من سيدفع الثمن الجزء التاسع في 10:12 م مرسلة بواسطة أحمد التكريتي

 

صباح العسل عليكم حبايب 😚

//// البارت التاسـع ////

#من_سيدفع_الثمن ؟؟

#بقلم_الكاتبة_شمس

تنازلت وبعتني ليش وشلون

كلبك مــنكســـر لمن بعتني ؟!

شلت سنين حزنك بين العيون

وانت بكم شهر ماشلت حزني !

صبرت اني وكلت دمعاتي تهون

ومن جيتك لكيتك فارگتني

شيفيد الدمع لو زخته اعيون

وانته بعينك الصلفه تركتني

لتكول الزمن غدار ويخون

زمانك ماغدر وانته غدرتني

لجلك حاربت كل اهلي والكون

كلت ماريد غيرك يل عفتني

حبيتك صدك حب طفل مجنون

و انطيتك حياتي وموتــــتــني

اشكرك علمتني الحب والضنون

ودروس هواي نطتني 💔💔

عذاب .. الخيانة مو فقط جسدية .. مجرد مايفكر الانسان بشخص اخر غير زوجة واو حبيبه تعتبر خيانه ..

وخاصه اذا كنت تحب بجنون وتكتشف انه خانك .. كان بودي اقتل حبي بيدي وادفن گلبي وياه ..

لكن ماگدرت .. 

بمرور الوقت تحول الحب الى لعنة وصرت اكره كلشي يذكرني بيها ..

حتى اختها وبنتي الي تشبهها .. احسهم لعنة بحياتي ..

من ماتت ونقدت روحها مني.. 

عبالها راح ترتاح  .. مستحيل اخلي روحها الي غدرت بيه ترتاح وگلبي جمر وروحي لسا تفرفح بسببها ..

شمرت ملابسها وغرفتها وكلشي يخصها بس ماگدرت انساها وانسى افعالها .. 

امثل القوة بس داخلي يغلي ..

وخاصة من اشوف اختها تحوم گدامي ..

وعبالك هي الي تمشي .. ومرات اتخيلها هي وودي اخنگها بيدي ..

بس العن الشيطان واتراجع ..

تركت اسرار هواي وراها .. بس سرعان مااكشفها وانقذ روحي من حبها الملعون ..

باوعت للساعة راح يصير الفجر واني افكر بالراحت وتركت رمادها يعذبني وبأختها الغامضه الي مااعرف شلون ناوية تخرب حياتي وتشتتنا ..

گمت من مكاني حسيت عليها غمضت ..

كأنه تراقبني ..

اتقربت الشهد .. 

اباوع نايمة مثل الملاك .. 

غمصت وتنهدت وطلعت ..

غسلت وتوضيت ..

گعدت صليت عسا وان ارتاح شويه ..

كملت الجو بارد الفجر .

سويت كوب گهوة ..

وطلعت برة اشربه ..

رغم برودة الجو الا ان حرارة گلبي صهرت جسمي وماحس بالبرد ..

سمعت حركة بالمطبخ ..

شفت عمتي مدت راسها ..

-هذا منو تارك الباب مو الجو بارد ..

شفتني اني دنگت ..

-يا عذيب .. شعندك هنا عمة…  الجو بارد وعايف مريتك دگوم تدفى بحضنها ..

-شبعت نوم وگمت صليت وجاي اشرب گهوة بعد شويه التحق ..

مااگدر ارجع انام ..

-اي عمة بس الجو بارد .. اروح اگعد مريتك خاف تحتاج شي ..

ذكرت فرح نايمة بالگاع ..

گمزت من مكاني .. لاعمة تعاي خليها تنام خطيه شهد ماتركتها تنام ابد ..

-اي خطية .. تحملت حمل اكبر منها .. بس هي مبينه فقيرة مو . مو تزعل اختها اللسان ..

ردت اغير الموضوع .. تعاي عمة خلينا ندخل باردة عليج 

دخلنا للمطبخ ..

-خليني اتوضأ واصلي واجي اسويلك ريوگ لاتطلع على لحم بطنك ..

ضحكت .. عمة لهجتج صايرة مثل اهل الناصرية .. 

عمتي .. اي عمة ماسامع من عاشر قوم اربعين يوما صار مثلهم .. مو دور عشرة ثلاثين سنة ..

عذاب .. صدگ سوداج لهناك ..

سعاد .. الحب يعمة ..

ضحكت .. لاصدگ عمة معقوله ..

سعاد .. جا شنو يعذيب بس انت تعرف الحب . بس قبل حبنا مو مثل هسا ..

والله حبيته بگلبي وماحجيت بس عيونه تسولف ..

كملت المعهد . من غير مايحاجيني اجة خطبني ..

واهلي رفضوا وماقبلوا ..

بس من سألوني وشافوني موافقه واني الوحيدة عندهم مارادوا يكسرون بيه ووافقوا ..

بس ابوك ..

اخ ياابوك .. هو الي وگف مثل الشوكة وراد يخربها بس القسمة تسكت حلوگ ..

بس ابوي گال موافق هو سكت ..

عذاب .. لاعمة تعلميني بأبوي طبعة الرفض والمعارضة اسأليني الي .. بس المهم تزوجتوا ..

سعاد .. الحمد لله .. 

يله عمة اني اخرتك .. گوم بدل على ما اصلي ..

فرح .. بعد ماعاط بيه وراد يضربني .. اخذت شهد تحميني وفدوة نامت ع صدري وفعلا نقذتني من عذاب ..

الي حسيت بي راد اقل خطأ حتى يعاقبني ..

وكأنه اني الي عذبته مو منار ..

نمت بس من خوفي گمت اتخيل اشياء .. ساعة اگول خاف يكتلني واني نايمة ..

بقيت مراقبته ..

وهو مبين مانام ابد لان بس يتنهد ومختنگ ع ساعة ينفجر تالي وي الاذان گام اني بسرعة غمضت ..

ومن گد مانعسانه غفيت ..

اول ماغفيت شفت منار بهيئة مو حلوة وتركض وراي ..

واني اركض وابجي واگلها تركيني وهي تگلي ..

رجعيلي حياتي .. 

رجعيلي .. واني ابجي واركض ..

فزيت ع صوت عذاب يصحيني ..

-شبيج تعيطين ..

-اباوعله مستغربه وكأنه اول مرة اشوفه ..

اريد احجي احس شي خانگني ..

عذاب .. گومي غسلي وارتاحي .. ها دوم هيج يصير بيج

فرح .. مو دائما مرات ..

طلعت من الغرفه وخليته يبدل عندة دوام ..

شفت عمته تسوي جاي وريوگ ..

فرح .. صباح الخير ..

سعاد .. صباح النور .. خطيه عذاب ماهون بيج يگعدج تسويله استكان جاي .. يگول خطيه سهرانه وي الطفله 

استغربت .. داتحجي عن عذاب لو غيرة ..

فرح .. روحي عمة نامي اني اكمل الباقي ..

سعاد .. هو كامل بس صبيله ..

راحت واني غسلت وبقيت گاعده بالمطبخ ..

طلع لابس عسكري .. وشكله حلو اول مرة اشوفه بهيج هيئة ويمكن مامنتبهة عليه ..

هو ديعدل بالنطاق مالته .. رفع راسة .. نصيت بسرعة وگمت اريد اصيله جاي ..

#بقلمي_الكاتبة_شمس

_________________________________

گال روحي انتي نامي اني اصب ..

رجعت القوري المكانة ..

گال اني رايح كم يوم وارجع ..

خليت فلوس عندي امي اي شي تحتاجوه خبريها ..

وها اياج تسوين شي من وراي واعتقد فهمتي قصدي ..

فرح .. لاتخاف بحياتي ماغلطت مو لأجل احد بس الاجل نفسي وتربيتي ..

عذاب .. دكافي محاظرة وروحي دخلي لاتبقين تفترين ..

ضجت منه حيل ..

كلما احاول الگي عذر التصرفاته يخليني اكرهة اكثر ..

رجعت للغرفه شفت شهد نايمة وتدور منا ومنا ع الممة جوعانة ..

سوتيلها ممة ورضعتها ..

تذكرت منار وشكلها ..

ليش هيج اجتني وتركض وراي شتريد مني ..

اشو حتى بصلاتي ومن اقرأ قرأن اذكرها وادعيلها ..

ليش دايما تجيني بأحلامي ..

گعدت الصبح ..لگيت خالتي وعمة سعاد مبدلات يردن يرحن الاهلي ..

اتمنيت اگلهم اخذوني وياكم مشتاقة الريحة بيتنا ..

وگعداتنا وبابا ومزحاتة وضحكاته ..

وتصنيف اخواني علينا ..

لو اكلات ماما وسوالفها ويانا تالي الليل ..

خنگتني العبرة ودخلت مااتحملت احد يشوفني هيج ..

بعد مارجعن من اهلي ..

سألت خالتي ع ماما .. گالت زينة لاتخافين وسألت عليج ومحضرة كليجة الج هاي دزته ..

اخذت الكليجة اشم بيها مو جوع وانما اريد اشم ريحتها بيها ..

گمت اكل بشراهة وهمتهم تضحك عليه تگول..

يمة ماضايگة كليجة لو لان من ريحة اهلج ..

حسيت ع نفسي واستحيت ..

بعد الغدا گامت عمتهم تجهز بغراضها تريد تروح .

عمو ابو عذاب ماقبل وگالها ابقي كم يوم ..

ماقبلت وگالت ..

الاولاد مناك معتمدين عليه ان شاء الله ع عطلة نصف السنة اجيب البنات واجي ..

اخذها معتز يوصلها ..

من رادت تطلع خلت بإيدي خمسة وعشرون الف وراحت ماقبلت اخذها بس هي اصرت وگالت اعتبريها هديه عرسج ..

فرح .. غير اشترتيلي هدية كافي ..

سعاد .. هذيج صوغة من الامام معليج بيها ..

بوستني ورادت تطلع ..

التفتت وگالت العمو وخالتي ..

هاي البنيه مبينة جوهرة خلو بالكم عليها ..

خالتي ضحكت وفرحت ..

بس زوج خالتي ماعجبه الوضع وضاج ..

گالتله .. احسن من ذيج بنتك الي ماكلفت تنزل تسلم على عمتها ..ليل ونهار بغرفتها ..

ابو عذاب .. غير سادس وتدرس فوگ لان هدوء ..

سعاد .. لاوالله ابد ماتعجبني بنتك وتعرفني ماعندي مجامله واعرف البنية من مشيتها ..

مو ذيج اختها شحلاتها ..

ابو عذاب .. يلة معتز بسرعة وصل عمتك خطية لاتتاخر ..

سعاد .. اي عبن ماعجبك كلامي گمت تزيح بيه .. رايحة خويه رايحة ..

طلعوا ومعتز كان يحاول يلمح او يحجي شي بس مانطيته مجال ماناقصني مشاكل ..

احاول ابتعد عنه مو خوف لان اني عندي ثقة بنفسي بس المقابل ماعندة ثقه والي سوته اختي خلتني اسكت ومااگدر ادافع عن نفسي ..

بقيت كم يوم متجنبة معتز ومن يريد يحجي وياي اطلع حجة واتهرب ..

-دايما يسألني اذا عذاب يأذيني او لا ..

فرح .. معتز الخاطر الله اتركني ولتدافع عني .. عذاب يشك بنفسة مو بس بيه ..

لهذا ماناقصني مشاكل ..

كانت تمارة تتنصت علينا اعتقد ..

راحت خبرت ابوها ..

واني كنت امسح بالمطبخ وخالتي تطبخ ..

اجتني دفرة بظهري ..

اريد اخذ نفس مااگدر ..

احس كلياتي وگفن ..

نفس المكان الي ضربني بي بلال من دافعت المنار ..

بس هالمرة اتأذيت اكثر ..

لزمتها بإيدي وشهگت ..

خالتي گامت تعيط .

-ليش هيج حرام عليك شمسويه البنية .

-اسأليها شمسوية .. وين ميروح معتز وراه .. وتتشكى اله حتى تغويه وتكسب تعاطفه ..

اختها وي الغريب وصخمت وجهنا .. 

وهسا اجت هي تخرب بيتي وتخلي ولدي يتقاتلون ..

سمع معتز اجة يركض ..

-شنو هالحجي يابه مامقبوله منك .. فرح مو هيج . واصلا هي الي ماتقبل احجي وياها وتتجنبني ..

ابو عذاب .. لاتدافعلها .. خلي تولي من بيتي مااريدها 

ام عذاب .. كافي والله اذا طلعت اني اطلع وياها ..

حجيت ع منار وغلطت وسبيت حتى اهلي وسكتت لان بنت اختي غلطت ومانطتني حجة ادافع بيها عليها ..

بس فرح لا .. متشوفها البنيه گاعدة بين اربع حيطان .

ضاع مستقبلها وحياتها وداتخدم بيكم وببنت عذاب ..

ومايوم شكت او حجت ..

اعرفك تريد تجيب بنت اخوك المايعه .. بس لو يبقى اخر يوم بحياتي ماادخلها بيتي ..

هم يتعاركون ويحجون واني الالم موتني ..

لدرجة صار عندي غثيان ..

اريد اگوم مااگدر ..

سندت نفسي ع الطاوله ووگعت من الالم وصرخت ..

اجت خالتي ومعتز ساعدوني ..

خالتي .. شبيج يمة ..

فرح .. خاله كلياتي بعد مااتحمل الحگيني ..

خالتي .. سودة عليه يمة .. گوم معتز بسرعة شغل السيارة خلي ناخذها .. 

ابو عذاب .. گامت تتماوع كلشي مابيها ..

فرح .. حرام عليك شمسويه الك .. لو بنتك تقبل احد هيج يضربها ..

ابو عذاب .. تخسين اذا تجيبين بناتي الجن گ…

معتز .. يابة كاااافي .

خالتي .. گومي يمه عمج مايفيد بي الحجي . الي يحبه يحبه والي يكرها يعاديه ..

فرح .. لا خاله مااروح هسا بس ارتاح يروح الالم ..

دخلوني للغرفه .. گالت خالتي نامي وراح اخذ شهد يمي حتى ماتزعجج ..

لفيت نفسي بالبطانية وابجي .. من الالم وحرگة گلبي .

ااااه يمة وينج .. محتاجة الحضنج الحرمتيني منه ..

هم گلبج يحس من ابجي لو اتأذة ..

هم تفكرين بيه وشلون عايشة وشيسون الي ..

#بقلمي_الكاتبة_شمس

_______________________________

بقيت اون الى ان هدات وغفيت ..

گعدت العصر ..

الم قليل بس احسن من الصبح ..

سألتني خالتي گلتلها زينه بس مشتاقة الامي اريد اشوفها ..

گالت اخذج ونروح ..

فرح .. لاخالة مااگدر من جهة عذاب يعصب .. ومن جهة حلفي ماادخل ذاك البيت بعد ..

خالتي .. لعد هسا ادز معتز يجيبها هي ومروة تشوفيهم فرح .. صدگ خاله راح تجيبوهم .. بس شلون مو ماما حادة.. 

خالتي .. واذا ياامي .. هو معتز يجيبها وعمج ماهو لليل يرجع ..

من سمعت راح تجي ماما فرحت ..

دخلت بدلت وبدلت الشهودة .. ماما مشايفتها من هي صغيرة وماتقربتلها ..

گمت خلطت كيكة بسرعة وخليتها بالفرن ..

بقيت مگابله باب المطبخ وگاعدة ..

منتضرة شوكت يدخلون ..

من انفتحت الباب ..

ودخلت مروة بالاول ..

فتحتها وركضت .. اول مرة افرح هيج فرحة بعد الي صار حضنت مروة وابجي وهي تبجي ..

وتضرب ع ظهري وتگلي .. ليش تركتني ليش بقيت وحدي بالضيم ..

( وعبالها اني هنا مرتاحة )

ماما رفعت العباية عن وجهها .

دموعها نازله .. ومنتضرة ردة فعل مني ..

فتحت دياتي الها وحضنتها قوي ..

اخذت اديها وبوستهم ..

سامحيني ماما .. مشتاقتلج هواي ..

معتز .. كافي بجيتوني . ادخلوا جوة وكملوا ..

حضنت ماما من ايدها ودخلنا ..

استقبلتها خالتي ودخلنا للصاله ..

رجعت فتحت ايدها ..

گعدت يمها وخليت راسي ع كتفها .. ردت احس بالامان 

اريد ارجع مثل قبل صغيرة ومااريد اكبر واشوف الي شفته ..

خالتي گامت للمطبخ ..

همستلي ماما .. شلونهم وياج ..

گلتلها .. ماشيه ع الله ..

ماما .. اعرف زوج خالتج مايعديها اكيد ديأذيج ..

ابتسمتلها ورجعت نمت ع كتفها ..

مروة اجت من الجهة الثانية .. وحضنتنا ..

نزلت تمارة سلمت بس ببرود وگالتلها اعتذر خالتو مااگدر اگعد وياكم عندي دراسة ..

سمعت صوت شهد طفرت ..

دخلت للغرفة اجت وراي مروة ..

گعدنا شوية بالغرفة ..

گالت هم يأذوج لو يعايروج ..

فرح .. يعني شتتوقعين قابل راح ياخذوني بالاحضان .

مروة .. ع الاقل ذولي اغراب عنج . لو شايفه اخواني مسوين حصار عليه .. 

من غير رنا الي مشغلتني خدامة عدها بحجة عندها طفل وماتگدر ..

بس ماما ماتنطيهم مجال زينه ..

فرح .. لزمت اديها اثنينهم .. اتحملي مراوي هذا قدرنا ..

بقت بس ماما عدنا اذا خسرناها معناها خسرنا حياتنا كلها ..متشوفين ماحجيت وياها عن اي شي ..

لان وضعها ماعاجبني وضعفانه حيل ..

مروة .. اذا هي كل يوم وگعة وضغطها مرتفع ..

شهد تناغي .. گلتلها خاله باعيلي اني كبرت وگمت اسولف ..

گامت مروة شافتها ..

مروة..  ياااي صايرة تخبل وكبرانة ..

شالتها مروة گامت تبجي استغربت ..

مروة .. يمة طالعه ع ابوها وحشية ..

فرح .. هههههه خلي يسمعج ياكلج بعيونه .

مروة .. الله يساعدج شلون عايشة وياه يخوف ..

فرح .. يمكن احنة نشوفه يخوف بسبب الصورة الي رسمتها النا منار ..

مروة .. يعني شنو قابل كذب مو عصبي وع اقل شي يعيط. 

فرح .. اي صحيح ✔ هو عصبي واذا عصب ميشوف گدامة بعد .. بس هذي العصبيه جواها انسان مجروح ولاتنسين اختنا خانته وقللت رجولته واي واحد بمكانة هيج يسوي واكثر ..

مروة .. خير فروحة اشو تدافعين عنه ..بس لا… 

فرح .. لا ابدا .. اصلا اكرهة ومااحب تصرفاتة ..

ولان بيوم كان زوج اختي مستحيل اگدر افكر بي . ولاهو راح يفكر بسببها ..

يعني اطمأني ..

مروة .. لعد ليش تداافعيله .. كلهم نفس الصنف .. شمدرينا ماهو الي وصل منار الهيج .. 

واصلا مدام هو ضابط يعني يصير قاسي وماعندة گلب فشلون ترديها تحبه ..

فرح .. مهما يكون . اكو شي اسمه محكمة وطلاگ . اذا يأذيها تتركة بس ماتخونة وتنزل شيبات بابا بالگاع ..

وصارت السبب بموته ..

حتى اذا اعذرها ع كل الي سوته بس مااسامحها لان حرمتنا من بابا ..

وج لو ناكرة لو ممعترفه ولاتحجيها بعين وقحة وتگول بس مكالمات بينا ماملتقين.. 

يعني ماكو داعي تسويها مضلومة وهي الي ضلمت نفسها وضلمتها ..

اووووف الله يرحمها ليش تخليني احجي واني ابد مااحب احجي عليها من بعد ماماتت ..

گومي خلينا نروح الماما ..

ضجت من نفسي لان ذميتها .. ويمكن احلامي بيها اثرت عليه وصرت اخاف او اضوج منها ..

فتحت الباب صار مقابيلي عذاب فزيت .. هذا شجابه ؟؟

عذاب .. ها خير شفتي بعبع گبالج ..

فرح .. لا بس ..

عذاب .. وخري من وجهي اريد اطلع ملابسي وغراضي من الغرفه ..

طلعنا اني ومروة همستلي ..

وج هذا الوحش والماعندة كل ذوق تگولين عليه طيب .

وج رجلي تطابگن من گال اطلعن اريد بس افلت .

حتى سلام ماسلم گبر ..

رحنا للاستقبال ماما وخالتي منتقلات هناك ..

اخذت شهد الماما شافتها نزلت دموعها ..

خليتها بحضنها ..

گالت ولج هاي ممخليه شي من منار تشبهها حيل ..

خالتي .. وهذا الي مخلي عذاب ينفرها ..

ماما .. اووووف يدادة مااعرف شأگول الله لاينطي الكان السبب بمصايبنا هاي ..

خالتي .. لاتقهرين روحج .. الله يرحمها وينتقم من ذاك الكلب ..

ماما .. مو گلتي عذاب لگاه شسواله ..

خالتي .. ماادري والله تدرين بعذاب كتوم مايحجي بس بقى يومين غايب ورجع معصب حيل ..

مروة .. خاف ذبحة .!!

خالتي .. لا مو الهلدرجة بس گال خليته يتمنى الموت ..

ماما .. الله يجازيه وكما تدين تدان . يجي يوم واحد يضحك ع عرضه ..

ماابرر البنتي بس لو مايقشمرها بسوالفه جان ماتقشمرت ..

همة يسولفون واجت ببالي رحاب ..

ياترى شنو سوالها . اتذكر معتز من گال انتقم منهم كلهم ورحاب وياهم ..

فعلا غامض عذاب وماينحزر شنو يطلع منه ..

راحن ماما ومروة بالليل رجعهم معتز بقن ع العشا بس احنه البنات وسوينا للولد العذاب وعمو وحدهم لان معتز طالع ..

وتمارة اكلت وي ابوها وعذاب مقبلت تگعد ويانا ..

دخلت ارتاح بعد مانضفت المطبخ ..

اندگت الباب حيل ..

فتحتها عذاب ..

تعاي اطلعي شويه ..

طلعت شفت خالتي وزوجها بالصاله ..

گاله يمة من باجر ارجع البيتي وفرح وشهد وياي ..

اني بقبت صافنة ومستغربه ..

شنو الي تغيير وليش ..

وشلون راح اعيش وياه ببيت واحد الوحدنا ..

باوعت الخالتي كانت رافضه ..

بس زوج خالتي .. گال احسن مايخرب بيتنا .. خوش قرار.. 

شنو من بشر ياالهي .. اكيد وصلوا العذاب غير كلام وخلوه يعزلني بذاك البيت ..

طبعا ابوها وتمارة يمكن ماقصروا بالزن عليه ..

هو هذا البيت وبي ناس وخالتي واحس روحي مخنوگة لعد هناك شراح يصير بيه .. يمكن يسويه سجن عليه وهو سجاني ..

#بقلمي_الكاتبة_شمس

يتبع .… ..

وربي بعد مااتحمل تجريحكم وكلامكم من اتأخر ..

اكيد موبيدي اذا اتأخرت وعندي ضرف .. 

ليش تحسسوني انكم مانين عليه بمتابعتكم ..

مع احترامي وتقديري للي يقدر ويتحمل ..

وسبق وان گلت الي مايتحمل الانتضار ينتضرها تكمل ويقرأها ..

رجاء انتقوا الكلمات قبل كتابتها حتى لتجرحون المقابل بيها ..

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad