من سيدفع الثمن الجزء السادس في 1:06 ص مرسلة بواسطة أحمد التكريتي

 

//// البارت السادس ////

#من_سيدفع_الثمن ؟؟

بقلم_الكاتبة_شمس

حسيته فقد ويتصرف بلا وعي ..

ويحجي وكأنه منار مقابيله مو اني ..

جسمي شمأز من تصرفاته ..

دفعته حيل ومااعرف منين اجتني القوة ..

واخذت شالي وركضت ..

الدموع كانت السبيل الوحيد الي يفرغ همومي ..

شافتني خالتي ..

شهگت يايمة هاي شبي راسج منو ضربج ..

بس لا عذاب ..

حاجيتها بسرعة . لا خاله انضربت بالباب ..

دخلت للغرفه ابجي واتذكر لمساته الي وحركاته المشمأزة ..

بقيت امسح بوجهي وشفايفي واعيط بحرگة ..

شلون راح اعيش وي هذا الوحش وشوكت راح تنشف جروحة وينسى ويرحمني ..

لان مادام جروحة باقية ماراح اخلص من عذابه وانتقامة ..

ااااااه يامنار مااعرف ادعي عليج لو ادعيلج .. 

بقيت اليوم كله گاعدة بالغرفة ماطلعت ..

هو اصلا كنت اخاف منه ومن نضراته وبعد الي صار خفت منه اكثر ..

صار انسان مريض يشوف منار بيه ويحاول ينتقم او يعاقبها عن طريقي ..

تذكرت لمساته وهمساته وكلامة اقشعر جسمي واشمئزيت ..

شوية وسمعت صوت عذاب يحجي وي امة ..

اتقربت للباب ..

خالتي يمة شبيك وين رايح وليش ماخذ المسدس ..

عذاب .. عرفت منو هذا الكلب وبيته ..

خالتي شهگت يايمة وشناوي لاتبلي روحك بي خلي يولي باجر عرضة يلعب بي مثل مالعب بعرض غيرة ..

عذاب .. تحجين صدگ يمة اني اخلي يشم الهوا بعد الي سواه .. مو عذاب الي ينداس ع عرضه ويسكت ..

طلع عذاب وخالتي تبجي وتلطم ..

طلعت يمها مااعرف شلون اواسيها .. گلتلها خاله ان شاء الله ماكو شي لاتخافين ..

خالتي .. وشلون مااخاف وابني راح يبلي روحة بسبب منار الله لا… .. وسكتت ..

نصيت راسي وهي تندمت لان رادت تدعي ..

اووووف يمنار كم گلب حرگتي بعملتج هاي ..

خابرت خالتي ع معتز وتماضر وزوجها .. وخبرتهم ..

شويه واجو ..

زوج خالتي .. شلون تخليه يطلع ماتعرفين تمنعيه .

خالتي .. شتدري بعذاب يقبل لو الي براسه يسويه ..

باوعلي وگال .. الله لايراويجن الخير ولايرحمجن خربتن بيتي وضيعتن ابني ..

سكتت عنه بس معتز گاله .. هي شعليها يابه . 

ليش تحملها اخطاء غيرها .. 

ابنك مو طفل وهو الي اختار منار ورغم كم رفضته .. يعني لاتحملون غيركم اخطاء عذاب ومنار ..

ولو مايجوز نحجي عليها بعد ..

زوج خالتي ماعجبه الكلام وبقى يتصل .. 

ويگول المن اخابر .. اروح افضح روحي ..

تعجبت من كلامة ليش هو اكو واحد ماعرف بالسالفه ؟؟

معتز يخابر وزوج خالتي وهو ميرد ..

زاد خوفنا عليها ..

اني دخلت للغرفه وادعي يارب يرجع لو ميتهور .. 

لان اكيد اذا صارله شي راح كله يوگع راسي ..

شهد بيومها موتتني بس تبجي ..

ومااعرف شبيها ..

ومنا البيت مخبوص ..

بقيت بالغرفه وماطلعت خفت احصل كلام اني في غنى عنه ..

خليت شهودة بحظني وگاعدة ع السرير ..

دخلت تمارة هستوها جاية من الدوام ..

-اسمعي لج اذا صار شي ع اخويه وربي اموتج بإيدي . منين اجتن علينا انتن . لامن مستوى ولاشرف ..

راح تسون عذاب مجرم بسببجن .

باوعت للطفله وگالت .. واكيد هذي تطلع نفس اخلاقجن مدام انتي الي ربتيها ..

متت قهر .. لو بغير ضرف وغير مكان كان اتصرفت وياها ..

بس فعلا مالي عين احجي .. وفعلا اختي السبب بالي ديصير بيهم ..

بقينا منتضرين .. وتماظر سمعت واجت ..

گالت گلت القيصر امي مريضه اشوفها وارجع خاف يحس ..

خالتي بس تبجي ..

معتز خابر ع جماعته كلهم ماعندهم علم بي ..

لليل جاوب معتز واخيرا ..

الكل وگف .. 

وزوج خالتي يعيط ويگله هسا ترجع .. لاتوسخ روحك بسبب عاهرات ..

وخالتي تعاركت وياها وگالتله ع الاقل احترمني ..

وصارت هوسة ..

عاط معتز وگال كافي .. شويه اهدوا وانت يابه كلامك ماله معنى واذا تبقى تحجي هيج نخرب ..

خالتي .. عوفنا من ابوك ميجوز من سوالفه ..

گلي اخوك وين ..

معتز .. ماقبل يگول بس گال لاتقلقون عليه ولاتتصلون واني مو زعطوط اعرف شلون اتصرف وطبگة ..

خالتي زادت بالبجي وتدعي ..

شويه البيت هدأ وتماضر اجة زوجها واخذها ..

خليت شهودة بسريرها وطلعت ..

من غير مااباوع بوجوههم ..

طلعت كبة وبتيتة گشرت وسويت فنگر ..

لان الكل لاغدا ولا عشا ..

سويت زلايط وحضرت السفرة ..

گلتلها خاله العشا جاهز تعالوا ..

عيون زوج خالتي تريد تاكلني من الغضب ..

تمارة هزت ايدها وگالت زين حسيتي ع نفسج وطلعتي من الغرفه… .. عاط بيها معتز وگالها احترمي نفسج مهما يكون اكبر منج وگامت وبادرت وسوت العشا لاتحجين هيج وياهة ..

هي تنرفزت وگالت .. هاي البقت تدافع الهاي الي اختها شوهت سمعتنا ..

عاط بيها مرة ثانية ..

گالت .. اعرف كلش زين ليش دتدافع الها .. وراحت .

هو راد يروح وراها ..

عاط بي زوج خالتي وگاله اتركها ..

باوعلي معتز وخجلان .. اني سويت نفسي ممنتبهه

رجعت للمطبخ انضف ..

ولان زوج خالتي ميحب اگعد وياهم ع السفرة ..

سويت لفه الي وگعدت بالمطبخ اكلها ..

اجة معتز گال لاتضوجين منها زعطوطه هذي ماتعرف شنو تحجي ..

فرح .. عادي تعودت ..

معتز .. انتي غاليه فرح ومايهون عليه واحد يزعلج ..

احس اللگمة وگفت ببلعومي .. وماتنبلع ..

نضراتة وكلامة يخليني اتوتر .. هو اني عايزة مصايب وهذا الثاني يلمح ويدافع ..

معتز .. ليش تاكلين تعاي يمنا ..

فرح .. لا شكرا هنا مرتاحة اكثر .. واريد اروح اشوف شهد لتگعد .

معتز .. اني هم مشتاق اشيلها والعبها .. من المشاكل نسينا نهتم بهذي الطفله المسكينه ..

قلمي_الكاتبة_شمس

______________________________

راح يتعشا واني بسرعة كملت ورحت للغرفة ..

شفتها گاعدة وتباوع بس شافتني ضحكت ..

اووووه فديت هالضحكة گعدتي يروحي .. جوعانة ..

تعالي ابدلج وارضعج ..

نزلتها يمي ع السرير ..

طلعتلها ملابس وبوطرة ..

بدلتلها ..

وگمت اسويلها ممة ..

دخل معتز ..

استأذن ودخل ..

اتقرب يمها ..

يلعب بإيدها ويتلمس خدها ..

-عمو حبيبتي شنو هذا الحسن .. اني عمو حبيبتي .

ضحك گال ..

هذي صغيرة حيل شلون اشيلها ..

گتله خلي اگمطها وارضعها وانطيكياها هسا جوعانة .

معتز .. لعد اني بالصاله اذا تگدرين جيبيها يمنا ..

هزيت راسي اله ..ج

هو بقى يباوع واني اگمط بيها واصلا مااعرف اگمطها بس هيج الفها  ..

احس جسمي حرارته ارتفعت من الخجل مامتعودة واحد يراقبني هيج ..

ماصدگت طلع واخذت نفس ..

اوووف ياشهودة شلون راح تخلص حياتنا هنا .. كل يوم توتر وخوف ..

كملتها واخذتها للصاله ..

شفت خالتي شادة راسها ومعتز ديقيسلها الضغط .

وزوج خالتي يگلب بالتلفزيون ..

حاولت الطف الجو ..

گلتلها .. بيبي شوفيني اجيت اشوفج .. هي ابتسمت .

ومعتز گال .. 

وعمو مشتاقلها هم لعد متريد تشوفه ..

گلتلها هياتها اجت العمو شهودة طبعها من گد مااسولف وياها تعودت وعبالك تفهمني تضحك الي من احجي .

فهي كانت تباوعلي وتضحك ..

نطيتها المعتز ومايعرف يشيلها ..

ونضحك عليه اني وخالتي ..

وعلمته شلون يشيلها اخذها يلعبها ..

درت وجهي لگيت تمارة واگفة يم الدرج وتباوع بمكر ..

وتهز بإيدها ..

اما زوج خالتي كان يباوعلنا بنضرات خاطفه وعينه ع شهد ومعتز ديلعبها هو وخالتي وهي تضحك ..

حسيته راغب يتقربلها لكن كبريائه يمنعه ..

مر يومين وعذاب مانعرف وين او شصار ..

گعدت الصبح البيت هادئ بس اني وخالتي لان الكل دوام اخذت ممة شهودة اغسلها ..

غسلتها وغليت مي الها ..

من رجعت للغرفه تفاجأت بعذاب دخلها ..

شفت بس ظهرة وتقرب الشهد اني مخليتها تلعب ع سريري ..

گعد يمها يتلمس ايدها ..

مسح عيونه ودنگ باسها ..

الموقف هزني مااتحملت ..

بقيت بالمطبخ مادخلت وخليته يشوف بنته ويتعرف عليها 

اجت خالتي گالت هايمة ليش گاعده هنا ..

فرح .. اششششش واشرتلها ع الغرفه باوعتلهم ..

وگامت تدعي الله يهديه على بنته ويراعيها ..

بس هو بسرعة تركها وطلع مااتحمل ..

حتى ماباوع للمطبخ صعد فوگ بسرعة ..

گلتلها خاله .. عذاب شوكت اجة وشصار ..

خالتي .. والله يمة ماادري . رجع بالليل كلش وسأله ابوه گاله لتخافون ماقتلته بس خليته يتمنى الموت ..

گمت للغرفه وحايرة . شنو الي سواه وخلاه يتمنى الموت ..

باوعت الشهد عينها عليه ..

نسيت كلشي ورحتلها ..

رضعتها وبدلتلها ..

وگمت للبيت وي خالتي وسوينا غدا ..

عذاب فوگ ابد مانزل ..

وقت الغدا نزل .. گال مااشتهي . 

منتظر ناس تجيني .. وطلع ..

شويه وسمعنا هوسه وسيارة حمل بالباب ..

طلعت خالتي ..

گالت هذا عذاب ديحمل الغرفة والغراض يصفي البيت .

شناوي هذا الولد مااعرف صاير غامض ..

بداخلي احجي .. لعد هسا عرفتيه غامض هو هيج من زمان ..

اجة زوج خالتي گالها .. اخواني يعتبون يگولون صار شهر من عذاب تزوج ومحد نطانة خبر لو حجة ..

خالتي .. والله ياربي غير يدرون بوضعنا .. خو مگلتلهم شي ..

ابو عذاب .. لا مگلت .. قابل افضح روحي . بس گلتلهم عمود الطفله ماكو احد يراعيها عقد ع اختها لان خالتها وتحن عليها اكثر من الغريب ..

بعد شتردين سويتهن ملاك الج بنات اختج المصونات ..

خالتي .. اي فروحة ملاك من صدگ .. لاتاخذها بغلط اختها هي مالها ذنب ..

اني بالمطبخ واسمع وانقهر بس ماباليد حيلة ..

للعصر اجت خالتي گالت هاج يمة شوفي هذا الثوب يصير عليج ..

فرح .. شنو. هذا خاله عندي ملابس مايحتاج ..

دخلت تماضر .. هذا الفستان اخذته ع ذوقي كون يعجبج . ولان حزينه جبته اسود والا امنيتي اشتريلج الوان وتفرحين بي ..

فرح .. ليش هو بعد بابا اكو فرح .. الي مثلي ماتشوف الفرح بس بأسمها ..

خالتي .. لاتگولين هيج يمة . هالفترة كلها اعصابها مشدودة والي صار مو شويه ..

ادعي تهدأ الامور ..

وتعدي ع خير ..

فرح .. شيعدي خاله .. ليش هو الي صار شويه .. ابوي راح بلمح البصر واختي غلطت وتعذبت وماتت بغموض ولحد الان مانعرف شلون ..

اي حياة تعدي ..

بالنسبة الي انتهى كلشي حلو بحياتي .. راح الامان الي كنت عايشة بي وبقت بس الكوابيس ..

ام عذاب .. يله يمة بدلي ولاتقهرين روحج .. ولاتخلين الناس تحس على شي ..

ترى عمام عذاب مايعرفون شي ..

دخلت سبحت ولبست الفستان الي انطتنياه خالتي ..

حيل حلو علية ..

خليت الشال ع راسي ..

اجت تماضر گالت اجو بيت عمو ..

تعالي سلمي وجيبي شهودة ديشوفوها ..

اخذت شهودة وهي سمنانة صايرة وحلوة ..

دخلت للاستقبال بتوتر گلت السلام عليكم ..

الكل رد صار مقابيلي عذاب منصي راسة ويتصفح بالموبايل ..

خفت اكثر .. واتذكرت الي صار ببيته ..

مرت عمة گالت ماشاء الله حليوة بس مو بحلاة المرحومة ..

الله يرحمها تخبل .. ااااخ الموت مايعرف كبير ولاصغير .

اعذروني لان مااجيت ع فاتحتها لان كنت مسويه عمليه بس ابو باهل من اجة وگلي تخبلت والله ..

هي تحجي واني صافنه معقوله هاي متدري لو تغشم نفسها ليش هو اكو واحد ماعرف بالسالفه ..

بعدين گالت هاي بنت المرحومة .. خليني اشوفها انطيتهيا ..

-اللهم صل على محمد وال محمد..  امها وگاعده ..

عذاب ماعجبه الكلام ترخص وگام ..

كان گاعد عمهم وابنهم وزوجته .. 

احس نفسي ممرتاحة ..

سمعتها همست الخالتي ..

بس مو حرام تضلمون البنيه بعدهي صغيرها وماشافت شي ..

مرت باهل گالت .. شعجب ماحافه ..

فرح .. غير حزينه ..

-اي عيني بس هسا انتي تزوجتي وهذي نضافه مالها علاقة بالحزن ..

سكتت عنها .. تتوقع تزوجت برغبتي لو فرحانه حالي حال المتزوجات واحف واجهز ..

دخلت تمارة وبنت عمها عبير جانن فوگ صاعدات ..

من شفتها انخطف گلبي ..

نضراتها وحركاتها تمارة الثانية ..

گالت هاي ..

گلتلها .. هلاو 

-انتي مرت عذاب الجديده .. وضحكت ..

هاي شنو ابد ممتلائمين . هو وين وانتي وين . حتصيرون رقم عشرة هيج ..

ضجت من كلامها مستفز ..

تماضر ردتها .. اي هيج حلو حتى شما تكبر تبقى بنضرة

صغير ومدللة ..

عبير .. امممممم ليش هو اكو احلى من الطويله .. هي الي تجذب النضر القصيرة متنشاف .. 

وگامن يضحكن هي وتمارة ..

خزرتهن تماضر سكتن ..

استأذنت وخليت شهد عند خالتي وگمت للمطبخ ..

اسوي ضيافه .. 

خليت الجاي ع النار وطلعت الكيك قطعته ..

مرت من يمي عبير .. 

-مشفتي عذاب وين ؟؟

صفنت بوجهها .. هااا ماادري يمكن بالحديقه ..

-اوووه باردة شيسوي برة .. وطلعت ..

بقيت متعجبة ع تصرفاتها .. 

كمل الجاي بديت اصب دخل عذاب ..

لااراديا باوعت بوجهه ..

گال .. ها شكو . درت وجهي لان كان معصب .

بعدها دخلت عبير وتتبسم عبالها اهتم ..

اجت تماضر اخذت الضيافه و گالت بيت عمو راح يبقون ع العشا .. 

ووصينا معتز يجيب من المطعم ..

گمت سويت حلاوة ودا اصبها .. تذكرت اليوم خميس ..

اهلي سوو ثواب البابا لو لا ..

فعلا اشتاقيت الماما ومروة .. همة الي بقوا الي من بعد بابا ..

وماعندي موبايل اتصل ..

احس روحي اختنگت .. 

اجت تماضر حست عليه ..

-شبيج فروحة احد مضوجج ..

-لا بس ذكرت بابا الليله خميس وماما هم مسامعه صوتها اشتاقيتلها حيل ..

-هاج اخذي موبايلي واتصلي واحجي وياها ..

-بس… .

-ماكو بس .. اخذي وادخلي للغرفة واتصلي ع خالتي خطيه تلگين هسا گلبها يمج ..

اخذتة بسرعة ودخلت للغرفه ..

سديت الباب ..

اتصلت عليها اول ماردت مااتحملت ..

بجيت من سمعت صوتي بجت وگالت هسا جاي اگول المروة عليج ..

ليش هيج گطعتي بيه .. صح قسيت عليج بس مو بيدي الي صار عماني وماخلاني اشوف ..

ووجعت ابوج لسا ماشفت .. 

ابجي واحجي وياها .. ماما سويتوا البابا ثواب ..

-اي سوينا بس منتضرين اخوتج .. انتي شلونج مرتاحة وشهد شلونها ..

-اني عايشة بالمصير الي كتبتوا الي .. وشهد زينة مدام اني موجودة مااخليها تحس باليتم الي حسيته بعد بابا ..

-كافي يمة لا توجعني بهذا حجيج شنو ذنبي ..

-الوكت فات ومايهم منو المذنب .. المهم اني الوحيدة الي دفعت الثمن ..

مروة شلونها ..

-هاي وياج احجي وياها ..

-اول ماحجيت وياها وگالت وج فرح مشتاقتلج المن اشكي بعدج .. حياتي هنا جحيم بسبب اخواني امي سكتتها وگالتلها لاتحمليها قهر زايد ..

فرح .. مراوي حبيبتي اتحملي شنسوي هذا مصيرنا ..

مروة .. الله لايرحمها كل يوم ادعي عليها بسبب الي سوته تغيرت حياتنا وتدمرت ..

فرح .. لاتگولين هيج .. هسا هي محتاجة الرحمة اكثر منا .. مهما يكون هاي اختج وحرام تدعين ع الميت ..

دااحجي وياها دخل عذاب ..

سد الباب بسرعة وسحب التلفون مني ..

المن تخابرين احجي ..

اريد احجي من الخوف انعقد اللساني ..

-هاااا امي ..

سحبني من شعري وخلى عيني بعينه .. اذا شفت موبايل بيدج اكسرها الج ..

مو عبالج اختج استغفلتني تجين انتي تكمليها .. لا وربي مااخلي شمس تطلع عليج ..

دفعته .. كافي حرام عليك مو كل اصابعك سوة .. ليش تاخذني بذنبها ..

عذاب .. كلجن طينه وحدة وماتختلفن عن بعض .. ولاعبالج ارحمج اذا خطأتي . ادعسج برجلي مثل الحشرة ومااخليلج اثر ..

دخلت تماضر .. شبيكم فضحتونا الكل يباوع للغرفه صوتكم طالع ..

انطاها الموبايل وگال .. هاج هذا واذا شفت واحد منطيها موبايل مايلوم الا نفسه ..

تماضر گالت . اني السبب مو .

فرح .. لا مو انتي بس هو صارت عندة عقدة مال شك ومايثق وعباله الكل سواسيه ..

تماضر .. امسحي وجهج واطلعي صبينا عشا ..

لاتخلين احد يحس ..

تماضر .. امسحي وجهج واطلعي صبينا عشا ..

لاتخلين احد يحس ..

اووووف لازم امثل جميع الاشكال وارضي جميع الاطراف وماكو احد يهتم للي احس بي او يراعي شعوري ..

طلعت احس عيون عبير مافارگتني تريد تاكلني ..

گعدت يم خالتي بجت شهد ..

اخذتها الحضني سكتت ..

مرت عمهم .. شلون لعد حتاكلين خليها بسريرها ..

فرح .. لا هي متعودة ع حضني تنام ..

-ياعيني صدگ الام الي تربي مو الي تولد ..

عذاب ضاج وگام يكح ويسولف وي عمة ع الدوام وشغله ..

عبير كانت تهتم بعذاب وتخلي گدامة اكل .. وهو مامهتم ويگلها شكرا خيتي مااشتهي او مااريد ..

امها تخزر بيها وهي عايشه الدور وعبالها تقهرني ..

اني هم مااهتميت وداانسولف اني وتماضر ومرت باهل حبابه وحتى مرت عمهم زينة مثل بنتها مااعرف هي وتمارة على منو طالعات ..

ام باهل .. لعد شعجب عذاب ماگعدت ببيتك ليش هنا باقين ..

عذاب .. هاااا مو بي تصليحات واريد اغير الاثاث مو هسا ام باهل .. اي حقة يمكن تذكرة بالمرحومة .. هي تحجي ع نيتها بس عذاب ضاج واستأذن وگام ..

صعد بدل ونزل گال جماعتي منتضريني ..

هو دايما هيج يطلع مايرجع النص الليل ..

تالي عمهم الح انه يعزمنا البيتهم وگال مايصير هيج لا زواج ولاعزومات ..

زوج خالتي راد يتعذر بس ماقبل عمهم واصر ..

ام باهل .. لعد شعجب سعاد متدري .. خابرتنا بالصدفه وگلنالها وزعلت لان محد گالها . تگول ع الاقل اجي للفاتحة ..

ابو عذاب .. هي بالناصرية شيجيبها مناك لهنا ..اني اتصل عليها وافهمها واراضيها ..

بقيت متعجبه .. معقوله اخوان ومحد يدري شيصير عند الثاني .. اشو احنه الدودة اذا ماتت عشيرتنا كلها تدري ماكو عدنا سالفه تتخبى ..

طلعوا بيت عمهم .. وراحت تماضر البيتها ..

گعدت انضف المطبخ وارتبة ..

ودخلت نومت شهد واخذت ملابس ودخلت اسبح ..

طلعت من الحمام باردة ولافه نفسي بالروب لان لابسه فانيلة ربع ردن وبجامة ..

وگلت بالغرفه ابدل الكل نايم ..

سمعت شهگة بالغرفه شلت راسي شفت عذاب يحجي وي شهد ..

تراجعت بس سمعته .. يگلها لاتصدگين اسامحج وحبي الج راح يكون نقمة عليج .. 

وحتى بنتج مااخليها تعرفج ولاتعرف عندها ام مثلج ..

بس المشكله خليتي شكلج كله ببنتج وحرمتيني منها ..

مااگدر اباوعلها لان تذكرني بيج ..

شنو من عذاب تركتي وراج ورحتي ..

كحيت هو گام بسرعة وراد يطلع ..

اتجرأت وگتله ..

شهد ماعندها حليب ..

باوعلي وعيونه حمر من الغضب .. وهسا ذكرتي ثوله انتي المن مخليج يمها ..

عصب عليه من غير ذنب ..

مااتحملت وگتله .. غير انت ابوها والمفروض تهتم بيها اكثر ..

لوى ايدي ودخلني لجوة لان الكل نايم ..

لزمني من وجهي واني گصيرة بقيت اتمرجح بيدة ..

وج لاتختبرين صبري .. السانج اگصة بعلي سبق وان گتلج انتي مربيه الها لااكثر فلا تتعدين حدودج ..

اتقرب اكثر باوعلي وهمس .. انتن لعنة نزلت عليه لو شنو ..

تركني وطلع اريد اتنفس مااگدر ..

گعدت بالگاع اخذ نفس ..

گمت ع حيلي ردت اقفل الباب ..

صار بوجهي معتز .. يخوزر وصعد ..

شوف هذا الثاني الي يخزر .. اكيد فسر الامور ع هواه ..

واذا فسر نارهم تاكل حطبهم .. 

بس المهم كرامتي لازم مااخضع الهم زيادة ومااخليهم يستغلوني بهذي الطريقه ..

ثاني يوم الصبح گعدت البيت مخبوص ويوم جمعة ..

گالت خالتي يمة فرح ..

جهزي الغرفه وراح ننزل سرير ثاني يم سريرج وبنتج خلي سريرها يم الشباك ..

جذبتني كلمة بنتج وعجبتني الصراحة ..

-ليش خاله شكو ..

-اي يمة مو راح ننزل غراض عذاب يمج وينام بالليل بالغرفه يمكم لان راح تجي عمتة سعاد وهاي ماتفوتها فايته اللسان وشكاكة بشكل ..

-فتحت عيوني .. يعني شنو خاله . مستحيل ابقى يم عذاب بغرفه وحدة ..

تمارة .. ليش يبزز لو عندج غاية ثانية ..

فرح .. اي عندي غاية وهي انه عذاب مو زوجي كافي تمثيل وماتربطني بي اي صله ..

معتز كان يباوع ويبتسم .. تراجعت من شفت نيته وملامحة تغيرت ..

گلتلها بس خاله اذا الشغله عمود عمته لاتحس اني موافقه بس لاالي علاقه بي ولاينام يمنا بس غراضه يبقن

خالتي .. وج يمة همة كم يوم تحملوا ولاتجلطوني ..

اذا وگعت باللسان سعاد شيخلصني الناصريه كلها تعرف بالسالفه ..

ضجت حيل ودخلت للغرفه ..

باوعت الشهد تحرك بيديها الي .. وتناغي ..

اوووف يعمري انتي وحدج تنسيني همومي ..

صار عمرها ثلاث اشهر ومدنفشه تخبل ..

وسوالفها بعد احلى ..

شويه واجة عذاب ومعتز نزلوا السرير من فوگ وخلوه ..

انطتني خالتي فرشة گالت افرشيها ..

گلتلها خاله مو الهاي الدرجة ..

عذاب .. لاتعشين الدور .. اصلا اني يوم واحد والتحق يعني لاعبالج مرتاح للوضعيه ..

سكتت عنه مالي خلگ هجماته المرتدة ..

للظهر اجت عمتهم وقت الغدا ..

هي حلوة حيل .. ومتوسطة بالعمر ..

سلموا عليها كلهم ..

اجيت سلمت عليها ..

باوعتلي .. هاي اخت المرحومة .. مملوحة احلى من ذيج مو تزعلين يعمة بس جانت مغرورة ..الله يرحمها.. 

اجة عذاب سلم .. گالتله ولك تموت مرتك وتتزوج بنفس الشهر وماتگلي ولاتحجي ..

خايب امي مو عمتك .. خلي امك گاطعة وماتگول انتو شمالكم ..

خالتي ضاجت .. يادادة هو احنه شفنا دربنا . هاي الطفله بعدهي لحمة حمرة وامها راحت .. 

وجانت متعلقة بخالتها هالاخذناها العذاب ..

والا عذاب وينه ووين الزواج بعد ..

سعاد .. اي مو اگول جان ميت عليها وكتل روحة يله حصلها مو بسهوله ينساها ..

عذاب .. گومن حضرن الغدا . اكيد عمتي جوعانه ..

سعاد .. ولك عمة بس لامجبور عليها اشوفك ماملهوف ولارايدها .. هاي عشرة عمر مو يوم ..

عذاب .. عمة قابل شأسوي اگوم ابوسها گدامج ..

سعاد .. اي ذيج مو جنت تحاضنها وتبوسها يمنا بلاخجل .

بس هي صدگ صعبه الواحد ياخذ اخت مرته موهينه .

بس هاي سوالف امك وخططها ..

ليش مااخذتلك عبير شحلاتها وطول ورشاقه ومن مستواك ..

خالتي .. تأفأف واني احس گلبي ضاگ من حجيها ..

دور بدت تحقق ع موت منار شلون ووين ..

گالها عذاب ..

حادث سيارة ..

سعاد .. يممممة وسكتوا ومااخذتوا فصل ..

عذاب .. الولد مسجون ..

سعاد .. عمة القانون شنو اخذوا حقكم عشائريا ..

اووووف هاي كم ساعه اجت خبصت البيت همزين ماتبقى العمر كله ..

اجة زوج خالتي وبقت تسولف وياها وهو زين ماجرحني ولا سمعني حجي گدامها ويعاملني عادي ..

لليل بقينا سهرانين كلنا . عجيبه عليها ابد ماتتعب ..

ودور دارت ع معتز گالتله وانت عمة شمنتضر ماتتزوج ..

گالها اي كانت ببالي وحدة وانخطبت وبعدها ماافكر بعد بالزواج ويباوعلي .. 

-عززززا هذا تمادى وگام يلمح .. لازم اخليه يقطع الامل او ينسى بأي شكل ..

لان مااريد نهاية هالشغلة توگع ع راسي ..

عمتة من شافت الكل ينعس .. گالت عذاب اخذ مرتك عمة وادخلوا ناموا ..

بس انت مو عندك بيت ليش باقين هنا ..

گالها بي تصليحات ..

وهاي ليش لابسه اسود مايصلح ..

گالتلها خالتي . ابوها واختها اثنينهم مو شويه ..

سعاد .. اي الله يساعدها شلون قدر اثنينهم بشهر واحد الله لايراوينا هالمصيبه ..

گوم يمة عذاب اخذ مرتك وادخل وراعيها هاي يتيمة خطيه ..

الصراحة ماعرفت طينتها ساعة تكسر وساعه تجبر ..

بقيت صافنه بوجه عذاب وهو صافن بوجهي ..

گتله راح اخذ شهد انومها ..

هز راسه ..

اخذتها من خالتي .

بدلتلها ورضعتها وداانيمها.. 

دخل عذاب وراي.. 

حسيت بي احس جسمي كله يرجف مت الخوف . اني لحظة مااگعد يمة شلون راح اتحمل بقائي يمة بغرفه وحدة ..

#بقلمي_الكاتبة_شمس

يتبع ..

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad