مساء الخير ع اجمل متابعين اتمنى لكم قراءه ممتعه
البارحه حيل افرحت لان اغلب التوقعات جانت صحيحه واتمنى اليوم هم تفكرون وتكون توقعاتكم صحيحه
🌹🦋 البارت 37 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
وجان انصدم بسياره طبكت يمنه والتسوق زينب
اني الصراحه اتفاجأت فتحت حلكي وعيني عليها 👈😲😲😲
بس الي شدني الها النزاكه والحشمه
لابسه عبايه والحجاب يعني مذابتها مثل ممتوقع
اني اتوقعت اكيد تذبها للعبايه
لان اذا امها اصلا ملابسه عبايه
هي شلون تبقى لابستها
الصراحه عيوني تباوعلها لكل تفصيل بيها غصبا عليه
نزلت رنا وياها
حضنت نظوري
مباوعت بوجهي ابد
فاتت من يمي بس كالت
مرحبا
ودخلت بهدوء
حتى ملحكت ارد السلام
رنا هم سلمت وانطت السويج لابوها
كلتله لمن ابو نور يطلع سيارته خليها بمكانها
اني لحد الان مصدوم
منو علمها ع السياقه وشلون اشترت السياره
اخذت نظوري ورحت وجنت حيل دايخ
بس الصراحه عجبتني شخصيتها
ولبسها وحشمتها
لازم اراقبها يوم خلال هاي اجازتي
حاب اشوفها بالجامعه
رجعت للبيت والكل فرحان بنظوري
كامو يحسبون حسابه يدزون جنطه بيها ملابسه
بالليل انيمهم يمي
طبعا حنان تتخبل مبين عليها
بس اني ولا بحالها التخبلت والمتخبلت
يطبها مرض
تبقى تحجي شنو كلشي ماافتهم منك من تجي
بس يله نايم وي جهالك
مااهتملها
اهم شي حبايبي يمي
زهراء زوجة امير طلعت حامل وطلع تعينها
بدت اداوم
اهلي هم فرحانين بيها
محمد قرر يسافر هو وزوجته يردون يكملون الدراسه بامريكا
يبقون هناك ع حساب الدوله راح يطلعون
وكال بلكي هناك نتعالج ع مود الطفل
خطيه يتمنى يصير عنده طفل
حيل فرحناله لان طلع اسمه للخارج
بدوا يجهزون بنفسهم وفيزوا
بقيت نظوري يمي 5 ايام
بعدها كال محمد خل ناخذه ويانه لامه
نريد نروح نسلم ع زينب واهلها قبل لنسافر
راحو وامي راحت وياهم وحتى نور صادف خميس
كالت ابقى هناك
ع اعصابي وافقت
لان هنه شكم يوم وراح التحق
الاحد رحت للجامعه ودخلت هواي عرف هناك
شفتها وانصدمت بيها منازعه العبايه حتى بالجامعه
وجانت بوحدها كاعده من دون الطلاب
اقل مجموعه اثنين
هي الوحيده العازله نفسها
ولاحضت لابسه نفس الحلقه الي اشتريتها الها
حيل افرحت من شفتها هيج
هاي زينب مو هينه ابد
يوميه تثبتلي بان هي اشرف وحده عرفتها
واني خطأت بحقها هواي
المفروض مااعاند وياها
مخليتها تحس بيه ابد
سالت واحد اعرفه عنها
كال هاي خط احمر البنيه متزوجه
وماعدها علاقه لا ببنيه ولا بولد
قسم يصيحولها المعقده
وقسم يصيحولها الكرديه
وقسم يصيحولها المغروره
احس ملكت الدنيه من سمعت هيج عنها
حيل اتندمت لان طلكتها
هسه شصار لو موافق
بس اني اكبر غبي كبريائي منعني اتنازل
واوافق
واكيد الندم راح ياكلني اكل
خلصت اجازتي بلمح البصر
الصراحه كرهت النزله
وبنفس الوقت من التحق
حيل اتعب واتمنى ارجع
مااعرف شنو الاريده
مشتاق للكليجه مالتها
دائما الكل يسالني شو بعد متجيب
كتلهم مريضه زوجتي ومتكدر تسويلي
التحقت اليوم هم لسامراء
شغلت بالطريق فيديو نصرت البدر ع الموت
خليت السماعات باذاني ورحت بغير عالم
تخلص وارجعها لحد مانمت
وصلنه لسامراء
رحنه للمقر
بدت مهمتنه ثاني يوم
دائما ابقى جوعان بس مابدينه شي
الاكل كله مايعجبني
لا عند اهلي ولا هنا
جان طبخها زنوبه يخبل يفتح النفس
مهمتنه حيل حيل صعبه
ومثل كل مره ارهاق وتعب
هالمره خلوني احقق وي الدواعش الي يلزموهم
واخذ معلومات منهم
مرات يحجون بسهوله ومرات بالضرب
اني الي يوكع بيدي اكيد امه داعيه علي
لان ماارحمه ابد
ميقبلون نقتلهم
اني لو يطيح بيدي الي اكمل تحقيق منه اعدمه بمكانه
بس الاوامر بعد
مره جابولنه واحد يسمونه الوالي
هذا كفرت بي واجرمت
كلت حتلو اتعاقب من ورا مو مهم
لان اعترف اعترافات حرام علي الواحد يبقي عدل
حتى صعقات بالكهرباء صعقته
ذبيت حركتي بي
اخر شي اجوي الضباط اخذوا مني
بقوا يحجون عليه
كتلهم انتوا لو سامعين بجرائمه جان مخليتو عايش
كال بس ميقبلون نقتله
نريد معلومات منه
نريد ينطينه احداثيات عن مواقعهم
وره يومين اجوي كالوا راح تحقق ويا
لان الظاهر حيل خايف منك
وهسه راح يعترف بكلشي
بلكي ينطي معلومات عنهم
بس انت دير بالك لتقتله
فعلا دزوا
كال دخيلكم شتردون احجي
بس لتخلونه يضربني
كتله لعد اعترف بدون لف ودوران
انطانه معلومات خطيره
بعدها ضيفته ضيافه حلوه وبعدها سلمته
فعلا طلعت المعلومات صحيحه
وصار الهجوم من قبل قواتنا
وجانت خسائرهم قويه
حيل فرحنه
واجوي الضباط هنوني كلولي لو ماانت مجان يعترف
اني الصراحه المجرم اخلي يعترف لو شيصير
بدون ضرب او ضرب لازم بالاخير يعترف
كلولي اذا بقيت هيج بالتحقيق نرفع كتاب بيك
ولازم تجيك ترقيه
اتشجعت اني بالحجي
والاهم من كلشي من اشوف ثمرة جهدي والانتصارت الي نحققها
صارلي واهس
كتلهم عليكم بس جيبولي المجرم والباقي عليه
فعلا كاموا شكو داعشي يدزوا عليه
واني اقوم بالواجب والضيافه الحلوه
كدرنه بهذا الشهر نحقق انتصارات
ارتفعت معنوياتنه
حصلنه معلومات من شخص بس الظاهر ناصبين كمين
دزينه سيارتين من الجيش
للمداهمه بس كدروا يقتلوهم كلهم
انغدروا كلهم
هبطت معنوياتنه وحيل ضجنه عليهم
اكيد عوائلهم جانت تنتظرهم لحضه لحضه
وبالتالي وصلت بس الجثث
الدواعش بسامراء مو هواي
يعني الوضع اهونمن الموصل سابقا
بس يبقى الوضع خطر لان الدواعش وي العوائل بنصهم
خلصت شهر بس كلولي ابقى بس شكم يوم كمل التحقيقات
كتلهم عادي ماكو اشكال
كوه حصلت اهلي وخبرتهم
خطيه نبع الحنان بس تبجي
كوه افتهم منها من تحجي
دمرتني دمار
كتلها يوم محتاج بس لدعائج
بقيت تقريبا 10 ايام وكملت التحقيق
يعني هالمره بقيت شهر و10 ايام بس ابد مشتركت نت لان ماعندي مجال ابد
كالو باجر انزلوا والكم اجازه 20 يوم
فرحنه وجنه تعبانين ومرهقين حيل
الليل كله منايمين فرحانين بالانتصارات وفرحانين بنزولنه لاهلنه
مشتاق لاهلي هواي ولجهالي وحتى لزينب
جهزنه الجنط وبقينه فرحانين ننتظر شروق الشمس حتى نرجع لاهلنه
فعلا صار الصبح وانطلقنا
زينب : اتعودت من يجي حيدر ياخذ نظوري شكم يوم
كلت هم خطيه يشتاقوله
اتعودت ع فراكه
عمو وخاله وعمامه هم خطيه
من حيدر يلتحق دائما يجونه حتى امير وزوجته
عرفت بيها حامل خطيه وفرحتلها
فاطمه همين حامل
اثنينهم نفس الفتره تقريبا
دائما يجونه وحيل افرح
فاطمه حتى هي وزوجها يجون النه
بالنسبه الي اتعودت ع الدوام وجانت الدراسه صعبه
معظم وقتي اقضي بالدراسه
ماما ورقيه خطيه متكلفات نظوري
ميخلني احس بي ابد
مرات بوقت فراغي اكعد لتبارك ادرسها لان سادس
هالمره حيدر مااجه لنظوري استغربت
صار تقريبا شهر وهو ماكو
بعدها اتصل ابابا وخبره
ثاني يوم رجعت من الدوام اني ورنا
وجان اشوفه كبالي
نظوري حبيبي اجاني كبل وبوسني
الصراحه اني كارهته لحيدر
حيل جرحني وخاصه اخر مره
حسيت بعلامة الصدمه ع وجها
انطيت لرنا السويج
كتلها خلي بابا يوكفها عدل لمن يروح
سلمت ودخلت كبل
مااخفي عليكم حيل اتاذه من ياخذ ابني
اخاف يتاذه ومحد ينتبه علي
الي سمعته منقول لسامراء
وجانت الاوضاع هناك متبشر بخير ابد
بقا يمه تقريبا 5 ايام
بعدها اجوي محمد ورسل وخاله ونور
حيل افرحت بيهم
يردون يسافرون لامريكا يكملون دراستهم هناك
رسل تبجي تكول هواي نطول شلون راح اصبر
خطيه حيل متاثره
كتلها بلكي تتعالجين هناك ويصير عندج طفل وراح تتغير حياتكم هناك اكيد
طلبت مني طلب
اسويلها كليجه وكروسان كالت اخاف مااكدر اكل اكلهم بالبدايه
كتلها تدللين من عيوني
قبل ليسافرون بيوم اجوي ودعونه وانطيتهيا
كامت نوره تجي كل خميس وجمعه وسبت
ندرسها خطيه لان مستواها نازل
دائما اوصي ماما تشتريلها ملابس قراصات
بالنسبه لحيدر كل شهر يدز 250 لنضوري
وعمو وخاله كل واحد 100 ابد مااقبل بس همه اصروا عليه
كلولي لابنه منطيهن مو الج
اني اشتري لنوره ولنظوري منهن
طبعا اشطر وحده بقسمنه اني
واكيد مثل من جنت بالمدرسه
الكل ماخذ نضره عليه
الي يسمعني مغروره
والي يكول معقده
والي يكول ام خشم اليابس
اني ولا يهمني ابد
هدفي واحد واضح
دراستي وبس
البنات دائما اتراسل وياهن حتى رسل
كدرت اوفق بين دوامي وابني والبيت
اساعد ماما خطيه
لان رنا ماتكدر ابد خطيه دراستها حيل صعبه
وتبارك السنه سادس ومتتحاجه ابد
باقيه بس رقاوي هم تدرس
ماما خطيه بوحدها
اني دائما اساعدها
رنا حاجيه وي مصطفى ومتفقين بس خطوبه
وعقد سيد ومحكمه
وبالسنه الاخيره يتزوجون
كللها اهم شي اضمنج الي وميهم الوقت
الظاهر يحبها حيل
وهي كذلك تكول كمت احبه واتعلقت بي
اجه عمو وفاتح بابا بالموضوع
كله اخذ رايي البنيه وارد الجواب
حجه ويانه محد اعترض
لان الولد كامل من كلشي
حباب وخلوق وصاحب شهاده
رجع بابا الموافقه
وصارت الخطبه رسميه
كال اني كاعد ابني
بيتي بوحدي
لمن اكمل واجهزه ذاك الوقت مخلصه دراسه نتزوج
قررنه بعطله نصف السنه يصير العقد حتى نسوي حفله
كثرت جيات عمو وابنه الي اسمه علي المزعج
الي نضراته مو مريحه ابد
ابد منرتاحله لا اني ولا ماما
عكس مصطفى
اني اتخبل منه
مره اجت زوجته واطفاله وياه
وجانت البنيه حبابه وحلوه
بس هو مدري شبي عينه زايغه
عمو وخاله دائما يجون
علاقتهم قوت باهلي
الي سمعته حيدر مبقيهم اكثر من المده
وخاله بس تبجي
تكول حيل خطر وي الدواعش
كام يبقى اكثر من شهر
اجذب عليكم اذا اكول ماخايفه علي
يوميه ادعيله بالصلاه
خلص الشهر وماكو وخلص الشهر ونص وماكو
خابر عمو يبجي يكول حيدر متعرض لهجوم
جماعته كلهم مستشهدين
بس هو حالته حيل خطره بين الحياة والموت
خبرني بابا اتخبلت
ياربي كلشي ولا يصير بي شي
خطيه
امه خطيه ابو اخوانه اخواته
وحتى نظوري
مااريده يبقى بدون اب
ياربي ساعدنه
كمت ادعيله
راح بابا للمستشفى
دخلو العمليات
كالو 5 طلقات
وحده براسه و وحده بصدره
وحده برجله وحده بايده
والاخيره ابطنه
مسويله اكثر من عمليه
وانطوا مهله 48 ساعه اذا صحه ماعلي خطر واذا لا
راح يدخل بغيبوبه
بقينه ندعيله اني واهلي
واهله همين
رحنه للبيت اني وماما
حالت خاله متنوصف ابد
اتفاجأت بحنان ماهي
كالو يم اهلها
هاي شترد عليها
يعني محتاجيها اكثر من اي وقت المفروض توكف وياهم
خاله حالتها تعبانه حيل
وكل شويه وصاعد ضغطها خطيه
مسويه اجازه مرضيه ومااداوم
لج خاله ادعيله والله مااتحمل بعد صدمه
واحد دفنته بيدي تقصد مروان الله يرحمه
واحد اتغرب تقصد محمد
وهسه هذا حالته خطره
ابجي وي بجيها خطيه
كمت يوميه اصلي صلاة الليل وادعيله
الصراحه صارلي فتره تاركتها للصلاه
لان اتعب بالدوام وانام من وكت
بديت اصلي ع موده خطيه
خلصن اليومين ومافاق ابد
كال الدكتور راح يبقى بغيبوبه ومانعرف شكد يبقى
يوم اسبوع شهر سنه اكثر
العلم يم الله
جماعته كلهم مستشهدين
الي عرفنا بيوم نزولهم
ناصبين الدواعش سيطره وهميه
موكفيهم وبادين يضربوهم عشوائي
الكل ميت بس هو الوحيد باقي
اني متاكده من الطلسم مالت الامام لان هو الي حفظه
بقه شهر واي استجابه ماكو
اجت الامتحانات نصف السنه
نور دزوها يمنه والسايق ياخذها منا ويرجعها النه
خطيه بس تبجي ع ابوها
خلصت الامتحانات بس الصراحه اني بالي مشوش كوه امتحنت
نور طلعت الاولى خطيه
خاله تكول ع حساب حنان
يكولن المعلمات مو زينه
اني هنا حيل ضجت
كتلها لا والله خاله درسناها
هاي يمج واساليها
دائما اسالها شنطوج
تكلي وجوابها صحيح
ترضين تزعلين
هاي حنان جذابه
خل تولي
كالت خاله اسكتي لتهيجين المواجع
راح الجان صاكرها
لاعبه بينه جوله
ويوميه عند اهلها
وهسه داخله دورة سياقه
تريد تشتري سياره
شلون انت عندج
تكول التسوه والمتسوه عدها واني لا
ادعي كون الله يكوملنه حيدر بسلامه
الله كريم خاله
كالت فدوه خل نروح باجر للمستشفى
اخذي نظوري ونور
بلكي يحس بيكم
كتله الله كريم باجر اني امرلج ونروح
فعلا كلت لبابا
كال روحي
مريت ع خاله ورحنه
لبسونه الكمام ودخلنه اني ونظوري ونور
الصراحه اتفاجات بي من شفته
حيل ضعفان ومتغير حيل
راسه شادينه
وجسمه كله اجهزه والصونده بخشمه
كمت ابجي بدون وعي
نظوري كام يبجي خاف منه
حتى نور همين
كتله حيدر اكعد ذوله نور ونظوري
يبجون عليك مشتاقيلك
اهلك كلهم منتظرينك
كافي نوم مشبعت
شلون انطاك كلبك هاكد تنام
معقوله مااشتاقيت الهم
كامو يبجون
طلعتهم لخاله
كتله هسه ارجعلكم خليهم يمج يخافون منه
رجعت لك حيدر النومه مو الك
جهالك محتاجيلك
فدوه اروحلك اكعد
اباوع رجله بيها بلاتين وايده كذلك
جسمه مشوه
شلون باقي عدل مااعرف
ماكو اي استجابه
طلعت لخاله ودخلت بمكاني
طلعت منتهيه خطيه
حيل اذاني منضرها اكثر شي
رجعنه للبيت بيومها جلبت بيه مقبلت ارجع
كالت وره العشه وروحي
اباوع للبيت اي روح مابي
بس خاله وعمو وزهراء وامير
حنان ساكنه اهلها
اني سويت عشه
بس محد يشتهي كوه اكلوا
كملت وترخصت منهم ردت اطلع
وجان تجي حنان ومشتريه سياره
لون احمر
اتخبل من شخص يغار هيج
اني مجبوره اشتري سياره
لان دوامنه اني واخواتي بيدي اخذهن وارجعهن
هي شنو الجابرها
بعدين كلت هم حقها هي هم تحتاجها لدوامها
اني شعليه بيها هسه
سلمت من وره خشمها
اني مهتميت
رحت للبيت اني والجهال
رادوا يسوون العقد مالت رنا
اني ماالي واهس
بس هم خطيه مااكدر اكلها اجليها
صارلي اسبوع من رحت شفته لحيدر وهو ع حاله
اليوم خميس قرروا العقد
ماما اخذتها للصالون
اني قررت من ترجع اسوي نفسي تخربطت واصعد للغرفه
ماالي واهس لكلشي
الصراحه مااعرف شنو السبب
نور اخذنالها فستان وجانت فرحانه حيل
طلعت تخبل فديتها الفستان
ونظور اخذتله قاطع جويتي طلع يخبش
دزيته للحلاق بيد بابا
خطيه فرحانين
اخذتلهم صوره هو ونور بالحديقه
طالعين يخبشون فديتهم
وحده من الصور خليتها ع الفايبر
نور ونظوري سويه
وحده لخ ع الواتساب
بدت تجي الناس وكلها اقاربنه
بس شكم صديقه الها ولتبارك
اني بس دخلت ماما
سلمت ع رناوي طالعه جمال فدوه لا الله
اعتذرت منها
كتلها راح اصعد حيل اتخربطت
هي عرفتني كالت اصعدي معذوره حبيبتي
ماما بقت تحجي عليه
ماما والله مااكدر ابقى راسي حينفجر
اي ماما مصدكتج
صعدت مهتميت لكلشي
وره شويه اجتي نور
حبابه ماما خليلي مكياج
كلها تقلد عليه
منو الي يقلد عليج
كالت اكو بنات يكولن هاي مو حلوه
وملابسه بدله
لج والله يغارن منج لان حلوه واحلى وحده انت
كالت ليش متنزلين ويانه
راسي يوجعني مااكدر
خليتلها مكياج
خابرت رقاوي وصيتها ع نور ونظوري
كتلها شوفي منو الي مضوجات نور
كالت لج كلها اتسودنت من شافن فستانها وترتيبها
خو نظوري اليوم الساتر الله من عيونهن
خلصت الحفله
والكل بقه للعشه
بابا حاسب حساب وموصي اكل من المطعم
نمت من صدك
ماكعدت غير ب12 بالليل
لكيت الهوسه مخلصه همزين
نزلت جانو بابا وماما ضايجين
كتلهم والله من صدك ماالي خلك وتعبانه جنت
كالت ماما صرتي معقده مو مثل قبل
واكيد كل هذا بسبب حيدر
حيدر شعلي بيه
بابا كللها عوفي الولد بحاله بين الموت والحياة
عفتهم ورحت للمطبخ جنت جوعانه
مخليلي لفة كص
اني ماارغب للكص اكيد اللحم مجمد
رحت سويت طماطه بالطاوه واكلت
اتذكرت حيدر اكثر اكله يحبها هي الطماطا ودهن هواي
كامت تحجي ماما
شوف حتى اكلها اتغير
محجيت لان من صدك ماالي واهس
رحت يم البنات لكيت رنا تحجي بالموبايل
لج اطبكي وكليله بعدين لاحكين ع السوالف
تعاي راويني الصور وسولفيلي
سمعتها تكله اي زينب
هاك هاي
مصطفى يريد يحجي وياج
الوو ها مصطفى هلو
الف مبروك وان شاء الله يوم الزواج
والله ماالي خلك مريضه
اعذرني
كلي ابد ممقبوله منج
وزعلان وياج
هيج تتحججين بالمرض وماحضرتي العقد
مااقبل اله باجر اعزمكم وتجين
الله كريم
راوتني الصور كلهن
وسولفتلي بالتفصيل
بعدها رحنه نمنه
ثاني يوم اخذنه مصطفى للمطعم كلت عيب
بس اتعشينه ورجعت وي الجهال بسيارتي
خلصت العطله وبده الدوام
صار شهرين وحيدر ماكو اي استجابه منه
قرروا يسفروا
بس الدكتور كال ماكو فائده عوفوا هنا احسن
كلت لخاله خليها نور يمي احسن
ودائما نروحلهم ويجون
محمد متخبل يريد يرجع يكول مااتحمل اريد ارجع حتى اشوف حيدر
بقوا يحجون علي كالو بالعطله الجبيره تعال
هذا علي بده يزعجني ويجيني للجامعه
كتله لتجي بعد وراح اكل لبابا
كال اني اريد افاتح عمي بموضوع
بس حبيت اخذ رايج قبل
اني اريد اخطبج واتزوجج
اكيد انت موصاحي
لا بالعكس صاحي
والله حبيتج من اول ماشفتج
لك بابا اني متزوجه
لتفكر بهذا الشي
يازواج هذا
وانت مطلكه وهو لا هو عدل ولا هو ميت
اني ممطلكه منه رسمي
بالمحكمه وبالقانون اني زوجته
واحنه متفقين بالعطله الجبيره نرجع لبعضنه
ههههه ضحكتيني ياعطله هاي
لو صدك حجيج جان رجعتوا باللحضه لويش هالتاخير
بس الظاهر انت دتتحلمين
لج بابا فكري هذا ميفيدج والله
اني ابد مااقيدج وحتى العبايه انزعيها
وبيت بوحدج
روح حباب شوفلك وحده غيري
مستحيل اوافق
فكري زين
حيدر معقد
وراح يبقى هيج فاقد الوعي لو ينشل
فكري ع مهلج ورديلي خبر
راح
لو يموت مااوافق علي ولا ع غيره
ابد مو ابالي اتزوج ابد
ولا تهمني هاي السوالف
للجمعه حسيت كلبي مقبوض وضايجه حيل
كلت لبابا اريد اخذ نظوري ونور لابوهم
كال روحي بابا
كتله امر لخاله ونروح
فعلا رحت لخاله وجانت الدمعه بطرف عيني
دخلت هالمره مستغربوا ابوهم
لان راسه موخرين منه الشاش
وايده ورجله
مبين حالته الجسديه زينه
كدروا يعرفونه لابوهم
كامو يبوسون بي
نظوري يكله بابا اريد موطا
ماما متقبل توكلني
اني من صدك مااخلي لان الجو بي بروده بعده
بس حيل اتاذيت وكمت ابجي
كله بابا طلعنه اريد وياك
ياشرلي نيميني هنا
يقصد بحضنه
نور تبجي
بابا مشتاقتلك
اكعد خل اكلك حنان شسوت بيه
اني تخبلت
لج اشسوت بيج كوليلي
وليش مخبرتيني
كالت تضربني كل شويه
وتكلي الله ياخذج وي ابوج
ان شاء اخلص منكم اثنينكم
هاي شوكت
كل مااروح لبيبي
اني تخبلت
كمت ابجي
لك حيدر اكعد شوف بنتك بعدك عدل وهيج تتعامل
لعد اذا متت شلون
ابجي بقهر
والله ابطل واقبل اعيش وياك
بس كون تبقى عدل
والله مااعاندك ابد
مفادنه العناد اثنينه خسرنه
ع مود مصلحتنه الشخصيه دمرنا الاطفال ويانه
والله اقبل ارجعلك
اهم شي جهالنه يبقون ويانه
الصراحه اتندمت لان عاندت
المفروض ابقى اقنعه لمن يوافق
هيج ضحيت بيهم خطيه
اني مو لخاطرك بس لخاطر ذوله المساكين الي انشلع كلبهم
اي استجابه ماكو منه
بس كلبي حيل مقبوض ومااعرف ليش
بهالاثناء بده جهاز القلب ياشر
كانو توقفت دكات كلبه
اتخبلت
طلعت اصيح
خاله حيدر مات
كامت تصيح
اجه الدكتور بدوا يسوله صعقات كهربائيه
ياالله ليش هيج حجينه كدامه
اذا صار شي مااسامح نفسي
ماادري كلبه سمع بنته وحس بيها
خابرنه امير وعمو
اجوي وذوله يسوله صعقات كهربائيه
تقريبا ربع ساعه
وطلعوا
كالو رجع النفس بس حالته ممستقره
راح ندزه للانعاش
ممنوع الزياره بعد
كالت خاله شكو شصار
سولفتلها الصار
والله خاله انزعجت من حنان
وعبالي ميسمع
ماادري بي يحس
كامت تحجي ع نور
ليش ماكلتي ولج
بيبي اخاف منها
امير تخبل كال انعل ابوها لاابو عشيرتها
اليوم احرك الدنيه عليها
هو اصلا نور مقيمه يمي بس صدفه تروح لبيت جدها
رجعت للبيت
بس افور دم من جها ع نور
ومن جها ثانيه ممرتاحه لحالة حيدر
كلبي مقبوض وحاسه اكو شي راح يصير
ماكدرت انام من التفكير ابد
صليت صلاة الليل
دعيت من كلبي
ياربي ادري بيك تسمعني
انت تكول ادعوني استجب لكم
بحق اهل البيت كلهم خلي يفيق من الغيبوبه حيدر
كلشي مااريد منك ياربي بس هذا الطلب
خلي عايش
ياربي ادري بيك كاعد تختبرني وجان اختبارك كلش صعب
وشفتني ماكفرت بيك ولا اعترضت ع حكمك
بس ياربي مااجه الوقت الي تخليني ارتاح وافرح
ياربي تعبت حيل واتمنى ارتاح
اريد تخليلي حيدر يصير زين
واجمعني بي من جديد
انت تحقق معجزات ياربي حققلي هالمعجزه
وكلشي مااريد بعد
اني صحيح اكول مااحبه لحيدر
بس الحقيقه غير شي تكول
اني مااحب احد يلمسني غيره
ولااحب احد يشوف شعري غيره
ولااحب ابو لنظوري غيره هو
اني داخلي ينزف دم
بقيت ابجي وادعي اكثر من ساعه
بعدها نمت
بالحلم شفت مروان الله يرحمه كاعد يزور حيدر بالمستشفى
باسه براسه
اني كاعده نفس كعدتي اليوم مقابيل حيدر
ابد ميباوعلي مروان
اني ابجي
كله لك حيدر اكعد مشتاقلك هواي هواي
نريد نروح سويه نفتر بالسياره
حيل ضايج ومشتاق لايامنه
اني خفت
كتله مروان انت مو ميت
بلا اني مميت منو كلج ميت
بس اشو انتو نسيتوني
خليتوني بالبيت ومحد يمرلي
حتى نظوري حبيبي متجيبنه الي ليش
والله محد ياخذني الك جان اجيت
كلي خل نروح اني وحيدر
كعد حيدر
اتشابكوا وكامو يبجون
كله لك اني مشتاقلك كوم خل نروح
اني زعلان منك ليش متجيبلي ابني
تدري شكد اشتاق اله
اني اجيبه الك بس خل نروح مشتاقلك موت
تخبلت لتعيفوني هنا بوحدي
ولا كانو احجي
عافوني وراحوا واني اصيح
حيدر فدوه لتعوفني
حيدر الله يخليك مااكدر لنور ونظوري بوحدي
لك مروان رجعه لحيدر حباب
ولاكانو احجي اتخبلت
بقيت اصيح
لمن كعدت
اتخبلت
ياربي بس لا يموت حيدر
كلبي احسه راح يوكف
حيل مقبوض كلبي
ياربي
مااكدر اتصل بخاله خاف تقلق
سولفت لماما الحلم
كالت ماما لان تفكرين بي
بس مجبت طاري نظوري يريد يشوفه مروان
اباوع للموبايل
كانو منتظره خبر احد يكلي مات حيدر
هذا احساسي جان
اتمنى يطلع جذب احساسي
بس صارلي يومين ممرتاحه ابد
قفلت الغرفه عليه بس ابجي
ياربي ساعدني
رحت اتوضيت وصليت
ركعت لربي
ياربي ساعدني
مااتحمل المسؤليه لوحدي
نور ونظوري شلون يبقون بدون اب
الله يساعد اهل الشهداء
ياربي شلون بيهم
خطيه اغلبية الشهداء شباب
واكيد عدهم عوائل واطفال
ماعرف شنو شعورهم خطيه
اهلي صاحوني ع الغده
رفضت اكل كتلهم مااشتهي
وفعلا مااشتهي
الجو بده يتغير لان شهر الثالث
الساعه ب2 وجان يدك جهازي
خاله الي متصله بيه
كلبي نغزني من صدك
ابد متتصل بيه بهيج وقت
رفعت خط وايدي ترجف
الووو
سمعتها تبجي
حيلي كله راح
الوووو ها خله صاير شي
خاله فدوه تعاي بسرعه جيبي الجهال هسه
خاله خير صاير شي
تبجي وكوه كاعد تحجي عرفت الجواب جان واضح
جان تكول حيدر ........
بارت مفاجئ
هلو حبايبي شخباركم
تعرفون نقطة ضعفي انتو من اطلبون بارت مني
اني ماعليه غير البي الكم الطلب وتددلون عليه
بس والله لو تعرفون شاعاني لمن انزللكم جان محد طلب مني ☺️☺️
اتمنى لكم قراءه ممتعه
🌹🦋 البارت 38 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
جان تكول خاله حيدر فاق من الغيبوبه واول مسال عليج انت والجهال
فدوه لعيونج تعالي وجيبي الجهال
دموعي تجري انهار
خاله الله عليج مابي شي
لا والله خاله هذا كاعد
هسه راح اخبرهم لاهلي واجي
فرحتي متنوصف
رحت لبابا اركض
كتله بابا حيدر فاق من الغيبوبه
صدك بابا
اي والله بابا
الحمد لله والشكر
بابا طالب يشوف الجهال
اي بابا هسه اني ادزهم
اني هم اروح وياك بابا
لا بابا عيب ترحين شيكولون عليج
عيب منه ولتنسين انتم هسه مطلكين
اني جنت اخليج تروحين لان مو بوعيه وجان فاقد الوعي
بس هسه لا بابا عيب منهم
هسه يكولون ذابه نفسها كوه
سكتت بس حيل ضجت
بس حجي بابا صحيح
وهم المفروض ماانسى من انطاني حضر
وحجيه ويايه اخر مره
بس مو بيدي تمنيت اشوفه
بس مابيدي شي
حيل مشتاقه اشوفه وهو صاحي
راحوا ماما وبابا واخذوا نور ونظوري
بقوا للعصر رجعوا
اني منتظرتهم بالمطبخ حتى اطمان علي
ها ماما بشري شلونه
الحمد لله زين
وحجه ويانه
وخطيه بس يبوس بالجهال
ردت اسالها وبطلت
ردت اكلها هم سالكم عني
شافتني
كالت عرفت الي ابالج
لتخافين مسالنه عليج ابد
شعليه بي السال والماسال
اي مظبوط مبين عليج
اذا انت تحبي ومتعلقه بي
لويش طلبتي الطلاك
منو كلج احبه
لج اني امج حافظتج حفظ
لعد وين الجهال
بقاهم يمه
لليل ويجيبوهم
وشوكت يطلعونه
باجر يطلع
رحت اتغديت وحسيت الدم رجع بوجهي
بديت اقره وصارلي واهس
بالليل اجه امير وجايب الجهال
بابا طلع اله
حيل فرحانين
يكول بابا كوه جايبين نظوري
يبجي يريد يبقى يم ابو
ثاني يوم رحت للجامعه
من رجعت لكيت الجهال ماكو
كالو مطلعين ابوهم
واجه عمهم ماخذهم
لليل كال بابا جهزي ملابس نور مالت المدرسه وجنطتها
راح يجي عمها ياخذهن لان راح يبقونهم هناك يم ابوهم
كتله اوك
فعلا جهزتهن وخليت ملابس لنظوري
ثاني يوم راحوا ماما وبابا
معطليهم ع العشه
بالليل رجعوا
كال هذا الاسبوع كله يبقون هناك
كل شويه اريد اراسله من وحده من البنات
بس اتذكر شسوه بيه اخر مره وابطل
بعدين كلت خل اراسل نور احسن واشوف خاف السعلوه حنان ماذيتهم
راسلتها
هلو نواره
شلونج ماما
شلونه اخوج
شلونه اخوج
اذا تكدرين خابريني
يطلعن مرئي بس ماكو جواب
حيدر : جهزنه نفسنه ونزلنه وجنه مدنين
تقريبا 3 سيارات
بس مو كلنه بنفس المحافظه
السياره الي اني بيها كلنه بنفس المحافظه
السايق وواحد بالصدر واحنه 3 وره
مشينه فتره وجانت سيطره بالطريق
السايق كال اشو هاي اول مره اشوف هاي السيطره هنا
حسينه اكو غلط بالموضوع
كناله لتوكف
اطلع كبل
بهاي الاثناء منحس اله السياره توقفت بوحدها
مخلين بالكاع بسامير تثقبت التايرات
باللحضه بدوا يرمون علينه عشوائي
ملحكنه ندافع عن نفسنه
احنه اول سياره
والسيارتين الباقيات ورانه
الرمي جان مكثف علينه
اني حسيت بنفسي اتصوبت بايدي وبرجلي
والثالثه براسي
عرفت هاي نهايتي واشاهدت ع نفسي
صورة زينب وامي كبالي
لزمت الطلسم الي انطتنيا زينب بيدي
كلت دخيلك ياعلي
ماعدنه غيرك روحي امانه يمك
بعد مااعرف شنو الي صار فقدت
مااعرف شكد صارلي بالمستشفى ابد
لحد البارحه حلمت بمروان الله يرحمه
كلي تعال مشتاقلك حيل
كتله ولك اذا اجي يمك منو يبقى يم نور ونظوري
كال لعد ابقه بس اريد توعدني تجيبلي ابني وتجيني
وعد مني اجيك
دير بالك ع حبيبتي لتاذيها
اذا اذيتها تاذيني والله
حسيت بنفسي مخنوك
كوه اتنفس
وجسمي احسه متكسر تكسر
مااكدر احرك شي بي
حركت اصابيعي
وره شويه كدرت افتح عيوني
كوه اشوف مااعرف اني وين بالظبطً
لحضات ودخل الدكتور عرفت اني بالمستشفى
نسيت الصار مااعرف ليش اني هنا
وره شويه
كلي الحمد لله ع السلامه يابطل
كوه احجي الله يسلمك
كلي لتحجي ولتعب نفسك
كتله دكتور مااكدر احرك جسمي
عادي لان جنت بغيبوبه
صارلك اكثر من شهرين
شنو شهرين
اي يابطل
الواحد لغيرك مات من زمان
بس انت امك داعيتلك
البارحه متت ومانعرف شلون عدلت
اجه مضمد وبده يحرك باديه ورجليه
دكتور اكو احد من اهلي هنا اريد اشوف امي
اي شويه ارتاح ونجيكك وانقلك لغير مكان ويشوفونك
انت هسه بالعنايه المركزه
ياربي هسه شصاير باهلي
اتذكرت الحادث
زين اصدقائي وين هسه
هواي اسئله ابالي
نقلوني لغير مكان
واجوي امي وابويه
خطيه ماما فقدت
تبوس بيه واطش جكليت
دموعها حركني حرك
يوم فدوه اروحلج لتبجين والله اتاذه
يوم فدوه خل تجي زينب هي والجهال اريد اشوفهم
اي ماما هسه اخابرها
اتصلت بيها وكلتلها
اسمع امي تكلها والله مابي شي وكاعد يمنه
مااعرف شكالت من سمعت بيه
ضاجت لو فرحت
مشتاقلها حيل والله
اتمنى تجي هي والجهال
وره فتره اجوي امها وابوها والجهال وهي ماكو
الصراحه حيل ضجت وانقهرت
معناها لاغيتني من الوجود
فرحت بالجهال وجنت حيل مشتاقلهم
طلبت منهم يخلوهم لليل
نظوري مجلب بيه ميقبل ينزل مني ابد
رغم مااذاني بس كتلهم عوفوا خطيه
امير سولفلي كال كلهم زينين جماعتك
عبالي صدك فرحت
كمت اتحرك زين والم تقريبا ماكو
شكم عمليه مسويلي
ثاني يوم اجه الدكتور وشافني كال زين طلعوا
طلعنه وجنت كوه امشي
ذبحو خروف جوه رجلي فدوه
ووزعوا ع الفقره
كوه امشي من جها رجلي ومن جها من زمان جنت فاقد الوعي
بدت الناس تجينه
الضباط اجوي كلهم
بس عرفت الحقيقه اني الوحيد الي طلعت عدل
حيل ضجت عليهم خطيه
كلهم بعمري وشباب
الله يرحمهم
سالت امير عن جهازي
كال هذا سلموا النه
كالوا بعد ماكو روحه لسامراء ابد
كتلهم مو بكيفي
لازم اشوف الوضع
ولازم اعرف مهمتي خلصت لو لا
طلبت من امير يجيبلي الجهال
جابهم وبالليل جابوا ملابس نور وكتبها
استغربت سالت امي
كالت امي هي هناك باقيه
وليش عود
ماما اني تمرضت من وراك
ومااكدر ابدللها ولا اقريها
ومنو كلج انت
حنان شنو دورها
يوم البنيه زينب امانه تحبها وتعزها
هي الي تتوسل بينه حتى نجيبها
يوم لتغيرين الموضوع
لك ماما والله مااغيره بس بنتك متقبل متريد حنان
اني استغربت منها مااجت ابد
سالت امي كالت عند اهلها
شتصخم عند اهلها
يعني لاسالت عني لا اجت شافتني
سكتوا
دزيتلها مسج
الووو
دزت الوووو
شعندج ابيت اهلج
هسه تعالي واذا مااجيتي تسوين جميل عليه
اني روحي طالعه اريدلي زله عليها حتى اطلكها
لان الظاهر مو ادميه
جاوبت هلو حبيبي
الحمد لله ع السلامه
والله فرحتلك
اي واضح مو لكيتج متانيتني
والله ضايجه البيت مينطاق بدونك
وكلت اروح يم اهلي
بدون لغوه تعالي واسكتي
صدك وره نص ساعه اجتي
بس وجها ميتفسر مثل الخايفه من شي
اجتي سلمت علينه
شفت وجه ماما ثكيل
امير كذلك
كلت لنور روحي بوسيها
دارت وجها نور ولا كانو
هي محجت شي
راحت للبيت
كتلها جهزيلي شوربه
كالت ميخالف
بدت الناس والمعارف من الصبح لليل ولا لحضه نفرغ
ثاني يوم اجوي ابو زينب وامها
اتمنيتها تجي وياهم
الي عرفته دائما تجي هنا وتبقى لليل
اكيد لان اني مو هنا
عطلناهم ع العشى
لليل موبايل نور بيدي
اكلب بي واشوف
اجني رسائل من زينب
دخلت ع الصوره المخليتها حلوه حيل
لنظوري ونور
بس شنو هاي ووين ماخذيها وشكو من مناسبه صايره عدهم
دزت ماما نوره خابريني
صحت نور تعالي خابري ماما تريدج
كعدتها يمي
مشتاق لصوتها
اني الغبي الي انطيتها حضر وخليتها متفكر تحجي وياي
فتحت الحضر
بلكي تخطأ وادك
سمعتها تسالها عنها وعن نظوري
كالتها زينين
تكلها والله ماما عيني علي
ومااخلي يروح هناك ابد
لا والله اقره اني بوحدي وكتبت
واخلي عمه زهراء تسويلي شعري
يله اوك اريد اروح العب
باي
تعالي نواره بابا
ها بابا
هاي الصوره وين ماخذيها
كالت هاي ابيت جدوا
شنو المناسبه عدهم
حفلة العقد مالت خاله رنا
هواي طكولي صور
منو طكلج
ماما بس بالبدايه قبل لاتبدي الحفله
وبعدين خاله تبارك ورقيه
وحتى عمو مصطفى وهواي
ماما زينب شلبست
لا ماما ملبست
لان تخربطت وصعدت نامت
ابد ماحضرت بالحفله
وبقت نايمه هواي
وجدو وبيبي اتعاركو وياها
مااعرف ليش احساسي يكلي مو مريضه جذابه
واكيد ضايجه جانت عليه
بس متحجي وتكول
كتلها تعالي خابريها وكليلها دزيلي الصور ملاتنه
بابا يريدهن
خابرتها وكلتلها
وره شويه وصلن
نظوري طالع جمال
دزتهن كلهن لجهازي
كلت خلي اصير زين واخلي وحده من صوره الصوره الشخصيه لصفحتي
قرر ابويه يسوي غده ويعزم الناس
كال مترهم هيج عيب
فعلا عزم المعلمين الويا وجماعتي كلهم
واقربائنه ومعارفنه
وابو زينب وامه
اخواتي ونسابتنه كلهم
جبنه طباخين حتى يطبخ
انكلبت الدنيه بيومها
سوينا يوم جمعه
حبايبي بعدهم يمي
صرت زين وكدرت اطلع واخذت الجهال للالعاب
وللسوبر ماركت
يوم السبت كلت خلي ادزه لنظوري خطيه
هواي اتعلق بيه
اتعمدت اخلي يتعلق
حتى اجيبه يمي
بلكي تعترض وتخابرني
اتصلت بابوها وطلع منتظرني
هالمره جلب بيه ادخل
عيب منه لازم ادخل
والله اجذب عليكم اذا كتلكم مامشتاق لكلشي يخص زينب
كال عمو لازم عشاك هنا اليوم
بقيت لان حيل مشتاق لطبخهم
بس احس بنفسي غريب مو مثل قبل
اجه وقت العشه وخابزين خبز حار
اكيد ع مودي
البنات كلهن اجن وسلمن عليه واتحمدلي ع السلامه
اله البذات ابد مشفتها
مسوين اشكال واللوان
كباب دجاج بس الطعم رهيب
لحد الان مماكل هيج طيب
وكباب لحم وكبه وسمبوسه وخبز صاج وفنكر وطماطه بالدهن
ومقبلات وخضره ولبن
من يوم الراحت زينب لليوم مماكل هيج اكل طيب
جنت جوعان بس استحي اكل
كلت عيب شيكولون مشايف 🙈🙈🙈🙈
بس عمي ابو زينب اصر
اكلت لمن شبعت 😂😂😂
وراها جابو الجاي
سولفت ع الحادث وع طبيعة عملي وي الدواعش
صارت ب10 ونص اترخصت وطلعت
اتمنيت امنيه اشوفها ماكو
رجعت لكيت نور تبجي
ليش عفتني ورحت
عندي شغل عيب اخذج
ما وين متروح اروح وياك
لج بابا انت كبرتي عيب اطلعج وياي
ما شنو كبرت وين متروح اروح وياك
ماابقى يم حنان بس تصيح عليه وتضربني
اني هنا عيوني صارن بكصتي
شنو ولج عيدي شبيها حنان
تصيح عليه وتضربني
رحت للبيت
صحت حنان
تعاي بنت الكلب ليش تضربين نور
شلعت كلبي متقره زين
واذا ماتقره تضربيها
غير لمصلحته
المعلمات يشكن منها يكولن كسلانه
ضربتها بنت الكلب اكسر ايدج اذا مديتها ع بنتي
ولتقريها بعد
كامت تصيح مو صوجكم صوجي اني الاقري
محد كلج قري
تعاليلي اني اقريج ادور باباتي
لا ماما زينب من اروحلها هي تقريني
لو اخابرها وتشرحلي
والله اشطر وحده اني
ذيج كلبت الخلقه
يطبها مرض
ثاني يوم كالت اني اشتريت سياره
شنو منو سمحلج
اني تعذبت بالروحه والجيه
ها اجه السايق وها مااجه
متاكده هذا السبب لو اكو سبب ثاني
مثل شنو قابل
يعني مو غيره من شخص
لا وعليمن الغيره
اشوعندي راتب والحمد لله
كدرت اشتريها
ومنو راح يعلمج
اني دخلت دوره واتعلمت
شنو لج انت شمصخمه واني مريض
والل انجبرت لان العلمتني بنيه صديقتي تشتغل بالدورات اتعلم
ولان ابلاش دخلت
يابه ومحمد اذا صعدتي بالسياره اله افلشها عليج
مشتريه سياره وداخله دوره وهسه جايه تكوين
كامت تحجي شنو التسوه والمتسوه صاعدات بسياره واني لا
اريد انام لتلغين زايد
اجه كتاب انفكاكي من سامراء ولازم ارجع اباشر هنا
خلصن ال10 ايام
وبديت اداوم
فد يوم قررت اروح للجامعه حيل مشتاقلها
رحت بس انصدمت من لكيتها وي ابن عمها الغثه
والقران لو يطيح بيدي
جان طلقه براسها وطلقه براسه
متحملت المنظر ابد
عفتهم ورحت
وجانت روحي طالعه من الدنيه
رجعت للبيت سولفتلي امي ع حلم زينب
وشلون يعاتب بينه مروان
تقريبا نفس حلمي
خطيه يشتاق لابنه
كالت راح اشوف زينب ونروح احنه وياهم
وهناك نروح للمقبره سويه
اي عادي شوفيها
وخلي السبت اليجي نروح
اتفقت امي وياهم وقررنه نروح سويه
مااعرف منو اليروح منهم
احنه قررنه نروح اني وامي وابويه ونور
اجه يوم السبت اتريكنه وره الصلاه
خابرت عليهم كالوا جاهزين
كلي ابو زينب نتلاكه بالسيطره حتى نروح سويه
حيل متلهف اشوفها اتمنى تجي وياهم
وصت للسيطره خابرت عمي
كلي راح نوصل للسيطره
لحضات واجت سيارتهم اعرفها هم عاليه
بس شفت زينب الي تسوق
ياربي شلون راح اتحمل اشوفها
والمشكله السيطرات يتخبلون ع التسوق
وهاي مو اي وحده
نزلنه اتسالمنه
لكيت عمي شاد ايده
سالنا كال انكسرت
كال جبت زينب حتى تسوق مااكدر
هي يادوب ردت السلام
كتله اخاف تدعمكم ومدبرها وينها وين جروخها تسوق طريق خارجي
يادوب عليها توصل للجامعه
احجي وعيني عليها اراقب حركاتها
باوعتلي بتك عين اكيد معاجبها الحجي
كال ابوها ثقتي عميه بيها
ومظبوطه بالسياقه
قبل لتتزوج هي تسوق
انصدمت يعني من زمان تعرف مو هسه
التفتت عليها تتندلين لو لا
اريد بس تحجي واسمع صوتها
كال لا ماتندل ابد
اني ادليها
لعد امشي ورايه
مشيت وهي ورايه
لازمه السايد الايسر
يعني مبين عليها توب بالسياقه
كل شويه وتجتازني
لابسه نظارات شمسيه
همزين خافيه عيونها
وصلنه ودخلنه سويه
رحنه للمقبره كبل
اشرتلها تجي ورايه
ورحنه بالبدايه لمروان الله يرحمه
اكدت ع امي متفلت شي كدام اهل زينب
وصلنه وكلبتها مناحنه نبع الحنان وام زينب
رحت اشتريت مي ورد وبخور
رجعت لكيت زينب تقره قران
نظوري ونور يبوسون بي
اباوع عليها
دموعها تجري بهدوء
وهي تقره
معرفت افسر دموعها
هل هي تحبه
لو غير شي مااعرف
اني حجيت ويا بكلبي
مروان هذا ابنك
اني صنت الامانه
حبيته مثل ابني واكثر
مااخلي احد يغثه
ولا اخلي احد يلمسه
جنت حيل مشتاقله
بقينه فتره
بعدها كتلهم يله نروح لسيف
اني مااندل
كتلها هالمره انت امشي واني وراج
فعلا مشت لمن وصلوا
نزلنه ونفس الروتين
اشترينه ثواب وزعنا
بعدها رحنه للامام نزور
وكمت امشي وهي ورايه
لمن دخلنه للكراج
كصيت وصولات اثنين ودفعت الفلوس
خليناهن بالكراج ومشينه نزور سويه
اني اخذت نضوري ويايه
وابويه وابو زينب
رحنه نزور
وخلينه امي وخاله ام زينب يرحن للحمامات
كملت زياره وطلعت
عفت ابويه وعمي
لكيتها بوحدها كاعده هي ونور
وين امي لعد
راحن يزورن
كعدت
كتلها الحمد لله ع السلامه سمعت بيج متصوبه و واصله الموت
سكتت محجت شي
يابه شدعوه عليج
الجلب العضج كتلناه من زمان
هم ولاكانو
حجت واخيرا
كومي حبيبتي نور خل نزور
حيل ضجت يعني متجاهلتني ع الاخير
سكتت بعد محجيت
راحن زارن وبعدها اتجمعنه كلنه
نور كالت اريد للحمام
ونظوري همين
كتلها كومي خل ناخذهم للحمامات
وبعدها خلي نفتر شويه قبل لنروح
خل نشتريلهم ملابس والعاب
باوعت ع ابوها
اشرلها براسه روحي
كامت ويايه
وجان بيومها الازدحام مو طبيعي
اني شلت نظوري لان مو مالت مشي
وهي لزمت نور
كتلها امشي بصفي لا تضيعن
ادري بيها ماتندل
رحنه للمغاسل وطلعنه
رحنه نفتر شويه
شنو الي يعجبج للجهال كولي
كالت اريد اشتري لنظوري دشداشه بيضه وشحاطه
لويش عود وينه وين الدشداشه
مو اريد اطهره
شوكت
بالشعبانيه وي ولادة المنتظر
اوك
اول مرحنه لمحل الاحذيه
اخذناله شحاطه
وبعده فرينه ع محلات الدشاديش
بس معجبنها ابد
كالت مو حلوات
كتلها خليها لمن نرجع واخذه للخياط افصله فصال
اسويها اله كلاسيكيه حلوه
التفتت لنور
حبيبتي شتردين اشتريلج
اريد حذاء كعب
لاماما مو زين ع ظهرج
ميصير تلبسين عالي
تعالي اخذلج شحاطه حلوه
حسيت بنور ضايجه بس معترضت ابد
دخلن لمحل واني وياهن
اختارت لنور وحده 👇
حسيت بنور فرحت مدري شحجت وياها
خلتني ادفع وطلعت
رجعت هي
اخذت الها 👇
ردت ادفع الفلوس كلتلي ارجعه بس تدفع
كتلها عادي رجعي مو مشكله
صدك رجعته
والله عنوديه
طلعت من المحل
اني اخذته ودفعت الفلوس وطلعت ع السريع
ماادري حست بيه لو لا
بعدها رحنه لمحلات ملابس اخذت لنور
ولنظوري
كالت يله خل نرجع
تعالو خل ناكل موطا
فرحوا الجهال
هي كالت اني مااريد
مااكدر اكل بالشارع
خلي ندخل جوه
لا مااريد
واتاخرنه عليهم خل نرجع
اخذتلهم ازبري حتى ميدمرونه
اني هم مااخذت
رجعنه وره شويه اذن
صلينه وطلعنه
كلنه نتغده بالمطعم
بالطريق اخذنه دهينه من احمد الياسري
واخذنه بقلاوه
زينب وامها وكفن يم محل ملابس
وامي راحت وياهن
اشترن بعدها وكفن يم ابو الشالات
هم اشترن
بعدها كتلها اني امشي وانت ورايه مو تيهين
كالت اوك
رحنه لمطعم السوباط
اتغدينه وخلصنه ورجعنه خليت العلاكه وي غراض نظوري بدون متحس
نور رجعت ويانه ونظوري وياهم
وره يومين جبته لنظوري واخذته للسوك
اخذوا قياسه حتى يخيطوله دشداشه
سويتها اله موديل خليجي
اني الصراحه ماعندي ولا دشداشه
ابد ملابسها
حبيت اجرب والبسها
هم فصلت الي وهم بيضه
خليت الفصال واحد
تقريبا بعد 20 يوم للولاده
قررت اجيبه يمنه هنا نطهره
حتى اسوي غده
زينب : اتصلت بيه نور واطمانيت عليها هي واخوها
بعدها طلبت الصور وعرفتهن لحيدر
دزيتله كل الصور
بقاهم اسبوع كامل
كلبي نار الصراحه
ابد ماارتاح لحنان اخاف تاذيهم
بعدها اجه بالليل جايبهم وحيل افرحت
كال بابا عطلته لحيدر
سون عشه
حيل افرحت عجنت وخبزت
كالت ماما لج يوميه ليش تتحججين بالدراسه ومتخبزين
اشو اليوم وحد
لان حبيب الكلب هنا
شهالحجي ماما
ياحبيب الكلب
بس تدرين خميس وجمعه واليوم سبت خلصت كل دراستي
اها هيج لعد
سوينه اشكال واللوان
شنو اليحبه سويته
البنات كلهن دخلن وسلمن علي
بس اني لا مااعرف لويش اتردد
بس محبيت ادخل خاف ماما وبابا ميقبلون لو هم يكولون عيب
كمل العشه وراح
اني سولفت لخاله ع حلمي
كالت حتى جاي لحيدر ويعاتبه
كالت خاله خل نروح سويه احنه وانتم
كتلها ميخالف بس يوم جمعه لو سبت
خبرت اهلي وكالوا نروح عادي من زمان مرايحين
قررت اطهره لنظوري بالشعبانيه
كلت اسوي مولود
بابا كال حتى نسوي غده عيب من اهله
كتله هاي هي
اتفقنه نروح السبت للنجف
بس يوم الخميس خطيه بابا العصر صعد ع الكرسي ويقلم بالاشجار
وكع وانكسرت ايده
راح صبها
كتله خابر حيدر كله منروح
كال لا بابا نروح بس انت سوقي
رحنه واتواعدنه يم السيطره
لكيناهم قبلنه
نزلوا واتسالموا
بده يغثني ومستهزئ بيه لان اسوق
كمت احاول اسبقه
بس الصراحه اعترف اتضايقت من قبل السيطرات
لان مع الاسف عبالهم كل بنيه تسوق مو شريفه
يبدون يتحققون ويايه اكثر من غيري
وصلنه لقبر مروان
دموعي تجري وحدهن
من شفت نظوري يمسح التراب عن القبر ويبوس بي
كتله هذا نظوري جبته الك مثل ماردت
قريتله قران وادعيه
بعدها رحنه لسيوفي
هذا جرحه لحد الان ينزف بكلبي
لان دماري كله بسببه
عبالي يبقى عايش
بعدها رحنه وزرنه
الصراحه اني جنت متلهفه اشوفه واسلم علي واتحمدله
بس من سمعته غثني كلت خل يولي
ولا اسلم علي وراح اتجاهله
بس هو كام يذب بسامير
ولا اهتميتله
بعدها كلي نروح للحمامات وللسوك
اخذت الاذن من بابا
اشرلي ورحنه
اشترينه للجهال
وعجبني صندل اخذته بس من راد يدفع رجعته
بعدها رحنه سويه للسياره
بالطريق اشترينه اني وماما للبنات
بعدها اتغدينه ورجعنه
حيل ضجت ع الصندل وبقه بنفسي
بدينه نطلع بالعلاليك
وجان انصدم بي
حيل افرحت مهمني منه لو لا
اهم شي صار عندي
بقن يحجن عليه اخواتي ليش مجبتينه وياج
كتلهن القصه
كامن يضحكن
هسه لو مكربسته بفلوس 4 ع عددنه
كمنه نضحك
ثاني يوم اخذه لحبيبي يفصله دشداشه
اتصل ابابا كله راح ابقي يمي
علي ابن عمو حيل بده يزعجني
يوميه وجايني للكليه
وجان دائما يطلب مني اطلك محكمه حتى نتزوج
واني ارفضه
كلت لمصطفى علي
كتله كاعد يسببلي ازعاج واحراج بالجامعه
ياريت تحجي ويا
اني مااريد اتزوج ابد
وحتى مااريد اطلك من حيدر
لان متفقين اذا اطلكنه محكمه راح ياخذ حيدر ابني مني واني ماضحي بابني ابد
كلي عوفي للموضوع عليه واني اتصرف ويا
دخلنه بشهر شعبان
بدت الولادات
سويت كيك انواع وحلويات
سويت كيك عادي وكيك اسفنجي وتشيز كيك وليزي كيك
سويت سابليه وبتي فور واكلير
تساعدنه اني واخواتي وماما
جاب بابا وياها جكليت وكرزات وببسي
طلبنا من بابا يدز لعمامي ولعماتي
كل واحد يدزله حصته لبيته
ردت اكل لبابا يدز لعمو وخاله
بس كلت خاف ياخذها بغير شي ويرفض
راح دز للكل ورجع
كال مابقيتن بعد
لويش بابا اكو هواي باقي
لعد انطيني خل ادز لحيدر واهله عيب منهم
حيل افرحت وكلي خلي يروح وياي نظوري
خليتله اكثر شي
كام يضحك بابا
كال شمعنى هذا داريتي وكثرتي
ع حساب نور خطيه تحب الحلويات
اها زين لعد
اخذهن وراح
وره فتره رجع بس بدون نظوري
كال كام يبجي ع ابو وبقه يمه
خلي خطيه اذا يريد يبقه
ثاني يوم سوينه كيك اخذه بابا ويا للدائره مالته
ثالث يوم رقيه اخذت وياها مسوين احتفاليه
بعد 10 ايام للشعبانيه
لازم اجهز كلشي للمولود
اكثر الاشياء جبتهن عن طريق النت
اكياس التوزيعات جبت نوعين 👇
السلات اني اشتغلتهن
وجهزت الصينيه الخاصه 👇
دزيت ع اشياء كيك من النت همين
يعني ابد ماطلعت اني
طبعت صورته الشخصيه طباعه سكريه حتى اخليها للكيكه
قبل 5 ايام اجه حيدر العصر اخذ نظوري
بالليل جايبه وبيده ملابس
بس الدشداشه ماكو
كال بعدهي ممكمله
بابا وصه ع خروف كال انذبحه بيوم الطهور ونطبخه للغده
صادف بداية نزول الباميا جانت حيل غاليه بوقتها
بس كلت ميخالف
الفلوس الي ينطينياهن ابو المهن
وجبت بيهن كل الاحتاجه
بس بابا مقبل خطيه كال كلها مني
بعد 3 ايام للموعد
اجتي خاله وعمو وحيدر
كلي بابا تعالي سلمي عليهم
لان يردوج بموضوع
شيردون بابا
والله مااعرف كالو عدنه موضوع وياها
لازم نحجي وياها
الصراحه مااعرف ع شنو ولا كاعد اكدر اخمن شنو
رحت لبست حجابي وعباتي
لان يعتبر غريب عليه بالوقت الحاظر
اخذتلهم ببسي وكليجه بوقتها مسوين
دخلت سلمت عليهم وبوست خاله
بقينه كاعدين يسولفون سوالف عاديه
لحد ماحجه حيدر
جان يكول .....
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: