قصة من سيدفع الثمن الجزء الثالث عشر في 11:54 م مرسلة بواسطة أحمد التكريتي

 مساء السعادة حبايب 💕 

//// البارت الثالث عشر ////

#من_سيدفع_الثمن ؟؟

#بقلم_الكاتبة_شمس

"..يؤسفني ان يكون قربي منك وسيلة لانتقامك من  جرح قديم كان ولايزال يؤلم قلبك….

كنت اصارع جواه .. هو بالنسبة الي ضخم ومااگدر اقاومة ..

بعد مافقدت من الالم ..

صحيت ع صوت خالتي تصحي بيه وترزل بي ..

-لك انت حيوان .. شلون تعاملها هيج .. مارف گلبك ع هذي الطفله شوفها شلون سابحة بدمها ..

شأگول شأحجي وياك مايفيد ..

-يمة بدل هالحجي خلي نبدللها وناخذها للمستشفى.. 

-ووين جان عقلك من سويت بيها هالشكل ..

باوعتله يفرك بوجهة ويفتر بالغرفه بتوتر ..

وصوت شهد بأذني تبجي ..

اون من الالم واحجي ..

-خاله !!

-هايمة شتحسين .. سودة عليه ..

باوعت النفسي مغطاية بشرشف ..

لميت روحي وقرفصت ..

-خاله خليه يطلع ..

اشرتله طلع ..

-خاله شهد تبجي ..

-وج يمة شهد ابوها راحلها .. بس انتي گومي راح ينشف دمج ..

خلي ناخذج للمستشفى ..

استحيت من خالتي .. اني بموقف لااحسد عليه ..

الالم فضيع واحس نزيف جواي ومااگدر اگوم من المستحة ..

اتمنيت امي يمي هسا ..

محتاجتها حيل ..

بحياتي ماعرفت عن الزواج والعلاقه الزوجيه ..

كنت اسمع صحيح ..

بس مااتوقعت راح تكون بهذي البشاعه ..

كرهت عذاب وكرهت نفسي وگمت الوم نفسي لان اني الي تقربت منه وخليته يستغل ضعفي ..

ضغطت عليه صحيح ✔ بس احتاجيت اهتمامة وحبه ..

مو يعاملني مثل وحدة…..  ومايهتم المشاعري ..

-خاله شلون اگوم استحي ..

-اني مثل امج .. لاتستحين ..

لمي روحج وادخلي للحمام ..

بين ماتجي تماضر خابرتها ..

سندتني وگومتني .. احس بطني تتگطع ..

لفتني بالشرشف ..

وطلعت گدامي ..

سدت باب غرفتنا اني وشهد لان عذاب بيها ..

وطلعتني للحمام ..

دخلت وسديت الباب ..

وخرت الشرشف عني وابجي ..

اباوع الجسمي ازرگ ..

عبالك كان يعذبني بوحشية ..

گمت اسبح وابجي .. شسويت بروحي اني .. ليش هيج سويت ..

يمكن كلامي خلاه يحس اني وحدة رخيصه ..

اااااه يابة وينك .. ليش مااخذتني وياك ..

تركتني اعاني وحدي ليش ؟؟

سبحت وكملت .. دگت الباب تماضر ..

-فروحة بيج شي .. ادخل اساعدج ..

-لامابيه بس اريد ملابس ..

-هاي جبتلج ومنشفه ..

فتحت الباب شويه نطتهم الي . وعلاگة صغيرة .

گالت هذا احتياط للنزيف خليه ..

لبست وكملت وطلعت لگيتها منتضرتني بالباب.. 

او ماطلعت وشافت عيوني ..

سحبتني الها وحضنتني ..

ماگدرت ابجي لو احجي اكو شي خانگني ..

گالت يله تعالي امشطلج والبسي حجابج خلي اخذج للدكتورة ..

دخلت للغرفه صارت عيني بعينه دنگ وطلع كان شايل شهد ..

حتى مانطق كلمة وحدة ..

مشطت وبدلت واخذتني تماضر وهو بسيارته ..

بقت خالتي يم شهد ..

هو يسوق بأرتباك وسرعه .. وتماضر توصفله الطريق ..

خليت راسي ع الشباك واباوع ..

اول مرة اطلع واشوف الشارع من اشهر ..

وتالي طلعتي تكون للدكتورة ..

وصلنا ..

كان وضع غريب بالنسبه الي ..

ومن شرحت تماضر الوضعيه للدكتورة وگالتلها زوجة اخويه وكذا صار بيها .. خجلت ..

گالتلي اصعدي نامي ع السديه ..

عيني ع تماضر ومستحيه ..

اشرتلي مااخاف ..

تكشف عليه الدكتورة واني ميته خجل ودموعي لااراديا تنزل ..

لعنت الساعه الي كبرت بيها وتحملت هيج ذنب ..

لعنت اليوم الي صرت بي اخت منار واتحمل طيشها ..

الدكتورة .. منو سوة بيج هيج ..

مااعرفت شأگلها ..

جاوبت تماضر .. زوجها .

الدكتورة .. ماما تضحكون عليه زوجها شنو هذي مملخة 

رجعت باوعتلي .. احد اعتدى عليج ..

تماضر .. دكتورة گالج زوجها شنو هالحجي ..

الدكتورة .. وشنو الي يثبت .. شكلها بنت بيت وصغير مو مال وحدة متزوجة حتى حلقه ماكو بيدها وماحافه ..

اكو شي يثبت عقد محكمة او شي ثبوتي ..

تماضر صارت حمرة من التوتر .. گالتلها عاقدين سيد بس ضحكت الدكتورة بأستهزاء ..

تقشمرين عليه انتي .. هذا الشي خارج نطاق مهنتي المفروض افتح تحقيق هسا ..

بس لان انتي مراجعتي واعرفج ..

الصراحة ممقتنعة بالموضوع ..

شفت الوضع اتأزم وتماضر انحرجت .. وخفت انفضح ..

گلتلها دكتورة اذا اسولفلج قصتي تصدگيني ..

باوعتلي بنضرة طمنتني ..

اني تزوجت زوج اختي بعد ماماتت عندها طفله واخذوني حتى اربي بنتها ..

وعقد عليه سيد بس ..

وصارلي ست اشهر متزوجة .. واليوم صار الي صار وبجيت مااتحملت ..

غمضت عيونها .. وگالت الله لينطيهم الاهلج ..ماعندهم لگمة وينطوج .. والله لينطي الحيوان الي اخذج ..جان تزوج وحدة تليق بي وتربي بنته ..

تماضر .. دكتورة ترى ميجوز ..

الدكتورة .. لعد يجوز تسون هيج بطفله صغيرة وميجوز اذا حجيت ع اخوج ..

البنيه لازمها خياط .. 

بين مااسويلها .. هاج هذا العلاج خلي يجيبه من برة وقنينه فلاجين وياها ..

انطت الباص لتماضر ..

وگلتلي استرخي ولتخافين راح اضربج ابرة مخدر موضعي ..

خدرتني بعد ماحسيت بألم . بس الم گلبي اذاني احس روحي تنزف اريد ابجي اريد اعيط واطلع الي بداخلي كله 

جابت تماضر العلاج ..

خلتلي مغذي والفلاجين ..

گالت ارتاحي هنا الى يكمل لان نازفه هواي وخاف تصير مضاعفات عندج ..

صاحت الممرضه الي وياها ضربتني ابر ..

وسدت الستارة عليه ..

هي عندها سديتين .. 

فوحدة خلتني بيها ويمي تماضر اجت ..

وبقت تمشي بمراجعيها عادي ..

حسيت نفسي نعست او من اثر الدوة ..

غمضت شويه ..

بس صوت المراجعات وشكاويهن خبلتني ولعبت نفسي من الزواج كله ..

كمل المغذي والفلاجين ..

الممرضه سحبتهن ..

وگالت گومي شويه شويه لاتدوخين ..

سندتني تماضر وگمت .

گالتلي شلونج هسا ..

اشرتلها براسي مااگدر حتى احجي ..

الدكتورة نطتني ابر وگالت بقي الكانونة بيدج ..

وعشر ايام وارجعيلي ..

#بقلمي_الكاتبة_شمس

____________________________

طلعنا تلگانا عذاب ..

-شلونج هسا ..

ماحجين وياها .. تماضر گالتله ان شاء الله تصير احسن بس تلتزم بالعلاج والابر اهم شي ..

عذاب .. خلينا نروح المطعم شي تاكل ..

تماضر .. لا وين متشوفها ماتگدر تمشي .. بس اخذلها كبد مشوي بالبيت تاكله يعوض دمها .. 

واخذلها عصير زبيب ..

صعدتني تماضر وهي گعدت يمة ..

كلما اشيل راسي الگيه يباوع بالمرايا وعيونه مبين عليهن الندم ..

درت وجهي للشباك وتنهدت ..

نزل هو يم مطعم .. شويه واجة بيدة دلفري ومقبلات وصمون ..

وصلنا للبيت بعد المغرب ..

خالتي ماهي ..

وماخذة شهد وياها ..

صارت عيني ع الغرفه .. 

نضيفه .. يمكن خالتي منضفتها ومعطرتها ..

دخلتني تماضر للغرفه ..

گالت ارتاحي ..

اتصلت ع خالتي وگلتلها رجعنا ..

دقايق واجت خالتي ..

بيدها شهد ميته بجي ..

شافتني شمرت نفسها عليه ..

اميه ونامت بحضني وتشم بيه ..

غطيتها وياي وغفت خطيه تعبانه من البجي عليه ممتعودة ع فراگي ..

خالتي گالت الي يسألجن گولن افلاونزا .

لان سألوني وماگلتلهم شي فشله ..

تماضر .. سولفت الخالتي كلشي ..

وخالتي گامت تلطم ع وجهها ..

طلعن من يمي وگالن ارتاحي ..

خالتي تحجي ع عذاب وتلوم بي ..

عزا العزاك عذاب ..

گادر بس على هذي المسكينه ..

اسمعها تحجي وياه بالصاله وبعدين راح صوتهم يمكن راحوا للاستقبال ..

حضنت بنيتي والمسكن شويه ريحني ..

غفيت ع ريحتها وهي هم غافية بحضني ولازمتني من قميصي خاف اتركها ..

صحيت ع صوت تماضر .. 

گالت گومي اكلي كبد حتى يعوضج وتاخذين علاجج ..

فرح .. بيش الساعه هسا ..

تماضر .. ساعه عشرة ..

فرح .. هاي شنو هالگد نمت . وانتي ليش هنا مارحتي للبيت عيب من ابو تمام ..

تماضر .. لا ميگول اصلا من گتله مريضه كلش گال ابقي يمها لاتتركيها والاولاد متعودين ع ابوهم زنين ..

فرح .. شنو گلتيله عليه بتعجب ..

تماضر .. لاتخافين شلون اگول هيج شي عيب ..

گتله فلاونزا قويه وماتگدر تگوم ولاتگعد .

حتى الاهلي هيج گلنا لتخافين ..

فرح .. وماما درت ؟؟

تماضر .. اي امي اتصلت عليها قبل شويه .. ورادت تجي بس اني گالتلها للصبح وتعالي شيجيبج هسا ..

انطتني الاكل ..

گمت اكل بلا خبز لان مااگدر بس تماضر جبرتني عمود العلاج ..

شربت العصير واخذت العلاج ..

رجعت نمت .. گعدت شهد جوعانه ..

سوتلها تماضر ممة ورضعتها ..

وماتقبل تنزل من حضني اول مرة هيج اشوفها ..

طبعها حلو واي احد تروحله وتضحكله بس هسا مااعرف شبيها متمسكة بيه ..

طلعت تماضر موبايلها وشغلت بي طيور الجنه الها ولزمته الها وهي تباوع صافنه ..

الى ان تعبت ونامت ..

تماضر جابت فراش وفرشته يمي ..

اندگت الباب ..

دخل عذاب اشرلها تطلع طلعت ..

اتقرب وگعد ع طرفي السرير ..

منصي راسه ويحجي ..

شلونج هسا ..

-احسن ..

-اعذريني مااعرف شلون صارت بس ثقي اني موهيج ..

كنت مو بوعي .. وتعبان وانتي ضغطتي عليه ..

-اني ردت اساعدك تطلع من الي انت بي .. ردت اوضحلك اني مو منار صح هي اختي .. بس مو معناها اشبهها بكلشي ..

وشنو النتيجة .. كسرتني وحطمت حياتي ..

صار اشهر وياك شنو الغلط الي سويته وياك حتى تعاملني هيج ..

ليش تحملني ذنب ماسويته ..

واني احجي حسيته تضايق منصي راسه ويفرك بإيدة ..

رجع باوعلي .. وگال اني حبيتها تعرفين شنو حبيتها ..

نضراته وهو يحجيها وكلامة احسة طعنة بصدري ..

حسست بغيرة منها رغم هي مموجودة ..

كمل كلامة .. تعرفين شنو يعني تحبين انسان وتسوين كلشي الاسعادة وتالي يخونج ويفضل غيرج ..

تعرفين شنو يعني الي تحبيه يختار الموت بدل ميختارج ..شلون ترديني انسى واني خيانتها الي ماتروح من بالي. 

-والى متى تبقى تعاقب نفسك وتعاقبني بسببها ..

شوكت تصحى من كابوس منار الي محاوطنا ..

رفع حاجبه بأستغراب وماكان متوقع كلامي ..

-انتي الي تگولين هيج ..

ماانتي تكرهيني واتهمتيني بقتلها .. شنو الي غيرج هيج عليها ..

-مااتغيرت ولحد الان ادعيلها واقرألها قرآن .. بس گول فتحت عيوني للحقيقه .. وگدرت اعرفك وافهمك ..

بالفترة الي انت ماحاولت تفهمني وتعرفني ..

واختاريت اتهامي وعقابي ع ذنب مو ذنبي ..

ابتسم بتعجب .. تدرين مااتوقعت بيوم انه تكونين بهذا العقل والرزانه وحدة الكلام ..

كنت اتصورج طفله وماتگدرين تفهمين الي اني بي ..

-يمكن فهمك الهذا الشي اجة متأخر .. كسرت كلشي بداخلي بعد الي سويته .. 

لاتخاف ماراح اكرهك او الومك لان اني السبب بلي صار حاولت اتقرب منك واطلعك من عالمك الاظلم ..

والنتيجة اذتيني وجرحتني ..

فأذا تريد ابقى بالقوقعة الي حابس نفسك بيها وثق ماراح اتقرب الك او احاول اساعدك لازم بنفسك تقرر شوكت ترمي الوهم والماضي من حياتك ..

الي يهمني بهذا البيت شهد وبس ..

وراح تبقى انت ابن خالتي ومااقصر وياك ان شاء الله.. 

تعصب وگال ..

اني اجيت حتى اعتذر عن الي صار مو حتى تنطيني نصايح .. ويمكن صحيح ✔ الي گلتيه ..

ابتعدي عني حتى لتتأذين .. 

وهاي اخر مرة تحجين وياي بهيج طريقه ..

عذرتج لان مريضه ..

تركني وگام ..

اعرف الي حجيته اثر بي وحس بالذنب لكن كرامته وجبروته ماسمحوله يعترف بخطأ ويحاول يعالجة ..

ااااااه ياعذاب .. يمكن انت عذابي الي راح يرافقني عمري كله .. بسبب گلبي الي مافتح عينه الا عليك !!

دخلت تماضر ..

شحجيتي وياه صار بارود وجكارة ورى جكارة ..

-گلتله الحقيقه الي مايريد يسمعها ..

-وج قزوم طلع كل البله بيج هههههه ..

-شنو قزوم ترى طولي حلو ..

-اي صحيح ✔ همزين اذا وگفتي يم عذاب توصلين الخصرة ..

-لا مو الهاي الدرجة .. ههههههه بقينا نضحك وتسولفلي عن معاناتها وي عيالها ورادت توصل للطلاگ ..

وشلون عالجت الموقف وگدرت تحافظ ع بيتها وزوجها ..

فعلا من يسمع مصايب الناس تهون عليه مصيبته ..

الي يشوفها تضحك ومتصافية هي وزوجها .

يگول هاي حياتها كلها مرتاحة وماشفت ظيم ..

حسيت بألم .. نطتني تماضر مسكن ونمت ..

گعدت الصبح ع صوت ماما ..

ماصدگت من شفتها ..

حضنتها وابجي .. اووووف يوم ليش من اريدج مالگاج يمي محتاجتج ..

ماما .. من گالتلي خالتج الليل كله مانمت وماگدرت اسولف الواحد واشكي ..

اني صوجي الي وافقت وخليتج عندة عبالي يصونج ويحبج  واستحيت ارفضله طلب بعد ماكسرته منار ..

شمدريني يطلع قهرة كله بيج ..

فرح .. ماما مشتاقه البابا اريد ازوره واحجي وياه ..

حتى بأحلامي مااشوفه خاف زعلان علينا كلنا .

ماما .. اني احجي وي خالتج بلكي يحن گلبه عليج وياخذة ..

ردت اعاتبه بس گالوا التحق ماهو ..

-همزين ماهو .. خلي يبعد شويه بلكي انساه او يمكن وجودي الدائم وياه هو الي خلانه اميل اله ..

جائز مو حب مجرد اعجاب لااكثر ..( احجي بداخلي)

اجت خالتي وتماضر رجعت البيتها خطيه ..

تريگنا سويه وماما گامت نضفت وسوت غدا .

وخالتي اهتمت بشهد وغسلت ملابسها وملابس عذاب وكوتهم ..

يعني صرت مدللة بين امي وخالتي ..

احساس حلو من تشوف الي يحبوك يهتمون بيك ..

وهاي اول مرة احس بهيج اهتمام ..

للعصر ماما رادت تروح ..

بس خالتي گالتلها ..

-خيه مو مناك مروة وحدها وماتقبل اعوفها .. وخاف يجي عذاب فشله.. 

خالتي .. مروة مو صغيرة واذا كلش ادز معتز يجيبها وابقن هنا يم فرح خطيه وحدها ..

ماما .. لا اخوانها مايقبلون .. بس خلي اخابرها واگلها تتحملهم شلون ماكان شنسوي ..

اتصلت ماما ع مروة وگالتلها همة يومين اتحملي .. بس مروة ضاجت وتتوسل بماما تاخذها .. اسمعها من الموبايل ..

اشرت الماما تجيبها ..

بس ماقبلت .. گالت مالي خلگ اخوانج يبقون يحجون وين اخذتيها وانتي تعلميها ع الطلعه ..

تخلص شغلها وتگعد بالغرفه اشو حتى التلفزيون خلتيلهيا يمها حتى ماتضوج ..

فرح .. ماما ليش مترجعوها للدراسه .. خطيه اني حطمتوني هي شنو ذنبها ..

ماما .. يا غير تقوم القيامة عليه .. انتي ماتعرفيهم .

فرح .. يوم الى متى تخافين منهم اذا يشوفوج هيج يزيدون ..

ماما .. تدرين بصحتي وعلى اقل شي يرتفع ضغطي اذا متت منو الها ..

والله بعدني مامدفونة ويشيلوها وينطوها العمامج ..

هسا اني الي واگفه بوجههم ..

فرح .. يعني تعترفين اخواني ظلام .. ظلموني وظلموا مروة وحتى منار ..

همة السبب بهروبها وموتها ..

ماما .. كافي فرح سدي الموضوع ولاتذكريني .. 

كنت فرحانه بوجود ماما يمي ..

فرشتلها يمي وبقينا نسولف ونضحك نسينا نفسنا ..

وخالتي هم مافارگتنا كل شويه تجي ..

ومرة منهن سمعتها تحجي وي عذاب وتگله زينه هسا وخالتك يمها لاتخاف ..

سويت نفسي ممهتمة بس داخلي انتعش وطول اليوم الابتسامة مافارگت وجهي ..

بعد يومين .. اتصلت رنا ع امي ..

وامي تعيط وتحجي .

اريد افهم شي مافهمت ..

كملت اتصال .. لبست جواريبها وگالت خليني اروح ..

مو گتلج مااگدر اتركها يمهم ..

فرح .. شكو يوم شبيها مروة ..

ماما .. جلال متعارك وياها وضاربها بوكس على خشمها وكاسرة وتگول رنا بس ينزف ..

ضربت ع صدري .. يمة اسم الله .. الله ينتقم منه وين يرحون من ربهم ..

ماما .. لاتدعين يمة اعرفهم ظلام بس انتو ولدي ومااتمنى اشوف واحد منكم بمحنه لو صايرله شي ..

هسا انتي شهد مو بنتج وشوفي شلون تخافين عليها ..

فرح .. لا ماما شهد بنتي صارت بحضني وهي لحمة حمرة تعبت وسهرت وربيت وصارت جزء مني ..

مااقبل واحد يگلي مو بنتج ..

ليش اني عليمن متحمله ظلم الدنيا والناس عليه ..

غير عمودها ..

الام الي تربي مو الي تولد ..

تخبلت من گالت ماما هيج.. هذي بنتي الي .. كلمة امه منها تسوه الدنيا ومابيها ..

راحت ماما خطيه اجة معتز اخذها..

سلم عليه بالباب وتحمد السلامتي بس كان متضايق وماباوع بوجهي ابد ..

حسيت بي شي ..

سديت الباب ..

قفلتها بالمفتاح ..

ورجعت نمت ..

سمعت الباب تكسرت .. اريد اگوم بعد مااگدر ..

خفت عبالي صار شي ع مروة ..

بعد رجلي ماتحملني من الخوف والالم ..

فتحت الباب صار بوجهي عذاب ..

-منو هنا ..؟؟

-ماكو احد بس اني وشهد ..

-وليش صار ساعه ادگ ماتفتحيها ..

-كنا نايمين ..

-نزع حذاءة وخلة جنطته بالگاع ..

-مو گالت امي خالتي هنا وينها ..

-راحت للبيت قبل ساعة .. مو عساس باجر نزولك ..

-ليش ماترديني اجي .. اكو شي ..

-لا شعليه مجرد سؤال ..

-هاااا .. وين شهد اريد اشوفها .. 

دخل وعينه تدور بالبيت ..

حتى لو مايگول بس عيونه فاضحته .. 

صار عندة مرض الشك بعد مايگدر يثق بأحد ..

دخل گعد شهودة ويبوس بيها .. گال جوعان اكو شي اكله ..

گتله غدانا تشريب دجاج احمي الك ..

-لاخاف ماتگدرين اني هسا ابدل واحميه ..

بقيت صافنه بوجهة منين اجة هالاهتمام ؟؟

كل ساعه بشكل ..

-لا قابل راح اطبخ بس احميه ..

هو دخل يسبح .. واني حميت التشريب ..

وطلعت صدر دجاج گليته ..

ودااسوي زلاطة ..

حسيت بجسمه لصق بجسمي ..

اخذ خيارة اكلها ويسولف ..  جيبيها اني اثرمها عنج ..

هو اطول مني واضخم ..

احس روحي ضعت بي ..

التفتت بس ردت اخلص من التوتر ..

احس وجهي دخل بصدرة ..

وهو سابح وباقي بالفانيلا ..

موقف لايحسد عليه ..

رفعت راسي اله ..

وبقت بس عيونه تسولف ..

خليت ايدي ع صدرة بس اريد ابعدة ..

گتله خلي اشوف الدجاجة لتحترگ ..

وخر عني من الارتباك ردت اعثر لزمني بإيدة من بطني ..

الله الله خو ماتأذيتي ..

ها لا .. اريد ابتعد ايدة محاوطتني ..

وحسيت انفاسه اقتربت مني وكأنه متعمد هيج يسوي حتى يقترب الي ..

بس بعد الي صار گمت اخاف منه ..

وخفت من التناقضات الي عايش بيها ..

ابتعدت عنه بهدوء ..

ورحت كملت الغدا ..

باوعتله متكي ع الكاونتر وصافن ..

گتله جهز الاكل ..

اخذة مني واتعمد يلمس ايدي ..

خلاه ع الطاوله وگال تعالي اگعدي وياي اكلي ..

-لاشبعانه ..

-حتى اذا بس گابليني مو تدرين مااعرف اكل وحدي ..

جبت اللبن والمي وگعدت ..

اكل لگمتين وگال .. بعدج ضايجة مني ..

رفعت عيوني اله ..

بعدني ماحجيت ..

دخلت خالتي ..

-يا هاي عذيب هنا .. شو ماگلت راح اجي ..

واني اجيت اشوف فرح خاف محتاجات شي ..

امج وين ؟؟

فرح .. راحت الظهر خابرت رنا وگلتلها جلال ضارب مروة وكاسر خشمها وراحت تشوفها خطيه واني بالي يمها ..

خالتي .. كسر ايدة ان شاء الله يستقوي ع البنيه ..

فرح .. شنسوي خاله مكتوب علينا نتحمل ضريبة اخطاء غيرنا .. وتعمدت باوعتله ..

حسيته راد يغص باللگمة وخزرني وانطبگت حواجبه من الغضب ..

درت وجهي عنة بسرعة ..

خالتي .. خلي اخابرها واشوف شبيها البنيه خطيه ..

فرح .. ياليت وتطمنيني عنها ..

خابرت خالتي .. گالتلها ماما بالمستشفى احنه ..

من سمع عذاب ..

گال يله گومي البسي خلي نروح نشوفها ..

ماصدگت رغم ألمي والي بيه فرحت من گال هيج ..

بدلت وردت اطلع .. 

دخل هو صرت بينه وبين الباب ..

اتقرب حيل الي وگال ..

ديري بالج تختبريني بكلامج وبساميرج عليه ..

تدرين بيه عذاب والي يعاندني اعذبه ..

مشى اصابعه ع خدودي واتلمسهن ..

يله كملي بسرعة لااغير رأي وغمزلي وطلع ..

بقيت صافنه ومتعجبه .. لااكيد مريض مو صاحي ..

ماعرفت غازلني لو رزلني بكلامة وتصرفاته ..

#بقلمي_الكاتبة_شمس

يتبع .………… 

( الي تگولون تعبنا من الانتضار واتاخرتي وماتوفين المتابعيج ..)

ترى اني البارحة نزلت بارت وقبلها بارتين وهسا بارت ..

ليش محسسيني اني صار اسبوع ممنزله ..

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad