مساء الخير ع اجمل متابعين اتمنى لكم قراءه ممتعه
🌹🦋 البارت 43 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
جان تكول خاله موافقين ذني ال5 وباجر من يجي ينطي ال5 الثانيه
اني وفاطمه بقينه 👈😵😵
هيج عاجبتك ومستعجل ع الزواج ياحيدر
اتوقعته راح يرفض
بس طلع كدرته بس عليه
بس حقه هيج يسوي البنيه حلوه وحواجبها داكتهن تاتو
وشفايفها مبين ضاربتهن بوتكس
واكو شامه فوك شفتها مااعرف هم وشم لو صدك
لابسه عدسات
يعني شكلها يجذب
بس بين قوسين جمال مصطنع
بقينه شويه واترخصوه ورجعنه
عمو لعب جوله كال هذا ابنج مخبل مو صاحي
شنو يقبل عشره ع شنو
وخل يكون بعلمج الغايب رادوا 25
كلتله خاله يطبه مرض
قابل دافعين من جيبنه
لج يامره والله ميطول وياها
لان هذا من النوع الملال يمل بسرعه ويتندم والله
وعباله بنات الناس لعبه بين ادي
اكو واحد صاحي يعوف هاي الجوهره الثمينه العنده
ويدور غيرها
والله ابنك اكبر خبل
وصلنه وجان منتظرنه ومبين علي فرحان حيل
ها يوم بشري
شابشر الحاضر 10والغايب 25
وهي كلها ارمله
هم لو بنت منقهرنه
ومن هسه اكلك معاجبتني لان خشمها يابس
وبس تتنغوص وتتعيقل
مو مهم اني قابل بيها وفدوه الها الفلوس
كرة عيني عليك يوميه الك عرس
شنو متعجب بنفسك يايوم
لك ذوله اخوتك اشو محد سوه مثلك
لان اخوتي ماوكعوا بيد الي ميرحمن
اني عفتهم وصعدت
صاحني هاي وين تعالي جهزي الغده
ميت من الجوع
حميت الاكل وصبيتله
وبقيت منتظره اتعمدت انزع العبايه
جان لبسي بنطرون كابوي ثلجي
وفوكاه بدي ضيك وقصير لون ماروني
ونزعت الشال
جان يكلي اصعدي بدلي لا ادفنج عدله
امير هنا ساعه ونزل وشافج
خل اصب الجاي واصعد فرد مره
اصعدي وانجبي
اني اصب الجاي
عفته وصعدت
غلست حتى ع المواعين
شفت الجهال هادئين نمت وغفيت
شويه ودك جهازي
هو الغثه
كلت لنور ارفعي خط وكوليله ماما نايمه
كلتله سمعته تكله خطيه اكعدها
يله راح اكعدها
ماما هذا بابا يريد يحجي وياج
اخذته حجيت
الووو
وجعوووو ليش تخلين نور تحجي
مو نايمه خيرك رايد شي
انزلي اغسلي المواعين
الغسل عبالي شو شيريد قابل طايرات
راح انزل
طبكته
نزلت لكيته كاعد ع الكرسي بالمطبخ
غسلتهن وردت اصعد
هاي وين
اريد اصعد
تعالي رتبي الغرفه وطلعي ملابسي
راح يجون هسه ياخذوها
رحت بدون صوت
اجه ورايه
كعد خله رجل ع رجل ويكلب بالجهاز
بديت انقل بملابسه خليتهن بالغرفه الثانيه
بقه فراش الجربايه اذن
كتله راح اصلي وارجع اكمل
صعدت صليت وكملت
رجعت لكيته شايله هو الفراش
بقن بس اشياء خفيفه سويتهن وكملت
سمعته خابر وكله يله تعالو اخذوها
رحت للمطلخ نظوري كلي جوعان
محتاره شاسوي عشه
اجه امير كال راح اجيب عشه من بره
لتسوين شي
زهراء هنا بالمطبخ يمي
سالتني عن البنيه وسولفنه شويه ودخل سكتنه
كال وين العشه
كلتله زهراء راح امير يجيب من بره
كلي كومي سويلي مااريد جاهز
طلعت كبه وسويتله طماطا وطرشي
كعد اكل وصبيتله جاي
كال لحد تطلع بره بعد
اجه امير وجايب الاكل
جايب لفات كص وكباب
كال والله ذبح هذا كله
ع مودج جبته من واحد علي ازدحام
كتله شكرا تعبتك ويايه
لا يابه تدللين
كعدنه نتعشه سويه
وره شويه دخل كال كومي انطيني ببسي 2
عفت العشه وكمت حضرتله اكلاصات والقواطي ومي
غسلت بعد مااشتهي
كامو يحجون عليه تعاي اكلي
والله شبعت مااشتهي
وخرولي لفه كالو خاف تجوعين
اني الي اكله وحده بالليل حتى اذا اجوع مااكل
لان موزين الاكل بالليل
سويت جاي اكيد راح يكول ع جاي
جهزت حتى الاستكانات
نص ساعه واجه راد يحجي صبيت اله
هو بقه صافن بوجهي
اخذه الجاي واخذ نظوري ويا
رجعت للصاله
كلت لخاله تجيب احجبه مالت الاميرات لنور
لازم تتحجب لان كبرت وراح تتكلف
كتلها اسويلها حفله بسيطه حتى تشجع ع لبس الحجاب
هي فرحت
كتلها اعزمي اي صديقه تعجبج
بعدلها تقريبا 10 ايام للتكليف
ثاني يوم يمكن راح حيدر يعقد مااعرف
خاله راحت للسوك وصيتها ع شكم شغله ع حساب نوره
ووصيتها ع احجبه
رجع العصر سالته ع الغده كال مااريد متغدي
بعد لحد تطلع راح يجيبون الغرفه
وره شويه اجوي وبدوا يشدون الغرفه
كلي جهزي العشه الهم
رتبته الهم واخذه واخذ ببسي ويا
بقوا ل11 بالليل كملت الغرفه
اني بالمطبخ كلي تعالي رتبيها الي
ابقى يم الجهال واني راح ارتبها
صعد يمهم واني بديت ارتبها ونضفتها
بعدها فرشت الفراش
ورتبت ملابسه كلهن
ملات الدوام وحد وملات الطلعه وحد وملات البيت وحد
بقيت ل3 ونص اذن
اتوضيت وصعدت ردت اصلي
لكيته بسابع نومه نايم بفراشي
عفته كملت صلاتي ونزلت كملت الغرفه تقريبا ب6 حيل تعبت
حتى الفرشه جايبها فرشتها ورتبتها اله تشبه 👇
الغرفه طلعت تخبل اعترف ذوقه كلش حلو
بقيت صافنه هنا راح ينام وهنا هي راح تنام بحضنه
زين هم راح يتغزل بيها وهم راح يكلها احبج
اي اكيد يكلها
لان هم كلي وجذب عليه
اكيد لكل وحده يكلها
احس بنفسي حيل مخنوكه
معقوله اجهز غرفته بنفسي
لج زينب هاكد عندج قوه وتتحملين بس ليادوب راح تتدعين القوه
ردت اطلع وكفت بالغرفه واشوف اخاف بيها نقص او متعجبه
مااحس اله يحجي هاي هيج عاجبتج الغرفه وهاكد صافنه عليها
اني من صدك طفرت واخترعت
كتله لا ع شنو تعجبني بس صافنه اخاف نقص بيها
بس هذا الشي اني اقرره
اخذله فره بالغرفه وفتح الكنتور
يعني لاباس بيها
شاف العطور مخليتهن ع الميز
ذني غيري مكانهن
لان اكيد العروسه تخلي المكياج هنا
وين اخليهن الك
بالكنتور
اخذتهن ورتبتهن اله
صار ورايه وهمس باذني
حيدر : هواي لحيت ع امي حتى تخطبلي
ادري بقراري هذا راح استعجل بي واكيد بالعجله الندامه
راح اتندم لو لا مااعرف بالضبط
كل الي اعرفه اريد اغث زينب
واني هم تعبت من هذا وضعي
شفت امي جامده
سالت ابن عمي ع وحده من اقربائنه بلكي يعرف
كال بنت عمي فلان بس مو عمي اللح
كال بنته ارمله وعنده بنيه
وحيل مؤدبه وحلوه
بغير محافظه
كتله انطيني معلومات عنهم لان مو هاكد اعرفهم
انطاني معلومات كامله
وكال علاقة امي قويه بيهم
راح اخليها تحجي وياهم وتاخذ الموافقه حتى يرحون عمي وعمه
كتله اوك راح انتظر خبر منك
رحت لاهلي وخبرتهم
وره يومين خابرني كلي روحوا يابه موافقين ماعدهم مانع
وكتلهم الولد مستعجل وكالو ماعدنه مانع
بس اهم شي زوجتك تروح وتخبرهم ماعدها مانع
خبرت اهلي وكتلهم روحوا شوفوها
وانطيتهم 5 ملايين نيشانها
وخبرت زينب حتى تروح وياهم
كلت فرصه حتى اغثها
وفعلا ع اعصابها راحت وياهم
بقيت اني هنا
خابرتني امي وكالت طلبوا عشره والغايب 25
اعترف ضجت ولو ماجنت مستعجل مجان اوافق ابد
ذوله يدورون ماده
بس ع عناد زينب وافقت
رجعوا وبقوا يحجون واني ولا همني
رادت تصعد كتلها تعاي صبيلي غده
صبت بس هاي اشو نزعت العبايه وجانت لابسه لبس يخبل عليها
اني اتعجبت كل مره تخجل مني بس هسه لا
شنو الفلم مااعرف
الصراحه مااتحمل تبقى هيج يمي
اتحججت بامير ردتها بس تروح من يمي
اتفقت وي ناس ياخذون الغرفه اتبرعت بيها لواحد يريد يتزوج
خابرتها حتى تنظف الغرفه
بس خلت نور تحجي وعصبت عليها
نزلت العجيب شاطلب منها متعترض ابد
رغم الي سوته وراحت لابن عمها وسوت علاقه ويا
بس حجايه وحده منها وتكلي لاتتزوج ابطل والله
اتمنى تكلي مااحب ابن عمي احبك انت
بس ولا كانو حيل اضوج من اشوفها متجاهلتني
كملت الغرفه واجوي اخذوا الغرفه
ثاني يوم طالب اجازه
رحت اني وابويه
عقدت محكمه وبعدها عقدنه سيد
شفتها البنيه حلوه ومابيها لوله
بس الصراحه نقطه ابحر هي وزينب
فرق 5 سنوات بيناتنه
بقينه اتغدينه يمهم وحسيت بيها تتنغوص ع سالفة امي
بنتها عمره 4 سنوات
ماعندي مانع تجيبها وياها لو تخليها يم اهلها
لابسه عبايه همزين
اتفقت ع موعد الزواج ورجعنه
اني مشتري الغرفه وموعدنه العصر
اجوي واتعشو يمنه
كملوا بوقت متاخر
طلبت منها ترتبها
صعدت فوك يم الجهال
اباوع ع الغرفه مشوها
هاي شلون اني هيج سويت
بسرعه نمت حيل نعسان وتعبان
كعدت ع المنبه
شفت نفسي هنا بغرفتها
وهي ماكو
متوقعتها بعدهي ممكمله
رحت ولكيتها تباوع للغرفه
مااعرف ليش اجاني احساس ضايجه
بس هي كالت لا
بعدين فتحت الكناتير
اعشق ترتيبها مثل مااريد بالضبط
بس العطور حبيت اغثها وكتلها خليهن بالكنتور
عبالي تحجي شي
بس ولاكانو
ودتهن للكنتور واتقربت الها
همست باذنها ليش كلبي حاس بانج ضايجه ومابودج اتزوج
لاوالله احساسك مو بمحله
لان ماالي علاقه بيك التزوجت والماتزوجت ماتعنيلي شي
اني هنا شغلتي واضحه ومتتغير ابد هم خدامتك وهم مربيه لجهالك
متاكده
اي متاكده
وخل يكون بعلمك
والله وروحه لاخويه مااسامحك هالمره لو اموت
واني متاكده راح تتندم وتجي تتوسل بيه بس اسامحك
بس مستحيل افكر ولو تفكير اسامحك
كمت اضحك شكد واثقه من نفسج لعد
اني اتوسل بيج ع شنومثلا
انت بالنسبه الي انتهيتي ومتهميني ابد
وهسه روحي جهزيلي الريوك وكتي راح مفارغ لسوالفج التعبانه
بدلت ورحت للمطبخ لكيتها مجهزه الريوك
اتريكت ورحت للدوام
حجزت بالفندق بكربلاء يومين
قرب الموعد وجهزت كلشي
واتصلت بيها كالت ماعندي شي كلشي جاهز
كعدت الخميس واتضاهرت فرحان بس الحقيقه لا
رحنه اني وابوي وامي وامير
اتغدينه يمهم ورجعنه اني وياها طلعنه لكربلاء كبل
واهلي رجعو ورجعوا الجنط ملاتها وياهم
كالت مااحب احد يلمسهن اني ارتبهن
انطيت علم لامي
وصلنه تقريبا المغرب
دخلت سبحت كبل وجبت ويايه الدشداشه لبستها
وبعدها هي هم دخلت سبحت
وطلعت لابسه ملابس نوم
كتلها راح اروح ازور واصلي وارجع
تروحين ويايه
لا بعدين ازور
رحت زرت وصليت وجبت ويايه عشه ورجعت
كعدنه اتعشينه وكملنه
بعدها اتقربتلها ماانكر بلهفه لان من زمان ممتقرب لوحده
وهي هم تجذب بجسمها ولبسها وحركاتها
بعدها نمت شويه وكعدتني كالت اريد اروح ازور
لكيتها مبدله
كتلها يله رحنه زرنه ورجعنه
هم نمنه سويه وبعدها غفيت
كعدت الساعه ب1 طبعا هاي الفتره التزمت بصلاتي
كعدت صليت ورحت جبت غده
رجعت جانت كاعده اتغدينه سويه
وهم خلص اليوم عادي
ثالث يوم رجعنه الصبح
حاب اشوف زينب من تشوفنه
وصلنه ودخلنه كبل لاهلي
طلبت منها تسلم ع الكل
لكينه الكل نايم
رحنه لبيتنه ونمنه
كعدنه الساعه ب4 سبحنه ورحنه لاهلي
لكيت الكل بالصاله
سلمنه عليهم
واجه الدور الزينب
كالت مبروك وان شاء الله السعاده الابديه
شكرا
وبوست مروه الي هي زوجتي
راحت بدون صوت حمت الاكل وجهزته
رحنه اتغدينه
وبعدها شربت الجاي
صارت عيني بعين زينب
مكدرت افسر نضرتها الي ابد
مااعرف عتب لو صدمه لو لا ابالي
كل الي اعرفه نضرتها الي دوختني وخلت بالي مشوش
عيوني تراقبها غصبا ماعليه
مروه راحت كالت اعزل ملابسي
واني كعدت بالصاله
كال امير بعد اسبوع ويجي محمد
لازم نستقبلهم بمطار بغداد
كتله اني اروح استقبلهم
ابوي كلي
ابني زينب من يوم الرجعت لهنا لليوم مراحت لاهلها
شنو يابه انت مانعها
لا وليش امنعها
بالعكس خلي تروح وتغير جو
اني هسه احجي وياها تجهز نفسها باجر اوديها
رحت للمطبخ وهي تسوي كبه كاعد
كتلها باجر جهزي نفسج من ارجع من الدوام اوديكم
سكتت محجت شي
بس حسيتها حيل ضايجه
ردت اسال بعدين بطلت
كلت هسه تاخذها بغير شي
اريد تحجي
كتلها ترحون شوي بعد وتباتون
كالت لا ماابات
باجر ودينه وبابا يرجعنه
رحت لبيتي
ومروه تعزل بملابسها
تمددت ع الجربايه اكلب بالفيس
لليل اتعشينه ونمنه
ثاني يوم دزيت زينب لاهلها
بالليل خابرتها ابقي باتي
كالت لا بابا راح يرجعني
رجعت
بعد 5 ايام رجع محمد وزوجته
استقبلناهم بالمطار اني وابوي وامير واهلها لرسل
جنه حيل فرحانين بي
رجعنه وفرحوا من شافوا زينب راجعه
وانصدموا بمروه
عرفتها عليهم
بيومها بقينه حجه للصبح
خطيه حيل مشتاق النه واحنه كذلك
طلب من زينب باجر تخبز خبز حار يكول مشتاق للخبز
ثاني يوم سوت دولمه هو مشتهي
وسوت تمن ومرك باميا
وخبزت خبز حار
حيل مشتاقين للخبز الحار
اني اتعمدت اروح يمها وهي تخبز
اموت ع الخبزه الي تطلع من التنور
عيوني تراقبها
احس كمية الحزن الي بعيونها متنوصف ابد
مااعرف ليش حاس ضلمتها هاي المره
ابد منطقت ولا بحرف وياها
بعدها سوت كيكه لنوره
عزمت صديقاتها الي بالمدرسه والي جوارينه
وبنت اخو زهراء
حيل فرحت واتحجبت من يومها
التزمت بالحجاب
امي كالت قرب موعد زواج اختها خطيه يوم وديها
شوكت الزواج
بعده مو هذا الخميس الخميس الي بعده
اليوم اربعاء صادف
كتلها الله كريم
كلت لنور صيحيها لامج
اجتي كتلها جهزي نفسج باجر ادزج لاهلج وابقي هناك يمهم شكم يوم
لا ماكو داعي مااريد ابات
اروح من الصبح وارجع بالليل
ع راحتج
ادري بيها اذا قفلت ع شي تقفل
وهاي لان اني منعتها تبات يم اهلها
رجعت للبيت
مروه نظيفه ومرتبه عكس حنان
ودائما تحاول تكسبني الها
سالتني ع زينب
كتلها اتمنى متجيبين طاري هاي السالفه ابد
والافضل متدخلين بيها ولا تغثيها ولا عليج بيها
كالت تامر امر
بس تكدر توديني لاهلي لان عزمونه
شوكت
باجر
الله كريم من ارجع من الدوام نروح
وعفيه نبات هناك
لا ماابات ابد
عفيه مو جمعه وماعندك دوام
والله مشتاقه الهم ولبنتي
بقت تتوسل بيه قبلت
مابيها اي سلبيه مروه
وبنفس الوقت عاجبني اسلوبها ويايه
بس عيبها الوحيد تتنغوص وشايله خشمها
ثاني يوم رحت للدوام ورجعت من وكت
خبرت زينب تجهز نفسها
ومروه همين
نروح نودي بالبدايه زينب ومناك نروح
اتغديت وسبحت وطلعنه اني ومروه
مروه قبل لااحجي شي صعدت بالصدر
اجتي زينب ومبوشه
اكيد مااعرف ردة فعلها شنو
صعدت وره ومشيت
عيوني عليها بالمرايه
لان ادري بيها متشوفني
بس ماادري ليش احس بيها ضايجه حيل ومقهوره
اني ادري بيها محبتني ولا يوم تفكر تفكير تحبني
ابد معرفت افسر تصرفها هذه
مرينه ع ابو الموطا اخذتلهم كلهم
زينب جبتلها سلاش الي تحبها
الجهال اكلوها
كتلها انتبهي عليهم لا يدمرون السياره
كتلها اليوم ابقي لان مراح اكدر اجي ارجعج
عادي ماكو اشكال بابا يرجعني
سكتت مااكدر اجاوبها
وصلنه ونزلت
بس موطتها بقتها عبالي نستها
هاي موطتج نسيتيها
لا مااريده اكلها انت
سدت الباب وراحت
انتظرت لمن فتحوا الباب ورحت
وصلنه العصر
استقبلونه وفرحوا بينه
بس لاحضت هي وبنتها علاقتهم مو هالكد
يعني لقائهم مو بلهفه
ولاكانو صارلهم هواي مملتقين
اخوتها حبابين وابوها همين
رغم مااقربائنه بس مااعرفهم ولا ملتقي وياهم
اني طبعي مااحضر لا اعراس ولا فواتح لاقربائنه
ابويه ومحمد دائما يروحون
اتعشينه وخلصنه وبالليل طلعوني الولد
رحنه للكوفي لعبنه بليارد وطاولي
رجعنه وقت متاخر
ثاني يوم اخرونه ع الغده
للعصر رجعنه
لكيت البنات كلهن هنا ع حساب محمد
رحت يمهم كعدت
زينب كاعده بس ذابته ع الصامت
احسها عايشه بغير عالم
زينب : قربه يوترني وشعوري مخربط
اول مره احس بغيره مو طبيعيه
جنت اتمنى ميتزوج
اتمنى يكلي اريدج بس انت بحياتي
بس لا صارت صدك واتزوج
بيومها ابد مانمت ولا لحضه
هسه منيمها بحضنه
هسه يبوسها
هسه يهمس باذنها انت حلوه
هسه يكلها زينب مجرد خدامه ومربيه
عقلي راد ينفجر من التفكير
مشكلتي اكل بنفسي
ماعندي شخص اشكيله همي
اهلي مستحيل افكر اشتكي بيوم
زهراء رغم علاقتي بيها قويه
بس مااكدر اشكيلها لان متعرف سبب زواجي من حيدر شنو
اني حتى فاطمه لحد الان متعرف شعوري اتجاها
الوحيده الي اشكيلها همي هي رسل زوجة محمد
احسها من صدك اختي
جنه نتراسل ع طول اني وياها
بس من اخذ جهازي بعد ابد مااتواصل وياها
حيل اخجل كدامهم من ماعندي جهاز زين
مو قصدي استحي منه لا بالعكس اني انسانه بسيطه
وابد متهمني هاي السوالف
بس اليغثني اكيد بين للكل هو ماعنده ثقه بيه
هذا التفسير الوحيد
اعترف جنت مااضوج من اتزوج حنان
بس هسه لا
جنت التهي بالموبايل وبالقصص
من اقره قصه واشوف هموم غيري تهون عليه قصتي
بس هسه وين انطي وجهي
حتى لاهلي مابدي اروح
اخاف انحرج بالاسئله
شريد اكلهم اتزوج مره ثانيه عليه
بقيت ع نار لمن رجعوا
شفت الفرح بعيونه
سلمت وباركت
رحت جهزت الغده
باوعتله بنضرة عتب
ليش هيج سويت
ليش رجعتني اذا ناوي تكسرني
يعني حلال عليك تشوف حياتك وتتزوج
واني حرام عليه كلشي
اني ماطلبت منكشي بس ردت اكمل دراستي
احساسي صعب افسره
هو اني متعجبه ع نفسي
معقوله اغار وليش اغار
اشو ولا موقف اتذكره منه
بس الاهاين والذل
الصراحه نفسيتي زفت
اخذني لاهلي
وخبرتهم ع زواجه
اتخبل بابا
لج بابا شسويتي بحياتج
والله دمرتيها دمار
ليش رجعتيله
وانت متاكده راح يذلج
والله بابا اني طلبت منه
كتله متلمسني واني ع حساب الجهال رجعت
من شافني مصره اتزوج
شفت نظرة الحزن بعيون اهلي
لو يدرون شنو الي بداخلي جان اتخبلو
لليل رجعني بابا
علاقتنه مو مثل قبل بين اهلي واهله
بابا ميدخل وهم كذلك
احلى خبر سمعته من عرفت محمد ورسل راح يرجعون
حيل فرحت وحسيت بنفسي طايره اجوي
وطبعا نبجي اني وياها
خطيه حيل تحبني واحبها
سويتلهم شكو اكله يحبونها
وكيك دزيته الهم للبيت
ارتاحت وراحت لاهله
من رجعت سولفتلها كلشي
اتخبلت كالت ولج والله ميستاهلج
حرامات ضحيتي بكلشي
شاسوي رسل والله مااتحمل بعد جهالي
هاي هم مشكله
بس تدرين انت تحبينه لهذا المغرور
لا مستحيل احبه اصلا اكرها
دسكتي احسن الج
لج الحب واضح عليج ومتكدرين تخفينه
غيرتج علي هاي اكبر دليل
لج ياحب هذا
هذا نفسه الي صارله اكثر من 4سنوات بس يذلني ويهيني
كلتلي لج هذا الكلب اذا دك ينسى كلشي
والله مااعرف شاكلج
بس تدرين اذا طلعت صدك احبه لهذا الاناني
اله اشلعه كلبي من ضلوعي واحركه حرك بالبانزين
ههههههههه ديري بالج لاتحتركين كلج
والله يارسل مستحيل افكر ارجع اله
هواي اتعذبت بحياتي
كلشي ماشفت من الدنيه غير بس شلاع الكلب
ولج والله تهون وتفرج وتصير سوالف
احنه النسوان مابينه حض
حجايه طيبه من الرجال ننسى الدنيا
والله يازينب بس يتقرب عليج وتسمعين حجايه حلوه
اذا مانسيتي كلشي اني مااتسمه رسل
لاوالله يارسل متوهمه
اني حيدر مو جرح واحد جارحني
ترسني جروح والدم ينزف
مستحيل بيوم يلتامن جروحي
وهاي المره اذيته وصلت للعضم
مستحيل اضعف امامه
ارتاحيت من سولفت وياها
قرب موعد زواج رنا
واني مبتعده عنهم خطيه
كلي اوديج لاهلج وابقي
بس اني مستحيل افكر ابات
ثاني يوم جهزت نفسي
طلعت وجان انصدم مصعد زوجته بالصدر
حيل ضجت
كلت هسه عليمن اضوج
اشو هو من البدايه رفضج تصعدين بالصدر
اكيد ميتشرف بيه
اشتره موطا
مايدري لو يطيح بيدي اشمرها بوجها والله
عفتها ورحت لاهلي
وزعلانين عليه
كتلهم ملتهين بمحمد خطيه
كالت ماما المفروض تساعدين اختج خطيه
والله ماما ماالي واهس بكلشي
لج والله انت الوحيده المارده كلبي مرد
نص ظيمي من وراج
والله ماما ماعندي شي
بس نفسيتي زفت
لج اذا نفسيتج زفت الله اليعلم بكلبج شنو
بس ماما خلي عينج بعين الله وتهون
رنا راوتني ملابسها
كالت مااخذت هواي لان راح نستقر هناك
عود مناك اشتري
توسلو بيه ابات واني رفضت
رجعت وهو جان بايت يم اهل زوجته
لكيت البنات كلهن هنا
حسيت براحه
من يجمعن انسىه همومي
ثاني يوم اتجمعنه ع الغده اكلت وياهم
بس الكل ملاحظ عليه كمية الحزن الي بداخلي
بس محد يحجي وياي شي
للعصر جنه متجمعين كلنه
اجه حيدر وكعد
طبعا اني بغير عالم
صحيح كاعده وياهم بس بالي مو يمهم ابد
لحد مسمعت محمد كال
يابه وين صافنه اشو صارلنه ساعتين نلغي بوحدنه
اسفه والله ممنتبها
لج بابا الدنيه متسوه والله
من شفتج وشفتيني مهمومه
اضحكي وعيشي حياتج
تصدكين من يوم الاجيتي لبيتنه لليوم مشفتج تضحكين ولا مره
شوكت تضحكين
الله كاتبلي شلاع الكلب
مكاتبلي الفرح ابد
يجوز بحاله وحده اضحك وصدك افرح
لمن الله ياخذ امانته مني
صدك راح افرح واودعكم بضحكه
الكل صاح
عمرج طويل ان شاء الله
ليش هيج تحجين والله الدنيه متسوه
الصراحه حيل مخنوكه وواصله وياي حدها
اكول صدك الله مكاتبلي الفرح ابد
كلت لمحمد صدك الدنيا متسوه والله
بس اني مو بيدي افرح
اتعوددت ع هذا وضعي
لان من صدك هواي ظلمتني الدنيا
اني حاب اطلب منج طلب ويمكن هاي اول مره اطلب منج
اتمنى متخجليني وترفضين
حيدر مخلي رجل ع رجل ومكتفي بالصمت
كتله كول انت تامرني امر
اليوم حاب اعزمكم كلكم ع العشه بالمطعم
واتمنى اطلعين ويانه
لا بهاي اعذرني مااكدر اطلع
اطلب مني اي شي ولاتكولي اطلعي
ليش اكو مانع
حيدر ميقبل لو شنو
لا حيدر شعلي بيه
بس اني مااكدر وتعرف مبوشه ويني وين المطاعم
اكيد اكو سبب ثاني يمنعج
التفت ع حيدر
انت متخليها تطلع
لا اني شعليه بيها هاي كدامكم واسالوها
حيدر بروح مروان وبداعت نظوري احجي الصدك انت متخليها تطلع
كال اي اني مانعها ماتطلع بس لاهلها
وليش عود
هيج يعجبني
يعني شلون يعجبك
لك انت متزوج 3 مرات غير زينب
ولا وحده حكمتها ولا وحده منعتها
شمعنى هاي
لان البنيه شريفه هاي معندك ثقه بيها
بس تدري انت متوالمك الحبابه والشريفه لان مو ثوبك
انت هاي زينب جريمه تكون زوجتك
هو سكت منطق ولا بحرف
كلي زنوبه اليوم لازم تروحين ويايه لو مو حيدر
واريد اشوفه اذا رجال خل يمنعج
هو يحترمه لمحمد صدفه اشوفه يرادده
احسبوا حسابكم وره الصلاه كلنه نروح
محمد فدوه اعذرني وداعت نظوري مو لان حيدر ميقبل اطلع
اني ماالي واهس اطلع
اذا تعزني اعذرني
لعد منروح كلنه
لا الله عليك بروح مروان روحوا
ولتشيل همي
والنبي نعسانه بس اطلعون راح انام
الكل سكت
راحوا ورجعوا
ثاني يوم هم متجمعين وكلهم كعدوا ع الغده
اني ماكعدت رحت للمطبخ
بقيت الهي نفسي
سمعت صوت محمد وحيدر عله
بس ممركزه ع الحجي ابد
اشويه واجه حيدر غسل بس مبين عصبي
حتى جاي مشرب راح لبيته
وره شويه طلعت ورا زوجته
زوجته مبين عليها مغروره وشايله خشمها
ابد مختلطت بينه مجرد سلام
كملوا
سالت البنات شصار
كالت فاطمه محمد طلب من حيدر يطلكج
كله خل تشوف حياتها
هو تخبل كال مااطلكها ابد وعاف الاكل وكام
كالت ساره والنبي هذا يحبج ويموت عليج
بس كبرياءه طاغي علي
كلتلها بنين دخلي يطير هو وكبريائه
كتلهن لا والله مستحيل يحبني
اليحب ميجرح ابد
بس هذا اناني
حب يمتلكني عبالك لعبه اني
نسه اني انسانه وعندي مشاعر
بس والله يجي يوم ويعض اصبعه ندم
خلال 4 ايام ابد ملمحته ولا دخل لهنا
حتى الاكل هناك ياكلون
زوجته يجوز تطبخ مااعرف شنو
باجر حنة رنا
واني اصلا ولا حضرت نفسي ابد
حتى وجهي منضفته
بس راسي حيل يوجعني احس بي يريد ينفجر
اخذت بندول وشويه صار احسن
بالليل اجتي نور كالت بابا وعمو محمد يصيحوج
وين همه
بالحديقه
بقيت دايخه ياربي شيردون
بس لا مصيبه جديده
رحت وجان جهاز حيدر بيد محمد
حسيت الوجوه متتفسر
حيدر يباوع عليه من فوك لجوه بنضرة استهزاء
كلي محمد تعالي اكعدي
كعدت بس اعترف الخوف امتلكني مااعرف لويش
جان يكول محمد ........
مساء الخير ع اجمل متابعين
اسفه ع التاخير والله لحد الان خطار ومااكدر اشوف دربي من الفره 😭😭😭 كوه اجيتكم راح انشر وارجع للفره 😂😂
اتمنى لكم قراءه ممتعه
🌹🦋 البارت 44 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
جان يكلي حاب اسالج سؤال واتمنى تجاوبيني عليه بصراحه
اسال الله شاهد مااجاوب اله الصراحه
راواني صوره بيها محادثه بيني وبين علي ابن عمو
الصراحه انصدمت ولساني انعقد مااعرف شاجاوب
سكتت
كال حيدر ها اشو سكتي
لازم انصدمتي شلون عرفت بعلاقتج ويا لهذا السافل
هذا هو النذل دزها اليه
سكتت لان ماعندي جواب الك انت بالذات
لان مع الاسف شكيت بيه وباخلاقي
كلي محمد احجي حاب اسمع منج
اخاف اكول جذب ومراح تصدكوني
لان المفروض انتو التحكمون عليه
انتو عاشرتوني وعرفتوا اطباعي واخلاقي
احب اكلك يامحمد
اذا صدكت اني هيج ممكن اسوي
مااكول غير الله يسامحك يامحمد لان الظاهر متعرفني زين
واذا لا متصدك اني ممكن هيج اوصل لهيج مرحله من النذاله
اكيد راح اكون ممنونه منك مدى العمر
لان عرفت طينتي شنو
4 سنوات حجابي استحي انزعه كدام حيدر وهو زوجي
بهالسهوله هيج اسوي وي ابن عمو الغثه
اما بالنسبه لحيدر ميهمني رأيه بيه
لان اكيد مصدك اني هيج اسوي
اني ماعندي علم بهاي الرسائل كلهن
لامراسلته ولا حتى رقمه اعرفه
اصلا ممدخله رقمه بجهازي
وهو شنو علي واحبه
هل ممكن اضحي بابني ع مود زواج
اني لو هيج افكر
جان سقطته للطفل من البدايه
وهسه اني عايشه حياتي
لو حاولت اكسبه لحيدر واقبل بي
مو اجي بعد التعب والسهر والتضحيه
افكر احب
وياريت رجال من صدك
هذا واحد نذل
لو مانذل مدز هيج شي
واني عرضه
يعني محمد تصدكني اني احب هيج شخص
اني الصراحه ثقتي عمياء بيج
وكتله لهذا رجلج الزوج الكمش
بس حبيت توضحيله اله مو الي
الصراحه اني دخت شلون دز من جهازي وشلون صور المحادثه
عقلي واكف عن التفكير
كال حيدر خل نفرض جذب
شلون تفسرين هاي المحادثات
اني ممجبوره ابررلك وافسرلك ولا مجبوره اشرحلك
لان اعتقد هاي السالفه صارت واحنه مطلقين
يعني من جان ماالك حق تحاسبني
المفروض انت بصفتك ضابط تحقيق هاي السوالف تعرفها وهي طايره
سكت محجه شي
اني لو عندي علاقه جان اتزوجته
ع شنو متحمله الذل والاهانه يمك
محمد كله روح جيبلي جهازها لزينب
كمت ابجي من صدك ضجت
طلع يشك بيه احب هذا الغثه
كتله لمحمد والله العظيم مفكرت بيوم ارتبط بشخص
ولا حبيت شخص
الامومه جانت طاغيه عليه
وحتى من داومت بالجامعه
لبست حلقه باليسره
حتى اليشوفني يكول متزوجه
اني جنت اكدر ارفع قضيه ضد حيدر
بس محبيت ادخل محاكم وتصير سالفتي بكل لسان
راح جابه وجان مقفول
كتله طلبت الطلاك بس لخاطر اهلي
لان كال بابا الناس اكلتنه اكل
يكولون مطلكين وساكنهم حتى ينام ابيتهم
وتشوهت سمعتنا
ولحوا عليه اهلي حتى اتزوج علي
والنبي هددتهم كتلهم انتحر بس تفتحون الموضوع ويايه
وانسد الموضوع
طلبت من ابويه يحجي وي حيدر حتى يرجعني وهو رفض
هذا صافن عليه
بس ابوج ابد مطلب مني شي
لاحجوا وياك هو وعمو وانت رفضتني
اخذه الجهاز محمد وفتحه
وجان الاشعارات تجي وحده وره الثانيه
فتحهن وبده يقره
معرفتهن منين
كله هاك حضرت الضابط
استلم وشوف
والله مااعرف شلون انت ضابط وفوكاها ضابط تحقيق
انت لو امرك بيدي جان خليتك جندي وهم هواي عليك
واخلي الرايح والراد يمسح بيك الكاع ع هاي سوايتك
حيدر : من رجعت من اهل مروه وشفت زينب بغير عالم
مااعرف ليش ضجت عليها
لان واضح عليها الحزن
مااعرف ليش هيج سوت بنفسها
يعني لو مطاوعتني من البدايه ومطالبه الطلاك
والله جان خليتها تكمل الدراسه واي شي تريده انفذه الها
تدري بيه اتخبل من العناد
بس هي الوصلتنه لهاي المرحله
يحجي محمد وياها وهي بغير عالم
بعدين حجت مااعرف بيش جانت صافنه وبي تفكر ي
طبعا صدك لهسه مشايفها تضحك ولا مره ابد
مااعرف شصار بيه من جابت طاري الموت
ج اتمنى يومي قبل يومها
رغم الي صار كله اني احبها لزينب واعشقها بجنون
اتخبل اذا صار بيها شي
اكبر دليل من شفتها ضايجه عقلي وكف
مااحب اشوفها هيج ابد
رفضت تروح للمطعم واني جنت اتمنى تروح
بس هيهات بعد تطلع
اني اثول ذيج المره كوه خليتها تتاقلم وتطلع وخليتها طبيعيه
رجعت بسهوله رجعتها للصفر
الصراحه ابد ماارتاحيت بالمطعم
مااعرف ليش كلبي يوجعني عليها
اني كاعد وياهم بس بغير عالم
الكل لاحظ هذا الشي عليه
ردت بس ارجع حيل ضجت
رجعنه وجانت فوك هي
ثاني يوم متجمعين بالغده
حجه محمد كال حيدر انت تزوجت وهاي البنيه حبابه
مو مثل ذنيج ان شاء الله تنسعد وياها
اجه الوقت الي تعوف انانيتك ع جها واطلكها زينب
بس هالمره خل تاخذ ابنها وياها
خليها تشوف حياتها خطيه
تكسر الخاطر
بعز شبابها وانت دافنها جوه الكاع
الكل عايش حياته طبيعي اله هي
شنو ذنبها
ذنبها تحب ابنها وضحت بكلشي ع موده
بس هذا الشي مو معناه نستغل نقطة ضعفها
اني اتخبلت
مااعرف شيصير بيه من يجيبون الطلاك ع لسانهم
هو اني مره اتخبلت وطلكتها
مستحيل اطلكها
كمت اصيح كلتله
محمد اتمنى محد يتدخل ابيناتنه
عود خل تجي بنفسها مثل ذيج المره وتكول طلكني
اني اطلكها
ابويه كام يحجي
مو بكيفك غصبا عليك عوفها
خطيه تعذبت هواي
اعتقها لخاطر الله
عفت الاكل وكمت
حيل ضجت
اني صدك اناني اتخبل اذا عافتني وراحت لغيري
رحت للبيت بيومها روحي طلعت
قررت مااروح لاهلي
تركت الشرب صار فتره
بالليل رحت كمت افتر مثل المخبل بالشارع
ردت بس ارتاح وانسى
ثاني يوم اتسوكت لمروه وكتلها هنا اطبخي
حاولت تعرف قصة زينب
كتلها لتساليني ابد
اتمنى ماتدخلين
سكتت
الحلو بيها متلح عليه
وتحاول قدر الامكان تسعدني
ماتدري كلبي ينزف من وره زينب
حاير شلون ياربي
ماكدر اطلكها
ولا اكدر احسبها زوجتي
دائما ترفضني ومتخليني اتقرب عليها
اني متاكد مستحيل راح تتقبلني
اذيتها هواي وخاصه هاي الفتره
بقيت شكم يوم ابيتي ابد مارحت لاهلي
لمن اجه محمد وصاحني للحديقه
كلي احجي الي بكلبك
ليش هيج كرهتها لزينب
ليش اتزوجت عليها
اذا جنت ناوي تتزوج المفروض تتركها للبنيه
سولفتله القصه وراويته المحادثه البينها وبين ابن عمها
كلي لك حيدر هاي زينب تعرفها شنو زينب لو لا
اذا متعرفها اني راح اعرفك عليها
هاي الي ضحت بكلشي لخاطر ابنها
هاي التحملت خبالاتك لخاطرابنها
هاي الي عاشت ويانه اكثر من 3 سنوات او 4 سنوات بالذل وقبلت
متقبل تاكل ويانه لان تخجل
هاي الي مايوم شفناها بمنظر مو حلو
هاي الي طاعتك طاعه عمياء
مستحيل تفكر تتنازل عن ابنها
وع مود شنو
ع مود زواج
هي لو يهمها زواج
جان حاولت تكسبك انت
لك لازم اكو خطأ بالموضوع
انت سالتها ع المحادثه
لا مسالتها بس من رحت للجامعه وحجيت وياها
كالت اني اذا طلكتني اتزوجه لابن عمي
اي واتزوجته
لا
ليش
ماادري
لانك غبي ومتفكر زين ابد
يعني مفكرت ولو تفكير شنو المانع الي مخليها بلا زواج لحد مارجعتها
اكيد ع مود ابنها
بس هي متاكده اذا اطلكت انت راح تاخذه منها وهذا جان الاتفاق ابينكم
يعني المفروض حاسبه حسابها لكلشي
سكتت معرفت شاجاوب
اني راح ادز عليها واسالها كدامك
بس ثق بالله ماعندي شك بيها 1%
بس راح اثبتلك تفكيرك وسخ وغلط
الصراحه امتلكني الخوف
مااعرف اذا طلعت ماعدها شي شراح يكون موقفي
بس اصفن واكول المحادثه البينهم واضحه واكبر دليل
اجتي وسالها محمد
تحجي واني صافن
جبت الجهاز
الصراحه نسيته مقفول ولا اجه ابالي افتحه
فتحه محمد وجان تجي رسائل
انطاني الجهاز وقريت
وجان انصدم
بنيه مراسلتها كاتبه عليها سمر
هلو زنوبه شلونج شخبارج
حابه اصارحج بشي اتمنى ماتحكمين عليه وتسامحيني
فدوه ضميري يانبني يوميه ومحمد
الصراحه علي طلب مني اراسله من جهازج
تذكرين من طلبت جهازج وكتلج اريد اخابر
هو طلب مني اكتب وادز لرقمه
مكلي يدزهن لرجلج ومحمد لو ادري ماراسلت
بس كلي حتى اتزوجها
بس اراويها الها واكلها وافقي لا اكل لعمي
اني عبالي هيج وكلت خطيه لان من صدك يحبج
ردت اساعده بس طلع نذل
عرفت بالصدفه دازهن لرجلج واتخبلت
رحت كلت لابوي واتعارك ويا وطرده
وشبعني كتل بيومها ابوي
وحتى علي موتني تموت لان فتنت
بس مهتميت
اهم شي ريحت ضميري
بس بقه بس انت فدوه سامحيني
والنبي مجان قصدي
ليش متجاوبين زينب
الووو
فدوه اروحلج والله الليل كله ماانامه
😭😭😭😭😭😔😔😔😔😔
ادري صعبه عليج تسامحيني بس والله مجانت نيتي ينهجم بيتج من وراي
المكالمات متنعد ولا تحصى
مستحيل اكدر اوصف شعوري بهاي اللحضه
اني اكبر غبي
لو مخلي الجهاز مفتوح جان من زمان اتلافيت الموضوع
ع الاقل جان متزوجت وهنتها اكثر
هستوني عرفت نضرت عيونها من صديت عيني بعينها
اكيد عاتبتني ع السويته بيها
الاصعب عليه الشروط الي شرطتهن عليها
مااعرف شلون راح اتصرف وياها
اني متاكد هالمره مستحيل تسامحني
شفت دموعها احسها تحركني حرك
مكدرت احجي ولا حرف امامها
حجت وي محمد
اني ماعندي اخو الي يدافع عني
الي الشرف تكون اخويه وسندي بالدنيه
اذا تقبل بيه ك اخت عندي طلب يمك
لج انت اختي والي الشرف اكون اخوج لان انتي انسانه تستحقين التقدير
وانت مطلبين انت تامرين امر
كولي شتردين
اتمنى تطلب من سيادة النقيب ميحاول ولو بالغلط يطلب يعتذر مني
ولو اني اشك بي يعتذر
بس خاف كلشي يصير
لان اذا حاول يعتذر مااضمن العواقب ابد
ويمكن احقد عليه اكثر لان باعتذاره راح يجرحني اكثر
اتمنى يحاول يبتعد عني قدر الامكان
ابقى اني بالنسبه اله مجرد خدامه ومربيه
وليحاول يحسبني غير شي
لان بوقتها راح يخسرني للموت
انطيتها الجهاز وعفتهم ورحت
لان مااعرف شاحجي بعد
وره ربع ساعه اجتي نوره
بابا هذا الجهاز دزته ماما
حسيت بنفسي مخنوك
بدلت وطلعت خابرت جماعتي
كالو تعال للشقه
رحت جنت محتاج اشرب اريد بس انسه
شربت لمن انتهيت بس ابد متقربت لوحده
بقيت بالشقه مااكدر ارجع بهاي حالتي
كعدت الصبح لكيت الساعه ب10
صادف عطله همزين ماعندي دوام
لكيت جهازي محترك حرك عليه
من محمد ومن ابويه ومن مروه
دخلت سبحت لازم اصحصح
راسي يريد ينفجر
خابرت محمد
لكيتهم متخبلين عليه
كايلتلهم مروه مارجع
عبالهم شو شبيه
طمنتهم ورجعت
وجان يستلموني ابويه ومحمد دك رزايل وغلط
اخر شي كلي محمد لازم اطلكها للبنيه لهنا وكافي
خطيه هنتها اكثر من اللازم
يعني اليوم حنة اختها وهي لهسه مرايحه
يعني شناوي للعصر وقت الحفله يله تاخذها
حالها حال الغربه
اهووو شلون نسيت ياربي والله خطيه
سالفة امس خبلتني خلتني مااكدر افكر
صحت نور
كتلها يله جهزوا نفسكم كلي لماما
انطيتها الجهاز وكتلها هم دزيلي صورتج انت وماما
كالت اوك
اني جنت خايف لامتروح
بس الحمد لله نزلت
طلعنه وجان تفاجئني من تصعد وره
هاي شلج بيها السالفه صارلج يمكن 3 سنوات وماناسيتها
ماارتاح بالصدر اله وره
زينب رحمه للحسين لتزوديها عليه
تعالي هنا ولتسويلي سالفه
حيدر اني اريدلي حجه حتى مااروح
لهذا السبب ياريت تخليني هنا وتمشي لا انزل
سكتت ادري بيها عنوديه وراسها يابس
وصلتهم ورجعت
رجعت لبيتي كبل
لكيتها هاي كالبه خلقتها
شكو خيرج
وين جنت امس
يعني مفكرت اكو وحده منتظرتك وقلقه عليك
وانت ولا مهتم تبات يم الكح....
ضربتها راجدي
هذا الاسلوب مااحب تحجين بي
وهاي الالفاظ اذا عدتيها ادفنج عدله
اطلع اسهر ابات ماعليج
سكتت همزين مراددتني
بدلت وكتلها راح انام مااريد اي ازعاج
نمت وكعدت يمكن ب6 جوعان
كتلها جهزي الغده
طبخها لمروه هم طيب بس مو مثل زينب
اتغديت وشربت جاي
احس بنفسي مخنوك
خابرت نور
كتلها ها نواره اشو مدزيتي الصور
مو ماما مااجت للحفله
شنو ليش مااجت
اتخربطت ومكدرت تجي
اني اتخبلت
ليش مراحت وتحججت بالمرض
خابرتها متجاوب
3 مرات يله رفعت بعدها
الووو
الوووو
قبل مااحجي كلتلي
قبل لتحجي اطمان مارحت للحفله
لتخاف مطلعت من البيت نفس مطلبت مني
هاي انت شكاعد تحجين
لج حنة اختج شلون مرحتي
اي عادي واذا اختي اذا انت منعتني من اي طلعه
مو مهم اختي اهم شي اطيعك انت
وين هسه انت
يم اهلي وين يعني
طبكته وبدلت ورحت لاهلها
دكيت الباب وطلع ابوها
جان متفاجئ بيه
سلمت علي وسالته ع زينب
كال فوك بالغرفه متخربطه
كتله تسمحلي اصعد يمها
اي ابني ادخل وروح اصعد البيت بيتك
شكرا عمي
صعدت دكيت الباب هواي منفتحت
فتحتها ودخلت
جانت نايمه وبصفها ام بي ثري والهيتفون باذانها
صحت زينب زينب
الظاهر نايمه من صدك
اخذت الهيتفون حبيت اسمع شجانت تسمع
خليتهن باذاني
مخليه نور الزين ماحضنته 👇
ادمرت دمار من سمعتها
من صدك خليتها مضحك هواي هنتها وهواي جرحتها
وابد مااستاهلها ابد
خصت وجان تطلع الاضرب منها
انت من دوني نمت 👇
ياالله والله دمرني دمار
كعدت يمكن حست بيه
كتلها كومي بدلي وخل ادزج للحفله
ههههه والله ضحكتني هاي ياحفله تقصد الي خلصت
انت شلون كدرتي متروحين اني مامانعج اصلا
كتيلي وكتلج لا حتى تحكمين عليه
وعليمن اكلك اني متاكده من جوابك
ولتنسى اني متعوده ع هذا الشي مو غريب عليه
زواجك الاول وزواج امير وزواج فاطمه كلهن مقبلت اروح
هالمره عادي محبيت اكلك وافشل نفسي
بس هاي تختلف اختج
حتى لو اختي شنو يعني
نسيت اهم شرط الك حتى ترجعني
مطلعين من الباب بس لاهلج وحتى ماالي حق ابات
اني الله كاتب عليه الحزن وشلاع الكلب من يوم ولادتي
مكاتبلي الفرح والراحه
هي مره وحده فكرت افرح بيها بيوم طهور ابني
وطلعت من خشمي
شكلتي لاهلج وبقيتي
نسيت اني ماخذه الاوسكار بالجذب والخداع
صرت خبره بهذا المجال
حيل ضجت من نفسي والله استحقرت روحي
يمكن اذيتها واصله للعضم
مااكدر احجي وياها
لااكدر اعتذر منها
يمكن اذا اعتذرت اجرحها اكثر
كتلها ابقي باتي اليوم وباجر روحي وياهم للزفه
لا ماابات ولا راح اروح للزفه
لتنسى هناك اكيد الكي علي اذا رحت
اذا ذيج المره شكيت بيه احبه
هالمره مو بعيده عليك تشك بيه نايمه ويا
عفتها وطلعت متحملت كلامها لان ياذيني حيل
كلت مااجيها ولا ارجعها
خبرت عمي كتله معانده تريد ترجع بالليل
خليها تبات هنا
لتجيبها واني هم مراح اجيها
كال هاي هي
حتى بالليل ادزها احللها يم هذا المختبر اليمنه
تحليل مالت شنو
مالت تايفوئيد لان الاعراض واضحه عليها
كلت مصدكين بيها مريضه
ميدرون بيها تجذب حتى متروح للحفله
حرت وين اروح
لااكدر ارجع للبيت ولا اكدر اتواعد وي جماعتي
حيل مخنوك
حرت وين اروح
اجه ابالي مكان يمكن هو المكان الوحيد الي راح ارتاح بي وانسى همومي كلها
توقعاتكم حبايبي شنو هذا المكان الي راح ينسى همه كله اذا راحله حيدر
زينب : مجنت متوقعته حيدر هيج يفكر بيه
يعني وين الحجي مالته وين انت انزه وحده
يعني كله الحجي جذب
حيدر لو يجي ويحلف بالقران ويكلي احبج
مستحيل اصدك بي
لان اليحب لازم يثق
لازم ميجرح ميذل ميتهرب من المواجها
هو لو مواجهني جان كدرت ادافع عن نفسي
مستحيل يجي يوم واسامحه
كل الي راح بكفه والي سواه من رجعني بكفه ثانيه
يعني ذلني ذل مو طبيعي
اخذ جهازي وجان صعب شعوري
ماعندي اي مبرر لموقفه هذا
يعني شاريد اكول
من رجعت للبوشيه اكدر اكول يغار عليه
ومن منعني من الدوام عادي ماكو مشكله لان هو جان سبب طلاكنه
من منعني من الطلعه هم نكدر نلكيله مبرر
بس الجهاز من اخذه مني ماكو تفسير غير واحد
زوجها ميثق بيها
اكيد ميثق بيها واخذه منها
هذا الشي دمرني دمار
هو من البدايه محبني وراح يحبني
هو راد يرضى غروره بيه نزوه وراحت
هو رادني من البدايه مربيه وخدامه وبس
مهما كانت علاقتي بي مراح يحسبني غير ذني
اني الصراحه حيل تعبت
علاقتي بي دمرتني دمار
مرات اكول الله يسامحك مروان من وراك كل عذابي
ومرات اكول لا اني السبب
اني المفروض احسب حساب للمستقبل
اني فكرت اهم شي ينطيني الفلوس مفكرت بالعواقب
يعني لو مصارحه ماما ع الاقل جان شاركت همي وياها
اني جنت اكبر غبيه اني الوصلت نفسي لهاي المرحله
المفروض مااذب الصوج ع غيري
شايله هم لحنة رنا اكيد مراح اكدر اروح
حتى اثبت اله مراح اموت اذا مطلعت
عباله الخيانه والغدر بالطلعه لو بالموبايل
والله الشريفه تبقى شريفه لو تخليها بوسط معسكر من الزلم
والمو زينه موزينه لو تقفل الغرفه عليها وتربطها بسناسل
هم تخون تخون حتى لو بالتفكير
بس مع الاسف تفكير الاغلبيه تفكير همجي
من حجيت وي حيدر ومحمد عافنه وراح
منطق ولا حرف
اكيد حس بغلطه وراح يتندم بس بعد فوات الاوان
عاف البيت وطلع
اكيد راح يلتجئ لاضعف الطرق
راح يشرب وينام وي وحده من ذني الشريفات
اني اعتقد الواحد من يلتجئ لهيج طريق اكيد راح يخسر وخسارته راح تكون جبيره
المفروض الواحد بهيج ظرف يلتجئ لرب العالمين
اني شكد مريت بظروف صعبه ويمكن مستحيل اكدر اوصلها الكم بالضبط
بس بقى ايماني بربي جبير
يجوز وحده الغيري من البدايه التجأت للحرام
بس اني فضلت الحلال وجنت ادري بالعواقب
بقه ايماني بربي وكدرت اتغلب ع هواي مشاكل
بس الرجال دائما تفكيره بالشرب عباله راح ينسى
بالعكس راح يصعب الامور اكثر
صار حجي والكل انخبص عبالهم شو وين راح
بس اني جنت متاكده منه ملتهي بالقذاره مالته
ولا اهتميت
ثاني يوم كعدت من وكت عبالي ياخذني من وكت لاهلي
اصلا ممجهزه نفسي ابد
لا منظفه وجهي ولا مشتريه فستان للحفله
الحنه بالقاعه
شايله هم شراح اكول لاهلي حتى مااروح
بس صارت ب10 وهو لهسه بعده مجاي
ماما سبتني سبي
ماما والنبي ماالي خلك وهستوني كعدت راسي حيل يوجعني اموتني
اعتقد التايفوئيد راجع عليه
ادري بيج تتحججين ومتردين ترحين لان حيدر ميقبل
بس مو بكيفج غصبا ماعليج وعليه رجين وترحين
والله يوم مااجذب راح اجي وشوفي بعينج
شوكت تجين
هسه راح اكعد الجهال واجي
يله منتظرين
صارت الساعه ب11 الى ربع اجت نور
كالت بابا يكول يله خل نروح لبيت جدو
اني مبدلتلهم واني همين
نزلت وجنت حيل مخنوكه
يمكن حجابه منه تغثني ولو بسيطه باللحضه اغير رايي ومااروح
صعدت وره لان اصلا قررت اتعامل ويا نفس الاول
لان هو الي رجعني للخلف لنقطة الصفر
لغه شويه وسكت استسلم للامر الواقع
نزلني وراح
طبعا راسي موتني مو جذب وحتى حرارتي مرتفعه
اعتقد التايفوئيد رجعلي
ماما اتخبلت هي وبابا
رنا كالت هسه اخابر مصطفى ااجله للعرس
بقيت احجي عليها
لج لتصيرين غبيه مابيه شي
كامت تبجي خطيه
لج اكثر وقت محتاجتج بهذا اليوم
وانت متكدرين تروحين ويايه
البركه بماما وتبارك وياج
حاولي تروحين حتلو بس شويه
والنبي مااكدر واني جنت احسب لهاي اللحضه شوكت تجي
اشوفج بالصور ومن ترجعين من القاعه
كامت تبجي
شبكتها وكمت ابجي وياها
ماتدري اني المرض مستحيل يمنعني عنها
بس من وره حيدر
والله ع اعصابي
اتغديت وياهم بس كوه لان مااشتهي وحسيت بنفسي حيل متخربطه
اجه مصطفى هو واخته اخذوا رنا وراحت وياها تبارك راحول للمركز
وماما بقت حايره بيه
كتلها مبيه شي روحي انت وياهم مقبلت
صارت ب 4 راحت ماما ورقاوي اخذت وياها نظوري ونور
موعد الحفله ب4
كوه راحت ماما خطيه بقت قلقه عليه
وره شويه خابرت فاطمه وسالتني كتلها اتخربطت
ورسل كذلك
بس محد مصدكه
بقيت بس اني وبابا
اترخصت منه وصعدت للغرفه
حيل نعسانه اتمنى انام وبعد مااكعد
خابرني وكام يحجي لان مارحت
اني متاكده لو ماعرف الحقيقه مجان خلاني اروح
طلعت ام بي ثري عندي
مدخله شكم اغنيه اكثر شي لنور الزين
يمكن لان مااعرف غيره لان عرفته من حيدر مطربه المفضل
اني ابد مااسمع اغاني ولا احبهن
بس هسه حسيت بنفسي مخنوكه من صدك محتاجه اسمع
من ضمن الاغاني
ماحضنته
وانت من دوني نمت
و الذاكره
ولو بي خير
خليت الهيتفون باذاني
ونمت مااعرف شكد وغفيت
حسيت بشخص يمي
فتحت عيوني وجان حيدر كبالي
بقه يحجي ويايه وبعدين عافني وراح
للمغرب رجعوا من الحفله وجانت رناوي طالعه ملاك تخبل
كمت ابجي وهي هم حضنتني وبجت
لج والله ع اعصابي احتفلت بدونج
بالي كله يمج
والله مبيه شي حبيبتي
اجوي اقربائنه كالت ماما نحتفل مره لخ هنا ع مودج
كلت لازم انزل عيب
احس ابرد مو طبيعي
جسمي يرجف كله
بس محجيت شي
صليت واني كاعده ابد مكدرت اوكف
كملت ونزلت وبابا جايب عشه
محد غريب بس عماتي ونسوان عمامي
فاطمه ورسل وزهراء وخاله همين
الحفله مالت الشباب بالقاعه لهذا السبب الكل اتعطل يمنه
اتعشوا اني ماكدرت اكل
طلبت من رقاوي بس عصير تنطيني
الكل عبالهم جنت اجذب بس من شافوني
اتخبلوا كالوا روحي للمستشفى
لا مبيه شي
شويه واصير زينه
عيوني مورمه وحمر
عبالهم جنت ابجي
غيرت جو شويه وافرحت لرنا خطيه
راح تزوج الشخص الحبته والحبها
شويه واترخصت وصعدت
صعدت اريد بس انام
صعدت ويايه فاطمه ورسل
كالن شنو سالفتج
بعقد امير هم اتخربطتي
مااعرف والله بس هالمره حيل متخربطه
خل نخابر محمد وحيدر يجون ياخذونج
لا عفيه لتخابرين احد
اروح وياكم للبيت
مااكدر ابقه هنا لان هوسه
كالت رسل راح يجي محمد
بس شلون السياره متكفي
كالت فاطمه اني راح ابات هنا اخذت الاذن من جويسم
عبالي هاي العوبه تبات
بس انظربت بوري
عادي باتي والله البنات يفرحن
كالت رسل والله اني همين ابات اذا بقيتي
اني بامريكا وشفت الفيديو مالت طهور نظوري واني ابجي
جنت اتمنى وياجن هسه ماافوت الفرصه
كالت فاطمه هاي هي لعد نبقى وانت غصبا ماعليج تبقين
لج اخوج الخبل مانعني ابات هنا
اني احجي ويا وشحده اذا رفض
بقيت حايره مااعرف اوافق لو لا
الصراحه اتمنى ابقى وي البنات
بس مااريده يحجي ويلغي
خابرت فاطمه ميجاوب
هواي دكت علي وماكو
بعدين حسيت عيوني جمر الم قوي براسي صار وعيوني غوشن
صعدت تبارك
بقينه نسولف وراها صعدت رناوي ورقاوي
هواي غيرت جو وياهن
رسل خابرها محمد وخبرته وكللها ماعندي مانع ابقي
بس خلي امي وزهراء يجن خل اخذهن
نزلت وخبرت خاله وراحوا
صارت الساعه تقريبا ب11 حيل اتاذيت وتخربطت
كلت لفاطمه اتصلي بحيدر خل يجي ياخذني للمستشفى مااتحمل بعد
دكت وهم ماكو جواب
كالت هذا ابد ميجاوب
دكيت علي اني هم ماكو جواب
اكيد ملتهي بالشرب والعربده ً
كالت خل نخابر محمد يجي ياخذج هو وابوج
لايمعوده ماالي خلك خبالاته
وره نص ساعه تقريبا اتصل بيه
رفعت خط كلت الووو
الووو
تكدر تمر عليه اريد للمستشفى كوه احجي
خيرج شبيج
متخربطه حيل
شتحسين شيوجعج
راسي موتني
جان يكول مااكدر امر عليج هسه خل ابوج ياخذج للمستشفى
العفو اتوهمت وخابرتك نسيت امري ميهمك ابد
اهم شي ونستك وشربك ونسوانك
كام يصيح هاي شبيج وين راح بالج لبعيد
ويني ووين الظيم اني
جان يكول اني هسه بال ..........
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: