قصة المشاغب والمطلقة الجزء التاسع والعشرون والجزء الثلاثون في 10:20 م مرسلة بواسطة أحمد التكريتي

#المشاغب 😎 و المطلقه 👩‍👦

قصه تدور احداثه حول بنت تتحرر من قيود زوجها الضالم لكن هل يمكن ان تعيش حياة سعيدة بعد طلاقها اما .....

#بارت29

الكاتبة زيليش ✍

يمه اليوم كتلي عمل شعبي اني راح اشمر البارت وشرد خاف تلوحني طابوكه

😊😊😊😊😊😊😊😊

استغربت شكله وجه مال واحد ضايج صعدت وهو وكف مخلي ايده ع راسه وينفخ مال واحد يفكر بس وصلت يمه

. زمرد هم مغيره مكان الفلوس مالتنه

. لا هنا بالكنتور بالمجر نفس المكان

دخل الغرفه يحجي واني وره

. بله تعالي معقولة اني مجاي اشوف ماكو كلت اله مغيرة انتي المكان

اكلب بالمجر واحجي

. لا ماغيرت مكان شي احب كلشي يبقه بمكانه شنو القصه يمعود جاي تشاقه وياي يعني وين يروحن

هذا الحجي ادور بالمجرات وبين ملابسه اكول بلكي ناسي اخر مره ومغير مكانه وكو جوه المجر هم مكان تسفط بيه الملابس نفشتهن كلت خاف واكع وهو خطيه جاي تعبان وبملابس شغل وكلب الغرفه كلاب فص ملح وذاب ومتكول ميةاو ميتين ونكول ميخالف فده بس فلوس هواي وجاي يجمع حتى من يروح لبغداد يكفنه ونشتري غرفه لان غرفه ماعده هناك ينام بالكاع وحتى كنتور ماكو بس مجرات مخلي بيه ملابسه ويكول ملابس جديده بتعلاك مخليهم يعني مكان يدوب لنومته حتى اكل من بره يجيب يعني لازم من نروح نجهزة بالكامل من مطبخ وردات وفراشات وغرفه نوم

الغرفه كلبنه كلاب وحتى من حركه كلبي شلت الدوشك مال جربايه خاف نسين وضاميهن .الغرفة صارت هوسة اذا شايفين بالات الكاضمية الملابس كمنه نفتحه وننكثه خاف صايره بنص ابلوز او دشادشه اني انكث بملابسي وهو بملابسه اني وياه ماردنه نكول لحد لكيناهن نسكت مالكيناهن هم نسكت لان عيب نكول فلوسنه نباكت بمعنه جاي نتهمهم هما حرامية

.يعني وين يروحن يايوسف شنو صارلهن رجلين ومشن اني هسة اكلك الاكبار بس يمكن جاهل مايفهم وهسة هاي الفترة جاي الفلوس الجذبيه فشافهم واحد منهم وعباله جذبيات واخذهن

.استغفرالله ربي والله مصيبه يعني انتي غرفتج هم دزين جاهل يجيبلج شي

. لا ابد ماعرف اصخر احد حجتي اجيبه بنفسي

بقينه نحجي وهم ندور ع ابو بلكي بهذا المكان نوب شفنه ماكو فايده الغرفه كلبناها كلاب ونستحي ننزل نكول فلوسنه ماكو والله حتى من حركه كلبي حسن نسيته جوة واني ماتركه لحضه وحده حتى من ادخل اريد ادخل حمام اوصي ميه توصيه خاف ينسوه ويطلع بشارع بس هسة كلبي صار نار مو علمود الفلوس بس مقهورة ع تعب يوسف هيج راح بسهولة سودة عليه بهل البرد يروح من الصبح يجي وجه مشك من البرد وهو يلمع والله مرات من يجي اكله عمت عيني هذا كله ركضك وجهك تعبان وديك متيبسه من البرد علمودنه من اذكر تعبه وباوع عليه بعد بملابس الشغل وكله تراب وجص وصبغ روحي تشيط وذب ح كتي بالغرفه حتى عندي تكرمون زبالة بيه اغلفه مال حلويات هم كلبته نوب مارتاح اله غلاف غلاف ادورة عبالك ادور ع نمل مو كومه افلوس وحجي ياربي لو عندي جاهل اكول يمكن شافهن واخذهن بس حتى حسن ميوصل لليده مال الكنتور بعده
اني جنت شلون ادردم بيني وبين نفسي
طلع يوسف يسمعني

. يله كافي لاتدورين وتحركين كلبج هاي راحن فده عنه يله مو يكولون بالمال ولا بالعيال احنه بعد يومين ونروح لبغداد وهذا الطريق كل شوية صايره بيه حادث وربج بعد عنه الشر بالفلوس واحد يكول لحمدلله ع كلشي يله اني اروح اسبح وانتي لمي الغرفه وخلي ننزل نتغده وربج كريم مدام جايبهن بتعب وحلال مابيكهن يعوضني بغير شي

. انشالله . رحت يمه حضنته . سودة علية

كطع كلامي دكه الباب وصوت مصطفى

. عمو وين صرتوا الغده نصب وجاي ننتضركم كلنه خو ماكو شي يكول جدو

فتحله الباب وصارت الهوية بوجه واني مبين علية ضايجه وهو بعد بملابسه مال الشغل وهو صاله ساعه جاي من شغل ويعرفون يوسف مايتحمل يبقه متوصخ كبل يسبح حس اكو شي

. عمو خوماكو شي ليش هيج ضايج

. لا عمي حبيبي ماكو بس ادور ع شي محتاجه للدوام ونسيت نفسي لان ادور هسة راح اسبح ونزل اني وزمرد اكلو بعدين ناكل لاتنتضرونه

نزل مصطفى بس مبين مامشت عليه وهو جذبته مو عدله منين اجته اوراق دراسه وهو مجايب قلم هنا كله بيت بغداد بس دخل يسبح واني كمت اخلي الملابس بالكناتير بس تشمر مالي خلق اسفط هو زين ولميتهن اصلا
بعدني جاي الملم وندك الباب

يدك بالباب ويحجي
عمي. يوسف زمرد بويه خيركم

رحت بسرعه مستحيه منه اول مره يصعد فوك وميصير اخليه يطول ورة الباب مكدرت اضم الملابس كله بس بقه شي قليل مو مثل مساعه عبالك انفجار صاير بالكنتور

زمرد. هلة عمي تفضل ليش تعبت نفسك وصعدت وعفت غداك

عمي. لا بويه شلون اكل لكمه وعايلتي مو كله مجموعة صح يوسف متعودين ع عدم وجوده بس ماكل لكمه اله ادك عليه وكله ها بويه تغديت رجعت من دوام مرتاح احس من اسمع صوته مرتاح ويكلي بويه ماكل حتى اكلتي يصير طعمه طيب بس اذا اني كاعد اكل ويوسف فوك ومن ادز عليه يكول اكلوا اني شويه ونازل حتى لو هو ما مشتهي او شيعان بس نفسي ماتنطيني امد ايدي ع اكل وتهنا بلاكل اله هم كدامي وهذا الحجي حتى وياج مو معناه اذا يوسف نزل وانتي مانزلتي ماهتم واكل لا هم بقه مامرتاح اكول اني اكل وشبع نفسي وماعرف ليش جنتي او ابني مانجمعوا وياي ع سفرة مو مثل اجبر بس ضميري يرتاح من هسة اصعد وبنفسي اسمع منكم كلمه والله بوية شبعانين وشوف وجهكم مابيه شي مو ضايجين او مضوجكم احد انزل واني مرتاح

. لا والله عمي ماعدنه شي ولا احد مضوجنه بس يوسف شويه تأخر ماسبح وانتوا صابين اكل كل لمصطفى اني اتاخر لا ينتضروني

. ها خوش عرفنه سالفه الغداه ليش وجهج ضايج صح انتي هسة مبتسمه بس تجامليني وثاني شغله ابنج ماتركيه منا لهنا مو صالج بساعه فوك وهو جوه وانتي ماتركيه دقيقه

. لا عمي من شنو ضايجه قابل منو يضوجني وحسن جوه ويه جهال مأمنه وكت الضهر البواب تنسد يعني مراح يكدر يطلع وخاف عليه

وره ماحجيت طلع يوسف من الحمام وتفاجئ من وجود ابوه

يوسف. هلة بوية شنو تغديت توه اجه مصطفى كال تعالوا ع غده يعتي انته مامتغدي

. اي صح ماكلت ماهن علية اكل وانتوا ماكو

. لابوية نروحلك فدوة صاعد وعايف غداك علمودنه يله خلي ننزل سوة

. والله يايوسف جنت شاك اكو شي ومن زمرد كالتلي لا ماكو شي اطمنت بس هسة مدام كتلي يله بوية خلي ننزل نتغده فتهربت من الموضوع لان تعرف نفسك بسرعه اكشفك اذا جذب عليه لو صدك ويله هسة تكلي شكو

. يابة والله سالفة متسوة

. اي كوله ميخالف

اني جنت واكفه يمهم وعمي كاعد ع طرف جربايه ويوسف يمه ومن عمي كله احجي يوسف فرك وجه لان هم ضايج ع فلوسه ومستحي يكله يابه فلوسي نباكن من غرفتي
اخذ نفس قوي

.يابة تريد صدك اني فلوسي ضاعت اجيت فتحت كنتوري مثل كل يوم مالكيتهن

. شنو بويه تحجي صدك شنو هو ربع ويضيع

. شسوي قابل اكلك نبكت هي كلمه صعبة تنكال واخاف اخوتي يزعلون

. شنو صعب وليش يزعلون هم مدام مالهم علاقة وماوصلين شكو يضوجون اني نازل وحجي مدام الكل موجود بس بوية قبل لانزل ارجع فتش غرفتك مره ثاني خاف نسوي هوسة ونكلب البيت ويطلع بمكن انتو مامدورين زين

كمت اني ويوسف ندور مره ثانيه وعمي ويانه بس كاعد ويكول انشالله يطلعن مدام مو مال حرام دورنه واحنا متأكدين بس كلامه صح خاف قبل شوية ما كزنه وحتى يوسف جر الجرباية خاف وكاعت جواه بس ماكو عبالك فص ملح وذاب

. بوية زمرد علكيفج لاشيلين ثكل انتي حامل حرام عليج يتأذه الطفل ولاتقهرين نفسج وانته يزسف هم اذا راحن ومالكيتهن لاتقهر نفسك والله انطيك فوكهن اذا عشرة الف انطيك مليون بس لاتقهر نفسك عندي صحتكم وراحتكم بدنيا

. لا يابة انته ماتعرفني عندي المليون والربع سوية بس واحد صعبه يجي. يلكه شي ماخوذ من غرفته والصعب ماتكدر تحجي لان انته تعرف الي وياك كله ثقه ومايمد ايده ع شي مو اله شلون تروح وتكله اووف والله صعبه كلش

وره ماكمل حجي ندك الباب فتحته طلع ابو مصطفى مبينين كلهم ماماكلين وجاي نتضرونه وعمي نوب هم طول يمنه فحجه بنسأل

. خو ماكو شي قلقتونه عليكم ونستحي نصعد نكول خاف سالفه رجال ومرة وعيب ندخل

عمي. تعال بوية هم مابينهم شي بس خطيه فلوسهم الي لميه حتى يأثثون بيه بيتهم لكوه ماكو بكنتورهم وهسة خطيه كلبوا الغرفه وماكو

ابو مصطفى. اناخوك صدك راحن راحن يموعودين خاف حطين بمكان ضاميهن يم احد وناسين

. لا وين قابل اضمهن هو هذا الكنتور بالمجر

ابو مصطفى. اكلكم حسن يعرف يفتح الكنتور لو بعيد عليه خافنه عباله لعبه وماخذهن

يوسف. لا وين هو اليده مال الباب ميلوحه وبوبنه فتحه ثكيل والمجر بعد ابعد

ابو مصطفى. لعد ننزل للكل بدون زعل نفتش غرف مو شاكين باحد بس عدنه جهال وجاهل كلشي يشفون ياخذون فلحد يزعل والاحسن ابويه هو يكول محد راح يزعل

نزلنه كلنه وهم خطيه الغده بارد وضايجين عبالهم مشكله اني ويوسف وهم الي وكعوا بيه بس من حجه عمي كله نقهرت علينه ومحد حسب انو جاي نحجي عليه كلمن راح لغرفته ويدور وناس تسأل جهال وناس كامت جر بالتخم مال الاستقبال خاف مشمور وراه وعمتي تطلب من رب العالمين ينلكن وهم دور بالغرفة مالته الحلو بيهم ماحد اخذ ع نفسه وضاج اصلا نقهروا ع اخوهم البيت صلر ضجه ونسوان حماي شالن السفرة لان بعد محد ياكل وكل شوية واحد يكلي هم دزين جاهل لغرفتج المكان الي ضمين بيه الفلوس قافليه يعني خزنين الفلوس لو مشمرات واني كلهم لا مخليهم بمكان امين وحتى بكنتور مو هواي نفتحه يعني بس وكت الحاجه نفتحه

كله دورت بغرفه وماكو شي البيت نكلب كلاب
باوعت ع يوسف ضاج بس بداخله ميحب يبين الهم والله حقه زين ماصعد ضغطه فلوس بهاذا وكتنه تركض صبح وليل حتى تحصل شكم فلس واكو ناس اصلا ماتلكه شغل

سودة عليه يشتغل هاي الايام كلشي بس علمود تكفينه فلوس شتغل عمالة وبهذلة ويكمل شغل بسرع وقت حتى يستلم شغل ثاني وحتى العصر مرات يروح للمزرعه بيه حوض سمج يصيد سمج ويبيعه لهل سوك والفلوس اله يعني مو تكول بسهولة محصلهن

بقوا محتارين وين راحن بس قابل شيسون بعد فكلهم كلوله لاتهتم ولاتنقهر هسة نصعد نجيبلك وكلهم يردون يرحون لغرفهم وعمي هم بس هو وكفهم

يوسف . والله ابد ربع ماخذ واني من اول بدايه ماردت اكول وحتى زمرد شاهدة ع كلمي كتله مو يكولون بالمال ولا بالعيال شدرنه يمكن ربك دفع عنه مصيبه ابسط شي اني وياه رايحين لبغداد وطريقنه معروف بيه حوادث قابل احنه واحد هم نتعرض بهذا الحادث ماصرف هاي الفلوس ع مستشفيات ودكاترة ويمكن نمت والله احسن ضاعن ولا هنا يمي وصرفهن ع دكتور ومستشفيات

كله كلتله كلامك صح ويحمدون الله وعمي وعمتي يكولون والله لو اعرف يخيروني بيتي ينوخذ مني وكعد بكوخ لو يموت واحد من هاي جهال لا والله انطي البيت بس علمود لا احزن ونقهر شنو فيده اني عندي كلشي من بيت وفلوس بس حزينه وفاقده شخص عزيز اكعد بكوخ بس المهم كل عايلتي يمي وكله تضحك وامبيهم واحد مريض او ماموجود افضل سعدتكم وسعدتنه ع الفلوس

اصروا ع يوسف بس هو يكلهم ضوجوني وصح انقهر من تسون هيج وعمي عرف انو يوسف مايحب يكون عاله ع احد كلهم سدو الموضوع ولاتلحون عليه ونوب كال يله بوية صبن غدانه هسة ضايجين ومكدرين علمود وصخ دنيا فلوس اصلا لازم اليوم نحمدالله ع هذا شي انو بعد عنه مصيبه او مرض او كارثه تريد اصير وخلاها بالفلوس كمنه كلنه للمطبخ حمينه الاكل ام كرار اصب واني وام حسن كمنه ناخذ الماعين للسفرة فجاي ادخل للمطبخ وسمعت ام مؤكل تحجي ويه ام كرار

ام مؤمل. والله خطيه صدك نكسر خاطري عليهم حتى زمرد كوه لازمه نفسه لو بيده جان شبعت بجي لان دمعه باوعله تروح وترجع بعينه هم حقهم بلكوه مجمعيهن وهم طلاب وراهم بيت يرتبوه والله صدك كسروا كلبي

ام كرار. هه والله انتي فقيرة هذا كله تمثيل شبيج بابا مصدكه ضاعن عمر صالنه هنا فديوم ربع دينار نباك نية بالمية هي اخذتهم وهي سوالف نسوان كله اعرفه عود سوي نفسه مقهورة ودمعه بعينه حتى محد يكشفه

اني من بدت تحجي اجتي ام حسن تريد تدخل لزمته من ايده عود اكله اوكفي خلي اسمع بله شتكول وهي هم وكفت تريد تسمع شكو من حجت هيج تخبلت يعني قصده اني الي بايكتهن ماتحملت اسكت رحت عليه شايطه وام حسن تكلي تركيه هاي ماتعرف تحجي ويمعود خاف الولد يسمعون وهسة هما معصبين وتصير مشكله بس اني ولا جني اسمعه تركته ورحت فوك قهرتي وضوجتي ونوب تتهمني

زمرد. ام كرار هواي تجاوزين وسمع منج حجي وشوفج تحرضين وتريدين تلزمين عليه لزمه حتى عمي والولد يضوجون مني وسكت وكول متسوه مادوخ راسي بهيج بشر بس من توصلين لخلاقي وتربيتي وتهميني بشي انتي لاشايفته ولاسمعه ولا حتى عندج شي يثبت انو تشكين بيه ولو حتى بالج انتي هسة بنت شيوخ ولازم متعلمه من الشيخ مانتهم احد وتحجي عليه اله نشوف بعيونه او يجي احد ثقه وموجذاب يكلنه اله نصدك ونكول هذا شخص موزين وع كولتج حراميه هسة انتي شفتي مني حتى هيج تكولين ابسط شي المخزن مال المواد الغذائية ماعده مره طبيت اخذت منه معجون وهم رحت كلت لعمتي عمه راح اخذ من المخزن قوطيه معجون خلص الي بثلاجه هي مو ماتقبل او اذا درت اني داخله راح تضوج لان كلكم دخلون بدون استأذان بس اني نفسيتي ماتتقبل ادخل مكان وتمشه وتصرف بكيفي واني مصالي شهر بهذا البيت هو مو عيب ولا حرام بس هي نفسيتي وعزه نفسي حتى ويه يوسف الي هو اقرب من روحي هم ماكدر افتح محفضته اله بعلمه والله والله وقسم بالله مافديوم فتحت محفضته وهو مايدري كلشي اريد اكله يوسف اريد هيج شي هو مايقبل ويكلي لاتستأذنين من تاخذين بس اني داخلي عزه نفس احس شي مو الي مامسموح حتى اباوعله مو نوب اجي ابوك فلوس رجلي الي جنت هذا المجر الي بيه الفلوس ماوصله مدام اكول مابيه شي الي شكو فاتحته مو هسة تجين وتهميني بوكه وهنا لا الف ولاالفين ملايين كليلي من فكرتي اني الي بكت مكلتي هي حتى ماعدها اهل ونكول صدك اخذتهن لاهلها بس معنا كلامج اني مو شريفه وعندي سوالف تعبانه فاخذهن لشخص ثاني والله العضيم هسة راح اسكت وماحجي وعديه لان اني مالي خلق ويوسف لو يدري هيج حاجيه ماحتاج اكلج انتي تعرفين شكلج اخر مره كبل يروح لابوج الشيخ بس ماتسوه لان اني يومين ورايحه وماحب احد يشيل عليه بكلبه بس والله اخر انذار الج بس اسمع منج كلمه حتى لو ماتسوه كبل اني اروح للشيخ وكله بنتك شوه بسمعتي وتتهم بيه وانتي بعد تعرفين الشيخ اني صالي ١٥ يوم هنا وعرفته شخص ميحب تشويه سمعه وخاصه الشخص المضلوم مثلي يلعب طوبة فاحترمي نفسج وبتعدي عني واخر مرة اسكت وعذرج وكول موقصده بس ثاني مرة شوفين غير وحده اله سمعتي اعرف اذبح بشر علمود سمعتي وشرفي دمرت حياتي وطلكت بس علمود سمعتي وشرفي

حجيت بدون نكطاع وبعصبيه وهي تريد تحجي بس اكله اس خلي اكمل وهم محد حس بينه لان البنات مابقن واكفات يمنه راحن يصبن اكل وياخذن ع سفرة حتى محد يحس وكل شويه وحده تكلي كافي لاتخركين كلبج وموقصده وهي متعرف شلون تحجي
بس اني ابد ماسكتت صح فقيرة وعمري ماعليت صوتي ع احد يغلط بحقي او يأذيني بس هم بشر اله حد للصبر حتى هاي النفاخه هم من تمليه خوا زياده طك ماتتحمل الهوا مو نوب احنه بشر عدنه مشاعر ودمعتك بطرف عينك واقل شي يبجيك وتسمع كلام مثل سجين يذبحك ذبح اول مرة ميخالف اعدي واسكت واسامح بس من توصل حده ويكوم يتماده لا ماتحمل تروح طيبه كلبي وصبري وصوتي ناصي واصير مثل الواحش بهذا وكتنه يا تبقه ساكت وحقك ينوخذ واصير ملطشه للرايح والجاي يا تصير شخص حقير و يطخج بكلمه ترديه بعشرة حتى حقك مايضيع والفقير بهذا وكتنه مايعيش وينكال جبان وحتى من يتهما احد ويبقه ساكت ناس تكول ماسكت اله صحيح الي جاي ينكال عليه

اخذت حسن بحضني وكعدت بصف يوسف بس مالي نفس اكل كمت اوكل بحسن وحتى يوسف اشوفه جاي يلعب بالاكل بس مجبور حتى لحد يضوج وعمي خطيه من يشوف احد مايكل كبل يضوج فيوسف سوه نفسه ياكل واني ابد هم قهر الفلوس وكلام ام كرار الي كل كلمه تبز بكلبي كملنه غده بس كله ساكته اول مره اشوفهم هيج ضاجين ومايحجون كلمن كمل اكله وشرب جاي وصعد غرفته واني ويوسف كل واحد لف راسه ونام ماحجينه كلمه واني هم ماكعدت اله ع نفسي مرفوعه فتحت عيوني شفت يوسف جاي يرفع بيه حتى يخليني بحضنه لان مسافه جبيره بينه حضني وخلاني ع كلبه وباسني من راسي

يوسف. اووف ياحضنج ينسيني كل هم

ماعرف احجي ولا اعرف ارد بقيت ساكته وحس حضني يشرحله الي اريد اكوله لان حاضنته بقوة ودفنه راسي بصدره وحس بعد حضن مو كافي

يوسف. يله كومي بدلي خلي نطلع للمرزعه وحسن لبسيه ثخين لان جو بارد

زمرد. خاف مالك خلك وانته تعبان اليوم من شغل ومانمت هواي

يوسف. لا اني اريد اطلع مختنك من الغرفه وماحب اطلع وحدي

كمت بدلت ويوسف كام يخبثويه حسن يكرص لو يدغدغ رجليه هو يتونس من اكله كعد حسن لان من يدغدغه يضحك وهو نايم فيكول اكو احد نايم ويضحك يوسف يتونس عليه ويبقه يكول اكو واحد نايم ويكركر ومن تركه يكمل نومه شو اني اذا جاهل بشارع عاط اسمعه وفز بعد مانام

من كملت تبديل ماعرف حسيت نفسي صعبه اطلع بمزرعه وهم منطقتهم بيه ناس شافنه احد يعرف ييوسف وسلم عليه واني ملابسه حجاب اول مره احس انو صعبه اطلع بدون حجاب واني ابد محد حتى ملمحلي بموضوع الحجاب رحت مباشرة بدون ماخذ رائي يوسف لان هو كلي مادخل بيج اذا لبستي او نزعتي الحجاب بس كلي اذا فديوم قررتي تلبسين حجاب ماتقبل بعد تغيرين وتنزعيه ياما تبقين بدون حجاب او تلبسيه كل العمر بلحضه وحده كلت وشبيه الحجاب شنو مثل راح يخنكني لو يسويني مو حلوة ليش اني احب اهل البيت ومن اوكع بمصيبه يساعدوني وحبهم بجنون وحزن بمحرم عليهم وحب السيده وفاطمة الزهراء واشوف معجزاتهم ومكانه الي انطاه رب العالمين الهم واتمنى اكون وياهم بالجنه بس اني ملابسه حجاب صح جنت ولحد هسة اكول مو معناه ما تلبس حجاب مو زينه ومو متدينه بس الحجاب مكمل لهذا الدين ستر للمره لو الحجاب ماله اهمية وماله ذكر. بالقران ورب العالمين ماامر بيه جان الرسول زوجاته ماتحجبن جان بنته فاطمه زهراء ماتحجبت بنته زينب ماتحجبت لان رب العالمين مامر بيه ولا هو واجب اني من لبسته اول مره مجبوره وهيثم جبرني بس هل مره اني حابته مقرره انو البسه محد جابرني محد امرني اله البسه رحت طلعته لون ساده ماروني ولبسي اني من اشتريته بديات طويله وفوكه ستره طويله وبنطرون يعني لبس محجبات بس اني من جبته كلت خاف اطلع ومناطقهم معدوم اصلا بيه البس بنطرون جينز وبدي لحد الخصر مالبست الحجاب اله خليت يوسف يروح للحمام حبيت اكون وحدي اكون البسه وراتبه كملت لبس وحسن هم وهو طلع

*******************

#المشاغب 😎 و المطلقه 👩‍👦

قصه تدور احداثه حول بنت تتحرر من قيود زوجها الضالم لكن هل يمكن ان تعيش حياة سعيدة بعد طلاقها اما .....

#بارت30

الكاتبة زيليش

😶😶😶😶

رفع راسه عود يكلي زمرد كملتي من صدمه كال زمرد تحمكتي خبط تحجبتي ويه كملتي
من الصدمه اني واحد جفص كدامي بعد شيسكتني كبل ضحكت

. يبو يازمرد صايره تافه كلشي يضحكج جنتي رزنه وبلكوه تضحكين هسة نهار كله فاتحه حلكج بس لا نعديتي منه وصرتي مثلنه تافه ع كلشي تضحك

. ههههه تره جاي تغلط ع اهلك

. ولج سكتي خلي نحجي جد شنو قصه الحجاب

. يوسف تعرفني ماعرف احجي بهيج مواضيع وكلك شنو خلاني اتحجب

. اي هذا شي خاص بيج واني من بدايه كتلج ماجبرج ع كلشي بس تذكرين شرطي تلبسين حجاب بعد مايلبس ومن تلبسيه حتى كدام اخوتي هم لان بعد حرام احد يشوفج من رياجيل غيري ملابسه حجاب يعني قصدي من لبستي الحجاب مو بس مجرد لوك ومليتي من شعر ومخليته مثل زينه ع راسج لازم تلبسين حجاب صحيح ماكلج لازم تلبسين عبايه لا هي مو بالبنطرون بس بطبيعه لبسج من ملابسه حجاب بالكليه تلبسين بدي قصير لحد الخصر او تنوره قصيره والبدي نصر دان ميهمج لا هذا يتغير لازم لبس طويل عادي بنطرون ماعليه اعتراض بس كون ملابس طويله حدج بس كف ايدج يطلع بعد انتي شايفه رانيا وشلون لبسه تتقبلين تلبسين مثله

. يوسف اني مو طفله اليوم تلبس حجاب وباجر تنزعه من اخذت هذا القرار بكل كلشي فكرت واني هذيج الايام جنت اقره بالانترنت
وتاكدت انو الحجاب واجب وقتنعت قلب وقالب بس جنت مامحدده الوقت ودائما اكول شون بس هسة حسيت اجه الوقت

ابتسم وكال

. والله مادري شكلج فرحان وبنفس الوقت ضايج اكول خاف مجبورة مو من كلبج

. لا والله ابد وحتى اذا تحس اني لبست الحجاب بسبب احس نفسي اني الوحيد بين كل نسوانكم ملابسه حجاب ونجبرت لان احس نفسي نشاز لا والله اصلا الكم اجر نبهتوني اقره عن الحجاب وشوف واجب لو لا لان اني محد فهمني ليش البس حجاب معتبرته جنت شي مستحب مو واجب

. عفيه خاف جنت اكول زمرد جميله هسة صرتي اجمل الحجاب برز ملامحج وانشالله بس ارجع لبغداد اشتريلج ملابس هواي وحلوة وحجابات انواع و هنا بس يومين باجر وعكبه ونرجع لبغداد يعني خاف تكولين الحجاب بالبيت يخنك عاد من بنقه وحدنه بكيفج شتلبسين وصدك هاي الثياب عوفيه هنا وحتى تراكسود ماريد كون جيبين الملابس فتحاته لاتقل عن ٣ فتحات اريد ضهر مابيه قماش يادوب خيط واديج كله ربع ورجليج طالعه لحد الركبه يعني قماش قليل هم نوفر وهم جمال

. هههه توفر هاي قويه

. ههه اي بدل ماتجيبين تراكسود ٢٥ كلما يقل القماش ينزل السعر

. هههه خوش تفكير اصلا هيج ملابس اصير اغله

. لعد لا يابه ملابسج نفسه بس جيبلي مكص واني اكصكص ع مزاجي منين مايعجبني

. هههه خوش فكره

. يله ولج امشي وشوفي حسن شلون زهك

هل ايام حسن من مانطي شغله لو اطول عليه يكوم يتئفئف

نزلنه جوه بهذا الوكت ناس نايمه وناس كاعده تشرب جاي او كاعده بالحديقه فجان عمي وعمتي كاعدين سوه ع الاخبار يباوعون ويمهم حماي ابو كرار كاعد

وهم بس نزلت كله حجت ها تحجبتي

يوسف. هههه شنو هل صدمه

ابو كرار. خويه لبستي الحجاب علمود الفلوس ترجع وراه تذبيه انتي مثل هذا الي صاعد ع شجره شمس من فوك حاركته والاسد جواه بس ينزل ياكله رفع راسه للسما وكله ربي بس تخلصني من الاسد وطلع سالم والله بعد استمر ع صلاه لحد اخر يوم بحياتي من راح الاسد ونزل مصار بيه شي كله جذبت عليك جذبت عليك. ههههههه يعني استغفرالله يكله اني خدعتك

يوسف. ههههه ينعل بليسك وين ذكرته

عمي. الله اكبر عليكم حتى البنيه طار واهسها من الحجاب وتندمت لبسته بدل ماشجعوها جاي تضحكون عليها

ابو كرار. لا يابه بس بعد تعرفني لازم اضرب مثل وهي نطبقت عليها القصه

زمرد. اني غلطانه فجاء لبسته كون شويه شويه مثل اول شي اخلي ع جتفي وبعدين اخليه ع راسي ومطلعه شعري كله وبرها بس الكذله ونوب تحجب مو فجاء اصدمكم والمصيبه مو هنا اتوقع مانتبهت ع جواريب سود

هو بس شافني مات من ضحك لان اني لابسه حذاء فلات ومتطلع الرجل منه بس شي قليل وحتى اكدر اغطيه بالبنطرون بس اني لا انتهت بعد لبست حجاب لازم انفذه بالحرف بس المضحك بالموضوع جواريب سود مال عجايز اثخان لان ماعدي بس هذني جنت البسهن من اروح للزياره فقط باقي الايام مالبس جنت

يوسف.هههه ولج ادري تحجبتي بس حتى امي مو مثلج هم جواريبه شويه خفيفه

ابو كرار. لا يوسف هي منيله جواريب اصلا بس تلكيه لابسه جواريبك ماتوقع اكو هيج جواريب نسائيه

زمرد. هههههه والله اني الجبته نفسي بعد شيخلصني منكم همزين العبايه مو اجباريه جان سويتوا من البسه

يوسف. ههه تخيل ابو كرار زمرد لابسه عبايه وبيده حسن وتعبر الشنفه هههههه كبل تنكلب ع وجه واجيه ركض هي ماكو بس العبايه مطوفه ههههه

عمي. يعنل بليسك ولكم عوفوه بحاله تعالي بويه. رحت يمه باسني من راسي. عفيه بويه وراح انطيج هدية ع اقتناعج بالحجاب من نفسج بدون اجبار

زمرد. لا عمو شكرا

عمي. لا بنيتي انتي حالج حال بناتي من جانن يقررن لبس الحجاب بيومه لازم اجيبلهن هدية وانتي مدام لبستيه بيتي فالج هدية ماحدد شنو بس بوكته تعرفين شنو

زمرد. لا عمو والله عندي كلامك الطيبه كافي الي تخليني احس اني وحده من بناتك

عمي. هذا واجبي مو بس انتي لان مالج احد ويتيمه كلجن احسجن يتامه هي كلمه يتيم معناه انو ماله احد من اهلها وهذا ينطبق الحجي ع المزوج الي راح تروح البيت ماله بيه لا اب ولا ام ولا اخ ولا اخت بس اذا اكبر هذا البيت ناس زينه وتعامله باسلواب حلو واذا تأذت من شي كله توكف اله راح تلكه باسلوب عمه ابو رجله حنيه ابوها وعمته خوف امه والحموات اخواتها والحموين اخوانه فصير اله عائلتين واني هيج سلوابي اعتبر الجنه مثل بنتي شجيب لبنتي اجيبلها شتمنى البنتي اتمناه اله والله حتى بكل صلاه ادعيلكم اسم اسم حتى جهال ولا انسه واحد بكل فرض

ابو كرار . هو دعائك الي يحمينه من كل شر ويبعد عنه اولظ الحرام مدام راضي علينه راح ترفع ايدك وتدعيلنه

يوسف. هسة كله سهلة بس بوية شلون حافض اسمي جهال وتكول ماترك واحد وبالاسم اعيلهم ماتوقع كلهم حافضهم

كلنه ههههه هم صدك

عمي. ثول والله احنه وين نحجي وهو وين يحجي قابل اني مثلك ذك اليوم اكله بوية وين الفيته يكلي انطيته لواحد من جهال اكله منو شسمه يكلي والله بوية مادري بس هو جان لابس قميص ازرق وشويه اسمر

كلنه هههههعع

ابو كرار. ههههه اضنه حتى منطي الفيته لجهال جيران عبالة واحد من جهالنة

يوسف. والله اني هم شاك لان من انطيته بقه صافن بوجهي

عمي. صدك احنه الاتهينه بسوالف ومبين انتو تردون طلعون

يوسف. صدك والله شويه نريد نغير جو العطله ماطلعت بيه وبعد يومين ورجع للدراسه

عمي. اي بوية مابيه شي بس ثكلوا بالملابس تره بارده اكلك صدك بوية يوسف انته هم عايف نسخه مال البيت يم جيران خاف يصير شي بالبيت لا سامح الله كهرباء طك ماتعرف
كلشي يصير

يوسف. اي طبعا لازم ومخليه يم المؤجرين الجوه يله مرخصتكم اني اروح محتاجين شي اجيب وياي

كله. لا بس سلامتكم

طلعنه نتمشه المنطقه بيه ناس هواي بس من رحنه للمزرعه هدواء بس صوت الشجر يتحرك من الهوا وصوت المي يجري بسرعه والعصافير والبط وريحه نبات تخبل وحتى الهوا تحسه نقي نضيف خفيف من تستنشق الهوا ينطيك راح اذا مخنوك تروح الخنكه عبالك علاج
بقيت اباوع ع زرع هو مو هواي وحتى يوسف كال بشتاء مانزرع لان المطر ياتلف الزرع بس اكو كم نوع يتحمل كلشي وكال احلى فصل للزرع الربيع الي هو شهر ٣و٤ يكول زرع يكوم ينفش عليه لان جو حلو لا حار ولا بارد بس هسة مو ماكو لا اكو كاعد بيه مثل مكان للبتيته وطماطه هم زارعيه بس مخليه بيت مكون من جادر شفاف ملون لان يكول الطماطه انحس نبات بزراعه زارعين خيار عطروزي بس كلي العطروزي اذا شويه طخيته برجلك حسبه صار مر بعد ماتنوكل فماقبل ندخل للعطروزي وخس زارعين هم مخضر

. عجبتج المزرعه

. اي تخبل

. لعد راح اشوفج مزرعه الشيخ وبراهة كولي مزرعتنه حلوة

وداني للمزرعه عباره عن بيت سياج مرتبله وبابا دخلنه اكو زرع بره وطماطه هم مثل مزرعه عمي مخليه بيت بس بيته حيل جبير لان هو عيشته ع الزرعه حتى تجيه ناس من غير محافضات تاخذ منه يعني انتاجه بيكمات بس من دخلنه لبيت هم يشبه بيت الطماطه اني هم عبالي للطماطه بس من دخلت نصدمت عباره عن ورد بكل النواع جوري كاردينيه ياسمين الاقوحان كل الانواع تحس كاعد بجنه نوب القهرة الجبيرة عود ردت اصور المنضر طلعت ناسيه الموبايل بالبيت شبعت قهر ويوسف كامرته موحلوة خربانه صورت بيه بس مو واضح المنضر بقينه نفتر والعطر يخبل ويوسف راد يكطع ورده بس كلبي مانطاني اكطعه بس علمود يوم واحد وبعدين تيبس وتخرب
بقينه منا لحد المغرب اله رجعنه
بعد محد جاب طاري الفلوس مدام مالكن بمكان محدد او بغرفه واحد مضمومه بعد شيسون شنو ذنبهم وماكو دليل ع احد او مبين ع احد مرتبك وهما ماشكو بالكبار بس عبالهم طفل من جهال ماخذهن يعني حتى لو لكوهن بكنتور واحد من حمويني ميتهموانا هو بايكهم يكولون واحد من جهالة ماخذهم تخيلوا يعني الثقه عدهم وين واصله معناه ماكو احد بكل البيت ايده طويله ويوسف ماكلكم يضحك وطلع معناه نسه بس طبيعته مايضهر حزنه للناس واني صح ضايجه بس ما ابينه وابقه اسولف وياه واشقه حتى ينسه مو فوك ماهو مقهور ازيده قهر من رجعنه للبيت صلينه وراه تعشينه وعمي هم يحس بيوسف ضايج من كملنه عشا طلع طالب من ابوكرار يشغلنه مسرحيه عادل امام المدرسة المشاغبون واحنه والبنات سوينه شامية وهما جايبين حب وزن لان ميكيفي ابو الربع يرادلنع كارتونه يله تكفي كعدنه كلنه سوه وعمي والولد كلهم يضحكون وعمتي ماتت من ضحك تحب عادل امام بس اني بالي مو يمهم حتى مانتبهت ع المسرحية صافنه شلون ندبر الفلوس مرات اكول بس نصعد اكله هاك بيع الذهب مالتي وتصرف بيه ومرات اكول اخابر ام رانيا دبرلها مؤاجر لبيت ابويه حتى الفلوس تفيدنه مصرف عاد مانشتري غرفه ونضتري طباخ مستعمل بس مصرف للدوام وخط منين نجيب بس يوسف شيقنعه غير يلعب بيه طوبة اني مرة كتله خلي ابيعه ونصرف بفلوسه تخبل يكلي اني ماخذ شي مو الي كتله اني قابله وحتى سميه باسمي عود كلت نشتري بيت بمنطقه حلوة بس هو ابد سدها بدون نقاش وحتى ماصفن بس نطقت مو نوب اكله بيع ذهبي غير ينقهر بزايد بس لازم اكله

رفعت راسي باوعتله لكيته يباوع ع التلفزيون بس ماخذ صفنه مبين يفكر لان لو يباوع ومندمج جان ضحك لان عادل امام سوه موقف مضحك وكله ضحكت من خلصنه الفلم كلها صعدت للغرف واني ويوسف هم صعدنه وحسن نايم من زمان قبلنه ومصعدته بقيت اني ويوسف نسوالف ع الصور بالفيس شويه وفتحت الموضوع وياريتني مافتحته صار نار يكلي

.ادفن روحي ومااخذ منج ذهبج هذا شي الواحيد الي كدرت انطيه الج شو حتى حاضر وغايب ماسويتلج بس مجرد كلم وحتى ماكدرت اسوي عقد بالمحكمه وحتى اكتبلج حقوق ويكون الج شي تطالبين بيه بالقانون

. اني الحاضر مالتي انته وجودك بحياتي يعادل كنوز الدنيا والغايب كلامك العسل وطبعك الي ياعدل ملايين الي هسة بلحضه اختفن ومانعرف وين بس الكلمه الطيبه والحلوة تبقه حتى اذا مات صاحبها ومرت سنين عليها تبقه بالبال ومن تذكره تدمع عينك اذا فاقده وتتمناه ي جع واذا زعلان تنسه الزعل واذا فديوم ضلمك تذكر لو منه كلمه وحده راح تنسه كلشي اني حتى لو فديوم وماكدرنه نستمر سوه وطلكتني وماالي حق اخذ نفقه فلوس وعبالك اتندم لا اني نفقتي والغايب مالتي كل كلمه حلوة تكلياه وكل لحضه عشتها وياك ابسط شي اليوم من اخذتني للمزرعه وشوفتني الورود شكد مكان بسيط ومو مثل امكان الي بغداد بس يعادلهن لان تحس انو كاعد بجنه محد يمك ماكو ضجه الناس ماكان هادئ رومانسي يوسف هي مو بالفلوس اكو غني ويكدر يشتري احسن سيارة واحسن بيت واحسن بس مايكدر يشتري سعادة الكلمه الحلوة مابكدر يشتري الحب هذا كله عندي اني اغنه انسانه هسة عندي انته كلمه وحده منك تعادل كيلو ذهب وانته باليوم تسمعني الف كلمه تخيل شكم. كيلو ذهب تعادل الف كلمه ليش بالقصص دائما الغنياء يوكع بحب فقير او جميل ياخذ قبيح ماكلت ليش شنو سبب بس هو لكه بهذا الشخص الحب الكلام الجميل الي يخلي الغني يستغني عن امواله بس علمود يسمع هذا الكلام والجميل مراح يباوع ع شكل القبيح او يهتم لان كلامه وطيبه كلبه وجمال افعاله يخليه يشوف الجميلة قبيحه ماله يوسف ماله علاقة الفلوس بسعادة اني لو ادري انو اعيش سعيدة بالفلوس مجان حبيتك ولازوجتك

. زمرد اعرف والله وافهم شنو قصدج بس ماتوصل بيه ابيع ذهب مالتج علمود والله اشتري اكل وملابس الي اني مدام شاب وبعد بيه حيل مايصعب عليه شي وجيب فلوس واعيشكم الي يحرك نفسه ويشتغل رب العالمين حتى يزيد رزقه بس مو اني كاعده واريد مصرف واكول ماعندي وابجي بوجه الله واكول رزق ماكو وشغل ماكو
ماتعرف بيا ساعه تنرزق مرات تبقه ايام تشتغل بس تحصل الف دينار تجيك ساعه او يوم ينزل عليك رزق من السما بدال الالف توصل ١٠٠ الف معناه اني مو من اول يوم شغل واشوف رزق قليل اعزل واكول اني مامرزوق وماعندي حض ماتعرف بيا ساعه يجيك الرزق فيمكن اني هسة صح خسرت فلوس بس رب العالمين باجر راح يرزقني بشي احسن ماتعرفين شنو مضموام الج بس ربج يعرف

. بس هسة انته محتاج ...

. مامحتاج شي وبعد يومين اله نسافر ماتعرفين بهاي اليومين شنو يصير لاتفكرين لبعيد عيشي كل يوم بيومه ولاتهمين ل باجر مدام الله كريم ورحيم ورزاق مرات بساعت تتغير الامور وتصير اشياء مامتوقعها ولا مفكر بيه

. انته شكد انسان ايجابي وعندك امل وابد مايخب مهما صار

. زمرد كلشي بحياتنه جاي نمر بيه عبارة عن اختبار ومفاجئات مثل مانوخذن الفلوس بلحضه عبالك نفتحت الكاع وبلعتهن هم راح يجيني شي اتفاجئ بيه ومااتوقعه

حضنته بقوة
.ههه لازم مليتي من كلامي

حاضنته واحجي بصوت ناصي

. لا بس كلشي تحجيه يخليني انجن بيك من تتعصب احبك ومن تشرح وتصير عبالك شيخ انجن بيك ومن تضحك وتنكت وتشاقه اذوب بيك كلي شي مو حلو بيك يخليني مااحبك

.اوووف ويكلك صير عاقل وهي تجي تتحرش بيك وتخليك تتخبل ولج هذا السان لو حلقومه بله طلعيه خلي اشوفه

حجه بمكر ونيه سافله

. ما اعرف ليش تريد اطلعه ماكو

. لا اني ماعندي شي جاي احجي بنيه صافيه بس انتي تفكيرج قذر

. هاااا هم صدك

. اكلج ع طاري اللسان شو لساني يوجعني

. بله خلي اشوفه طلعه خاف مطكك

طلع لسانه بس مابيه شي لا حبايه لا اكو الاتهاب

. ماكو شي لبش جاي يوجعك

. قابل اجذب

. لا يابه بس اعرفه يكون اللسان واضح عليه شي مثل يصير لونين او احمر او بيه حباية

. بله طلعي السانج خلي نشوف نفس اللساني

اني ع نيتي طلعت مصدك بس هوة الواتي سوه نفسه مريض حتى اطلع لساني دائما يلعب عليه

اختصار الاحداث

يوم سفرنه كعدنه من الصبح قبل يوم خليت بالجنطه شنو احتاجه ومهم وبقيت اشياء الي مالبسها بالكنتور لفيت حجابي وبدلت حسن ويوسف جان ينزل بالجنط هو اشتغل يومين واستلم فلوس بس كروه طريقنه يعني بالخط العريض بجيبه ١٠٠ الف واهلة توسلوا بيه حتى ياخذ منهم بس هو ابد يرفض وخطيه كلهم البارحه نجمعوا سوه وحايبين الفلوس بديهم شمروها عليه رادو حاولوا وهو رافض مايقبل عنده عزة نفس بعد اكصر مني

سلمنه عليهم وطلعنه صعدنه كيات طول الطريق ساكتين او نايمين ومرات يوسف يكلي شوفي من شباك اذا شاف شي حلو
اختصار الطريق لان كلش طويل ونزلنه مره بمطعم كعدنه اكلنه ومو بس احنه كل ناس ومجبور سايق لان سيارة تتعب لازم شوية ترتاح

براها وصلنه للبيت هو عنده قفل البيت فتحنه الباب الرئيسي وبره درج صعدنه نوب هم باب من فتحه
انصدم يوسف بالي شافه 

يتبع

تحياتي

أحمد التكريتي

30/5/2019

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad