قصة حب في ازقة بغداد الجزء 7-8-9 في 11:16 م مرسلة بواسطة أحمد التكريتي

 

#حب_في_ازقة_بغداد 

#للكاتبة ام مصطفى 

#البارت السابع..

ساره...سعد..ثائر مااريده وحرام تجبرني عليه لااعرفه ولا يعرفني ١٠   سنوات واكثر بالخارج مااريد اسافر الله يخليك..

سعد..ساره اني انطيت كلمه الاابن عمي وصدكيني يااختي هذا يبهذلج باجر عكبه صير عندكم اطفال الفلس حصره عليكم وتبداي مشاكلكم ومراح تنتهي انتي اختي واحبج ورايدلج الخير ثائر انسب الج والموضوع انتهى وبعد مااريد احد يفتحه وباجر راح ارد خبر ال ثائر وانتوا حظروا نفسكم ساره الدنيا صعبه والماعنده فلوس ميكدر يعيش بيها ولتخليني افكر اكو شي بينج وبين كرار لان ساعتها احرك الاخظر واليابس وهسه طلعي وسدي الباب..

طلعت منه واحس حيلي انهد المن اروح والمن اشتكي،رنا كالت راح اتصل بخالتي واحجيلها وتعرفين سعد ميكدر على لسانها

ساره ..ياريت فدوه رنا خابريها واحجي وياها. هسه..

رنا..لا موهسه لان هم معزومين بخطوبه ابن عمهم ويتأخرون بليل يرجعون ....بهل الاثناء سمعت سعد كال اني رايح لبيت عمي ثائر عازمه وراح يبات عدهم..سنين..همه بيت عمنا بس ابدا سعد مخطى باب بيتهم مره كان رايح هو وعمي وسمع عمي كال زوجته سوينا غدا..

وهي راده عليه اكو غدا الك ممسويه هوايه شمدريني راح جيب ابن اخوك وياك..واني الف مره كتلك لتخليهم يوصلون هنا ناس همج مشايفين بس يلفون علينه يصير شي من عيونهم وعمي متعارك وياها وسعد سامعها وطالع من البيت هذا الكلام قبل ليتوفى ابويه الله يرحمه شنو الي تغير هسه وسعد مد جسر الموده بين بيت عمي وبينه ؟؟باوعت من الشباك الي يطل على طرمه بيت كرار شفت ولد  منطقتنا واكفين بالطرمه تعجبت شكو؟؟

بعدها طلعوا ثلاثه شباب لازمين كرار من ايده ورجله  ويحاولون يشيلوا وكرار فاقد ومنتهى منهاره وتبجي ..وبدون وعي صحت على رنا...لج رنا كرار مااعرف شبي شفت ولد المنطقه شالينه وطلعوا من البيت لج رنا كرار راح يضيع من ايدي كوليلي شسوي واني كاتمه صوتي بايدي وامسح بدموع عيني واحس روحي راح تطلع بسبب الهبطه الي صارت 

رنا ..على كيفج حبيبتي ان شاالله ماكو شي احتمال تعبان من الشغل شوفي سعد راح يبات بيت عمي سمعته كال ال امي انتظري هنا ومن تنام امي روحي على منتهى وشوفي كرار شبي اكيد هسه منتهى وحدها ويه ابوها

صارت الساعه تسعه ونص امي دخلت تنام بغرفتها ونزلت اني ورنا

وطلعت من البيت طبعا الي يفصل بيتنا عن بيت ابو كرار بس الحايط وكنا دائما بليالي رمضان بعد الفطور ناس تزور ناس الى وقت السحور طلبت من رنا سد الباب وتنتظرني رحت لبيت كرار ودكيت الباب فتحته الي منتهى حظنتني وتبجي ساره كرار اخويه راح يموت من القهر لج ساره صارله ثلاثه ايام لااكل ولا شرب بس الجكاير وهسه اتخربط واخذوا ولد منطقتنا منتهى تحجي واني ابجي واحس عيوني ورمت من البجي 

سعد..وصلت بيت عمي ثائر كان مسوي كعده بالحديقه نركيله وناصب المنقله ويشوي كباب طبيت للحديقه اجه عمي شافني سلم عليه هو وعصام وطلبوا مني ادخل للبيت بس كتلهم اهنا احسن الهوى طيب وكعده الحديقه حلوه ترخص عمي وضلينا اني وعصام وثائر يشوي بالكباب على المنقله مر من الوقت عشره دقائق او اقل واسمع عمي يتعارك ويه مرت عمي الي صوتها كان عالي حتى اسمع جانت تصيح وتكول ثائر مستحيل ياخذ،ساره اشو لاعلم ولافهم وناس فكر لادراسه ولاشهاده اني اخطب الابني تاج راسها وزينه البنات

ثائر هو عصام اترخصوا مني ودخلوا للبيت اني طكت روحي شكد شايفه نفسها متكبره تحجي من طرف خشمها  حتى عمي ميكدر على لسانها عفت البيت وطلعت ضليت افكر بساره ساره فقيره وهاي مرت عمي ميعيش وياها الفقير ولو ساره راح سافر وتعيش بعيد عنها بس تبقى امه وهي مرت ابنها وجنتها واكيد مراح تعوفها بحاله راح الغي الخطبه وتعذر من ثائر اذا هاي امه من البدايه وهذا كلامه بعدين شلون ؟

ساره ظليت يم منتهى وحدها كاعده خطيه وابوها من يشرب الدوا ينام ميحس بعد واني اشكيلها همي وهيه تصبرني وتكولي عوفيها على الله سبحانه وتعالى الى ان سمعنا صوت الولد بالباب وصوت كرار يتشكر منهم منتهى راح للباب تفتحه واني اباوع عليهم من شباك الهول منتهى حاضنه كرار وتبجي وهو باسها من راسها ويضحك يكولها واالله مابيه شي ليش تبجين دخل كرار كان وجهه اصفر وعيونه ذبلانه شافني ضل صافن عليه سلمت عليه تفاجأ بوجودي بمثل هذا الوقت منتهى عافتنا ودخلت جوه ..الحمد لله علل السلامه كرار من عمري على عمرك ليش هيج كرار لو صاير بيك شي واالله اموت نفسي بعدك منو الي غيرك كرار

كرار..الله يسلمج سوره شلون اجيتي ومنين عرفتي وشلون تبقين هنا ارجعي للبيت بسرعه قبل ماسعد يشوفج..

ساره..سعد بابيت بيت عمي ثائر عازمه اجيت حتى اشوفك كرار كولي شلون نحل هل المصيبه كرار مستحيل اصير لشخص ثاني مااكدر حتى لو اعرف اموت نفسي ..

كرار.اسم الله عليك لتكولين هيج سعد رافضني ليش ماادري كول تلي راده سويته ليش واكف بوجههي من زمان احسه ميحبني حتى من اشوفه واكف بالباب اسلم عليه يرد السلام من وره خشمه..الله شاهد لاغلطان بشي ولامسويه شغله تزعجه شنو السامعه عني ماادري 

ساره والله ياكرار اني هم محتاره راح اتخبل لااكدر اسكت ولااكدر اوكف بوجهه بعد مااطمئنيت على كرار اترخصت منه وطلعت من البيت واشوف سعد كدامي يفتح باب بيتنا...شافني وعيونه تريد تطلع..

ساره . وين جنتي   وشعندج بيت ابو كرار باوع و شاف كرار واكف بالباب ...

جرني حيل من ايدي ودخلي بلبيت وهو يصيح لج شعندج بيت هذا الساقط رنا جانت واكفه تباروع وتبجي وراحت ركض تكعد امي 

وسعد يصيح صخمتي وجهنا ويضرب بيه من كل جانب دفرات برجله على بطني جرني من شعري وظربني بوكس على وجهي ومن تعب طلع احزامه وضل يضرب بيه امي جره من صفحه ورنا وهو ابدا متوقف عن الضرب الى ان جرى دمي من راسي ومن خشمي وحلكي وكوله كوم واني اسمعه يتوعد ال كرار ويكول كرار ياساقط اني الك اذا ماربيتك اني مو سعد

سألتني امي انتي صدوك جنتي طالعه من البيت جاوبتها رنا لان مااكدر احجي وكالتلها كرار تخربط وراحت يم منتهى خطيه بقت وحدها وكرار كان بالمستشفى يعني البيت فارغ وهو جوارينا ضلت امي تحجي عليه  كالت لو كايلتلي جان اجييت وياج سمعت سعد يجاوب على الموبايل ويكول ثائر لتعتذر اني انطيتك مره معلينا بكلام النسوان قصده على مرت عمي اكيد ضليت حاضنه امي وابجي الى ان نمت بحظنها بعد محسيت على شي

ثاني يوم سمعت صوت صياح وبجي الصوت مو غريب عليه هذا صوت منتهى ردت اكوم مااكدر جسمي متكسر استندت على الحايط ومشيت شفت منتهى تبجي وتكول الامي..

ليش هيج خاله الله يرضاه مو احنا جيران وحق الجار على الجار ليش كرار ايده مكسوره وراسه مفتوح وهسه نايم بالمستشفى هو شنو الي سواه كرار راد بتكم ودخل بيتكم من ااباب متريدون كولوا منريد

سالتها واني عقلي مشوش وراسي من الضرب موتني ومركزت على كلامها كتلها منتهى منو الي بالمستشفى..؟؟

شافتني صفنت عليه وحسيتها انقهرت كالت كرار بالمسنشفى 

ساره ليش شبي؟؟

منتهى اسالي اخوج حسبي الله ونعم  الوكيل..

بيومها سعد منتظر كرار براس الشارع ومن شايفه ضاربه بحديده على راسه وعلى ايده والناس مفارقتهم وناقلين كرار للمسنشفى خالتي اجتي الظهر وظلت منتظره سعد حتى تحجي ويا وحاولت تقنعه وماكو نتيجه اول مره اشوف سعد معاند لهل درجه وميقبل يغير رائيه بعد يومين اجه عمي وثائر وقروا الفاتحه بدون موافقه مرت عمي الي اساسا مااجتي وانطوا فلوس الجهاز ال امي حتى نعقد نهايه الاسبوع لان الاسبوع الي بعده ثائر لازم يسافر واني اسافر بعدين اله منتهى اتصلت على رنا وطلبت بنبره حزينه ان ابتعد عن كرار والزواج قسمه ونصيب طبعا تخاف على اخوها حقها  لان سعد مهدد كرار ان يقتله اذا اتقدم مره ثانيه بعدها باايام دخل سعد لغرفتي واني نايمه بفراشي بسبب المرض كال اتصلي على منتهى وكوليلها اخوج مااريده وهذا الاسبوع راح اعقد لا والله العظيم طلقه واخليها براسه لج يريد يوكف بعيني اجاني للمعمل يريد يحجي ويه عمي وثائر والله لو ما العمال لازميني جان دفناه بمكانه

امي سمعت كلام سعد وخافت كالت هذا اخوج اخاف يسويها والولد هلوحيد لااهله وراحت لبيت كرار وحجت ويه كرار كالت ويه منتهى كالت ساره راح تعقد وبعد مااريدك تتقدم البنيه مو من قسمتك وانتهى كولشي حياتي ضاعت احلامي انسرقت وتلاشت الانسان الي احبه من صغري مااكدر ارتبط بي راح اودع كل هذا حتى المنطقه الي ساكنها بيها تمنيت من الله عز وجل ياخذ امانته حتى ارتاح واخلص من الدنيا

وللحكاية بقية ام مصطفى

#حب_في_ازقة_بغداد 

#للكاتبة ام مصطفى 

#البارت الثامن..

نهايه الاسبوع اجه عمي وزوجته وثائر وعصام وعزموا بيت عمي ابو ستار وتم العقد مرت عمي عرفت اني مقابله على الزواج من اثار الضرب الواضحه على وجهي لان قبل يومين سعد ضربني ضربه موت وكانت هاي اخر وسيله الغي بيها الزواج ومكدرت حتى اخواتي مسلمن من ظرب سعد الهن 

ثائر سافر ومره وحده اتصل بيه كان كلامه رسمي ويابه اذا محتاجه شي او تردين تشترين حاجه للعرس واني اجاوب بي بكلمه لا شكرا ونهيت المكالمه بحجه عندي شغل بلبيت والمره االثانيه اتصل اساسا مجاوبته طبعا هو اشترى الي موبايل ونظم وسائل الاتصال بي حتى بسهوله يحجي ويايه 

رنا..هلو احمد شلونك الحمدلله علىالسلامه شوكت رجعت 

احمد..البارحه بليل..رناوي امي راح تجي عليكم باجر تفتخ الموظوع ويه سعد بخصوص الخطوبه اخاف سعد يدك الناقصه ويزوجج لواحد من ولد عمج حتى اخلي الطلقه براسه والله وانشاالله اذا وافق على الاسبوع الثاني تجي الزلم عمامي واولاد عمي 

صدوك..اخبار ساره شلونها

رنا..والله ياسعد ساره عايشه وميته بنفس الوقت النهار كله نايمه بالفراش وجه اصفر لااكل ولاشرب حتى ويانه متحجي ولاتطلع من الغرفه بس من تريد تصلي 

احمد..شوفي رنا موكولشي بالدنيا الي نريده يصير ونكدر ناخذه ونحصل عليه اكو اشياء شكد محاولنا وجاهدنا ونركض وراها متصير من نصيبنا الا اذا الله راد ولو الدنيا كلها ساعدتج وسهلت الامر الج حتى تحصلين عليه وكرار مو من قسمه ساره وان شاالله تعيش حياتها ويصير عدها اطفال وترتاح ويه ابن عمج وتمر كل هاي الاحداث كذكرى حلوه 

رنا...احمد اني هم يجي يوم واصير ذكرى من الماضي بالنسبه الك..

احمد..رناوي انتي بالنسبه الي الماضي والحاظر والمستقبل وان شاالله باجر امي تفتح الموظوع ويه سعد ويوافق..وصيرين من قسمتي..

وانتهى. الاتصال...بكلمات..تامات

من الحب ..والهمسات..❤❤

ساره..مرت..الايام..وتم.عقد قران اختي رناوي هلى احمد ابن خالتي وسط فرحه الاهل والاحبه والرضى والقبول بعيون رنا و السعاده بعيون احمد اما..بالنسبه الي صرت مثل الواحد فاقد الذاكره فقدت القدره على الكلام والتركيز والضحك مااحس بالناس الي حولي

حتى اهلي يضطرون يعيدون السؤال مرتين حتى استوعبه واكدر اجاوب عليه فراغ قاتل بحياتي مثل الاسير الي ينسجن بمكان بعيد عن اهله وعن احبابه واصحابه بماكن بعيد حتى عن البلد الي ينتمي اله وقضى بي حياته..

وبيوم اجه عمي الظهر وكال الاسبوع الجاي ساره تسافر للسويد ثائر محصل اقامه لان معارفه هوايه بالسفاره وسهلوا هوايه امور..

حسيت نفسي فقدت التركيز على كل الحواس عقلي اشتت يعني الاسبوع الجاي اني بغير دوله ومزوجه غير الشخص الي تمنيتى بعيده عن اهلي امي اخواتي بعيده عن صديقه الطفوله منتهى بعيده عن نصفي الثاني كرار اااه ياكرار شلون اكدر انساك واعيش حياتي استغفر باليوم الف مره لان حرام افكر بشخص واني على ذمه شخص اخر بس شلون الكلب شسويله وينسى ياارب  كرار مو من  قسمتي ورضيت بقسمتك بس طلعه من كلبي الهي انت اعلم بحالي فارحم بي ياارحم الراحمين ..

عمي سلم ال امي فلوس غير الي انطاها الها قبل فتره للنيشان وكال شتحتاج عروستنا بس تأمر واحنا نفذ...امي اخذت الفلوس وطلبت مني اروح وياها حتى اشتري فستان للحفله لان تريد تسوي حفلع تعزم بيها جيرانا واقربائنا بس اني رفضت اروح وياها لكن هيه بالنهايه ام وتريد تفرح بنتها وكانت دموعها تجري وهي تتوسل بيه وصعبه دموع الوالده من تبجي وانت تكدر توقفها سلمت امري لله ورحت وياها اختاريت فستان وحجزت صالون لان مرت عمي دزت خبر راح تجي هيه وصديقاتها عازمتهم بيتنا واكيد الغرض من الزياره تشوف عروسه ابنها الغير ملائمه ال ابنها ثائر والي كان هذا اختيار زوجها بيوم الحفله لبست الفستان كان لونه ذهبي عاري الاكتاف مفصل على الجسم ولبست سلسله مال وادي الله يرحمه حرف S..اما الذهب مالتي اساسا ملبسته اكتفيت بسلسه ابويه فتحت شعري الي سرحته بالصالون ونهايه الشعر صير برم واصل لخصري وعليه طوق اكرستال ناعم مكياجي كان كولش هادى حتى بالصالون مخلت هوايه مكياج كالت بشرتج صافيه ميحتاج مكياج طوخ رسمت عيني الي بينت اكبرمن بحجمها وطوخت الشامه حيل حتى توالم المكياج بالوجه رغم هيه واضحه..بعدني بالغرفه صعدت رنا كالت لج ساره اجتي مرت عمي لابسه كول الذهب مالتها طالعه جنها فكتوريا واما صديقاتها مبينات احوال ويباعن بطرف خشمهن..

هبه اجتي يمنا ميته من الضحك تكول تعالي شوفي امي رحبت بالقاصي والداني سلمت على ام محمد وام 

عدنان جوارينا ومرت عمي يمها كاعده ماسلمت عليهم ولاعبرتها بكلمه ساره فدوه  اروحلج من تنزلين انتي هم لتعبرهااساسا خلي نظرج بيعد عنها الله اليعلم شنو من وصف واصفته مره عمي لصديقاتها اكيد راح يتفاجئن بيج 

نزلت الدرج وسط الهلاهل والفرح لعيون الاحبة والحقد والكراهية بعيون اشخاص جالسين امامي ولي اقصدة مرة عمي وصديقاتها قريت الرهبة بعيون عمتي من شافتني وضاعت عليها الفرحة بالاستهزاء بلتقليل من شأني امام صديقاتها 

اغاني واهازيج بلصلاة على النبي واني كل عقي بكرار اذا سمع صوت الهلاهل وافرح بيتنا شنو راح يكون احساسه هم راح يتعذب مثلي وميكدر ينسى حبنا هم اصير ذكرى بحياه كرار اسفه جكد تمنيت الموت وحاولت اخلص من حياتي بس فشلت ...ياربي احميه واحفظه وصبره اهله محتاجيه وبدون مااشعر احس دموعي تجري على خدي ورنا يمي 

رنا..ساره اخذي الكنينس امسحي عيونج الناس انتبهت عليج حبيبتي 

ساره..ياريت الناس ينتبهون حتى لو اخر لحظه يخلصوني من هذا العذاب وهذا الكابوس الي راح اروحله برجلي..لج رنا اختنكت مااكدر اتنفس

رنا..اذا سمع كرار صوت الهلاهل راح يموت..والله كلبي يوجعني

رنا..ساره..بيت ابو كرار صار لهم ثلاثه ايام عايفين البيت رايحين لااقربائهم بالريف لان ابو كرار حيل مريض هناك عدهم مزرعه وبساتين ارتاحي حبيبتي وسلمي امرج بيد الله 

انتهت الحفله وعمتي ام ثائر اخذت صور اليه ترسلها لثائر حسب طلبه وفديوات هوايه صورت هوايه لقطات  بليل كلمن راح لبيته وثاني يوم كعدت الفجر صليت وصعدت للسطح القي اخر نظره لحلمي الي سرقوه مني والي قتله اعز الناس الي اخويه سندي بعد وفاه ابويه كان هسه هذا بيتي وهاي غرفتي رفعت راسي للسما ودعيت ال كرار بالرزق والعافيه والصبروعاهدت نفسي مراح اسامح سعد على كسره كلبي ودعت بغداد والعراق وسافرت الى بلاد ثانيه بعيده لااكون فيها  غريبه حزينه ليس لي اهل ولا اصحاب ولااحباب ..وحيده قاطعه مسافات طويله لااعرف ماينتظرني ..

هل اكون سعيده ام احاول ان اكون سعيده ..ام السعاده لاتعرف طريقها اليه..

وللحكاية بقية ام مصطفى .

#حب_في_ازقة_بغداد 

#للكاتبة ام مصطفى 

#البارت التاسع..

ثائر..كنا بشقه صديقي اني وويايه اربع ولد صديقي محمد مكان موجود تأخر بالشغل ناصبين اكل وشرب نضحك ونسولف طبيعتي مااثكل بالشرب لان معدتي اتأذيني محمد وصل متأخر وظلينا كاعدين شرب وونسه وضحك وصلت رساله على الواتساب عبالي من هاله صديقتي  الي بالطابق الاول دزلي صور وهي بملابس النوم تغريني حتى اروح الها بليل فتحت الرساله كانت صوره انتظرتها تحمل طلعت صوره مال ساره  كولش حلوه ظليت اتفرج على الصور الي دزتهن امي والفديوات .محمد سألني شنو القضيه 

ثائر..تدري محمد ناسي باجر راح توصل مرتي ضليت اضحك رغم صار اسبوع ارتب بالقضيه ويه سعد والوالد وصول ساره..

محمد..طبعا..اذا الست هاله ماخذه كلبك وعقلك ...

ثائر..لالا..لاعقلي ولا كلبي تعرف بي كولش زين اني طير حر مااوكع بشبكه احب اطير من شجره لشجره محمد...وهاي المحروسه الي راح تجي شلون..شبكتها..

ثائر..وعيونك..صغيره وخام وكواشي متعرف بالدنيا راس الشارع مواصله..لعد اني هيج غبي واورط نفسي بالزواج..غير لكيت بيها المواصفات الي اريدها..

محمد..بالعافيه عليك..امك شكد داعيتلك....ثاني يوم كنت بااستقبال ساره..

ثائر..الحمد لله على السلامه شلونج

اكيد هسه تعبتي راح نوصل للشقه وترتاحين..

ساره..من..دخلت للشقه كانت بارده  او يمكن اني شعرت بالبروده 

 جميله حيل بس يرادلها ترتيب  تحتوي على غرفتين غرفه نوم كبيره والغرفه الثانيه بيها اشياء كمخزن صغير والصاله مفتوحه على المطبخ بديكور حلو..وصحيات .فتحت البرده مال شباك المنظر كان كولش حلوه شارع واشجار على الجانبين وسوبر ماركت كبير وناس كاعده بالمتنزه وناس تمشي ظليت صافنه عليهم الى ان سمعت صوت ثائر الي اساسا نسيت هو يمي واكف ..وحجه ويايه كال..ساره راح اطلع ارجع الشغلي مظطر واالله اخذي راحتج بعد ثلاث ساعات ينتهي دوامي واجي للشقه حظني حيل وهمس بااذاني اكو ثوب نوم بالغرفه على الجربايه اريد من اجي اشوفج لابسته موتنسين ارتاحي هسه اكو اكل بالاوفن اذا جوعانه اكلي واذا احتاجتي شي اتصلي عليه ..حسيت من اول ليله زوجت انسان كان بي اطباع دوله اجنبيه دخلت للغرفه الصغيره صفطت غراض قليله كانت على جهه نظفتها وفرشت بيها سجاده الصلاه وخليت القران على لوح خشبي وصارت هاي غرفه خاصه بيه للصلاه والعباده دخلت للحمام سبحت وطلعت  لغرفه النوم  الي كانت كبيره واخشابها كولش حلوه والجذب اهتمامي الميز عليه انواع من العطور حتى عطور نسائيه يمكن ثائر اشتراها بالجديد .اخذت ثوب النوم الي على السرير شفته حيل عاري واني بعدني ممتعلمه عليه بالرغم امي اشترت الي ملابس نوم بالنسبه لهذا الثوب استر بهوايه 

بدلت ولبست روب على هدومي وظليت بالغرفه تعبانه بس مااكدر انام سمعت صوت الباب انفتح هذا اكيد ثائر حسيت بطني كامت توجعني وراسي يريد ينفجر دخل للغرفه كال جبت اكل سفري رتبي السفره واني راح ادخل للحمام ..

دخل ثاىر يسبح واني طلعت رتبت الغراض الي جابهم على السفره كيس بي بيتزا  وهمبرغر والكبس الثاني كان بي مثل البطل عبالي مشروب غازي ببسي اوسفن اخذته بالثلاجه طلع ثائر من الحمام وراح للغرفه مشط وخله عطر. وطلع شافني بالصاله اجه عليه وكال..

طالعه حلوه بالحفله معبالي هيج جسمج حلوه وهو ديحجي شافي الثوب الي لابسته صاح..كال اني موكتلج لبس الثوب الي جبته الج ليش تعاندني بعدني اريد اجاوب...

كال مااحب المراه الي تعاند زوجها بسرعه روحي بدلي وتعالي ومنا وجاي كلامي  الج يتنفذ بالحرف الواحد..لان متعرفين اذا اعصب شيصير كوني طيعه ادللج ..

منطاني مجال احجي حتى لو كلمه واحده دخلت شفت الثوم مره ثانيه ياالله هذا حيل مفظوح. لبسته ولبست الروب فوكاه مكدرت اطلع الا من صاح ساره وينج طلعت بخطوات بطيئه واحتي عيني على الميز الي كدامه كان عليع  شراب وكرزات واشياء هوايه ظليت صافنه سألته كتله ثائر انت تشرب مو حرام ميصير  ..شافني جرني من ايدج ونزع الروب الي لابسته بخفه ايده وشمره بعيد ..

هو شنو الحرام راح صيرين مصلح براسي واعظه دينيه اكولج على شي من البدايه ممنوع تحاسبني ولا ساليني حتى مااذيج واضل احبج هو كم ساره عندي اني..فدووه الله.. ..

ساره..العلاقه بين الرجل وزوجته كولشي بيها مباح لكن بدايه الزواج الخجل يمنع العروس من ممارسه الحلال ويه زوجها لهذا استمر ثائر بعدم احترام المشاعري ولخجلي استباح جسدي بكل قوه وعنف تجاهل دموعي والمي وكلمات التوسل حتى يشفق عليه ويتركني ارتاح الى ان انتهى مني ونام حسيت جسمي كله يوجعني  الم فظيع بااسفل بطني دخلت للحمام ومن طلعت صليت ودعيت بالهدايه ال ثائر الى الطريق الصحيح 

 ثائر كعدت الصبح متعلم اكعد وحدي ساره مكانت بالغرفه كلت احتمال بالمطبخ دخلت للحمام ومن طلعت لكيت الفطور جاهزعلى الطبله والشاي بالترمزكتلها صباح الخير..

ساره..صباح النورصوتي كولش ناصي بسبب ليله الماضيه 

ثائر..اباوع عليها العيون وارمه وكوه تمشي انقهرت عليها بس فقدت بنيه وخام وحلوه وبين ايدي ضليت اتكلم وياها وهي عيونها منزلتها متباوع عليه الى ان كملت وطلعت للشغل ..

ساره..ضليت وحدي ارتب بالشقه صار عندي نزف بيت وقت لااخرماادري خربطه هرمون اوبسبب حالتي النفسيه وهذا الشي جعل ثائر يتعصب عليه حتى مسأل شنو السبب ولا كلف خاطره يعرضني على دكتوره تشوف حالتي ومع هذا عذرته ومبينت اني ضايجه ااستقبله من الباب بكلمه الله يساعدك واجهز اله اكل ياخذه ويا للشغل بعد ايام صرت زينه وسجلني ثائر معهد تعليم لغات صرت ادرس ومن عندي وقت فراغ اجهز وجبات اكل ال ثائر اخليها بالثلاجه فطائر كيك وانواع المعجات..صار تقريبا اسبوعين اني بالسويد ثائر بس بليله العرس اتقرب مني حتى من صرت زينه كان مبتعد كنت فرحانه بداخلي لان ميقترب مني  و بيوم ثائر اتاخر حيل هويجي ساعه ٨ والساعه هسه بالوحده الى ان سمعت انفتحت ااباب كان شكله موطبيعي عرفته شارب نزع ملابسه ودخل للحمام

كنت بالمطبخ احظر اكل ياخذه  الثاني يوم اجيت اخذ الملابس للغساله لكيت قميصه بي حمره وعطر نسائي استغفرت الله ربي وتنفست بعمق ضليت شايله القميص باايدي واتفرج عليه الى ان سمعت صوت ثائر يكول عوفي الملابس تعالي نامي باجر غسليهن كان يريد يخفي الاثر الي بالقميص متكلمت ويا ولاكلمه طلعت وعفته وحده بالغرفه كملت شغلي ودعيت ربي يصبرني ويهدي ..

استمر الحال كلما يرجع متأخر اعرفه كان بحضن وحده من النساءبيني وبين نفسي قررت اتكلم ويا بس ترددت لان راح يواجه كلامي ..ياإما يكذب ويكول ماعندي شي ويبرر افعاله بالخداع ..او راح يواجهني ويكولي هاي حياتي الخاصه ومااريدج تتدخلين بيها ويسوي الي يريده لهذا قررت اسكت خاصه هو ممقترب مني فالسكوت افضل ..

كل زوجه من تعرف زوجها يخونها تهدد وتصيح وتزعل وتتعصب وتطلب منه ان يتركه او تعوفله البيت وتطلع الااني كنت حيل هادئه والسبب اانه ثائر مدخل لاعقلي ولا كلبي وكانت العلاقه بينا بس على كد سؤال وجواب..

رنا..من..سافرت ساره تركت فراغ جبير بحياتي رغم احمد ممقصر ويابه بس تبقى هي الاخت الجبيره الي تخاف عليه وخاصه ساره بالنسبه الي الام الثانيه بيوم احمد طلب مني نطلع بعد دوام الكليه اخذي لمكان هادى حيل احمد يحب الهدوء عكسي تماما اني احب الهوسه والضحك والصياح دائما خالتي تكول والله متعجبه شلون راح تتراهمون المهم اثناء كلامي ويا سألته كتله احمد بيوم النيشان مالتي ليش مدخلت ولبستني الذهب بيدك واني اشتريت فستان نفس اللون الي تحبه وعشر ساعات بالصالون وتالي تجي خالتي تلبسني الذهب لو متكلم مم البدايه جان لبست دشداشه ربع ردان وفضيناها..

احمد ضل يضحك وبعدين كال شوفي رناوي انتي بالنسبه الي مو بنت خالتي  وحبيتج وخطبتج..لا

انتي حياتي الي اعيشها ثقي بالله

واني بالموت 

 مااخاف على نفسي مثل مااخاف عليج من انتي صغيره وتجين ويه خالتي تبجين من سعد اتمنيت اخليج بكلبي ومااخلي احد يضربج بورده تمنيت تكونين الي ودائما من اروح للزياره ادعيلج وانسى ادعي الروحي وعاهدت نفسي اذا خطبتج ماالزم منج شعره لحد يوم زواجنا احافظ عليج مثل الجوهره الثمينه الي يحفظوها بصندوق ويكتبون عليه ممنوع المس هاي انتي الجوهره مالتي ..

رنا..احمد يحجي واني صافنه على كلامه وذكرت ساره نزلت دموعي عليها الله يهنيج ياساره وتنسعدين بحياتج ..

زواجي اقترب ودائما نطلع اني وامي نشتري ملابس واشياء خاصه الي ساره اتصل عليها ماكو شي جديد بحياتها اختي راح تخبلني تعرف بزوجها يخونها وهي ممهتمه والمشكله قايمه بواجبه هم

رنا...ساره انتي صدوك تحجين شنو سكتين عنه لا ومشغلج خدامه ابن فكتوريا احجي ويا اتعاركي اخذي حقج انتي مو بالعراق بتلفون واحد للشرطه يدخلوا السجن اذا راد يسوي شي او يأذيج

دائما اتكلم وياها بس هي ساكته تكول اهم شي ممطالبني بحقه خلي مبتعد عني افضل .

بيوم خالتي عزمتني على عرس ابن عمهم كان الاتفاق اجي بيت خالتي ونروح سويه اني وخالتي ورند واحمد طبعا اخذت الموافقه من امي وسعد..وياريت مموافقين وياريت اتكلموا وكالوا لتروحين ياريت لو ما عاندت نفسي الي جانت مخنوكه حيل من هاي العزومه وياريت لو يرجع الوقت واكول لا مااروح وياكم وابقى بغرفتي واقفل الباب عليه وياريت..وياريت..

وللاسف كلمه ياريت متفيد بعد ..

بيومها داومت بالكليه جان عندي امتحان الخط مال الكليه ينزلني قريب على بيت خالتي الطريق كله ازدحام فاتصلت رند كالت احنا راح نروح اني وامي واحمد راح ينتظرج وتجون سويه لبيت عمي وصلت بيت خالتي كان الباب مال الطرمه مفتوح على غير العاده هم بابهم يسدوا ميقبلون الولد ضل الباب مفتوحه دخلت للطرمه اتصل على احمد اكثر من مره ميرد اتصلت برند كان موبايلها مغلق كولش ضجت لااني الي رحت وياهم ولااني الي رجعت بيت اهلي

كلت خلي اتصل بااحمد اخر مره واشوف  بعدني اريد اتصل سمعت صوت داخل اابيت دخلت للمطبخ واني اصيح احمد ..احمد ..ماكو جواب ..الاصوات كانت من الطابق الثاني يعني غرفه احمد ومهند اقتربت من الدرج الصوت كان واضح اكثر وكلام ممفهوم وصوت واحد اشبه بالنعسان صعدت نص الدرج وصحت احمد وينك اصيح عليك ليش مجاوب ونفس الشي ماكو رد خفت اكثر كلت احتمال احمد بغرفته ومريض ميكدر يجاوب كان باب الغرفه مفتوح نصه   

((((كانت قبضه ايده قويه بالرغم مبين عليه هزيل وتعبان حاولت اكوم مكدرت كتفني وربط ايدي وثقل جسمه عليه ظليت اعيط واترجاه يتركني مزق ملابسي وصار يشوه بجسمي بكل وسيله مره ضرب هره عض بااسنانه واني اصيح من الالم والخوف على نفسي سلبني عذريتي بكل وحشيه وحيونه) ))))

للحكاية بقية ام مصطفى

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad