قصة من سيدفع الثمن الجزء الرابع عشر في 9:53 م مرسلة بواسطة أحمد التكريتي

 اسعد الله مسائكم بكل خير احبتـي 💕 

//// البارت الرابع عشر ////

#من_سيدفع_الثمن ؟؟

#بقلم_الكاتبة_شمس

كل ما نحتـاج إليـه هو رفيق واحد نتخطـى معه بشاعـة هذا العالم .. لا أن نرافق من يزيده علينـا بأساً ..!!

بدلنا اني وشهودة وطلعنا ..

شفته متكي ع الدرج ويتصفح بالموبايل ..

شال راسة وصفن علينا ..

سويت نفسي ممنتبهة اله .. بس حسيت بنضرته مختلفه 

عذاب .. شهد تروح ويانا ؟؟

فرح .. اي لعد وين اخليها ؟؟

عذاب .. مو خاف تتمرض .

فرح .. والحل شنو ؟؟

عذاب .. ادخلوا انتي وامي للمستشفى واني اخليها يمي برة ماندخل جوة ..

فرح .. براحتك ..

طلعنا اخذنا خالتي ورحنا .. 

وصلنا للمستشفى ..

دخلنا اني وخالتي وعذاب بقى برة هو وشهودة ..

دورنا ع ماما ماكو ..

اتصلت عليها خاله گالتلها احنه بقسم الاشعه ..

رحنا لهناك ..

شفت بلال وياهم ..

حضنت مروة وتبجي من الالم ووجهها مورم وازرگ ..

كان بلال بعد مسافه عنا ..

جاب الاشعه واجة ..

سلم عادي علينا ..

ولاعبالك اخته ومشايفها من اشهر ..

رجعنا للطبيب ..

كان مغرب واطباء الخفر موجودين .

فسولها علاج طبيعي وگالوا لازم تراجع طبيب اخصائي لان عندها كسر وانحراف ..

نطوها ابرة مسكن وكبسول مسكنه ..

وطلعنا ..

اول مشافنا عذاب اتقرب النا ..

گال هاي بشروا ..

سولفتلة ع حالتها ..

باوع البلال وگاله ..

ليش هيج شنو ذنبها هالطفله تسون بيها هيج ..

بلال ضاج وماعجبه كلامة ..

گاله السانها طويل وماتسكت ..

امي .. ولك يمة خافوا الله شو ليل ونهار صايرة خدامة الكم وساكته وياليت راضين ..

بلال .. يمة منا عالم مو وكت هالحجي .. يله امشونا وباجر نشوف دكتور وناخذها ..

راد عذاب يوصلهم .. ماقبل بلال واجروا تكسي وراحوا ..

رجعت ضايجة حيل على مروة ..

بعدهي صغيرة وشوهوا وجهها ..

ليش هذا حظنا من دون البنات .. شفنا المر والقهر واحنه صغار ..

انتبهت ع صوت عذاب .. 

باوعتله .. 

-وين صافنه مو احجي وياج ..

-مامنتبهة ..

حسيته ضاج عباله متعمدة .. گال شناخذ عشا ..

گتله بكيفيك ماادري ..

سبقتني خالتي وگالتله ..

دوديني للبيت ..

واخذ فروحة وبنيتك واطلعوا الجو حلو هسا ..

فرح .. لا خالة اخاف على شهودة ..

خالتي .. يمة البنيه انتلفت بالبيت حتى عضامها ماتقوى بلا شمس ولاطلعة ..

عذاب .. خلص يمة هسا نوصلح ونرجع الاي مكان نتعشا بي ..

توترت حيل هاي اول مرة راح نطلع سوة ووحدنا .

وصل خالتي وگال تعالي هنا اگعدي .

فرح .. لا هنا مرتاحة ..

عذاب .. سايقج اني وگاعدة ورة الي يشوفج شيگول ..

تعاي هنا ولاتجادلين ..

نزلت بسرعة وفتحت الباب ..

نطيته شهد وصعدت ..

اخذتها منه وحضنتها من التوتر ..

الجو حلو بالليل واحس الدنيا موت حر .

باوعلي وسحب كلينكس ونطاني ..

-ماادري الدنيا هيج حارة ..ويضحك عليه 

درت وجهي ع الشباك وبقت عيني ع الشوارع ..

غمضت عيني واشم هوا بغداد ..

اووووف احس روحي من اصحاب الكهف وطلعت للدنيا هسا ..

بغداد حلوة بالليل ..

گال وين تحبين نروح ..

-بكيفك ..

-تدرين اتخبل من كلمة بكيفك .. مااحب احد يحيرني ..

-واني مايفرق عندي اي مكان بعد ماشميت الهوا ..

ضاج اكثر ..

نزلنا يم مطعم گال هذا جديد مفتح ..

كان مرتب وراقي ..

اجة النادل جاب المنيو ..

گال اختاري ..

طلبت صاج لان احبه وصار فترة طويله مماكلته ..

وهو طلب شاورما ..

كنت خجلانه اكل ووحدنا .. رغم ميته جوع ..

اكلت سويه فنگر ومقبلات وقطعة صاج ..

حس بيه خجلانه ..

طلب من النادل يلفه الي دلفري ويضيف وياه فنگر بعد ومقبلات ..

كملنا .. 

گال شنو رأيج نروح للمول نشتري ملابس الشهد ماعندها واني مااعرف قياسها ..

گتله بكيفك .. ملامحة تغيرت .. اوووف نسيت يكره كلمة بكيفك ..

اختارينا ملابس الها يخبلن وحبيبتي مدنفشة يلوگلها ..

اخذتلها احذيه وقراصات ناعمة .

كملنا ..

مر ع الملايس النسائية .. گال ادخلي اختاري ..

ماقبلت ..

لحد الان ممتعودة عليه لدرجة اطلب منه ملابس ..

اني اصلا حتى ملابس داخليه ماعندي كانت ..

لان اخجل اطلب وحتى خالتي مااگلها استحي ..

بقيت افتر كلشي حلو بس من الخجل ماعرفت اختار ..

شافني مابيه فايدة ..

اختار الي كم قطعة وطلعنا ..

رجعنا للبيت ميته تعب عبالك كنت بسفر .. لان من زمان ماطالعه ..

بسرعة بدلت الشهد ونومتها لان هي بالسيارة تنحست وگامت تبجي ع النومة ..

بدلت واخذت فراش العذاب فرشته بالاستقبال ورجعت للغرفه ..

من فرة المول جعت واني اصلا مااگلت ..

طلعت اخذت الصاج الي جبناه من المطعم ورجعت للغرفه طلع عذاب صار بوجهي استحيت ..

ماراد يخجلني ..

گال تدرين شگد اكلت واحس نفسي بعدي جوعان ..

اشرتلها ع الاكل .. تاكل ..

عذاب .. لا هذا الج اروح اسوي اي شي ..

-لا هذا هواي قابل راح اكله كله ..

-زين لعد روحي جيبي وياه قوطتين كولا وتعاي واخذ السفري مني ..

اووووه شلون سالفه .. اني اصلا اخذته حتى اكل براحتي وهسا راح يگابلني شلون راح اكل ..

رجعت للاستقبال .. شفته مطلع الاكل ومرتبه ع الطاوله الصغيرة ..

گعدت مقابيله بالگاع ..

وكالعادة ماگدرت اكل بس انقش ..

وهو الظاهر هم مو جوعان بس يجاملني ..

شرب بس كولا ..

گلت الحمد لله .. دااگوم ..

گال .. ابقي شويه ..

استغربت من كلامة ..

-ها لا نام انت تعبان اليوم اجيت وماارتاحيت وخاف شهد تبجي ..

ماصدگت گمت منه .. كانت نضراته بيها كلام .. بس ماگدر يحجيه والدليل . گام يشرب جگارة ورى جگارة وهذا طبعه من يضوج لو بباله سالفه ..

رحت للمطبخ كملت اكل وغسلت ورجعت للغرفه ..

گعدت شهد تبجي ..

بقيت وياها ل 3 الفجر يله نامت ..

خليت راسي ع المخدة وغفيت بعد ماادري بالدنيا شبيها 

#بقلمي_الكاتبة_شمس

______________________________

ثاني يوم… 

گعدت سمعت حركة واكو ريحة بالبيت غريبه..

رتبت شعري وعدلت نفسي وطلعت ..

شفت عذاب دا يسقي بالحديقه ومخلي جاي ع النار وناسيه والقوري شايط گد مافاير الجاي بي ..

ضحكت وركضت طفيت القوري ..

وفرغته بالزيل وغسلته ورجعت خدرت من جديد.. 

اجة هو .. 

-هاي شنو الريحة ..

-القوري شايط والجاي محترگ .. وابتسمت ..

-اهوووو شلون نسيته ..

عود خليته بين ماتگعدين . ورحت اسقي بالحديقه الجو حلو ..

خلي نطلع شهد ..

-اي بس شلون نگعدها الا انت تخليها يمك ماعندها حجله -اي والله ذكريني اجيبلها حجله وعربانه خاف نطلع نمشي ..

اباوعله وممصدگة هذا عذاب لو غيرة سبحان المغير الاحوال ..

اندگت الباب ..

راح يفتحها ..

دخلت خالتي تبجي ..

-شكو يمة شبيج ..

-ولك يمة ماتحجي وي اخوك ..

-معتز شبي ؟؟

-مدري منو مقشمرة وبايع سيارته ويريد يطلع تهريب وي جماعته ..

-هذا مخبل شبي ؟؟ ميشوف الوضع والناس الراحت من ورى هاي السالفه .. ليش قرر هيج . اكو شي صاير . ابوي مضوجة ..

-لا والله يمة ماكو احد .. بس هو صارله فترة مقهور وضايج حتى بالبيت مايتواجد هواي ..

-هينة يمة لاتنقهرين . هسا اتريگ واجي احجي وياه 

-ماهو طلع گاب لازم اكمل شغلاتي .. وابوك شگد حجى وياه مافاد ..

-هسا اخابرة واشوفه وين ..

راحت خالتي خطيه ضايجة وعيونها مانشفت ..

خليت الريوگ وعذاب ضايج ومقهور .. 

گعدت شهد رحت جبتها واجيت ..

لگيتة دا يتصل بمعتز ..

شهد خبصتني من شافت الاكل. صايرة تريد تاكل ..

گمت سوتيلها بسكت وحليب واسمعه يگلة تعال غداك هنا يمنا تعال ..

الظاهر معتز ماقابل بس هو الح عليه ..

من سمعتة حيجي ضجت فعلا ..

گال عذاب .. تلحگين تسوين غدا لو اجيب من برة ..

فرح .. لا الحگ مايرادلها شي . بس ببالك شي اسوي ..

عذاب .. لا بكيفج شتسوين سوي ..

فرح .. ها مو تگول مااحب احد يگلي بكيفك ويحيرني اشو هسا انت حيرتني ..

ضحك وگال .. لا مااحيرج بس الاسهل عليج سويه ..

فرح .. امممم اني عندي دولمة جاهزة بالمجمدة اطلعها اطبخها واشوي سمك وياها ..

عذاب .. خوش حجي ولو هيج راح تحيرينا بالاكلتين اثنينهن طيبات ..

كملنا ريوگ بدلت الشهد واخذها عذاب وطلعوا بالحديقه يشمسها ..

واني بين مارتبت المطبخ وطبخت وسويت زلايط وطرشي وحلاوة محلبي ..

طلعت شفت الابو وبنته كاتلتهم الشمس وصايرين طماطة ضحكني ..

گالوا شمسوها بس مو احمسوها ..

صار ساعتين الشمس تدگ بيها مو هيج لاتتمرض ..

هي شافتني بجت واتأشرلي اخذيني ..

عذاب .. تعاي اخذيها هاي مايغزر بيها صار ساعه مصموط وياها بالحر واول ماشافتج بجت وعافتني ..

ضحكت واخذتها مني صار ايدي ع ايده .. حسيت بأحساس حلو ..

رغم اذيته الي ومعاملته وقساوته الا انه ماگدرت اكرهة او اشيل بگلبي عليه ..

حبي اله انزرع بين الحزن والالم .. 

صحيح هو اتغير خلال اسبوع لكن احس بعد اكو حاجز بينا يمنعنا من الاقتراب البعضنا ..

اني الخوف من الخذلان ..

وهو الماضي الي مسيطر عليه ..

دخلنا للبيت خليت شهودة بفراشها وشغلت الها طيور الجنه ..

بقت تباوع ..

سمعت صوت عذاب يصيح عليه ..

فرح اجة معتز تعاي ..

خليت شالي ع راسي وطلعت ..

لگيته گاعد بالصاله ومنصي راسه .. 

سلمت رد عادي ورجع ع نفس وضعيته..

رحت للمطبخ اجهز الغدا ..

وعذاب يحجي وي معتز ويحاول يقنعة مايروح ويريد يعرف السبب ..

لفت انتباهي سؤاله ..

-لك خاف وحدة تركتك وتريد تترك العراق بسببها .. سواها بضحك ..

-معتز ضاج وگله .. شنو هالحجي بس اني اريد استقر واشوف مستقبلي ليش هو بالعراق اكو استقرار وحياة 

اجة عذاب ..

گال كمل الغدا ..

-اي بس افرش السفرة ..

فرشها وگمت انطيه وهو ياخذ يصفط بالسفرة .. لان مايحب بنيه تدنگ وتخلي الاكل واكو ولد گاعد يگول مو لايقه تندگ گبال الزلم ..

نطيته صينيه الدولمة .. شمها وگال اويلي شنو هالنفس العندج بالاكل ..

خلينا الاكل كله ونطيته اللبن والگلاصات ..

ردت ادخل للغرفه ..

صاح عذاب .. وين فرح تعاي تغدي ..

باوعتله وگتله لا اخذوا راحتكم اني راح اشوف شهد ..

معتز مدنگ ومايحجي ..

عذاب .. يمعودة تعاي يمكن هذا اخر غدا النا وي الهاارب تعاي يمي هنا واشر بايدة ..

گتله بس اشوف شهد.. 

رحت شفتها نايمة غطيتها وطلعت ..

اجيت گعدت يم عذاب ومقابيل معتز ..

من الخجل مااعرف اكل او احجي ..

منا معتز الي كانت نضراتة وتليمحاته تقلقني ومنا عذاب الي كان يتهمني بأغوائي الاخوه وشنو الي غيرة هيج ..

گمت اخاف من اي تصرف واحسب اله الف حساب ..

اكلوا وكملوا وعذاب خلصها توصيات المعتز الي مكمل كلشي من غير محد يدري ولما تحدد موعد سفرته يله خبرنا ....

گال عذاب .. سويلنا جاي من تگومين ..

رفع راسة معتز وگال .. عاشت ايدج خيتي الاكل طيب كلش وحرت شأكل الصراحة ..

فرح .. الف عافيه ..

معتز .. عذاب الظاهر الله عوضك بجوهرة حافظ عليها ..

باوعلي عذاب وابتسم ..

#بقلمي_الكاتبة_شمس

________________________

گمت بسرعه للمطبخ ..

سويت الجاي وحضرت الاستكانات ..

وعذاب ومعتز يشيلون بالمواعين ..

دخلت خالتي عيونها وارمة ..

گالت معتز هنا ..

-اي خاله وهسا كملوا غدا ..

-اي شنو هامة يتغدا وياكل وامة من قهرها لسا لگمة ممخليه بحلگها ..

اجو من سمعوا صوتها .. شافتهم بجت 

حضنونها اثنينهم ويبوسون براسها ..

ومعتز قرفص گدامها ويبوس بإيدها ويحاول يرضيها ويقنعها انه كل يوم يتصل عليها فيديو ..

وهي خطيه خايفه عليه من البحر لايغرگ ..

وبعد كلام وعتاب بالگوة اقتنعت ..

اشرلي عذاب ..

گال سوي صينيه غدا الامي خلي اليوم نأكلها بيدنا ..

واخذوها للصاله ..

ابتسمت ودمعت عيوني المنظرهم .. شلون يدللوها ويعاملوها ..

اويلي عليج ماما ماشافت من اخواني بس القهر ..

مع العلم بابا كان وردة ومثقف ومايوم جرح احد بعكس زوج خالتي الي مخلصها عياط وتجريح ..

سويت الخالتي غدا ..

خطيه اكلت شويه وصبينا جاي ..

شويه تغيرت حالتها وگامت تضحك ..

وعذاب هم كان مرتاح والضحكة مافارگت وجهة ..

لدرجة اخذتني الصفنه عليه ونسيت نفسي ..

انتبه عليه ..

اشرلي براسة وغمزلي ..

معناها شكو… 

استحيت ع حالي درت وجهي بسرعه ..

هو ابتسم وعظ شفته ..

ياربي شگد عيب هسا شيگول عليه ..

اخذ معتز خالتي وراحوا للبيت .. 

بعد ماسلم عليه وگال ابريلي الذمة خاف ضوجتج بيوم ..

عذاب .. دروح الي يشوفك يگول باجر طالع ..

عود من تسافر نجي نودعك ونطش وراك مي ويضحك ..

بعد يومين .. خابرت امي الخالتي .. واجت خالتي تركض بالموبايل خطيه ..

گالت امج ع الخط ..

سلمت عليها وسالتها عن مروة گالت حددلها الدكتور ثلاث اسابيع بعد ويسويلها عمليه يعدل العضم ويسويلها تجميل .. لان وجهها هسا مورم فد مرة وخشمها معوج وازرگ ماگدر يسويلها شي ..

بقت ع العلاج ..

كملنا اتصال وگلتلها بوسيلي مروة ..

عذاب من شاف ماما تخابر ع خالتي ومرات ماتحصلني .

گال فرح لاتفهميني خطأ ..

عندي موبايل عادي مو لمس .. عادي انطيه الج بس مااريد اي رقم بس امج ..

ومحد يعرفه بس امج ..

اذا شفت لو عرفت احد يخابر عليه حتى لو صديقتج مااقبل .

گتله بكيفك .. اني شعندي غير امي .. بس اذا هذا الشي يزعجك لاتنطيه الي عادي ..

عذاب .. مااخفي عليج ثقتي مهزوزة بالكل وصحيح ماشفت شي منج لسا بس مو بيدي اعذريني ..

واذا فهمتيني ومشيتي ع مرامي مانختلف ان شاء الله 

گتله ان شاء الله.. 

للعصر راح جاب سيم كارت جديد .. وسجل بي رقمة ورقم خالتي وامه بس ..

گال ذولي الارقام بس راح يبقون بجهازج ..

اني وامي وامج ..

خاف تردين شي اتصلي عليه باي وقت ..

فرح .. شكرا ..

اول مااتصلت بماما ونطيتها الرقم فرحت وگالت ع الاقل اتواصل وياج وگلبي مرتاح ..

گلتلها ماما بس مااريد احد يعرف عندي رقم .. مااريد يصير مشاكل ..

ماما .. لا يمة مااگول الاحد ماصدگت الله هدى عذاب الج وصار زين وياج ..

ثاني يوم موعدي وي الدكتورة وسفر معتز بنفس اليوم 

الصبح اجتمعنا عند بيت خالتي كلنا وجهزنا غراضه وودعناه واجت تماضر وعمامة كلهم موجودين ..

خالتي خطيه ماتت وراه ..

للعصر اخذنا عذاب اني وتماضر ورحنا للدكتورة وگالت وضعج زين رغم اني ابد ماگعدت واتحرك واشتغل ..

بس كنت ملازمة ع الابر وماتركتها ابد ..

نطتني كبسول بعد وغسول ودهن .. وگالت لتخليه يتقرب هالفترة الى ان يمر اسبوع بعد ..

بس گليله تگول الدكتورة ..

خلي يحاول يكون رجال بتعامله وياج موووو ..

تماضر ضاجت ورادت تتعارك وياها ..

واخذتني وطلعت ..

عذاب حس بيها ضايجة ..

سألها گالتله ماكو شي خلينا نروح امي مريضه خطيه ..

باوعلي عذاب همستله ماكو شي ..

لو يعرف الدكتورة هيج حاجيه كان دخل موتها ..

باجر عذاب يلتحق .. فرجعت للبيت حضرت جنطته وغراضه ..

هو بقى عند اهله ..

اجة تقريبا ساعة 10 لان خالتي ارتفع ضغطها وماخذيها للمستشفى ..

فرح .. شلونها خالتي ..

عذاب .. زينه احسن عفتها نايمة وتماضر باتت يمهم ماراحت ..

-كملتي غراضي ..؟؟

فرح .. اي كلشي جاهز بس اتأكد خاف اكو شي ناقص 

باوعلي وابتسم .. مدام انتي الي محضرتها اكيد ماكو نقص .. تدرين قبل من جانت…  وسكت ..

عرفته يقصد منار ..

كمل كلامة .. كنت ارتبها وحدي ماكانت تهتم بهيج امور .

انقهرت عليه .. ومااعرف شلون طلعت لااراديا ..

ومعقوله كنت تحبها رغم عدم اهتمامها الك ..

عصب وطبگ حواجبه ..

اني رايح انام فرشتيلي ..

طلع من غير مايرد عليه او يقنعني شنو سبب حبه الكبير الها .. مو انانيه بس فعلا اغار منها ع هيج حب رغم تغيرة معاي بس احسه بعد الماضي بعيونه ونضراته ..

بنفس الوقت ضجت لان ضوجته بكلامي ..

بقيت افتر بالغرفه .. 

شهد نايمة والتلفزيون بس اگلب وماثبتت ع قناة من التوتر ..

طلعت ردت اشوفه اذا محتاج شي ..

شفته يباوع بموبايله ..

گتله راح انام تحتاج شي بعد ..

عذاب .. نعسانه ؟؟

اتعحبت من سؤاله . گتله لا شويه اباوع ع التلفزيون بين ماانام ..

عذاب .. زين ماتجين تگعدين يمي نباوع شي بالموبايل ..

فرح .. يعني شلون ..

عذاب .. نطلع فلم ع اليوتيوب ونتفرج مامليتي من التلفزيون ..

ماعرفت شنو اگله بس حسيته مو خالي .. 

گال .. شبيج خايفه تعالي ..

اتقربت منه ..

هو گاعد ع القنفه ..

گعدت يمة ..

طلع اليوتيوب .. 

گال فلم اجنبي لو عربي ..

گتله ها ماادري ..

گال راح اطلع اجنبي احلى ..

كان يبحث ع الفلن واني عايشه بتوتر ..

صعبه فجاة وبدون مقدمات يصير انجذاب بينك وبين شخص ماكنت متوقع منه القرب الك بهذي السرعه ..

وخاصه اذا كان الهذا الشخص ماضي ..

ومايگدر ينساه بسهوله ..

طلع الفلم ..

وفتح ايدة گال تقربي اكثر ..

خلى ايدة ع كتفي ..

كنت اباوع بس ممنتبهة ولاعرفت شنو بي الفلم ..

بس عرفت بطوله كاثرين زيتا ..

وكانت بي لقطات فاضحة… 

حسيت بتوتر ..

وحسيت بضغطت عذاب ع كتفي ويحاول يقربني الي ..

وهو اني اصلا ضايعة بحضنه ..

صعد ايده ع شعري وسحب القراصه ..

من شفته راح يتمادى ..

ذكرت الي سواه بيه ووحشيته .. وكلام الدكتورة 

خفت وگمت بسرعة من مكاني ..

من شافني گمت .. 

لزم ايدي وعصرها ..

وين رايحة ..

-ها .. اروح انام ..

-خفتي مني ..

-لا بس ..

-اطلب منج طلب ..

سكتت مارديت عليه ..من توتري ..

-اريد تنامين يمي الليله واوعدج مااذيج ولااتقرب الج بس نامي بحضني ..

-لا اروح بفراشي احسن ..

-زين اني اجي يمج ..

-عذاب عفية ..

-لاتخليني اتوسل .. گتلج مااذيج ليش تعاندين ..

عيونه وكلامة وهو يحجي جذبني ..

نفسي ماتتقب تنام يمة ..

بس گلبي يدگ ويضغط عليه حتى اوافق. .

گتله بس ماتسوي شي ..

عذاب ..وعد؟؟

فرح .. اروح اجيب فراش واجي ..

عذاب .. لا خلينا ع فراش واحد ..

فرح .. زين بس اجيب شهد يمنا خاف تبجي ومااسمعها 

عذاب .. خاف تجيبيها وتگعد ..

خليها بسريرها واتركي باب الغرفه والاستقبال مفتوح حتى نسمعها ..

ماخلالي فرصه للرفض ..

اتقربت يمة سحب ايدي ونزل نام بفراشة وفتح ايدة ..

اتقربت اكثر ونمت يمة ..

كنت بوضع لااحسد عليه ..

اول مرة بحياتي احس بهيج شعور ..

من نمت بحضنه سحبني الصدرة وحوطني بأيده ..

شعور ممزوج بالفرح والعذاب ..

فرحي بقربه الي وعذابي ليكون الماضي مازال موجود ويفرقنا ..

اجت ببالي منار ..

هذا الحضن بيوم كانت تنام عليه ..

وهسا اني ..

رفعت راسي وباوعت الوجهة مغمض .. 

حجيت بداخلي ..

ياترى احساسك وياي نفس احساسك بيها لو يختلف ..

گال حلو اني مو ؟؟ وضحك ..

يبوووو استحيت ..

رجعت ع وضعيتي ..

كانت اديها تتلمس شعري بطريقه حلوة الى ان غفينا اثنينه ..

بالليل ردت اعدل وضعيتي ع الجهة الثانيه.. 

دار وجهة وهو نايم وحضني صار صدرة ع ظهري ..

ودنگ وجهة برگبتي اخذ نفس وگال اشتاقيت الحضنج منورة حبيبتي ..

بين نايمة وبين گاعدة ..

بين لحضاتي الجميله وياه واحلامي الي بينتها بهذي الساعات ..

لاول مرة مااختنگ وماتجيني الكوابيس ..

بس عذاب بكلامة خنگني وهدم احلامي كلها بلحظة ..

ردت اتنفس مااگدر ..

سحبت نفسي منه بهدوء وگمت ..

ركضت للغرفه وسديت الباب ..

كتمت صوتي بالمخدة وگمت اعيط وابجي ..

ااااه يمنار .. شوكت ارتاح منج ..

شوكت تخلص كوابيسج ..

شوكت ينتهي ثمني الاخطائج ..

اني مو بقصدي اخذ شي يخصج ..

انتي الي تركتيه وانتي الي دخلتيني العالمج ..

فوگ كل هذا ومستخسرة عليه لحظة حلوة اعيشها ..

بلحظة حسيت نفسي اغار مت منار ..

وحسيتها منافس الي ..

ولازم اهزمها واحاول اخليه ينساها ..

انانية هو حب مااعرف شنو تفسيرها ..

بس بعد مادگ گلبي اله ..

گمت مااميز بين الصواب والخطأ الي يهمني افوز بگلبه وبس ..

نمت ودموعي ع خدي ..

فزيت ع همسات عذاب الفجر ..

باوعتله مبدل ومكمل ..

گال .. ليش تركتيني وانهزمتي .. باوعلي گال ..

شبيهن عيونج ..

گمت عدلت شعري ..

ماكو شي بس اختنگت بالليل وماردت اگعدك ..

وذكرت بابا وبجيت .

گعد يمي وگال ..

ان شاء الله من اجي اخذج تزوريه ..

ضحكت .. صدگ تحجي ..ااااه لو تعرف شگد مشتاقتله صار سبع اشهر مزايرته ..

عذاب .. ان شاء الله نروح واشبعي منه ..

يله اني راح اروح ..

تعاي اقفلي الباب وراي ..

گمت وراه ..

طلع من باب المطبخ .. گال البارحة نمت مرتاح .  ابتسمتله ..

-يله مع السلامة ..

-الله وياك ..

گال لا مو هيج .. واتقرب عليه واخذ شفافي بشفافه من الصدمة ماحسيت بشي ولاحسيت بشفافي الي گطعهن بوحشيته ..

كمل .. گال يخبل طعمهن غمزلي وطلع ..

اقفلي الباب بالمفتاح وطلع ..

كل هذا واني بعدني بصدمة وممصدگة الي صار ..

قفلت الباب ودخلت ..

واني مو بوعي والي صار عبالك حلم ..

معقوله باسني .. لو مثل الليل اتخيل منار بيه ..

بس لا هسا واعي ع روحة يعني ممعقوله ميشوفني ..

اااااه ايها الغاضب لقد اسرتني بعشقك المجنون 💕

#بقلمي_الكاتبة_شمس

يتبع…… ..

____________________________________

هلو حبايب ..

رجاء الي متتحمل الانتضار لتابع ..

والي تگول عليه اشتهرت وانغرت ..

ع شنو اشتهرت ..

قابل شفتوا الاعلام والقنوات واكفين سرة ع بابي ..

كافي تجريح وخلوني اكمل القصه براحتي ..

لاتجبروني اوقفها واكملها كلها يله انزلها ..

اذا صاحبت القصه نفسها دا تعذرني وتقدر ضروفي انتوا متعذروني ليش ؟؟

تحياتي للعقول الراقية والمتفهمة احبكم كومااات 💕

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad