قصة من سيدفع الثمن الجزء السابع في 11:30 م مرسلة بواسطة أحمد التكريتي

 صباح العسل لعيونكم حبايب 😚

//// البارت السابع ////

#من_سيدفع_الثمن ؟؟

بقلم_الكاتبة_شمس

♠ غالباً يجب عليك أن تُدرك أنكَ عظيم لثباتِك بنفس القُوة رغم كُل هذا الإهتزاز ..

دخل عذاب وراي..

 

حسيت بي وراي جسمي كله يرجف من الخوف . اني لحظة مااگعد يمة شلون راح اتحمل بقائي يمة بغرفه وحدة ..

سويت نفسي مشغوله وي شهد ..

سحب فراش من فوگ الكنتور نزلة واخذ بطانيه ومخدة وفرش بالگاع من غير ماينطق ولاكلمة ..

بقيت اني گاعد ع السرير مقرفصة وعيني ع شهد لان مااعرف شلون اتصرف بهيج وضع ..

بعد دقايق باوعتله شفت مخلي ايده ع عيونه والايد الثانية ع بطنه ..

شكله مرعب حتى وهو نايم .. اخذتني الصفنه الشكله .

وبيني وبين نفسي اگول شلون كانت عايشة وياه منار شكله يخوف ..

فززني صوته .. اذا خلصتي تحديق بيه انخمدي ونامي يله ..

يمة متت مستحة بسرعه سحبت الفرشه وصرت جواها وغطيت راسي ..

يمة هذا شلون شافني .. اگول مخليه بالاستخبارات مااعرف القوات الخاصه .. لان يعرف النمله وهي طايرة معقوله كل هذا الدهاء وماعرف او حس بمنار ماتحبه ..

شنو الي خلاه يدوس ع كرامته ويبقى متأمل وعايش وياها ..

لو اصلا كرامته ماسمحتله مرأة تكرهها لهذا كابر واتحملها ..

اووووف معقوله الحب هيج يذل .. 

احس روحي تضايقت من الفرشه الي ع راسي .. والله خالتي وسوالفج ..

هسا شلون راح اشيلها مني واتغطى بالبطانيه ..

بقيت احوس مااعرف انام ورجال وياي بنفس الغرفه ..

بجت شهد فزيت مرعوبه .. خاف يعيط عليه ..

گمت سوتيلها ممة . ورضعتها وبعدهي تبجي ..

يبوووو شسوي وهذا راح يگعد ع الصوت ..

شفته غير نومته ونام ع بطنه ..

اششششش اسكتي حبابه شهودة بابا نايم ..

گال وهو نايم .. شبيها متسكتيها ..

گمت نزعتها وغيرت حفوضتها . بس بعدهي تبجي ..

صدگ صجت وحسيت راح يگوم هايج عليه من ورى بجيها ..

گام من مكانه صفنت بوجهه وگتله مااعرف شبيها مو عوايدها هيج تبجي بالليل ..

صفن عليها ..

گال انطينياها اخذها مني ويهز بيها بيدة . الحيالة صفنت عليه ولمت حلگها وكأنه تريد تحجي وياه ..

من شافها سكتت گال هاج يله اخذيها نيميها ..

گتله اكيد تحس وتعرف انت ابوها ..

شفته عصب عليه سكتت ..

هاج ولاتتدخلين ..

اندگت الباب واحد صفن بوجه الثاني ..

گال منو ..

-اني عمة شبيها الطفله تبجي ..

فتحت عيوني ..

-عزاااا هاي شجابها ..

ولو هي نايمة بالاستقبال اكيد سمعت ..

عذاب بحركة سريعة ..

شال الفراش خلاه فوگ ..

وشمر البطانيه والمخدة ع السرير ..

فتح الباب ..

ها عمة شگعدج هسا .

والله يعمة گعدت اصلي صلاة الليل وسمعت الطفله تبجي خطيه خاف ممغوصه ..

عذاب .. لا مابيها شي رضعتها فرح وبدلتلها وسكتت ..

تعجبت من لفظ اسمي اول مرة اسمعه باللسانه من بعد الي صار ..

سعاد... هاااا اي زين يله عمة روحوا ناموا وعينها ع الغرفه والسرير .. وعذاب يفرك بلحيته من التوتر ..

ماصدگنا طلعت ..

قفل الباب ..

ورجع الفراش ونام بالگاع ..

نومتها بسريرها .. الى ان غفت ..

اخذت بطانيه من الكنتور .. ورجعت نمت . بس مااعرف شلون نومة ماصدگت طلع الصبح ..

بس اريد اطلع ..

شفت شهودة گاعدة تلعب ..

اخذتها بهدوء وطلعت ..

شفت خالتي وعمتهم گاعدات بالمطبخ ..

سعاد .. ها عمة نامت بالليل ..

فرح .. اي نامت زين. 

سعاد .. يمة لازم تتعلمين . تعبيها بالنهار حتى تنام بالليل .. حتى تخصصين وكت الج والزوجج ..

شنو البارحة هو نايم بالتراك ..

وانتي بثوبج الاسود ..

لعد شلون ينساها للمرحومة اذا ماغوتيه وخلتيه يحبج ..

باوعت الخالتي ومااعرف شنو احجي .. اذا هي حتى لبسنا انتبهت عليه ..

ام عذاب .. بعدهم دادة لسا جرحهم مانشف لا هو ولاهي .. موهينه عليهم .. هذا مرته وام بنته توفت .

وهي اختها وابوها ..

سعاد .. اي اعرف مو هينه .. بس يدادة عذاب زلمة الف وحدة تتمناه .. 

طول بعرض وشخصيه ورجال من صدگ فوگ منصبه ..

وهو يطلع ويمشي ..

وقبل جانت عندة علاقات هواي ..

واخاف من حزنه يروح يرجع لسوالفه ووحدة تاخذة من مرته وبنته .. اذا ماتملي عينه يطير منها بشربة ماي. 

طلع عذاب يكح .. صباح الخير ..

سكتت عمته وگالتله .. هلا بيك يمة صباح الخيرات . نمت زين ..

عذاب .. اي نمت .. دار وجهة ع امه ..

وين ابوي ..

-طلع عندة شغل ..

-هاااا يمة حضري جنطتي باجر التحق ومناك عندي مأموريه ابقى كم يوم ..

-اي يمة شويه واحضرها ..

سعاد .. يا يعمة شبيك هامل مريتك .. هاي الاشياء تطلبها من مرتك مو من امك ..

حسسها انت مهتم بيها . شمالك اني اعلمك يعمة ..

حسيته ضاج من تدخل عمته بكل شي ..

گال .. لا بس لان ملتهية وي شهد ماردت اتعبها وامي تعرف غراضي ..

سعاد .. اي ادري مرتك طفله بعدهي بس انت عودها وعلمها ع طبعك ..

بقيت صافنة بوجهها هاي ساعة ترفع للسمة وساعة تشمر بالگاع .. شنو طفله ؟؟

گلتلها خاله اني راح احظرهن ..

هو صافن عليه ..

نطيت شهد الخالتي وگمت ..

سعاد .. وين عمة تعاي حظري الزوجج ريوگ وتريگي وياه لاحگة ع الغراض بعد وكت ..

هففففف رجعت سويت بيض وجبن وقشطة وصبيت جاي وجبت الصينيه وخليتها ع الطاوله ..

ردت امشي ..

گال شبيج ماتگعدين واشر ع الكرسي ..

گتله . هاا مااشتهي ..

اشر ع عمته وخزرني ..

فهمت يخاف من اللسان عمته ..

رحت صبيت جاي واجيت ..

بقيت بالنص ساعه اخوط بالكوب ..

بقلمي_الكاتبة_شمس

_________________________

هو ياكل وصافن ع ايدي ..

گال .. مخليه احجار لو شكر . كافي تخوطين .

سحبت ايدي بسرعة ..

بقيت انقش شويه شويه .. بس رغم البرد احس الجو صار حار حيل ..

كملنا ريوگ .. شلت المواعين ونضفت المطبخ ..

خليت اللحم ع النار .. 

ورحت انضف البيت ..

نزل معتز گال اريد ريوگ ..

جهزتله .. 

وبين ماكملت .

ذكرت جنطة عذاب ..

گلتلها خاله شنو اخليله ..

گالت تراكات وملابس داخليه ومناشف .. 

بس ملابسه العسكريه هو يسفطهن بيدة ميقبل ..

دخلت للغرفه اجهزهن ..

اجة دخل ..

شجاي تسوين ؟؟

احضر ملابسك !!

جيبي اني ارتبهن .. اخذهن مني بعصبيه ..

طلعت من الغرفه شفت معتز ..

گال هاي بنيه صديقتج تريدج بالباب ..

اتفاجات ..

طلع عذاب وراي .. 

منو صديقتج ..

-ماادري متشوفني هنا ..

-اسمعي ولج ولزمني من ايدي .. بسرعة تصرفيها منا وتگليلها زوجي مايقبل لو اي عذر ..

باوعتله بأستغراب . ليش انت زوجي .. وبعدين مالك حق تحرمني من صديقاتي شنو ذنبي ..

سحبني للغرفه حيل ..

مااريد اي صديقه بحياتج .. شفتي صديقه اختج وين وصلتها ..

مااريد رحاب ثانيه ببيتي ولا منار ثانيه بحياتي ..

عطت بي بحرگة .. كافي كافي اصحى اني مو منار . منار ماتت قتلتها او مااعرف شنو سوتيلها بس هي مو اني ..

لاتخلط بيني وبينها ..

دخل معتز سحبني منه ..

گال .. كافي عذاب منا عمتي عينها ع الباب .

لاتفضحونا .. ولاتزودها بنيه قلقت ع صديقتها واجت تشوفها شبيها ..

اشرلي اطلع ..

مسحت عيوني وطلعت .. گالت خالتي البنات دخلتهن بالاستقبال ..

تفاجات بنات شنو ..

دخلت شفت زهراء وسهير ..

اول ماشفتهن احس روحي رجعتلي .. ورجعت ايامي وذكرت الجامعه وضحكنا وسوالفنا ..

احس شفت احد من اهلي ..

همة گاموا متفاجأين بحالي ..

ركضت الهم حضنتهم وابجي .. ابجي بحرگة وقهر ..

كنت محتاجة حضن ابجي بي وافرغ همومي ..

همة يبجون وياي .. 

زهراء .. وج هاي شصاير بيج .. ماصدگنا من رحنا الاهلج واختج گالت تزوجت ..

سهير .. ليش ماتتصلين علينا وليش تزوجتي زوج اختج ..

سكتت للحظة ماعرفت شنو احجي .. وعقلي خاني ..

گلتلهن هذا الي صار ..

انجبرت اتزوج عمود بنت اختي ..

زهراء .. بأي عصر احنه .. وليش تتزوجين وانتي مقابله جان رفضتي .. فرح الي اعرفها كانت تدور مستقبلها وطموحها شنو الي خلاج تضيعين مستقبلج وتبهذلين نفسج هالشكل ..

فرح .. بعد وفاة بابا مالنا رأي او قرار .. تتذكرون من كنت اگلكم. بابا مثقف وناطينا حرية الاختيار ومابيوم يجبرنا نختار غصب عنا ..

بعد وفاة راح كلشي وياه وانجبرت بيوم الگي نفسي متزوجة زوج اختي .. 

تعرفون شلون صعبة وحدة تتزوج زوج اختها وتعيش وياه باليوم اموت الف موته واحيا من جديد ..

سهير تبجي واجت حضنتني .. وج شنو هالظلم وين يرحون من ربهم .. شنو الي بيدنا نسويه الج گولي ..

فرح .. جيتكم هاي نستني همومي كلها .. ولاتخافون عليه مدام شهودة بحياتي فآني زينه ..

زهراء .. صدوگ وينها خلينا نشوفها ..

مسحت وجهي وطلعت اجيبها ..

شفت عذاب بالغرفه ..

هيييي اذا عاندتي ادفنج هنا .. بسرعه فضيها وطلعيهن 

فرح .. مو من عوايدي يجيني ضيف واطردة .. اذا عندكم هيج شي روح اطردهن بنفسك ..

من شفته عصب حيل ..

اخذت شهد وطلعت بسرعه ..

گال وين ماخذتها ..

الصديقاتي يشوفنها.. 

غير تاخذين رأي ..

-ليش انت معترف بيها واخذ رأيك ..

تركته وطلعت ..

اووووف ياللساني يجي يوم يجيب اجلي ..

بس لازم مااسكت واجرحة بالحقيقه بلكي يصحى ع حاله ويتقبل الواقع ويهتم ببنته ..

اخذتها الهن تخبلن من شافنها ..

زهراء .. وج شنو هالملاك يخبل .. حقج تتحملين كلشي عمودها ..

سهير .. تشبه اختج مو .. الله يرحمها ..

زهراء .. وزوج اختج . اقصد زوجج اوووه والله مااعرف شلون احجيها .. يعني شلون يعاملج .. معقوله گدر ينسى اختج ..

فرح .. مااعتقد راح يگدر ينساها .. اصلا لاعبالجن زواجنا مثل العالم هو كله عقد لاغير لاتتأملن زايد ..

سهير .. الله يساعدج .. اذا ماالوحدة تاخذ الي يحبها ومختارتة برغبتها مايتسمى زواج ..

فرح .. صدگي مايهمني اي شي بگد خسارتي الجامعتي والكم ..

زهراء .. اي والله اشتاقينا الج حيل والقسم كله يسأل عليج .. هسا طلعنا ساعه علمودج لان رحت الاهلج البارحة وگالولي .. وموبايل ماعندج. ليش ..

فرح .. انكسر وماگلتلهم اشترولي .. من يصير عندي اتواصل وياجن ..

سهير .. يله احنه نروح عدنا محاضرات .بس لاتگطعين بينا وتنسينا ..

فرح .. ان شاء الله..  حضنتهم وبوستهم ..خليت شهد بالاستقبال لان باردة برة ..

وطلعت اوصلهم للباب ..

بالباب .. طلع عذاب وراي .. فرح شهد تبجي استعجلي ..

همستلي سهير .. وج هذا زوجج الله يساعدج من يمي خفت ..

زهراء .. بس حلو وشخصيه .. گرصتها حتى تسكت .

ضحكن وطلعن ..

لگيته مخلي ايدة بجيب البنطلون .ولاف لفاف ع رگبته ولابس سترة ..

اگول البنات انعجبوا بي . حقهم ميعرفون شكله الحقيقي وعصبيته ..

تركته ودخلت ..

گال هاي اخر مرة تدخل هالمزعطة البيتي ..

-لعد من اخذت وحدة بعمرهن ماگلت مزعطة تركته ودخلت ..

عذاب .. اللهم صبرج ياروح .. نصيحة الج لاتخلين راسج براسي ترى تندمين ..

مااهتميت .. دخلت شفت خالتي تطبخ .. رحت جبت شهد خليتها عندها وكملت طبخ ..

وعمتهم مابطلت سوالف ..

وگالتها متاخذينا نزور صار هواي مزايرة ..

اتفقن يرحن العصر ..

گالت خالتي حظري روحج روحي ويانا انتي هم مختنگة من البيت ..

گلتلها لا خاله مااگدر شهد تتمرض ..

خالتي .. لبسيها زين ودفيها ماعليها ..

سكتت لان اعرف عذاب مايقبل لهذا مااناقش ..

خلصت رحت غسلت ملابس شهودة ..

واخذتهن نشرتهن برة ع الحبل ..

سمعت طگطگة ببيت عذاب ..

خفت .. 

عذاب طلع هذا منو الي بالبيت ..

رجعت للبيت .. شفت معتز ..

گتله معتز صوت ببيت عذاب خاف حرامي ..

گال .. لاتخافين هذا عذاب كل يوم اشوفة يدخل للبيت يطلع قهرة ومرات يكسر غراض ويطلع ..

هيج يرتاح يمكن ..

فرح .. وليش ماتمنعه .. هيج يأذي نفسه .

معتز .. مدام هذا الشي يريحة ويخليه ينتقم من الي اذوه ليش امنعه ..

وبعدين اذا رحت راح يتعصب اكثر لان مايحب احد يشوف ضعفه ..

لاتخافين عذاب قوي .. وگدر ياخذ حقه من منار والولد الي خانته وياه ومن رحاب هم ..

وهسا اجة الدور الگلبه خلي يعاقبه وينتقم منه حتى يرتاح ..

استغربت من كلامة ..

شتقصد انتقم منهم ليش شسوه. 

معتز .. لاتهتمين خليج بالفخ الي دخلتي بي وفكري شلون راح تخلصين ..

فرح .. معتز ارجوك لاتحاول تدخلني بمتاهات الي بيه مكفيني .. لو تساعدني كـ اخ او تبتعد عني افضل ..

ابتسم وطلع ..

بقيت بالمطبخ واراقب البيت .. ياترى عذاب شيسوي جوة .. وشلون انتقم منهم مثل ماگال معتز ..

زين رحاب شسوالها ..

اووووف ياربي شنو الغموض ..

شوية ودخل عذاب .. عيونه حمر ولاف ايدة ..

گتله هاي شنو مجروح ..

-مالج دخل وخري من وجهي ..

تركته وصعد لفوگ ..

صاحته خالتي ..

گالتله عمتك تريد تزور .. خلينا نمشي كلنا للكاظم ونتعشا هناك ..

عذاب .. اي خلي ياخذكم معتز وروحوا بس فرح ماتروح .

خالتي .. بس يمة .. 

عذاب .. يمة بلانقاش . گلت فرح ماتروح ..

سكتت خالتي لان عمتي موجودة وماگدرت تحجي خاف تكبر الشغله وعذاب يعصب ..

اشرتلها تسكت وگلتلها عادي خاله اصلا تعودت بالبيت .

اذا هي امي واختي انحرمت منهم بعد ياطلعه تسوى بلا شوفتهن ..

هو صعد ع الدرج ومسوي نفسه مايسمع ..

للعصر گعدت شفت الكل مجهز نفسه ..

سعاد .. ياعمة شو انتي مامبدله ماترحين ويانا .

خالتي .. لا عذاب هنا يبقى ماله خلگ وتبقى يمة ..

سعاد .. اي زين خليهم يبقون سوة بلكي يتعودون ع بعض ..

نزلت تمارة مبدله .. اتعجبت .. يعني شنو كلها حتطلع وابقى اني وياه وحدنا ..

والله اخاف يقتلني ويدفني من غير محد يدري ..

بعدين حجيت بداخلي ..

فرح اسلمي ع نفسج واسكتي لو شنو يسوي اسكتي ترى محد يخلصج من ايدة اذا راحوا ..

بعد ماطلعوا ..

بقيت اني وشهد ع التلفزيون نباوع ..

هي بحظني وصافنه عبالك تفتهم .. 

نزل عذاب مبدل ..ويخابر ..

اي جايكم دقايق ..

غلق الموبايل وگال .. اني طالع الطفله شمحتاجة امي گالت ماعندها حليب ..

فرح .. اي وحفاضات وكلينكس مبلل ..

دار وجهه وطلع من غير سلام ..

من طلع تفاجأت اخذ المفتاح وقفل الباب وراه ..

معقوله الهذي الدرجة الشك وصل بي ..

اضوج من يتصرف هيج بس شأسوي اذا اختي الي خلته مايثق بيه او بأي شخص ..

بقينا شويه ع التلفزيون شفتها غفت ..

رحت صفطت الكنتور.. وگمت اطلع شغل حتى التهي ..

الوحدة تكتل يربي ..

گلت خلي استغل نومة شهد واسبح ..

اخذت بس المنشف والروب لان محد موجود ودخلت الحمام .

جاي اسبح وفاتحة الدوش مااسمع .. سمعت صوت عذاب يعيط ..

وينج وين رحتي ..

خفت عبالي شو شكو اريد الحگ البس الروب ماكو من التوتر ..

خليته ع جسمي ومااعرف شلون البسه .

فتح الباب عليه عطت بي ..

هو بقى صافن ومرتبك وبنفس الوقت معصب حيل ..

گتله اطلع متستحي ..

مااتحملت يشوفني بهيج موقف ..

گمت اعيط بلا وعي ..

#بقلمي_الكاتبة_شمس

يتبع ....... ..

حبايب ليش هيج تفاعلكم ضعيف وتصويت مداتصوتون ..

يعني تطالبوني وتعاتبوني اذا تأخرت وانتو متتفاعلون 

تفاعلكم بالقصص السابقه اقوى من هيج ..

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad