قصة من سيدفع الثمن الجزء الحادي عشر في 11:20 م مرسلة بواسطة أحمد التكريتي

هلو حبايب .. بارت مفاجئ  قصير لان وعدتكم وماگدرت اخلف ..

متابعه ممتعه احبتي 😚😚

//// البارت الحادي عشر ////

#من_سيدفع_الثمن ؟؟

#بقلم_الكاتبة_شمس

بقينا للصبح گاعدين وماكو خبر… 

بيت خالو هيثم سمعوا واجو من الصبح ..

ووياهم زوجته ام ضحى ..

ياربي شگد حشريه .. هي بالفاتحة ورادت تفضحنا ..

لعد هسا وگدام عمامهم شراح تسوي ..

هي عساس زعلانه من خالتي ..

لان معاتبتها من عقد عذاب عليه ..

وگايلتلها .. ماتبتوا من اختها ورجعتوا اخذتوا الثانيه ..

خالتي ماناطيتها مجال وطابگة الموبايل بوجهها ..

من شفتها انقبض گلبي وضجت ..

باوعتلي وگالت ..

شلونج فرح .. شو ماتسلمين .

-هلو خاله شلونج ..

-والله فالجن فگر .. الولد اخرته يموت بسببجن .

خالتي ابجي وتباوعلها ..

من الخجل ماعرفت شأسوي ..

اخذت شهد ورحت للمطبخ گعدت ..

محد اله خلگ يردها ..

واحنه بوضع مو مال مشاكل وهي جايه ناويه الشر ..

انهزمت للمطبخ اجت وراي المصايب ..

تمارة .. طبعا شنو هامج گاعدة ومخليه هالفگر بحضنج واخويه مانعرف وين وشنو الي صارله ..

عبير .. اتركيها شتتوقعين من وحدة مثلها .. گرصتها تمارة وسكتتها ..

احس روحي طلعت . معناها تمارة گايلتلها .

من هيج عبير من اجت لسا بس تباوعلي بأستحقار وحقد وعبالك ماخذة زوجها ..

اخذت نفس وگمت .. باعي انتي وياها ..مو خوف منجن ماارد عليجن .. 

بس كل شخص يعكس اخلاقه وتربيته ..

عبير .. امممم واضح .

دفعتها وطلعت من المطبخ كله ..

ياربي شنو هاي احس الذيابه تجمعت عليه من كل جهة .

رحت للغرفه ..

نومت شهد ..

سمعت هوسة وعياط ..

ركضت والخوف مسيطر عليه ..

ايدي وجسمي يرجفن وادعي من الله مابي شي ..

شفت خالتي واگعة وكلها مكومة عليها ..

اريد افهم السالفه شنو مااگدر ..

تماضر تححي بالموبايل وتعيط وتبجي ..

رجلي اخذتني الها ..

ولزمت ايدها ..

تماضر عذاب لگوه شبي ..

باوعتلي وگالت .. وج لگوه مصوب ..

طالعه عليه جماعه وحاولوا يغتالوه ..

بس هو مخلص روحة ومصوب واحد منهم وهو مصوب بكتفه ورجلة ..

مااعرف ارتاح او اضوج ع هذا الخبر .

من سمعت العياط خفت بي شي لاسامح الله .

بس من گالت مصوب وبالمستشفى شويه ارتاحيت المهم عايش ..

بس منو الي تهجم عليه وقتله وشيردون منه ..

خالتي من الهبطة بعد مااتصلوا وگالوا عذاب مغتاليه وگعت وتخربطت .

مافاقت الا لما اتصلوا وخلوه يحجي وياها ..

من سمعت صوته ارتاحت ..

للظهر .. رجع عمو ابو عذاب واخوته وخوالي ..

تلگتهم خالتي ..

وين عذيب شلونه ومنو صوبه ..

ابو عذاب .. زين لتخافين عليه سبع وگدر يخلص روحة منهم ..

خالتي .. الله لينطيهم منو ذوله وشيردون منه ..

ابو عذاب .. يگول مااعرفهم شمدريني ..

ابو باهل .. مااعتقد مايعرفهم اكيد مهدديه لو عندهم شغله وياه .. لان مقاومهم ومصوبهم معناها يعرفهم .

هسا ع الاقل يشتكي عليهم ومايضيع حقه ..

خالتي .. بس خاف يرجعون يكتلوه مرة ثانية ..

ابو عذاب .. غير يقنع ابنج ويگول منو ذوله ..

عذاب .. طلعت المغرب اتفقت وي فارس نلتقي .. وگلت اغير جو لان من ابقى بالبيت اختنگ ومااتحمل ..

وي طلعتي حسيت اكو سيارة تراقبني من طلعت من البيت ..

بقيت امشي واباوع بالمرايا ..

امشي سريع تمشي ..

افتر تفتر وياي ..

طلعت سلاحي وخليته يمي ..

اتقربت السارة اكثر وصارت گدامي ..

وتوازي بيه الى ان نزلتي ع الترابي ..

اخذت سلاحي وگمت ارمي ..

انضربت بكتفي ..

نزلوا الي ..

بعد مابنجروا التاير ..

نزلت عليهم ..

صوبوني برجلي ..

هنا گلت .. عذاب هي موته وحدة ..

گمت ارمي عليهم واحد واحد لان طلقات قليله ولازم ماارميهن عشوائي ..

صوبت واحد .

سحبوه للسيارة وطلعوا ..

الناس اتجمعت واتصلوا بالشرطة ..

كنت شاك بواحد واذا طلع هو الا ماارحمة ..

اخذتني الاسعاف .. وبقى موبايلي بالسيارة ..

دخلوني العمليات وطلعت واهلي مايدرون ولااخد يعرف رقمهم ..

الى ان صار الصبح وصحيت ..

اجت الشرطة تستجوب ماانطيت اسم لان مامتأكد ..

فبقى التحقيق جاري ..

طلبت من شرطي يتصلي على اهلي. 

وانطيته رقم معتز ..

نص ساعة واحس المستشفى انگلبت ..

عمامي وابوي وولد عمي ومعتز وزوج تماضر ..

وصرعوا راسي بالاسئله كلها تگول منو الي صوبك ..

ساعة وانگلب المقر مالتي ..

وجماعتي كلها اجت ..

والآمر يتصل ..

ماردت الامور تكبر والكل يعرف ..

ولازم اكون حذر بخطواتي ..

لهذا اضطريت اسكت ومااشتكي حاليا الى ان اتأكد ..

فرح ..

اليوم كله احنه مخبوصين بين الخطار والجيران ..

واني حرت بالبيت والطبخ وشهودة مستغربه من الهوسة وماتريد احد بس اني ..

حبيبتي كبرت وصايرة تفتهم .. 

وتميز الوجوه من تشوفهم ..

وحتى گلبه يحس الي ترتاحله او لا ..

بعد يومين .. طلعوا عذاب للبيت مال اهله ..

لان حتى يراعوه ولد عمة ومعتز يمة ..

هناك ماكو احد ..

اول مادخل طلب شهد يشوفها ..

استغربت ..

اخذتها خالتي اله ..

قتلني الفضول اشوفها من تشوفه شنو تسوي ..

اخذها من خالتي وحضنها وشمها ..

-ااااه ولج ماتوقعت هيج اشتاقلج .. تدرين يمة اول ماتصوبت صارت هي گبال عيني ..

ردت الله ينطيني عمر حتى احضنها واشبع منها ..

يحجي وي خالتي .. وهي تبجي ..

حتى اني بجيت ع كلامة ..

كان يكابر ويحاول يبعدها عنه .. بس القدر قربه الها ..

البيت مافرغ من الخطار طول هذي الفترة ..

من جماعته واقاربهم ..

حتى اخواني اجو يشوفوه ..

بس اني مطلعت الهم ولاشفتهم ..

ولاهم طلبوا يشوفوني ..

اصلا كنت متوقعة هالشي منهم ..

خالتي كانت تتعمد تدزني اله .. اسويله اكل لو اساعدة بشي ..

ومااگدر ارفض لان بس اني وياها بالبيت واستحي اگلها مااروح ..

مرات يقبل ومرات يتذمر ويرفض ..

بعد ماتحسن طلب نرجع للبيت ..

وگال اريد ارتاح هناك هنا هوسة ..

طبعا بهذي الفترة كل شويه وطلب يشوف شهد وهي تضحك وتناغي ومخبلته ..

#بقلمي_الكاتبة_شمس

__________________________

رحت وحدي للبيت .نضفته ورتبته ..

وطلبت من خالتي سرير نفر واحد اخليه بالاستقبال اله .

دزت سرير بيد معتز وزوج تماضر ..

دخلوا خلوه بالاستقبال وطلعوا ..

اني رتبته وخليتله بطانيه .

وشغلت التدفئة ورجعت البيت خالتي ..

من دخلت .. گلتلها خاله كملت .

صاح عذاب ..

فرح تعاي ..

رحت اله ..

-شعندج رايحة للبيت ..

-نضفته لان صار كم يوم متروك ..

-وحدج ..

-اي اخذت المفتاح من خالتي ورحت وهي تدري ..

-وليش دزيتي على معتز وزوج تماضر شتردين منهم ..

-مادزيت .. خالتي هي دزت السرير بيدهم ..

-لاتشوفيني مااگدر اگوم وتستغلين الوضع وربي اذبحج بنفس اللحظه الاشوف بيها غلط عليج ..

-ترى اني مو صغيرة وتحمي هي وياي .. اشو مسويني فد مرة ماعندي اخلاق ..

-لتجادلين واطلعي برة .. وها دزي شهد الي ..

-ماادزها نايمة ..

-گعديها ..

تركته ومشيت ..

بقى هو يعيط ع تمارة .. روحي جيبي شهد ..

بسيطة عذاب .. لازم اخليلك حد الاسلوبك وياي ..

تمارة .. انطيني هاي عذاب يريدها ..

فرح .. هاي اسمها شهد وبنت اخوج عيب هيج تگولين 

تمارة .. دجيبي جيبي هاي اذا طلعت بنته فعلا ..

فرح .. احترمي نفسج .. صحيح منار خطأت .. بس مااسمحلج تتهميها هيج اتهام .. باعي النفسج يله تتهمين غيرج ..

هي عصبت ولافتها عليه وعساس متهمتها بشرفها ..

وزوج خالتي انطاني نبذة من كلامة الحلو ..

وذكرني بحقيقه اختي واني شنو وليش جابوني لهنا ..

كان بودي اعيط عليه وارد عليه بالكلام ..

بس قهرتني خالتي وهي واگفه بنصنا وتدافعلي ..

درت وجهي واخذت شهد ودخلت للغرفه ..

هي تبجي واني ابجي ..

اجة عذاب ع العكازة يمشي ..

دگ الباب وفتحها ..

-اني مو گتلج جيبيها ..  ليش عاندتي وفوگاها خابصه البيت ومسويه مشكله ..

مسحت دموعي ..

-اني مو .. اسأل اختك شنو گالت ع شهد ..

اذا هي ماتمسك وماتهتم الها ..

فعندي شهد بغلاة روحي ومااقبل احد يمسها لو يشهر بيها وتاخذها وياها للكبر ..

عذاب .. شنو گالت ..

فرح .. اسألها الها .. كلكم تنتقمون من منار بهذي الطفله .

بس هذي طفله يتيمة وتشور خافوا الله بيها ..

عذاب .. انتي ناسيه هي بنتي ..

فرح .. مو اني الي انسى انت واهلك الي ناسين .

انت هاملها كنت واهلك مايحبوها ..

عذاب .. كافي حجي ماسخ يلة .سكتيها خاف تريد تنام .

طلع مو الغرفه بسرعة .. طبعا الكلام ماعجبه ..

كل مرة يححي ويشوفني ساكته يستغل ..

هالمرة من واجهته تراجع وطلع ..

للعصر رجعنا للبيت ..

اوووف رغم اختنگ بالبيت واحلامي المزعجة بي .. واحساسي بروح منار يفتر حولي ..

بس بعد الي شفته ببيت خالتي ..

صار هذا اللبيت بالنسبه الي احسن واريح ..

عذاب نام بالاستقبال ..

ويگدر يگوم ويگعد عادي ..

اني گمت اسوي عشا ..

وخالتي بقت عدنا خاف نحتاج شي ..

اندگت الباب راحت خالتي تفتحها .

طلعوا بيت عمة ابو باهل .

راحوا البيت خالتي ومالاگين عذاب اجو النا ..

من شفت البومة وياهم انقبض گلبي ..

دخلوا للاستقبال ..

حضرت الضيافه ودخلت سلمت ونطيتهم ..

رجعت للمطبخ اجت عبير وراي ..

بقت تفتر بالبيت وتباوع ..

رادت تروح الغرفه عذاب وعبير ..

ركضت سحبتها وسديتها ..

-ممنوع هذي الغرفه خاصه ميجوز تدخليها ..

-امممم حظوظ.  

درت وجهي الها .. ع شنو ..

-انتي واختج . عرفتن شلون تقشمرن عذاب وتوگعنا بشباكجن .. 

طبعا صيدة حلوة . شخصيه ورتبه وفلوس اكيد ماراح تفوتنها ..

فرح .. عبالج الناس كلها مثل تفكيرج .. 

عبير .. مبين انتي ماتحبيه .. ليش باقية وياه . اطلبي الطلاگ احس مما تجرحيه مثل اختج وهالمرة اكيد مايتحمل ويقتلج لو يقتل نفسه ..

فرح .. ههههه عرفت تمارة مخبرتها وهي ماصدگت فرصه واجت الها حتى تبتزني ..

-باعي حبيبتي . اذا خطات اختي مو معناها اني مثلها ..

وعذاب زوجي وشهد بنتي يعني ذولي عائلتي ومو بكيفج انتي تقيمين حبي ..

لان مگاعدة ويانا ولاعايشه هنا وتعرفين شيصير بينا ..

هي تخبلت ودارت وجهها وطلعت ..

واني بقيت اضحك ع سخافه عقلي وتفكيري .. شلون حجيت وفكرت بشي من المستحيل يحصل ..

هاي شنو فوفه معقوله غرتي ع عذاب ..

ههههههه ياربي اول مرة اضحك هيج ..

بس خوش احترگت كافي بس همة يضوجوني .

بعد ماطلعوا بيت عمة .. 

دز ع فارس صديقه وگال سولنا عشا ..

حضرت العشا الهم اخذته خالتي ..

واني وخالتي گعدنا بالمطبخ نتعشا ..

تكررت زيارات فارس ..

وكل مايجي يبقون بالساعات وحدهم ومايقبلون احد يدخل عليهم ..

شكيت بالموضوع وگلت الخالتي ..

خالتي گالت لا بس همة دومهم سوه متعودين ..

اني هم مادققت وسكتت.. 

بالصدفه مرة اجيت اريد انضف الاستقبال . 

شفته نايم ويمة موبايله مفتوح تاركة وغافي ..

اخذتني عيوني اله ..

وشفت بي الشارع والحديقه والطرمة ..

خليت ايدي ع حلگي ..

معقوله مخلي كاميرات سريه ويراقب خاف انهزم لو شنو ..

فعلا ضجت منه .. طلعت من الاستقبال ورحت للمطبخ ..

اباوع من الشباك ..

وشفت وحدة مخليها على عمود الكهرباء بأتجاه البيت ..

اجت ببالي خاف مخلي كاميرات بكل البيت واني مرات امشي ع راحتي لو البس بالغرفه وانزع ..

يااا عزا ..

وبيومها سويت حمله ع البيت كله ادور خاف مخلي كاميرا بي ..

وسولفت الخالتي وگامت تضحك عليه ..

بعد ماتحسنت حالته .. خالتي رجعت وبقيت بس اني وياه هو زاد تذمرة وعصبيته ..

ومااعرف السبب ..

واكيد همومة كلها يفرغها بيه ..

مرات يگعد هو وبنته بالغرفه بالساعة واني ابقى ناطرة الى ان يطلع ..

مرة من المرات ..

نايمة بالليل وگعدت مختنگة ..

طلعت اشرب مي ..

صارت عيني ع الاستقبال مكانه فارغ ..

گلت خاف بالحمام ..

شربت مي ورجعت ..

سمعت صوت فوگ خفت ..

تراجعت باوعت للاستقبال ماكو احد ..

رحت للحمام خليت اذني ع الباب هدوء ..

دگيتها محد جاوب ..

فتحتة فارغ ..

ياربي هذا وين راح ..

بقت عيوني تراقب الطابق العلوي ..

صعدت ع اطراف اصابعي ..

الباب مسدود واحس صوته مخنوگ ويحجي ..

ولج ليش عذابج الي مايخلص ..

رحتي وارتاحيتي وخلتي گلبي مشتعل نار.. 

وج الشك اكلني ..

ياليت كاتلج بيدي ولااسمع هالحجي ..

العار الي حبتيه يگلي مالگت الراحة بحضنك واجت الحضني ..

معقوله خيانتج وصلت بيج تخلين غيري يشاركني بجسمج 

ولج انتي ملكي كلج شلون واحد غيري يمسج ..

اااااه يابويه ..

والله لو يمي هسا لأطلع سنوات حبي ودلالي الج نقمة وعذاب عليج ..

كان يعاتب ويحرگ مااعرف شنو لان شميت ريحة شياط .

نزلت واني متخبله من الي سمعته ..

معقوله منار كانت تطلع وتقابله ..

لا مستحيل ..

اكيد هذا يكذب حتى يحرگ گلب عذاب ..

والله زين منه عذاب ماقتله ع هذا كلامة ..

طخت ببالي بسرعه شغله ..

معقوله هو نفسه الي اغتال عذاب ..

لعد شگد حقير ووقح اذا هو فعلا ..

مااعرف ليش ساعتها كسر گلبي .. اوووف يمنار شسويتي بي حتى هيج مكسور ومايگدر ينسى طول هذي الاشهر ..

رجعت لفراشي نمت .. 

واني افكر بعذابه وصوته وكلامة بأذني ..

صعب هيج حب ينوجد .. وصعب شخص تحبه وتنطيه روحك ويغدرك ..

تذكرت كلام تماضر ..

وقررت اغير تعاملي وي عذاب ..

مو لغايه وانما حتى اساعدة يرجع مثل الاول ويطلع وجهة الحقيقي وينزع قناع القسوة الي لابسة والي رسمته اله منار بمخيلتي ..

مااخلص عمري كله اخمن وافكر واصدگ كلام هذا وذاك 

عذاب صار عندي مثل اللغز ..

ولازم انجح بفك هاللغز وحلة ..

وبما انه قدري كتب الي غيري فأجة الدور حتى اخلي هدف الحياتي واختار طريقي بنفسي ..

#بقلمي_الكاتبة_شمس

يتبع .. 

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad