قصة من سيدفع الثمن الجزء التاسع عشر في 9:33 م مرسلة بواسطة أحمد التكريتي

 صباح الگاردنيا حبايب ..

بارت مفاجئ لعيون السهرانين ولو قصير بس ماحبيت تنتضرون اكثر ..

//// البارت التاسع عشر ////

#من_سيدفع_الثمن ؟؟

#بقلم_الكاتبة_شمس

اتهمتنـي بالخيانـة .. رغم انك اول من اعلن اخلاصـي ..

اتهمتني بالكـذب .. وكنت  اول من اعلن صدقـي .. 

جرحتنـي .. قبل ان يشفى جرحي القديم منك ..

فأن كان كل ماعشتـه معك كذبا .. 

فأتركني بهدوء  دون ان تلوث ذكراك و ملامحك الجميلة بداخلـي !!

كنت احاول ابرر واحجي بس عصبيته وضربه منعوني من الكلام ..

ردت بس انقذ نفسي منه ..

احس نفسي انگطع ومااشوف بعيني بعد .. وخالتي تحاول تدافعلي بس كان غضب عذاب اقوى منها ..

كانت عيونه تنتقم من. منار بيه ..

وكأنه اجت الفرصه ليطلع قهرة الي متخبي بداخله كل هذي الفترة ..

كان يگول شفيت من الجرح السابق ..

بس الي اشوفة الجرح تجدد وظهر الوحش الي بداخلة ..

سحبني حيل وشمرني بالغرفه ..

وگال هذا سجنج منا ورايح ..

راح تسوني قاتل تالي عمري ..

ابقى حياتي كلها اجمع وسخجن وانضف وراجن ..

منا للصبح اذا ماگلتي منو نهايتج على ايدي ..

هالمرة حقي اخذة بيدي ..

جسمي تعب من الضرب وبعد مااگدر اگوم وحسيت بمغص موتني .. فزت شهد من العياط وتبجي مااگدر حتى اگوم الها ..

ياربي شسويت عندك حتى عقابي مايخلص هيج ..

حتى الشهرين الي عشت بيهن بسعادة .. ماتهنيت بيهم ..

خالتي تدگ بالباب وتگول ..

يمة فرح بيج شي .. گولي فهميني ..

ماحجيت شي وياها بس دموعي تجري . اذا اني نفسي مافاهمة الي يصير شلون اگدر احجي وافهمها ..

سمعت صوت تمارة تحجي وياها ..

- غير انتي تدافعين عنها .. طلعت بلاويها نفس اختها .

اصلا هي مو راحة صارلها فترة تتختل وتسولف ..

تخبلت من سمعت هيج .. زحفت زحف للباب وكسرتها 

تمارة خافي الله .. وج بحياتي مااحد سمع كلمة مني .. ليش تضلميني ..

گعدت ع حيلي وابجي ..

ااااه يابه الحگني .. اخذني وياك يابه مااريد اعيش ..

شهد ماتت بجي ..

وخالتي تتوسل بعذاب يفتح الباب ..

بالگوة اخذت المفتاح منه وفتحة ..

گلتلها .. خاله والله مسويت شي .. دخلت تمارة ونضرات الشماته بوجهها ..

گلتلها ماكو غيرج انتي يالحيه .. الله لينطيج اكيد هاي افعالج .. 

بعدني ماكملت .. 

عاط عذاب .. وج الج عين وتحجين .. فكري واحجي قبل مايطلع الصبح ولاتذبين الصوج بواحد ..

وفوگاها مأمن واتركج وحدج بالبيت ..

-عذاب معقوله انغشيت بيك .. يجي يوم وتندم على كلمة گلتها .. اصلا انت كلمة وحش قليله بحقك ..

انت ظالم والك يوم ياظالم ..

ضربني ضربة شهگت بيها قوي واحس روحي طلعت ..

عطت صوت لو زلازال كان هدم حيطان السجن الي عيشني بي ..

وگعت واحس رجلي خدرت .. وحرارة نزلت من رجلي ..

باوعت وابجي .. خاله الحگي خاله مااعرف شبيه ..

اباوع العذاب مصدوم وصافن .. وخالتي تلطم وتدعي ع عذاب ..

گومتني خالتي بالگوة للحمام ..

طاحت مني قطعه بيضه صغيرة وي الدم .. 

مااعرف شنو ..خالتي اول ماشافتها لطمت ع صدرها ..

وج يمة عذاب يتقربلج ..

مغص قوي وابجي .. هزيت راسي ..

گالت .. سود الله وجهة طاح الطفل ..

من سمعت هيج ضجت واتهسترت ..

معقوله .. كنت احمل بأحشائي قطعه مني وراحت ..

بألمي وقهري ..

عطت الله لينطيك يعذاب انت وتمارة الله ليوفقكم ..

راح طفلي بسببكم ..

بحياتي ماراح اسامحك ..

گعدت بالگاع وابجي ..

خالتي تهدي بيه وتگومني ..

گومي يمة مو زين عليج .. گومي اشطفي بي وبعدين اغسلي ..

مالي خلگ اگوم وحيلي مهدود ..

بالگوة سبحت وطلعت ..

احس كارهة الدنيا كلها. .

تمنيت الزمن يرجع وماعشت الي عشتة ..

خسرت عذاب وطفلي بيوم واحد ..

بعد شلي بهالدنيا ..

طلعت من الحمام للغرفه ..

حتى ماباوعت بوجههم ..

سمعت عذاب وزوج خالتي وخالتي يتعاركون مااعرف يحجون بالغرفه ..

ويلوم عذاب لان تزوجني من البدايه ..

احس نفسي خاليه من المشاعر .. بعد مااحس بضيق او حزن من يحجون عليه ..

تعبت واعرفهم مراح يصدگوني ابد ..

صارت مقابيلي تمارة واگفه بباب غرفة خالتي ..

گلتلها .. حسبي الله عليج .. 

اجت خالتي تركض اخذتني للغرفه ..

نمت ع السرير وغطتني ..

گالت راح اخذ شهد يمي نامي وارتاحي انتي ..

وباجر اخابر تماضر تاخذج للدكتورة ..

غمضت عيني وكأنه ماسمعت شي من كلامهم ..

اتمنيت الموت ..

لليل اخذتني الرجفه ..

جسمي بارد. 

اشوف بابا يواسيني ومنار واگفه بعيد وتضحك ..

گمت ابجي واعيط ..

ولزمني الهذيان ..

احجي بس مااعرف شنو احجي .

خالتي تسمي ع راسي وتقرأ ايات ..

فزيت .. شفتها بجيت . گلتلها خاله ابني راح ..

طفلي قتله ابوه قبل ليكير ويجي للدنيا ..

خالتي .. الله يهدي سركم اني ادري هذا منين طلع ..

فرح .. خاله السبب بأبنج عباله الناس كلها سوه .. ماگدرني يعرفني طول هالاشهر ..

يتصورني منار ..

صدگ كلشي وكذبني .

خالتي .. نامي يمة نايمي جسمج نار لاتبجين كافي ..

رجعت نمت والسخونه هدتني وماعندي حيل ادافع وانتقض واحجي ..

گعدت الصبح .. 

شفت تماضر يمي ..

باوعتلها هي گالت شلونج ..

-انتي مصدگتني تماضر ..

-مصدگتج بس مو وكت هالحجي .. انتي تعبانه ..

-كلكم ماتحسون بالي اني بي .. طفلي راح وزوجي يتهمني بالخيانه ..

لويش بعد مخليني هنا .. 

ليش مااخذني وشمرني ع اهلي وگلهك اخذوا بنتكم واغسلوا عارها ..

مو هيج گال .. مو جرح بابا وخلاه مايتحمل ومات ..

عذاب .. لاعبالج السواد عيونج اني مبقيج .. بس لان اعرف اخوانج حيوانات ويقتلوج اذا عرفوا ..

فرح .. وانت ماتفرق عنهم انت قتلت ابنك .. ماهامك اني لو اخ اني يقتلوني ..

انت تخاف تنفضح بين الناس ..

بس هالمرة اني الي ماابقى ..

صحيح كرهتهم من نطوني الك .. بس هسا مجبورين يتحملوني وياخذون حقي منك ..

عذاب .. والله ابن ابوه ويجي حدي .. وشوفي اذا مااكسر ظهرة ..

ماحجيت وياه .. شگد حبيته وحاولت وصبرت وياه . بس بعد ماكسرني هيج ودمرني .. 

لعنت الساعه الي دگ گلبي بأسمة ..

ولعنت اليوم الي قررت ابدي حياة جديدة وياه ..

خالتي گالت گومي خلي ناخذج للدكتورة ..

فرح .. مااريد خاله بس خابري امي اريد احجي وياه

خالتي .. يمة لاتكبريها يومين ونعرف السالفه شنو وتنحل بينا ..

فرح .. تحجين صدگ خاله لو يبقى اخر يوم بحياتي مااعيش وياه بعد خلص ..

الله ماقاسملي وياه اعيش ..

تماضر تحاول وياي وتريد تقنع بس اني قفلت ..

خابرت خالتي الامي ..

اول ماسمعت صوتها بجيت ..

ماما .. شبيج ياامي شكو زوج خالتج بي شي گولي ..

اخذت نفس وسولفتلها كلشي .  كنت اشهگ واحجي ..

تعصبت حيل وگالت .

اني احجي وي اخوتج وعمج .. شنو تايهة انتي .. 

اخذ حقه ثالث ومثلث وماكفاه .. دور دار عليج ويتهمج ..

احنه غلطنا قدرناه ونطيناه مرة .

سدت التلفون ومافهمت شراح تسوي ..

طول النهار نايمة ومخليه شهد بحظني ..

اجت تماضر . 

گالت انتضرت تهدأين واحجي وياج ..

سولفيلي شنو هالرقم ومنين ..

ابتسمت وگلتلها .. اذا تعرفيني صدگ .. اكيد تصدگين مااسويها .. بس اسألي اختج احسن .

مو من طبعي افضح واحد .. لكن متأكدة هي السبب والي صارله مدبرته هي ..

تماضر .. فرح اعرفج مقهورة .. بس تمارة شعدها وياج قابل .. صحيح هي السانها متبري منها بس مو مال تسوي هيج شي ..

خليتها تحجي وغطيت راسي بالبطانيه ..

مااريد ابرر واحجي اكثر تعبت واني ادور خاطر الكل ومحد يفكر بخاطري اذا انكسر.. 

حتى تماضر معذوره .. قابل تنطي بأختها ع حسابي ..

للعصر سمعت صوت ماما ..

گمت من مكاني ..

سلمت ودخلت ..

صاحت وين فرح ..

فتحت الباب تماضر ..

دخلت وراها ماما .. حضنتها وابجي ..

گالت يله ياامي حضري غراضج .. اخوانج بالباب ..

مو ماعندج اهل ويعاملج هيج ..

خالتي وتماضر يحاولن يقنعنها ماتاخذني ..

ويگللها ساعة شيطانيه ..

ماما .. لا مو ساعه شيطانيه . بس اعتبرها رخيصه لان احنه الي رخصناها من البدايه وخليناها تدفع ثمن ذنب مو ذنبها ..

بنتي مثل الوردة ذبلها وشوفي حالها ..

وتالي يضربها بهيج وحشيه ويتهمها بشرفها ويسقط طفلها ..

وهاي يمكن اشارة من الله حتى تخلص منه .. قبل ماتضيع شبابها وياه ..

تمارة مناك تعيط .. والله فوگ مابناتها ساقطات جايه تعد وتصف علينا ..

باوعت امي الخالتي وگالتلها .. بالاول ربوا بنتكم  ع الاقل بناتي مابيوم تجاوزن ع الاكبر منهن ..

لميت ملابس شهد وملابسي ..

شلتها ودانطلع دخل عذاب بالطارمة ..

هز راسه ..

خير وين ..

ماما .. اخذها وياي .. لهنا وكافي كلمن يروح الطريقه 

عذاب .. اي هاهي الله وياها .. بس شهد وين ماخذتها ..

فرح .. وياي قابل تريدني اتركها هنا ..

عذاب .. ناسية هي بنتي مو بنتج . يعني مو من حقج تاخذيها ..

فرح .. لاتگول مو بنتي .. اني الي ربيتها وكبرتها .. بوقت الي امها ميته وانت رفضتها وماردتها والكل كان نافرها ..

اني الي سهرت وتعبت مو انت ..

سحبها مني وگال .. روحي له هسا محد يمنعج ..

فرح .. عذاب لا .. لاتختبرني بيها .  اموت بلاها وهي هم ماتتحمل بلاي ..

عذاب .. تنسى بعدهي طفله وانتي هم انسي ..

فرح .. شأنسى ماتگلي .. ابني الي سقطته بعدة جرحة مانشف وهسا تاخذ بنتي ..

الله ينتقم منكم بليتوني ببلوة ممسويتها وظلمتوني ..

اني تسحب بيه واني ابجي واريد شهد ..

وهي مادة اثنين اديها وتصيح ماما ..

احس قطعه من روحي اخذها ..

خالتي تتوسل بي وهو مايقبل ..

اجو اخواني ورادوا يتعاركون وياه وگالوله من كانت منار غلطانه انطيناك حقك ثالث ومثلث .. بس بعد مااتهمت فرح ومن غير ماتثبت الحقيقه .. فألنا حق يمك وناخذة ان شاء الله ..

گالوا يله فرح گومي بيت ابوج موجود هو الخسران ..

گمت واجر بأذيال الخيبه ..

الي زامطت بي هو اول واحد باعنـي ..

وصلت للباب .. صاح فرح .. عبالي راح ينطيني شهد ..

التفتت .. گال .. انتي طالگ طالگ طالگ ..

عبالك ثلاث رصاصات بگلبي غرزهن ..

ماحسيت بعد بالدنيا شصار ..

كانت هذي اخر نضرة جمعتنا .. واخر كلام ..

نسينا الايام الجميله ونسينا الحب والحنان الذي غمرنا.  

ولم يتبقى بيننا غير الكره وماتحمله نضراتنا من الم وعتاب وحزن ..

#بقلمي_الكاتبة_شمس

يتبع .…

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad