#بارت مفاجئ والاخير
هلو حبايبي شخباركم لازم نختم القصه ابارت مفاجئ اتمنى ينال اعجابكم
🌹البارت 53 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
قررت انسى الماضي كله
مااريد اخسره حيدر
مااريده يطلكني
اريد اعيش كل عمري ويا وبحضنه
اريد نعيش سويه اني وهو ونور ونظوري
حيل تعبت من حياتي
اريد استقر
هواي ضاع من عمري بحزن وبقهر
لهنا وكافي
فتحت الضوه واتفاجات بالغرفه تخبل
فتحت الكنتور جايب هواي ملابس
فرحتي متنوصف ابد
قفلت الغرفه حتى ابدل ع راحتي
بعدين قررت اصعد لفوك اسبح ع راحتي وابدل واتمكيج
لان مكياجي فوك
طلعت ومجان حيدر موجود مااعرف وين
سبحت ع السريع وبدلت وخليت عطر
خليت مكياج وهالمره طوخ
لان مو بره واطلع
كملت ردت انزل
دزيتله مسج
كتله رجع امير لو بعده
لا بعده ليش
هيج ماكو شي
وين انت
بالبيت
طبعا خجلانه من لبسي ومن مكياجي بس عادي
اشتياقي اله اكبر من الخجل
اكيد هسه عباله اني رفضته وصعدت
لبست صايه فوك ملابسي
رحت لبيته لكيته يشرب جكاير
بقه صافن بوجهي
كتله راح ادخل للغرفه لاتجي لمن اصيحك
هو منطق ولا بحرف وجان مصدوم
دخلت للغرفه نزعت الصايه والحجاب
عدلت شعري ورتبت الغرفه
دزيتله تعال
طفيت الضوه لان اخجل يشوفني بهيج لبس
باللحضه اجه يمكن واكف وره الباب
دخل كام يضحك
افهم منج انت مسامحتني
سكتت
يعني اليوم الي مطلق الحريه شاسوي بيج اسوي
هم سكتت مدنكه اني
رفع راسي بايده
خلي عينج بعيني وسمعيني كلمه حلوه وحده مااريد غيرها
كتله احبك واعشقك رغم كلشي سويته بيه
قاطعني وباسني خفيف
راح نترك الماضي ورانه
نترك العتاب كله
ننسى كلشي صار
نفكر بس بالمستقبل
نفكر بحياتنه الجايه
اليوم اريده يبقى بذاكرتنه للموت مننساه
اليوم بس اني وانت وبس
اتذكرت الحب لازم اخذ منه
كتله حيدر فدوه اريد احجي وياك قبل كلشي
مااريدك تفهمني غلط
احجي كولي
اريد حب مانع حباب
احنه شكلنه زينب
يعني متردين طفل مني
لا والله مو هذا السبب
اني طالبه ادرس
اكيد مااكدر اوفق بينكم وبين البيت وبين الدراسه اذا طفل بنصنه
تدري الطفل تعب وسهر
اريد لمن اخلص يله
بس اني اريد طفل ومنج بالذات
امنيتي يصير عدنه طفل
والله مستعد اجيبله مربيه خاصه اله
اني اسهر مااخليج انت
اني احب الاطفال واتمنى تجيني بنيه احبها للبنيه حيل اذا منج
اذا تحبيني وتعزيني نفذيلي هذا الطلب وانسي الحب
سكتت بعد مااكدر اجاوبه
كال وهسه نبدي باحتفالنه
كتله اوك
شغل النغمه دايخ بيك لسيف نبيل 👇
كعدنه وبدينه نكص الكيكه
وكلني ووكلته
شربني عصير واني هم شربته
كال صدك انت بلا غده ولا عشه
لازم اوكلج نص الكيكه
جنت جوعانه صدك بس مااحب الكيك ولا الحلويات
كتله مااكل كيك بعدين اسوي عشه الي والج
اني مااريد عشه لان راح اتعشه بيج
كملنه وسحبني للفراش
تصدكين جنت متمني هذا اليوم ع نار
ثقي بالله حتى اذا اصبح ميت راح اكون اسعد واحد ميهمني شي بعد
الله ليكولها عمرك طويل ان شاء الله
انت طلبت من ماما تاخذ الجهال
اي لعد هم تشلعين كلبي
ها كعدوا ها وين انيمهم
صدك تعالي اروايج شي
اخذني وراح لغرفته الثانيه
اتفاجات صراحه تخبل مسويها
احلى من غرفتهم بهواي
كتله هاي شوكت سويتهن
من انتو بالدوام اكمل كلشي
بعد اكو مفاجئه ثانيه الج
اخذني للمطبخ وجان كله جديد
اتمنى يعجبج ذوقي
اني جنت اتمنى انت تختارين
بس ردت مفاجئه اسويها
واذا معجبنج ابدلهن الج كلهن
والله الصراحه ذوقك كلش حلووعاجبني حيل
باقي البيت كله عليج
الاستقبال والصاله
لان راح نستقر هنا نهائي
حتى الطبخ هنا
وهنا ياكلون ويانه
بعد ماكو روحه حتى لاهلي
تحجي صدك عود
اي لعد جذب
اريد اشبع منج واريد اعوض سنين الضاعت من عمري كلهن
لا عفيه لتسوي هيج
والله استحي منهم
اروح هناك اطبخ وناكل هناك
كلشي تتمنينه انفذه الج
رجعني للغرفه دخلنه اني ويا
شغل اغنية محمد الترك وحنين القصير 👇
بعدها للاسف طردوني من الغرفه 🙈🙈🙈🙈
مخلوني ولو شويه اكيد خباثه منهم 😡😡😡
عبالي ابثلكم بث مباشر 😂😂😂
يله ع غير مره
يله مو مشكله كلمن تتخيل بذاكرتها هاي الليله
ونترك ابطالنا يعيشونها بسعاده بهاي الليله
حيدر : حجيت وياها وجنت اتمنى تتجاوب ومترفض
بس من شفتها تركت الغرفه وصعدت حيل ضجت
وعرفت جوابها شنو جان
مستحيل اكدر اوصف شعوري بهاي اللحضه
كمت اشرب جكاير
بقيت بالصاله
راسلتني وسالتني ع امير
مااعرف ليش
بس فجأه دخلت عليه وجانت مخليه مكياج
اول مره اشوفها مخليه طوخ
حجت وياي واني فاصل
معرفت شحجت
ردت ادخل عليها
اريد استوعب الصار
جان تجيني رساله منها تعال
باللحضه دخلت
مستحيل انسى ذيج اللحضه ولا ذيج الليله
جانت طالعه مثل الملاك
اخيرا تحقق حلمي
اكيد سامحتني
اكيد راح نبدي صفحه جديده من هاي اللحضه
عشنه هاي الليله وفعلا كانت ليلة العمر
ولا بالاحلام
نسينه الدنيه كلها
نسينه حزنه
نسينه جرحنه
نسينه همومنا
رحنه لعالم ثاني
عالم المسامحه والنسيان
للصبح منمنه ولا لحضه
صلينه سويه
بعدها كالت لازم اطبخ الغده حتى انام بعد مااكدر
كتلها اليوم ممنوع اطلعين من الغرفه ولا لحضه
لاعفيه عيب والله
والغده عليه
مو مهم
راح ادز رساله لامير يجيب سمج مسكوف من بره
وحتى تمن يجيب من المطعم
والنبي استحي
خلي اسوي وارجع
اش ولا كلمه
راسلت امير
كاعد
جاوبني اي
اليوم جيب غده من بره
شكو اليوم
الحب منيمه بحضني ومااخليها تطلع من الباب
ياحب هذا
لك جم حب بحياتي هي وحده وبس
كول والله
اي والله
واخيرا صفيتو
اي بعد اخوك اليوم سويلي هذا الجميل جيب غده واتغدوا ولتحسبون حسابي
دلل من عيوني الاثنين
سالمه عيونك حبيبي
يله تعالي
اني اليوم مااريد لاريوك ولا غده و لاعشه
لان راح اشبع بيج
بعدين اتذكرت كلت خلي اخبر امي خطيه
كتلها هسه اجيج عفته ورحت
لكيت امي تصلي بست راسها
كتله يوم اني وزينب اتصافينه
حيل فرحت خطيه
راح يعيشون ابيتي
يوم عيد عندي الي اشوفكم مستقرين وابيتكم
اليوم طالبين اجازه منكم مراح نطلع لباجر
روح يوم الله يسعدكم دنيه واخره
شويه واجيت
وين رحت
رحت خبرت امي
كتلهم اليوم محد يزعج عروستي
عزه بعيني كول والله
اي والله
والنبي استحي منهم والله عيب
شنو بايكه وتستحين
هو اليوم يله اتزوجنه حقيقه
والله عيب حتفضحني فضيحه
بعد بقوا جماعتك هم روح خبرهم
كمت اضحك لا مو لهالدرجه
وهسه شلون اريد اطلع
اس ولاكلمه والنبي متمدين راسج من الباب اليوم
منا لباجر عود يله لو اخليج لو لا
لا عفيه عندي امتحان الاحد مهم
اي بس مو اهم مني
زين شلون اريد انزل كتبي وملابسي
باجر انزلهن سويه وحتى ملابس الجهال
يله تعالي خل انام
نيمتها بحضني وممصدك
اكول اخاف بحلم واكعد الكيها مو يمي
بقينه نايمين لل 4 العصر يله كعدت قبلها
الله احلى شي بالدنيه من افتح عيوني والكيها كبالي
كمت اوخر شعرها نازل ع وجها
حست كعدت
صباح العسل
هذا ياصباح ياعسل
الساعه ب4
مو مهم مساء العسل
ضحكت كعدت
لويش مكعدتني
شكو ليش اكعدج
ماجعت
لا مو كتلج اليوم مراح اجوع لان شبعان بيج
كالت يا خطيه نظوري ونور ماادري بيهم هسه يبجون علينه يجوز
هاي وين لكيتها يبجون وهمه يم رقاوي
كلشي يصير
خابرت امها وكالت خليهم اليوم هنا ميقبلون يجون
ماتدري اني خابرت امها وسالتها عليهم
كالت فرحانين
خاله اني طماع واريد يبقون اليوم يمكم
ابني امنيتي يباتون والله حيل نفرح بيهم اني وعمك والبنات
خليهم واخذوا راحتكم
بس مخبرتها
نمنه سويه وسبحنه
وره شويه اذن
صلينه سويه
يله بدلي وخلي نطلع
وين
ماعليج بس بدلي
اني جوعانه من البارحه واليوم مماكله
ع اساس اني المو جوعان
بدلي وفضيها
ملابسي كلهن فوك
روحي اصعدي جيبي الملابس الكبل الجبتهن من بغداد
استحي والله شلون اطلع
هاي شبيج زنوبه
شنو قابل شمسوين
يله خل نصعد سويه اني وياج
صعدنه ومحد جان موجود همزين
جابت ملابسها وعبايتها
طلعنه ورحنه للمطعم اتعشينه
احس مالك الدنيه كلها
خل نمر باهلي حباب والله مشتاقه لنور ونظوري
اس خلي باجر نروح ونجيبهم
خل بس هاي الليله نعيشها مثل البارحه
خلصنه من المطعم
رحنه لمول كتلها خلي ناخذ شكم شغله للمطبخ
حتى خاف نجوع بالليل حتى تسوين براحتج
اخذت بس الاساسيات
بعدها رحنه لسوبر ماركت
هم كتلها اخذي كلشي تحتاجي للعشه
حتى ناخذ راحتنه ساعه يم اهلي وساعه لا
والي يجوع بالليل
اخذت هواي اشياء
اخذنه حلويات
رجعنه للبيت
كالت ماالحك والله شلون انقل الملابس
شلون ارتب حياتي الجديده
عندي امتحان يوم الاحد
اي عادي اني وياج نتساعد بكلشي
الملابس لاتنقليهن كلهن
بس المهمه ويوميه شويه ممتوازين عليهن
هو هم هيج راح اسوي
زين شلونراح ينامون بوحدهم نور ونظوري
اي عادي وين المشكله
كبار صاروا
وراح يفرحون بالغرفه الجديده
ماادري خل يجون ونشوفهم
رجعنه كلي خل نصعد نجيب شكم شغله مهمه وملازمج
كتله اوك
رتبت الغراض الجبناهن
كلي باجر اجيبلج مسواك كامل
لحم ودجاج
ع مود تسوين كباب كبه بركر واي شي يعجبكم
صعدنه اخذت الملازم والملابس المهمه
نزلت قبلي رتبتهن
نمنه وثاني يوم كعدنه من وكت
زينب : بديت حياة جديده وي حيدر
نسيت الماضي لان الله منطينه نعمة النسيان
احس بنفسي عايشه بعالم وردي
كعدنه السبت
حيدر راح للسوك وكال مناك اجيب الجهال لان حيل اشتاقيتلهم
واني رحت يم خاله طبخت الغده
اجني خاله وزهراء وجانن فرحانات حيل
كالت زهراء بعد ماعليج بينه ابد
انتوا اطبخوا وحد واحنه وحد
هاي شنو زهراء هاي اطردينه
لاوالله مو طرده
بس اخذوا راحتكم
وعود اذكرونه وياكم
كلت لخاله راح اطبخ الغده هناك واجيبه لهنا بس حموا
مقبلت ابد كالت احنه نتسوك معليكم انتم
كالت يبقى الاكل يمنه والكل يتجمع ع الغده مثل قبل
والعشه بلي يعجبكم
كتلها هاي هي خاله
اجمل طبع بيهم ماعدهم فرق بين واحد وواحد
بالمصرف ماكو فرق
المسواك كذلك
كلمن حر بنفسه
بديت ارتب البيت بوقت فراغي
هذا الاسبوع كله امتحاناتي صادفن
نور ونظوري ماعانينه منهم بالغرفه
فعلا جانو فرحانين واتعودوا ينامون بوحدهم
ابد ميضغط عليه حيدر باي شي
صار الخميس وكلي احسبي حسابج كل خميس مميز عندي
لانثاني يوم جمعه ودوام ماكو ودراسه ماكو
عفته ع راحته
بس الجمعه والسبت رتبت كل اموري
كملت نقل الملابس وفرغنه الغرفه
كالت خاله عوفوهن ع حطتهن للبنات من يجن ينامن ع الجربايه ويخلن ملابسهن بالكنتور
سويت هواي اشياء وخليتهن بالمجمده
كمنه غدانه هناك
وعشانه بالبيت
رسل دائما نتراسل اني وياها
وخبرتها بكلشي وفرحت
كلتلي اقتنع محمد بطفل الانابيب وراح نبلش الاسبوع اليجي
سولنه التحاليل وانطونه امل 75 % بنجاح العمليه
حيل افرحت الهم خطيه
قربت امتحانات نصف السنه
طلب مني نسوي جوازات
كتله ليش كال هيج
قبل الامتحانات سوالنه وجان عنده عرف هواي
خلال اسبوع سلمونه الجوازات
بدت الامتحانات وجان ضغط عليه
من جها نور ومن جها اني
الحلو بحيدر ابد مضايقني بهاي الفتره
عافني ع راحتي
اكثر المرات ابقى سهرانه اقره لان حيل متعبه دراستي
بعد يوم وتخلص الامحانات
يعني اليوم اخر يوم نقره
كلي مااصدك يخلص اليوم
اريد اشبع منج
كتلتيني بالدراسه
لو يطيح بيدي ابطلج
تحجي صدك
والله اموت اذا بطلتني
يعني هذا تعبي هيج يروح
شوف شكد كاعد اعاني حرامات
انت مو تكولين مااريد اتعين
شلج بالشهاده لعد
حسيته سجينه وذبحني بيها
كتله مو مهم اهم شي انحسب خريجه
ضجت
كلي ليش ضجتي والله اتشاقه وياج
لو اموت ماافكر ابطلج
وراح اخليج تتعينين
كول والله
والله وداعتج
وهديتج اذا تخرجتي راح تكون غير
شنو الله عليك
مفاجأه مااكولها لمن تتخرجين
شنو وابقى متانيه بعدلي 3 سنوات
مو مهم
خليها لوقتها احلى
حباب منو حبيبتك
انت
لعد كلي
ابد والله مااكول اله بوقتها
خلصت الامتحانات
الحمد لله
وجنت فرحانه
رجعت لكيته جايب ويا جنطه جبيره مالت سفر
اتفاجات شنو هاي
كلي جهزي ملابسنه باجر نسافر
شنو نسافر وين
معليج مفاجأه
تحجي صدك
اي اكيد قابل جذب
ليش محجيت قبل بساع
شعندج شنو المشكله
اخبر اهلي واهلك
الكل يعرف معليج انت
زين وين نسافر وشكد نبقى
وين هاي مفاجأه
وشكد نبقى 12 يوم
يعني العطله كلها تقريبا
واني حاسبه ميت حساب للعطله
ارتب البيت وارتب المطبخ
لاحكين عليهن
جهزت ملابسنه وحتى الجهال
رحنه بالليل يم اهلي ودعناهم
ودعنه عمه وخاله وزهراء
طبعا اول مره اسافر خارج العراق
ثاني يوم وصلنه امير للمطار وره اذان الصبح
متلهفه اعرف وين
نادوا ع المسافرين الي متوجهين لدبي
ابد متوقعت لدبي
كلت احتمال لتركيا او ل لبنان
سافرنه وصلنه واستقرينا بالفندق
جان بابو ضبي اسمه فندق ياس فايسروي ابو ضبي
فندق ⭐️⭐️⭐️⭐️⭐️
جان قريب ع عالم فيراري
اول شي سوا كلي العبايه انزعيها ومن نرجع للعراق البسيها
حيل افرحت بهذا الشي
لان بهيج سفره وهيج اماكن العبايه تقيد الشخص
اخذنه ثاني يوم لعالم فيراري طبعا ولا بالخيال ولا بالاحلام
راد يصعدنه بالفورمولا روسا هاي اسرع افعوانيه
ماقبلت ابد لان جانت تخوف
ونور ونظوري وين نوديهم
راح صعد بوحده
اجه كال لازم تصعدين وياي
لان ولا بالخيال تخبل
كعدنه نور ونظوري اشترالهم حلويات
اكو اماكن خاصه للاستراحه
وطلب منهم ابد ميتحركون ولا لحضه
صعدنه بس متنوصف اللعبه
متت من الخوف من صدك تاخذ الروح
بس بنفس الوقت جانت حيل حلوه
كتله بعد ابد مااصعد باي لعبه
بعدهاصعدنه نور ونظوري بسباق فورمولا الصغير عباره عن مضمار مليئ بالانعطافات وهمه يصعدون بسياره
جانت كلش حلوه وحيل فرحوا بيها
اكو شخص يرشدهم بيها
بعدها زرنه مصنع مصغر عن شركة فيراري
شفنه شلون يصنعون السيارت الفيراري بادق تفاصيلها
بعدها استاجرنه سيارة فيراري كاليفورنيا
علموا حيدر بالتفاصيل
اخذنه فرنه بيها جزيرة ياس كلها
بعدها ركبنه بالقطار
هذا اليوم بقه معلق بذاكرتنه
رجعنه للفندق
حيدر : حياتي اتغيرت كلها
صارت بيها معنى
حسيت معنى الفرح
عفتها ع راحته زينب بالامتحانات
كلت خطيه وكاعد اشوفها تعبانه حيل
سويت جوازات ورحت فيزت وحجزت التذاكر
قررت نروح لدبي
لان اسمع جماعتي يسولفون بيها يكولون ولا بالخيال
سافرنه وحجزت فندق قريب ع عالم فيراري
انطوني تفاصيل كامله جماعتي حتى ع الاسعار
طبعا الاسعار نار
بالنسبه للالعاب بالدولار كلهن
اني اخذت وياي فلوس هواي
كلت لازم اعوضهم ع كلشي
اول يوم صعدنه هواي اللعاب
رجعنه للفندق ارتاحينه ونزلنه اتعشينا
بعدها نامو نور ونظوري من التعب
رادت تنام
ها اشو راح تنامين
هم تعبت اني
لا يابه لهنا وحدي وياج
اتحملت عليج هواي
تنسين التعب وتنسين كلشي بالليل
كامت تضحك
لعد مااطلع بعد حتى مااتعب
هههه اضحكي ع روحج
طبعا كل ليله قضيناها سويه احسبها ليلة العمر
احس بنفسي وياها عايش بغير عالم
كعدنه الصبح هم اخذتهم لعالم فيراري
طبعا حيل جبير وبي اللعاب ماتنعد ولا تنحصي ابد
صعدت بوحدي بلعبة جي فورس مثل البرج يرتفع حيل اعلى من السقف مالت عالم فيراري
لو زينب صاعده وياي جان ماعت روحه من الخوف
بعدها صعدت نظوري ونور بهواي العاب
كمل اليوم
وراها رحنه للمولات
اكو مول اعتقد اسمه مول ياس مارينا
جان بي حلبة مو جبيره للتزلج ع الجليد
كلنه دخلنه بي وجانت حيل حلوه
اشترينا هدايا للكل منا
وراها بيوم رحنه لحوض دبي المائي
بي حديقة حيوانات واسماك حقيقيه تحت الماء
هواي اسماك القرش بي
طبعا نشاهدها كلها عن طريق اكبر لوحة اكريليك في العالم
جان بي اسماك حقيقيه قرش وغيرها 👇
اجمل مابي دبي هو هذا المكان
خلصنه العطله هناك وجانت اجمل ايام عمرنه كله
رجعنه للعراق
اجونه للمطار اهل زينب واهلي
جانوا مشتاقين لاحفادهم هواي
زينب : هاي الايام القضيناها بالامارت جانت اجمل ايامنه
الله عوضني عن الحزن والتعاسه
بسعاده ولا بالخيال
رجعنه للعراق وجنه فرحانين
رسل نجحت عمليتها وهسه حامل
اني هم حللت وجنت حامل
حسيت بسعاده بعيون حيدر متنوصف ابد
اني هم فرحانه حيل
حاليا اني بشهر السابع
اخذت سونار وطلع بيه ولد
رسل حامل بتوم ولد وبنيه وحاليا بشهر الخامس
اني حاليا نجحت للمرحله الثالثه
حيدر لليوم مضوجني ولا ازعجني
يوم عن يوم يحبني اكثر ويتعلق بيه اكثر
واني همين
راح نترك ابطالنه يعيشون بسلام سعاده ونتمنى الهم الحياة السعيده
الى هنا تنتهي رحلتي معكم متابعيني الاعزاء
تحياتي
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: