قصة من سيدفع الثمن الجزء الخامس في 10:49 م مرسلة بواسطة أحمد التكريتي

 //// البارت الخامس ////

#من_سيدفع_الثمن ؟؟

بقلم_الكاتبة_شمس

اود ان اصرخ !!

بأعلى صوتي ..

اصرخ من اعماقي..

اصرخ حتى اكاد ان الفظ احشائي ..

فهناك شيء بداخلي.. لا استطيع وصفه..اريد ان اتخلص منه ..!!

شيئا يخنقنـي .. ويكاد ان يقتلني ..

فهو شعور مدمر يقسمني الى قسمين ولااعرف ان كنت ميتةً او مازلت على قيد الحياة ..

هذا الشعور لايأتينا الا عندما يتفق العالم كلـه ضدك ..

شگد كنت متعاطفة وي منار رغم الي سوته خطأ بحقنا كلنا ..

بس خلال شهرين حياتنا انقلبت وتراكمت العواقب عليه وكأنه اني المذنبة ..

الكل يريد مني ادفع ثمن خطيئة اني مالي ذنب فيها ..

كنت اتوسل وابجي واريد احد يسمعني ..

لكن لاحياء لمن تنادي .. 

اجة بلال وگال يله البسي شي ع راسج وتعالي السيد راح يعقدلكم ..

تخبلت باوعت الامي بتوسل ..

هزت براسها ..

وگالت ريحي ابوج بگبرة .. ارفعي راسة واثبتي للناس انه يعرف يربي وبناته شريفه واذا وحدة خطأت مو معناها كلهن مثلها ..

للحظة وبدون تفكير كلامها شل دماغي .. واخذتني رجلي للاستقبال ..

كنت لابسة دشداشة سودة وحجاب اسود ..

بس خالتي جابت مشمر ابيض وخلته ع راسي ..

گالت لازم بياض بالعقد مايصلح اسود ..

وكأنه مصدگة هذا عقد حقيقي ..

السيد يعقد واني دموعي تنزل .. مو هيج كنت متمنيه حياتي ..

ليش الي احلم بي كله راح واتبخر .. وبقت بس الكوابيس والاحلام السودة ..

لاهذا الشخص الي كنت احلم يكون زوجي ..

ولابهيج طريقه ..

كمل السيد ..

گمت واحس خنگة بگلبي ..

طلعت للغرفه فرغتها بالبجي والعياط ..

لحگتني خالتي ومروة ..

حضنتني مروة وتبجي .. وتگول الله لاينطيهم ان شاء الله 

خالتي .. سحبتني وخلتني گبالها ..

باعي فروحة وداعتج يمة مااخلي احد يمس شعرة منج .

الي سويناه المصلحة الكل واولهم بنت اختج ..

انتي تعلقتي بيها وهي هم ماتنام اذا ماتشم ريحتج ..

اعتبريها اجر والج بي عند الله ..

ضحكت ودموعي ينزلن .. واني منو الي يكسب بيه اجر ويرحمني .. الكل دور مصلحته بهذا العقد الا اني محد فكر بيه مستقبلي وحياتي كلها راحت واني بعدني هسا دخلت العشرين ..

بأي دين او ملة هيج يصير ..

خالتي .. بعد هذا الحجي ميفيد .. والي صار صار ومانگدر نغيير شي ..

يله ماما لمي ملابسج وغراضج وملابس الطفله وخلينا نروح ..

مروة طلعت الجنط وبدت تجمع الغراض واني بدلت الشهودة وحضرت غراضها ..

گمت احجي وياها ..

ها شهودة .. يمكن اني وياج راح يصير مصيرنا واحد ..

بس انتي الي .. الكل ضدي ..

حسيت بإيد تخلت ع كتفي ..

باوعت امي .. گالت .. هذا راح يبقى بيت ابوج واني امج ومراح نتركج وحدج ابد ..

سحبت نفسي منها .. تركتوني بأصعب ضرف وحملتوني ذنوب غيري .. بس بحياتي مااسامحكم .. ولاادخل الهذا البيت ..

اعتبروني ميته ودفنتوني .. 

گامت تبجي .. حضنتها گلتلها بحياتي ماعصيتكم انتي وبابا وحتى اخواني شتگولون اگلكم صار ..

تالي ضيعتوا حياتي وكسرتوني ..

تركتها وكملت الغراض وبدلت ولفيت شالي وشلت شهودة وطلعت ..

گالت خالتي يله ..

طلعوا اخواني الجنط برة ..

شفت عذاب يخليهم بالسيارة .

عمي سلم عليه ويوصي ويگول ارفعي راسنا ..

واني اصلا مو يمة ولااهتميت ..

كانت عيني ع عذاب وافكر .. شلون راح اعيش وي هذا الوحش ببيت واحد ..

وياترى شراح يسوي وشلون ينتقم مني بسبب منار ..

منار كانت تگول اذا عصب ينگلب وحش ..

وشكله بالنسبة الي هيج ..

هو ضخم واصلع وعندة لحية وشوارب ..

واني كنت قصيرة وناعمة ..

فكنت اشوف شكله وطوله مبالغ بيهم ..

انقطع تفكيري بصوت بلال ..

باوعتلهم وگلتلهم من اليوم انتو مو اخوتي ولااعرفكم .

ولو اموت مااجي واطلب شي منكم ..

من غير ماانتضر ردهم طلعت وصعدت بالورى ..

الطريق كله حاظنة شهودة واشم بيها ..

رحيتها تعوضني عن هموم الدنيا ..

رفعت راسه شفتة خازرني بسرعة نصيت راسي ..

وصلنا البيت خالتي ..

شفت معتز يريد يطلع ..

من شافني تفاجأ ..

گال .. فرح خير... صفنت بوجهه وكأنه مايدري ..

گتله .. شنسوي لازم نتحمل نتائج اخطاء غيرنا ودخلت ..

دخلنا اني وخالتي ..

صار گبالي زوج خالتي .. هذا غثة وماينحمل واصلا ماكان يحب منار ..لان راد بنت اخوه العذاب ..

وعذاب رفضها ..

دخلتني خالتي گبل الغرفة وگالت ابقي هنا هسا اجيج ..

سمعت اصواتهم اتعالت ..

معتز يگله حرام عليك هاي طفله شنو ذنبها هيج تظلموها ..

وزوج خالتي يگول .. خلصنا من ذيج الساقطة تجيب اختها .. اذا ذيج خلصتها مخابرات ..

هاي الله العالم كم واحد تدخل البيت وتسويه مگ... 

عذاب عاط بي وگاله .. كااافي يابة .. مااريد اسمها او سيرتها ينذكر بهالبيت ..

وهاي مجرد خدامة البنتي لااكثر لاتخاف ..

من گد الالم الي حسيت بي .. اخذت مخدة ع السرير وعضيته حيل واعيط بصوت مكتوم ..

بس ردت افرغ الي بداخلي من قهر ..

لا ياالهي لاتخليني اضعف انطيني القوة .. 

دخلت خالتي تتعذر وتبوس براسي ..

گلتلها .. على شنو تتعذرين خاله .. اختي السبب بنضرة الناس النا هيج ..

الله يسامحها ويغفرلها ..

ولاعتب ع العقول الي تاخذنا بذنب غيرنا .. 

طلعت وهي خجلانه ..

شويه واجت گالت اريد الطفله يشوفوها ..

ماادري ليش ساعتها تمسكت بيها وماقبلت انطيها ..

خالتي ..شبيج فروحة ترى هي بنتنا واكيد مانأذيها ليش خايفه .. بس بلكي اذا شافها جدها وابوها يحن گلبهم عليها ..

انطيتها شهودة .. گلتلها خاله اني سميتها شهد وماادري انتو شنو مسميها ..

گالت هو اصلا بيان لسا ممسويلها ..

بلكي احجي وي عذاب يسويلها بمعارفة واخلي الاسم الي انتي سمتي بي ..

ابتسمت .. ع الاقل شي من الي 

اتمناه يتحقق ..

بقلمي_الكاتبة_شمس

__________________________

بقيت گاعدة بالغرفة ..

وخالتي گالت صفطي ملابسج بهذا الكنتور وهاي الغرفه التماضر من تجينا هي واولادها يباتون بيها ..وراح تصير الج ..

گمت رتبت الملابس وغراض شهودة .. وخليت سريرها يم سريري ..

سمعت صوتها تبجي ..

طلعت ركض .. شفت خالتي شايلتها ..

گلتلها انطينياها اكيد جاعت ..

شفت عذاب گاعد بعيد وعينه عليها ومايتقربلها ..

زوج خالتي .. بغرفته ويصيح ماتسكتوها الهاي ..

هزيت راسي واخذتها .. ولاتگول بنتهم ..

صاح وراي عذاب ..

هيييي شبيج تهزين براسج لازم ماعاجبج الوضع ..

ماحجيت تركته ودخلت ..

-مو احجي وياج .. خالتي وگفته وسكتته ..

اوووف شلون راح تخلص هاي ..

جاي ارضع بالطفله .. دخلت تمارة الي للمغرب يلة گعدت ..

بدون لاسلام ولاكلام ..

-عيني شلون حتگضيها بالغرفه گومي ساعديني بالعشا ..

-بس الطفله دترضع اكملها واجي ..

-اگلج والله عايشه الدور .. قابل هي بنتج انطيها الامي وگومي لو ترديها حجة ..

صدگ ضجت اذا هي اصغر مني وهيج تحجي وياي ولاعبالك بنت خالتها من يومها مغرورة وتتكابر علينا .

شلتها واخذتها الخالتي ..

لگيتها دتصلي ..

اشرتلها ع شهودة وگلتلها رايحة اساعد تمارة خلي عينج عليها ..

رحت للمطبخ لگيتها مطلعة لحم وتثرم بي ..

گالت هاج سوي البصل والبتيتة حنسوي مخلمة ..

ودور انتي سوي العشا لان اني يادوب الحگ اقرأ وامتحانات اريد اجيب معدل ..

كملت ثرم اللحم غسلت وراحت .. 

خليته ع النار وي المي ..

وبديت اثرم البصل والبتيتة ..

جاي اسوي عشا ..

دخل معتز ومبين ضايج حيل ..

من شافني اجة بأتجاهي ..

-انتي شلون توافقين وليش وافقتي ..

-ليش هو بكيفي اصلا محد اخذ موافقتي ..

-بس الي سوتيه خطأ وظلمتي نفسج وظلمتي غيرج ليش وضرب ع الكاونتر ..

اجت تمارة تباوع .. دار وجههة ومشى ..

من حجى هيج ماكنت مهتمة ..

بس نزلت دموعي ع نفسي فعلا انضلمت بهيج قرار ..

مسحت دموعي ودرت وجهي شفت تمارة بعدهي واكفه وتخوزر بيه ..

كملت عشا وسويت سلطة ..

ودخلت ..

اخذت شهد من خالتي ..

گالت خابرت امج تسأل عليج ..

گلتلها .. شلونها هي ومروة ..

گالت .. زينه بس مقهورة عليج ..

-بعديش ماتفرق عندي بعد ..

دخلت لجوة ..

شوية وسمعت هوسة ..

اجت تماضر وجهالها وزوجها ..

طلعت سلمت عليها واخذت شهودة تبوسها وتشمها ..

گالت فدوة كبرانه وحليانه سبحان الله تشبه امها ..

دخل عذاب وزوجها وراها ..

صاح بيه ..شعندج مطلعتها دخليها وادخلي يله ..

بقيت صافنه بوجهه ومستحيه من زوج تماضر ..

گال .. سمعتي شنو حجيت يله ادخلي وبعد متطلعين من يجي احد ..

اخذت شهودة ودخلت ..

انهضمت .. يعاملني وكأنه منبوذة .. لو بيدة حتى الهوا حرمني منه ..

صبوا العشا وصاحتني خالتي ..

سمعت زوج خالتي يگلها ..

خليها تاكل بالغرفه اذا گعدت ع السفرة مااگعد اني ..

سويت نفسي ماسمعت ..

نومت شهد وغطيت راسي بالبطانيه ونمت ..

مااريد اسمع ولااريد اگعد وياهم ..

نمت بدون عشا .. 

غفيت واحس شي ديخنگني وتكرر الحلم الي حلمته بوفاة بابا .. 

دخان اسود محاوطني .. وايد تخنگني ..

ومن بعيد اشوف منار وامد ايدي الها حتى تنقذني بس هي تبعد عني ..

ابجي واعيط واناديها وهي كأنه ماتسمعني ودارت وجهها عني ..

فزيت ع صوت خالتي وتماضر يصحوني ..

گعدت مختنگة واريد اخذ النفس ماكو ..

طگيتها بجي .. نطتني تماضر مي وتحجي وي امها ..

-حرام ظلمتوا هالطفله شنو ذنبها ..

-يمة شنسوي اذا هذا قدرها ولو باقية هناك مصيرها يصير اسوء ..

شربت المي .. واباوع بأركان الغرفه من الخوف ..

شلون بيج يامنار .. ماناوية تخليني ارتاح ..

شتردين مني ..

مو كافي تحملت عواقب ذنبج .. وبالحلم تعذبيني وتتركيني وترحين ..

گالت خالتي هذا عشاج اكلي ..

گلتلها مااشتهي ..

تماضر .. زين ارتاحي واني اخذ شهد عنج اليوم اذا تردين ..

بسرعة جاوبتها .. لا ماتاخذيها مااعرف بدونها تعودت عليها ..

تماضر .. براحتج بس علمودج اني ..

طلعن وتركني ..

بقيت گاعدة وحدة ومااعرف انام .. او اخاف ارجع انام ..

الى ان قريب الفجر ..

گمت توضيت وخليت السجادة .. قريت قرآن البابا ومنار بلكي ترتاح روحها وتتركني ..

احسها تحوم حولي ..

كملت ..

اذن الفجر صليت واستغفرت بالسبحة ونمت ..

شويه احس روحي ارتاحت ..

گعدت الصبح ع صوت شهودة طفرت ..

بدلتلها وكملت ..

ردت اسويلها ممة ..

باوعت للممة ماغاسلتها ..

اخذتها اريد اغسلها ..

رحت للمطبخ ..

غسلتها وردت اطلع صار گبالي عذاب ..

طفرت من مكاني ..

كان لابس عسكري ومخلي مسدسه شكله يخوف اكثر ..

گال .. شبيج هيج اخوف ..

ماحجيت ردت اعبر من يمة ..

سحبني حيل وعصر وجهي بأيده ودفعني ع الكاونتر.. 

همس بأذني ..

باعي ولج تصرفات المسكنه وتكسبين العواطف ..

هاي اعرفها وشفتها بأختج قبلج ..

ابتعدي عن معتز ولاتحاولين تخربين بينا ..

لا وحق الخلقج .. اذا اختج رحمتها وتركتها انتي ادفنج بمكانج فااااهمة ..

سحب ايدة مني . احس روحي ذابت .. رجلي گامت ترجف من الخوف .. 

عيونه ينگلبن حمر من يتعصب وفعلا صار وحش ..

گمت ازحف مااگدر امشي بعد ..

طلعت بلغرفه بسرعه ..

اخذت نفس ودموعي ينزلن ..

ياااا عزااا .

هذا شيحجي .. 

شعندي وي معتز قبل .. بس لا هاي تمارة وصلتله حجي عني ..

شلون يربي مااخلص ..

بقلمي_الكاتبة_شمس

____________________________

بقيت اتجنب معتز .. 

وهو دايما يجي يسألني اذا محتاجة شي .. او اذا ضايجة بس مااطول وياه خاف واحد يشوفنا ..

بعد كم يوم .. اجة عذاب ..

گالها يمة اريد واحد يروح يشيل الغراض الي بالغرفه كلها ..

لان اريد ابيعها مااريد اشوفها ببيتي ..

خالتي .. يمة جا اني مااگدر وتمارة بالدوام .. اخذ فرح وهي غراض اختها وتعرف شلون تلمهن ..

وشوفلك فقير وانطيهن الها ..

گالها گليلها تلبس شي وتطلع بسرعه اني واگف بالباب ..

گالتلي خالتي ماگدرت ارفض ..

لبست وخليت شال ع راسي وطلعت ..

بيت عذاب ومنار بصف بيت خالتي ..

درنا للبيت .. فتح الباب وگال . هاج هاي اكياس لمي غراضها كلهن وماتبقين شغله .

حتى الفرشه والشراشف تشيليهن ..

دخلت للبيت انقبض گلبي .. احس ريحتها بي ..

دخلت الغرفتهم ..

كانت اكو صورة كبيرة الهم مال الزواج .. باوعت الجمالها ااااه معقوله هالجمال كله اخذة التراب ..

لو ذاك الشكل الي شفته بالمغتسل ..

بقيت صافنه ..

سمعت صوت وراي شمنتضرة صافنه ..

گلتلها وهاي الصور هم اشيلها ..

گال لا اتركيهن ذولي اريد احرگهم ..

بقيت الم بالغراض سمعت صوته .. 

گال تعرفيه منو ؟؟

صفنت ومستغربه .. منو هو ؟؟

-حبيب اختج !!

-لا مااعرفة ..

-معقوله انتي اختها وحافضه اسرارها اكيد تسولفلج شلون كانت تستغفلني وتضحك عليه ..

-گتلك مااعرف ..

لزم شعري حيل من ورى الحجاب ..

-مو عذاب الي يضحكن عليه زعاطيط .. اكيد تعرفيه وماتحجين .. تخافن عليه مو ..

اذاني حيل .. مااتحملت وگتله ..

-بدل ماجاي تتقوى عليه انت واخوتي جان رحتوا ولگيتوه مو تركضون ورى منار وبعد ماخلصتوا منها اجيتوا الي ..

ضرب راسي بالكومدي ..

حسيت بدوخة والم .. عطت بي ..

وخر عني مالك حق تضربني .. هيج كنت تعاملها .. 

متلام من كانت تگول عنك وحش ..

هو طلع ورجع ..

شنو شگلتي .. شنو تگول اختج عني .. وحش مو ..

اروايج شلون كنت اعاملها ..

اگلج شلون كنت اخاف عليها من نسمة الهوا ..

لو من خشونة ايدي لتأذيها ..

اتقرب مني زيادة واني گاعدة وازحف لورى ..

خفت منه وياليتني ماحجيت ..

بكلامي هذا هيجت الوحش الي بداخله ..

شكله كان مثل الاسد المجروح الي تركته لبوته وخلتة هايج بكل لحظة واحد يذكرة بيها ..

اتقرب حيل .. 

وقرفص گدامي ..

لمس وجهي ووجنتي وشفايفي ..

واني جامدة من الخوف وبس دموعي تنزل ..

-هيج كنت اعاملها ..

وهيج ادلعها ..

وهيج ابوسها ..

وهيج اغازلها ..

وصار فوگي سحب الشال وخلى وجهه برگبتي ..

ااااه يمنارتي .. اشتاقيييت ..

ليش هيج جرحتيني وتركتيني ولج مو انتي الهوى الي اتنفسة ..

ليش ضلمتيني وضلمتي روحج ..

وحتى باخر لحظة اختاريتي الموت بدالي وتركتيني ..

ليش ..؟؟

حسيته فقد ويتصرف بلا وعي ..

ويحجي وكأنه منار مقابيله مو اني ..

جسمي شمأز من تصرفاته ..

دفعته حيل ومااعرف منين اجتني القوة ..

واخذت شالي وركضت ..

الدموع كانت السبيل الوحيد الي يفرغ همومي ..

شافتني خالتي ..

شهكت يايمة هاي شبي راسج منو ضربج ..

بس لا عذاب ..

حاجيتها بسرعة . لا خاله انضربت بالباب ..

دخلت للغرفه ابجي واتذكر لمساته الي وحركاته المشمأزة ..

بقيت امسح بوجهي وشيفايفي واعيط بحرگة ..

شلون راح اعيش وي هذا الوحش وشوكت راح تنشف جروحة وينسى ويرحمني ..

لان مادام جروحة باقية ماراح اخلص من عذابه وانتقامة ..

ااااااه يامنار مااعرف ادعي عليج لو ادعيلج .. 

بقلمي_الكاتبة_شمس

يتبع ....

حبايب اعرف البارت قصير .. ومتأخر ..

لكن وربي اني بالحلة عند اختي وتعرفون اذا واحد بغير بيته مايعرف يركز ويكتب ..

لهذا كتبت البارت هسا حتى ماتنتضرون ..

واذا مانزلت باجر اعذروني بس اوعدكم اعوضكم بالايام الجايه ..

لان فعلا مااعرف اكتب ولااركز واحس الي اكتبه مامقتنعة بي ..

حتى مااضلم القصه وانطيها حقها لازم اكتبها واني بكامل تركيزي ..

تحياتي لكم واتمنى تعذروني وتقدرون وضعي 

احبكم 😚😚

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad