قصة من سيدفع الثمن الجزء السابع والعشرون في 9:06 م مرسلة بواسطة أحمد التكريتي

هلا وغلا. حبايب 💕

//// البارت السابع و العشـرون  ////

#من_سيدفع_الثمن ؟؟

#بقلم_الكاتبة_شمس

اجة عذاب ..

باوعتله عيونه حمر ..

گعد گبالي ..

دفعته ..

انت السبب انت انت الي بعدتها عني انت الي مرضتها .

فقدت وگمت اعيط وابجي واحاول افرغ همي والمي بلومي اله والنفسي ..

سحبني الحضنه وشهگ ..

-اششششش حقج سوي كلشي بيه عسا ماتموتيني بس خلي تطيب شهد وتشفى ..

بقينا نواسي بعضنا بدموعنا وعتابنا .. 

كان حضنه بالنسبة الي اطمئنان وامان .. 

وكان مرض شهد حبل مشنقة بالنسبة الي .. وبأي لحظة ينزلق الكرسي الي جواي واموت ..

لان فعلا احس روحي ضعيفه ولاحول ولاقوة الي ..

عذاب .. گومي شوفيها هي هسا محتاجتج انتي اكثر وحدة بينا ..

رفعني وگومني واني مختنگة وابجي ..

لاان ممصدگة الي صار ..

صار بلال مقابيلي ويخزر لان عذاب ساندني ولازم ايدي 

وعبالك اني بوضع يسمحلي افكر لو اعرف بي الي يصير والي ميصير ..

كنت مترددة ادخل واشوفها ..

فتح الباب عذاب ..

دخلت ورجلي ترجع لورى بدل ماتتقدم ماردت اشوف حالها واتذكر انه هي مريضه ومرضها يمكن يبعدها عني.. 

اتقربت وشفتها خليت ايدي ع وحلگي وكتمت صوتي ..

بس العيون يبجن ..

خالتي گبالي وتبجي ..

درت وجهي العذاب .. ليش هيج ليش؟

وين راحت الخدود ليش هيج ذبلانه وانتو مانطيتوني خبر يعني شمنتضر تموت يله تگلي ..

خالتي .. اشششش لاسامح الله .. عذاب ماراد يگلج لان يدري بيج ماتتحملين ..

فرح .. شنو مااتحمل .. عسا مااموت بس هذي بنتي تعرفون شنو بنتي .. يعني الي سهرت عليها ليالي وخايفه عليها من الهوا ..

تالي تنمرض هيج مرض واني بعيدة عنها ..

گامت خالتي .. وگعدت اني بمكانها ..

اتقربت منها ودنگت شميتها حيل واخذت نفس ..

رفعتها الحصني ودموعي ينقطن عليها ..

صحنها من نومتها ..

شافتني ابتسمت .. رغم المها ومرضها ابتسمتلي ..

ورجعت غمضت وكأنه حست بالامان بحضني ..

لزمت اصبع ايدي حيل ..

وكأنه تگلي لاتتركيني ..

اخذتها الحضني واشم بيها وابوس ..

اجت امي بوستها واخذت خالتي وطلعن برة ..

اتقرب عذاب وقرفص گبالي ويمسد ع راسها ..

باوعتله بعتب وگتله ليش هيج .. الهذي الدرجة هنت عليك وردت تعاقبني بيها ..

عذاب .. مامتقصد .. ماردت اخرب خطوبتج وحياتج الجديدة بهمومنا ..كافي الي تحملتي ..

فرح .. اي خطوبه اني اصلا ماقبلت ورفضته .. 

عذاب .. يعني ماقبلتي ..

فرح .. شفت هسا منو الي دفع ثمن كبريائنا واخطائنا ..

بحياتي ماكنت اتوقع انه شهد تكون ضحية عقولنا المتحجرة والجامدة .. كنت احجي بحرگة وابجي ..

خلى ايدة ع حلگي ومسح دموعي ..

اششششش الخاطري كافي لوم .. خلينا ننسى كلشي ونفكر بشهد وبس ..

خلي تطيب وعاتبي واحجي وعصبي وسوي الي ترديه.. 

المهم عدنا بنتنا تطيب وترجعلها صحتها ..

دخلت ماما وخالتي وبلال جايب علاليگ بيدة ..

من شافهم عذاب مسح دموعه وگام ..

بلال نضراته مافارقتنا بس مااهتميت ولاراح اهتم ..

گال .. هذا اكل اشتريت من المطعم ومي ..

خاف جوعانين ..

خالتي .. هو منو الي يشتهي يمة.. 

ماما .. لازم تاكلين خيه لاتتخربطين . كلنا لازم نقوى ونوگف ع حيلنا علمودها ..

مسحت عيوني وگلت ..

عذاب هسا الاطباء شيگولون وشراح تسوي ..

عذاب .. ماراح اخليها هنا بالعراق راح اطلعها. برة.. وهذي الفترة كلها ماسكتت واكو ولد صديقي تكفل يشوفلي مستشفى زين للامراض الخبيثة ..

وراح يحجزلي بمركز الحسين بالاردن ..

يگول هذا احسن مركز وبي عناية ..

خالتي .. ياالله .. لو بآخر الدنيا ناخذها بس كون تطيب لو اعرف ابيع كلشي ونعالجها ..

عذاب .. ان شاء الله اني بلشت بالجوازات .. وراح ابيع بيتي لو ارهنة ..

بس بقت شغله المرافق .. اريد وحدة وياي لازم مرة تمشي ..

طفرت من مكاني .. اني اروح طبعا مستحيل اتركها وحدها ..

بلال .. وين ترحين وحدج هناك .. خلي لو امي لو خالتي 

فرح .. انت شتحجي .. هذي بنتي ومااخليها وحدها لو اعرف الدنيا كلها توگف بوجهي ..

بلال .. فرررررح ..

عذاب .. بلال مو وكت العيب هسا .. هي راح تبقى بالمستشفى واني مااتركهم وبعدين شهد من تشوفها تتحسن .. 

بلال ماعجبة الكلام واخذ امي وطلع يحجي وياها .. 

واصلا حتى لو رفض اروح ..

كافي الي صار ببنتي بسببهم .. 

گالت خالتي اني اروح للبيت ارتاح واسبح ..

وعذاب گال اروح اجيب ملابس الها واجي مااتأخر ..

بقوا ماما وبلال يمي .. 

بلال .. فرح انتي ماتفهمين شلون ترحين وياه وحدكم. وهو مو زوجج شنو هالتحرر ماتعرفين الحلال والحرام بعد ..

فرح .. شنو الحلال والحرام .. قابل طالعة وياه ونسة لو باقين وحدنا بفندق ..

اني راح ابقى وي شهد بالمستشفى واراعيها .. كل الي صار بشهد لأن ابتعدت عني ..

ومامستعدة اخسرها .. لو اعرف تتبرون مني ..

بلال .. يمة ماتحجين ..

ماما .. اني وي فرح .. خلي العيب على جهة اهم شي عدنا شهد.. وبعدين متشوفهم بيا حال وينهم ووين سوالفك والعيب ..

بلال .. والله ماادري شوفي الناس شلون تاكل وجهنا ..

ماما .. منو الناس ؟؟ خاف قصدك عمامك .. 

فكل واحد عليه بروحة ويشوف عيوبه قبل ميشوف غيرة 

بنتي ممسويه شي خطأ ..

ولهنا وكافي .. اذا ماعاجبك روح انت اني ابقى هنا يم فرح ..

هو بقى يحجي وعصب وطلع ..

مااهتميت .. مددت يم شهودة وخليتها بحضني ويمي ..

وهي كل شويه تفتح وتباوعلي وترجع تنام ..

وماتركت اصبعي ابد ..

شويه واجت تماضر وزوجها ..

گعدت يمنا وتبجي ..

وج فروحة شوفي شلون حاضنتج .. گلتلهم مرضها كله بسبب بعدها عنج محد سمعني ..

اووووف مااعرف الومكم. لو الوم الدنيا الي ضلمتها ..

فرح .. كافي تماضر عفية ..

بلا كلشي اني متدمرة وندمانه ..

وج ساعه اگول لو دايسه ع كرامتي وقابله ارجع علمودها جان ماصار الي صار ..

مااتوقعت هيج يصير ..

وبأخر فترة عذاب عاند وراد يعاقبني .. بس طاحت ضحيتها شهد ..

تماضر .. الي صار مكتوب وقدر الله .. بس الاهم علاجها نصفه براحتها النفسية ..

خليج يمها ولاتتركيها ع الاقل الى ان تشفى .

فرح .. وليش منو گلج اتركها بعد .. راح تعيش وياي وين مااكون .. عود اذا يريد اخوج خلي يتزوج ويجيب اولاد بس ماانطيه شهد ابد ..

تماضر .. والله يربي مااعرف اضحك لو انقهر .. وج هو يريدج انتي وشهد مايريد غيركم لسا مافهمتي ..

الي سواه حتى ترجعيله بس اثنينكم دماغكم يابس وعاندتوا ..

اجة عذاب وزوج تماضر دخلوا لان كان منتضر برة ..

عذاب .. ها شلونها ..

فرح .. ع نومتها لسا ماتقبل تگعد ..

سلم زوج تماضر عليه وگال يارب الشفاء العاجل ان شاء الله.. 

باوع عذاب الماما وگالها ..

خاله خلي اخذج للبيت اني هنا يمهم ..

ماما .. لامااتركهن. شعندي خليني هنا وهاي سدية فارغة يمهم اگعد بيها ..

عذاب .. براحتج بس لان ردت جنسية فرح ومستمسكاتها علمود اسوي جواز ..

ماما .. اي الصبح من اروح روح وياي وانطيهن الك ..

باوعلي وگال .

حتى بس اكملها ويحتاجوج للبصمة اجي اخذج ..

تماضر .. يعني فرح تسافر وياك ..

عذاب .. اي لازم امها وياها تعرفيها من تتمرض تتنحس وماتريد احد ..

تماضر ..  عين العقل .. اتركوا كلشي ع جنب وفكروا ببنتكم… 

راحت تماضر وزوجها .. 

واجو بيت خالي هو. وزوجته ..

بسرعة طش الخبر شلون ماادري ..

ومرت خالي ماتسكت وتگول .. هاي البنية ضحيه وتعذبت لو ماجاية للدنيا احسن .. انهملت لاام ولاابو ومت من هذا الحجي ..

ماما ماسكتتلها ..

ليش انهملت فرح امها وربتها وتعبت عليها وسهرت ويمكن لو امها عايشة ماسوت مثل فرح ..

عذاب .. رجاء مو. وكت هذا الحجي .. الي يجي يسلم ويروح بلا حجي اهلا وسهلا ..

والي مايعحبه لايجي .. هذا مستشفى مو محفل غيبة وگالات ..

هي عرفتها ع روحها سكتت ودور اشرت الخالي وراحوا ماعجبهم كلام عذاب ..

بقيت اني گاعدة ومخليتها بحضني وعذاب گاعد يمي يمسد براسها ويبوس بيها ..

باباتي يروحي .. طيبي ولاتخوفيني عليج والله تدمرت وكبرت عشر سنين من سمعت بمرضج ..

هو. يحجي واني ابجي مااتحملت ..

ماما .. كافي شنو الحجي والبجي اسم الله .. مايصلح مگابلين البنيه بهذي المغربية وتبجون ..

گولوا يله وان شاء الله يشفيها ..

عذاب .. والنعم بالله .. اني طالع شويه برة تحتاجون شي ..

فرح .. لا سلامتك ..

اجة الممرض .. اخويه ميصير مخليتها بحضنج اتركيها بسريرها خلي ننطيها علاجها ..

فرح .. لاعفية خليها بحضني ماترتاح اذا موهيج متشوفها لازمتني ماتتركني ..

راد ينطيها العلاج الكانونة خربانه ..

گال راح اجيب جديدة واجي اسويلها ..

فتحها وسوة الجديدة .. 

فزت وگامت تبجي وتفرفح. واني ابجي وياها ..

باوعلي الممرض وگال ..

اذا الام هيج شلون الطفله .. هيا شلون نسكتج لو نسكتها ..

عذاب اجة ماعجبه كلامه ..

وعصب ..

گاله .. اخوية كمل شغلج بسرعه متشوف البنيه ماتت بجي ..

عاد الممرض سكت وكمل الكانونة. وخلالها العلاج ..

وطلع ..

احسها تلوع وتبجي من يخلولها العلاج وماتتحمله ..

ومن اشوفها هيج اموت ..

گال عذاب .. فرح لازم تصيرين قويه .. اذا ضعفتي مانگدر نتغلب ع المرض ..

شهد تباوعلج وتستمد قوتها منج .. 

اذا ابتسمتي بوجهها وحسستيها بالامان راح ترتاح وتتطمأن ..

فرح .. عذاب متشوفها شلون تلوع من العلاج .. بعدهي صغيرة ع هيج مرض ماتتحمل ..

عذاب .. شنسوي هذي ارادة الله .. حاولي تكونين اقوى اذا طلعنا للاردن شلون ..

اني من اشوفج ضعيفه وتبجين انهار .. لازم واحد يساند اللاخ ..

مسحت دموعي وهزيت راسي .. ان شاء الله 

طلع هو جابلنا عشا واجة..

گالتله امي مو هذا الاكل جابه بلال ..

گاللها بلال جايب دجاج وفرح ماترغب للدجاج بالليل ..

جبتلها شاورما تحبها ..

بقيت صافنه عليه .. معقوله حافظ شنو الي اكله والي مااكله بالليل ..

ماقبلت اكل .. 

بس گال الخاطر شهد اكلي ..

ابتسمت ومااتحملت .. گتله .. ماعرفتك وانت حنين وهادئ.. 

ضحك .. خرب يومج يعني وحتى انتي بأسوء حالاتج مافوتيها الي ..

فرح .. لا بس صدگ استغربت ممتعودة ع حالتك هاي ..

عذاب .. هذا اني وطبعي هيج دايما بس الوكت والضروف ووو .. سكت وگال هي الي خلتني غير انسان وغيرت طبعي ..

گام من مكانه وگال اتعشوا انتو ع راحتكم اني طالع برة اخذلي جكارة وارجع ..

طلع شفت نضرات امي العجيبه..

ماما .. شنو هالميانه الزايدة لاتنسين انتي هنا علمود شهد وبس لاتخليني اندم لان وافقت تطلعين وياهم ..

فرح .. صدگ تحجين ماما اني ويني ووين هذي السوالف ماما ...لاتصيرين غبيه وتنسين كلشي بسهوله .. خليج عزيزة وراعي شهد وبس ومعليج بي ..

فرح… اووووف ماما عفية كااافي وربي بعد مااتحمل احس روحي تريد تطلع گوة مصبرة ع نفسي وانتي تگليلي خليج عزيزة ومدري شنو ..

لليل گامت ماما نامت ع السدية الي مقابيلنا ..

وهو. اصلا ممنوع الا مرافق واحد وي المريض بس ماما عاندت الا تبقى ..

وعذاب طلع برى گال اي شي يصير لو تحتاجون شي خابريني ..

بقينا كم ع نفس الوضع .. 

عذاب منتضر جوازي يطلع حتى نسافر ..

وبالليل لو ماما لو خالتي يبقن يمي ..

الزيارات انگلبت علينا الكل اجانا ..

اتصلت زهراء وسولفتلها ودموعي تجري ..

گالت هسا اخلي بابا لو مصطفى يجيبوني ..

ماقبلت تجي خطيه شيجيبها .. 

بس هي اصرت ..

وصدگ ساعه وجايه .. وحايرة شجايبه وياها ..

خجلتني ..

سلمت ع عذاب هي ومصطفى .. وعذاب ماقصر بالسلام والترحيب ..

زهراء .. شمنتضرين متطلعوها للخارج ..

فرح .. اي راح نطلع للاردن بس اني الي اخرتهم على ماسويت جواز ماعندي ..

باوعتلها ياعيني شلون لازمة ايدج ..

فرح .. هي هاي من يوم الي اجيت لسا مافرگتني حتى من رحت للجوازات .. 

اجيت لگيتها ميته بجي ..

زهراء .. خطيه صايرة عندها رهبة خاف تتركيها .. بس حيل ذبلانه ..

فرح .. اي راح ذاك السمن والخدود تتذكريها بعيد ميلادها .. 

هسا الي يشوفها يگول بعد كم شهر يصير عمرها سنتين 

زهراء .. الله كريم اهم شي تشفى والسمن والعافية يجن وحدهن…  

اتصل عليها مصطفى.. 

گالت اني رايحة لان مصطفى عندة شغل بس راح اتصل واجيج مااتركج ..

ها فروحة اي شي تحتاجيه گولي ..

الله عليج من المليون للعشرة ..

فرح .. لا يعمري عساكم دوم بخير ورزق بس الحمد لله عذاب رتب امورة وباع البيت وعمو بس يصفي شغله يحولنا فلوس ..

زهراء .. ميخالف بس خاف يجي يوم وتحتاجين خليني ببالج ..

فروحة…  ادري بيج متقصرين انتي اخيتي الي ماجابتها امي ..

بوستني وراحت ..

سولفت العذاب عليها وموقفها ..

گال هو كلامها كافي .. وحتى خطيبها مبين حباب ارتاحيتله ..

اتعجبت من ردة فعله . حسيته فعلا انسان ثاني ..

مو نفسة عذاب الي عاشرته ولا عذاب الي كانت تسولف عنه منار .. 

لليل خليت شهودة بحضني وتمددت بصفها ..

الدكتور گال لتخلوها تسخن حيل سوولها كمادات وشراب شربوها ..

عذاب كالعادة يطلع ويرجع .. 

حتى دوامة. ماخذ اجازة وميروح ..

وخالتي نايمة… 

تلمستها حرارتها عاليه ..

گمت طلعت خاولي .. 

وبللته بالمي .. وبديت اسويلها كمادات ..

بس حرارتها بعدهي مرتفعه ..

خفت حيل .. اخذت شراب شربتها اتقيأته كله .

معدتها ماتتقبل اي دوة ..

حرت شأسويلها ..

سويه وگامت تنفض وترجف بيدي وانشمرت ..

گمت اعيط بلا وعي ..

ركضت اريد ممرض لو احد يجي ماكو ..

خالتي تلطم .. يمة البنيه راحت ربي ارحمها وتدعي وتبجي ..

بلا وعي شلتها واركض ونسيت نفسي حافية  گلتلها خاله بسرعه اتصلي ع عذاب ..

وطلعت بس اعيط واصيح اريد احد يجيني ..

احس الردهات كلها طلعت ع صوتي ..

تلگاني الممرض ودكتور مقيم ..

اخذوها مني ودخلوها للغرفه ..

شافني ابجي واعيط ..

طلعني وگال قلقتينا خلينا نشوف شغلنا ..

اجة عذاب يركض وخالتي وراه ..

گال شبيها ..

-عذاب مااعرف الحگها طلعوني ميقبلون ..

دخل عذاب وترك الباب مفتوح ..

اني اباوع وابجي وادعي ربي لاتختبرني بيها .. اخذ من عمري وانطيها ..

موتني وطيبها بس لاتخليني اشوف يومها قبل يومي ..

طلع عذاب .. گال اهدي انطوها ابرة وهسا احسن بس تنخفض حرارتها ناخذها للردهة ..

دخلت اشوفها ..

تباوعلي وتون ..

سودة عليه ياماما وين جانت الج هاي ..

خليت كرسي وگعدت يمها ..

خالتي من الهبطة تخربطت .. اخذها عذاب يقيس ضغطها 

شويه ورجع.. 

شاف ممرضين واگفين ضاج ..

بقى يخزر ..

يله گومي روحي يم امي بالغرفه اني راح ابقى يمها هنا ..

فرح .. شلون اتركها متشوفها تون ..

عذاب .. گتلج روحي متشوفين امة لااله الا الله هنا وانتي بنصهم .. همسلي بعصبيه ..

گمت بسرعة. ومن غير نقاش .. من خوفي ع شهد وقلقي ماشفت الي حولي ولاحسيت منو وكم موجودين بالغرفه ..

رحت الخالتي لگيتها نايمة ..

شافتني گالت ها يمة شلونها هسا ..

فرح .. لا احسن الحمد لله احس روحي راحت من شفتها هيج ..

خالتي .. وج يمة احس گلبي وگف من شفتج تركضين بيها وتعيطين عبالي ماتت اسم الله ..

فرح .. لا اسم الله عسا يومي قبل يومها وربي اموت غير ..

خلينا نتفائل وان شاء الله يفرحنا بشفائها ..

رجع عذاب شايلها اخذتها الحضني واشم بيها ..

حرارتها زينه وصاحية ..

نطيتها بسكت ..

گامت تاكل شويه شويه وعصرتلها برتقاله وخليته بالممة شربته ..

ارتاحيت شويه ..

عذاب .. مااخليها هنا .. لازم نستعجل هنا العناية ماعاجبتني .. 

باجر خاف اطلع من الصبح ومااجيكم .. لان لازم اكمل كلشي بيدي ماتكمل اذا مااوگف ع راسهم ..

وانتي اي شي تحتاجيه خلي امي تخابر ابوي ..

عمو. ماكان يجي لان مايگدر من رجله ومايتحمل مستشفيات بس كان دايما يتصل ويسأل كل ساعة .

اجت ماما من الصبح هي وجلال وبقوا يمنا وخالتي راحت للبيت ..

للظهر حوالي ساعة 2 يله اجة عذاب ..

گال مابقى شي .. الاثنين الجايه نطلع ..

بس قبلها لازم ترحين للبيت تجهزين جنطتج وتجيبيها لهنا لان منا ونطلع للمطار ..

فرح .. ان شاء الله. 

جلال ماعجبه الكلام وعبالهم اتراجع عن السفر ..

مر كم يوم ..

ورحت للبيت يوم الاحد ..

حضرت جنطتي وملابسي ..

ماما شالتلي كم ورقه گالت هذني ضامتهن للزمن اخذيهن بجنطتج خاف تحتاجين شي وتستحين تگولين ..

وطلعت من مجمع قريب ..

اشتريت ملابس الشهد واحتياجات الي ..

كملت كلشي ..

دخلت سبحت وبدلت ملابسي ..

وردت اطلع اودع اهلي واخواني ..

بس جلال سواله عركة وگال ماتطلعين ع جثتي احنة مو گ…  ونخليج ترحين وياه من غير عقد ..

يريد ياخذج وياه يعقد عليج ..

بيومها اتهسترت وگمت اعيط ..

بالي يم شهد وذولي يعرضون طريقي ..

تالي اتصلت بعمو وگتله حاجيهم يخلوني اروح ..

اني اگدر احافظ ع نفسي ..

وفهمته وجودي وي عذاب عمود شهد بس ..

گال يصير خير ..

طلعت سمعت عمو يحجي وي بلال ..

وحجى وي جلال ..

اقتنعوا ووافقوا ..

من غير مااحجي وياهم ولااودعهم سلمت ع ماما ومروة وطلعت ..

لگيت عذاب منتضرني اخذ الجنطة مني ..

صعدت واحس گلبي مختنگ ..

گال .. ليش امج اتصلت بيه وگالت تعال اخذ فرح .. ليش اخوانج وين ..مو عساس هم يجيبوج ..

فرح .. ماعندي اخوان .. وسكتت ..

فهم السالفه وگال ..

هينة ان شاء الله ماكو شي يبقى ع حالة بس الاهم هسا عدنا شهودة خلي تشفى والباقي سهل ..

رجعت للمستشفى واحس روحي تختنگ من ادخلها ..

بس مجبورة الخاطر رويحتي وبنيتي ..

ثاني يوم تجهزنا وبدلنا .. الجنط بالسيارة ..

اجة صديقه فارس وصلنا حتى يرجع السيارة للبيت ..

خالتي ويانا راحت ..

هناك لگينا تماضر وزوجها وعمو ..

سلموا علينا وعمو اتقرب وباسني براسي وگال ان شاء الله ترجعون وهي بصحة وعافية ..

حضنت خالتي وگامت تبجي ..

وگالوا خابرونا كل يوم مو تگطعون ..

نريد نمشي اتصل معتز ع عمو ..

گاله عذاب هذا معتز ..

اخذة عذاب وسلم عليه ومعتز يواسيه ..

تالي گاله انطيني فرح ..

مد ايدة عذاب وگال معتز يريدج ..

استغربت .. اخذتة ..

الو ..

شلونج خيتي ..

ع الله انت شلونك ..

اني بعد الي سمعته مو زين . ربي يفرحكم بيها ويشفيها وترجعون سويه واحسن من قبل ان شاء الله.. 

گتله ان شاء الله..  ومااتحملت بعد انطيت الجهاز العذاب 

كانت لحظة اليمة ومااتمناها العدوي ..

تاركين اهلنا وبلدنا ورايحين البلد غريب حتى نعالج بنتنا .

بس احنه وماكو احد يمنا ..

ماكو احد يواسينا ويطيب خاطرنا ..

كنت اخذ نفس واحاول مااخلي دموعي تغلبني ..

وادعي من ربي انه مايخليني اخلي رجلي وارجع للعراق بعد الا وبنتي بيدي وبصحة وعافية ..

وكانت هذي رحلتنا نحو الامل والتحدي والمحاربة معا 

#بقلمي_الكاتبة_شمس

يتبع .. 

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad