قصة من سيدفع الثمن الجزء الخامس عشر في 10:07 م مرسلة بواسطة أحمد التكريتي

 اجمل مساء لعيون متابعيني الاعزاء .. 

//// البارت الخامس عشر ////

#من_سيدفع_الثمن ؟؟

#بقلم_الكاتبة_شمس

كـ رحيق الاوركيدا زهر نادر....

عطرك عندي سهم غادر...

يعصفني من كلي حتى الاظافر...

يبعثرني يلملمني...

ويرميني بين احضانك كـ طير مهاجر...

وجد موطنه بعد هجران قاتل...

أرحم قلبي أيها المغرور الماكر...

رجعت لفراشي ممصدگة الي صار .. گمت احس بأهتمامة ورغبته اتجاهي ..

ويمكن الي صار بالليل خارج عن ارادتة ..

لازم مااظلمة واقسي عليه ..

لان حاليا هو مثل الطفل المكسور من هجر احبائة اله ويحاول يوگف ع رجله وينسى الماضي والهجران ..

اصبري فرح لاتستسلمين ..

صحيح را تتعبين وراح تحسين شبح منار محاوطج ويعذبج بس لازم تقاومين حتى تحافضين ع عائلتج الي انكتبت بقدرج ..

نمت براحة .. گعدت ع صوت الموبايل .. مرات استغرب صوته لان ممتعودة عليه من بعد اشهر ..

خالتي ..

الو هلو خالة شلون صرتي ..

-ع الله احسن .. بالي يمج وماگدرت امر عليج لان مالي خلگ ..

-لا خاله عادي اهم شي صحتج اني ماعندي شي ..

-اي زين يمة قفلي بيبانج واگعدي انتي وبنيتج واني شويه واخلي تماضر تجي يمج ..

-هلا بيها ..

سديته من خالتي ..

گعدت بنوتي وبدلتلها .. ورحنا سوينا احلى ريوگ الام العاشقه وبنتها الحلوة ..

كملنا گمت نضفت ولو البيت نضيف بس اشياء بسيطة .

دخلت للاستقبال شفت الفراش ..

تذكرت حضنه .. 

رحت تمددت بفراشة وتغطيت ببطانيته اخذت المخدة اشم بيها ..

ريحته خاصه .. مو عطر لا بس ريحة مميزة ..

امممممم فزيت من احلامي ع صوت الباب تندگ ..

ركضت شلت الفراش بسرعه للغرفه ..

والباب تكسرت . 

ركضت فتحتها شفت تماضر واولادها ..

-اسفين ع الازعاج بس ذوله كسروا الباب وتمام يگلي كسري الباب عليها ماتسمع اذا حابسيها بالبيت ..

فرح .. هههههه حبيبي بوستهم وسلمت ع تماضر ودخلت 

-ليش متسوون الجرس ..

-اي والله اريد اگول العذاب مرات اني بالغرفه ومااسمع الباب ..

دخلنا بالاستقبال ..

گلتلها اسويلكم ريوگ ..

-لا وين هسا بالعشرة متريگين ومكملين بس امي خطيه الليل كله مانامت وخايفه عليه ..

-حقها .. ان شاء الله يوصل ويطمنا ..

-ان شاء الله.. 

گعدنا نضحك ونسولف .

تماضر .. اگلج فرح وجهج وعيونج يضحكن صاير شي من وراي ..

متت خجل من كلامها ..

-ها لا ماكو شي ..

-اني امي گالتلي متحسن وياها ويهتم بيهم بس ماصدگت لما شفت وجهج هسا ..

-اي زين احسن من قبل بس هم بعد احسه متردد وخايف يحاول يقتربلي بطريقه سريعه ..

وهذا الشي مو طبيعي بالنسبه النا . اثنينه مرينا بضروف صعبه مو بالسهوله نقترب هيج بسرعه ..

-جائز يريد ينسى بسرعه ويحاول يتقرب منج .. جائز هذي اشارة الج ويگلج بيها حبيني قربني منج نسيني كلشي مريت بي ..

-اووووف تماضر مااعرف شلون اگلج صعبه .. بس احس منار بعدهي بحياتنا .. يعني مرات يتذكرها وهو يمي ..

-ومنو گلج يتذكرها .. بس يمكن سهوا صارت . مااعتقد بعدة يحبها لان هو. گال كرهتها من خانتني ..

بس احتمال مايگدر يتقبل خيانتها اله بسهوله لهذا يكابر ويحاول يسد النقص بغير طريقه ..

شبيج فروحة سبق وان گتلج عذاب مجروح وبيدج انتي علاجة وتضميد جروحة ..

فرح .. خايفه !! اخاف احبه واتعلق بي وتالي مااگدر اخليه يحبني لو يخذلني ويجرحني ..

-فرح فكري بشهد ومستقبلج وياه ولاتفكرين بشي ثاني حاولي تغيرين بحياتج وتخليه يشوف ضحكتج دايما ..

يعني اجذبيه البسي عدلي ..

-بس... .

-ماكو بس فرح .. الحزن بالگلب ترى . عمرها الملابس واهمال النفس مادلت ع الحداد والحزن ..

ع الاقل حفي وجهج .. ترى هذي نضافه وانتي داتحفين الزوجج مو الغريب ..

فرح .. يا احف شلون ؟؟

تماضر .. شنو شلون .. اخذج واحف الج وارتب حواجبج تطلعين تخبلين ولو انتي مقاصرة ..

فرح .. بس وجهي مابي شعر ..

تماضر .. انتي تگولين هيج بس دحفي وشوفي النضارة الي بوجهج شلون تطلع ..

-لا مااگدر وعذاب ماهو ومايقبل ..

-اتركي عذاب عليه اني اقنعه .. بس بطلي حجج وگولي اي .. واذا تردين راح اخابر خالتي واحجي وياها وشوفي شتگلج ..

-لا عيب من ماما شتگول ..

طلعت تماضر مويايلها وخابرت ماما .. واني اشرلها ماتحجي بس هي حجت كلشي الماما ونطتني الموبايل 

-الو ماما شلونج مروة شلونها. 

-كلنا زينين ومروة زينه ع العلاج .. انتي وشهودة شلونكم ..

-الحمد لله ..

-باعي ماما .. ابوج الله يرحمة كان يحب يشوفجن سعيدات . والحزن بالگلب ياامي .. واذا تحبيه وتردين راحته .. صيرة سعيدة واسعدي زوجج ..

المرأة كلشي تسوي حتى تسعد زوجها .. والولد صاير زين ويهتم بيج .. حاولي بكل الطرق واكسبيه ..

ترى لاتصدگين اني او اخوانج نفيدج ياامي ..

محد يفيدج غير بيتج ورجلج ..

هالتشوفين احنه بالبيت شلونة كل يوم مشكله وسالفه واني بعد مااتحمل من المشاكل ..

ع الاقل انتي ريحيني وخليني اشوفج مرتاحة ..

اعرف تعبتي واتحملتي هواي واعرف شلون تفكرين هسا بس هذا حلالج ياامي وموعيب اذا سويتي كلشي السعادته وسعادتج ..

بعد ماما شجعتني وقنعتني.. قررت اساير تماضر واروح وياها بس شرطت ماانزع الاسود ..

تماضر .. اي لاتنزعيه بس ع الاقل نشتري اشياء حلوة واكو دشاديش ربع ردن واكو قصيرات حلوات البسيهن بالبيت ..

-لا مااريد استحي ..

-لاانتي راح تجلطيني .. وج مو عبالج مااگدرج . قزمة وبيج بله ..

-ههههههه لاتماضر شنو هاي .. زين خليها من يجي عذاب ونشتري ..

-لا عيني هسا نروح واذا ع الفلوس فلتخافين .. عذاب مخلي عند امي الج فلوس خاف تحتاجين شي وهو مموجود .. عود ناخذ منهن ..

فرح .. اي بس بالاول خلي نگله يله ناخذ ..

تماضر .. هو راح اتصل عليها واگله راح اخذج وياي نتسوگ ..

#بقلمي_الكاتبة_شمس

_______________________________

خابرت تماضر العذاب ..

وگالتله نطلع نتسوگ ..

ماقبل وگال من ارجع اخذها وتشتري الي تريدة ..

تالي گالتله ..

نشتريلها ملابس نسائيه واكيد تستحي وماتشتري وياك

متت مستحة من گلتله هيج ..

عاد هو اقتنع وگالها روحوا بس لاتتأخرون .. 

تماضر .. هسا رايحة يم اهلي اكمللهم الغدا وبعدها اجي اخذج ..

وانتي لاتطبخين اني من اطبخ ادزلج من الحايط ..

بس خلي كرسي واخذي الصينيه .. وتضحك عليه .

فرح .. لا مو الهذي الدرجة سويتوني ترى طولي حلو بس انتو طولكم مبالغ بي هههههه ..

حضرت ملابسي وبدلت الشهد ملابس طلعة ..

وبقيت منتضرة ..

دگت تماضر الحايط ..

رحت اخذت الصينيه .. مسوين سبزي وتمن عنبر ..

امممم عود مااشتهي بس من شفته اشتهيت .

گعدت اكل وشهد تخبلت تتعارك وياي تريد تاكل ..

خلتيلها الخاولي ع صدرها وبديت اطعمها سبزي ..

بالبدايه مارغبته بعدين حبته وگامت تاكل ..

كنت اسويلها شوربه ع عظام وتشريب ..

وهي گامت تحب الاكل وكلشي تاكل ماتستغرب الاكل بس بالبدايه اذا اول مرة تاكل الاكله ..

كملنا وغسلنا وبدلنا وتجهزنا ..

اجت تماضر ..

وطلعنا ..

اول مارحنا للصالون .. گالتلها مرت اخويه وحزينه بس وجهها تريد تحفه لان صارلها اشهر ماحافه ..

ام الصالون هم گامت تحجي عليه وتگلي هذي نضافه وشلون متحمله حواجبج وشعر وجهج ..

استحيت من كلامها ..

حفتلي وحسيت روحي تطلع .. موت احمر .. هاي شلون يحفن ومتحملات البنات.. اني احف شواربي وابقى اطفر كل ساعه من الالم ..

لو من سوت حواجبي گمت ابجي . 

بس بعد ماشفت النتيجة .. تخبلت .. خليت ايدي ع وجهي واضحك ..

هذي اني معقوله . حواجبي مرفوعات ووجهي فعلا بي نضارة .. واحس تغيرت هواي .

سوتلي قناع ومساج الوجهي . 

وكتبتلي اسماء مرطب وفيتامين للوجه گالت دايما استخدميه يحافظ ع بشرتج ولو بشرتج حلوة وصافية ..

طلعت من الصالون ممصدگة .. وفكرت بردت فعل عذاب اذا شافني شيسوي ..

بعدها طلعنا نشتري ملابس .. مااعرف شلون تجرأت وطلبت ملابس داخليه ..

تماضر گالت ع بالي اخذلج ..

اشترينا ملابس بيت واخذتلي باودرات ومكياج وعطور ومعطرات ..

يمكن صرفت راتب عذاب كله بهذا اليوم ..

واگلها مااريد وكافي بس ماتقتنع وتگلي معليج انتي .

گالت خابرت ع ابو تمام .. 

يجينا خلي نروح المكان نتعشا ونلعب الجهال ونرجع ..

اجة ابو تمام واخذنا الكورنيش الاعضميه ..

قبلها اخذ شاورما لفات ورحنا هناك تعشينا ولعبوا الاولاد وتونسنا ورجعنا .

فعلا كنت محتاجة هيج جو وونسه ..

بديت احس انه حياتي راح تتغير لااحسن ومن فرحتي گمت اقرأ المعذوات لااحسد روحي ..

صحيح تعذبت وبابا راح وحزني وعذابي بس اكو ناس حسسوني بالامان ووگفوا دايما وياي مثل خالتي وتماضر الهم الفضل بخروجي من الازمة ..

رجعنا البيت خالتي مارجعت البيتي لان عذاب ماهو ..

بس الصبح اروح للبيت وبالليل ابات عندهم ..

شافتني خالتي ضحكت وصلت ع النبي ..

كانت تمارة يمها داتقرأ ..

شافتني تخبلت ..

گالت والله عمي زين غير حزن هذا ..

خالتي .. انتي لاتتدخلين وبيج حظ الامتحانات جايه بيضي وجهنا ..

هزت ايدها وگامت ..

بس كانت تذب كلام وتعيرني بسماري وكأنه ناويه ع مشكله ..

بعدها طردتها خالتي وصعدت الغرفتها ..

زوج خالتي كالعادة نفس طبعه ويعاملني كأنه مموجودة واني هم مالي علاقه بي ..

بس علاقته بشهد زينه وهي بسوالفها تخبل اكبر واحد ..

تماضر راحت البيتهم ..

گالت مدام انتي هنا يم امي راح اروح مطمأنه ..

بقيت يم خالتي گاعدة وكل شويه اقيس ضغطها لان يتزل شويه ويرجع يصعد ..

وعود هي متاكل ..

لليل اني وشهودة گاعدين ع التلفزيون ..

گالت يمة فرح متسويلي لگمة اكلها ..

-اي خاله هسا ..

همة مسوين دجاجة شوي ..

حميته وسويتلها زلاطة ..

اخذته الها .. 

گالت يمة ماتشوفين اخيتج .. ماتعشت لان ماكو احد وياها ياكل وخاف جوعانة وهي تدرس ..

اذا گاعدة صيحيها ..

-اي خاله هسا ..

-صعدت لفوگ وسمعتها تسولف بالموبايل بالاول مااهتميت بس سمعت كلامها مو مال تحجي وي بنيه ..

غزل وسوالف اني استحي اسولفها وي عذاب الي هو زوجي ..

مااعرف ليش اجت ببالي منار .. وتذكرت الي ضحك عليها ماردت منار ثانيه بحياتنا ..

فتحت الباب من غير ماادگة ..

شافتني ارتبكت وعاطت .. 

انتي جاهلة ماتعرفين تدگين الباب .. وشعندج هنا صاعدة ..

-خالتي تريدج وعيني ع الموبايل .. 

هي حست بيه غلقته بإيدها وتخبلت عليه ..

-شبيج تمارة ترى ماسويت شي .. ليش هيج كارهتني مايوم اذيتج .

-وجودج بحياتنا وحدة اذيه .. فرضتن نفسجن علينا انتي واختج الشريفه ذيج ..

صدگ انقهرت من حجت هيج ..

-والي تسويه انتي صح برأيج ..

-وشنو مسويه هي هاي العايزة تتبلين عليه .. طبعا عبالجن الناس كلها مثلجن متزوجات وتتمعشگن .

-احترمي نفسج ولاتجمعين .. اصلا الصوج بيه انه معتبرج اختي ونصحتج ..

-مااريد نصيحتج ولي من غرفتي يله ..

دفعتني وسدت الباب ..

صدگ انهضمت ..

واني شعليه هم اذا ادخل توگع ع رلسي السالفه ..

وبعدين اذا عذاب درة يتخبل وهالمرة يرتكب جريمة وربي ..

نزلت الخالتي ..

-شكو شبيجن اصواتجن طالعه ..

-ماكو شي خاله .. بس لان صعدت الها ماقبلت ..

-اوووف والله يمة مااعرف هاي عليمن طالعه ..

خليها طبها مرض تجوع هي تنزل وحدها تاكل ..

#بقلمي_الكاتبة_شمس

_________________________________

بقيت كم يوم بين بيتي وبين بيت خالتي وعذاب مرات يتصل بيه بالليل عود يسأل ونبقى نسولف بالساعه ..

عبالك عشاق واول مرة نتعارف .. 

كان شعور حلو وحسيتة تقربلي اكثر ..

وگام يفضفض الي عن الي بداخلة ..

عذاب ..

فرح اني فعلا اريد ابدي حياة جديدة وياج .. يكفيني وجودكم بحياتي انتي وشهد ..

اثنينكم مليتوا عليه البيت وطلعتوني من القوقعه الي خليت نفسي بيها ..

بدون ماتدرون .. اجي بالليل اتفرج عليجن شلون نايمات وابتسم .. الله نطاني اثنين بنات مو وحدة ..

اعترف اذيتج وجرحتج هواي وحتى استحي اطلب منج السماح ..

بس الي اريدة منج تتحمليني وتصبرين عليه ..

اكو هواي امور لازم احلها يله ابدي حياة جديدة ..

فرح .. عذاب ليش احسك غامض ..

عذاب .. تدرين اسمي حلو بلسانج ..

فرح .. ههههههه خوش تغير الحديث ..

عذاب .. وانتي طلعتي داهيه وماتفوتج شغله ..

فرح .. اي غير زوجي ضابط فأتعلم منه ..

عذاب .. ههههههه هاي قويه .. بس حلوة كلمة زوجي منج .. فرح ابقي هيج لاتتغيرين وتصدميني ..

فرح .. مستحيل اتغير عليك ..

صحيح هو بعيد عني .. بس كلامنا بالموبايل قربنا من بعض وصار متلهف يرجع حتى يشوفنا ..

اليوم .. موعد نزول عذاب ..

رحت من الصبح ..

نضفت البيت وعطرته ..

وسويت غدا ..

سبحت وسبحت شهودة وبدلتلها ..

واني لبست دشداشه مخصرة وربع ردن ..

وسرحت شعري وخليت ماشات من جهة ونزلته من الجهة الثانيه ..

خليت بس كحل ..

حسيته غير شكلي ووسع عيوني ..

تغيرات بسيطة بس غيرتني هواي ..

رشيت عطر وگعدنا بالمطبخ ننتظر ..

مو عوايدة يتأخر هو كل مرة من الصبح يجي ..

صارت 11 ونص وهو ماكو ..

فكرت اتصل عليه .. بس ترددت خفت لايعصب ..

صارت 12 . اتصلت ..

مارد عليه ..

تركته ومالحيت بس قلقت ..

وخالتي كل شويه تتصل وتگول عذيب مااجة بالها يمها ..

اذا اگلها لسا مااجة يمكن ماتتحمل القهر وهي هستوة صحت من سالفه معتز لمن خابرها وگالها عبرنا البحر يله ارتاحت ..

اجت رساله من عذاب .. فتحتها بسرعه ..

اني اتأخر صارت عندي شغله اتغدوا اذا تردون لاتنتضروني ..

ضجت حيل .. بس المهم اطمأنيت عليه ..

وين الي نفس بعد اكل ..

اخذت شهد ونومتها ..

وتمددت ع السرير ..

بقيت اگلب بالقنوات الى ان غفيت ..

حسيت بأنفاس تلفح وجهي واتقربت مني ..

فزيت عذاب مقرفص گبالي ..

مبين عليه التعب وضايج بس كان يبتسم ..

-هذا الجمال كله الي .. طالعه حلوة ..

-حمدا لله ع سلامتك قلقتني ..

-الله يسلمج يعني خفتي عليه ..

-شلون مااخاف .. خلي اگوم اسوي غدا ..

-لا مااشتهي هسا تعبان ..بس اريد انام ..

--لعد خلي افرشلك .

-لاتفرشين . خليني انام هنا يمج بس اغسل وابدل . 

ماگدرت احجي شي ..

راح هو غسل واجة لابس بس بجامة وبالفاتيلا ..

شكله يموت .. شناوي هذا الله اليستر ..

ضحك .. لاتخافين بس اريد انام بحضنج مااسوي شي ..

ابتعدت عنه نام وفتح ايدة وسحبني ع صدرة ..

باس گصتي وگال يرادلنا سرير اكبر من هذا ويضحك ..

فرح .. شنو قصدك ..

عذاب .. قابل نخلص عمرنا لو بالاستقبال لو بعذا السرير الصغير ..

فرح .. بس... .

عذاب .. اششششش لاتفكرين .. اعرف الي ببالج .. 

وگتلج مااتقربلج اذا ماانتي برغبتج . 

شفته غفى وهو يحجي من التعب رجعت ع نفس الوضعية ونمنا سويه ..

گمت احس بأمان واني بحضنه ..

گعدت العصر ..

تسحبت ع كيفي ورحت حميت الاكل ..

اني مسويه مطبگ باگله ع لحم ..

حضرت الاكل ..

وگعدته ..

گام وشاف شهد گاعدة ..

بقى يلعب وياها ..

گال شفتي الغراض الي جبتها. .

گتله لا لسا ..

گام وهو شايل شهد .

وهي تلعب بليحته اخر شي سحبتها حيل وگام يعيط ..

وج بنت اللذين تطلبيني ثار ..

ضحكت عليهم شگد حلوين ..

جاب الغراض من السيارة .. مسوگ خيرات الله كلها ..

وملابس الشهد والعاب .. وعربانه وحجله الشهد ..

گعدها بيها وهي فرحانه ..

بعدين شال علبه ونطاها الي گال هاج هاي ..

فتحتها بيها حلقة ذهب ..

ضحكت ..

گال ترى مااعرف قياسج اذا كبيرة نطلع نبدلها العصر ..

لبستها بيها كبر شويه ..

ضحك هو .. گال عود جبتها صغيرة بس اذا انتي سنفورة شأسويلج ..

رغم يضحك ويانا بس كان ضايج واكو شي بداخله مايطلعة.. 

گال خلي نتغدا .

واروح اخذ غراض جبتهن الاهلي واشوف امي واجي الگيج جاهزة حتى نروح نبدلها ..

جاي نتغدا وهو يباوعلي . خجلت . گال تدرين طالعه شكل ثاني ..

-يعني عجبتك ..

-كلش ..

ابتسمت ..

گال فرح .. ترى عبالي روحة النجف ماناسيها .. بس عندي شغله تخلص ونروح ..

-لا عادي بس حاسه عليك مو طبيعي بيك شي. .

-لاتهتمين ماكو شي ..

واخذته الصفنه وگلب بالاكل وگال الحمد لله ..

دخل يبدل ..

گمت غسلت المواعين ..

طلع هو ..

-رايح الاهلي واجي الگيج جاهزة ..

-ان شاء الله.. 

طلع دگ موبايله وگام يحجي ويفرفح ..

گال راقبوها هي .. 

مدام خاطبها وعاقد عليها يعني اكيد تعرف مكانه لو يلتقون ..

استغربت شيقصد عذاب .. اكيد لسا ع سالفه الي ضربه او نفسة الي ..

خليت ايدي ع حلگي . شوكت راح تخلص هالسالفه ياالهي ..

بدلنا وانتضرناه . اجة گال يله ..خلينا نطلع ..

صعدنا بالسيارة ..

وهو ماحجة ولاكلمة ..

التفت وگال .. مناك ونروح التماضر عازمتنا ..

ماقبلت ابدل الحلقه رغم اكو احلى منها.. 

بس گتله صغرها الها لان هو اختارها الي وماردت ابدلها ..

كملنا ورحنا التماضر ..

لگيناها خابصه روحها ومسويه اشكال ..

ساعدتها ..

وعذاب طول الگعدة ماحجة وضايج .

اشرتلي تماضر عليه ..

گلتلها ماادري ..

كملنا عشا وگال يله خلي نروح .. توسلت بي تماضر حتى نبقى هنا ماقبل ..

رجعنا للبيت ..

شفتة مو ع بعضه ..

تجرأت وسألته ..

عذاب اكو شي صاير احسك ضايج ..

فرك وجهة وگال .. 

انتي تعرفين رحاب ..

صدمني بسؤاله وماتوقعته ..

-شبيج ساكته .. تعرفيها لو لا ..

-منو قصدك رحاب صديقه منار ..

-اي صديقه انتقام ..

تعحبت من ردت فعله ..

گتله مااعرفها هواي لان ماشيفتها بس بالمناسبات ..

-هز راسة وگال هذا هو ..

-ليش شبيها .. صاير شي ..

-مااعرف احس روحي بدوامة .. تعرفين منو الي ضربني بالرصاص ..

-منو ..

-العار الي اختج خانتني وياه ..

ولو بي حظ طلع واجهني بس لان جبان دز جماعه الي ولزمتهم واعترفوا عليه ..

بس هو الكلب هارب ومااعرف وين ..

وصار شگد مكلف جماعة يدورون عليه ومالگوه ..

بس بالصدفه ..

عرفت رحاب صديقة اختج خطيبته ..

عطت بصوت .. شنوووو ..

اي اني مثلج استغربت ..

شلون وشوكت ماادري . بس عاقد عليها محكمة ..

ورغم اني انطيتها درس ..

بس الظاهر الدرس الي نطيته الهم ماتوبهم ويرادلهم درس اكبر ..

لان تجرأوا واتحدوا عليه ورادوا يتخلصون مني ..

-عذاب عفية عوفهم .. ذوله انذال .. شتتوقع من وحدة خربت حياة صديقتها وقشمرتها ..

والثاني ضحك ع وحدة متزوحة وماخاف الله ..

عذاب . كافي اسكتي وعساس اختج مضلومة هي نفس صاحبتها وماتفرق عنها بس اني كنت اعمى وااشوف عيوبها ااااااخ يابة دخلي الزمهم الا اندمهم . الظاهر مافاد بيهم العقاب ..

فرح .. ليش انت شسويتلهم ..

التفت عليه وگال .. خليتلهم بصمة ماينسوها بس الظاهر مايفيد بيهم ..

سدي الموضوع ولاتفتحيه بعد ..

ماالحيت عليه بس بقيت حايرة وافكر شنو سوالهم وشلون رحاب وهذا الحقير انجمعوا ..

عذاب عزل نفسة بالاستقبال وضايج ..

واتصالاته ماوگفت ..

الى ان غفى ع القنفه ..

جبت غطا غطيت ورحت للغرفه نمت ..

اوووف ياربي شوكت نرتاح من هاي الشغله ..

الايام تمشي والاشهر وراح تصير سنه وعذاب مازال يراوح بنفس المكان ..

للصبح سمعت صوت عذاب يعيط ..

فزيت .. 

طلعت مرعوبه .. شفته ديبدل والموبايل بأذنه باوعلي اشرلي ..

مافهمت ..

غلق الخط وگال .. مستعجل راح اطلع خاف اتأخر لاتقلقين ولاتگولين الامي شي ..

فهمت اكو مستجدات بالشغلع ..

گتله لگيته؟؟

وهو يريد يطلع گال ان شاء الله وطلع ..

حرك سيارته ..

رجع گال تقفلي الباب زين ..

يارب عدي هالشغله على خير مااعرف ليش گلبي عصرني واختنگت ..

بقيت ادعي ومااعرف المن اشكي او اروح ..

والساعات تمشي وهو ماكو خبر عنه ..

ومااگدر اتصل لان نبه عليه مااتصل واشغله ..

#بقلمي_الكاتبة_شمس

يتبع .... .

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad