مساء الخير ع اجمل متابعين اتمنى لكم قراءه ممتعه
❣️❣️#البارت 7❣️❣️
#الندم_مابعد_الخطيئه ❣️❣️
❣️❣️#للكاتبه رونق❣️❣️
وجان ننصدم بالولد صديقه ملابسه مشككه وجها كله دم
هو اتخبل
ديما بس تبجي
راح ادخل هو
واني وكفت ع صفحه
شكو لج شبي الولد
لج اسكتي ترجف وكوه تحجي
واكفين هنا ومنتظرين الاقلام
اكو ولد اثنين بس يباوعون عليه وكصوني كص
عراقين لو ايرانين
ايرانين
دخلوا للمحل وسوو نفسهم يردون يشترون
اجوي بصفي
ولامست ايد واحد جسمي وجان متعمد
وهذا اتخبل علني
كوه شلعوا الولد من اديه
بس هذا حقير جاب جماعه وداروا كلهم عليه خطيه اذوا
ليش مخابرتونه
واني ادري اديه كامت ترجف
لو اموت بعد مااطلع بالليل
احنه شطلعنه ولج
وحتى عيب منهم هسه يكولون علينه ساقطات وتايهات بالليل يفترن بوحدهن
لج اسكتي خل نشوف شلون تصفه
اكول لوحدنه وذوله يتحارشون بينه جان شسوينه
والله ماادري
لحضات واجوي
كالوا امشن
هذا الخبل حجه اشعل ابهاتجن اذا طلعتن بالليل بوحدجن
ردت احجي بس ديما لزمت ايدي عود اسكتي
سكتنه محجينه شي
ديما تبجي خطيه وترجف
التفت عليها الولد
شبيج تبجين اذوج
اشرت براسها لا
كال خل نكعد هنا لحضات ونكوم
صدك كعدنه
سالت الولد كتله شصار
كال اجت الشرطه بس انهزموا
ووين نعرفهم ومهما يكون احنه ضيوف عدهم اكيد القانون وياهم
بس الحمد لله فوخت كلبي وي هذا العار
بس بعدين التموا عليه جبناء
الحمد لله ع السلامه
هاي بعدهي تبجي
اسفه من ورايه هيج صار بيك
اي بهاي انت صدكتي
اكو بنات مربايات مثلجن يطلعن بالليل بوحدهن
هاي اني لو ما يمج الله العالم شسووا بيجن
ذوله مكبسلين ميدرون بارواحهم
يابه لطلعن بعد رحمه للحسين
اسلوبه حلو عود مثل هذا الخبل
غسلوا وارتاحوا وكالوا يله
كتلها وين الاقلام
شوف هاي البطرانه يااقلام بابا
انعل ابوهن لا ابو خيرهن هنه من وراهن هيج صار بيه
بس حرامات والله
اذا ع فلوسهن اني انطيج بس لاتبجين حجاها هذا الغثه
حجه الولد الحباب
اني اسويلجن بمشهد ان شاء الله
خل يولن كلهن شمرتهن والله
بس عفيه بعد لطلعن بوحدجن
التفت لديما
هاج رقمي اذا احتاجيتي شي اني بالخدمه
لا شكرا ميحتاج
لعد انطيني رقمج خل اطمان عليج راح ابقى قلق ع جروحج الي سببتهن الج
عرفته بسمرها هي ضحكت
ودارت وجهه جر ايدت وخله الرقم
كاله عليج الله اخذي
اخذته ووصلنه للفندق
التفتت كتلها لج ديما علاكه الاحجبه وين
كالت عندج
وين عندي غير بايدج
حرامات ضاعت
كالت خل نرجع نشوفها بلكي نلكيها
اشو ذوله اثنينهم طفروا جنهم مخابيل
انعل ابو العلاكه لا ابو الشالات
امشن واسكتن
كالت يله عود نكعد من الصبح نشتري قبل لنروح
دخلنه للفندق وجان هادئ
اكيد الكل نايم
صعدنه للغرفه
ساعه نضحك ع الموقف ساعه نضوج
سبحنه واجينه بفراشنه
هي تكلي تعاي سولفيلي واني اكلها تعاي سولفيلي
كتلها انت اول
لا والله انت اول
تصرفاته مالت واحد يعرفج ومن زمان
الله عليج اكولج بس متحجين لاي بشر
تحجين صدك من يمته واني احجي اسرارنه
لج هذا اخو صديقتي شهد
عزه بس لا هو نفسه الي تعارك ويا عمار
اي هو نفسه
عزه لج شغلتج معقده
شنو يحبج تحبينه
لا والله لا يحبني ولا احبه
بس صدفه شفته هنا وهو عرفني
بالبدايه معرفته لمن سالته هوكلي
اخذتني الغيره عليج
لج اروح فدوه للغيره العراقيه
فديتهم اثنينهم
لج والله من شفته شلون يحجي وياج كلت لو هذا الرجال لو مينراد
دسكتي وانجبي رجال
هذا يارجال متكليلي يتحكم بيه عبالك يعرفني من سنين
يله تعاي سولفيلي انت بعد
لج شسولف
لو هذا الرجال لو لا
اول مامشينه من يمكم
قبل لتسولفين شلون تعوفيني وترحين
لج اني من شفت هذا الولد الصاك ويني ووينج بعد
حتى فصلت بعد مااعرف شتحجين
ايا خبيثه كملي
لج رزن وثكيل عود وهو والخبل صاحبه سويه
اروح فدوه اله
كلي عوفيهم خلي ياخذون راحتهم
كال خلي ناكل موطا
كتله لا مااريد
عود ليش مااكلتي
غير استحي ولج
اها كملي
اخذلي عصير وهو هم اخذ
كال خل نفتر شويه قبل لنروح للمحل
سكتت هو اكيد راح يفهم موافقتي
لج ثوله غير ترفضين
وليش عود ارفض
حتى ميكول هاي خفيفه البنيه المهم كملي
بقينه نفتر بس منحجي
كال ممكن اعرف اسمج
كتله ديما
علشت الاسامي
اني احمد
بيا صف ديما
اني بالجامعه نجحت مرحله ثانيه
شنو قسمج
تربيه قسم انكلش
حلوو قسم الانكلش
اي اني قويه بي
اني خريج كلية تربيه قسم رياضيات
اني بالرياضيات توب
هاي البنيه صديقتج
منو
هاي الوياج حتى اسمها مااعرفه
روان بنت عمتي
بس صديقك ليش هيج يحجي وياها
والله اني هم مثلج متعجب واتفاجأت بي
لج شايفه من يحجي ويايه
بهدوء وادب
بس فجأه صعدت الغيره العراقيه
اروح فدوه للغيره العراقيه
عبالك اقربله واتخبل من شافهم يتحارشون بيه
بس اني متت خوف ومحمد من شفته اذه الولد
وهذا من جاب جماعته وهدوا عليه
متت بعد اكثر لج خطيه من ورايه اتاذه
بعدين كامت تضحك
لج شايفه من انطاني رقمه ورفضته ضجت
كلت عيب منه اتشكر منه اطمان عليه
يمه الزحف يمه
لج اثكلي شبيج
اتعززي شويه
ذبحتي نفسج
لج هذا ابن الرافدين ابو الغيره
غير ماصدكت من حجه ويايه
زين شنو سالفة خدج الاحمر
غير هذا الحقير ضربني
كولي والله
اي والله
ليش
اتجاوزت وغلطت عليه
يله نامي ورانه كعده
لج حرامات الشالات والجواريب والمعاصم
اي والله
بس نحجي كدام مامياتنه يلعبن طوبه
كالت ديما خل نكول مارحنه
اي هم هيج احسن
روان ..نسيت الرقم الي اخذه
ردت انام
اجاني اشعار
هلووو
مجاوبت
كاعده
هم مجاوبت
اقره بس اغلس
جاوبي لتبقين ساكته
طفيت الشبكه وخليت الجهاز صامت ونمت
كعدنه متاخرين لكيت الساعه ب12
كعدت مثل المخبله
لج ديما اكعدي
راح وكتنه
كعدنه بسرعه للحمام غسلنه وطلعنه
بدلنه لكينه اهلنا حاركين الموبايلات علينه
خابرت ماما ورزلتني رزاله ناشفه
وديما همين
وين لهسه نايمات الكل متجمع بالصاله مالت الفندق
متوقفين عليجن
فتحت الشبكه وجانن الرسائل وحده وره اللخ
مهتميت لان مستعجلين
اتوضينه حتى نصلي بالطريق
خليت ميك اب خفيف وجنطنه جاهزات
رتبنه الغرفه
نزلنه كالت ديما كون مننسه الفلوس الي بالقاصه
نزلنه ولكينه الكل متجمع
متوقفين علينه صدك
الانضار كلها اتجاهنا
كالت ديما لج صايرين شخصيات مهمه ومندري بنفسنه
خالو كام يحجي وين صرتن الحمله كلها منتظره
ليش مدكيتوا الباب علينه
لج ياندك هو الفندق كله سمع الدك اله انتن
بعدين كالوا يله خل ننطلق
لبست نضاراتي الشمسيه
الجو هم حار بقم بس مو مثل العراق
اكو عيون تراقبنه
كالوا هنا انتظروا
اجت ام الحمله كالت هذا مصلى الي يحب يصلي بس ع السريع
فعلا رحنه صلينه وكملنه ورجعنه لنفس المكان
اخو شهد حسيت بي يريد ينفجر ويباوعلي من فوك لجوه
احسه نار صاير
اباوع لصديقه عينه ع ديما ويبتسم
عود مثل هذا الغثه بس يخزر بيه عابت اله
لحضات واجتي السياره
صعدنه واخذونه للكراج
كاعد تجيني رسائل بس ابد مافتحته للجهاز
وصلنه للكراج وبقينه ننتظر شويه
بعدين كلت لديما لج احنه بدون اكل واني جوعانه
كالت حتى اني
خل نكل لبابا يجيبلنه بسكت وعصير
رحنه كنالهم كال خالوا جبنه ويانه خل نستقر بالسياره وننطيجن
شويه وصاحونه
اجتي السياره
صعدنه بيها بس هالمره الكعده عشوائي
المقاعد المقابيلنه كاعدين بيها اخو شهد وصديقه
وراهم هم شباب 2
والكدامنه خالو وخاله ومقابيلهم ماما وبابا
استقرينا بالكعده
كالوا الي يريد ينزل يشتري مي وعصير خل ينزل شويه يله ننطلق
نزل بابا وخالوا
حتى همه الولد نزلوا
وره شويه رجعوا الكل
انطلقت السياره
اني بصف الجامه وديما بصفي
انطونه عصير بارد وبسكت
كعدنه ناكل والموبايل ابد مسكت
عفته لمن كملت اكل
بعدين فتحته
وجانن رسائل متنعد ابد منه
بالليل دازبسيطه لتجاوبين
وره شويه كاتب ليش سادتها الشبكه
للصبح داز صباح الخير
كاعده
الله عليج لتلبسين ضيك ابد
لج كافي نوم اكعدي
راح الوكت
اكعدي لج تنبل نوم
هواي داز
بعدين واحنه بالفندق من نزلنه
بسيطه اني اعلمج ع عنادج
ليش تلبسين ضيك
والله اله اخليها تتراوالج بعد متلبسين ضيك ابد
ليش تتعمدين تعرضين نفسج للولد
وانت تدرين بنفسج مستحيل تتزوجين غيري
ليش تخليني اذكرج شصار بذاك اليوم
الافضل الج لتسوين هاي السالفه
ادري بيج بعنادي هيج تسوين
بس بسيطه الج
سديته الجهاز
وره شويه دزلي
كلي لديما خل تراسل احمد خطيه منتظرها
هاي بالجذب متشكرت منه ولا اطمأنت عليه
البارحه جان راح الولد من وراجن
شنو عيني اذا هو يريد يصير فاندام كدام ديما
احنه شنو بي
هي اشتكت وكالتله تعال ساعدني
لا عيني بس هاي غيره عراقيه انت شمعرفج بيها
لا اني بالغيره العراقيه اعرفها كلش زين ماكو داعي تكولي
هذا ابن الرافدين كلشي يتوقع منه خاصتا من يغدر بنيه لاحول ولا قوه الها
يضحك عليها هو واخته الحقيره
شلون يغتصبها وهي بنص بيته وهي ضيفه عدهم
اهنا الغيره فول تصعد عنده
هاي بحث اخر وهي هم اصلا من الغيره الزايده هيج يسوي
بس قبل كلشي شهد ماالها علاقه بيه وربج
ماتدري بيه ابد
مااكدر هنا اكتب التفاصيل من نوصل بسلامه
نتواعد اني وياج واحمد وديما واشرحلج كلشي
لا شكرا مااريد تشرحلي ابد
ولا تفكر بعد تضياقني لو تحاول تحجي ويايه
هسه انت اشفتي من المضايقه بس اصبريلي
بس خل يكون بعلمج اني مااقبل هيج تلبسين
من هسه اكلج بس نتزوج تلبسين عبايه
ممنوع تلبسين هيج واطلعين
دزيتله 😡😡😡
اول شي مااتزوجك لو تموت
وثاني شي مو بكيفك البس العبايه
اتزوجج وغصبا ماعليج ع مود تنسترين
ماكو داعي كل شويه واذكرج بلي صار
دزيتله عليك الله امسح الرسائل
لا احد يقراهن
اول شي اني مو ناقص غيره واخلي غيري يقره رسائل زوجتي المستقبليه
وثاني شي الله عليج انطيني فرصه اصحح غلطي
سكتت
اني امسح اول باول
اخاف ديما تقراهن
اباوع ع ديما نايمه بسابع نومه
ماما وبابا همين
اني بقيت اباوع ع المناظر
اتذكرت من خابرته وكلي اتزوجت
شلون بعد يريد يتزوجني
خل يولي ماافكر تفكير بي
هم نذل وهم حقير وهم من اشباه الرجال
لو بي حظ مغتصبني
بعد ماانطي مجال ابد
خل يولي
وصلنه استراحه نزلنه للمغاسل اتوضينه وصلينه المغرب والعشاء
بعدها دخلنه للمطعم
اني جنت حيل جوعانه لان مماكله بس البسكت
هذا كاعد مقابيلي
حتى مااكدر اكل ارتبكت
اكلت قليل لان عيونه تراقبني
كالت ديما خل نغسل ونروح نشتري من المحلات اليم المطعم
رحنه واكو بنات همين راحن ويانه
بس مبينات مو راحه ابد
باللحضه اجاني مسج
لتمشن وي ذني الحبابات
مااكدر اكلهن لاترحن ويانه عيب
ولا اكدر ابتعد عنهن
رحنه اشترينا
عدهم بوشار طعم يجنن بجميع النكهات بالعسل وبالتوفي وبالكراميل
اخذنه منهن واخذنه جبس
وعصائر وديما اخذت شكولاته
اني بعد مااكلهن ابد اخاف اسمن 🙈 مااريد ارجع روان السمينه
اجوي المزعجين ورانه
اخذ عصير بالرمان فتحه
اشو هذا ذبه ع قميصي متقصد
سوه نفسه ميدري
اني طفرت لان جان بارد حيل عباره عن ثلج
صحت صوت لا ارادي
الكل باوع عليه
كال اسف بالغلط وكع مني
اباوع ع قميصي تلف كله واحس بنفسي ثلجت كمت ارجف من البرد
لان العصير بارد ثلج والجو بارد
جو ايران بالنهار حار وبالليل حيل بارد خاصتا بالطريق
مكدرت انطق ولا حرف اخاف احد يحس بيه
بس الصراحه صرت اعصاب
حيل ضجت اني متاكده اله قصد بس شنو مااعرف
المشكله قميصي اوف وايت يعني انفضحت
كلت لديما امشي خل نروح احاجي ام الحمله بلكي تكل للسايق يطلع جنطتي حتى اطلع ملابس وابدل
احس بنفسي صرت قالب ثلج كمت ارجف
اجتي ام الحمله كالتلها ديما
كالت للسايق وفتح الصندوق مالت السياره
انشلع كلبنه اجه بابا وخالو ويا السواق همه اثنين
كوه لكيت جنطتي
طلعت ملابس الي
اجاني اشعار
هذا درس الج حتى متلبسين ضيك بعد ومتعانديني
مره لخ وربج امزكهن عليج وافشلج كدام الكل
ملابسي كلهن هيج والله مو كصيف ومبارز جسمي لان حيل ضعيفه
بس هو مخبل علني
خل يولي اله اعاند وماالبس عريض لو يموت
رحت وي ديما للحمامات
نزعتهن وسبحت وجان المي ثلج مو طبيعي وكمت ابجي والله هم من البرد وهم من الخجل
الكل يباوع عليه ومااعرف شيكولون
لبست هيج 👇بعناده
  
 اوووه! هذه الصورة لا تتبع إرشادات المحتوى الخاصة بنا. لمتابعة النشر ، يرجى إزالته أو تحميل صورة أخرى.
بس طلعت صار كبالي حيل حقدت علي وضجت منه
مسحت عيوني
القميص غسلته ومفاد بي مراح اللون
عفته بالحمامات وحيل ضجت
كام يباوعلي من فوك لجوه
ولا اهتميتله
صعدت بالسياره كبل
الناس قسم بالسياره وقسم لا بعدهم
كعدت اني واستقريت
الدمعه بطرف عيني يمكن اقل حجايه ابجي
مرتضى : استفزتني هواي هاي البنيه
وخلتني اطلع من طوري
اخذت جهازها وجبرتها اخذت رقمها الايراني وخطها اسيا
سجلتهن يمي وحتى صفحتها اخذتها
جبرتني ضربتها مرتين
بس من شفتها تبجي اتخبلت
ردت اهدئها فرينه شويه بس هي بغير عالم
اخر شي رحنه لاحمد وبنت خالها
اتخبلت من شفت احمد
ملعوب بي طوبه
خطيه دايرين عليه العجمين كلهم
بس شاردين معرفت السبب بعدين فهمني
متحارش الولد بديما وهو متخبل
طبعا احنه الصراحه الغيره عدنه فول تصعد من نشوف واحد يتحارش ببنيه
والله بالنسبه الي بعمري وحياتي ممتحارش ببنيه
بس مريم الله يرحمها حبيتها حب صادق
وهاي البنيه اخت عمار
جنت معمي ع وجهي من هيج سويت
المهم كعدنه شويه حتى يرتاحون
هاي خطيه بس تبجي بنت خالها
وهذا مدمى وملابسه مشككات
رجعنه وطلعت ضايعه علاليكهن بس مو مهم بطرانات يردن يرجعن يدورن عليهن ولا بعينهن العركه ابد
رجعنه ولكينه جماعتنه نايمين بسابع نومه
سبحنه وبقينه نسولف اني واحمد
كلي وين تعرفها روان
اني اسمها ممركز بي ابد
منو روان
هاي البنيه بنت عمته ديما
لاتكلي صدفه هنا شفتها وهيج حميت ع البنيه
لا لك اعرفها من زمان
كعد ع حيله والقران عرفتك
وين تعرفها وليش ماادري بيها
لك مو الي ابالك
هاي اخت عمار الي تعاركت ويا وكسر محلي
لا بربك
اي وربي
وين تعرفها
جانت صديقة اختي وعلاقتهن قويه
زين اذا اخت عدوك
ليش هيج ذابح نفسك عليها
لك كلبي كام يدك من جديد
اي بعد اخوك كلبك جبير ويتحمل يوميه وحده جديده
لك مرتك بعدهي مدايره سنتها وانت ادور حب
كلت بكلبي لو تدري شمسوي بيها
اني متاكد متباوع بوجهي بعد
بس مضطر اكله احبها
بس الحقيقه كلبي قافل ع مريم الله يرحمها
بس مجبور اتزوجها لان غلطان وياها ولازم اصحح غلطي
خطيه ماالها ذنب اني المذنب وياها
كتله تعال سولفلي عليك انت وديما
لك البنيه دخلت كلبي كبل عجبتني حيل
حبابه وثكيله حيل
شكد حاولت اخذ رقمها ومنطتنيا
لك هاي احسن بهواي من هاي الخبله العندي
هاي انطيها بس عناد
لا حبيبتي هادئه ومطيعه
هله هله من شوكت حبيبتك
من اول ماشفتها هذا 👈❤️ دك
اتمنى تخابرني بس اني متاكد متسويها
الله كريم
لك بعد منفوت حالهن وراهن وراهن لمن نرجع للعراق ان شاء الله ناهين كلشي وياهن موكعيهن لا محال
ان شاء الله
بعدها نام احمد
اني بقيت اراسلها
بس المشكله تقره ومتجاوب
بالاخير قفلت الشبكه
ماكدرت اخابر لان الكل نايم
اني اعلمها ع عنادها
مبينه عنوديه بشكل ومتاكد راح اتعب وياها
ومدللا عند اهلها
واضح عليها
اني لبسها ميعجبني ابد
هاي اول مااخطبها البسها عبايه
الصبح هم راسلت وماكو
اتريكنه وجهزنه جنطنه
وصار الموعد ونزلنه والكل متجمع
اله هنه
ماكو
اني واحمد واحد صافن بوجه الثاني
كتله هسه يطلعن بالسوك يدورن العلاكه الضاعت
احمد ضحك كال والله يسونها مخبلات
كتله لك اني اعلمها ع العناد
وانت عليك ديما
ضحك كال دخلي يعبرنه بالاول
اباوع الحمله كلها متانيه والكل يتذمر ويحجي
ع لحضه واجني ومبينات جانن نايمات
اباوع عيون الكل عليهن
الصراحه روان حيل حلوه ونازكه حيل
بس لبسها معجبني هم ضيك ومفصل جسمها
اني اعلمها ع العناد
فار دمي
اباوع ع الحمله عيونهم عليهن
وخاصه هي
رحنه وسافرنه واني تفكيري كله
بس بلبسها اريد اسوي شي كون اتوب ومتلبس هيج
احسها ملكي وحدي مااحب احد يشوف تفاصيل جسمها غيري
راسلتها واني بالسياره
ممهتمه الي ابد وهذا الشي واضح عليها
حسيتها عينها ع المناظر
طلبت منها تخلي ديما تحجي وي احمد
بس هاي راسها يابس متتقنع بسهوله
ولا حتى حجت وي البنيه
وصلنه لاستراحه
صلينه واتعشينا
شفناهن كامن
اشرت لاحمد كمنه وراهن
راحن للمحل
كلي احمد لك مشن وي ذني البنات المو راحه
راسلتها وكتلها لتمشن وياهن
وهاي ولا كانو مشت وسكتت
اني اعلمج
رحت اشتريت عصير رمان اتعمدت اخذه ع مود لونه
فتحته واجه ابالي اذبه ع ملابسها حتى متعاند بعد
بس العصير جان بارد حيل ممنتبه لهاي السالفه جنت
هي صرخت والكل وجه نظره عليها
كتلها العفو بالغلط
احمد يباوع عليه وصافن
هي مشت بدون صوت
بقيت اراقبها
راحوا نزلوا جنطتها
طلعت ملابس
راحت للحمامات
احمد كام يحجي عليه
لك خطيه ليش هيج سويت بيها
هم فشلتها كدام البنات وهم بارده عليها
حيل وياها حتى بعد متعاند وتلبس عريض
اكلك لبسها عادي والله اصلا عريض
شوف البنات ذنيج شلابسات
معليه بيهن
عليه بيها وبس
دزيتلها مسج كتلها هاي كرصة اذن الج
بقيت انتظرها لمن طلعت
هم لبسها معجبني
كال احمد اكلك البنيه هذا لبسها هيج واحتمال الجنطه كلها هيج لبسها
يعني منين تجيب غيرهن
سكتت
دزيتله وكتلها هذا درس بسيط حتى متعاندين
صعدت للسياره
وجانوا ناس قليلين
حسيتها بغير عالم حيل ضاجت
نزلت ديما للمحل
كللها احمد رايحه للمحل
كلتله اي
انطاها فلوس كللها
جيبيلي وياج قوطيه ببسي
كالت اني اجيبلك وياي رفضت تاخذ الفلوس
هو يريد بس يحجي وياها
نزلت وهو راح وراها
الضوه خافت وناس قله بالسياره
خلت راسها ع الكشن ومغطيه عيونها باديها
دزيتلها
الوووو
لا بحال الموبايل ولا بحال المراسله
التفتت يسره يمنه
ماكو احد قريب
اكو بس بعد شكم كرسي
والاخير جايين
حجيت وياها بصوت همس
روان ...... روان ......
ماكو اي صوت مسويه نفسها نايمه
ادري بيج كاعده
احجي ويايه خل نتفاهم
ولا كانو
كعدت بصفها
هي طفرت بساع
كوم لا يجون اهلي
لعد جاوبي واني اكوم
ميخالف بس كوم
رجعت لمكاني
دزيتلها شبيج
مبيه شي
اسف مجان قصدي هيج اسوي بس انت جبرتيني
اتخبل اذا اشوفج بملابس مو لائقه
بس اني ذني ملابسي من يومي وساعتي
وملابسي هيجي كلهن تقريبا
يعني منين اجيب عريض هسه
واعديني وعد من نرجع للعراق مراح تلبسين هيج
اواعدك مو بس لبسي عريض
حتى من الباب بعد مااطلع ولا اشوفك ولا تشوفني
ارجع مثل قبل
تحجين صدك
مو روحي طلعت يله شفتج
صارلي 3 سنوات مخليت وسيله تعتب عليه حتى اشوفج وماكو
وبالتالي مصدكت من شفتج
تردين بكل سهوله تختفين
بس ارجع اخطبج وافضها
منو كلك اني اوافق
الافضل الك متفشل نفسك
بابا ميوافق واذا وافق ماما اكيد ترفض
واذا ماما قبلت اكيد عمار يتخبل ومايقبل لو ع كص ركبته
وحتى اذا نفرض عمار يوافق اني ارفض
الافضل الك تكعد وتسكت
لج شاكعد شاسكت
غير اعمل المستحيل واخلي اهلج يوافقون
وانت امرج بسيط اني اعرف شلون اخليج توافقين
شنو نسيت الي سويته بعمار
مو اجاكم وخطب اختك ليش موافقت
فوكاها خليته بالسجن وذليت اهلي كلهم ع مود يطلع من السجن
ومكفاك هذا الشي
رحت اغتصبتني ابنص بيتك
كل هذا ومكفاك
جاي هسه تريد تشوه سمعتي
لج منو الي يشوه سمعتج
ناقص غيره الي يسويها
لج والله اقرب صديق الي احمد
مايعرف كلشي عنج والرضا
مستحيل اشوه سمعتج
انت عرضي زوجتي المستقبليه شلون اشوه سمعتج
بدت الناس تصعد حتى اهلها
اجتي ديما
سمعتها تكلها خليني بصف الجامه
دخلت ديما يم الجامه
وهي كعدت بالجها الثانيه
اجه احمد ووجها يضحك
كال خليني بصف الجامه
شنو متفقين علينه انتو
يكولي شنو ماخذين طابو انتوا يم الجامه
لايابه مو طابوا
تعال اكعد واسكت
كملوا الناس واتحركت السياره
الاضويه مالت السياره خافته والتبريد مفتوح
بس السياره بارده
كامت تعطس اعتقد تمرضت من ورايه
كامت يم امها وابوها
الي همه كدامي بالضبط
كلت لامها بردانه حيل
كال ابوها تعاي خل اطفي التبريد الي يمج
انطتها امها شرشف
غطت نفسها
ابوها حاول يسده بس معرفله
كتله وخر عمي عني اني اسده
طفيته ورجعت لمكاني
استمرت بالعطس
كل شويه واجاها ابوها
ويتلمس حرارتها
كلي عمي ماعدكم براسيتول او فلا أوت
لاوالله عمي مجايبين علاج
كال يابه بدون زحمه عليكم اكو احد عنده علاج انفلاونزا
اكو مريه كالت هاي عندي
راح جابهن وانطاهيا
بلعتهن وكالت لابوها راح انام
يله بابا نامي
احمد كام يحجي عليه
لك اكو عاقل يسوي سوايتك
خطيه البنيه ليش هيج سويت بيها
عود ردت اتوبها من العناد
هو منو يكول معانده
البنيه هذا لبسها مبين عليها
قابل تدري بيك راح تحاسبها لو مترضه وهيج تلبس
كتله مو هسه هاي بنت خالها وياها
شوف لبسها شلون مستور
لك والله هاي توهمات
نفس اللبس ونفس الستايل
بس انت يتصورلك هيج شي
تعال سولفلي شصار وي الكلب
لك غيرتموت شنو الادب وشنو الاخلاق
رحت للمحل وراها
ولكيتها تريد تشتريلي
وبالتالي اني اشتريتلها
مقبلت ادفع
بعدين دفعت غصبا ماعليها
كتله ليش مخابرتيني
كالت ها ضاع رقمك
سحبت فونها
كتلها افتحي الرمز
فتحته
وبسرعه سجلت رقمها الاسيا وثبته عندي
كالت ليش هيج صديقك يسوي بروان
خطيه حيل ضاجت وبس تبجي
احسه يتعمد ياذيها
اي بالله وشجاوبتها انت
كتلها هذا خبل يتصرف مو بوعيه اعذروا يابه وامسحوها بوجهي
كول والله
اي والله
الله يطيح حضك اذا صدك
سويتني مخبل
لك اكو واحد هيج يسوي
اضبط اعصابك واضبط نفسك كدام الناس
احسب حساب لهاي الناس
اي فعلا اني زودتها وياها
بدت الناس تنام احمد مدنك ع الجهاز
يجوز يتراسل هو وديما
اني بالي يم روان خطيه
اباوع عليها نايمه
اني هم نمت
كعدونه كالو وصلنه للقدم مالت الامام ع
وجان الوكت كاشف يعني الصبح صاير
نزلنه
اباوع ع روان مبين المرض عليها
وعيونها ذبلانه
الجو بارد حيل هنا
والمسافه شويه بعيده
اني واحمد وراهم
زرنه وصلينه وطكينه صور لان المنظر هنا يخبل
رجعنه اكو محلات يسوون ريوك
لكيت كل الحمله يتريكون يمهم
عيوني ادور ع روان
كعدنه تريكنه وشربنه حليب مالت بقر كلش طيب
اهل المطعم عراقيين جانو
جانو امها لروان وابوها وخالها وزوجته كاعدين يتريكون
كملنه ورحنه للسياره
الاغلبيه بعدهم يتريكون
بس روان ماكو وديما همين
ياربي وين ذني
احمد ذني وين راحن والله ماادري
نزلت اريد اشوفها
دكيت ع خطها الايراني
سمعته يدك قريب
طلع بالجنطه مالتها وبالسياره باقيه
التفتت للجها الثانيه مالت السياره
جان اشوف وانصدم ........ اتخبلت من المنظر ........
توقعاتكم حبايبي شنو الي شافه مرتضى ؟؟؟؟
شنو الي صدمه ؟؟؟؟؟
راح تتطور علاقه مرتضى بروان لو لا ؟؟؟؟؟
#الندم_مابعد_الخطيئه -
#البارت الثامن -
#Hghh53
مساء الخير ع اجمل متابعين اتمنى لكم قراءه ممتعه
❣️❣️البارت 8❣️❣️
❣️❣️الندم ما بعد الخطيئه ❣️❣️
❣️❣️للكاتبه رونق❣️❣️
شفت روان كاعده بالكاع وتتقيئ الوجه مينوصف
حيل ضجت وروحي طلعت
جبت مي من السياره
سالني احمد لكيتهن
اي ذني يم السياره
انطيت المي لديما
غسلتلها وشربتها مي
بقن شويه واجن صعدن
الناس اتجمعت
هي خلت اديها ع عيونها ونامت
كتله لاحمد راسل ديما واسالها ع روان
فعلا راسلها
كلي حيل متخربطه وحرارتها مرتفعه ويمكن بلاعيمها ملتهبات
هسه انت عفت كلشي ملكيت غير العصير البارد
بس ممعقوله العصير هيج يسوي
خل اسالها
لحضات وكال
لك سابحه بمي بارد والعصير بارد حيل
مو اكول ممعقوله من العصير هيج تتخربط
بس هم من وراك
العصير دمرها ودمر ملابسها ممعقوله تبقى هيج بدون غسل
عود ردت اتوبها هسه هي التوبتني
بعد ماعليه بيها
الطريق كله هي نايمه
وصلنه للكراج
بعدها صعدنه بمنشاه ثانيه دزونه للفندق
وصلنه تقريبا ب10 الصبح
بقينه منتظرين بالاستراحه مالت الفندق
لان موعد تفريغ الغرف ب12
اباوع عليها حيل متخربطه
اخذها ابوها وطلع هو وابو الحمله
بقينه منتظرين
هواي عوائل دزوهم للغرف
احنه الشباب خلونه بطابق بوحدنه
كملوا توزيع الغرف
وهي ماكو
صعدنه لغرفتنه وسبحنه واستقرينه
اني بالي يمها
راسلتها
رجعتي لوبعدج
بس ترجعين طمنيني عليج بالي يمج
مراح انام لمن ترجعين
اذن صليت وكملت
اباوع للجماعه رايحين بسابع نومه
بقيت قلق
وين صرتو لهسه راسلتها
طلعت مرئي بس ماكو جواب
فدوه بس طمنيني نعست حيل واريد انام
هم مرئي وماكو جواب
اخر شي تعبت واايست نمت
كعدوني الولد كوه جايبين غده من بره
كبل عيني ع الجهاز ملكيت اي شي منها
اتغدينه وكملنه وبدلنه
كالوا نروح نزور
كلت لاحمد راسل ديما خل اطمنه ع روان
ابد متقبل تجاوب
راسلها
كال تكول زينه مشكليلها كانيولا وضاربيها ابر
ومنطيها علاج
حيل انقهرت عليها
ذوله سبونه يله ويلا
انطونه كارت الفندق خاف نتيه
رحنه زرنه
صدك لو كالو انيس النفوس
جانت زيارته غير تخبل وتحس براحه نفسيه موطبيعيه من تدخل للصحن
بي سبع صحون
اول شي سوينا زرنه وجانت الزياره ثكيله بشكل
ازدحام بشكل
كملنه وصلينه المغرب بعدها
كمنه نفتر بالامام بعدها بقينه كاعدين فتره
بعدها رحنه اتعشينه بالمطعم
ورجعنه للفندق
بدلنه لبسنه تراكات اريح
انطرحت بفراشي وراسلت اهلي
وصتني شهد ع شكم شغله
كتلها ع باجر ان شاء الله
بعدها راسلت روان
الووو
ماكو جواب
شلون صرتي
هم ماكو جواب
دزيت رساله لاحمد كتله خل ننزل بالاستراحه مالت الفندق
كال يله
سالونه الولد
كنالهم جوه نكعد شويه
كالوا راح انام اخذوا المفتاح وياكم
نزلنه
كتله راسل ديما خل نطمأن ع روان
مامستقر ابد ولا مرتاح والله
حتى نوم مااكدر انام
كال هسه
راسلها
كال صارت زينه
بس ابد مطلعن
كتله كللها مدام زينه خل ينزلن ويرحن يزورن لو يفترن بالمحلات
راسلها
كلتله اهلنه راحوا يزورون
بس احنه بقينه هنا ماقبلت روان تروح
كتله اسالهن متعشيات
كال لا بعدهن
خل تقنعها بس ينزلن يتعشن ونفتر هنا قريب ع الفندق
كتله فدوه احمد لخاطري خل تقنعها شلون مجان
رفضن ينزلن
بقينه كاعدين
وره فتره ونزلن اثنينهن
حيل فرحت من شفتها
بس احنه بقينه صافنين اني واحمد
كتله مو كالن مانطلع
مااعرف والله
شافنه ورادن يرجعن الظاهر هم نصدمن من شافنه
بسرعه سحبتها
وين تردين ترجعين
مااسويلج شي والله بس امشي
منطقت ولا حرف ويايه
التفتت ع ديما
انت مو كلتي مانروح لامطعم ولا غيره
اشرت ع روان افتهمت
يعني هي كايلتلها
يله ديما خل نرجع
لاوين نرجع خل نضرب الابره ونرجع
وين تضربنها
يم هاي صيدليه
احمد سال ديما هم تعشيتن
لا بعدنه
عود هسه كلنه نضرب الابره ونتعشه
بس ميجوز الابره قبل الاكل
امشن يله منا
انت وين تريد
خلينه نروح بوحدنه
لعد مااخذتي عبره من ذاك اليوم
سكتت
روان والنبي اكره العناد واضوج من اليعاند
امشي واسكتي
كلت لاحمد خل نبدل ونرجع
كلي لا يمعود مبيهن شي تراكاتنه
ع مانبدل نلكيهن رايحات
ها هم صدك يله
طلعن قبلنه واحنه وراهن
كتله المطعم الاكلنه بي طيب حيل اكلهم
خل نروح اله
كالن مانرتاح بالمطعم نريد من نرجع ناكل
بس موزين تضربين الابره
مشيت بصفها
شلون صرتي
محجت شي ومطنشتني
وصلنه للمطعم
طلبنه الهن وجبتين دجاج
الطعم رهيب مو شوي يمكن گلي وبيها نكها حيل عجبتنه ووياها فنكر
كال احمد اطلبنه بيتزا وياهن
خل ناكل ع الواهس
لك شتاكل بعد
مصار ساعه من اكلت
كال عيب منهن بس نباوع
عيب منهن لو ع مود كرشك
الصراحه ع مود الاثنين 😂😂😂
كتله خل ننتظرهن بالباب وخل ياخذن راحتهن
تمام
دفعنه الحساب وطلبنه بعد ببسي وبيتزا
كنالهن راح ننتظر بالباب
شويه وديما راسلت احمد كلتله تعالوا ادخلوا
دخلنه كعدنه يمهن
لكينه شباب كاعدين مقابيلهن
عرفناهن ع مود هذا الشي دزن علينه
كالت ديما اكلو ويانه حرامات راح يبقى
هواي طالبين
اني اخذت قطعة بيتزا
واحمد لا اكل 3 قطع
ضحكت لك انت متشبع
لا مااشبع اكلهن احسن منرجعهن الهم
اني اضوج منهم الايرانين
لان عيونهم زايغه شويه ع العراقيات
حبيت اغير جو شويه واضوجهن بلكي تحجي
لك شنو عيونهم ع العراقيات
شنو مخبلين عايفين العجميات الينگرطن كرط
ويجون ع الجكات شنو شيشوفون منهن
لا لك مرتضى ممقبوله منك ابد
كل هذا الجمال وجكمات
لك وين الجمال اجابهن ع الايرانيات
اشو جمالهن رباني وغمزت لاحمد 😜 يعني خل نغثهن
لك صدك شفت ذني الي بالطريق الخالات رجل ع رجل ويشرب اركيله
اي والله صدك شفتهن وصدك حلوات
ذني صافنات علينه منطقن ولا حرف
اباوع عليهن ينقشن تنقش
لك شوف شلون ياكلن هنه ذني العراقيات عود يتفيكن علينه واحنه مناكل هواي وبالبيت وحدتهن تاكل عبالك مشايفات اكل
انطيهن بس اكل ونوم وموبايل
الله وكيلك كلشي مينفهم منهن
ضحكنه اثنينه
احنه جنه نتشاقه منحجي صدك ابد
بس خوش اشتغلت الغيره
ديما كالت يله كومي روان خل نرجع
يله خل نتحاسب
احمد كال اصبروا خل ناخذ الاكل الزاد ويانه
تحجي صدك ولك
اي والله اني كل شويه اجوع
وحرامات هذا الاكل باقي ع حطته
اشو جنهن عصافير ينقشن تنقش
كتله لك غير مسويات رجيم
اتذكر وحده جانت دبدوبه ويكولون ليل مع نهار تاكل نوتيلا
وكت هسه مسويه رجيم
جانت تشرب مي
غصت بي وكامت تكح
ضحكت كتله وربك احلى دبدوبه شفتها بعمري وحياتي
حسيتها صارت عصبيه زايد
تكومين ترحين لو اعوفج واروح
هاي شبيج متوازيه اصبري خل ناخذ الاكل حتى نروح سويه
شكرا ابقوا هنا انتظرولكم شكم ايرانيه ونسقوا وياهن احسن من عدنه
خوش فكره والله حتى زواج متعه مفكرين نتزوج هنا
بس مو هسه
هسه مهمتنه حراس شخصيين لحضرتجن نوصلجن للفندق ونرجع عود
احمد صار شريف
خاف ع مشاعر ديما
يابه اني ماعليه بيك من هسه لااعرفك ولا تعرفني
اني متعجبني غير العراقيات اروح فدوه الهن ولنزاكتهن
ايا واطي بسرعه قلبت بعدك باولها وتخاف من الحكومه
بعد العرس شتسوي
لك منو العصر النسق وي الايرانيه
انت غير
لا بالله اخاف تزعل
منو الاخذها وراح لللفندق
انت غير
ذني باللحضه طلعن
بعد منشوف دربنه
هذا الخبل احتار بالاكل
رحنه وراهن
وهنه عبالك بيب بيب محد يلحك بيهن
وصلن صيدليه بس عبرنها
لحكت بيهن اني نسيت نفسي بالتراك جاي والله عيب
انتبهت لنفسي
انعل يومجن مخليتن براسنه عقل
جريتها لروان من ايدها
لج شنو شادات محرك سياره ومحد يلحك بيجن
اخر مره تلمسني والقران اراويك شي متتوقعه ولا يعجبك ابد
لعد ارجعي اضربي الابره وروحي
هذا الشي ميخصك
راحن بسرعه للفندق
كال احمد لتضغط عليها ابد خليها تروح
مرتضى زودتها وياهن حيل
اني اعلمها
لك انت شنو حجايه والثانيه وكلت اني اعلمها
مدكلي شخبصتنه شتعلمها قرايه كتابه
مرتضى مع احترامي الك بس اسلوبك مو حلو وي البنيه
انت حير بنفسك ومعليك بيه
صعدنه ونمت كبل
ثاني يوم حر بالنسبه للحمله
هالمره راح اتركه ولا الي علاقه بيها
ثاني يوم رحنه للسوك اني والولد
دزونه ع محل يبيع جلد طبيعي 100%
قمصله وستره وحزام واحذيه ومحفظه
عجبنه القماصل كلش حلوات وجلد طبيعي صدك
بس سعرها فوك الورقه
المحفظه تطلع ب20 دولار بس تخبل
الحذاء سعرها ب40 دولار
الحزام ب15 دولار
يعني اسعارهن شويه غاليه بس توب نوعيتهن
كال احمد اكلكم خل نجيب زوج ام الحمله الايراني
بلكي ينزل وناخذ كلنه منهم
هو هم يحجي عربي وواضح
طلعنه وبقينه نفتر اشترينه شكم حاجه
اذن رحنه للامام قريب علينه
صلينه وزرنه مره ثانيه ورحنه اتغدينه
رجعنه للفندق
لكيناها ام الحمله بالاستراحه
حجينه وياها وكالت اني اروح وياكم
اخذناها ورحنه
تعرف شلون تتعامل وياهم
عصرتهم عصر
اخذتهن النه كلهن بورقه و40 دولار
اني اخذت قمصله قصيره
اتشكرنه منها ورجعت
قريب ع الفندق
اخذت محفظه لمهند واخذتله هم قمصله كلت عيب منه
لابويه اخذتله شحاطه ومحفظه
رجعنه للفندق
رتبتهن بالجنطه الثانيه
قررنه نروح للمدينه المائيه
اني منايم زين
كتلهم راح انام من ترحون كعدوني
نمت ومااعرف شكد وكعدوني
بدلنه واجرنه تكسي عدهم دليل بايدهم
ااشرنالهم عليه. ودزنه
جان يوم ولا بالخيال
تخبل المدينه المائيه
بي مسبح واللعاب مائيه
صدك تونسنه ونسينه الدنيه
اتاخرنه يله رجعنه
سبحنه وقررت انام مااطلع بعد حيل تعبت
كالو نروح نزور ونروح لسوق الرضا
اني رفضت
احمد هم بقه يمي
كتله هم راسلتها ديما
اخاف هم يطلعن بالليل بوحدهن
كال لا شحدها اكسر رجليها
كالت هاي روان قررت ماتطلع اله وي اهلها
بعد احسن
شلون صارت
زينه تكول
شلونها علاقتك بديما
عاديه متنطيني مجال احجي وياها ابد
بس ع كد السؤال ع روان
مافاتحتها
شافاتحها شاكلها احبج مثلا
لا كلها معجب وحاب اتعرف عليج
لا يمعود خلينه هيج شويه شويه امهدلها الطريق
حتى متكول يقشمر عليه
لان مستحيل واحد يحب بهاي السرعه
اني مااريد استعجل واوهدنها ويايه
تدري بيه مو مالت اضحك ع وحده
يعني نيتي صافيه
اذا اصارحها معناها ادز امي تخطبها
اني البنيه عاجبتني مؤدبه وهادئه
بس طلعاتهن بالليل لوحدهن مدخلت عقلي ابد
شلون اهلهن هيج يخلوهن
نفس تفكيري بالضبط
يعني شلون هيج يثقون بيهن والدنيه مو امان
وخاصه احنه ابلد غريب
الواحد يتوقع كلشي يصير
اني ليش كاعد اضغط عليها ومااقبل تطلع روان بالليل
الله كريم تصفى وحدها
يله خل انام باجر ب9 نروح للمزارات
نمنه وكعدنه ع دكت الباب طلعت ام الحمله
كعدنا وجهزنه نفسنا
نزلنه وبلا ريوك ملحكنه
لكين السياره منتظرتنه اباب الفندق
صعدنه وماشفتها لروان
بالاخير صعدوا دائما ماخرات الحمله
مااعرف ليش هالتاخير
وجانت لابسه عبايه تخبل طالعه بيها
رحنه مزارات هواي بقينه للعصر
الغده اخذونه للجبال اكو شلال صناعي بنص الجبل مسوينه
بي حديقه كلش جبيره وحلوه
اكو مطاعم هواي
الكل جاب غده وكعدنه بالحديقه نتغده
بعدها الكل اتفرق يطك صور
هنه لكيناهن بصف الشلال ويطكن كله صور
بعدها دك جهاز ديما
وحجت وفتحت كاميرا
وهاي شاكه حلكها بس تضحك
صرت وراها شفته شاب
سويت نفسي ممنتبه عليه
سمعت تحجي ويا
لك كرار اني اعلمك خل ارجع واشوفك شاسوي
مندمجات اثنينهن ويسولفن ويضحكن
احس نار اشتعلت بصدري
هذا منو وشنو هالميانه ويا
صارت قريبه ع الشلال ورجليها بالمي هي وديما
لك كرار ع عنادك شوفك
هسه انت وين
مااكدر اركز شيجاوبهن ابد
بعدين راحن يم اهلهن
وكلهم حجوا ويا
اطمأنيت شويه
بس هم افور دم
ماالها حق هيج تشاقه وتضحك
طبكنه
اباوع لاحمد هم ضاج
شكو شبيك
شفتهن شلون مطنشاتنه وممعبرتانه ابد
ولا كانوشايفاتنه
خل يولن
هم خل نتجاهلهم
خل نشوف ذنيج البنات الويانه بالحمله
خل نشوف حجه ونحجي وياهن ونضحك
منويكول يضوجن لو يغارن
ذني مبين عليهن خشم يابس
خل نجرب مخسرانين شي
اوك
روان : ضوجني هذا الحقير حيل اسلوبه محلو ابد
صعدت بالسياره واني جسمي يرجف من البرد
متت والله بيومها
هذا خبيث كعد بصفي لو اتخبلت
اخاف يجي بابا ويشوفه وتصير سالفه الها اول ماالها تالي
انجبرت اجاوبه بالموبايل
وهذا من كل عقله يريد يتحكم بيه
وساعه يكول اتزوجج
والله اموت ولا اتزوجه لهذا النذل
خل بس ارجع للعراق اله اخلي يحلم يشوفني
حسيت بنفسي انفلاونزا وصخنت
رحت خبرت ماما كتلها حيل بردت
انطتني شرشف وهم جان خفيف
بابا حاول يطفي التبريد الي ع جهتي
بس مكدر اجه هو وطفاه
بعدها جابلي حبايتين بندول وفلا أوت
بس مفاد كلشي بيه
بقيت فتره ونمت
كعدت لكيت نفسي بردانه برد مو طبيعي
احتاريت شاسوي
ماما نايمه خطيه مااكدر اكعدها
بقيت بس ع اعصابي
وصلنه لاستراحه
كالو قدم الامام هنا
الجو هو بارد حيل هنا لان ديما تكول حيل بردت
واني هم لزمتني النفاضه من صدك روحي طلعت
كرهت الجيه والله
رحنه للمغاسل اغسل وجهي والله عبالك مي من المجمده وكاعد اغسل بي
ديما كالت لج شنو هذا المي ثلج
لعد اني شاكول متت والله
كوه غسلت واتوضيت
زرنه وصليت كوه
دخلوا للبير يجيبون مي
اني وديما كنالهم راح نروح للسياره
كال بابا تعالن اتريكن
اني مااشتهي
ديما روحي وياهم اتريكي
لا مااتريك مااشتهي
رحنه للسياره وحسيتها دافيه مو مثل بره
كعدنه لحضات وحسيت بنفسي راح اتقيئ
نزلت بسرعه وصرت ع صفحه
روحي طلعت اني مماكله البارحه لا ريوك ولا غده والعشه كلش قليل
عود كلنه ناكل بسكت بس اتخربطت بعد
معدتي فارغه واتقيأت حسيت بنفسي متت والله
لحضات واجه الغثه انطه بطل مي لديما
غسلتلي وجهي وارتاحيت وصعدت
ماما اتخبلت كالت خل نوصل ونوديج للدكتور
صعدت بالسيارت ونمت
بالكوه وصلت جنت منتهيه
احس بلاعيمي ملتهبه
كوه ابلع المي
وصلنه للفندق كلي بابا كومي خل اخذج للمستشفى
راح ويانه ابو الحمله
ضربوني ابر وخلولي مغذي
عدهم عنايه حيل بالمريض
وعلاجهم توب مبين عليه
مقبلوا نطلع لمن اسقرت حالتي والحراره صارت زينه يله طلعونه
رجعنه للفندق اتاخرنه بالمستشفى
رحت لغرفتي كبل بدلت وردت انام
وهذا بطران كل شويه يراسلني
طفيت الشبكه ونمت
كعدت لكيت الدنيه ليل
خطيه ديما ابد مطلعت
اتذكرت صلاتي حتى الظهر ممصليه
رحت توضيت وصليت
ولاجني بيه شي شي
حالتي زينه
اكيد علاجهم زين
بس بقن ابرتين لازم اضرب بالليل وحده والصبح هم وحده
كالت ديما لج نسبيت سبايه عليج
كل شويه وسالوا عليج
خل يولي لو يموت بعد لااحجي ويا ولا الي علاقه بي
كالت هذا احمد صديقه احسه يريد حجه حتى يراسلني
لج انت صيري ثكيله مو ممصدكه وبس تشوفينه تنسين الدنيه
اباوع الحلكج الكي الابتسامه متفاركج
شيكول عليج ممصدكه احجي وياها
لج والله لتشوفيني اتشاقه وياج واحجي هيج
بالحقيقه اني جبانه واخجل وماانطي مجال ابد
والله ماعليه بي ابد
لعد بعد مننطيهم مجال ابد
تمام حبي
اجوي بابا وخالو وماما وخاله
كالوا خل ننزل نتعشه ونروح نزور
كتله بابا اني مااكدر اروح تعبانه
لباجر ان شاء الله
لعد راح اجيب عشه الجن وابقن
لا بابا روحوا انتو واحنه نروح وراكم نتعشه واضرب ابرتي بالصيدليه
بابا شلون بالليل بوحدجن واصلا متندلن
مانبتعد والله بس هنا قريب نتعشه ونرجع بسرعه
خالوا هم ماقبل كال ميصير اطلعن بوحدجن ابد
هاي هي منروح ننتظركم لمن تجون ونطلع وياكم
بعدين ماما وخاله كامن يحجن عليهم
خل يرحن شعليهن الناس للصبح كاعده هنا
كالن لا منا ولا منا بس تاكلن وللصيدليه
هذا كارت الفندق اخاف اتيهن
اوك
راحوا
كالت ديما هذا كل شويه ويسال عليج
وطلبوا منه ننزل نتعشه ونفتر شويه
كوليله منروح لاي مكان
وخلي نتاخر شويه يله ننزل
بدلنه وعدلنه نفسنه ونزلنه
قررنه اخر مره نطلع بوحدنه
كتلها خل نجيب اكل هنا ناكل احسن
حتى منتاخر
تمام بس اهم شي اضربي الابره
اوك
نزلنه واتفاجأنه بذوله كبالنه
بقينه اني وديما مترددين
كتلها خل نرجع
بس هذا جرني وكال ماعليه بيج بس امشي
كالت ديما ابرتج مهمه
خل نمشي بس خلي نطنشهم
دزونه ع مطعم قريب ع الفندق
طلبونه اكل وطلعوا بره همزين
اخذنه راحتنه
بس اكو مجموعة شباب حيل ضوجونه
يحجون كله عجمي بس يضحكون وعيونهم علينه
كالت ديما اكلج اخاف ذوله يسونه مشكله
واحمد ومرتضى هم يتعاكون وياهم وتعال يعمي شيلني
راح اخليهم يكعدون يمنه حتى محد يزعجنه
كتلها تمام
فعلا راسلته واجويي
بس شنو غثونه هواي وحيل ضجنه
اخر شي عفناهم وطلعنه
خل يولون عكبنه الصيدليه وهذا سحب ايدي
اتخبلت مااله حق يلمسني
رحت للفندق حتى الابره مضربتها عاندت
رحنه للغرفه اتصلوا بينه اهلنه وكنالهم هنا
بدلنه وكعدنه نسولف
كتلها لو نموت بعد منطلع بوحدنا
الدنيه تخوف واحنه بغربه
وذوله خل يولون ابد منطيهم مجال
تمام
ثاني يوم جان عدنه حر
كعدنه من وقت ورحنه زرنه وبقينه للظهر هناك
بعدها طلعنه اتغدينه وبدت الفره
هواي فرينه بس المشكله ماما وخاله يردن يوكفن ع البهارات وع الصوغات يدورن هاي السوالف
واحنه نريد نفتر ع الملابس
كال خالو تعالن اني اروح وياجن
وهنه يبقى وياهن ابو عمار يقصد بابا
فعلا خالو افتر ويانه لاكال تعبت وا كال كافي
اخذنه هواي اشياء منهم
بقينه لمن اذن يله رجعنه
لكيناهم جاين قبلنه
ارتاحينه وصلينه
جابولنه اكل للفندق
اتعشينا وكملنه
اتوسلنه بماما وخاله نرجع للسوك
اكو يم الفندق محلات كومه
كالن تعبنه
بقينه نلح قبلن
طلعنه واشترينا حلويات كومه
لكينه محل يبيع بقلاوه
الطعم رهيب حتى اطيب من الخاصكي
رجعنه ولكينه ربل مالت قبل
احنه منعرفه بس ماما وخاله علمنه
عجبنه نصعد بي
خطيه ماما وخاله رغم تعبهن محجن
صعدنه وجانت احلى شي بمشهد بعد الزياره
ضحكنه هواي وفرحنه
بعدها رجعنه
ثاني يوم خبرونه نروح مزارات
قررنه انام من وقت
بس العجيب الزوج ماكو خبر عنهم
كلت ديما معقوله عافونه بحالنه
والله مااعرف اني هم هيج كاعد افكر
اليوم ابد مراسلونه
مااعرف
اخر شي نمنه
كعدنه الصبح اليوم قررت البس عبايه لان مزارات
بس من نزلت جوه
كالوا هم نروح مناطق ترفيهيه كلت ارجع ع السريع ابدل واجي
رحنه ع السريع اني وديما بدلنه ونزلنه
لكينه الكل صاعد
ديما كالت لج والله عيب دومنه معطلين الناس
اي والله مره لخ قبل الناس نصعد بالسياره
زرنا وهواي مزارات حتى مااتذكر اسماء
كملنه بعدها ودونه لمكان ترفيهي يجنن
اتغدينه وكملنه وكمنه للشلال
اخذنه هواي صور
خابر كرار ع ديما
فتحت كام وكام يحشش علينه
ولجن وجوهجن وجوه شلال
انتن مالت يودونجن لحديقة الحيوانات يخلوجن وي القروده لان من فصيلتجن
كمنه نكمز ونتوعدله
ضحكنه هواي
سلمنه ع زوجته
بقينه نسولف
حسينه عيون تراقبنه
كمنه نخبث طولنه وي كرار وهو بس يضحكنه
بالاخير دزينا لخاله شويه وطبكه
رجعنه نفتر وصعدنه بالجبل شويه شفناها متعبه نزلنه
وجان نشوف مرتضى واحمد يمشون وي بنات الوي حملتنه
ابد مو راحه ذني
بس المشكله ضحك وسوالف
بقينه صافنين اني وديما
بعدين كتلها خل نمشي
شعلينه بيهم اشو لامواعدينه بشي ولا احنه المنطيهم مجال
مهتمينه الهم ابد
اكو محلات يبيعون عسل وكرزات وقمر الدين بس حيل طيب
رحنه اشترينه بعدها كعدنه يم اهلنا
صار موعد الرجوع
التمينه و رجعنه
خبرونه باجر ياخذونه اماكن ترفيهيه
وصلنه وره الاذان
صلينه وارتاحينه
كال بابا تروحون للمطعم لو نجيب اكل هنا
لا بابا احنه مانطلع جيبلنه هنا
جابولنه واتعشينه
ديما كالت خطيه مانضغط ع ماما وعمه حتى نطلع
خل يرتاحن اليوم تعبن
اي عادي
خل انام همين
خابرت ماما كالت نروح وي الصلاه نزور ترحن ويانه
كتلها اوك بس كعدنه ونروح
بقينه شويه ع الموبايلات ونمنه
كعدنه من وقت ورحنه زرنه وشبعنه زياره ورجعنه
هم رجعنه نمنه لان بعد هواي وقت
وقتنه الموبايل قبل لا انام
كعدنه ع المنبه
جهزنه نفسنه
هالمره الميك اب زودنه شويه لان سفره سياحيه
رحنه ع ماما وخاله ولكيناهن جاهزات
بس بابا وخالو مراحوا يكولون مابينه حيل
نزلنه للاستراحه مالت الفندق والكل متجمع
هالمره حسيت عيون الكل علينه
هواي شباب ويانه
اني لحد الان ممركزه ع احد ابد
الكل يتجمعون سويه احسهم عائله وحده
بس احنه دائما منعزلين
بابا وخالو اندمجوا وي الي بعمرهم
وخاله وماما همين
بس اني وديما معزولين
مهتمينه للكل ابد واتجاهلنه الجميع
حتى مركزنه ع مرتضى واحمد
اجتي السياره وصعدنه
مانعرف وين بالضبط نروح
اول شي اخذونه لقرية جاغرق جانت جميله ولا بالاحلام
خارج العاصمه مشهد
بيها جبال و وديان واشجار وفواكه امثلها بشبه جنه لان حيل حلوه
غدانه صار بيها الجو حيل حلو بيها
حتى اكلهم حيل طيب
بعدها توجهنا لبحيرة جاليدره متقل جمال عن سابقها
بيها تلفريك صعدنه اني وديما وماما وخاله بقن كاعدات
بعدها صعدنه بالبجعه عباره عن عباره صغيره تتسع لشخصين
واكو قوارب تتسع لهواي اشخصاص
بالبدايه صعدنه بالبجعه وجنه احنه نحركها باقدامنه
جانت احلى تجربه تخبل
بعدها كالت ديما خل نصعد بهاي الجبيره
صعدنه وصعدوا ويانه صدفه ولد من حملتنه وبنات همين
اني وديما اخذنه صور كومه وخاصه سلفي
بدوا يحجون ويانه بس ابد مقللوا احترام
احنه هم مطوخناها
بس بوقتها اكو ولد حجه كال اجينه لعام
مثل هيج وقت وي الحمله وصعدنه
بيه ومانحس مالت بينه العباره اكو مره جبيره
ويانه كام تصيح ولكم يمه الحكوني راح اغرك
راح اموت واني بعدني ملشبعت من الدنيا
كلبت الدنيا بالصايح واحنه ضلينه نضحك
ولولد شلون يقلد صدك منضره يضحك
كامت تجيني رسائل بس مهتميت
كلت ماازعج نفسي هسه خل ننزل واشوف منو الراسلني
كملنه ونزلنه وجان نشوف الزوج والوجوه متتفسر
مهتمينه ابد
رجعنه لماما وخاله
اكو محل يبيع موطا رحنه اشترينه
طبعا صادف الهوى حيل حيل عالي
ولان بالجبال يعني التنوره بهذلتني
كلت لديما لو ادري مجان لبستها
عيونه ع الايرانيات
طبعا حيل حلوات ولابسات الحجاب هيج
يعني يخافن من الحكومه لان اعتقد ممنوع
لبسهن مينوصف
الاركيله علني يشربنها
والعراقيين فاهين عليهن
بعدنه 3 اماكن ياخذونه
مااعرف وين و وين
صار وقت التجمع بالسياره
صعدنه واستقرينه وكاعد نكرز كرزات اني وديما
مااحس الى مرتضى بيده قوطية ميرندا
سوه نفسه ممنتبه ومتمسك باعلى المنشاه
اول موصل يمي داره عليه الميرندا من فوك لجوه
يعني وكع ع شعري وتلف ملابسي كلهن
اني هنا عيوني صارن بكصتي
كتله اعمى متشوف
كال اسف اعتذر منتبهت بس شنو حسيت بي يريد ياكلني
مكدرت انطق ولا بحرف
لان عيب من الناس
الكل متجمع واتحركت السياره
اني اتخبلت
قررت لازم ارجع للفندق بس قبل كلشي لازم اخلي يتندم ع السواه بيه
حجيت وي ديما كتلها راح ارجع اني وماما
مااكدر ابقى هيج
كالت حتى اني ارجع
مقبلت ابد كتلها والله ازعل عليج
كالت مو مشكله
ارجع ونطلع وحدنه اني اضوج لوحدي
كتلها بس قبل كلشي لازم نسوي شي اخلي يشتعل شعل
خبيث الغسل اله عود عباله اهتم من هيج يسوي
بس اني اله
بعدين اجتي فكره ابالي تخلي يشتعل ويطفي
رحت لماما وخبرتها كتلها خل نرجع لان مااكدر ابقى هيج
كالت اي ماما خاف تتمرضين مثل ذاك اليوم
خاله هم فرحت كالت خل نرجع احسن
رحت لام الحمله وخبرتها كتلها اقرب مكان خل ينزلنه السايق
كامت تحجي وكالت حرامات وراح اوديكم لاماكن تخبل
كتلها مو مهم لان مااتحمل الميرندا وملابسي كلهن تالفات
كالت اوك
عندج كارت الفندق كتلها اي عندي
رحت لماما كتلها راح اروح لذاك الولد يعرف يحجي ايراني
اخلي ياشرنه سياره ويطلب من السايق يدزنه للفندق
كالت اوك روحي
رحت للولد نفسه الي صعد ويانه بالعباره
وصلت يمه اني حيل مرتبكه وخجلانه
كاعد بالجها الثانيه فرق مقعدين عنه
وجان اكله ........
توقعاتكم حبايبي شنو راح تكوله ؟؟؟؟؟
وشنو راح تكون ردة فعل ردة مرتضى ؟؟؟؟
مساء الخير ع اجمل متابعين اتمنى لكم قراءه ممتعه
❣️❣️#البارت 9❣️❣️
#الندم_مابعد_الخطيئه ❣️❣️
❣️❣️#للكاتبه رونق❣️❣️
وصلت وجان اكله
بلا زحمه عليك تكدر تنزل تاشرنه سياره نريد نرجع للفندق
واذا عندك الكارت مالت الفندق انطيهيا
لان ماجايبين كارت ومنندل
اي تدللين من عيوني
بس ليش راح ترجعون
نكبت عليه ميرندا
طبعا الكبار بالعمر الاغلبيه مااجوي ويانه لان سفره ترفيهيه
لهذا السبب كلهم شباب يعني عادي من حجيت وي الولد
وكف السايق ونزلنه والولد ويانه
فعلا اشر لتكسي وانطا العنوان
اتعمدت احجي ويا
كتله شكرا اخويه تعبتك ويانه
لاتدللين
ماما هم اتشكرت منه
احس اكو ناس راح تنفجر وتباوع علينه من الجامه
رجعنه للفندق
اتصلت ابابا وسالته
كتله وين انتم
كال نريد نطلع نزور
كتله تانونه راح نرجع
رجعت ودخلت سبحت وغسلت ملابسي
ماما وخاله كلمن بغرفتها يرتاحن
رحت لماما وكتلها وره الصلاه خلي نروح لمجمع الماسه
سمعت ام الفندق تحجي عليه وتكول حلو
كالت الله كريم
رجعت ولكيت ديما هم سابحه
كالت لج جهازي محترك حرك من الرسائل
حتى اني نسيت والله ماقريتهن
اخاف عمار لو كرار
فتحت الرسائل لكيتهن كلهن من الغثه
انت منو سمحلج تلبسين هيج
انتبهي من تصعدين السياره رجليج كلهن طالعات
انعل عشيرتج كلها اذا لبستي هيج مره ثانيه
ومحمد اذا ماانتبهتي للتنوره انعل ابوج
لج بنت ال ...مو اكلج انتبهي الرجليج كل شويه وانرفعت تنورتج
لج فرحانه من تطلع رجليج والولد تتفرج عليج يعني متعرفين تلبسين شي جوه التنوره
يابه ومحمد اله اخليج تتندمين اني اعلمج
انت الظاهر ميفيد بيج التفاهم
اعرف شلون اخليج تنزعيها للتنوره
رساله ثانيه
لج عبالي شريفه اثاريج ساقطه وطايحة حظ
منو كلج تسولفين وتضحكين وي الولد
لج شحال لو ما مقرر مصيرج
ياما تنقتلين لو تتزوجيني
واني مااقبل بيج لو تموتين اذا بقيتي هيج
بس اصبريلي دواج يمي
اهلج الظاهر معرفوا يربونج
من عيوني اني اعرف شلون اعيد تربيتج من جديد
بس اصبريلي
بعدها داز
هذا درس الج واحسبي حسابج
كل ما تلبسين لبس ميعجبني هيج اسوي بيج
بس مره ثانيه مو مشروبات
اعرف شاسوي بيج
بعدها داز
شعندج وي هذا الولد
ليش تحجين ويا
والله اندمج بسيطه الج
من صدك فور دمي
دزيتله شفت ناس منحطه و واطيه بس مثلك مشفت
وشفت حقراء وماعدهم شرف بس مثلك ماشفت
ماكو كلب غيرك انت
مااسمحلك تغلط ع بابا وتتجاوز عليه
اني مربايه احسن تربيه بس الدور والباقي عليك
انسان بلا شرف وبلا اخلاق
عيد تربيتك من جديد يله تجي تربيني
مااكدر احجي وي ديما شي
اخاف تشك بيه
كالت اكلج هذا احمد سابيني سبي
يكول شعدجن وي هذا الولد
كتله ماالك حق تسالنه
ولا الك حق تدخل بخصوصياتنه
اي حيل بي خل يولون
مااله حق يحاسبني ع لبسي
كالت راح انطي حضر واخلص منه
كتلها حتى اني
فعلا انطيناهم حضر وخلصنه
بدلنه وخبرنه اهلنه ونزلنه
بابا وخالو اجوي ويانه
نزلنه وجانوا مقابيلنا بس باين عليهم الغضب واضح
مهتمينه ولا كانو مقابيلنا
اجرنه سيارتين للمجمع
رحنه واتفاجأنه بي جان يخبل
بي هواي محلات بي موديلات تجنن
هواي اشترينه ملابس كانت راقيه بهذا المجمع
بعدها رحنه لمدينة العاب ارض العجائب
جانت بالمجمع وجانت مسقوفه كلش حلوه
بيها العاب تجنن
كعدوا اهلنا واحنه مقصرنه مخلينه لعبه تعتب علينه
من صدك اتونسه اليوم وحيل فرحنه
اهم شي الغثه مو يمي
بعدها اتعشينه بمطعم بنص المجمع
اكلهم يجنن
هواي فرينه واشترينه اشياء غريبه
الميك اب العدهم يجنن هواي اخذنه اني وديما
بعدها رجعنه للفندق
لكيناهم جوه منتظرينه الظاهر
سوه نفسه يحجي وي صديقه
ومبين علي عصبي
احمد قسما بالله العظيم اذا مافتحت الحضر راح اندمك
وراح انتظرك منا لساعه ضبط
النزلت جوه واتفاهمت وياي زين ع زين
واذا مانزلت وعاندت اني اشوف شغلي وياك
صعدنه ولا اهتميت
بدلت ورتبنه الجنط لان باجر موعد سفرنه للشمال
كالت ديما افتحي الحضر لا يسويلج سالفه
لو يموت خل يولي مااله حق هيج يسوي
كملنه كلشي وردنه انام
اندك الباب علينه
استغربنه منو الي يدك علينه بهيج وقت
بقينه ع حطتنه حتى ماكلنه منو
بعدين زاد الدك
اتقدمت حجيت بصوت ناصي
منو
جان يكول اني وانصدمت من سمعت الصوت
مرتضى : رحنه اني والولد جماعتي
لشلة البنات الحبابات
لكيت اصلا الولد متعرفين عليهن ومنسقين وياهن
اجتنه فرصه اني واحمد
كتله معلينه بيهن
بس خلي نضحك بالجذب وياهن خل يشوفنه
بلكي يضوجن يغارن
عيونه تراقبهن من بعيد لبعيد
بس ولا كانو شي صاير
تركناهن وقررنه نهملهن مؤقت
بالليل بقينه نفتر بالاسواق وزرنه همين ورجعنه
باجر سفرتنه سياحيه
كعدنه وجهزنه نفسنه
عيوني ادور عليها غصبا ماعليه
هالمره لاحظت عيون الكل عليهن
بنت خالتها اهون منها
بس هي لاعبه طوبه بوجها
معجبني وجها ابد
هي متحتاج مكياج ابد
لان وجها صافي ومعانيها حيل حلوه وبيضه
مااعرف شعاجبهن بهالخرابيط
لاعبه طوبه بوجها
دزيتلها رساله
خففي من المكياج
ولا كانو
لاحظت من تصعد بالسياره
التنوره تنرفع وتبين رجليها
اتخبلت
اني احس روان ملكي
اني متاكد من مصيرها تصير زوجتي لو شيصير
اني ادري راح اعاني ومتاكد اواجه صعوبات
واكيد مراح يوافقون عليه
بس مستحيل تصير لغيري
اكيد لو تصيرزوجتي وراح تنستر
لو اذا جبروها ع غيري ياما تنقتل وياما يخلوها هيج بدون زواج وهذا الاحتمال ضعيف
لهذا السبب اني غيرتي متسمحلي احد يباوع عليها
ولا اكدر اشوفها لابسه مو لائق
احسها ملكي الي وبس
اني صحيح خطأت وياها
بس الي متاكد منه راح اصحح الخطأ واعمل المستحيل حتى اقنع اهلها
بس ارجع للعراق ابدي اعتذر من اخوها
وانتظر السنويه مالت مريم بعدها اعتذر من عمي واطلب من اهلي يخطبوها
شكد حاولت اراسلها بس ولا تقره
حيل عصبت واتجاوزت عليها
بس ولا كانو اراسلها
بعدها رحنه للبحيره وهم كذلك
صعدنا فوك بالجبل وجان الهوى مو طبيعي
اباوع عليها واني افور دم من صدك
احس العيون عليها
لان كل شويه وطارت التنوره
اتخبلت اله شويه
هي صحيح تحاول تستر نفسها
ومتخليها للتنوره اطير
بس رغم كلشي مو مستوره
راسلت وهم بدون جدوه حيل ضجت
بعدها شفتهن صاعدات بالعباره او القارب
والمشكله يسولفن ويضحكن ومندمجات وي ولد من حملتنا
مستحيل اكدر اوصف شعوري بهاي اللحضه
اتمنيت تصير كبالي وتختفي كل الناس
اله اخلي دمها بطولها
اتحلفت بيها
وصرت اعصاب
هالمره قررت اشتري ميرندا وكلت اديره عليها من فوك لجوه
وفعلا سويت نفسي ماادري وذبيته عليها
رغم كلشي مابردت النار الي ابداخلي
بس صدمتني من حجت وي الولد نفسه الي ضحكت ويا
مااعرف شحجت ويا
لحضات وكفت المنشاه
ونزل الولد
اجر سياره ورجعن اعتقد للفندق والولد رجع
احس بنفسي دخنت
من ناحيه رجوعها للفندق فرحت حيل
ومن جها ثانيه ضجت من تصرفها
هم راسلتها ولا كانو
اخذونه لحديقة الحيوانات احس بنفسي فصلت ع العالم
مااحس بعد وين ودونه ووين اخذونه
كملنه وبعدها دزونه لحديقة الجبل الحجري
صحيح جان حلو بس اني بالي يمها
شكد حاولت اتجاوب ولا كانو
اخر شي دزونه لمدينة العاب
رجعنه وي رجعتنه طلعوا همه كلهم
بدت الرسائل تجيني وجان تصدمني من متجاوزه عليه
هواي متجاوزه عليه
اتمنيت كبالي تصير اله اعلمها ع التجاوز
بقيت افور دم
صعدنه بدلنه وارتاحينه
صلينه وكالوا خل نتعشه
رحنه للمطعم اتعشينه بس بالي مو يمهم ابد
الظاهر هاي عنوديه وراح اتعبني هواي بعنادها
بقوا يفترون اني ماالي واهس
كلت لاحمد راح ارجع للفندق
كال خل ارجع وياك
سالني وسولفتله ع تجاوزها
كال راسلها وجاوب ع تجاوزها
منطيتني حضر بنت الكلب
مرتضى خل نكون واقعين
محد تقبل احد يتجاوز ع اهلها
وانت ماشاء الله السانك فالت منك
بين كلمه والثانيه وكلت بنت الكلب
يعني شتتوقع منها
احمد عقلي وكف كاعد تعاند عناد مو طبيعي
شفت منظهرها وتنورتها طايره
لو شفت ضحكها وي الشباب
بس رغم كلشي ماالك حق تحاسبها هيج
خل اراسل بنت خالها
راسلها احمد وهم منطيته حضر
كام يضحك
عميت عليه همين
احب اسالك سؤال وجاوبني بصراحه
اسال
شنو علاقتك بيها بالضبط
تحكمك بيها مو طبيعي
اني مااعرف علاقتي بيها بالضبط
كل الي اعرفه اعمل المستحيل حتى تصير زوجتي
يعني تحبها لو شنو بالضبط
لازم اتلاحك نفسي من اسئلة احمد وانتبه لجوابي
لان بده يشك بيه ع مااعتقد
كتله احبها من زمان واموت عليها
وخطبتها ومنطونياها
واتعاركنه اني واخوها
زين وبنت عمك الله يرحمها
مو جنت تكوم تكعد تسولف بحبها
وتكول هي الهوى الي اتنفسه
احس بنفسي عاجز عن الجواب
ادري بنفسي مذنب ومااعرف بالضبط شلون اتصرف
كتله احمد لتصعبها عليه
البنيه اني احبها واتمنى تصير زوجتي
اني متاكد ممقتنع احمد بيه بس شاسويله
مرتضى اني اخوك قبل لااكون صديقك اذا حاب تحجيلي الحقيقه
اني جاهز اسمعك وانصحك واكون سند الك وسرك ابير
كلبي حاسني وراك سالفه جبيره
الصراحه اتمنى احجي وي شخص
بس صعبه عليه
مااكدر احجي لان هذا شرف بنيه مو هين
قررت التزم الصمت والله كريم
كتله تسلم احمد اخو والنعم منك
بس ماكو لا سر ولا غير شي
كل ماهنالك الغيره صاعده عندي فول وضحكت
كال ان شاء الله ماكو شي
بقينه ننتظر بالاستراحه مالت الفندق
اجوي الولد
كنالهم خلو الباب مردوده شويه ونصعد
هواي اتعطلن ومااجن
بس الي مطمني اهلها وياها
كاعد افور وع اعصابي
وره فتره اجوي
سويت نفسي احجي وي احمد وطلبت تفتح الحضر
قررت انتظر واشوف
عكبت الساعه وهاي ولا كانو لا فتحت الحضر ولا راح تنزل تتفاهم ويايه
قررت اتخذ خطوه صحيح بيها اذيه الي والها
لازم اصعد لغرفتها
يعني صعبه همه بطابق واحنه بطابق ثاني
يعني اذا احد حس بيه راح انفضح وافضحها
بس لازم احجي وياها افور دم
لازم تحسب حساب لتصرفاتها
احمد كام يحجي عليه
عيب مرتضى انت من يمته هيج تصرف
البنيه خطيه راح تشوه سمعتها
احمد راقب المكان وماعليك بالباقي
تعرف غرفتها يارقم
اي اعرفه
شفت رقم الغرفه بالكاميرا
شنو يعني كاميرات مراقبه بالفندق
اي بلي بكل طابق بالممرات اكو كاميرا
يعني هسه انت متخاف احد يشوفك
لعد شكاعد اكلك
راقبلي المكان
ابو الفندق طالع بالباب ملتهي
راح اصعد مااطول لحضات وانزل
اكيد هسه تخاف وتفتح الحضر
صعدت وكلبي يدك سريع
اني مااخاف ع نفسي الصراحه
اخاف عليها اذا اهلها حسوا بيه
بس مجبور اسوي هيج
دكيت الباب وع كيف
ماكو صوت
الضوه مفتوح يعني متاكد منايمات
بقيت الح وجان تحجي بصوت اشبه للهمس
منو
كتلها اني
شدتسوي هنا مرتضى
الله عليك استر عليه
الج مهله دقيقه وحده لو تفتحين الحضر لو افضحج والله
انزل والقران راح افتح الله يخليك استر علينا
نزلت لاحمد ولكيته ع فرد كعده يراقب
كعدت بصفه
انفتح الحضر
دزتلي الووو
الج مهله 10 دقايق الكيج جوه اريد اتفاهم وياج
مااكدر والله انزل اهلي نايمين
مو مشكلتي
راح يبدي العد اتصرفي وانزلي
عفيه خليها للصبح
بده العد
والنبي مااكدر اهلي ناموا
بعد احسن اطلعي بدون علمهم
حبيت اجربها
والله مااكدر اطلع بدون علمهم
وعد مني باجر احجي وياك
روحي لامج وخبريها كليلها نريد نزور
لو هاي صعبه عليج
احتمال متوافق ميقبلون بالليل اطلع
بس اعتقد انت متعوده ع طلعات الليل
شكم مره طالعات بالليل بوحدتجن
هاي مو غريبه عليجن
خل اشوف ماما اذا كاعده وقبلت اطلع
واذا مقبلت اعذرني مااكدر لباجر
كتلج هسه يعني هسه
لحضات وراسلت بنت خالها احمد
كام يضحك لك ذني ميجن اله بالعين الحمره
الله عليك لاتفتح الرسائل ابد
اريد ينزلن واتفاهم وي هاي ام خشم اليابس
كال احمد اني هم ناوي مااحجي
شنولعبه وكل شويه حاضرات وفاتحات الحضر
بس شلون راح ينزلن معقوله بدون علم اهلهن
لك الصراحه هواي كبرت بعيني
رفضت تنزل بدون علم اهلها
اله تخبرهم
احنه جنه متوهمين من هاي الناحيه
جنه نعتقد بكل سهوله يطلعن بوحدهن
لحضات وراسلتني
والله مقبلت ماما عفيه مااكدر
اني مصمم هسه مااكدر بالنهار احجي وياها ابد
الكل عيونه عليهن
واخاف احد يشك بينه
كتلها حاولي وياها
واذا مقبلت تعالي بدون علمها
كلي احمد يمعود عوف السالفه لباجر
لا تسويلنه سالفه الها اول ماالها تالي
يعني شلون تطلع بدون علم اهلها
اذا حسوا بيها شلون
لازم احجي وياها ضروري مااكدر اهدئ ابد
وره فتره دزتلي راح ننزل اني وديما
عفيه بالشطوره
راح نوكف اباب الفندق
جانت الساعه ب2 ونص بالليل
كتله احمد بس يجن تاخذ بنت خالها وتختفي من وجهي
ليش شناوي تسوي
ماعليك انت
اخذ بنت خالها والباقي عليه
بس مرتضى لازم تتأنه لاتستعجل باي ردة فعل
لتخلي الشيطان يركب راسك وتاذي البنيه
هاي شبيك احمد
لتنسى اني راح اقابلها بشارع عام يعني مو بفندق ولا بغرفه
ليروح بالك لبعيد
طلعنه ننتظرهن
لحضات ونزلن اثنينهن
ومبين عليهن الخوف
دزيتلها راح نمشي وتعالن ورانه
مااريد احد يحس بينه
ابتعدنه شويه عن الفندق
اتوقفنه
اجن يمنه
كتله احمد يله اخذ ديما واختفي
لمن اخابرك يله تجي
هنه لزمن ايد بايد
ديما كالت اني مااريد ابتعد عن روان
احنه سويه نمشي
ديما عفيه لتصعبين الامور
عندي حساب وي بنت عمتج اصفي وارجعن سويه
كالت روان
لو تحجي شتريد كدام ديما وصديقك
لوتخلينه نرجع
دزيتلها مسج
موالحجي الي اريد احجي مااعتقد تحبين احد يسمع بي
اذا ماعندج مانع وتقبلين احجي كدامهم
عادي احجي اني ماعندي مانع
مااعرف شحجت وي ديما
التفتت ع احمد
كلتله هاي امانه يمك اتمنى تصونها ومتاذيها لا بكلام ولا بفعل
احمد ضحك كال يابه شالقصه روان
اني هم عندي اخوات وعندي عرض واخاف عليهن وع سمعتهن
لهذا السبب اني اتعامل وي كل بنيه بكل ادب واحترام
راحوا احمد وديما
مشيت مسافه
ناس قله والمحلات الاغلبيه معزلين
شفت مساحه بفرع حديقه زغيره بين الفنادق
كتلها تعالي هنا
الخوف واضح عليها
اي ست روان
عيدي الكلتي بالرسائل
سكتت محجت شي
منو الكلب
منو الماعنده اخلاق
منو المنحط
كالت اني مااسمحلك تتجاوز عليه بحرف واحد
ماالك حق تكول بنت الكلب
اها بس الج حق تكولين عليه كلب مو
سكتت
ضربتها راجدي
هاي المره اتجاوزتي
مره ثانيه وربج اندمج واتعرفين شلون اخليج تتندمين
هاي اول شي
ثاني شي انتبهي لتصرفاتج والملابسج
انت ماالج حق تتصرفين بكيفج
لان تعرفين مصيرج الزواج مني
اني راح ابدي اعيد تربيتج من جديد
لان الظاهر اهلج ممربينج
احترم نفسك ولتحجي هيج عليه
اني مربايه احسن تربيه
لتشوف نفسك غدرتني انت واختك وضحكتوا عليه
وكدرت تكسرني
والله لو ماغادريني لا انت ولا الف مثلك يكدر يمس شعره من شعري
اي واضح عليج من ضحكج وي الولد
لج انت وحده بلا اخلاق اعتبرج
هاي لوامرج بيدي والله اكسر رجليج واعوقج ومااخليج تمدين راسج من الباب
شفتي شسويت باختي من عرفت بيها عدها علاقه
ومجرد شك
هاي لو الكفها مثلج تضحك وي ولد غربه
يمكن ادفنها عدله وربج
انت ماالك حق تحاسبني
ذيج اختك وروح حاسبها
اني مو اختك ولا مسؤل عني
اكو من مسؤل عني وهمه الي يحاسبوني
قصدج اخوج الطرن لو ابوج العار الي يخليج بالليل اطلعين بوحدج
خل يكون بعلمك شدزيت الك بالرسائل اني اعنيي بالضبط
وازيدهن همين انت انسان فاشل بمعنى الكلمه
وجاي اطبق عليه دور المتسلط
انت الظاهرمريض نفسي
ضربتها هالمره بقوه
لسانج اكصه الج ومحمد اذا اتجاوزتي بعد
دارت وجها تريد تعوفني وتروح
جريتها حيل
وين تردين
انت ماعليك
لتدخل بيه افضل الك
لج اكلي تبن وتعاي اكعدي
ميفيدج العناد
خل اتفاهم وياج وعود روحي
كعدتها كبالي بس كوه ع اعصابها كعدت
خدها احمر والدمعه بطرف عينها بس كاعد تكابر حتى متنزل
اسمعيني زين
والنبي اخليج تتندمين بس تعاندين
ترجعين للعراق تلبسين عبايه واذا مالبستي اني اعرف شاتصرف
واذا لمحتج تحجين وي اي ولد وربج والخلقج ااذيج
لا اقرباء ولا غيرهم
انت اول وتالي راح تكونين زوجتي
منو كلك اوافق عليك
غصبا ماعليج توافقين
وراح اتزوجج الرضيتي والمارضيتي
واني لا عبالج ميت عليج
لا عيوني متوهمه
اني بس حبيت اصحح الغلط الي غلطته
خلصت حجيك
لو احس نفسي اعترف لاهلي واخليهم يكتلوني يكتلونك مو مهم
اهم شي لو تموت مااوافق عليك
وماعليك بيه لتبقى تحاسبني ماالك حق ابد
روح حاسب زوجتك لو اختك
لج تروحين فدوه لزوجتي
شجابها الج
لابسه عبايه ومحترمه نفسها
مايوم عرضت نفسها للشباب
ولا يوم قللت احترامها
لاعبالج من تلبسين هيج ينعجبون بيج الشباب
بالعكس انت كاعد تخلينهم يباوعون عليج بنظرة استحقار
يكولون هاي اهلها شلون هيج مخلينها تطلع
من هسه اكلج جربتيني وشفتيني
والله اذا مالبستي عبايه واحترمتي نفسج
اخليج تتندمين وحتى دوام اخليج مداومين
وجربي وشوفي
الافضل الج تحترمين نفسج
وتبتعدين عن الشباب
وهذا الولد اذا اتقربتي عليه اسويلج شي متتوقعينه ابد
ساكته منطقت ولا بحرف
ا وشغله ثانيه مااريد تنطيني حضر لو شيصير
هم ساكته هالمره ذابتها ع الصامت
افهم من سكوتج موافقه ع الحجي الحجيته لو اعيد
كالت يعني شلون تبقى تهدد بيه
اي اهدد واكسر راسج همين
اني زوجتي اريدها محترمه ومؤدبه متحجي وي الشباب
والاهم من كلشي تعجبني زوجتي لابسه عبايه
هذا لبسج ميصرفلي ابد
بس هاي اني وهذا طبعي
لو اموت مااغيره وع شنو
ع مود واحد كسرني بسهوله ومرفله جفن
لتتوقع مني البس عبايه
لعد اتحملي العواقب
والنبي اذا لبستي لبس بالشمال وماعجبني
احسبي نفسج اسبحج بالببسي لو بالميرندا لو بعصير لو باي شي
من هسه اكلج خاف تكولين ماادري
اخر مره اكلك ماالك حق تحاسبني لا ع لبسي ولا ع اي شي
اهلي مسؤلين عليه
اني العليه حذرتج والباقي عليه
والنبي اذا سويتها وتلفت ملابسي مره ثانيه
العب طوبه بيك وافشلك كدام الحمله كلها
جربي وشوفي شاسوي
تدري بنفسك انت انسان ماعندك شخصيه
جاي تلعب دور الزوج والظاهر حميت زياده
ينرادلك واحد يطفيك قبل لتحترك
لتصدك راح اخذ بكلامك لانك بنظري انت مورجال
انت ذكر لا اقل ولا اكثر
بهاي حجايتها استفزتني هواي
خلتني افقد
ظربتها هالمره حلكها كام يجري دم
خابرت ع ديما
يله تعالي ارجعي بسرعه
ماادري وين
خل احمد يخابر صديقه وهو يكله وين
كامت تمسح بالدم
تعرف الي يضرب مره احسبه مورجال
وانت بهاي افعالك كاعد تثبت نضرتي الك صحيحه
ليش ماتسكتين
والله راح افقد وياج
بس اذا فقدت وربج اخليج تتندمين واعلمج بذاك الوكت اني رجال لو لا
مااريد اضربها بعد
حسيت بنفسي فقدت من صدك
صرت اعصاب
دك عليه احمد
دليته وين
خل تروح لا ابتلي بيها
كوه لازم نفسي
وربج اذا عاندتيني انت الي راح تخسرين
واذا خسرتي اهلج الي يوكعون بيها
خاف تكولين ماادري
ولتلوميني ع اي تصرف يبدر مني
تمسح بالدم وساكته
احس شخصيتها قويه
بس عنادها دمار
اجوي احمد وبنت خالها
اتخبلت من شافت الدم
التفتت عليه
انت منو الي انطاك الحق تضربها واطلع دمها
منو كلج اني ضربتها وبسرعه تهمتيني
هاي اساليها وشوفي
روان هذا ضربج لو لا
احترمي نفسج شنو هذا ماعندي اسم
احمد ادخل
يمعودين صلوا ع النبي
ديما اخذي روان وامشن للفندق
واحنه وراجن الوقت اتاخر
راحن كدامنه واحنه وراهن
دخلن للفندق
بقينه بره شويه
استلمني احمد بالاسئله
ليش ضاربها
انت شنو سالفتك متكلي
اني الي اعرفه مو هذا طبعك ابد
شنو الخلاك هيج تتصرف
لك والله تصرفاتها طيرت عقلي
هاي بنت خالها اشوف تصرفاتها ولبسها عكسها
بس هي احسها هيج تسوي عناد بيه
والله متوهم
اني حجيت وي ديما
واكدتلي هذا لبسها وهذا طبعها
والبنيه شريفه شوفت عينك
ذني البنات الويانه شكد ضحكن شكد سولفن وي كل الشباب
بس هنه الي عازلات نفسهن
واذا ع الولد الي ضحكن وياهم
اكدتلي ديما تكول صدفه حجه شي وجان يضحك وهيج ضحكنه
ولان ضاجت من تصرفك
طلبت من الولد ياشر تكسي الهن
تصرفاتها طبيعيه وماعدها شي البنيه
بس انت كبرت السالفه
واي بنيه تضوج من يتحكم الشاب بلبسها وبتصرفاتها
احمد انت تعرف شي واني اعرف شي
اني اتخبل من اشوف لبسها هيج والكل يباوع عليها
والله مااعرف شاكلك
بس تصرفك ابد مو حلو
والمفروض تلزم نفسك ومتضربها
ميجوز تمد ايدك ع بنيه
حقك ماسمعت الي سمعته هي استفزتني هواي
واتجاوزت عليه هواي
بين قوسين هي الي طلبت مني اضربها بتصرفاتها التعبانه
بقينه شويه وصعدنه
بدلنه وجهزنه الجنط
ب12 موعد انطلاقنه للشمال
جنت متلهف للسفر
بس طلعت سفرتي مو مثل ممتوقعها
روحي طلعت وضجت حيل
بعدها ردنه انام
احمد يراسل بالجهاز
كتله ويامن
كال وي ديما
كال راح ارسلك رسالتها
منكدر نحجي لان الولد نايمين
حجينه كله رسائل
كتله ارسلها
دزها الي بديت اقراها
وجان انصدم بلي دازته ديما .......
توقعاتكم حبايبي شنو الي دازته ديما ؟؟؟؟
شراح تتصرف روان بعد هذا الموقف ؟؟؟؟
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: