مساء الخير ع اجمل متابعين اتمنى لكم قراءه ممتعه
❣️❣️ #البارت 19❣️❣️
#الندم_مابعد_الخطيئه ❣️❣️
❣️❣️ #للكاتبه رونق❣️❣️
الصراحه جنت حاسه اكو غلط بالموضوع بس متوقعت مرتضى جاي للنجف ورايه
كلت احمد هاي وحده وياك شلون هيج تسوي من صدك زعلت وياك
كال اني قابل شتسوين بيه سوي زعلي عاقبيني مو مهم بس اهم شي اتفاهمي انت وهذا المخبل الي خبلني خبال لان متحجين وياه
احمد رجاءا رجعني مااكدر اروح وياكم
مرتضى مستمر بالسياقه ومنطق ولا بحرف
مااكدر ارجعج بعد مراح نتاخر منطول ابد
ديما والنبي اذا عرفت بيج تدرين باحمد ومرتضى مراح يدور لساني ع لسانج ابد
والنبي ماادري حالي حالج هم متفاجئه
وصلنه لمكان مااعرف وين بالضبط هنا احمد طلب من ديما تنزل ويا
لزمت ايدها وين تردين
هاي شبيج روان امني مراح ياكلج مجرد يحجي وياج دقايق ونرجع الكم اني وديما نريد نشتري شكم حاجه
سكتت كلت اريد اشوف وين يردون يوصلون
نزلوا كال احمد نتخابر من نكمل
هنا حجه مرتضى كال اوك
نزلوا هنا التفت عليه وكلي تعالي هنا اكعدي
خليني بمكاني
لتخلين الناس تنظر النه بغير نظره تعالي ولتخافين مراح اكلج
نزلت وكعدت بصفه ساق بدون كلام
اخذني لمطعم نزل وكلي انزلي
مااريد اكل مااشتهي
مو مشكله بس نحجي
نزلت ويا وكعدنه
شتحبين اطلبين
مااشتهي ابد
اطلبي لتجبريني اطلب ع ذوقي
والنبي مااشتهي
مو مهم بس شي بسيط
ابد مااريد اي شي
اتصل باحمد وساله
شوف ديما من يمك كللها شتحب بنت عمتها ام راس اليابس
بيتزا اوك مشكور ابو شهاب
طلب هو كص وبيتزا وعصائر ومقبلات
بده يحجي
اي ام راس اليابس احجي
شاحجي ماعندي اي كلام وياك
لعد اني عندي هواي حجي بس قبل لاابدي احب اكلج الله يساعده الي ياخذج لان عنوديه بشكل يعني اقل زعله يمكن اطولين شهر يله يكدر يراضيج
سكتت مجاوبته
يابه اتاسفنه وكنالج حالة غضب وساعة عصبيه والله مو بقصدي من حجيت
ابد منطقت ولا بحرف
اشو ساكته ليش متحجين
اعتقد فهمتك وكتلك ماعندي اي كلام وياك وياريت تستعجل حتى نرجع
يابه وربج ونبيج واسلامج وكتابج متزوجين غيري لو ع كص ركبتي ومالت تفكرين تبقين بدون زواج هاي كطنه وطلعيها من اذنج لان اهلج مراح يعوفوج بحالج
اكو شغله انت يمكن خامل عنها او بالاحرى تعرفها وغاض النظر عنها
شنو هي
تدري بيه اني اكرهك كره مو طبيعي واضوج منك لان دمرت حياتي
ادري والله ادري وادري بيج مطيقين وجودي بس مجبورين اني مثل مفهمتج زواجنه راح يكون بس شكل يعني حبر ع ورق مراح اطلب منج شي ابد لا حق شرعي ولا غيره ابد كل ماهنالك استرج وبعد فتره شوكت متحبين اطلكج راح اطلك بدون تردد اهم شي وافقي
اني هم مجبور اذل نفسي واذل اهلي كدام اهلج لخاطرج بس وصدكي لو وحده غيرج وماعندي شي وياها وحتى اذا احبها حب بجنون يستحيل ابقى مصر عليها هيج ومتاكد اهلها مينطوها جان سحبت نفسي بسهوله
مجبور ابقى اتوسل ومجبور اذل نفسي كدام عمار والا اني اكلج لو ما انت مجان اطيقه لعمار ولا اطيق الشارع الي يمشي بي
مستعد كلشي اسوي لخاطرج
سكتت طبعا حجيه وكلامه كله صحيح مثل مااني مااحبه هو هم ميحبني ولا يطيقني بس حب يصحح غلطه ومجبور بيه
طبعا احترمه من هاي الناحيه لان الواحد لغيره جان نسحب واتخله عني بسهوله وهو من البدايه جان قصده يذلني ويذل عمار يكدر يبقى مصر ع موقفه
بس اكيد ضميره انبه ومخلاه يسكت عن الحق ابد
فدوه افتحي الحضر وريحيني لان من صدك تعبتيني وخليتيني اعصاب 24 ساعه لازم اسمع اخبارج منج
اني ساكته
اشو ذابته ع الصامت ليش متحجين
اكلك اشو اتاخروا مجابوا الاكل راح وكتنه
لتخافين بعد وكت وهسه راح يجيبوا
فعلا بعد لحضات جابوا الاكل اني الصراحه جنت حيل جوعانه بس مااكل ويا لو اموت
يله اكلي حتى اخابر احمد ونرجعكم
مو كتلك مااشتهي
والله تفوتج البيتزا تخبل بس ضوكيها واحكمي
انطاني كصه اكلتها وجانت حيل طيبه
تعاي سولفيلي شلون انتحرتي تدرين لو صاير بيج شي مراح اسامح نفسي للموت
والله انتحرت من ظيمك وظيم اهلي الي جبروني
مفكرتي تموتين وترحين لنار جهنم
مفكرت بساعتها بس ردت اخلص نفسي
لتعيديها ابد مره لخ ووعد مني اعمل المستحيل ومااخليج بهيج موقف مره ثانيه ووعد بعد مراح ازعجج بكلمه
خابر احمد خل يجون حتى يتعشون ويانه ونرجع
صدك اتصل بي وانطاه اسم المطعم
وهسه راح تفتحين الحضر
افتحه بس بشرط
شنو اي شي موافق عليه
ابد متراسلني ولا تتواصل ويايه حتى من يصير شي احلف يمين ماعندي اي تواصل وياك ولا ادري شتسوي
وشلون اتواصل وياج
عن طريق شهد اذا عندي شي احجي وياها وانت هم بس متكلي باي مخطط الك
اوك اتفقنه بس اذا اكو شي ضروري كلش لازم نتواصل
ان شاء الله
يله كملي اكلج
اجوي ديما واحمد وجانوا محملين علاليك
اجوي ميتين جوع اكلوا ويانه وطلب مرتضى بعد اكل
كملنه ورجعونه وبعدها رجعنه للبيت جنت فرحانه ومااعرف السبب هل لان اتصالحنه اني ومرتضى او لان شفت شلون متمسك بيه ومستعد يسوي اي شي في سبيل اصير اله ويصحح غلطه وياي
مشت الايام عادي ماكو شي جديد
قرب موعد زواج ديما ورحت وياها لمركز التجميل حجزنه وحجزنا البدلات واحمد اتكلف القاعه وحجز
عمار جابلي ملابس من تركيا خاصات للحنه وللزفه وبيومها صارت الطلايب والمشاكل ماالها والي اني حيل فرحت من عمار رجع مثل قبل الحمد لله
اسيل كلبت الدنيه شلون متجيب الي همين
كللها انت هستوني جبتلج ورحتي بي للحفله مالت خطوبة بنت عمج
اي ذيج الحفله وحد وهاي وحد
ماما ادخلت لج خاله هو منو شافه فستانج من اقربائنا
حتى لو هو تقدير مو قحط
لج بنت الكل .... ياتقدير اشو كل مااروح اتسوك جنطه كامله الج وره اسبوع اسبوعين اسالج وينهن تكليلي ها عند اخواتي ها صديقتي حرجتني وكالت حلو وانطيتهيا ها نسيتهن ابيت اهلي كل هذا واني ساكت
بس حلفت يمين لو تموتين بعد مااجيبلج ابد
زعلت وكالت حتى للحفله مااروح
والله تسوين جميل شكبره علينه
ماما كامت تحجي ع عمار هسه لوجايبلها واحد ومسكتها
تحجين صدك يوم والنبي مغركها وكلهن غاليات وكلهن كاعد تنطيهن مدري وين توديهن والله ثبتلي فكر بنت فكر
كلت بكلبي همزين اعترفت
ماما انطيها الملابس لان اصلا اني عندي هواي
كام يصيح عمار والله اذا فكرتي تنطيها اله اكلب الدنيه ذني الج ومحد يلبسهن غيرج ابد
صعدت لفوك وسولفت وي شهد ع كلشي
سالتني اذا هو هيج يدري بيها وباهلها لويش جبرج ع اخوها
اكيد راد بس يزوجني ويخلص من اخوج
اي هم صدك
هم تجين للحفله
والله ماادري العالم عزمونه بس ماما ماهاويه ابد كالت خاف تصير مشكله
يمعوده يا مشكله وهو منو الي راح يركز بالوجوه
والله ماادري اشوف ماما
الله عليج حاولي تجين لان من صدك مشتاقتلج حيل
الله كريم
قبل موعد الحنه بيوم رحت بتت ابيت خالو واخذت ملابسي وياي
لان قررنه اني وديما نروح سويه للصالون وبعدها نروح للقاعه
بيومها بقينه سهرانين اني وديما واحمد خبصها خبص بالمخابرات وهي تنطي رفض تكله خل اشبع من اهلي وزعل وياها وهي تكول مو مهم
قبل لاانام راسلني مرتضى اتفاجأت صراحه
هلو روان شلونج
هلو مرتضى
شخبارج
تمام الحمد لله وانت
اني بخير اذا انت بخير شكو ماكو
ماكو شي
باجر راح تحضرين الحفله
اي اكيد هو اني وياها اروح للصالون ومناك نجي للقاعه
منو الي يجيبكم
والله مااعرف بس ع الاكثر احمد
مو تصعدن بتكسي
لا شلون بتكسي اكيد لو احمد لو كرار ابن خالي
مااوصيج لا ع لبسج ولا مكياجج والله ثم والله اذا لمحتج بمنضر مو لائق اكلب الدنيه فوك راسج تردين تتمكيجين لو خفيف لو تلبسين بوشيه مو تكولين ماادري
بدون متكلي اصلا مااخلي مكياج اله بالقاعه يله اخلي
اي عفيه لان تعرفين اباب القاعه شراح تصير الشباب بحجة يجيبون اهلهم
شهد راح تجي لولا
والله مااعرف خاف اجيبها وتصيرلج مشكله
لا شعليه اول وتالي جايه من طرف العريس
لعد هاي هي اجيبها اكيد
مرتضى : روان كفرتني بالدنيا كلها لان عنوديه بشكل ورافضه تفك الحضر عني مليت وياها ماخليت شي يعتب عليه
اخر شي خبرني احمد اتركها ع راحتها واكيد راح ترجعلي بس انطيها صبر
سمعت اهلها سافروا وراح تبقى يمها ديما اتوسلت باحمد يخلي ديما تحجي عليها وتقنعها بس بدون جدوى
قررت اتركها ومن صدك بعد ماعليه بيها مبين عليها عنوديه بشكل وخشمها يابس ماتدري بيه اني اعند منها بقاطات بس اني مجبور اتنازل واتوسل لان اني غلطان وياها
بقيت فتره هاملها ولاالي علاقه بيها لان مليت
بعدها جنه اني واحمد سويه بالمحل خابرته ديما وكلتله نريد للزياره والي افتهمته حتى روان واهلها وياهم
اني فرحت ماادري ليش قررت لازم اروح واشوفها لان احس نفسي مشتاقلها وهذا الشي جنت اجهل تفسيره هل هو الشعور بالذنب اتجاها لو اني اتعلقت بيها لان احسها من مسؤليتي
حجيت وي احمد وكتله خل نروح وراهم بالبدايه رفض كال عيب من اهلهن
كتله منخليهم يحسون بيه اني بالذات وبالنسبه الك انت نسيبهم ميهم
بس صدك تعال اسالك معقوله متعرفوا عليك اهل ديما ومكالوت رحتوا ويانه لايران
لا يمعود اول شي صار اكثر من سنه وثاني شي الحمله جانت اكثر من 40 شخص معقوله يركزون ويتذكروني
كلشي يصير
يمعود هو ابو روان الي اطلابه وياك شكدها شعرضها وفصل ومحاكم متذكرك تريد يتذكروني اني
اي هم صدك
رحنه للنجف اني واحمد وقررنه نروح لشارع الروان هم نتعشه وهم احمد هو وديما يشترون النواقص الي محتاجيهن
طبعا من شافتني انصدمت ورادت ترجع لو ماعيب من احمد وديما جان عرفت شاتصرف وياها سوتها بدون معنى حيل زودتها
بس بعد عناء طويل كدرت اقنعها وقبلت تفك الحضر واخيرا حيل فرحت والصراحه اني متعجب بتصرفي هذا مااعرف اله تفسير
رجعت بيومها الدنيه كلها ملمتني من الفرح تغيرت نفسيتي ورجعت شهيتي مثل قبل وحتى اهلي حسوا بيه
بس شهد شايله خشمها عليه ومتحجي وتكلي شلون هيج تسوي بروان
لج اني ماصدكت خلصت من زعل روان تجيني انت صفح
هسه انت شعليج اشو روان وصالحتها انت شعليج بعد
سكتت
صحيح اتفقت وي روان مااراسلها ابد اذا اكو شي عندي اخبر شهد وهي تراسلها بس اني مطمأن لان فاتحه الحضر واني وياها ع اتفاق
قرب موعد زواج احمد واني يمكن فرحان اكثر منه لان راح تقوى علاقته باهلها لديما ونكدر ناخذهم مشيه ويانه
قبل الحنه بيوم راسلتها لان جنت مطمان هي بايته يم ديما ومستحيل احد يلكفها تراسلني بيومها
بقينه نسولف هواي وطلبت منها متخلي مكياج هواي احسها زوجتي واخاف احد ينضرلها بسوء
ثاني يوم الحنه قررت ادز شهد وامي لان عيب من احمد هواي اكد عليه وعلاقتنه عائليه احنه واهله
احمد كال اني اجيبهن من الصالون ونروح نسوي جلسة تصوير وبعدها نروح للقاعه
اتمنيت اشوفها بس مااكدر انتظر اباب القاعه هم عيب وهم اخاف يشوفني عمار
وصلت امي وشهد ورجعت اتصلت باحمد
كوه جاوبني ابن اللذين اكيد وينه و ويني حاير بديما
متكلي شتريد مني هييي ابن الم....
ايا كلب ليش تغلط ع ابويه
لك سبيتني سبايه ماتكلي شتريد اي ادري طالبني بطلابه
غير من حبي الك ع اعصابي مفاركك انت الغالي شعندي غيرك
احجي لا اسمط جد جدك مثل ماسمطتني
روان شلونها لبسها مستور مكياج مخليه
اي هنا مربط الفرس مو اكول مو لا الله داك عليه
يابه البنت طالعه كمر لابسه بدله قصيره والمكياج لتسولف سالفته تكل لديما ميلي عني واني بمكانج اكيد راح يتوهمون بينها وبين العروس
اني هنا عيوني صارن بكصتي اتخبلت مااعرف ليش هيج تسوي وتعاند وياي مااعرف ليش هيج تسوي بالضبط لان تكرهني او تريد تنتقم مني
ها وين راح صوتك
والله يااحمد لو ممجاوبني هواي افضل لان حركت اعصابي ويجوز افقد اعصابي وياها وارتكب جريمه بحقها
وليش يابه شمسويه البنيه اشو حالها حال البنات عرس وحفله وتعرف الحساب
ياعرس يامعود هاي يسموها استهتار يعني البنيه تعرض جسمها ووجها للناس هاي شيسموها بس والنبي اله اندمها لروان ع هاي سوايتها
يله يابه روح واسف ع الازعاج
اوكف اوكف وروح بيبيتي نوفه اجذب عليك الله وكيلك هي الوحيده الي وجها صافي ولابسه محتشم وعينها بالكاع لمن دخلن للقاعه واني ردت العب باعصابك شويه
والله دتجذب عليه حتى اهدئ
والله العظيم وهذا قسم عليه ماجذبت بحرف واصلا حسدتك عليها وكلت هنياله مرتضى ع هالادب والاخلاق والبنت طلعت تضوي جنها كمر وجنها العافيه الله وكيلك اباوع البنات الوجوه انكلبت زرك لان حاره واللبخ المخلياته كله سال 😂😂😂😂
بس روان تضوي والله لان طبيعيه
لك اشو تتغزل بحبيبتي بيوم حنتك اروح لديما واحيلها عليك واخليها تقلب هسه وتلغي حتى العرس
دخيلك ودخيل الله كلشي ولا مريتي وحبيبتي اني احسب لحضه لحضه شوكت ادخل القفص الذهبي تجيني انت تخرب عليه
منو اخيك منو صديقك منو منقذك وكت الشدايد
اصبغ بعد وبعد
عفه عليك مامرجيه منك ابد اني اصبغ لك انت النفس الي يصعد وينزل
ايا سرسري روح عمي خلصني مرتك منتضرتك هسه
اي وعلي حتى نسيتني يله باي تعال من وكت للحفله
ان شاء الله
حيل فرحت من عرفتها هيج مسويه وحيل كبرت بعيني
انتظرت مخابره من شهد
خابرتني ورحت جبتهت للبيت
ها شهد خو ماكو مشاحنات
لا ماكو ان شاء الله
وام روان
شبيها بس سلام ابينه وكلمن راح لحال سبيله
وروان شلونها
اسكت لك والله احلى وحده هي لان ع الطبيعه البنات تعال وشوفهن وموت ضحك مينعرف الاحمر من الاخضر من الازرك من الاسود
وهي عبالك لعابه
اسمع واحس بسعاده متنوصف ابد
بدلت ورحت لبيت احمد
الحفله بحديقتهم لان جبيره حيل
بدت الحفله وثاني اليوم الزواج زفيناهم للفندق بالنجف وثاني يوم سافروا لتركيا
بقت شهد وروان ع تواصل ودائما تحجيلي شهد
اني كلت خل اترك روان هاي الفتره لمن احمد ياخذ ميانه وي نسابته
طلبت من شهد بس يصير مجال عند روان خل تراسلني حتى احجي وياها
وفعلا راسلتني
مرحبا
مراحب
بعد مكتبت شي
جنت اتمنى تتجاوب وياي وتسالني بس ابد ولاكانو
شخبارج
تمام
شكو ماكو
ماكو شي سلامتك
عمار شلونه وياج
زين ويايه ورجع مثل قبل تقريبا
ياالله ان شاء الله دومه زين وياج وياريت الله يهدي عليه ويوافق بطلبي
لا هاي مستحيل
لاوليش مستحيل اني مساكت هسه منتظر احمد يرجع وبلكي تقوه علاقته بخالج وجدج حتى اخذهم مشايه لابوج بلكي يوافقون
الله عليك عوف هاي السالفه اخاف يرجعون مثل قبل ويايه ويبقه ياذيني عمار
يعني شلون ياذيج يضربج لو شنو
يضربني ويسمعني كلام جارح واكثر المرات يتجاهلني ع الاخير
كسر بايده ان شاء الله
لويش تدعي عليه مااقبل لتنسى هذا اخويه
واذا اخوج ماينطي الحق يضربج
اليسمعك يكول ماعذبت شهد ولا ضربتها ولا جبرتها
جبرتها اي بس مااذيتها ولا ضربتها لان جنت معمي ع وجهي
مو مهم هذا الحجي الاهم من هذا كله لتلومه لعمار حقه هيج يسوي بيك وبيه لان السويته بي مو قليل حرمته من حبيبته وسجنته ولعبت لعب بي
هم هذا الحجي مو مهم الاهم منه انت الج الصافي انت الي ومستحيل تصيرين لغيري لو ع جثتي
ممكن اعرف سبب اصرارك عليه رغم ماكتلك عوفني وبالنسبه الي ماتفرق عندي تزوجنه اني وياك والا لا ميهمني وشغله ثانيه انت ماتحبني ولا اني احبك والاهم من كلشي زواجنه ع الورق بس لان اني مستحيل اتقبلك ك زوج وانت كذلك متاكده منك هم يستحيل راح تتقبلني بحياتك ك زوجه الك
كل الحجيتي ميهمني اهم شي استر عليج واصحح الغلط الي سويته وياج
مو مهم تحبيني احبج اهم شي محد يعرف بلي صار ولا احد يكدر يشوه سمعتج ولا احد يكدر ياذيج اذا عرف الحقيقه
بس اني ماعندي امل ولا واحد بالميه اهلي يوافقون عليك
اني متاكد وعندي ثقه اهلج راح يوافقون عليه وراح اتزوجج ويجي يوم واذكرج
مااعرف منين تجيب هاي الثقه كلها
يستحيل اخليج بموقف محرج امام اهلج لازم اعمل المستحيل حتى يوافقون ع طلبي مستعد يوميه ادز مشيه وشيوخ وساده لمن يوافقون
الله كريم بس هاي الفتره اكعد واسكت مدامهم زينين ويايه اذا عندك شي خلي للعطله لمن اكمل هاي المرحله لان مبقه شي ع الدوام
الله كريم بس اهم شي مااريدج تضمين عليه شي ولا اريدج تحجين وي اي شاب احسبي حسابج انت مخطوبه مااريد احد يجيب طاريج بكلمه مو حلوه ابد
من هاي الناحيه اطمن كارها جنس ادم كله مااطيق اي شاب فلتخاف من هاي الناحيه
ممكن اعرف السبب
انت السبب اكيد لان دمرت حياتي كلها وخليتني انسانه معقده متثق باي شخص
يصير خير روان وتهون ان شاء الله وكلشي يتصلح باذن الله
اذا رجعوا احمد وديما هم تجونهم
اكيد وحضرنه الهدايه اني وماما
بس تجون خبريني حتى اشوفج لان مشتاقلج
اول منطيت ارسال حسيت ع نفسي هاي اني شكتبت بالحضه انطيت حذف لكل شخص مااعرف لحكت قرت لو لا ضربت كصتي شلون نسيت نفسي
دزيتلها من تجون لبيت احمد خبريني حتى هم اروح وع اساس صدفه نتشاوف
لا عفيه مرتضى مااكدر نتشاوف لان عمار ياخذنه ويجيبنه اكيد ومااريد تتشاووفون وتصيرلي سالفه
يمعوده ياسالفه هو الولد صديقي وعلاقتي بي تعرفيها شكد قويه
صدك كل مااريد اسالج انسى عمار عرف باحمد صديقي لو لا
ماعرف اله بيوم الحنه
شلون عرف
اعتقد شافكم من اجيتوا انت وشهد لان بيومها سالني ع شهد وكتله مااعرف يمكن من طرف العريس
وسكت محجه وياج
لا سكت
معقوله منه من الشيطان
هاي بعد
عسى الله يهدي علينه
عفيه بس تجين خبريني
الله كريم هسه خل يرجعون بسلامه
ان شاء الله بس لازم تخبريني حتى اجيب امي وشهد حتى تتشاوفون هناك وبلكي امج وامي يتصافن
الله كريم يله من رخصتك تصبح ع خير
وانت من اهله
خليت جهازي بالشحن وبقيت افكر بلي صار قبل شويه
ياالله شلون راح تكون علاقتي وي روان كلامها صحيح اني وياها طريقنا مسدود اني حاليا مااكدر افسر علاقتي بروان شنو بالضبط اني اتمنى اتزوجها واتمنى تتقبلني ك زوج الها
اني حاليا بديت اتعلق بيها واشتاقلها واتمنى اهلها يوافقون بيه
البنيه عجبتني اخلاقها هواي رغم هي سافره بدون عبايه ولا عبايه اسلاميه وملابس جانن مو لائقه احسهن عكس اخواتي بس البنيه لحد الان مشفت شي مو زين عليها وتروح بدربها وتجي بدربها والبنيه هادئه بشكل واهم شي الشاب اذا فكر يتزوج يدور بالبنيه ادبها واخلاقها اهم شي والبقيه تهون
مااعرف سبب تعلقي بيها بالضبط شنو الخلاني اتعلق بيها وشوكت مااعرف
وره ايام رجع احمد واني الي رحت استقبلتهم ورجعتهم للبيت
ثاني يوم رحنه اني وابوي ومهند لبيت احمد لان علاقتنه قويه وعائليه واحنه كاعدين اجوي خال روان وابن خالها واعتقد وياهم نسوان اني الصراحه حيل فرحت كلت خل ابويه وخالها يتعرفون عله وانه يساعدني هذا الشي بيوم
فعلا هذا الشي راح يساعدني هواي لان حيل اندمجوا بالحديث ابو احمد وابو ديما وابوي
اني اتعمدت اتعرف ع اخو ديما الي هو يصير ابن خال روان
حيل ارتاحيت بهذا اللقاء
تعرفنه ع بعض واخذت صفحته واخذ صفحتي بعدها رجعنه
وره يومين كلتلي شهد اليوم راح تجي روان وامها لديما اخذنه اني وماما اذا تكدر
جهزن نفسجن واني اخذجن
لبست اجمل ملابس عندي وجنت حيل فرحان احس بنفسي مشتاقلها هواي
رحنه وصلتهم ودخلت يم احمد بس اتفاجأت من شفت عمار كاعد
سلمت ورجع السلام بس من وره خشمه
احمد حاول يخلي المساله طبيعيه وحاول يغير اجواء التوتر واجواء القلق من اللقاء ابيناتنه
سالني احمد شنو جاي وحدك
لا اني وامي واختي حبوا يسلمون ع العروسه
راح احمد يجيب الضيافه
حجيت وي عمار
شلونك عمار شخبارك
بنعمه وخير بفضل الله
ان شاء الله دومك بخير
سكتت بعد مااكدر احجي ويا لان مبين علي يريد ياكلني اكل
دخل احمد هو بسرعه كله بلكي تخبر امي حتى نروح
بعد وكت شنو السالفه هستوكم اجيتوا
لازم اليوم عشاكم يمنه ميصير اطلعون
والله عندي شغل ومااكدر اتاخر خليها لغير وقت
بقه احمد مجلب بي وهو اصر
طلعوا وحتى مكدرت المح روان اتندمت لان اجينه سويه شلون مفكرت بالعواقب اخاف هسه ياذيها لان لكاني وهسه اكيد يكول متفقين بقيت اكل بنفسي
قبل ليجي احمد اتصلت بشهد وخبرتها نروح
دخل احمد واترخصت منه وهو حس عليه متضايق حيل
ان شاء الله تهون وتبقى بس سوالف بس كول ياالله
ياالله والله يااحمد تجيني لحضات احس بنفسي عاجز امام اهلها لروان وحيل دايخ مااعرف شاتصرف ابد
الله كريم تفرج وربك بس اصبر
الله كريم
ودعناهم وطلعنه رجعتهم للبيت وطلبت من شهد تستفسر منها لان مااكدر اراسل اخاف يشك اخوها
بعدين طمنتني شهد بس كالت ابد لتتصل ولا تراسلها
بده الدوام وكمت اكثر الاوقات اطلع من الصبح حتى اشوفها احب اراقبها واراقب تصرفاتها جنت احب هدوئها ورزانتها بالكليه اني مو قصد اشوفها شعدها ماعدها بس احب اشوفها
بديت اني واحمد نخطط شلون ناثر ع خالها وطلب مني نروح زياره لاهل ديما اني ويا وكلي حاول تقنع الوالد
فعلا حاولت وي ابوي بس رافض رفض نهائي وفهمته كتله لبيت خالها مو الهم واكيد خالها ياثر عليهم
توسلت بنبع الحنان وبوستها كوه قنعتها حتى تقنع ابوي واخيرا قنع
رحنه اني وابوي واحمد وابو لخال روان
تفاجئ بالجيه واكيد رحب بينه بعد التحيه والسلام بدينه بالموضوع مباشرتا
حجينه وي خالها وفهمنا بان اني عجبتني البنيه لان اخلاقها عاليه وتربيتها الحلوه وحاولنا نخطبها ويرفضونه واحنه اجينه عليك واملنه جبير بيك
جان يفاجئنا ويكول .......
توقعاتكم حبايبي شنو كال خال روان ....
راح ياثر ع اهل روان لو لا .....
راح تتعقد الامور اكثر لو لا ....
🌹🌹🌹🌹🌹🌹
مساء الخير ع اجمل متابعين اتمنى لكم قراءه ممتعه
❣️❣️البارت 20❣️❣️
❣️❣️ #الندم_مابعد_الخطيئه ❣️❣️
❣️❣️للكاتبه رونق❣️❣️
جان يكول جيتكم ع عيني وع راسي بس والله مااعرف شاكول البنيه بعدهي تدرس وانت واخوها بينكم عداوه ورافضينكم وانتوا تعرفون مراح اكدر ااثر عليهم لان ابقى اني خالها وماالي سلطه عليها بس لخاطر جيتكم اليه اني راح اوعدكم احاول اقنعهم واحجي وياهم والعليه اسوي والباقي ع الله ولتنسون كلشي بالقسمه والنصيب اني اخبركم بالرد باذن الله بس اشوفهم
طلعنه منهم واني ع نار راح انتضر ردهم بفارغ الصبر
كال ابويه هاي اخر محاوله اذا رفضوا تنسى
الله كريم ميدري بيه راح اعمل المستحيل حتى يوافقون
كل شويه وطلبت من احمد يخابر ابو ديما وهو يهدأني
لك شبيك تحجي صدك انت شوف حالتك شكم مره اكلك عيب نخابر اصبر لمن هو يخابر ويفهمنه ويجوز الرجال بعده مرايح الهم
لك يامهله وصارلنه 3 ايام من حاجينا
فدوه خلي ديما تتصل لو بابوها لو بروان
لك بس اصبر لتستعجل
بقينه منتظرين الرد اسبوع وهذا الاسبوع ع نار
اجاني احمد والوجهه ميتفسر عرفت الجواب
كال والله محاولين بكل الطرق ابو ديما وجدها بس عمار رافض رفض نهائي يكول ع جثتي اوافق
صرت نار ويمكن هسه اذا يصير كبالي عمار اله ابتلي بي وادخل سجن
مااعرف شاسوي وشاتصرف جان عندي اخر امل هو خالها وهسه انقطع هذا الامل بس رغم كلشي مراح استسلم ابد لازم اشوفلي طريقه تجبرهم يوافقون عليه
مخبرت ابوي ع الجواب ادري بي يبقى ياكل راسي اكل وكل يوم وكلي بشر مرجعوا خبر واني اكله لا اخر شي خبرته وبقى يحجي عليه راح اخطبلك بنت عمك( اخت مريم يقصد )غصبا ماعليك
اني هنا تخبلت شنو غصبا اني مره وتغصبني وتجبرني مستحيل اوافق ع اي وحده من بنات عمي تعرفني احسبهن مثل اخواتي ويستحيل اوافق
مو بكيفك توافق وانت الممنون الى متى تبقى بعنادك هذا مو بهذلتني وذليتني بتالي عمري وع شنو ع وحده اذيت اخوها بيدك انت
مرتضى اعقل وخليني ساكت عنك لا وحق ربك ابهذل احوالك والله كافي هواي نذلينه من وراك
يابه خصم الحجي مااتزوج الى روان لو تنكلب الدنيه كلاب اني راح اروح لعمامي ولشيخنه واخذ ساده ومعممين واخليهم همه يتصرفون
شنو بكيفك مكفاك ذلنه اني وامك هالمره تريد تدخل العشيره حتى ينذلون كلهم لك انت شنو ماالك احد يوكفك عند حدك اوكلك خ..... بس تتنفس بعد تسد الموضوع نهائي واختارلك وحده من بنات عمك احسن من مااراويك وجهي الحقيقي كافي عاد هواي انطيناك مجال
يابه اني حجيت العندي مااتزوج غير روان لو شيصير وهاي مالت بنت عمك الغيها من بالك لان يستحيل اوافق اني ادري انت تريد بنات اخوك لان تدري بيهن محد ياخذهن وتريد تكربسهن براسي مااعرف ليش هيج حجيت يمكن من ماادري بنفسي لان حيل عصبت
هنا ابوي فقد اعصابه وضربني راجدي
كلب حقير هم الك عين وتوكف بوجهي وهيج تحجي والله لعيد تربيتك يامرتضى لان الظاهر انطيتك مجال اكثر من اللازم
ماحجيت ويا ابد لان اعرف بنفسي هواي تماديت
روح اختفي من وجهي لا ابتلي بيك
طلعت بره وبيومها مارجعت للبيت بتت بالمحل امي خابرتني وطمنتها خطيه
اتصلت بشهد وخبرتها ابد لتحجي شي كدام روان
بقيت يومين خارج البيت وبعدها اجاني مهند وبقه يحجي عليه انت زودتها اكثر من اللازم وهذا ابوك ميصير هيج تتجاوز عليه
اني ابد متجاوزت عليه بس هو يريد يجبرني ع بنات عمي وانت تعرفني حاسبهن مثل اخواتي بس هو مصمم واني كتله مايجوز تجبرني واني مو طفل ولا صغير وهيج يسوي بيه
لك انت شوكت ناوي تعقل والله خبلتني اذا انت مثل متكول لاطفل ولا صغير ليش تتصرف تصرفات الاطفال هاي البنيه اتركها بحال سبيلها شنو جلبت بيها الخلقها مخلق غيرها شنو معنى كلامك لو هي لو ماتتزوج
والله هذا العندي مااتزوج من بنات عمي لو اموت وبالنسبه لروان اني راح اروح لعمامي وللشيخ واخلي هو يتصرف بعد مااكل لابوي ولا لاي واحد منكم
لك اعقل وكبر راسك واقتنع البنيه مو من نصيبك وهم راح يروحون ويتفشلون الافضل اكعد واحفض كرامتك وانسه السالفه كلها
لا هاي من سابع المستحيلات وانسوها للسالفه مالت انسى روان لا يستحيل
اخر شي مل مني وعافني وراح
امي خطيه تخابرني وتبجي وشنو تنام بالمحل وارجع والله مااخليهم يزوجوك وحده من بنات عمك
بعدها رجعت لبيت اهلي بس انام بي واطلع من الصبح ماارجع لليل حتى ماالتقي بابويه ابد وهاي صارلي شهر تقريبا احاول الهروب من البيت او بالاحرى اهرب من المواجها وي ابوي
اكدت ع شهد ابد متحجي وي روان
ابد متواصلت وي روان خلال هاي الفتره وبده الدوام وهاي اول مرحله لشهد وثاني مرحله لروان
استغليت الفرصه ادز شهد بيدي واحاول ارجعها لو اني لو ابوي اني ردت احاول اشوفها لروان مردت شهد تروح وي خط
كمت اشوفها لروان ومرات حتى عمار يصير كبالنه ولقائنا لا يخلو من المشاحنات
طلبت من امي تحجي وي ابوي لان قررت قرار نهائي احجي وي عمامي واطلب منهم يروحون يخطبوها الي حتى لو من شيخهم لان راح اجمع ناس ساده ومعممين وشيوخ بلكي يكدرون ياثرون عليهم
ابوي رفض رفض نهائي وطلب مااخطي اي خطوه من هاي وبالتالي اني عاندت لازم اتصرف اني مو عناد بابويه بس اني عندي سبب يخليني اعاند واعمل المستحيل حتى اخليهم يوافقون
رحت لعمي ابو مريم والصراحه اتفاجئ بطلبي ومعرف شيجاوبني لان اكيد ماالومه لان اني زوج بنته المرحومه والكل يعرفني اني احبها واعشقها وجانو متوقعيني راح اتزوج وحده من اخواتها
اكيد انصدم شلون احب وحده غيرها وهيج متمسك بيها بس رغم كلشي كلي الله كريم اني راح اتكلفلك الموضوع بس انطيني صبر
كتله عمي مستعد انتظرك اهم شي قنع ابوي واريد اخذ مشيه كون تجبرهم يوافقون نحاول ناخذ ساده من جميع العشائر وناخذ شيخنا
الله كريم ابني
امي تجيبلي الاخبار اول باول كالت عمك داز ع ابوك وحاجي عليه وكايله خطيه مدامه يحبها خلي نسعه وعله وانه يوافقون
تعمدت محجي وي روان حتى من يرحون يخطبوها وعمار يسويله سالفه تحلف متدري بشي
ابويه اقتنع بس قبل كلشي تجمعوا هو وعمامي اثنين ومهند وطلبوا مني اواعدهم وعد شرف امام الجميع بس يرفضون اهل روان لازم انسى الموضوع نهائي وبعد مااجيبه بالطاري
الصراحه اصعب موقف امر بي لان مااكدر اواعدهم مااخطبها بعد لان حتى اذا رفضوا اهلها مراح استسلم وراح اشوفلي غير طريقه
يابه فدوه افتهمني اني غير روان مراح اتزوج وحتى اذا رفضوني مراح اسكت قابل اني اول واحد مايستسلم اذا رفضوا اهل البنيه
هنا ابوي فقد كل اعصابه وكام يغلط عليه كدام الكل
شنو انت محد يوكف بوجهك والله لانروح ولا نخطبها وروح انت اتصرف بوحدك يعني راح ناخذ شيوخ وساده بعد شيردون قابل نبوس اديهم يله يوافقون كافي ذل واعقل لا وحق الله وكدام الكل اتبره منك ليوم الدين
ردت احجي بس مهند اشرلي اسكت سكتت
بعدين ردت اهدئ الوضع كتله هاي هي بس هالمره اخطبوها وبعد هاي هي
حددوا الموعد كالوا يوم الجمعه وطبعا صدفه بعطلة نصف السنه صارت
منطيناهم خبر بس خالها وجدها عن طريق احمد وابو وطبعا هم قرروا يرحون بالمشيه
اتجمعوا ابيتنه وسوينالهم غده ذبحنه ذبيحه وطبخنالهم
مااكدر اوصف شعوري بهذا اليوم احس دكات كلبي ابد ممنتظمه ويمكن بالدقيقه الف دكه وجنت حيل متوتر وخايف من ردة فعل اهلها
كمل الغده وصبينه الجاي وبعدها بده العد التنازلي للموعد طلبوا مني مااروح مرادوني التقي باخوها ابد
شراح يصبرني مااعرف
مااعرف شراح يكون ردة فعلي بالحالتين
اذا وافقوا او اذا رفضوا
اذا وافقوا راح اكون اسعد انسان اما اذا رفضوا هاي راح تكون كارثه بحد ذاتها راح اكون عاجز كل العجز امام اهلها لان مااعرف شراح اتصرف
جهزوا نفسهم وطلعوا بدوا يصعدون بالسياره اتصلوا بخال روان وكال منتظريهم بالبيت يعني مخبر ابوها لروان
اباوع ع المشيه هيبه والسيارات كومه اذا نرفضت هاي الناس من صدك بعد من المستحيل راح يوافقون عليه
راحوا وراحت روحي كلها وياهم وبقيت منتظر ع نار
روان : رحت وي ديما للصالون وحاولت اعدل نفسي هم ماقبلت كلت بالقاعه اني ارتب نفسي وابدل لان مااكدر اخذ راحتي اذا بدلت واتمكيجت كملنه واجه علينه احمد بعدها راحوا جلسة تصوير ورحنه للقاعه
هناك لبست واتمكيجت خفيف حيل لكيت شهد وامها وحيل فرحت بشهد رحت سلمت عليهن وكعدت شويه يمهم
خلصت الحفله وقررت ابات يم ديما
فاجأني عمار من سالني ع شهد شعدها
كتله من طرف العريس
معقوله صدفه يطلع احمد صديقه لمرتضى لو هاي اكيد روحة ايران هيج سوت
والله اني مااعرف شنو اليربطهم اثنينهم هم احمد وهم اخو شهد ذولاك روح اسالهم
بسيطه يصير خير
رحنه لبيت جدوا وبالليل رجعت ماما واسيل
بقينه اني وديما سهرانين ويانه بنات عمها وبنات خاله
بعدها تراسلنه اني ومرتضى
ثاني يوم صار العرس وهم رحت وياها للمركز وطلعت لعابه ديما كلش حلوه
اجتي الزفه وراحوا واني رجعت للبيت
استلمني عمار تحقيق وسين وجيم بس مضغط عليه
بعدها تراسل ويايه مرتضى وطلب مني نروح سويه لديما اذا رجعت اني مااكدر اسوي هيج اخاف من عمار واكيد راح يعتبرنه متفقين
دائما نتراسل اني وديما ودزتلي صورها وجانت في قمة السعاده
رجعت وقررنه نروح اني وماما وعمار ياخذنه حجيت كدام شهد متوقعت راح الكيها كدامي وفعلا رحنه لديما وره لحضات اجتي هي وامها والصراحه كلبي نغزني لان خفت من ردة فعل عمار
سلمنه ع بعض والصراحه وجهي نخطف وعجزت شاتصرف وره قليل دز علينه عمار وطلعنه هواي اتوسلوا بينه حتى نبقى بس رفضنه ادينه الواجب ورجعنه وجان عمار عباره عن بارود عوزه بس نار وينفجر
لحضات وجان ينفجر يباوع عليه بالمرايه ويحجي هم كولي صدفه وماادري بيهم راح يجون
وداعت ماما وداعت بابا مااعرف بيهم جايين ابد وصدفه اجينه تدري بينه ممهيأين لجيتنه
روان لتخبليني شلون اجوي صدفه
والله مااعرف ولتصدك اعرف بيهم جايين واني اقبل اجي واجيبك ويايه انت بالذات جان طلبت من بابا يجيبنه
بهاي كلماتي كدرت اهدئه ولو شويه
هذا مرتضى راح يجيب اخرتي ع ايده من تصرفاته هاي
بعدها رجعت لحياتي الطبيعيه واني وديما دائما ع تواصل بيناتنه
وعلاقتي بشهد هم قويه ودائما نتخابر ونسولف كلشي يخص يومنه
وعاتبتها ليش مخبرتني راح يجون لبيت احمد واكدت عليه مجانوا ناوين يرحون بس مرتضى اصر علينه
وره فتره اجوي بيت جدو النه
جدو وبيبي وخالو وزوجته عبالنه زياره عاديه مثل كل مره بس فاجئونه من فتحوا موضوع مرتضى
عمار هنا يتحول لوحش بس يجيبون طاري مرتضى
كام يصيح ونسه نفسه هم كدام جدوا وخالو وبابا وهم نسه وجود اسيل الي دائما يحاول ميذكر شي كدامها
كال اخر شي تفكرون بي هو موافقتي والله مااوافق عليه اله ع جثتي
خالو طلب منه ينصي صوته ويهدئ بس هو اتخبل بالزايد
كام يسب ويغلط ع مرتضى لحد ماكام خالو هنا ضربه راجدي
انت شلون تعلي صوتك بوجود ابوك وجدك واني يعني ماعندك احترام النه ابد يعني بصوتك العالي هذا تعتقد تمشي كلامك علينه
العفو خالو مجان قصدي بس اني هذا الولد ينرفزني من يجيب طاريه احد
ميهم بس لازم نتفاهم بهداوه ونوصل لحل ميصير انت تبقى هيج ماخذنه حاصل فاصل بصوتك العالي
العالم ناس طيبين واجونه بكل احترام وتهذيب وشارين بنتنه يعني ماكو سبب نرفضه
اكيد هسه راح تكول مثل مارفضني ارفضه
احب اجاوبك الولد متندم حيل واعتذر وكال شطلبون اني حاضر شتريدون مني انفذه الكم واني الممنون اجاني ابو ورجال حباب ويكول هواي طلبنه منكم وانتوا كاعد ترفضون
شنو التردوا والي اطلبونه اني حاضر الكم
خالو هذا الموضوع ينسد نهائي لا وحق الحق اروح واتعارك ويا ومستعد اكتله خلاص حتى نخلص منه
روان ماانطيها اله لو يموت حتى اعلمه اشسوه بيه
بس مايصير ياابني الراح مات وعلينه بالجديد الولد مشتري اختك وجاينه من الباب وطلبها بكل ادب لازم نفكر زين
انت ابو عمار شنو راييك بهذا الموضوع
والله تريد الصدك اني ماهاوي انطي بنتي لواحد متزوج وزوجته متوفيه
زين روان شنو راييها بالموضوع موافقه ع الولد لو لا
عمار طفر باللحضه وكال
اكيد متريده ولا توافق عليه لان تعرف بي اذاني وحطم حياتي كلهم يستحيل تحب عدو اخوها واني متاكد من راييها
التفتوا عليه وطلبوا رايي
الصراحه اصعب شي كان عليه لان اذا رفضت راح اصعب الامور وباعتباري اكلهم ارفضوا نهائي واذا كلت موافقه عليه مراح اضمن العواقب الي راح تواجهني لهذا السبب اكتفيت بالسكوت وكان الكل عرف ردي وكلمن راح يفسر بطريقته الخاصه
اخر متوصلوا اله هو الرفض القاطع وكالوا ينسد الموضوع نهائي
حسيت الدنيه طلعت من عيني لان مبقى امل ولا واحد بالميه اهلي يوافقون
عمار نهى الموضوع وطلع وهو نار
اني رحت هربت للغرفه
قبل لاانام اتفاجات بعمار دخل بدون ميدك الباب
انطيني جهازج باجر ارجعه الج
بكلبي خوف مينوصف عرفت شنو غاية عمار واخاف يصير الي يريده اخاف يراسلني مرتضى او شهد اني ماكده عليهم ابد ميراسلوني اله اني اراسلهم بس هذا الشي ميمنعهم يراسلوني فجأه
انطيتهيا اخذه خلاه بجيبه ورجع كلي
اسالج سؤال واريد جواب بدون لف ودوران
شنو علاقتج بمرتضى بالضبط
كمت امتمت مااعرف شاحجي
مممممرتضى منوووو
مو كلنه بدون لف ودوران
بس والله معرفت سؤالك عن شنو
راح اعيد الصيغه شنو علاقتج باخو شهد بالضبط
تحبينه تعرفين بتصرفاته وتدرين بي من يدز ناس عليج
اخاف احجي ومتصدكني
لا احجي اريد افهم كلشي يخصكم
والله العضيم والنبي محمد والانياء والمرسلين واقسم بجميع الكتب السماويه مااحبه ولا عندي اي علم جايين لخالو ومااعرف شلون اجه وخطبني
زين خل نفرض حجيج صدك
شنو السبب الي يخلي مرتضى هيج متمسك بيج ويوميه خاطبج
مااعرف السبب روح اساله وتلكي الجواب عنده اكيد
سكت ماحجه عافني وطلع
بقيت للصبح اقره ايات وادعيه حتى ميراسلني مرتضى ولا شهد ابد
خليت دمي بشيشه يمكن ختمت القران كله للفجر اذن واني دمي بشيشه رحت توضيت وصليت وبعدها نمت ماكعدت غير ب12 الظهر ماما كعدتني
رحت غسلت واتوضيت وصليت كملت التفتت للميز لكيت جهازي مخلي حيل فرحت لان معناه ملاكي شي ضدي الحمد لله والشكر
نزلت لجوه كلي حيويه ونشاط
اتغديت وياهم وبعدها نضفت البيت كله صارت عندي طاقه وحيويه عجيبه
بعدها بده الدوام وعلاقتي بمرتضى شبه مقطوعه لا اراسله ولا يراسلني بس طلبت من شهد تحجي ويا بعد ليخطبني ابد لان ماالي خلك عمار
شهد انقبلت كليه اداره واقتصاد وبلشت دوام
كمنه نلتقي بالجامعه اني وشهد وديما ابد منختلط وي الباقي
هواي شباب حاولوا يتقربولنه بس منطيناهم مجال ابد وقررنه ابد منختلط احسن
اكو ولد ويانه طاح بعين شهد خطيه حتى كامت تبجي كالت بس يدري بيه مرتضى يبطلني عباله اني منطيته مجال
بعدين دزينه بنيه عليه وخبرنا هي ارمله ومتفكر بعد بالزواج ابد
رجع خبر كال ادري بيها ارمله واني موافق ونيتي صافيه بس تنطيني كلمه ادز اهلي بعدين عرفنه هو هم متزوج وزوجته متوفيه وعنده طفل
رفضته بدون تفكير حتى
بعدين حجينه اني وديما وياها كنالها شنو المانع ليش متوافقين عليه وتكملين حياتج شنو يعني قابل انت اول وحده ارمله لو اخر وحده
عيشي حياتج وانت بعدج صغيره وحلوه
كالت اني الله كاتبلي الحزن والاذيه وشلاع الكلب من يوم ولادتي مااعتقد يجي يوم وافرح بي وادري بنفسي ماعندي حظ لا وي حبيب ولا وي زوج لهذا السبب قررت ابقى هيج احسن الي
لج لتصيرين غبيه البنيه اول وتالي مصيرها تتزوج وتشوف حياتها لان اهلها مدايميلها وهاي سنة الحياة
مااقتنع بالحجي وقافله ابد متكدرن تغيرن رايي
ع الاقل فكري بالحجي
ولا افكر ابد
الموضوع حاسمته وخلص
تركناها ع راحتها
يوميه نلتقي ونتريك سويه ونسولف احداث يومنه كله
مره اجت شهد وجانت حيل ضايجه سالناها شبيج كالت مبيه شي
لحينه عليها هم محجت تركناها
ثاني يوم اجتي وهمين نفس الضوجه
هالمره جبرناها تسولف كالت مو حلفوني مااحجي
منو حلفج
مرتضى
ليش وشكو
صارله شكم يوم مو بالبيت
لعد وين
بالمحل يبات لان طلع زعلان ومعصب من بابا
ليش شكو وشصاير
راح اسولف كلشي بس امانه عليجن لحد تحجي وتفلتها كدام مرتضى لو احمد
اتعارك وي بابا لان بعد ميقبلون يخطبوج يكولون هواي فشلونه وبابا كله راح اخطبلك وحده من بنات عمو وهو تخبل كاك لو الدنيه تنكلب مااقبل بيهن وغير روان مااتزوج ابد
شعوري هسه مينوصف ابد فرح ع حزن ع غيره ع خوف مااعرفه بالضبط
فرحت لان شفته متمسك بيه وخايفه خاف راح يتعب لو يمل وحزنانه ع الصدفه الجمعتنه وحطمت مستقبلنه وهاي الغيره خوفي ليوافق ع بنت عمه بعد ميمل مني ومن اهلي
وهسه بعده مو بالبيت
اي والله واني وامي ميتين قهر عليه خطيه
اخ لو يطيح بيدي يعمار اله اخلي طلقه بكلبك ع هذا عنادك
دكولي والله مرتين ينطيج كلبج
وليش ماينطيني كلبي قابل شعندي ويا
مضبوط صدكتج
حجت ديما تعالي شهد سولفينه ع شعورج اتجاه عمار
اي شعور ماعندي اتجاها من يوم التزوجت محيته من ذاكرتي ومن كلبي
جذابه والله اتحداج تحجين الصدك لان اليحب من كل كلبه يستحيل ينسى وبسهوله
منو كلج بسهوله وجرت حسره
صار موعد المحاضره واتفرقنه وكلنه بعدين نكمل حديثنا
مصار مجال بعدها رجعنه اليوم شفت مرتضى من بعيد وجان يباوعلي من فوك لجوه
ثاني يوم كالت شهد رجع فرحت
بعدها مشت الايام وابد متواصلنه اني ويا
بس دائما نلتقي بالطلعه ومرات يتواجهون عمار وهو واحد ياكل الثاني بس بالعيون
قربت العطله وبدينا بالامتحان والتهينه كلمن بدوامها وصدفه نتشاوف اني والبنات
وجنه متلهفين للعطله
كعدنه اني وامي نخطط للعطله
كالت نروح لكربلاء ونبات وبعدها نروح للنجف وهم نبات جنت حيل متلهفه
بهاي الفتره اسيل طلعت حامل وهي بدون عزه معزايه يعني نايمه 24 ساعه حتى ابنها ذابته ع ماما
اليوم اخر يوم وقررنه نتعطل حتى نتشاوف ونتواعد وفعلا صارت كعدتنه مميزه اكو مطعم قريب ع الجامعه الاغلبيه قرروا يتغدون بي
كلمن كالت راح اخابر واشوف
اول وحده ديما اجاها الرفض القاطع من احمد وثاني وحده اني خابرت عمار ومن سالني منو وياج كتله شهد وديما تخبل كال لا ممنوع وشهد هم مقبل مرتضى وحيل ضجنه يعني ولا واحد بيهم قبل
كلمن كالت عابت الهم بس احنه ميخلونه
اتفقنه بالعطله الصيفيه لازم نقنعهم قبل فتره
بقينه كاعدين لمن كلمن اجه عليها احد
اول واحد اجه عمار وفاجئنا بدخوله للجامعه
سلم علينه وعيونه تاكل شهد اكل
خطيه شهد ارتبكت باللحضه اترخصت وكامت من يمنه
عبالي نروح كال لا خل نبقى شويه
شهد اتصلت بمرتضى وسمعناها لان جانت قريبه
احمد ومرتضى متفقين منو الي عنده مجال ياخذ ديما وشهد لان علاقتهم قويه وواحد ثاق بالثاني
بقينه كاعدين وعمار يحجي ومندمج وي ديما بس عيونه فاضحته كل شويه وصارت ع شهد
لحد مااجه احمد مو مرتضى الحمد لله لان خفت اخاف يتواجهون ويصير كلام بينهم
احمد سلم وكعد يمنه وطلب من شهد تجي بس رفضت وبقت بمكانها
كمت اني كعدت يمها واجتي ديما
ها لج ليش هربتي
ماهربت بس مااكدر اكعد واخاف يجي مرتضى فجأه وتصير سالفه
مطولوا لحضات ورحنه
بالطريق كام يسالني عمار
من شوكت وانت تتشاوفن هنا
من بداية السنه وقبل لتحجي وتلومني لاتنسه علاقتي شكد جانت قويه بشهد وتدري بيه اعزها واحبها واكيد منخليكم انتم وعداوتكم تاثر علينه
زين لعد وهاي يوميه يجيها اخوها ويدخل
لا والله ولا مره دخل
وهو واحمد متفقين بيناتهم ع ديما وشهد
سكت بعد محجه
تروحين للمطعم نتغده
لا خل نروح للبيت
لعد مساع شلون تتوسلين حتى تروحين
لان وي البنات واغلبية الطلاب راحوا هناك
سكت وصلنه للبيت اتغدينه ورحت نمت ماكعدت لليل
صليت واتعشيت شي بسيط
بعدها كلت راح اسوي حمله ع البيت هسه حتى ابقى نايمه باجر ومحد يكعدني
ماما وبابا عارضوا شنو بالليل تنظفين وتزعجينه بالمكنسه الكهربائيه بس اني اصريت وكتلهم حتى مااكعد باجر
كلهم كالوا مخبله مو صاحيه جان الجو بارد حيل بيومها
بلشت بالاستقبال كملته وعطرته وسديت الباب
صار بوجهي عمار
شنو متواعده وي ناس باجر وهيج عاندتي اله هسه تنظفين
لا والله بس اريد اخلص حتى محد يزعجني باجر اريد اشبع نوم ودير بالك احد يفكر يكعدني
عافني وصعد
كملت الاستقبال كله ورجعت للمطبخ نظفته كله لمن نكسر ظهري باوعت ع الساعه صارت ب3 اجه عمار نزل احتمال شك بيه اخابر او غير شي مااعرف
شنو لهسه منايمه ماكملتي
همزين نزلت عمار فدوه بقه بس الكراج والحديقه اطلع ويايه لان اخاف
اكيد مخبله انت مو صاحيه بهالبرد اطلعين بره
وينه البرد يمعود كول ياالله
اني الشته كله ماالبس شتوي ابقى بربع ردن وبرموده مااهتم ولا ابرد بس بالليل من اريد انام لان مااتحرك صدك ابرد
عفيه دطلع بس من بعيد والبس قمصله حتى متبرد
فعلا طلعنه وجانت السمه صافيه والليل هدوء
نضفت المغسله البره غسلتها من فوك لجوه وبعدها بديت بالكراج غسلته وعمار وخر السياره عن طريقي وبعدين رجعها
نضفت الحديقه همين بعدها كام يحجي عليه يله كافي وباجر كملي اني نعست حيل
يله مبقى شي كملت وصارت الساعه ب5
دخلنه هو راح لغرفته واني رحت لغرفتي دخلت للحمام سبحت وجففت شعري وصليت صارت الساعه ب6 بعدها نمت مرتاحه لان البيت محد ينظفه بس اني واسيل ابد منعتمد عليها وماما تنظف بس مو مثلي
نمت نوم عميق ماكعدت اله ع الهوسه واسمع صوت عمار رج البيت رج
ردت اكعد بعدين كلت شعليه بي اتوقعت هو واسيل لان دومهم يتعاركون
بس فجأه اندفع الباب قوي فتحت عيوني واني بعدني نعسانه شفت عمار وعيونه بكصته وخالو لازمه وبابا ويا اني انصدمت لان جنت نايمه وهيج تفاجأت
كله خالو خل نفتهم ياابني ميصير هيج
والله اليوم اله اكتلها وبايدي واخلص منها
اريد استوعب شكو وشبي عمار
شكو صاير شي
كولي هو شنو الي مصاير اكول باقيه للصبح اثاري حبيب الكلب مواعدها يجي يخطبها
اريد استوعب الي ديصير شنو معقوله اني بحلم
كمت افرك بعيوني
خالو لازمه كوه وهو يريد بس يلزمني اجتي ماما وادك وتطلطم
راح ننفضح من وراكم
لك خالو بس اهدئ خل نفتهم
شنفتهم بعد اكلكم للصبح مانامت لمن رتبت البيت كله لان تعرف اليوم جاين مشيه عليها
شنو مشيه ومنو الجاي
اي سوي نفسج متعرفين شي
خالو والنبي ماادري باي شي وجنت حيل تعبانه ونايمه
اكعد عمار خل نتفاهم قبل لايجون الجماعه عيب منهم
تعالي خالو رونه
انت تدرين اليوم مرتضى جايب مشايه ويريد يجي يخطبج
هنا عقلي تجمد مااعرف شاحجي
اكو قران بغرفتي بدون كلام جبته وخليته مقابيلي ماما سحبته مني بسرعه
بس اني مقبلت وسحبته
اقسم بهذا كتاب الله مااعرف باخو شهد يريد يخطبني والبارحه نظفت بس حتى انام ومحد يزعجني ابد
جان يكول عمار ........
🌹🌹🌹🌹🌹🌹
مساء الخير ع اجمل متابعين اتمنى لكم قراءه ممتعه
❣️❣️ #البارت 21❣️❣️
❣️❣️ #الندم_مابعد_الخطيئه ❣️❣️
❣️❣️ #للكاتبه رونق❣️❣️
جان يكول عمار لو مو تحلفين بالقران مااصدكج لان من البارحه اني شاك بيج والله بس وهمت نفسي ورغم كلشي احب اطمنج مااوافق عليه لو ع جثتي هاي اعيده الحجي ومراح يتغير رايي ابد
كله خالو ابني اكعد خل نتفاهم ميصير هيج عصبي ومتتفاهم لازم نكعد ونحجي بهدوء
خالو وحق علي ابن ابي طالب لو يجيبون العراق كله مشيه هم مااوافق لو مو ساده وشيوخ
اني لحد الان مكاعد استوعب الي ديصير
كلي بابا انزلي انت وامج وجهزن الجاي واحسبوا حسابكم عددهم هواي
نزلنه وهمه هم نزلوا
ماما شنو السالفه
ع اساس متعرفين
والنبي كلشي مااعرف ولا اكدر استوعب الي ديصير
تردين تقنعينه نظفتي وسويتي حمله وبقيتي للصبح كاعده هيج صدفه متعرفين بالموضوع
يعني حلفتلكم بالقران ومصدكتوا والله العظيم وداعتج وداعت بابا مااعرف واصلا متفاجئه مثلكم
والله مااعرف شاكلج يا ماما
اني اتمنى اصدكج لان هذا الولد ميفيدج ماما متزوج وزوجته متوفيه شلون تقبلين بي مااعرف
سكتت
اجوي يمنه بابا وخالو واجوي هسه بيبي وجدو
طلبوا من عمار يهدئ حتى يتفاهمون
كال ابد مااهدئ ولا اكعد اله تكولون نرفض مرتضى لان من المستحيل اوافق ولا واحد بالميه
كله جدو الولد مشتريها وحابها اكيد راح يسعدها ليش توكف بوجه قسمة البنيه
اكلكم والله اذا وافقتوا اعوف البيت واسافر مااخلي احد يندل مكاني وعود ذاك الوكت زوجوها ع راحتكم
بعد نزاع قوي وشاد اتوصلوا الى رد وكالوا راح نرفض ونتعذر منهم ونكول البنيه مخطوبه وعاقديلها ونسد الموضوع
كالت ماما وهاي الساده الي جايبيهم ميصير هيج تردوهم
بابا كللها متشوفين ابنج قافل
حيل اتاذيت لان هم راح يرفضون اني من البدايه عرفت مستحيل اصير لمرتضى
وره فتره كالوا اجوي وجانت الصدمه واضحه عليهم من كثر الناس والاغلبيه شيوخ ومعممين وساده معروفين
كال بابا صبوا الجاي
صبينه يمكن 70 استكان ويصيحون بعد وبعد
انخبصوا خالو وبابا لان جايبين ناس معروفين ومهمين
كالوا صعبه نفشلهم ونرجعهم حاولوا وي عمار بس اصر ع قراره
خصموها وياهم وطلعوا وجانوا ضايجين حسب كلام خالو
كال والله الصراحه ياابو عمار لو اني منك اقنعه لعمار واوافق لان نادرا تحصل هيج شخص عمل المستحيل حتى نوافق عليه خطيه بس عمار الي يوكف بوجها
هذا عمار مخبل ويتخبل من الولد وهاي كدامك شفته خلي نتجفه شره ونرفض ونسكت ولازم هالمره الاخيره الي يحرجونه بيها بعد مننطيهم مجال ويخطبوها
الله كريم
بقوا اتعشو يمنه واني كلبي نار همزين اسيل مو بالبيت
عمار كلي كدامهم اسمعيني زين روان نصيحه لوجه الله ابتعدي عنه افضل الج واله لان هالمره من صدك بس يجي يخطب مره ثانيه راح تكون نهايته ع ايدي حتلو اكضي كل عمري كله بالسجن
عمار والرسول ماعندي اتصال ويا ولا ادري بي من يخطبني
وهيج صدفه كعدتي للصبح ترتبين وتنضفين
والله صدفه ولو ادري مثل مكلت جان خليت المساله طبيعيه والصبح جان نظفت ولتنسى اني نايمه لحد مدخلت عليه معقوله اعرف بخطوبتي وانام جان جهزت نفسي وجهزت الجاي يعني اخذوها بعقلكم شلون اجيب الشبها لنفسي
سكت هو بعدين كال راح اروح اجيب اسيل من اهلها
اترخصت من الكل وصعدت استغليت خروج عمار وراسلت شهد
قبل السلام كتلها بس كليلي اخوج شنو سالفته مناوي يتركني بحال سبيلي والله كاعد اتاذه من وره سوالفه
بالاول سلمي يبذات
دزيتلها هو انت واخوج خليتو الواحد يفكر يسلم 😭😭😭😭
بس لتكوليلي ماتدرين بالمشيه
اي والله ماادري ابد وانصدمت ومو هنا المشكله
المشكله سويت حمله ع البيت كله لان عطله وكلت ابقى نايمه ومحد يزعجني وبقيت للصبح انظف والكل عبالهم اني عندي علم وهيج سويت
كولي والله 😂😂😂
اي والله وفوكاها تضحكين عليه 😭😭😭😭
وشكتيلهم
شاكللهم بعد حتى بالقران حلفت ماعندي علم ومحد مصدكني
وهذا عمار بالذات خبلني خبال وفوك كلشي رافض رفض نهائي
اسكتي لتقهريني والله لو تشوفين حال مرتضى خطيه من خبروا ردكم اتخبل كام يسب ويغلط واتحلف بعمار
والله لو يطيح بيدي عمار اله العب بي طوبه
شتسويله مثلا
يمعوده خليني ساكته لااحجي وتزعلين لان اخوج
لا تخافين ماازعل احجي لان اني هسه لو يطيح بيدي اله اخليلي سجينه بكلبه لعمار ع الي سواه بيه
تدرين شكد جنت احبه لعمار واحترمه هسه اكرها واحتقره لان طلع نذل المفروض ياخذ عبره من الي صار شلون فرقوا بيناتنه واثنينه متهنينه بحياتنه المفروض هسه يكول حرام عليه اعيد التاريخ نفسه وابعدهم عن بعضهم
والله تردين الصدك اني ضايجه اكثر شي ع ابوج خطيه يوميه مبهذله مرتضى
اي والله صدك اتعارك وي مرتضى وكله بعد تحلم اخطبها الك ولازم تنساها للبنيه
تردين الصدك مرتضى يستاهل الرفض لان كل الي ديصير بينه هو السبب
سبب دمارج ودماري هو
اي والله صدك بس هم خطيه اتندم ع كلشي وهذا الديسوي اكبر دليل ع ندمه الواحد الغيره خطب مره مرتين وهاي هي بس هو لا حتى اليوم كال والله مراح اايس وراح ابقى وراهم لمن يملون وينطونياها
اروحلج فدوه شهوده قنعي لاخوج خل يعوفني بحال سبيلي لان تعبت والله اخاف يجي احد يخطبني ومن وره تصرفات اخوج راح يجبروني عليه وذاك الوكت ماعندي حجه وارفضه
والله مااعرف شاكلج ياروان والله وروح ابني الماشبعت منه لو ادري بمرتضى هيج راح يسوي بيج مجان خليتج تجين ابد
هذا حضي وهاي قسمتي الله كاتبلنه الي صار وخلص مبدينه شي بعد
شهد فدوه اكدي ع مرتضى لو شيصير لايراسلني ابد لان والنبي دائما يفاجئني عمار وياخذه جهازي يبقي للصبح يمه يتمنى يلزم لزمه علينه وحتى انتي كوني حذره اني من يصير عندي مجال اراسل
اوك
يله باي
باي
نزلت جوه حتى محد يشك بيه
سوينه عشه اني وماما وبيبي وجدو بقوا يمنه يباتون
اجوي عمار وزوجته وجانت اسيل معصبه مبين عليها
ماما كالتلهم تعالو اتعشوا
كالت اني متعشيه يم اهلي
عمار اجه وكعد يمنه
اتعشينه ومحد فتح الموضوع ابد
بس عمار احسه مثل البالون اقل شي وينفجر والكل لاحضوا هذا الي لهذا السبب الكل اتجنبه
كملنه العشه وصبيت الهم جاي وبديت اغسل المواعين
رحت للاستقبال ونضفته مره ثانيه من طلعت لكيتهم يحجون ع موضوع مرتضى وصاحوني تعالي اكعدي
كعدت يم بيبي
حجه بابا كلي روان انت جبيره مو صغيره واكيد انت واعيه وتفتهمين الي ديصير
الي اريده منج يابنتي اتركي لهذا الولد لان من سابع المستحيلات راح نوافق عليه ولا واحد بالميه الافضل الج تكطعين الامل وخلي هو هم يكطع الامل احسن ما يجي يوم وتجبرينه نبطلج من الجامعه ونوافق ع اي شخص يخطبج
اني هنا دموعي خانني وكمت ابجي
بابا وغلاتك عندي وداعت ماما ابد ممتفقه ويا ولا ادري بي راح يدز مشيه وصدفه اني نضفت البيت لان عطله وحبيت اخذ راحتي بنومتي ومحد يزعجني
عمار حجه روان لتخبليني ماكو احد يخطب بنيه اكثر من 4 مرات ومصر عليها رغم الرفض اذا ماعنده علاقه بيها شلون تردين تقنعيني ماعندج شي
والنبي ماعندي علاقه بي ولا احبه والله يشهد عليه وحتى شهد مجابت طاري الخطوبه كدامي ابد
بيبي جاوبت عمار اني اصدك روان واني اكلك الله عاقبه لهذا الولد وشسوه بيك انت واخته الله سوه بي وخله كلبه وعقله يم اختك ويجوز بدون علمها
بيبي بربج هذا هم حجي وانت مقتنعه واحد هيج بدون متنطي البنيه كلمه يدوس ع كرامته ويبقه مصر عليها
اي بيبي وليش لا وراح اسولفلك قصه قديمه جانوا اهلنه قبل يسولفون عليها
الكل سكت وبدينه نستمع لبيبي
اسمعوني زين اكو قبل واحد فلاح يشتغل بكاع عند شيخ عشيره معروف وهذا الشيخ جان صغير بالعمر يعني مو جبير وبنفس الوقت جانت كلمته مسموعه بين الشيوخ والناس
عنده اخوات 3 اثنين متزوجات ووحده بعدهي وجانت هاي البنيه حيل حلوه وجمالها مو طبيعي وجانوا يخافون عليها اهلها يكولون جانوا اهلها بيدهم ياخذوها للمدرسه وبيدهم يرجعونها
يوم ماخذها اخوها للمدرسه وجانوا يرحون مشي ملاكيهم شخص غريب جاي خطار من شايف جمال البنيه واكف مقابيلهم وكايله يابه والله لو اني منك هاي البنيه مااخليها تمد راسها من الباب من جمالها شنو متخاف عليها
ميعرف هذا الرجال هاي اخت الشيخ تصير
صايره طلابه شكدها وشعرضها وي هذا الشخص وماكله بسطه تسوه عمره وحياته
بعدها بطلوها البنيه خطيه يخافون عليها الخطابه يوميه يدكون بابهم بس هي ترفض وبقوه عناد باهلها وهمه ميكدرون يجبروها
كل اليجي يرفضونه وحتى شيوخ اجوها ومقبلت
البنيه متخبله وتبجي ليل نهار ع دراستها من شافوها هيج كاموا يسمحولها تروح يم البستان
يوميه كامت تروح وتشوف هناك فلاح يشتغل بالبستان هو متجرئ يباوع بوجها ابد بس هي تكول من انزل عيوني واباوعله صدفه الكي عيونه عليه
البنيه تكول روحي صارت بالبستان بس حتى اشوف هذا الفلاح البسيط
بمرور الايام البنيه اتعلق بي حيل بس هو ولا يمه السالفه تكول كام من يشوفني اجي باللحضه يختفي وهذا الشي خبلها ماتعرف السبب
معقوله معجبه شكلي او حسني مو راحه لان اباوع عليه
بمرور الايام الولد كام يبقى ومرات يتجرئ ويضحك بوجها وهي الفرحه مسايعتها بوكتها
بعدها تكول تجرأت وكمت اسلم وهو يرد السلام بعدها سالته ع اسمه كلي اسمي راضي وردت اعرفه ع اسمي كلي اعرفج زين يا فاطمه اتعجبت وين يعرف اسمي
كتله وين تعرف اسمي
هو اكو واحد ميعرف فاطمه اخت الشيخ تكول بدينه يوميه نسولف شويه لمن عرفت كلشي عنه وهو همين عرف كلشي عني
بدينه واحد يحب الثاني هو اعترفلي واني اعترفتله
كلي راح اخطبج من الشيخ وراح اواعدج اعيشج عيشه كريمه ومااخليج يوم من الايام تزعلين مني وجنت طايره طيور بحجيه
هذا الفلاح البسيط كدر ياخذ عقلي بشخصيته ورزانته
فعلا اجه خطبني بس اتفاجات باخوي الشيخ بسق بوجها وطرده مو بس من الديوان طرده من الكاع والبستان والديره كلها وفوكاها هدر دمه اذا شافه بالديره لان اعترف وكال احبها وهذا الفلاح لان فقير يكول ميناسب فاطمه ابد
حيل ضجت وانقهرت بس مابيدي شي
بقيت عايشه بالضيم من وره اهلي لان عرفوا الصار وحبسوني بالغرفه وبقيت اكثر من 3 اشهر مااطلع بعدها سمحولي اطلع بس مو بوحدي
يوميه اروح للبستان والي امل اشوفه كبالي مر شهر يوميه اكعد نفس المكان واايست من راضي كلت نساني وراح ولازم هم انساه
ثاني يوم اجيت ولمحت ضل شخص خفت ردت ارجع وجان ينسد حلكي وانجريت
بعدها التفتت لكيت راضي خطيه يكلي اسكتي لتحجين لمن اكمل
بده يحجيلي ويكلي يوميه اجي وميهمني تهديد اخوج ودزيتله هواي ناس بس مصر يرفضني حتى ساده دزيت بس مفاد كال البنيه رافضتك ردت اعرف ليش رفضتيني
والله مارفضت واصلا حبسوني بالغرفه
والله اعشكج وبس الموت يفرقني عنج
اني هم اعشكج وجسمي يحرم ع اي شخص غيرك
بعدني ممكمله ومااحس اله اخوتي فوك روسنه اني عندي 3 اخوان ومن ضمنهم اخوي الشيخ
جان يصيح صوت علينه حسيت الديره كله سمعت
سحب اقسام دنكت ع رجله ابوس رجلك بس اسمعنه والله ممسوين شي ولا سوينه خطئ بدون ميسمع مني ضرب راضي طلقه براسه وطلقه بكلبه وكتله كدام عيني وهو بانفاسه الاخيره اجيت خليته بحضني كال احبج والله احبج نفسي وراج لتتزوجين غيري راح انتضرج هناك وياشر بالسمه وجان يموت بين اديه
هنا اني انكلبت وحش عليه
الله لايوفقك الله لايهنيك والله ممسوي شي جان يجرني من شعري ويسحلني للبيت سحل وحبسوني بالغرفه
اني هنا كمت ادك والطم لمن مليت كطعت الاكل والشرب ايام وايام بعدها اجني اخواتي وكامن يحجن عليه بديت اكل بس مااطلع بس للحمام وارجع
بعد مرور سنه فتحوا الحبس عني بس اني مهمني ابد اني بقيت بالغرفه ابد مااطلع ولا الي واهس كلش هواي حاولوا اطلع ارجع مثل قبل بس ولا يمي
حاولوا يجبروني ع الزواج حلفت يمين اكتل روحي ولا اخلي احد يلمسني
شاء القدر والشيخ رايد يدعمله بنيه وجانت حيل حلوه هو فها ع جمالها وهي ترزل بي وهو ولا يمه
الشيخ اتعلق بالبنيه من اول نضره
سال عليها وكال جيبولي اصلها وفصلها ومن جابوا اصل البنيه جانت الصدمه تطلع اخت الولد راضي
الشيخ حار شلون راح يخطبها وهو اتعلق بيها واكيد يعرفونه هو نفسه الي كتل ابنهم
كام يكوم ويكعد ويكول اريد البنيه روحي اتعلكت بيها
خطبها من اهلها واكيد الرفض جان الجواب وهو تخبل بالزايد
الله راد ياخذ حق الولد الكتله وحق اخته وعذبه بالدنيه قبل الاخره
دز شيوخ وساده ومفاد
راح بنفسه واعتذر من اهلها وكاللهم شتردون اني حاضر
المشكله ماخله لاسيد ولا شيخ ولا عرف ولا احد يعتب عليه مادزه الهم والبنيه بالذات رافضته تكول شلون اعيش وي واحد كتل اخوي بيده
مرت سنه وسنتين و3 و4 و5 سنوات والشيخ مامل من البنيه ومحد يكدر يخطبها لان الكل عرف بالشيخ يريدها والبنيه معارضه ماتريده ابد
فاطمه بقت بدون زواج ابد
والبنيه جانت الوحيده لاهلها هي واخوها الله يرحمه
شاء القدر وابوها اتوفه وبقت وي امها لاحول ولا قوه الهن وحالتهم الماديه مو زينه ابد امها بدت تتمرض وتحتاج علاج
الشيخ يدز مساعدات بدون علمهن حتى يساعدهن بصوره غير مباشره بس هنه عدهن كرامه وعزة نفس ميقبلن مساعده بدون مقابل
بعدها راحت للشيخ وطلبت منه تشتغل بالكاع وهو رفض كاللها شلون تشتغلين والرايح والجاي يشوفج
هذا الشي ميخصك ابد تريد تساعد مثل متكول شغلني بلي يعجبك اهم شي اشتغل
وافق وخلاها تشتغل بالبيت تساعدهم لو بالطبخ لو بالتنظيف هو راد محد يشوف طولها وهي رادت شغله شريفه تساعد امها بيها
بدت تشتغل وصارت مقربه من فاطمه والشيخ اطمان من ناحيه محد يشوفها وقريبه عليه وساعدها وكام ينطيها اجر جبير وهي ترفض تاخذ حقها بس
امها بدت حالتها تسوء كلش ودزت ع الشيخ وجانت ع اعصابها كلتله امي تريدك
فاجات الكل من كلتله اني موافقه ع زواجك من بتي استر عليها لان ماعدها احد غيري واني احس هاي ايامي الاخيره واريد اموت واني مطمانه عليها
رفضت رفض نهائي البنيه بس امها اصرت وكالتلها هاي وصيتي قبل لااموت ومراح ارضه عليج اله لمن تتزوجينه
وره يومين اتوفت امها وبقت وحدها وحارت شتسوي رجعت تشتغل ابيت الشيخ وكامت تنام وي فاطمه
مرت سنه ع وفات امها والشيخ يوميه يدز وحده تحجي وياها وهي ترفضه ومخله شي يعتب عليه بعدها طلب يشوفها ويحجي وياها
اسمعيني يابنت الناس اني جنت همجي واعترف كدامج ماجنت اؤومن بالحب ولا اعترف بي واني اخوج من خطب وطردتها وطلبت منه مايلفي للديره وهو عاند واجه لكاعي وكدام عيونه التقى باختي شتتوقعين اتصرف
اني اعترف كدامج غلطت ومستعد كلشي اسوي لخاطر ترضين عليه يابنت الناس
الكل يدري بيه رايدج ع سنة الله ورسوله والكل يعرف بيج انت عايشه عدنه تشتغلين ابيتنه والكل يعرف باهلج ميتين
الكل اكل كلبي شلون تعيشها وياكم وهي تحرم عليكم الله شاهد يابنت الناس حبيت اعقد عليج حتى اسكت الناس لان الناس الها الظاهر محد يعرف انت واني شنو علاقتنه بالبيت
كالتله اني اوافق عليك بس بشرط
شنو شرطج يابنت الناس
نعقد ع حسب الاصول بس مراح تلمسني مدة سنه كامله شالبس شاسوي كدامك ماتمنعي بس اريد وعد شرف من الشيخ وكدام شهود ماتلمسني ابد واذا لمستني بدون رضاتي تسجل كل املاكك باسمي
زين اذا نجحت ومرت سنه ومالامسج بعدها شلون
راح اكون زوجه الك
هاي هي يابنت الناس اتفقنه
انتشر خبر زواج الشيخ من اخت راضي
اتزوجوا وكام يجي ينام يمها لان هذا الشي من ضمن الشرط البنيه جانت ذكيه وداهيه رادت توكعه بكل طريقه
كامت تلبس وتخلي الاحمر والاخضر وتخلي الشيخ يموت 100 موته باليوم بس مايكدر يلمسها وكدر يسيطر ع نفسه
ملت منه وهو ولا كانو بالعكس بين الها ولا كانو هي كبالها وراح اتزوج عليها وكام يقضي كل وقته وي الجديده وبدت تغار عليه وتضوج شلون ميهتم بيها
مرت السنه وهو صامد امامها بالعكس يبيع ثكل عليها ومسوي نفسه ممهتم بيها وبدت تضوج من هذا وضعها
طلبت منه يطلكها وهو رفض هذا الشي كلها اتسجلتي باسمي وللموت تبقين باسمي
بعد السنه بده يرجع لغرفتها وطالبها بحقه الشرعي وهي ماتكدر ترفض لان هذا اتفاق
صارت زوجته فعليا بس هي مبين عليها متريده وتكرها من شافها هيج تركها رغم ماطلعت حامل هي ماتتقبله زوج الها وهو كرامته متسمحله يتنازل ويذل نفسه الها
جابت ولد والدنيه كلها طايره لان الشيخ اجاه ولي العهد بس هي بعدهي ماتهواه
بس صار دم وثار بين عشيرتين وادخل الشيخ وحل النزاع بس بعد مااكله طلقه وحالته صارت لاتسر عدو ولاصديق دخلو انعاش وفقد الوعي بقه تقريبا شهر واخذوها خارج العراق يله اتعافه
بنفس الوقت البنيه تدعيله ليل نهار ونذرت نذر بس يتعافه ويصير زين ترجعله وتعيش حياتها طبيعي
اتعافه الشيخ وجانت المفاجئه بانتضاره ولكه زوجته منتظرته وعاشوا عيشه سعيده
بعد معاناة وشلاع كلب اتفقوا الاثنين وعاشوا حياتهم سعيده بس فاطمه بقت بدون زواج لحد ماماتت الله يرحمه
ياابني مرات الله يراوي البشر الخطئ الي ارتكبه ويخلي يمر بنفس الموقف مثل مصار وي هذا الولد
اكول فعلا كلام بيبي هيج صار وي مرتضى بس الفرق هو اغتصبني وبعدها اتندم ودفع الثمن غالي
معقوله يجي يوم واغار عليه معقوله احبه لا مستحيل لان اذاني حيل ويستحيل احبه
عمار كلها بيبي قصتج حلوه وبيها معنى بس الشيخ مو مرتضى ولا زوجته روان احنه الحمد لله عايشين وممحتاجين احد ومستحيل يجي يوم ونضطر نزوجها اله
كول ياالله ياابني الولد متندم ويجوز عاشكها لاختك من صدك
تعال اكلك البنيه مو كلتوا استشهد رجلها ليش ماتتزوجها وانطي اختك وفضت راحت
مستحيل اتزوجها لشهد بعد شنو مخبل واقبل بيها هي الفضلت ابن عمها عليه وشنو نسيتي بيبي اني متزوج وعندي ولد والثاني بالطريق
لا مانسيت بس انت النسيت يوميه عركه ويوميه اطلابه وي مرتك
حجت ماما شنو يوم انت بمكان ماتشجعينه يعقل ويعامل مرته مثل الناس انت كاعده تشجعينه بالزواج
وليش لا بابا اذا الولد ممرتاح وي زوجته وهو يحبها للبنيه ليش مانسعه الهم حجه جدو
عمار خصمها وياهم
هاي السالفه انسوها لو تنصب ذهب ولو تطلع نخله براسها وراس اخوها هم مااوافق لا عليها ولا ع اخوها
اني اترخصت منهم وصعدت وجنت حيل ضايجه وخايفه اخاف عمار يعاند ويجبرني ع غير مرتضى وبهذا الوقت اكيد انتحر وهالمره لازم اموت
بقيت افكر شنو الي اكدر اسوي وااثر ع اهلي حتى يوافقون فكرت احجي وي ماما الحقيقه يجوز تكدر تساعدني بس بعد تفكير طويل توصلت الى نتيجه حتى اذا صارحت ماما راح ااذيها ويجوز تتخربط وضغطها يصعد وبدون نتيجه لان الرايي الاول والاخير هو لعمار هو الرافض الوحيد
نمت وثاني يوم كعدت ع صوت اسيل هي وعمار غلست رجعت نمت
كعدت تقريبا ب12 صليت ونزلت جوه
سالت ماما شكو شصاير الصبح
ماكو شي
بيبي وين هي وجدو
بالغرفه ديصلون
رحت سلمت عليهم وكعدت يمهم
اكو وحده تكعد الظهر شبيج بيبي غير تكعدين الصبح وتساعدين امج خطيه وحدها
بيبي والله اني شغلي من الليل اكمله في سبيل ابقى نايمه وشوفة عينج البيت كله عليه وماما واسيل عليهن الطبخ لان مااعرف اطبخ
وليش عود ماتعرفين عايزه ايد رجل
والله بيبي اضوج من الطبخ لان دائما يطلع مو طيب بس اعرف اگلي
اجتي ماما يله كملوا صلاتكم راح اصبلكم الغده
رحت اساعد ماما
اشو اليوم جنتج ماكو وين
يم اهلها
ليش شكو مو امس بالليل رجعت
البنيه مريضه خطيه وراحت تبقى هناك ترتاح شكم يوم
معقوله كل هاي الهوسه الصبح وهسه ماهي اسيل وتكولين مريضه كولي عمار طردها
اشو فرحانه ولج بس لا تردين الحيه شهد تصير مرته لعمار وانت ترحين لاخوها نجوم السمه اقربلكم
هاي وين راح بالج لبعيد ماما اني ااكدلج شهد ماتقبل بعمار لو يصبها من ذهب
جان يمد راسه عمار وكال
شنو عيدي الكلتي اني اصبها لشهد من ذهب ومتوافق عليه شنو هالثقه الزايده
لج بابا والله مااقبل بشهد لو تموت لان مستحيل اقبل بفضالة غيري وهذا الكلام اتمنى توصلينه الها
يله ماما صبينه الغده احسن من هذا الكلام البلا معنى
سكتت مااكدر اتناقش وياهم
كمل الغده ورادوا يروحون جدو وبيبي بس ماما اتوسلت بيهم يبقون حتى يروحون ويانه لكربلاء وكالت ماما نخابر خالو وزوجته
بقوا وفعلا اتفقوا بعد يومين نروح وقررنه نبقى هناك يومين
اتوسلت بديما تروح ويانه حتى ع الواهس اني وياها كالت اذا قبل احمد اروح وراح اتوسل بي لان يومين نبقى هواي
لج هيه ليله وحده وثاني يوم نرجع خل نغير جو
الله كريم
وبعدها وافق احمد وجنه فرحانين اثنينه
اجه الموعد ورحنه سيارتين عمار بقه هنا وجاب اسيل
وصلنه واجرنه بالفندق وبعدها رحنه زرنه واتغدينه ورجعنه اني وديما بقينه كاعدين ونسولف واتصلنه بشهد وفتحنه كام وياها
الكل نايم بس اني وياها
للعصر رحنه للحر والمقام وحيل اتونسنه وغيرنه جو
بالليل هم زرنه مره ثانيه
ثاني يوم اتخربطت بيبي خطيه واضطرينه نرجع من الصبح
وصلنه الظهر جبنه ويانه غده جاهز
اتغدينه ورجع عمار للمحل
تقريبا ب4 العصر دخل علينه عمار بمنظر ماانساه للموت الدم من فوك لجوه مانعرف منين الدم ديطلع
وبنفس الوقت عيونه تريد تاكلني اكل
بس لا الي ابالي صار معقوله مرتضى الي مسوي هيج
ماما كام ادك وتلطم وبابا كام يصيح اسكتي خل نشوف منو الي مسوي بي هيج
جان يكول ........
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: