قصة من سيدفع الثمن الجزء العشرون في 10:24 م مرسلة بواسطة أحمد التكريتي

 صباح الورد عليكم حبايب💕

//// بارت عشـرون  ////

#من_سيدفع_الثمن ؟؟

#بقلم_الكاتبة_شمس

كنتُ أريدك دهراً ليس بأيام ..

كانت أمنيتي فقط ان أصبح أمنيتك،أن أكون شخصاً ضرورياً لديك لكنني لم أكن ألا مجرد شيء تواجده جميل وغيابه لا شيء!!!

صحيت ع روحي .. بالسيارة وامي يمي ..

رجعت غمصت ماردت اصحى واتذكر الي صار ..

اسمع اخوتي يحجون .. 

بلال ..الا نذله ونبهذله مو صار رجال براسنه واجة رزلنا ورزل ابوي من ذيج خانته ..

وهسا اذا الا اردها الها واعرفة شلون يتمختر ويمشي بزودة ..

جلال .. بس اذا هي ماسوت منو الي طلع الرقم ومنين جابه ..

ماما .. ماكو غير وحدة منهم تكرها ووگعتها بهيج مصيبه وهي بمرضة عمها ملتهية والبيت ع راسها وشو يا حية اخذت موبايلها وسوت عملتها ..

بقيت افكر بكلام ماما كان منطقي . اني اصلا موبايلي مااعرفه وين من گد الشغل والتعب ..

بس مرات تخابرني هي .  ارد وارجعة بالغرفه اشمرة.. 

بس هي ماكو غيرهن تمارة لو عبير ..

وصلنا للبيت صحتني ماما ..

جلال كان عندة شك .. بس يكابر او لان شاف بلال مصدگني حاول يصدگ ..

دخلت تلگتني مروة حضنتني .. 

گالت لاتنقهرين هو الخسران ..

فرح .. وج اني مو عليه . ابحي وانقهر ع شهد اريدها ..

شلون بيها بالليل ماتنام اعرفها اذا ماتشمني ..

گالت ماما ادخلي نامي وارتاحي .. وكافي بجي . هسا راح يجون عمامج ويسون حل ..

باوعتلها .. شيسون يعني .. اكيد يعتذرون منه ويرجعوني ليش همة شسوو قبل ..

منو الي ظلمني غيركم انتو وياهم ..

منو الي حطم حياتي ..

حملتوني ذنب مو ذنبي ..

واكيد هسا انتو مصدگيه .. شمنتضرين يله . اقتلوني لو احبسوني ..

بلال .. كافي ولج لو اشك بيج جان دفنتج هناك .. بس اعرف انتي ماتسويها واذا عذاب كلامة صحيح ✔ خلي ينطينا اثبات ..

فرح .. اثبات شنو هو اني طالعه اعرف واحد حتى الجهاز مابي ارقام .. صديقاتي ميعرفوه بعد هذا منين عرفه ..

اكيد هذي مكيدة الي ..

بلال .. انتي شاكة بوحدة ..

مروة .. ماكو غيرها مروة الحيه تكرهنا ومتحبنا وحتى من رحنا اني وماما تهز ايدها وتسوي حركات ..

جلال .. بسيطة اذا طلعت هي الا اطلع خياسها كله هالمايعه .. 

ماما .. تأدب دير بالك تلعب بعرض الناس عندك عرض وتتحاسب عليه باجر ..

وبعدين هي مو غريبه بنت خالتك ..

مروة .. وهمة ليش ماگالوا هيج من بهذلونا .. وطلعونا ساقطات ..

ماما .. اسكتي انتي .. نسيتي اختج شسوت هي الي ماخلتنا نرد ونحجي وندافع عنج ..

لان الي سوته مو قليل ..

وكافي حجي بهالموضوع الى ان يجون عمامكم ..

دخلت للغرفه نمت ..

احس النوم السبيل الوحيد للنسيان ..

شويه واجت مروة ..

گالت عمامي اجو يردوج ..

تنهدت وگمت .. ااااه ع الايام الي رجعتني لهنا كنت حالفه ماادخل البيت وماعندي لااهل ولاعمام ..

بس الوكت رجع وذبني الهم .. والعازتهم ..

دخلت سلمت وگعدت ..

عمي گال .. شنو السالفه فهمينا ..

فرح .. ليش اني الي فاهمة .. اهلي كانوا عدنا نضفت وكملت وعذاب راح للغرفه هو وشهد ..

شويه واجاني يعيط وضربني وسحلني من شعري من غير مااعرف شنو السالفه ..

عساس واحد متصل ع جهازي وگايل اسمي مااعرف شنو ..

محمد ابن عمي .. ومنين هذا تعرفيه ..

ابتسمت بأستهزاء .. ليش شگالولك النهار كله احجي وي الولد واعرفه ..

اشو من اخذوني لسا ماطلعت مني العيبه ..

هز ايدة وكأنه يستهزأ بكلامي ..

باوعتله وعيني بعينه .. ترى اني بنت عمك وعرضك واذا شكيت بيه معناه شكيت بنفسك ..

ومااسمحلك تعاملني هيج مو منار اني ..

محمد .. احترمي نفسج ولج .. طينتن شرفنا وماتردينا نشك ..

فرح .. احترم نفسك انت .. وبعدين عمامي موجودين انت منو وتحجي وتتدخل ..

راد يگوم يضربني .. عاط بي عمي . 

محمد اگعد ولاتتدخل وخلينا نحل السالفه ..

باوعت الاخواني گاعدين ولاعبالك راد يضرب اختهم ..

طبعا لان محمد اخو رنا .. واخو هبة الي جلال مخلي عينه عليها .. عرفت ساعتها لازم اصير قويه واخذ حقي بيدي .. لا يصير بية مثل منار اذا شافوا ضعفي ورضوخي ..

گمت وگتله عمي ماكو سالفه تنحل .. واحد طعن بشرفي من غير مايتأكد .. 

بدل ماتحققون وياي رحوا واجهوا واخذولي حقي ..

وخاف عندكم نية ارجع .. 

ماارجع ..

كافي الاشهر الي خلصتها هناك ومستقبلي الي ضاع ..

دفعت الثمن غالي ..

ولهنا وبس ..

عمي گال بسيطة .. اني اخابر عليه ونشوف حل بس هيج ماتحصلين حقوق منه .. لان حتى محكمة ماعاقدين 

فرح .. كلشي مااريد منه بس شهد اني الي ربيتها وتعبت عليها ومو من حقه يبعدها عني ..

عمو .. بس هاي بنتهم مانگدر نگله انطيها النا وخاصه امها ميته ..

فرح .. اني امها من ذبها هو هنا اني الي ربيتها محد بيكم اهتم بيها بس اني كلكم عاقبتوها بغلطة امها الا اني سهرت الليالي وتعبت عليها ..

اني احق بيها .. وادگ ع صدري ..

گاعدين نسولف اني وماما . 

اجة بلال يركض ..

-هذا الحجي صدگ ..

-شنو؟

-تمارة عدها علاقات ومن كشفتيها تهمتج ..

بقيت صافنه هذا شمدريه… 

باوعت الرنا وراه واگفه وتتصفن ..

گلتلها كنتي تتنصتين علينا ..

-ها بالصدفه سمعتج من تحجين وي خالتج وبعدين همة اشكال طلعوا علينا حجي وبنتهم ماشاء الله ..

بلال ركض الغرفتة ونزل سلاحة بيدة .. اني اعلمة قليل الشرف يطعن بأختي وهو اخته زباله ..

ركضنا وراه اني وماما ورنا ونسحب بي وماكو ..

جلال كان برة ..

گال شكو ..

بلال .. ولك عذاب الناقص اخته ورى السالفه وهي الي مخليه صاحبها يخابر على موبايل فرح ..

ردنا حاولنا ماكو دور ردنا نوگف واحد صاروا اثنين .

طلعوا وماما تعيط وراهم ..

ركضت خابرت ع خالتي طلعت تماضر .. 

گلتلها عذاب وين ..

گالت ماهو طالع ..

گلتلها حاولي اتأخريه لايجي اخواني اجو وناوين الشر ..

تماضر .. ليش شكو ..

فرح .. سولفت الخالتي ع تمارة ورنا سمعت وراحت گالتلهم ..

تماضر .. شكو شبيها امي شگلتيلها وتخربطت ..

فرح .. اني السبب لو من البدايه گايلتلج لو گايله الخالتي كان ماصار الي صار ..

تماضر .. شكو فهميني ..

فرح .. اني شاكة بتمارة وگتلج بس ماصدگتيني ..

تماضر .. معقوله شنو الي بينجن ..

فرح .. خلي خالتي لو هي تسولفلج هاي اذا مانكرت .. وهسا روحي شوفي عذاب ولاتفتحين الباب اذا اجو اخواني ..

بقينا منتضرين وادعي ربي مايصير شي .. وامي تلوم برنا وتعاركت رنا ومروة لان عاطت بأمي ..

ورنا اتصلت ع ابوها وگالتله ..

والسالفه كبرت ..

اجة عمو يعيط عليه لان سكتت وماحجيت ..

بالي يم عذاب واخواني لا يتكاتلون وذولي يلومون بيه ..

اتصلت تماضر تعيط ..

وج اجو اخوتج وكسروا الباب وصار رمي بالشارع ..

لطمت ع صدري ..

ركضت العمي گتله ..

گال هسا اخابرهم تركنا وطلع وهو يتصل ..

امي تلطم وتگول عذاب شراني ومايسكت وهسا يسجنهم لو يكتلهم ..

بقيت الوم نفسي لأن حجيت .. 

بس الى متى ابقى ساكته وصابرة ..

الى متى يظلموني واتغاضى .. تعبت واني اصبر واگول بلكي باجر ارتاح ..

خابرت الخالتي من جهاز ماما .. گلبي نار عليهم ..

گالت اجة عذاب وصارت مشكله شكبرها وراح يتاكتلون واخوانج بوسط الشارع يگلوله ربي اختك السا…  هي السلطت صاحبها على فرح ..

وعذاب مااتحمل وضربهم ..

اووووف ياالهي شسويت اني يارب بردا وسلاما ..

لليل اتصل عمو وگال عذاب اشتكى عليهم واخذوهم للمركز .. وشغلتهم صعبه لان عندهم سلاح وضاربين بي وعندة شهود ..

امي وگعت ورنا تبجي وتدعي عليه عبالك اني الي رحت وگلت البلال  .. 

فرح .. كافي تلومين بيه ماجبرت احد يدافعلي ولاتنسين لو ماانتي تتنصتين كان ماصار الي صار ..

تماضر خابرت ع جهاز ماما  ..

الو ..

وج فرح البيت انگلب .. وامي تخربطت .. 

وعذاب اخذ تمارة وصعد للغرفه وقفل الباب مانعرف شكو ..

فرح .. روحي وراه خاف يسويلها شي .. 

تماضر .. ماقبل واحد يصعد .. خاف بابا يسمع .. اوووف فرح لو گايله من البدايه كان ماصار هيج ..

فرح .. اذا خفت عليها اطلع غلطانه ..

تماضر .. روحي هسا بعدين اخابرج عذاب يعيط خلي اروح اشوف ..

بقيت ع نار .. مرت ساعة خابرت تماضر ..

گالت عذاب ضرب تمارة نكرت وتگول مالي علاقة بس مااعرف شگالتله وطلع معصب واخذ موبايلها وقفل الغرفه عليها وطلع ..

سألتها ع شهد گالت بس تبجي وامي مخليتها بحضنها .

گلتلها خليني اسمع صوتها ..

سمعتها تبحي .. بقيت اسولف وياه واحجي سكتت تعرف صوتي يروحي ..

اتصلت فيديو .. شافتني لزمت الشاشه بإيدها وتگول ماما ..

اني ابجي وهي تبجي .. تالي مااتحملت وسديته ..

كنت اذا بجت شويه اتخبل ومااتحمل ..

هسا شلون بينا ..

لاعذاب راح ينطيها الي ..

ولااگدر اتنازل وارجع واضيع كرامتي وسمعتي الي اتهموني بيها ..

اندگت الباب حيل ..

استغربنا .. الولد ماهمة بالمركز وبس بنات بالبيت .

راحت رنا ومروة ..

اجت مروة گالت هذا صوت عذاب ويگول صيحي فرح بسرعه ..

گمت ردت اطلع لزمتني گالت خلي يولي لاترحين خاف يسويلج شي ..

فرح .. كافي لازم اخلي احد خلي اعرف شيريد ..

طلعت وحجيت من ورى الباب .. 

عذاب شرايد بعد روح الخاطر الله 

لاتكفريني وافتحي الباب اريد افتهم لاتخبليني احس روحي صدگ مغفل بسببجن ..

فتحت اله .. مشكلتك اذا ماعندك ثقه بالناس ..

عذاب .. ليش تبليتي ع تمارة ..

فرح .. يعني صدگت بيها وماتصدگ بيه .. 

عذاب .. موتتها ضرب لو عدها شي جان گالت وموبايلها عندي فتشته كلشي مابي ..

ابتسمت .. هاهي اذا اني استاهل الي صارلي وحقك ماتصدگ بيه .. لان اني غبيه .. حافظت ع بيتك ومافضحت اختك تالي خذي جزاتي ..

وهسا روح واطلع من حياتي كافي .. 

ولاتصدگ اتنازل عن حقي وشهد ..

عذاب .. مثل مااتنازلتي عني اتنازلي عنها ..

فرح .. انت الي تنازلت مو اني حرام عليك تموتها هيج ..ماتگدر بلاي هسا خابرتني تماضر ميته بجي ..

عذاب .. ماجاي اخذ وانطي وياج بالحجي .. شغله وحدة اريد اعرفها .. صدگ كانت عندج علاقة بمعتز قبل مانتزوج ..

فتحت عيوني .. انت صدگ مريض .. اكيد تمارة سممت عقلك لان مريضه مثلك ..

عصر ايدي حيل .. 

گالج ردي ولاتتجاوزين ..

-وخر عني راح اجاوبك مو لان خايفه منك لو اريد ابرر الك .. بس لان اشمأزيت منك وبعد هاللحظة انساني ولااريد اشوفك ولااسمع صوتك ..

-احجي گتلج .. 

-معتز ماانكر كان يلمحلي من كانت منار عايشة ونجيكم بس مابيوم صرح بشي ولاعاملني بقلة ادب ..

صح ضاج وانقهر لان تزوجنا وعاتبني بس هم ماصرح ولاگال كنت احبج بس عيونه فضحته ..

عاملته مثل اخوي وهو هم ..

وشگد تمارة لفقت علينا ورادت تشوه سمعتي بس بالنتيجة اختار الهجرة وراح منا علمود مايخسرك ولايخسر اهلة ..

ولهنا وكافي واطلع يله ومااسمحلك تجي ..

طلع وسديت الباب وراه ..

گعدت ع الگاع وابجي ..

اجت رنا ومروة گومني ..

رنا .. گومي مو زين عليج وانتي تعتبرين نفسة .. واذا تحبيه هيج ليش ماتنازلتي شويه وبررتي ورجعتوا ..

فرح .. الخاطر الله كافي ماناقصتج خلوني وحدي ..

رحت للغرفة وتغطيت ونمت ..

اوووف يشهد وينج يروحي اشتاقيت الريحتج يروح امج ..

وج يگولون انتي مو امها ..

شلون واني الي سهرت وربيت وتعبت ..

نمت ودموعي ع خدي ..

اااه يفرح شوكت تخلص دموعج وترتاحين ..

ثاني يوم ..

اجة عمو واخواني مطلعيهم ..

ودازين ع عمام عذاب ..

ومسولفيله السالفه ..

عمهم ابو باهل رجال حقاني ويخاف الله ..

ماخذ عبير البيت عذاب  ..وضاغط،عليها 

ومعترفة ع تمارة ..

بعدها تمارة گالت عبير صاحبة الفكرة ..

وباقيات وحدة تتهم الثانية الى ان انكشفت كل الاعيبهن 

وحسب ماسمعت من تماضر .. 

عذاب جايب صوندة من الحديقة ..

وضاربهن وساحبين تلفونهن ..

وماخذهن الصاحبة ..

وببرنامج گدر يطلع كل المحذوف ..

وشايف بلاويهن ..

وماخذ عنوان الولد ولازميه ومشبعه ضرب ومعترف ع تمارة وماخذ جهازة ولاگي حتى صور التمارة بموبايلة متخبل ..

من راجع .. 

صاح تمارة .. هي قافله الغرفة عليها وتبجي ..

حامي صيخ وصاعدلها دافر الباب ..

ومطبع اديها تطبع بالصيخ ومعاقبها وحابسها. .

كل هذا بفترة اسبوعين ..

واني عايشة بعالم ثاني من حزني ومرضي ..

لان انتكست حالتي والسخونه مافارگتني ..

وطلع عندي التهاب لان ماراجعت وهملت نفسي ..

بعد ماعرف عذاب الحقيقه ..

جاب عمامة واجانه ..

اعتذر من اخواني وتنازل عنهم ..

وطالب يراضيني ويرجعني ..

كان ردي بعد مااجة عمي ..

-عمو خلي ينسى بيوم كنت بحياته .. ماابقى اعاني طول عمري من شكة ..

عمو .. بويه رجلج اعتذر وطلاگج يعتبر باطل شيطان ودخل بينكم وهسا اجة يراضيج الخاطر الطفله ارجعي ..

فرح .. مستحيل ارجع .. واذا متندم صدگ مايحرمني من شهد ولايحرمها مني ..

كان صوتي كافي حتى الكل يسمع حرگة گلبي واني احجي ..

عذاب .. هذا هو عمي الي تريدة يصير وشوكت متريد الطلاگ اني حاظر .. وشهد شوكت متريدها تجيها مااگدر انطي بنتي احد يربيها واني بعدني عايش ..

طلع وكانت كلماته اشبه بالخنجر من يحفر بالگلب ..

حتى مااتنازل ولو هذا طبعة مغرور واناني بس حبي اله هو الي عماني وخلاني اشوفة غير شكل ..

بعدها قررت اوگف ع رجلي ومااضعف مااخلي يحس بضعفي بعدة ..

حجيت وي ماما وگلتلها اريد ارجع للجامعه ..

ورجعوا مروة .. حرام كافي الي صار بينا بسبب شي مالنا ذنب بي ..

ماما حجت وي اخواني رفضوا بالبدايه ..

بس من شافوا ماما ضغطت عليهم وگالتلهم لعد انطوهن راتب ابوهن يصرفن منه ويضمنن مستقبلهن ..

تراجعوا ..

وكانت ماما هالمرة واگفة ويانا وحست بظلمها النا وتصرفها بلاوعي بعد وفاة بابا متندمة عليه ..

وتحاول تصحح الي صار ..

فرحتي لاتوصف لان حرجع اداوم ..

قهري الوحيد فراگ شهد وگلبي الي متعبني وتفكيرة بعذاب.. 

بس لازم اصير اقوى من گلبي ومااخليه يتحكم بيه ..

خابرت صديقاتي وفرحوا .. بس ضاجوا لان سمعوا افترقت عن عذاب ..

زهراء گالت باجر اجيج بس سهير تعذرت لان محافظات ..

من اجت زهراء .. وشافت حالتي وشلون مريضه وتعبانه 

گالت احسن حل تشتغلين وتغيرين جو ..

فرح .. وين اشتغل ومنو يشغلني ..واني حتى جامعه ممكمله ..

زهراء .. اشتغلي بعقد بالجامعه المكتبه العامة الي بالجامعه محتاجين موضفين سمعت واني اخلي بابا يتوسطلج ..

فرح .. بس شلون خاف اخواني ميقبلون ..

زهراء .. الى متى تبقين خايفه مو كافي الي صارلج ..

اتعلمي تعتمدين ع نفسج .. وكملي دراستج وباوعي المستقبلج ..

فرح .. وج هو ماكاسر گلبي غير شهد .. مايهمني لاعذاب ولاغيرة بس هي ..

زهراء .. وداعتج يجيبوها الج منو يتحملها وهي متعلقه بيج اول وتالي يجيبوها الج ..

فرح .. لتخافين عليه عذاب لو يعرف يتزوج اربعه يربن بنته ولا يفكر ينطيها الي .. انتي متعرفيه ..

زهراء .. واني شفتج فرحانه ومرتاحة گلت واخيرا ارتاحيتي معقوله كل هذا كذب ..

فرح .. لان اني كنت اسعى السعادتي وياه ..اووووه زهراء سدي الموضوع رجاءً..

زهراء .. خلص لاتهتمين ولاتضوجين والله هو الخسران وباجر عگبة يرجع يركض وراج ..

فرح .. هههههه تحلمين اكيد .. 

زهراء .. دگومي خلي نحجي وي خالتي هي تگدر تقنع اخوانج .. حتى تنطيني خبر واحجي وي بابا ..

رحنا اني وزهراء وحجينا وي ماما .. ماقبلت وترددت بس بعدين وافقت من گلتلها اريد اعتمد ع نفسي وادرس ولان شافتني مقهورة كل ذيج الفترة ..

اقتنعت وگالت اني احجي وياهم .

لليل فتحت ماما الموضوع . 

جلال ماقبل وگال .. تعتبر مطلگة شتگول العالم علينا .

ماما .. العالم شعليها قابل مسويه غلط هو شغلها بالجامعه والداوم راح يبدي ..

ع الاقل دوامها ودراستها بنفس المكان ..

بعد جدل دام لأيام وافقوا بس بس بشرط بلال يوصلني ويجيبني ومااختلط بأحد واهتم بشغلي وبس ..

كنت فرحانه فعلا لان راح اداوم ..

طلعت ملابس وحرت شنو البس واروح اقدم .. زهراء تنتضرني بالجامعه وابوها موصي عليه ..

رحت للجامعه وكأنه اول مرة اشوفها ..

امشي واتنفس الهوا الي انحرمت منه ..

ضحيت واتحملت السجن والحزن والالم ..

حتى ارضي گلبي وحبي ..

ونسيت نفسي وحقها عليه ..

نسيت حياتي ومستقبلي الي انحرمت منهم ..

دموعي نزلن من الفرح ..

مسحتهن .. لا فرح خلص الحزن لاتبجين بعد لان محد يستاهل دموعج ..

عيشي النفسج وبنتج وبس ..

كلي امل نرجع اني وياها واربيها واكبرها واصرف عليها 

وهيج بديت اول خطوة بحياتي الجديدة ..

#بقلمي_الكاتبة_شمس

يتبع ..

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad