قصة من سيدفع الثمن الجزء الأول في 10:47 م مرسلة بواسطة أحمد التكريتي

السلام عليكم

طبعا القصص منقولة وليس من تأليفي 

وغير مسؤول عن أي كلمة بداخل القصة

حقوق الكاتبة محفوظة

بدون اي تغيير فقط تم تغيير الصورة

يومية ينزل جزء واحد لان الجزء كلش طويل واذا حبيتو انزل اثنين عادي اكتبولي بالتعليقات

 #من_سيدفع_الثمـن ؟؟

حرمتُ من مستقبلي وحياتي  .. وأجبرت ع العيش كما يريدون لكي يسددو الثمن لذنب ليس ذنبي .. فمن سيدفع الثمن ؟؟

روايـة حقيقية (للكاتبـة شمس)

usershamsss

ملخص والتعريف عن الشخصيات !!

هلا وغلا حبايب ..

اكيد استغربتوا لان مصار هواي من كملت القصه السابقه ولازم ارتاح ..

بس صاحبة هذي القصه كانت منتضرتني من بداية كتابتي لساهر الفجر ..

ومن نطتني ملخص عن قصتها لفتت انتباهي وجذبتني.

وحسيت بيها هواي عبر وحكم لظاهرة منتشرة هالفترة للاسف ..

ماگدرت ارفضها رغم ايدي وجرحها ..

لكن طلبت منها تنتظر الى ان ارتاح فترة وايدي تشفى حتى مااقصر لاوياكم ولا وياها ..

وحتى انطي القصة حقها واكتبها واني بالي مرتاح ..

القصة احداثها تتحدث عن طالبه كليه ..

من عائلة بأحدى مناطق بغداد ..

تتحمل اخطاء غيرها وتتعاقب عليهم من غير ذنب ..

وقعت فريسة المجتمع والاخوة والاهل ..

والكل يقف ضدها ويجبارها لدفع ثمن ذنب لم تقترفـه .. 

فكيف ستكون حياتها ..

ومن سيدفع الثمن ؟؟

هذا مانعرفه من خلال احداث القصة ..

اما عن ابطال والشخصيات للقصـة ..

فرح ..( بطلـة القصه) .. طالبة في كلية العلوم مرحلة ثانية .. البنت الوسطى للعائلة .. ملامحها عاديه . حنطاويه صاحبة عيون واسعه طولها 158 جسمها متناسق مع طولها .

شعرها بني طويل ..

عذاب .. ضابط في القوات الخاصـة .. عمره 33 سنة .. ضخم البنيـة حنطاوي ذو شارب ولحية لكن اصلع الرأس او ذو شعر خفيف جدا ..

متزوج من اخت البطلـة وابن خالـتها..

منار .. الاخت الكبرى لفرح .. زوجة عذاب وعمرها 25 سنة خريجة جامعه لكنها ربة بيت .. 

مواصفاتها اجمل من فرح .. واطول قامـة ..

بلال .. الاخ الكبير لفرح عمره 30 سنة .. موضف بالصحة ( معاون طبيب) ..

وحالته الاجتماعية .. متزوج من رنا ابنة عمه ..

جلال .. اخ فرح الثاني اكبر من منار بعام واحد .. يعمل مع والده بمحل لتصليج الاجهزة الكهربايية وتنصيب السبالت والمكيفات وغيرها ..

وحالته الاجتماعية غير متزوج ..

مروة .. اخت فرح الصغيرة عمرها 15 سنة ..

اما باقي الشخصيات ستتعرفون عليها اثناء السرد ..

تحياتي لكم ..

وابقوا في الانتضار ..

المُحِبة لكم دووومـاً(شمس) 

صباح  الورود حبايب 🌺..🌹

//// البارت الأول /

(#من_سيدفع_الثمن) 

روايـة حقيقية // #للكاتبةشمس //

في بعض الاحيان ندفع ثمن اشياء لم نقترفهـا ..

وندفع ثمن ذنوب ليست ذنوبـنا .. 

وندخل في متاهات معتمة لانعرف الى اين ستأخذنـا، لكن في النهاية هناك معركـة اما تربحهـا او تخسرهـا. ولامجال للاستسلام فيها ..

لانـك ان لم تُقاوِم وسرت فـي طريق الاستسلام السهل ، فهناك ثمن سيدفع يوما مـا ..!!

منذ سنين مضت ..

اتذكـر ذلك اليوم .. وكأنه البارحة ..

فهناك صدمـة والم وذنوب كثيرة اشترك فيها الجميع واصبحوا جلادين لايعرفون الرحمـة ..

عندما تكون حياتك هادئة .. وفجأة تتحول الى فوضى

هنا تشعر بأنك في عالم اخر ..

وكأن روحك انتقلت الى البرزخ ولاتعرف مامصيرك هل سيكون الجنة ام النار !! 

رجعت من الجامعـة .. كانت بداية المرحلـة الثانـية ..

وفرحانة لان شفت صديقاتي وخاصة بعد العطلة ماالتقينا ابد لان سهير كانت محافظات ..

وزهراء ممتواجدة دايما عند اجدادها تروح ..

بس كنا متواصلين بالموبايل وع الفايبر ..

وصلت للبيت كنت ميتة جوع .. واتخيل ماما شمسويتلنا غدا ..

فتت من الباب سمعت عياط بالبيت ..

-ياساتر شكو ..

دخلت من المطبخ .. شفت ابوية گاعد مقابيلي بالصالة مدنگ راسه وعينه بالگاع ..

واخواني يضربون بمنار اختـي ..

وامي لازمتها وتبجي ..

ولكـم حرام عليكم البنيه حامل .. لايوگع الطفل ..

جلال .. خلي يوگع شمعرفنا اذا ابن حلال ..

منار .. لاتگول هيج والله ماسويت شي بالحرام بس بالموبايل ..

جلال .. ياعار تسولفين حبجيات بالموبايل وتگولين ممسويه شي ..

زين منه عذاب من اجة وشمرج عدنا .. اني منه جان كتلتج بسرعه ..

استغربت من كلامة وركضت بلهفة اريد احميها ..

سحبني بلال ولواها لذراعي ودفعني ع الحايط ..

بلال .. ولي من وجهي انتي انگس منها ماتجيبن بس العار ..

دموعي نزلت ..

باوعت البابا ..

بابا احجي احنة تربيتك ليش تسمحلة هيج يحجي ..

باوع وگال بعد الي سمعته والاهاين الي حصلتها من عذاب ماالي عين احجي وادافع ياحسافة تعبي بيجن .

اني عذاب يگلي اخذ بنتك وطم عارها ..

وشوفها اذا نايمة وياه لو لا ؟؟

بقى يحجي بينا وبين روحة وعيونه حمر من القهر وحسيته مكسور ..ومصدوم ..

تركنا وراح للغرفه ..

تخبلت وگمت اعيط . وردت اگوم منار . وجهها ماينعرف بعد من الضرب ..

وبدافعي الها . انضربت دفرة ع خاصرتي حسيت روحي طلعت ..

كتمت صرختي ودموعي ينزلن ..

امي تخبلت وگامت تعيط ..

ولكم حرام عليك. راح تموتهن .. 

جلال .. عوفها بلال لاتموت جوة ايدك ونبتلي بيها .. ماتستاهل تدخل سجن علمودها ..

بلال .. لا والله ماارتاح الا ادمرها .. سحبها من شعرها وصعدها لفوگ ..

ردت اگوم وراها بس الم خاصرتي موتني مگدرت ..

اباوع المروة اختي مقرفصه وتبجي .. بسرعة اجت حضنتني وامي تركض وراهم .

ولزمتها رنا مرت بلال ..

حسيت يوم القيامة ببيتنا ..

شنو الي صار وشلون صار ماادري ..

نزل بلال وبيدة مفتاح ..

گال .. الباب قفلتها واريد اشوف بنيه منجن الي تفتحلها لو تساعدها على ماانشوف زوجها شيگول ..

ولو بعد شلون اله نفس بوحدة لزمها بيدة تخونه وعندة الادله ..

من سمعت هالحجي ضربت ع وجهي من الصدمة ..

باوعت الامي .. يوووم شنو السالفه .

امي ماتحجي بس تبجي ..

گمت سندتها اني ومروة واخذناها الغرفتنا ..

-وج شسوت منار گولي ( احجي وي مروة )

-ماادري بس عذاب اجة يسحل بيها وضاربها .. وشمرها بوسط البيت وگال الابوي .. 

هي هاي الي تعززت بيها وشلعت گلبي يله وافقت تنطينياها .. طلعت ماتستاهل ذرة من تعبي عليها ..

هاك اغسل عارها الخاينه ..

ابوي عصب وغلط عليه وجلال راد يضربه ..

بس هو دفع جلال ووگعه وگال .

روح استقوى على اختك الي مخلصتها حب وغراميات بالموبايل ووياي عايشه دور المريضه ..

وحتى الطفل الي ببطنها مااريدة هذا اذا طلع مني ..

وتركنا وطلع واحنه بصدمة ومانعرف شنو صار ..

وبلال شبعها كتل وهي مانكرت ولابررت . 

بس الي عرفناه ماشايفها ولاشايفته بس كانت تتراسل وي واحد بالموبايل ..

امي عاطت .. اشششششش كافي ولج لاتكملين .

وبقت تلطم ع وجهها .

ولجن هيج ربيتجن اني .. هيج تسوون بيه . تخلن راسي اني وابوجن بالطين .. 

ريت هالبطن ماحملتجن ولاجبتجن ..

مروة .. واحنه شعلينا ليش تجمعين . مو صارلج ساعة تدافعين عنها وتحملتي الكتل بدالها . 

عطت بمروة .. كااافي اسكتي خليها تحجي من قهرها . اذا اني لسا ممصدگة منار هيج تسوي . لعد امي شلون الي ربتها وتعبت عليها . حقها شتگول ..

باوعت الامي اختنگت وبالگوة تاخذ النفس ..

ركضت الها .. يووم .. ماما شبيج ..

صحت بـ مروة .. اركضي جيبي مي ..

گمت اضرب بخدها واحجي وياها بس هي ماكو صوت ..

صحت .. 

جلال .. بلال الحگوا ماما ماادري شبيها ..

اجو يركضون ..

گال بسرعه لبسيها عباتها خلي ناخذها ..

اني بعدني بملابس الدوام .. رحت وياهم بسرعة ..

والطريق كله مخليتها بحظني وابجي ..

لاماما .. اياج تعوفينا . ادري صعبه عليج . بس اتحملي الخاطرنا ..

وصلنا للمستشفى ..

دخلناها للطوارئ . فحصوها .. گالو ضغطها مرتفع وزين ماصارت جلطة همزين اتلاحگتوها ..

خلولها مغذي وضربوها ابر ..

الردهـة نسائية ..

طلعوا اخواني بالباب ..

وانـي بقيت يمها گاعدة ..

كنت اتمنـى يطلع كل هذا كابوس واصحى منـة ..

بس للاسف كان واقع ..

گمت بلا وعي اگرص ايدي اريد اصحى احس ايدي صارت زرگة من الگرص وبالگوة كاتمة صوتي ومختنگة بس الدموع ينزلن ..

منا امي واخاف تروح منا من القهر ..

لو شيبات ابوي ورباته الي راحن ..

لو منار الي كنت احسها مثال الي اقتدي بي . مستحيل يطلع منها هيج شي وتخطأ لو تخون ..

بين كل هذا رجعت الذكرياتـي قبل هاليوم ..

وحاولت انسى او اتناسى الي صار ..

انـي فرح .. البنت الوسطى ..

عندي اثنين اخوان اكبر مني بلال وجلال ..

واختي منار متزوجة عذاب ابن خالتي هو ضابط وقتل نفسها عليها بس لان تدرس كانت ابوي مانطاها ..

وهم لان شغله صعب وخطر يگول اخاف كلشي يصير وتترمل بنتـي ..

منار كانت رافضه وماتريدة وهي اصلا اكثر وحدة مدللها بابا لان اول بنت بعد اثنين ولد ..

لهذا نفذ طلبها وكان يرفض عذاب بكل مرة يجي يخطب ..

بس عذاب بقى مصر وجاب شيوخ وخلالها مهر غالي ..

امي بقت تقرأ براسها وتگلها ماتلگين هيج واحد يحبج وبيت وحدج ومرتاحة ..

بس هي اكو شي ببالها وكانت قافله ع الرفض .

الى ان بيوم اجة عمو وگام يحجي ..

گال البابا مو وضعية بنتك فشلتنا بين العالم والشيوخ ..

الولد شاريها وشنو الي تردوه يسويه حتى بيت مأثث وجاهز على شنو ترفض .. خاف عندها شي لو واحد مقشمرها ..

بيومها ابويه عصب وعيط عليه وگاله بناتي اني مربيهن واذا ماراغبة الولد مااگدر اجبرها ..

الكاتبة_شمس

………………………… . 

مرت الايام والحال نفسة ..

منار بأخر يوم امتحانات .. اتأخرت وابوي واخواني قلقوا .

يتصلون عليها جهازها مغلق ..

الصراحة شكينا بعذاب خاف مسويلها شي ..

لأن هو اذا تعصب مايشوف منو گباله .. ومنار نزلت كرامته ورفضها كان مثل السكين المطعونه بصدرة ..

امي رادت تخابر خالتي بس ابوية ماقبل .

گالها ننتظر شويه ..

بلال طلع .. گال اروح اشوفها بالجامعه . خاف صاير عليها شي ..

من رجعوا .. دخل للبيت سحلها وضربها ..

وگال الامي .. خابري ع خالتي وگليلها البنيه كملت واذا يريدها عذاب خلي يجي ياخذها ..

منار .. والله لو اموت مااتزوجة موبكيفك ..

بلال .. طايل السانج ولج اني اعلمج شلون تردين عليه ..

ابويه .. كاااافي شو ماتحترموني . وانت منو تقرر واني عايش .

بلال .. يابه ماشايفها احنه هنا محترگين عليها .. وهي تنزل من سيارة ولد وتتمضحك وياه ..

بيا زمن هذا ..

باوع بابا بغضب الها ..

-صدگ هالحجي ..

منار تبجي .. والله بابا مجرد زميل .. لان اتأخرنا وسوينا عزيمة بالقسم گال اوصلجن اني ورحاب وياي مو وحدي ..

بابا .. اشششش ماتعرفين تخابرين تگولين .. الظاهر اني نطيتج وجه زيادة عن اللزوم ..

من يمته تصعدن سيارة غريب وضحك وسوالف ..

بلال .. لا وگاعدة بالصدر .. والله لو لازمة الا اشبعة كتل بس مالحگت عليه ..

بابا .. باعي منار .. راح اصدگ كلامج لان مااريد اطعن بتربيتي .. بس كنتي تگولين خلوني اكمل ولاتضغطون عليه ..

اني اشوف عذاب مايتعيب وشاريج . ودراسه وكملتي .. بعد ماكو حجة للرفض . الا اذا كان اكو شي مثل ماعمج گال ..

باوع الامي وكمل كلامة ..

ام بلال . خابري ام عذاب وانطيها الموافقه ..

منار دخلت للغرفه وتبجي .. مااريدة . مااريدة گوه . عصبي وشايف نفسه شلون اعيش وياه ..

دخلت امي ورانا ..

لزمت اديها .. احجي ولج عندج شي وي هذا الي اجيتي وياه .. 

منار .. ياااا شبيكم مو گلت ماكو شي .. 

ماما .. اذا خلص توافقين . وهاي سوالف المزعطة ومااريدة وعصبي خليها ع جهة .. 

محد يتحمل دلالج ويحبج مثل عذاب .. 

منار .. اي خبلكم عذاب ببيته وفلوسه لهذا تردون تبيعوني ..

ماما .. انجبي لج .. شنو فلوسه شتشوفينا مگاديه . طول عمرنا ماعزنا احد ولامدينا ادينا وربيناجن احسن تربيه ودلال وخاصه انتي ..

بس صوج ابوج هو الي طلع عينج ..

اخواتج صغار مايسون مثلج ..

ضربتها ع راسها بأصابيعها وگالتلها شغلي دماغج .. خاف واحد داگلج صدر . ومقشمرج بالحب وكذا .

لاتصدگين هالحجي .. الي يحب يجي من الباب مثل عذاب مو يتختل ويتشرد ..

طلعت ماما ومنار تبجي ..

فتحت تلفونها وبقت تراسل ..

تكتب وتكتب واني صافنه عليها ..

اخر شي غلقت الجهاز ونامت وهي تبجي ..

احس بيها موجوعه او عندها شي بس مااعرف شنو ..

صارت عيني ع جهازها .. ردت اشوف وخفت تگعد .. 

طلعت يم ماما ..

لگيتها هي وبابا يتناقشون .. 

ويگلها تحاول تسايسها وتعرف شنو بيها وليش هالرفض 

بابا انسان مثقف وابد مايوم ضربنا او غلط علينا بعكس عمامي واخواني الي اخذوا طبع عمامي ..

بالعصبيه والهمجيه ..

رجعت للغرفه لگيت موبايل منار صامت ويضوي .

اتقربت منها . شفت رسائل فايبر تطلع الشاشه .

ماقريت البدايه بس الاخير .

مكتوب . منار لاتضغطين عليه سبق وان گتلج اني ماعندي امكانيه حاليا ..

اذا مستعجله ع الزواج وافقي وفضيني ..!!

فتحت عيونـي من قريتهن .. 

الاسم كان رحاب 2 مسميته .. عساس رقم رحاب الثاني ..

من الخوف والتوتر .. 

گعدتها ..

منار اجتج رسائل ع الفايبر ..

طفرت هي ..

فتحتهن وتبجي .. 

تالي خابرت ماكو رد ..

گالت حقير ماتوقعته هيج ..

گلتلها .. منار حرام تضيعين نفسج ع شخص باعج من اول فرصه ..

لو يحبج صدگ وگلج انتضريني .. جان اني گتلج اتحملي واوگفي وياه بس هذا مبين ملعب ..

استغربت وگالت ..

شنو تتجسسين عليه .. 

-لاوالله بالصدفة .. شفت اخر رساله ع الشاشه طلعت . وماقصدي . واني اختج مو غريبه ..

كلشي يصير بيه اجي اگلج ومااضم . ليش تضمين عليه .

ترى كبرت اني ..

حضنتني وتبجي .. وج اگله حيزوجوني يگول اذا قاتله نفسج ع الزواج تزوجي وفضيها ..

ليش هيج يسوي . هاي جزاتي لان تعلقت بي وحبيته .

وج والله الجامعه كلها تتمناني واني اختاريته بس هو .

منار .. معقوله انتي هيج تصدگين بسرعه .. 

شگد صارلكم . سنه سنتين .. هاي خلصتوا ومااجة ولافكر يخطبج . 

اني الي اعلمج لو انتي تعلميني ..

-مو بيدي بعد حبيته .. اصلا هو مو بجامعتنا بس يجي مرات .. 

-وهسا بعد هذا الكلام ناويه تنتضريه وتضيعين شبابج لو شنو ..

-مااعرف .. بس والله اذا مارد عليه منا الباجر . اوافق ع عذاب واكسر خشمة واحرگ گلبه ..

-يعني توافقين ع عذاب علمود تكسرين خشم ذاك . ليش الزواج لعبه . وج هذي حياة طويله .. شلون هيج تفكرين 

-وشحصلت من الحب .. مو جربته وتالي يگلي روحي تزوجي ..

-لاانتي مو طبيعية .. انتي مو تكرهيه العذاب . شبسرعة اقتنعتي بي ..

-ومنو گلج مقتنعه .. بس اريد اكسر گلبه واحرگ روحة الذاك الباعنـي .

-منار اعقلي .. لا وربي احجي كلشي الماما وهي تتصرف وياج ..

منار .. عرفتي هسا ليش مااگلج من سوالفج هاي . 

فرح .. بس انتي اختي الجبيرة ومثال النا اني ومروة المفروض نتعلم منج مو احنه نعلمج ..

منار .. روحي فرح اريد انام ..

بقت ايام منار حزينه وبس تبجي .. وكلما تتصل ع النذل الي خلاها تتعلق بي هيج .. مايرد وحتى جهازة غالقة ..

كانت تتصل برحاب وتشكي وتبجي .. اني كنت امثل نايمة وانقهر عليها ..

اعرفها تحبه ودا تتعذب لان بلحظة تركها . لمجرد گالتله تعال اخطبني ..

بعد اسبوع وفجأة ..

طلعت من غرفتها وكانت ذبلانه ومقهورة ..

وگالتله . بابا اني موافقه ع عذاب ..

شفت الفرحة بعيون اهلي ماتنوصف .. وماما بسرعة خابرت خالتي وبشرتها ..

وبيومها اجة عذاب واهله . وجابو الذهب وفلوس النيشان .

كان يباوعلها بحب وشغف .. عيونه تريد تاكلها .

وفعلا منار كانت تستاهل هيج حب . هي حلوة ومناقصها شي ..

بس ياليت تنسى وتگدر تحبه ..

عذاب من هي صغيرة يحبها ورايدها ..

وهي كانت تكرها وتگول ضخم عبالك وحش . وخاصه من يجي من الدوام النا .

رغم شخصيته بس لبسه وشكله يثير الخوف ..

لليل .. منار .خابرت رحاب وگالتلها ع الموافقه .

ونطتها موعد المشيه والمهر ..

بعد ماكملت .. طلعت السيم كارت . وكسرته وشمرته بالزبل ..

وحذفت شكو موقع تواصل عندها ..

من سألتها .. گالت خلص مدام وافقت على عذاب لازم امحي الماضي من حياتي ..

عجبتني بتصرفها ..

وفعلا تغيرت منار بعد ذيج اللحظة ..

وكانت دايما توصيني وتگلي ..

انتي راح تدخلين جامعه .. لاتخلين احد يقشمرج لو يضحك عليج بأسم الحب ..

لاتكررين خطأي .. 

وكنت اخذ بنصيحتها وفعلا الي شفته كافي لحتى يكون عبرة ودرس الي ..

انشغلنا بتحضيرات خطوبة منار وعذاب ..

وخالتي كانت تحير شنو تجيب الها .. 

من زمان منتضرين هاللحظة ..

بس منار كانت تتشرط وتطلب هواي ..

وشرطت حفلة الخطوبة بالقاعة ..

وتعزم صديقاتها واقاربها كلهم ..

عذاب مارفض .. وكانت اموار وشروط منار مجابة بالنسبة اله ..

واجة يوم المشية والخطوبة ..

احنة رتبنا كلشي بالبيت للمشية ..

وطلعنا للصالون ومناك نروح للقاعة ..

بعد متخلص المشية يعقدون ويسون حفله هناك ..

اباوع المنار طلعت حورية تخبل ..

هي حلوة وبيضه كانت احلى مني ومن مروة ..

والفستان ذهبي ويلمع كله ومخصر ع الجسم والردن شيفون .

التسريحة بسيطة وشعرها بي شگار . 

طلعت ماشاء الله ..

الكل انبهر بجمالها ..

حتى عذاب من دخل بعد ماعقدوا صفن بيها واتقربلها بشغف ..

كل البنات كانو حاسديها عليها ..

لان شخصية عذاب بعائلتنا فد شي ..

رغم عصبيته وحديته وغالبا مايضحك ..

الى انه بنات خالي وخالاتي وحتى اقرباينا من ابويه .

كلهن يتمنن واحد مثله ..

ويگولن هنيال منار ع هيج قسمة ..

منار كانت تبتسم بغرور وتفاخر من تشوف نضرات البنات وهو يلبسها الذهب ومن اكلها الگاتو . 

وبعدين رقصوا ..

حتى صديقاتها صافنين بيهم .. وگالولها . وج منار هذا وين وذاك وين . شوفي شلون ينگط هيبة ..

بس منار ضاجت وگالتلهن مااريد الموضوع ينفتح ..

تونسنا حيل بحفلتهم وكانت اكو مصورة تصور الحفل كله

بس من دخلوا جماعته واخوانه .

صاح بأختة تمارة تجيب شي المنار يغطي راسها وجسمها وعصب حيل ..

بسرعة لبسناها البرنص .

واحنه سترنا نفسنا بالعبايات والجبب ..

دخلوا رگصوا وهو ابد ماشال عينها منها .

رغم هيبته والجبروت الي بعيونه ..

الا انه امامها يضعف ..

فأي حب هذا ..؟؟

كملت الحفله ورجعنا للبيت ..

بس منار كانت تتصنع الضحكة ..

ومرات اسمعها تحجي وي رحاب وتگلها خايفه اندم ..

بسببه اني تسرعت . 

وراح ارتبط بأنسان متعصب وماراغبته ..

من يجي عذاب ويردون يطلعون . كانت تطلع حجج وتگول مريضه ..

وهذا الشي ضوج عذاب ..

وقرر يتزوجون بسرعه ويطلعون الاربيل ..

منار تعاركت وي امي وگالتلها شنو مستعجلين مااريد هسا ..

بس بابا مانطاها مجال وگالها شمنتضرة بعد .

الولد وابن خالنج وتعرفيه .

ومتمكن وبيته جاهز وماعندة شي يتأجل ..

لاتصيرين زعطوطه وتدللين ترى هذا زواج مو ببيت اهلج وتدللين عليهم .

الظاهر صدگ اني غلطت من دللتج .

بعد ماصارت امام الامر الواقع تزوجوا ..

وطلعوا ثاني يوم الاربيل ..

بعد اني انشغلت بالتقديم للجامعه وكنت فرحانة لان راح ادخل العالم جديد وغريب بنفس الوقت ..

اختلطت مشاعري مابين الفرحة والتوتر ..

طلعت اني وماما واشترينا ملابس واحتياجات ..

من رجعنا تفاجأنا بمنار وعذاب عدنا ..

بعدها استأذن عذاب وكان مبين ضايج .

وگال اني عندي شغل ..

لليل ارجع اخذ منار ..

منار .. لا اني اريد ابات هنا اليوم ..

عذاب بعصبيه .. لا لليل واجي اخدج . وراح بسرعه ..

امي حست اكو شي ..

اخذتها ودخلوا للغرفه .. 

مافهمت شكو . بس اسمع صوتها تبجي وتگلها همجي ومتوحش وينگلب انسان ثاني وع اقل شي يتعصب وفوگاها يريد يلبسني عبايه اسلاميه او جبه .

يگلي مااريد احد يشوفج .

واني اصلا ملابسي عريضات ..

ماما بقت تقنعها وتسايسها ..

وگالتلها من يجي ابوج لاتحجين شي . ترى يطين عيشتج بعدج عروس وبدت مشاكلج ..

الولد يحبج لا تخسريه بسوالفج .

ولان بعدكم ببدايه الزواج تصير هيج مشاكل ..

كنا اني ومروة نضحك. ونگول .. همزين مانتزوج ولا هالعيشه يومين وتجي زعلانه ..

ورنا تخزر بينا وتگول لاتسمعجن اسكتن ..

لليل اجة عذاب سلم ع اهلي وتعشا يمنا وراحوا البيتهم .

مرت الايام ..

ومنار بطلت شكواها وزعلها كل فترة ..

واستقرت حياتهم ..

صحيح مر كم شهر وطفل ماصار عدهم .

ومانعرف السبب شنو .

بس نوعا ما صاروا احسن .

حتى منار من تجي تضحك وتسولف .

وعذاب كان دوامة بمكان حساس ومرات تصير عندة خفارات ..

فلو يجيبها يمنا لو عند اهله يخليها ..

اني بعد ماداومت .. من كلام منار خفت واحس نفسي انعزلت .

من المحاظرة للبيت . 

بس عندي صديقه اسمها زهراء حبابه البنيه ومؤدبه .

وماعندها اختلاط مثلي ..

فصرنا صديقات حيل وگمنا نگعد ونطلع سويه ..

وبعدين تعرفنا ع بنية اسمها سهير محافضات وفطيرة حيل وحبابه ..

وصرنا ثلاثة .. اكلنا وشربنا وگعدتنا سويه ..

وبما انه سهير محافضات ..

گمنا بين فترة وفترة اني وزهراء نطبخلها وناخذلها للقسم ..

علاقتنا قوية وصرنا اكثر من الاخوات ..

وبالجامعه مالنا علاقه بأحد ..

الكل مسوين گروبات ولد وبنات مختلط .

بس احنه وحدنا ..

وكانت عندي رهبة او خوف من الاختلاط بالشباب حتى لو كانت فقط صداقة ..

وخاصه من اشوف كل اثنين گاعدين سويه احس نهايتهم مثل منار والي حبته ووثقت بي وتالي ضحك عليها ومااتزوجها ..

مرت ايامنا عادية ..

ومنار استقرت .. وصارت حتى تضحك وتسولف ويانا اني ومروة ..

واسولفلها ع الجامعه وهي تنصح. ودايما كانت تگلي لاتثقين بأحد ..

اني عندي امتحانات ودراسه فأجي تعبانه انام بسرعه 

ومرات اگعد وي بابا واخواني ونضحك ونسولف ..

الى ان اجانا خبر حمل منار ..

خالتي اتصلت ع ماما وفرحانه حيل .

وتگلها باجر غداكم عدنا ..

عذاب مسوي غدا وعازم الكل ..

رحنا ثاني يوم .. وعذاب حاير شمسوي .. لان صارلهم اشهر من تزوجوا وهو منتظر هذا الطفل ..

بس منار ضايجة وتگول .. بعدني ماشفت من حياتي شي . ولااتعينت ولاطلعت ..

كانت تتذمر ..

وخالتي تگلها جيبيه واني اربيه وانتي اشتغلي واطلعي وتونسي ..

خالتي حبابه حيل ..

بس عذاب من سمعها ..

گالها .. منور انسي الشغل .. شنو جوعانه واخليج تشتغلين ..

بيتج وابنج واني اولى بالوقت الي تعبين بي بالدوام .

وبقوا يتناقشون ..

وتالي خزرها تسكت .

لان نسوان خوالي گاعدات .

وماراد احد يسمع نقاشهم ..

دخلت للغرفه منار ضايجة .

رحت وراها وشفتها تبجي ..

فرح .. شبيج منار . لاتضوجين جائز يخاف عليج وانتي حامل ..

منار .. لا مو يضوج يغار . وغيرته تكتل وزايدة عن حدها اتصوري ..

من نطلع يگلي لترفعين راسج ..

وياخذنا بمكان معزول .

ويخلي وجهي للحايط من نگعد بمطعم مو للناس .

لعد المن مطلعني ..

ومن اگله اريد شغلات من السوگ يگلي اكتبيهن بورقه واني اجيبهن .

قافل عليه فد مرة وخانگني ..

حتى الفيس يگلي الغيه مااريده ..

لعد وين انطي وجهي ..

وج حتى رحاب .. اگله خلي اروح اشوفها مستاقتلها .

يگلي خلي هي تجيج ..

وانتي تدرين بأهلها مايقبلون ..

جاي نحجي ونسولف ..

دخل معتز اخو عذاب الاصغر منه . خريج قانون اهلية

شافنا ضحك ..

سلم عليه وسألني شلوني بالجامعه واذا محتاجة شي .

عندة معارف ..

تشكرته وگتله ممحتاجة شي ..

كانت نضراته غريبه وهاي مو اول مرة .. بس للأمانة مايوم قلل احترام او لمح الشي . مؤدب حيل ..

صبوا غدا تغدينا ورجعنا ..

مرت الايام عادي واني كملت المرحلة الاولى بتقدير جيد جدا ..

وبالعطله انشغلنا نجهز المنار .. 

ومرت بلال هم حامل ..

منار من عرفوا جنس الجنين بنية .. هي فرحانه بس حسينا عذاب كان ضايج ..

وخالتي تگول . هو مامعترض ع حكم الله بس راد اول طفل ولد ينشال اسمه بي . وبعدين خلي يجن بنات عادي ..

منار رغم كانت مرايدة الطفل بس فرحت من عرفت بنيه وكل ساعه مطلعه اسم وتختار ..

خلصت العطله وداومت .. لكن يومين ورجعت للبيت وصار الي صار ..

وياليت مااجة هاليوم ..

صحيت من ذكرياتـي .. ع صوت الممرضه ..

گالت المغذي خلص ..

وضغطها زين .. اذا تحبون شوفوا الدكتور واطلعوا ..

صحت بلال .. 

راح شاف الدكتور .. گال اذا تردون بقوها اليوم والصبح طلعوها ..

بس ماما ماقبلت واصرت تطلع ..

طلعنا المغرب للبيت ..

وصلنا تلگتنا رنا ومروة ..

مروة .. هاي منار كسرت الباب وتبجي من رحتوا لسا وخاف يصير بيها شي ..

بلال .. ولي انتي معليج .. اموتج وياها اذا فتحتي الباب مروة .. لا والله مافتحت .. بس… .

جلال .. انجبي ولاتتدخلين .. كلجن نفس الشي ماتنعطن وجه ..

بلال .. ابوي وين ..

رنا .. من صارت المشكله دخل نام وبعد ماطلع ..

ماما .. غير تشوفنا .. رجال مريض خاف بي شي ..

رنا .. لا دخلت ردت اگعدة شفته نايم تركته وطلعت خفت يعصب عليه ..

امي .. اني داخله اگعدة هسا مغرب مايصلح نايم لسا مو عوايدة ..

دخلت امي واني رحت للغرفة ابدل ..

بعدني بس نزعت .. سمعت عياط هز البيت كله ..

رجليه بعد مايشيلني ..

اريد البس ماالحگ بعد ..

خليت الدشداشة ع راسي وطلعت بسرعة ..

بقلمي_الكاتبة_شمس

يتبع… ..

حبايب راح يكون تنزيل البارتات يومي .. يعني كل يوم بارت حسب وقتي ..

واذا شفت تفاعل انزل بارت بالليل💕

تحياتي الكم

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad