قصة من سيدفع الثمن الجزء الثاني في 9:43 م مرسلة بواسطة أحمد التكريتي

 اسعد الله مسائكم بكل خير احبتـي 💕

//// البارت الثانـي ////

#من_سيدفع_الثمن ؟؟

بقلم_الكاتبة_شمس

♣اصعب شئ عندما تفقد احبائك بلحظة لم تتوقع فقدانهم فيها ..

دخلت امي تشوف بابا واني رحت للغرفة ابدل ..

بعدني بس نزعت .. سمعت عياط هز البيت كله ..

رجليه بعد مايشيلني ..

اريد البس ماالحگ بعد ..

خليت الدشداشة ع راسي وطلعت بسرعة ..

شفت امي واگعة .. 

ومروة ورنا يعيطن ومتهسترات ..

وبلال هو وجلال ركضوا للشارع ..

دخلت غرفه بابا واصيح شكو .. بابا شبي ..

لگيتة نايم ..

اي نايم بس كانت ملامحة مكسورة ومقهورة ..

وجهة ازرگ وشفايفة بيض ..

بس كان مثل النايم ..

اتقربت اريد اصحيه .. گتله بابا بابا ..

تلمستة جسمة ثلج حيل ..

باوعت المروة .. وج جيبي بطانيات بابا بردان حيل ..

طفي السبلت وج بابا جسمة ثلج ..

رنا تسحب بية وتگلي وج عمو مات مات ..

عطت بيها .. لا اسم الله بيش مفاوله عليه ولي منا .

هسا يگعد ..

ادري بي ضايج وانقهر من منار .. بس هو مايتركنا يحبنا .

وهو بعمرة مازعل عليها يحبها ..

هسا يگعد ويتراضون ..

اجة بلال من وراي ..

سحبني ودفعني للباب ..

امشن منا .. انتن الي موتنا ..

والله ماارحمجن .. وبحياتي مااسامحجن وعيونة حمر ويفرفح ..

وجلال دخل يلطم ع راسة ويبجي ..

بلال صاح رنا .. گالها لبسي امي شي ..

ناخذها للمستشفى ..

وخابرت عمامي يلحگونا للمستشفى ..

اني مثل المصدومة وممصدگة ..

بلمح البصر .. اجو عمامي وولدهم ..

والكل يبجي ويعيط ..

دخلونا للغرف ..

ودخلوا يم بابا .. من شفتهم غطوا وجهة هنا وعيت وعرفت خلص بابا تركنا وراح ..

ركضت اريد اروح اشمة وابوسة الاخر مرة .. سحبني محمد ابن عمي ..

گال لاتروحين راح يشيلوه ..

عطت بي .. خلوني اشوفه .. 

شفت طلعوا ماما تخبلت ..

توقعت هي هم ماتت واخذوها ..

گلتلهم ماما وين اخذتوها شبيها ماما ..

انخبص البيت بالعياط ..

اجة عمو حسن حضني ويبجي .. صيروا قويات بابا ..

هذا امر الله ..

مات وهو نايم لاتعذب ولاتأذة ..

دموعي ينزلن نار .. وبداخلي اگلة لا .. مات ضايج ومقهور .. مااتحمل خيانة بنته وترباته تروح هيج ..

جلال گام يعيط .. وولد عمي وعمامي واگفين ..

كله من الساقطه منار .. 

والله الا اموتها ..

اخذ روحها مثل مااخذت روح ابوي ..

مااخليها ..

ولد عمي لازميه وعمي يعيط عليه .. 

وهو مستمر يعيط ويحجي ..

والشغله الي كان محد يدري بيها صار الكل يعرفها . 

ومنار انفضحت بين عمامي وولد عمي ..

وتخبلوا من سمعوا وراد يصعدون الها ..

بس عمو عاط بيهم وگال ..

ولا واحد يتصرف .. انزلوا ..

باوع الجلال وين موبايلها ؟؟ عرفتوا منو هو ..

جلال .. لا عند عذاب .. وهي بسرعة كاسرة الموبايل من شافت نفسها انكشفت ..

هذا الحجي گاله عذاب النا ..

بعد ماندري ..

عمو .. يصير خير .. خلي تخلص الفاتحة ونتفاهم .. 

ولاتنسون زوجها الوحيد الي يحكم بيها مو احنه ..

محمد .. بس يابه زوجها شمرها علينا وگال ربوها .. يعني تبرأ منها ..

عمو حسن .. اشششش ولاكلمة . مااريد احد يفتح حلگة الا تخلص الفاتحة ..

الناس راح تجي ومااريد فضايح ..

اتصرفوا طبيعي ..

وانت بلال انطي المفاتيح الاخواتك . خلي يشوفنها ..

لاتسوي بروحها شي ونبتلي بعدين ..

طبعا طول هالفترة صوت منار .. مابطل عياط .

وتدگ بالباب وتصيح شكو ..

بابا شبي ..

گلولي بابا شبي ..

حس گلبها انه بابا بي شي لان هم علاقتهم مختلفه وكانوا مثل الاصدقاء . ورغم كلشي كانت تحبة حيل ومتعلقة بي هواي ..

احنة من الي صار نسيناها ..

وحتى صوتها ضاع بين اصواتنا ونحيبنا ..

حضنت مروة وابجي ..

الناس بدت تجي .. ليل وظلمة وموحشة .

ولاابوي ولاامي ..

نسواني عمامي وبنات عمامي كلهن اجن ..

وخوالي ونسوانهم ..اجو 

كلها موجودة بس اهلي ماكو .. 

امي اخذوها وماكو احد وياها ومانعرف شنو الي صارلها وابوي راح خلص بعد ماكو احد يحمينا ويخاف علينا .

خيمتنا انهدمت وبقينا بالعراء مكشوفين ..

احس الدنيا باردة وموحشة بلياه ..

كلها مگابلتنا وتبجي وتسأل شلون مات .. وشلون مادريتوا بي .

امجن وين عنه معقوله محد دخل وشافه . 

يگولون صارله كم ساعة متوفي .. ووووووو

الكل يسأل ويحجي .. واني مو يمهم ..

كنت احس اكو غصة بداخلي مااعرف شلون اطلعها ..

شگد لطمت وشگد بجيت مافاد ..

شويه واجة بلال ..

گال الرنا انطيني جنسية ابوي ومستمسكاته ..

تلگنة عماتي يبجن ويعيطن .

حظنهن ويبجي ..

بس مااجة وحظنه .. ماگال خويه ابونا راح اني ابوجن وسندجن ..

باوعلنا بحقد ..

وگال تعاي وراي ..

دخل الغرفة اهلي ..

شفت رنا فاتحة الكنتور وتدور بي ع المستمسكات ..

بلال .. اسمعي ولج لاعبالجن افوتها الجن .. هاج هاي المفاتيح ..

كل شويه واصعدي للعاهرة الفوگ شوفيها ..

وانطيها اسود تلبس ع ابوها الكتلته ..

واياها تنزل لجوة .. 

خلي تخلص الفاتحة ونشوف شلون نتصرف وياها ..

واذا صار بيها شي لو انهزمت انتي الي تتحملين النتيجة .

فاااااهمة بعياط ..

هزيت راسي وابجي .. اي بس امي شلونها . وابوي هم تجيبوه بعد لو لا ..

حباب بلال سلملي وودعا الي ماشبعت منه ..

بلال .. كتلتنا وتبجن عليه ..

فرح .. حرام عليك اني شعليه .. ترى هذا ابوي مو بس انت مقهور عليه .. اني الي راح احس بعازته ..

ماكملت كلامي ..

وعصر حلگي وشفايفي .. اششششش كلجن نفس النمط هذيج الله كشفها انتي الله اليستر منج .

من تحت السواهي دواهي ..

عاط برنا .. يله انتي وين المستمسكات ..

رنا .. اي متشوف ادور وماكو ..

گال روحي شوفيهن وين .. وحلگي احسة ورم من العصرة مالته ..

لزمت حلگي بيدي وكاتمة صوتي وادور ..

لگيتهن بالمجر ..

اخذهن وطلع ..

بقت رنا تباوعلي ..

گلتلها .. هاااا شكو ..؟؟

هزت ايدها وطلعت ..

ااااااه يمنار .. ليش هيج سويتي .. 

مافكرتي بينا وبأبوي ..

باوعت للمفتاح بيدي ..

اي ماكو غيرج انتي الي تطفي الغصة الي بگلبي ..

اخذتها وطلعت ..

قلمي_الكاتبة_شمس

------------------------------------

دخلت الغرفتنا .. 

طلعت من الجنط دشداشة سودة ..

لبستها .. 

واخذت ثانية وصعدت الغرفه جلال ..

فتحتها ..

شفت منار فاقدة ووجهها ازرگ من الضرب ..

ركضت جبت مي وصحيتها ..

هاي اذا شافنها نسوان عمامي والناس بهاي الحالة اكيد يشكون بالسالفه ..

ولو هو جلال فضحها اصلا ..

صوتها مبحوح من العياط والبجي ..

گالت بصوت واطي .. شكو شنو هاذا العياط .

بابا لو ماما بيهم شي ..

شمرت الدشداشة عليها ..

گلتلها هاج گومي البسي اسود ع ابوج الي مااتحمل صدمته بيج ومات خلص ..

من سمعت هيج .. 

گامت تلطم وخرمشت وجهها وتبجي صوت ماعندها بعد ..

لزمتها حيل من قهري ..

هزيتها باثنين ايديه ..

ليش ولج ليش ..

ليش ضيعتي روحج وضيعتي ابونا منا ..

انتي يتمتينا وخلتينا بلا اب ..

وج انفضحنا وراح تصير سيرتنا بكل اللسان ..

تبجي وتحجي .. والله ندمانة والله .. ماعبالي هيج يصير .كله منهم .

گلتلهم مااريدة .. مااريدة ..

وج ماترديه ترحين تخونيه .. 

جان تطلگتي ..

مافكرتي بشيبات ابوي ..

لو سمعة اخوتي ..

لو شرفنا احنه اخواتج ..

انتي انانية من صغرج . وماتفكرين بس بنفسج ..

منار .. فرح ارحميني .. وج ابوي مات وبسببي وانتي تزوديها عليه .. اااااه يابة ريت يومي قبل يومك .

ولج والله لو كاتلني وموتني ولاميت هو ..

وج بعدة منو يرحمني ..

لو احسن خلي يكتلوني وارتاح شلون اعيش بعد واني السبب بموت ابوي ..

رغم حقدي عليها والي سوته دمرنا كلنا . بس مااتحملت 

اتقربت منها وحضنتها ..

وگمنا نبجي سويه ..

گلتلها وج ماتحمل وصارت بي سكته وهو نايم ..

رحت وي ماما للمستشفى  وطول هالفترة هو ميت وماندري ..

جسمة مثلج وبارد ..

سودة عليه شگالت روحة. 

منار تبجي وتضرب ع ظهري .. وج مات وهو غضبان مني وج حرام اعيش اني ..

هي ماعدها صوت بالگوة تحجي ..

واني من ضيمي ماگدرت اسكت ..

وبقيت الوم بيها ..

ليش هيج منار ليش ..

مافكرتي بالبطنج ..

وج هاي بنيه .. من تكبر شتگليلها ..

گالت .. اااااه مو نسيته وتعودت ع حياتي .. شجابه وشرجعه مرة ثانية الي ..

وج والله كم مرة صديته وماقبلت . بس ضعفت . ذكرني بحبنا وايامنا وكلامة وغزله نساني كلشي ..

ونسيت حتى عذابي وي عذاب ..

باوعتلها .. اي عذاب انتي بي .

شو زوجج يحبج ويباوع الحلگج ..

منار .. اي شمدريكم عليكم الظاهر بس وكت مايعصب ينسى الحب وينگلب وحش ..

-زين انتي مو كسرتي السيم كارت بعد شعرفه بيج ..

منار .. رحاب .. مخابرها ومصر تنطيه رقمي ..

بلا وعي ضربتها .. قشمر .. ضيعتي روحج وضيعتينا ع واحد باعج من البدايه شلون رجعتي وثقتي بي .

الي ماتزوجج وانتي بنيه ..

يتزوجج من تتطلگين وعندج طفل ..

گولي ماخفتي من الي راح يصير ..

ماخفتي من الله من تحبين واحد وانتي ع ذمة رجال ..

شگد حذرتج منه .. وگتلج هذا ملعب ..

وينه هسا گولي وينه ..

اكيد انهزم لو كسر خطه ومسحج من حياتج ..

قشمرج وضحك عليج وتالي دمرتينا بنزوتج ..

شگد غبيه .. صحيح ✔ انتي اكبر مني . بس انتي غبية وغبائج ضيع ابوي منا وامي مااعرف شبيها ..

بحياتي ماراح اسامحج ..

حرمتينا من ابونا هو عايش وهو ميت ..

كنتي انانية وماتخليه يتقرب منا وماخذته بس الج من كنا صغار ..

دللج اكثر وحدة بينا .. وتالي من كبرنا ومنتضرين نتدلل بوجودة ..

تالي رجعتي واخذتيه منا بأنانيتج وبعد مانشوفه ..

هي ماتحجي بس تبجي ..

صعدت مروة ..

تبجي .. من شافتها رادت تهجم عليها ..

سحبتها ..

مروة اششش منا ناس لاتفضحينا ..

انزلي هسا انزل اني ..

انطيتها الدشداشة ..

وگلتلها راح اترك الباب مفتوح ..

بس لاتنزلين لايشوفن وجهج ويشكون وتدرين بنسوان عمامي شلون ..

اذا تردين اسبحي ..

گالت مااريد .. 

تركتها ونزلت ..

شفت دخلوا ماما وخالتي ام عذاب وياها ..

ركضت الها حضنتها وابجي ..

گالت خالتي .. خلنها ترتاح ..

ماما بعالم ثاني وماتحجي ..

نيمنها بسريرهم .. لگيت البنات مبدلات الفرشة ومنضفاتها ..

ردت ابوسها غمضت عيونها ودمعت .. 

اجن النسوان كلهن اخذن من خاطرها وبوسنها ..

طلعنا بالصاله كل وحدة مخلية قرآنها ونقرأ سورة يس حتى تتلگاه قبل ليدخل القبر ..

وصلينا الوحشة اله ..

ااااه يابة شلون بية فراگ .. 

تمنيت ادفن روحي وياه ولااعيش بلياه ..

كلما ارفع راسي .. اشوف بنات عمي لو نسوان عمامي وخوالي يتهامسن ..

والكل يباوعلنا اني ومروة ..

صدگ متت قهر ..

مرت خالو هيثم .. هاي رادت بنتها العذاب ..

وعذاب رفضها واخذ منار لان يحبها ..

كانت تعوج بحلگها وتگول ..

منار ليش فوگ ماتنزل جوة مو عزا ابوها هذا ..

خالتي ام عذاب ردتها .. ام ضحى منار حالتها مو زينه والطفل تعبان احنه صعدناها فوگ حتى ماتتأذة ..

ام ضحى .. ياااا خطيه لعد هسا نصعد نشوفها ..

طفرت من مكاني .. گلتلها نايمة خطيه لان بجت ع بابا ومااتحملت انطيتها فاليوم ونامت ..

ام ضحى .. مو زين عليها غير حامل ..

ام عذاب .. لا ماعليها هي الدكتورة كتبتلها من رحاتها وجعتها ..

سكتت مرت خالو بس ماصدگت او يمكن تدري بس تسوي نفسها متدري ..

اما البقية . فيباوعللنا عبالك بينا وباء معدي ..

مروة مااتحملت وراحت يم ماما گعدت وتبجي ..

دخلت يمها ..

مروة امي ماناقصه قهر . لاتحجين شي ولاتحرگين روحها ..

كافي الغالي راح من عدنا ..

حضنتني وتبجي ..

گالت . شفتي شلون يباوعللنا .. 

كله من ورى منار وجلال الي فضحونا ..

لزمتها من وجهها .. باعي مرواي . لاتسوين هيج . خلي ثقتج بنفسج .. انتي ممسويه شي حتى تخجلين .

والي تحجي طنشيها .. 

كل شخص يشوف عيوبه يله يحجي ..

بقلمي_الكاتبة_شمس

-----------------------------------------

حضنتني وبقينا نبجي سويه ..

وحدة تواسي الثانية لان ماعدنا احد يواسينا ..

ضعنا بهذي الدنيا وناسها الماترحم ..

صدگ لو گالوا الاقارب عقارب ..

يمكن يصح الغريب احسن من القريب.. 

ع الاقل يعذر ومايحكم بسرعة ..

احاول اقنع مروة بكلامي .. 

بس اني منو يقنعني .. الف فكرة اجت ببالي ..

ياهم اشيله بعد ..

هم ابوي وحرگته الي بصدري ..

لو هم امي الي بعالم ثاني وفاقدة ..

لو هم منار وسوايتها ..

واخواني الي توعدون النا ومااعرف شنو ناوين ..

قطعت دمعتي وافكاري .. خالتي ام عذاب ..

گالت يمة فروحة.. 

تعاي اصعدي وياي اريد اشوف منار ..

گلتلها خاله عليج الله اتركيها هسا .. صح خطأت بس الي صار بينا كافي خلي تخلص الفاتحة واحجوا ماعايزين فضايح ..

ام عذاب .. وج شبيج خبله .. اريد اشوف وضعها . نسيتي هي حامل وتلگيها كلشي ماماكله ..

مو زين ع الطفل ..

اخذتها وصعدنا ..

لگيناها نايمة وتون .. كسرت گلبي ..

هي شافت خالتي ..

گمزت ..

خالة والله غلطة وصارت .. والله ندمانة ..

يريد عذاب خلي يكتلني يطلگني .. بس لاتفضحوني .

فرح .. بعديش .. بسبب جلال عمامي وولد عمي دروا ..

لطمت ع صدرها .. يمة يعني انفضحت .. خلي يكتلوني مااريد اعيش ..

طلعوا هاي من بطني وموتوني مااريد ..

اتهسترت وتعيط .. ضربتها خالتي راشدي .

اسكتي ولج فضحتينا .. اني ماردت احجي وياج هسا .

بس انتي الي فتحتي الموضوع ..

كلشي توقعت منج الا هاي الشغله ..

وحتى عذاب ماصدگته من گال .. 

لأن اعرفج تربات اختي ..

صح تتدللين وتتعصبين بسرعه بس مااتوقعت هيج تسوين وج خايفه من الفضيحة ..

وماخفتي من الله ..

منين عرفتيه وشلون وانتي حتى ماتطلعين وفيس ماعندج وج احجي ليش هيج سويتي ..

ليش ضيعتي نفسج وبنتج وابوج خطيه مات بقهرة ..

منار ساكته وماتحجي بس تبجي ..

منار .. خاله حبابه خلي اشوف ماما اريدها تسامحني .

ابوي راح وهو غضبان عليه .

خلوني اشوف امي ..

ام عذاب .. مو هسا امج مريضه وخاف تشوفج ويصير بيها شي ..

خلي تخلص الفاتحة والله كريم ..

وانتي اكلي وخلي بالج ع الطفل ..

هي تتحرك ..

منار .. ماادري مامنتبهه ..

باوعتلي خالتي .. وگالت ..

سويلها لگمة تاكلها وانطيها فاليوم شو شنو خليها تنام وترتاح ..

وبس تخلص الفاتحة اخذها للدكتورة نشوف وضع الطفل .

نزلت خالتي ونزلت وراها ..

شفت تمارة وتماظر بنات خالتي جايات .

تماضر اخت عذاب الكبيرة متزوجة وعندها ولد وبنية ..

وتمارة الصغيرة بالسادس اعدادي ..

گامن سلمن عليه ..

تماظر حصنتني وتبجي ..

بس تمارة حسيت سلامها بارد وعبالك مجبورة جاية ..

مااهتميت الها ورحت للمطبخ اسوي اكل المنار ..

لگيت البنات يسون كباب وبطاطا وزلاطة عشا ..

اخذت ماعون ودااخلي بي كباب ..

تذكرت بابا وگمت ابجي .. سودة عليه .

تلگيه جوعان ..

زين هسا دفنوه لا ..

غسلوه بعده .. اشو محد نطانا خبر ..

البنات گامن يواسن بيه ..

اجت ام رنا ..

گالت .. عليمن تبجين من وراجن مات .. ماتجيبن بس المصايب ..

رنا خزرتها .. وگالتلها يمممة ..

صدگ ضجت .. گلتلها عمة عيب هالحجي هم عندج بنات تقبلين واحد يحجي عليهن .

وبعدين مو كل اصابعج سوة ..

هي تخبلت وگامت تحجي .. تلعميني العيب روحن طمن عارج يله تحجن .. الرجال مات من وراجن .

وامجن هالفاقدة بس صوجها ماعرفت تربي ومدلليلجن كلش ..

صدگ انهضمت .. هاي اول هجمة بعدك يابه منو جان يدوسلنا ع طرف بوجودك ..

گلتلها مااحجي وياج .. يس مسلمتج بيد الله ..

تركتها وطلعت ..

اخذت كباب وخبزة وزلاطة .

وصعدت لفوگ ..

صعدت وراي تماظر ..

گلتلها منار گومي اكلي لگمة ..

شافتها تماظر شهگت .. هاي شمسوين بيها ..

منار من شافت تماظر يمكن خجلت .. گالت اطلعن منا مااريد شي ..

لاتضلين كل شويه جايبة واحد يتفرج عليه ..

والله اكتل روحي وارتاح ..

كافي ..ارحموني ..

ادري بروحي كلبة وخطأت بس ع الاقل خلوني احزن ع ابوي وسو الي تردوه ..

بابا راح تفتهمون شنو راح ..

وبسببي بسببي ..

بقت تعيط .. وتلطم ..

بالگوة لزمناها الى ان فقدت ..

ركضت الخالتي صحتها ..

صعدن البنات والنسوان كلهن كتلهن الفضول ..

خالتي خابرت معتز گالتله بسرعه تجي ..

اشرتلنا لفها بالعباية ..

غطيت وجهها اني حتى ماشوفنها ..

خالتي گامت تحجي .. انزلن جوة البنيه مختنگة وضايجة ع ابوها .. انطنها مجال تتنفس ..

مرت خالو ام ضحى ..

گالت .. والله زين منج وماتنطين بيها لو اني بمكانج جان ماباوعت بخلقتها ..

خالتي عصبت وطردتها من الغرفه ..

واضح الكل يدري وماكو داعي نخبي شي ..

اجة معتز سوينا طريق اله ..

صعد شالها ونزلها ..

گالت خالتي انتي ابقي يم امج اني وتماضر نروح ..

اخذوها وراحوا ..

وبقيت وحدي بين العيون والنضرات ..

مااتحملت دخلت للغرفة يم ماما ومروة وابجي بصوت مكتوم ..

مروة تباوعلي وتبجي .. تگلي فرح شلون راح نتحمل نعيش هيج ..

خاف يوصل الحجي للمدرسة شلون اباوع بوجه الطالبات والمدرسات مااتحمل اني ..

دموعي تجري ومابيدي حيله .. شنو الي اسويه الها والي ..

شفت امي تنهدت وعبالك تسمعنا ومسويه نفسها نايمة .

اخذت اديها وابوسها ..

يوم اصحي محتاجيج احنه والله .

لاتحملونا ذنب غيرنا ..

بابا راح وتركنا بأشد الحاجة اله ..

لاتتركينا انتي… 

شوية سمعت صوت الزلم اجو وهوسة ونحيب ..

عماتي وعمامي ..

طلعنا شفناهم اجو بالاستقبال ..

وسمعت عمو يگول من الفجر نطلع ندفنة ..

اني ومروة بس واكفين ونبجي ..

عمامي حاضنين عماتي ويبجون .. بس مافكروا يحصنونا ويواسونا ..

شفت بلال اجة طاير من بعيد ..

گلت الله يستر ..

سحبني للغرفة ..

شاف امي وطى صوته ..

وج اني مو گلت اختج الساقطة ماتطلع من الغرفه شلون ياخذوها للمستشفى. 

فرح .. شعليه اني خالتي اخذتها لان اغمى عليها واختنگت وخافوا ع الطفل ..

بلال .. عساها بالموت ونرتاح .. 

دور لوة ايدي حيل وگال اسمعي ولج منا وجاي تصيرن خدامات بهذا البيت ..

اذا حجيتن ولا رديتن ع وحدة وتجاوزتن .. سنونجن اكسرها بحلوگجن ..

فرح .. هاي رنا گالتلك .. لعد امها من تتهمنا بشرفنا مارديتها وحجيت ..

بلال .. شحجي وشأرد قابل جذب .. انت شريفات .. نزلتن روسنا الله ياخذجن ..

امي صحت…  شافته وبجت .. وين ابوك وين اخذتوه .

باسها ويواسيها ..

ويگلها الفجر ندفنه .. صارت بي سكته ومااتحمل . من العصر ميت وماندري بسبب بناتج…… .

انهضمت صدگ .. يتهمنا بأبشع الالفاظ وهو اخونا ..

وامي حتى ماردته وگالتله مالهن ذنب ..

لعد لاعتب ع الغريب من يحجي علينا… 

قلمي_الكاتبة_شمس

يتبع……..

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad