قصة حب في ازقة بغداد الجزء 4-5-6 في 11:41 م مرسلة بواسطة أحمد التكريتي

#حب_في_ازقة_بغداد 

#للكاتبة ام مصطفى 

#البارت الرابع والخامس 

#البارت الرابع

ساره..سويت فطائر على العشا كميه كولش هوايه واخذت قسم منه غلفته بسليفون حتى اخذه ال كرار خطيه يتعب بالشغل صار الليل وكملت صلاه وقراءه القران والدعاء سمعت صوت بالسطح اكيد هذا هو صعدت وفتحت باب السطح شفته يصفط بالطابوق ومواد البناء الي اشتراها ويغطيها ويبعدها عن المي حتى متتلف.النشاط والهمه يرسمن معاني وجهه ويه كل شي يحمله يكول ياالله واني اردد ياالله كون بعونه الى ان التفت وشافني صافنه عليه .

صباح ااخير سوره ليش واكفه بعيد تعالي شوفي كملت كولشي بقى بس البناء ابدي بي بس اكمل  ويه ابو الشغل..

صباح النور..ان شاالله تكمل والله يسهلها علينا بس كون انت سالم ومااريد شي من الدنيا بس انت هاي سويت الك فطائر اعرفك تتعب بالشغل وتنسى نفسك 

كرار تسلم ايدج شكد امي داعيتلي حتى كلبج يحبني ادعوا الله عز وجل يكمل كولشي بدون مشاكل حنى تنورين بيتي ودينتي كلها 

تدرين..بالشغل يكولون ليش تحجي ويه روحك وميعرفون اني اتخيلج كدامي واسولف وياج يمكن الى ان نزوج صاير مخبل.

ساره..اسم الله عليك ان شاالله عدوك ضليت اباوع على اخر نجمه بالسما قبل متشرق اشعه الشمس وادعي الله يجمعنا سوه وميفرقنا 

ومرت الايام وكراربنى الغرفه واشترى غرفه اخشاب بسيطه بس بعيني احلى غرفه وصبغها وصارت تجنن وجنت اخيط ملابس عند منتهى هم اساعدها وبنفس الوقت مااحتاج فلوس نيشان ..

كالوا الكلوب سواجي مره صعدت على السطح اباوع على الغرفه وصار كرار بوجهي ابتسم وكال

ليش تباعين رجاءا عندي حبيبه تغار عليه..

صوج حبيبتك المفروض متخليك تصعد السطح وبنات مخلتنا يشوفوك ويخلون عينهن عليك 

كرار.ياهيه تخلي عينها عليه اشو حافي ويادوب مدبر حالي غير انتي امج داعيه عليج وحبيتني 

ساره.امي داعيتلي اصلا ليل ونهار تدعيلي وتحبني اكثر منك

مسنحيل احد يحبج بكدي  حجيت ويه ابويه الجمعه جايكم نخطب ونعقد بنفس الوقت شنو رائيج..

انشاالله شوكت يجي الجمعه احسه بعيد حيل 

يجي حبيبه وازوجج وتنورين حياتي ..

كرار كان يخاف عليه حتى من احجي ويا كلامنا ميكول خمس دقائق يكول انزلي اخاف سعد يشوفج او احد من الجيران مرات اضوج وبعين اكول كلامه صح اذا شافني سعد صير مشكله اله واليه..

اتمنى..ان لايغمض لي جفن..

حتى لاتظيع ثانيه دون ان اراك

فلي فكر ولي قلب باأسمك..

وتبقى..عيني..لاترى..سواك

نزلت جوه كان سعد جاي من المعمل سمعته حجه ويعده امي كال ابن عمي ثائر الي بالسويد باجر يوصل اجه بااجازه يشوف اهله ..ثائر اكبر اخوانه عمره تقريبا ٣٢ سنه عنده شهاده هندسه حاسبات ويعمل بوظيفه بااحدى الشركات بالعاصمه ستوكهولم السويديه..وظعه كولش زين حسب كلام سعد ممزوج وكان عمي يعاني من تصرفاته لان ميقبل يزوج ويخاف عليه لاياخذ وحده سويديه ويريد يزوجه بنيه من بغداد ومرت عمي تحاول تزوج ابنها بنيه بموصفات خاصه جمال شهاده مستوى مادي عالي وطبعا صديقاتها ال مرت عمي يمتلكن هاي المواصفات واكثر كانت مرت عمي ستار تحجينا عليها لان احنا علاقتنا بيها شبه معدومه بس عمي كان يجي علينا دائما ونشوفه..

عمتي ام ثائر تحب الكشخه ومتحب تتعرف الا على صديقات من مستواها المادي ودائما تكول مرت ابني ثائر اخذها مال وجمال متعرف القدر راح يسخر منها وابنها يزوج وحده بعيده عن هذه المواصفات غير جمال الوجه نوع ما

البارت الخامس 

وصل ثائر وكان سعد بيت عمي وعزمهم على ثاني يوم على غدا وصادف يوم اربعاء سعد طلب منا غدا مرتب لان بيت عمي كلهم راح يجون يمنا بما بيهم مرت عمي الي انقطعت عن زيارتنا اكثر من خمس سنوات وعمي وابن عمي الاصغر من ثائر عصام 

سعد يمه خلي ساره سويه برياني وتشريب لحم عني طلبه وكال اريده من ايد ساره 

_اي يمه يعيني وراح اشوي ثلاث سمجات واخبز خبز عروك عيب من بيت عمك صار هوايه مجاينه 

ساره..اسمع امي تحجي ويه سعد مو بسبب صار هوايه مجاين وانما امي تحب تغث مره عمي وتقهر غرورها مره عمي اذا يصير عدها عزومه مثل هاي تطلب اكل مطعم لان اكلها موطيب ومتحاول تعب روحها عكس عمي الي يحب اكل البيت ودائما سعد ياخذ غدا..للمعمل

تمن باكله..او كبه حامض او تشريب لحم يتغدون هو وسعد ..

بيوم العزيمه رتبنا كولشي حسب اومر الولده حتى ترتيب واختيار الصحونوكان غاية بل دقة وصلوبيت عمي ساعة ١١ وكالعادة رنا باستقبال الضيوف شخصيتها قوية تضحك وتسولف مو مثلي اني خجولة نوع ما ضليت بلمطبخ واكفة مطلعت سلمت الى سمعت عمي كال وية سارة سويتلي البرياني لولا 

دخلت عليهم وسلمت على عمي ومرت عمي وعصام  جنت كولش خجلانه طبيعتي ماادري ليش وانتبهت على شاب كان كاعد بصف سعد ونظراته تخترقني وتحاول تقراء كل شي عني 

حمد الله على السلامه ثائر شلونك

ثائر..اهلا ساره شلونج ان شاالله زينه

الحمد لله الله يسلمك طلعت بسرعه من الاستقبال وعمي صاح ساره ويه التشريب مال عمج؟

جاوبته واني بالمطبخ كتله صار ودقائق السفره انمدت بالاستقبال 

عمي صاح عاشت ايدج ورائي عمتي المناقض وهي تكول ثائر تعود على الاكل الخفيف بالخارج مياكل ثكيل

ثائر لاوالله يومه مشتاق لهذا الاكل الطيب عاشت ايدج ساره 

ساره اكتيفت بالابتسامه ورحت للمطبخ مكعدت وياهم اقل الربع ساعه واني ارتب بفناجين الشاي سمعت صوت ثائر..ليش متغديتي ويانه؟

ساره..بالعافيه اتغدى بعدين طبعا اتكلم ويا بخجل ومااباوع بوجهه 

ثائر.. عاشت ايدج  عبالي ابويه يصبغ بيج طلعتي طباخه ماهره 

ضحكت ودنجت وظليت اراقب الشاي وريحه الهيل عطرت المكان 

ثائر..ساره شعجب بطلتي من المدرسه..

مكدرت اداوم ابويه كان مريض وضاعت عليه السنه 

زين ليش مكملتي خارجي؟

سعد مقبل اطلع واقدم على الامتحان..

محاولتي تقنعي جان هسه مكمله وداخله كليه مثل رنا..

ضحكت رنا مقبلت تبطل سباعيه ظلت محافظه على دراستها بس اني خفت اناقش سعد وتركت الدراسه ثائر كان يسال حتى يفهم طبيعه الشخص المقابل ومدى ادراكه للامور ومعرفه شخصيته اذا كان قوي اولا..

ثائر...احب الحريه اطلع اسافر اتونس وظيفتي زينه دخلها المادي لاباس به عندي علاقات لاتحصى ويه البنات اشكال والوان بس حاليا مرتبط باامراءه عربيه ساكنه نفس العماره بالطابق الاول مطلقه جميله جدا احتاجت مني شغله بالسفاره واني عندي معارف وكملت شغلتها حبت تشكرني عزمتني على العشا كانت واضحه من البدايه بحيث الفراش جمعنا من اول لقاء مريحتني حيل حاولت مره تعرض عليه الزواج ولو بالسر رفضت بحجه عندي حبيبه بالاضافه الي اريد ازوجها لازم تكون خام متعرف شي غير البيت وتربيه الاولاد

ظل والدي يلح عليه ارتبط وامي يوميه جايبه الي صوره بنيه من بنات صديقاتها المهندسه والدكتوره والي عدها لغات بس اني اريد زوجتي تكون عميه وطرشه وخرسه لاتسال وين رايح وين جاي (غير اخنكها بايدي)اصدقائي اربعه القريب عليه حيل وصديقي الصدوق محمد نفس الاستايل مالتي اذا شفنا بنيه عجبتنا نتراهن ياهو الي وكعها قبل الثاني وعلى الاكثر اني لان شكلي حلو بلاغرور طويل وجسمي معضل العب حديد 

اليوم معزومين بيت عمي ظلت عيني على ساره حسيتها هادئه وجهه بريءمطيعه لان اني عندي خبره بالبنات حليوه عيونها كبار وشامتها على خدها توكع الصكر خليتها بعقلي بس بعد يراد اعرفها اكثر حتى احدد موقفي وياها 

ظليت اني وسعد نتناقش وعرضت عليه يفتح محل حاسبات بالاضافه الى شغل المعمل الصبح واني اساعده بالاستيراد كقطاع خاص وهو رحب بالفكره بدينا ندرس الموظوع من كل جانب 

حبيت اهذ رقم الموبايل مال ساره حتى اتواصل وياها فكتلها..

ساره بعد اسبوع او عشره ايام بالاكثر اني راجع للسويد اريد رقم تلفونج حتى اذا اشتهي اكله سويها اتصل بيج واتساب تصورين السفره 

امي حجت اي وشلون توصلها الك؟

يوم بس اشوفها اشبع لان العين تاكل ..كولها ضحكت 

ساره..اذا على الطبخ سهله بس اني ماعندي موبايل 

ثائر..صدوك..لو تشاقين؟اكو بنيه ماعدها موبايل...

رنا..اي ساره ماعدها مرات تحب تصفح على النت تاخذ مبايلي او مبايل هبه اكولها عيني اشتري ،واحد تكول اضوج منه اخاف اتعلم عليه وضيع عليه اوقات الصلاه وشغل البيت 

اما عني اني رنا فالموبايل كول عائلتي الفايبر ابني الصغير والواتساب ابني الكبير والفيس زوجي يااخي كولها يحتاجلهم رعايه واهتمام عاد اني اهم شي عندي الاهتمام والعنايه بالعائله المثاليه

ثائر..طبعا الله يساعدج ويكبر عائلتج اكثر واكثر 

ضلينا نضحك كان سعد ويه ابويه بالاستقبال لهذا البنات ماخذات راحتهن ..

ضليت اباوع على ساره من خجلت وكالت ماعندي موبايل..وهاي صفه احبها ان تكون زوجتي ماعدها شغله فيس ولايك واعجاب..

والله ياساره هوايه صفات بيج عجبتني واحتمال كبير تكونين حرم ثائر بيك وانتي الممنونه

ساره..من..طلعوا..بيت..عمي.ابو ثاثر كان سعد حيل فرحان ومتحمس للمشروع الجديد..خاصه ثائر قدم اله كل التسهيلات الازمه والمطلوبه وعنده سلفه راح يشتري بيها المحل ويستورد حاسبات وبعدها يريد يشتري سياره حلمه يصير عنده سياره موديل حديث..

سعد حقق جزء من احلامه ويارب يحقق الجزء الثاني ويزوج ويستقر 

بيوم الجمعه سعد ميطلع من البيت يقضي وقته على الموبايل مااعرف شلون كنت اشتغل تفكري كله بالخطار الي راح يجون العصر الغدا  سويته شلون ماكان امي خطيه كملته عني وللعصر ساعه ٤ اندكت الباب امي فتحته 

السلام عليكم خاله ام اسعد شلونج

سمعت صوت منتهى وباوعت من الشباك شفت منتهى وخالتها واكفين بالباب بسرعه سديت البرده ودخلت للمطبخ امي دخلت الخطار بالاستقبال الي اجه كرار وابوا كرار وزوج خالته واصدقائه اثنين بالشغل  ومنتهى وخالته 

اجتي امي كالت السعد ودخل سعد للاستقبال منتهى وخالتها تركوا الزلم واجوي بالهول كنت اسوي الضيافه شاي وكعك حظرت ايدي متاخذ على الشغل صعدت على. رنا كتلها اجويه بيت ابو كرار تعالي راح يغمى عليه من الخوف والفرحه 

 رنا..ساره والله فرحتلج واخيرا كرار جهز نفسه وكمل واجه يخطبج يارب يتممها على خير اني راح اجي وياج ارتاحي انتي واكعدي بصف منتهى

نزلت جوه ورنا دكت الباب على سعد حتى ياخذ الضيافه بس رنا اشرتلي كالت سعد صاير عصبي احنا كاعدين بالهول وصوت سعد كان مسموع نوع ما..

جيتكم على عيني وعلى راسي.

بس ماعدكم قسمه يمنا...

وللحكاية بقية 

ام مصطفى

#حب_في_ازقة_بغداد 

#للكاتبة ام مصطفى 

#البارت السادس 

متى ..ستعرف..كم..اهواك..يااملاً..

ابيع..من..اجله ..الدنيا..وما..فيها

لو تطلب..البحر..في..عينك.اسكبهُ.

او.تطلب..الشمس..في..كفيك..ارميها..انا..احبك.فوف..الماء.. انثرها..

وللرياح..والامطار..اسقيها..

انا..احبك..فوق..الغيم..اكتبها..

وللعصافير..والاشجار..احكيها..

انا..احبك..حاولي..ان..تساعدني

فمن..بدا..المأساه..ينهيها..

ومن..فتح..الابواب..يغلقها...

ومن..اشعل..النيران..يطفيها

البارت السادس

ماعدكم قسمه يمنا 

 ساره مهرها غالي وانتوا ناس على كد حالكم احنا بناتنا تربيه دلال وحدتهن تاشر والي تريده يجي كدامها وكرار لا وظيفه ولاعمل شغلته كاسب يوم اكو يوم ماكو شلون راح تعيش هسه لو على الاقل متعين وعنده راتب ثابت ماعنده مانع 

كراى..اني مقدم على الشرطه وان شاالله يطلع تعيني وحاليا اشتغل وماكاعد والحمد لله الفلوس الي حصلتها من البناء ووالسلف اكدر ازوج بيها ومااحتاج شي الغرفه اشتريها اخشاب نصبت واذا تحب تفضل ويايه واي نقص اني سداد

سعد..اني مايهمني غرفه واخشاب اني الي همني يكون عندج وظيفه مستقبل امن راتب على شهر تستلمه حتى اختي متحتاج شي وبعد مااحسب حساب الباجر

كرار..مو كتلك اني مقدم على تعين صح ممعلوم شوكت يطلع بس تبقى يم الله واني عمري مكعدت بلاشغل ايدي ماخذه عليه خلفه بناء وايدي شغلها ذهب وثانيا الوظيفه عمرها مكانت ظمان الظمان الوحيد اخلاق الشخص وسمعته هذا الضمان الي المفروض الانسان يعتمد عليه مو الوظيفه الوظيفه تجي وتروح بس اخلاق وتربيه الانسان ثابته مستحيل تتغير

كنا نسمع من الباب كلامهم منتهى حيل انقهرت هيه وخالتها  ابو كرار كان مريض ميكدر يتكلم هوايه وانتهت المقابله وكان سعد جوابه ان نسال عمامنا ونرد خبر رغم عمامي من زوجوا بناتهم عمرهم متصلوا على ابويه اللله يرحمه مجرد نسمع بت عمي فلان الحنه مالتها اسبوع الجاي او عرس فلانه بعد يومين كنا نحضر الحفله عادي بدون منسأل اي شي..

طلعوا من البيت واجه سعد كال ساره شنو رائيج بكرار؟.

ساره..شوف سعد بيت ابو كرار ناس مستورين نعرفهم من زمان عشره عمر وام كرار خطبتني من ابويه الله يرحمه وهو وافق بس كال خلي يكون نفسه وبالنسبه الي مااريد شي من الرجال بس تكون سمعته طيبه وعنده ديانه حتى يصوني ويخاف عليه..

واعتقد بيت ابو كرار سمعتهم طيبه ومثل الذهب والفلوس ياخويه تجي وتروح مو مقياس للانسان لان مهما زادت ضل مجرد ورق اله قيمه ماديه لااكثر ولا اقل

سعد ..ساره تحجي ويايه  واني فكري راح للغدرت بيه ليش مقبلت بعيشتي كل فلوسي الي احصلها جنت اخذالها هديه مرات ذهب ومرات ملابس وممقصر عليها بشي معقوله لان ساكنين منطقه شعبيه

الى هسه اذكر شكلها وهيه تركب السياره ويه خطيبها الي انطبعت ملامح وجهه بالي ومااكدر انساه دائما اتخيلهم سوا ناموا كعدوا طلعوا .....احس نفسي صرت اعصاب واريد زله حتى افرغ حركتي بساره بس المشكله كانت تتكلم ويايه بهدوء وعينها مرفعتها من الكاع ولااكدر اسمعها لان كلامها يذكرني بموقف ندى الحقير

المهم اني اسال عمامي 

ساره..بس انت اخويه الجبير وبمقام ابويه وولي امري يعني انت بيدك كولشي ليش تريد تاخذ راىي عمامي هم من زوجوا بناتهم مجرد عزمونا على الخطوبه ولااحد اتكلم منهم ولا اخذ رائينا او انطانا خبر 

سعد..هاي الاصول ساره

صعدت لغرفتي وضليت ابجي امي ورنا وهبه يمي 

يوم الله يخليج اقنعي سعد ليش هيج معند كرار سوه كول الي راده سعد ليش واكف بقسمتي شنو عيبه كرار لان ماعنده فلوس اني راضيه هو شعليه

الام..لايمه شلون شعليه غير اخوج يخاف عليج ويحبج بس وعيونج هسه ادخل لغرفته واحجي ويا واقنعه وان شاالله تصيرين من قسمته ولتنسين الزواج قسمه ونصيب..

ثاني يوم قررت امي تحجي ويه سعد من يجي من الشغل امي حيل تحب بيت ابو كرار لان همه خوش ناس بالاضافه ان كرار معروف بالمنطقه بااخلاقه وسمعته الطيبه وامي تنمنى ازوج قريب عليها حتى تظل عيني عليها 

سعد راح يسال عمي ابو ثائر وياخذ رائيه رغم هم عندهم اربع بنات زوجوهم بدون ميدزون خبر او ياخذون رأينا ..

ثاني يوم الصبح كنت حيل مختنكه وكوه اشتغل وامي خطيه عينها عليه الى ان صار وقت صلاه الظهر صعدت صليت ونزلت اسوي غدا اجه سعد من الشغل طبعا ميباوع بوجهي مااعرف ليش كال حظريلي الحمام رحت بسرعه خليت ملابس اله وحظرت الحمام بعد ماكمل صبينا الغدا وكعدنا كلنا على السفره امي ورنا كاعدات بصفي اتكلم سعد وياريت محجه ولا كال..

يومه اني حجيت ويه عمي علمود سالفه بيت ابو كرار وخطبه ساره..

الام...والله يايومه ياسعد بيت ابو كرار ذهب ومراح تلكه ناس مثلهم وبتنا قريبه يمنا  وعينها علينا وهمه جوارينا عمر صار لامشفنا منهم الا الخير وكرار ولد اخلاق ويخاف على اخيتك فيااابني اخصم السالفه ورد عليهم بالموافقه..

وان شاالله يوم زواجك واشوف جهالك 

سعد..يوم اني حجيت ويه عمي وثائر كان موجود وضل عمي يحجي يكول شلون ترضون بهاي القسمه ال ساره ناس ماعدهم لاكدامهم ولا وراهم وثائر كال اني رايد ساره بت عمي وماالكه احسن منها تعيش ويايه بالسويد احلى عيشه وشتريد تتمنى واني حاظر جهاز فلوس ذهب 

ساره..اسمعهم واحس روحي راح تطلع مااعرف شصار بيه فزيت على قطرات مي وضربات خفيفه على وجهي فتحت عيني شفت امي ورنا وهباوي فوك راسي عيونهم ورامه من البجي وسعد بباب الغرفه 

ساره يومه ثائر مااريده مااريد اسافر مااريد ابتعد عنكم 

سعد..شبيج ساره ثائر مو غريب ابن عمج واولى بيج من الغريب وانسان مقتدر وتعبان على نفسه وعايش بالسويد وموظف ودخله المادي كولش زين شتريدين بعد من احسن من هذا المهتلف لاشهاده لا وظيفه بيها خير ثانيا لج اكو شي بينج وبين كرار اذا عرفت اكو شي بيناتكم احرك البيت على راسج..

الام..يمه شبيك موعيب تكول هذا الكلام على اختك شو صاير متنجرع اكول اخوهن الجبير وحقه يخاف عليهن بس مو تخربط بالحجي وتسالها عندها شي ويه كرار بيت ابو كرار جوارينا وهي صديقه بتهم منتهى من الصغر  تحبهم مثل مااحنا نحبهم وتودهم عيب عليك هذا الكلام

سعد..يومه ثائر ابن عمي ورايدها ال ساره واحق بيها من هذا الفكر خلي تفكر زين ثائر منتظر مني جواب حتى يسوي الخطوبه والنيشان والعقد بهذا الاسبوع قبل مايسافر وبعد بشهر تسافر ساره من يدز عليهاوتعيش هناك مو احسن من هاي العيشه بهل المنطقه مااعرف شنو العاجبكم بيها 

طلع سعد واحس راسي راح ينفجر من التفكيرشنو الاسويه مين طلع هذا ثائر ابن عمي بالاسم حياته كلها بالخارج هسه صار ابن عمي واحق بيه من الغريب 

رنا..ساره ترى هذا الكلام كله صاير بالمعمل يعني اكيد زوجه عمي الموقره متعرف بي لان راح تحرك البيت عليهم من تعرف هي عدها كولشي ولا ثائر المهندس تريد تخطبله على مزاجها شهاده مال ومركز وهلها يكونون معروفين وهي اساسا مطيقنا مو عاد تاخذال ابنها وحده منا ..صدكي مراح تقبل واكيد عمي ميكدر على لسانها 

احس نار كامت تاكل بجسمي 

رناوي روحي على منتهى وكوليها خلي كرار يروح على ابو جاسم يحجي ويا. الحجي.ابو جاسم معروف بالمنطقه حاج بيت الله الناس تقصده بكل مشكله هو الي حلها   بمثابه مختار محلتنا بيته مفتوح  للكل ماكو واحد 

عنده حاجه واجه ال ابو جاسم بعد الله الا وقضاها اله خلي يجون على سعد يحجون ويا مستحيل سعد يرفض طلب ابو جاسم 

راحت رنا حجت ويه منتهى 

وثاني يوم اجه الحجي ابو جاسم ويا اثنين زلم معكلين وزوج خالته ال كرار وابو كرار طبعا ابو كرار حيل تمرض وكوه يمشي حتى كلام ميكدر يحجي بس يأشر وانفتح الموظوع..

سعد..ابو جاسم ماعاش الي ردلكم طلب انت وهل الوجوه الخيره الي كدامي بس انت تعرف المقربون اولى بالمعروف وابن عمها رايدها وهو احق من كرار بيها

ابو جاسم بس الي اعرفه انتوا منطين كلمه لبيت ابو كرار قبل وفاه والدته 

سعد..هاي انت كلتها كلمه يعني لاقارين فاتحه ولا عقد ولاخطبه ولاشي وكتلك ابن عمها رايدها وحظرتك ياابو جاسم ابن عشاير وتعرف بالاصول البينه اذا عدها ولد عم متطلع للغريب 

وانتهت الكعده وطلعوا واجه عليه سعد كال هذا اذا بعد دك الباب اشوفه انجوم الظهر الحافياسمعه وكلبي يوجعني ودموعي تجري ليش اخويه يسوي هيج شنو ذنبي ازوج واحد مااعرفه بااسم ابن عمي رنا تهدا بيه واني احجي بحركه.شوفي رنا اذا سعد جبرني ازوج ثائر احرك روحي ومااخذه اني احس نفسي انخلقت ال كرار محرمه على اي رجال ثاني ..

⚘⚘⚘⚘⚘⚘⚘⚘⚘⚘⚘⚘⚘⚘⚘⚘⚘⚘⚘

ان ..اموت..وانا..بين..يدك..

خير..من..الحياه..وانا..بعيده..عنك.. 

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad