مساء الخير ع اجمل متابعين اتمنى لكم قراءه ممتعه
🌹🦋 البارت 31 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
جان ترسلي عفيه حيدر لتحلم بعيد هواي
اخاف تنصدم والله
مجاوبته لان حجيها مهمني
كل شويه وتراسلني وين وصلت
لو شكد بعدلك
بعدين راسلتها وخبرتها دخلنه للمحافظه
كالت اكعدهم نور ونظوري
شوكت همه يكعدون يوميه
لو ب2 لو 2 ونص
باوعت ع ساعتي ب1 الى ربع
كتلها عوفيهم خطيه
من اجي اني اكعدهم
منو بالبيت
محمد وزوجته بالدوام
وامير همين وزوجته نايمه
وعمو وخاله بالغرفه
وفاطمه
هم نايمه
وحنان
والله ماادري بيها
ممخابرها انت
لا هم ماتدري
مو كتلج مااريد احد يعرف بيه اريدها مفاجئه
ماتدري بيه كلبي طاك بس عليها هي وبس
حيل حيل مشتاقلها
اليوم اله اجرم بيج وعلي
طبعا هذا الحجي بكلبي
وصلت منطققتنه
راسلتها
كتلها افتحيلي الباب بدون صوت اريد افاجئهم
وهو جذب اريد اشوفها وبس
طبختي تمن وباميا
اي
يله لعد اوكفيلي بالباب راح اوصل
احس كلبي كام يدك سريع
احساسي صعب اوصفه
بعمري وحياتي ممار بهيج موقف ولا بهيج احساس
كتلها افتحي الباب
زينب : من صعد يمي حيدر قبل ليلتحق خربط وضعي كله
قلب كياني وقلب حياتي كلها
حيل وترني قربه الي
وادور يريد مني بوسه
مااكدر انطي مجال لان اكيد يتماده عليه
واني مستحيل اخلي يتقربلي
من جاب طاري الموت والدواعش كلبي نغزني
يبقى ابو نظوري ونور
حتى لو عندي حياتي الخاصه يبقون ذوله اطفاله
حسيت بنظوري ابنه من صدك مو ابن اخو
عندي طلسم الامام علي سامعه بي يحمي ويحرس الي شايله
انطيتهيا اني هذا جايني هديه من صديقتي
كلشي ولا يصير بي شي
بعدها طلب مني البسهيا
اديه ترجف كوه كدرت اسيطر والبسه
بعدها باسني ع الطاير بخدي ونزل
بقيت اتلمس خدي واضحك
اذن صليت وكملت ونزلت
كلت اسويله ريوك خطيه قبل ليطلع
فعلا سويتله وانتظرته
اجه يتريك واحس الخوف بعيونه
اني متعوده يم اهلي اي احد يسافر نطلع ورا ونذب مي
طلعت ورا وسديت الباب
احس بضوجه مااعرف لويش
رجعت بعدها نمت
احس حياتي صارت باهته ومااعرف السبب
فاطمه بدت تجهز للعرس لان قرب الموعد
كامن يطلعن وياها رسل وزهراء وحتى حنان
اشوف الكل عايش حياته طبيعيه
الى اني وخاله
خاله اشوف الخوف والحزن بعيونها دائما
اني كذلك
نظوري اتنحس حيل ع حيدر
رغم ما محمد وامير ابد مقصرو ويا يطلعونه ويشتروله
بس هو يريدله حجه حتى يبجي
نور كذلك دائما تسالنه ع ابوها ونكللها بالجيش يدافع عن الوطن
حبيبي بدت تتحسن حالته
حيدر ابد ميخابرني
اتصل بمحمد وخاله وحنان كالت همين خابرني
حيل ضجت
لويش بس اني ميخابرني ولا يسال عني
كلت خلي ع راحته
مااعرف سبب انزعاجي
لان علاقتي ويا عاديه
يعني مو اله يتصل بيه
جنت ممهتمه لامره ابد
هسه ليش اضوج مااعرف
الكل يتجمع بالليل اني مااكعد يمهم
اتذكره من يمنعني احجي وي اخوته
اهلي قرروا ينتقلون هاي الفتره بس نقل بابا اتاخر
البيت بمنطقه راقيه كالو منجيب شي ويانه بس الملابس
لان راح ياثثون من جديد
وهو اصلا اثاثهم كلها قديمه
مراح يتعبون
و واحد من عمامي متكلف البيت منظفينه ومناقصه شي
تقريبا صار اسبوع من حيدر التحق
اجوي اهلي كلهم
جايين ع مود يحجزون الكاونتر وغرف النوم
حيل فرحت بيهم واتغدوا يمنه
للعصر اجه ابن عمو الدكتور واخذهم ويا
بقن البنات يمي
حيل اتعطلوا وره الاذان يله رجعوا
ماقبلو يبقون ابد
راح يباتون ابيت عمو مقابلين يبقون يمي
ضجت بس مابيدي شي
اتوسلوا بيه اروح وياهم بس اني رفضت
بالليل اتراسلت وي رنا
كالت ماما مختاره الكاونتر لون بنفسجي
ومشترين غرفه الهم تركيه
ومختارين طخم للاستقبال وللصاله
وباقي غرفهن والبردات
كالت الصبح نروح احنه نختار
هم شفتي البيت
حلو لا
لا مشفته بس ماما تكول بناء حديث
شلونكم ابيت عمو
يوووه اسكتي
الكول متجمع هنا وتعاي سلمي وتعاي بوسي
والعيون كلها علينه
كوه سحبنه نفسنه واجينه هنا
شلونهم حبابين لا
البشر مينعرف من البدايه
بس هذا عمو جلال حيل حباب ومثقفين ولده وبناته
بقينه نسولف وبعدها رحت نيمت الجهال
اني يوميه تقريبا اصلي الفريضه يله انام
ابقى لو اكلب بالفيس داخله بكروب حلويات
ومرات اتابع قصص ع الواتباد
احس الوقت متوقف مكاعد يمشي
واحس حياتي روتين بدون معنى
يوميه ادعيله بصلاة الليل كون الله يحمي
يوم جنت اصلي وجنت حيل مخنوكه
وجان تجيني رساله عرفتها منه
احس روحي ردت اليه
استغربت ع نفسي
حيل فرحت من راسلني وكلامه جان يدوخني
اكثر المرات مااكدر اجاوبه
طلب افتح كام
واني احس منومه مغناطيس
مااكدر اكول لا
اكول خطيه مفارك اهله وتعبان
مااكدر ارفض طلب
بس هواي وترني ومااعرف شاحجي واجاوب
كل الي اعرفه حيل فرحانه
بعدها طبكه
ثاني يوم الضحكه ابد مفاركتني
الكل لاحظ عليه
كتلهم ماكو شي بس فرحانه لان اهلي اجوي
حنان راحت لاهلها وبقت هناك اسبوع
صار 15 يوم وحيدر مبين
بعد مراسلني
كال دوامي تعب مااكدر اراسل دائما
فاطمه عقدت محكمه وتقرر زواجهم بعد 20 يوم
راح تسوي حفله بالقاعه يوم واحد هو حنه وهو زواج
ويسافرون اللبنان
امير وزهراء قرروا يسافرون شهر لتركيا يرحون
وره زواج فاطمه
شايله هم اذا اتزوجت فاطمه
علاقتي قويه بيها
بس شاسوي بعد
كالت فاطمه التجهيزات كلها ع اهل علي همه مخبريهم
الحمد لله لان ماالي واهس لكلشي
حجيت وي خاله كتلها خل عمو يجيبلنه تنور
بقت صافنه بوجهي
ليش شنسوي بي
اشو نخبز كله عند الخباز
اي عادي نخبز من نشتهي
منو يعرف يخبز
اني اعرف اخبز
مو دائما نخبز اذا جمعه اخبز وي السمك
واني مشتهيه اخبز خبز لحم
فرحت كالت ياريت اني هم اساعدج
اني جنت كله اخبز بس صارت عندي حساسيه بعيوني
ومنعني الطبيب
والله ع اعصابنه ناكل خبز الخباز
والله حتى اني خاله تلعب نفسي منه بس مجبوره اكل
خل عمو يجيبلي تنور
واريد طحين وخمره
كالت هسه اكل لعمج
فعلا خبرته وجان فرحان
العصر جاب التنور وطحين وخمره
خلينا وره البيت اكو مساحه بالحديقه ممزروعه
اتذكرة ماعندي مخده للخبز
رحت خبرت خاله
كالت اني هسه اسويلج
قصصت اسفنج وقماش وسوتلي وحده
كالت بس اطلع للسوك اني اشتري وحده جديده
ثاني يوم عجنت وخبزت
والكل اتفاجئ
ضحكت كتلهم مو تتعودون عليه مااخبز يوميه
ضحكو كالو عمي حتى لو بالاسبوع مره كافي
كتلهم اني اخبز لعمو وخاله خطيه لان خبز الخباز مالح
اني بداخلي مااعرف لويش هيج سويت
يمكن ع مود حيدر
ادري بي يحب الخبز الحار مالت البيت
كلت بيوم اليجي اخبزله
صار 20 يوم وابد مراسلني ولا اتصل بيه
اليوم جنت حيل ضايجه وجان تجيني رساله من حيدر وره الاذان الصبح
حيل فرحت
وجان يفاجئني جاي
محد يدري بس اني
احلى خبر سمعته
طلب مني تمن وباميا
رغم ما بعدني لهسه منايمه بس كعدت كلي نشاط وحيويه
لكيت عمو كاعد
كتله صباح الخير عمو
صباح النور ابنيتي
هم تطلع للسوك
شتردين كليلي واني اجيبلج
اريد باميا ولحم غنم طازج وتمن عنبر او ياسمين
اريد اسوي للغده
التمن اغلبيته هندي يحبونه
ماعدنه عنبر ابد
كال صار شوي بعد اجيب
بقيت حايره شاسويله بعد
مااعرف يا حلاوه يحبها جان سويتله
كمت اكلب باليوتيوب
اخر شي صفيت ع حلاوة التوفي لان معجبني شي
راح عمو للسوك ورجع
هذا الحجي الجهاز بيدي
كل شويه لو اراسله لو يراسلني
بس خوفني من كلي اليوم محد يخلصج مني
جايب وي الباميا سمك زوري
مااحبه ولا احب تنظيفه 😢😢😤😤😩😩
اجتي خاله كالت اني انظفه تدري بيه اضوج من تنظيفه
حيل فرحت
عجنت وكلت مااخبز لمن يجي حيدر
حتى ياخذ الخبز كبل وياكل
خاله كلتلي اليوم ليش كاعده من الصبح
خاله لهسه منايمه اليوم مدري شبيه ولا نعسانه
كلت الهي نفسي بالطبخ بلكي انعس وانام
كملت الطبخ التمن والمرك
وسويت سلطه طماطا وخيار وبصل وزيت زيتون
همه يحبونها وي السمك
خاله اتكلفت الزوري
كتلها لمن اخبز يله تكلي حتى يبقى حار
اذن صلينه وكالت خاله راح ابقى بالغرفه من تردين تخبزين كوليلي
كتله خطيه الجهال اكعدهم كلي عوفيهم
راسلني كال وصلت للمحافظه بعدها للمنطقه
اخر شي كلي افتحيلي الباب
اني مااعرف شعوري اتجاها شنو بالظبط
كل الي اعرفه فرحانه بجيته لا اقل ولا اكثر
فتحتله الباب وانتظرته وره الباب
وجان يدخل باوعلي وابتسم
حسيت اللهفه واضحه عليه
شلونج زنوبه
هلو ابو نور شلونك
الحمد لله ع السلامه
الله يسلمج
سد الباب ردت ادخل لجوه
وجان يسحبني
ذب الجنطه بالكاع
اكو وحده تستقبل زوجها هيج
وخاصه بعد فراق 20 يوم
ارتبكت ومااعرف شاجاوبه
سحبني وخلاني ع الحايط
وصار مقابيلي
احسب لحضه لحضه شوكت اشوفج واحضنج وابوسج
وانت بهاي السهوله تردين ادخلين
اتخربطت اموري بهذا الحجي
كمت اوتوت مااعرف شاحجي
ها مو مو مو مو
خرب المو
احجي
مو الكدر ع النار لا يحترك
انعل صفحته للكدر
لعد واني ممحترك هسه
قرب شفته ع شفتي
وجان يبوسني احساس غريب انتابني
بالبدايه استسلمت وضعفت
بس بسرعه اتلافيت الموضوع
مااحب يتقربلي ابد
مااريد اكون اله سهله لان اكيد يرجع يغلط بحقي
بديت ادفع بي
بس هو ربط اديه بادي
كمت ارفس لان من صدك اختنكت
وهو ولا كانو
وجان نطفر اثنينه من سمعنه صوت ورانه
وجان صوت حنان
هاي شدسون
وشوكت اجيت
اني طفرت دخلت جوه بسرعه
وهو بقه وياها
لحضات وجان يدخل بعده بملابسه
خاله وعمو يمي بالمطبخ
وجان يتفاجأوون بي
خطيه خاله بس تبجي
احتار وين يبوسها براسها وبايدها ودنك ع رجلها باسها
اول مره اشوف حيدر بهيج موقف
يمكن لان من زمان مشايفها
رجع ع ابو همين خطيه باس راسه وباس ايده
التفتولي عمو وخاله
ايا ملعونه هاي التحضيرات كله اله
وتكولين الكم
ليش محجيتي
هو كللهم ردت افاجئكم اني كتلها لتحجين شي
زوبه حبيبتي ميت من الجوع جهزيلي الغده
اني تذبحوني متلكون بيه قطرة دم 🙈🙈🙈🙈🙈
استحي كدام اهله هيج يحجي ويايه
كلتله خاله روح اسبح وتعال تلكي الاكل جاهز
اني بسرعه جهزت العجين وخاله خلت الطاوه حتى تسوي الزوري
رحت اخبز
جان الجو موطبيعي بداية شهر السابع
والساعه تقريبا ب1
مستحيل اوصف حالتي بهاي اللحضه
قبل لا اكمل وجان يجي والابتسامه ع وجها
جنت لابسه الحجاب وشادته فوك راسي يعني ركبتي طالعه
اخاف ع شعري اخاف يحترك
اخذ خبزه بيده
شناويه تخليني اكل بس خبز واعوف الغده
لو هم ناويه تضربيني مثل ذيج المره
وتخليني بدون غده
لا لويش خلصت وراح اجهزلك الاكل
بس ليش تخبزين بالحر
شايفه وجهج هسه
عادي مصار شي وهياتني كملت
هذا الخبز ع مودي مو
ها لا ع مود خاله وعمو
يحك بشعره ويضحك
وعمج وخالتج اله هسه وي جيتي تخبزيلهم
سكتت خجلت معرفت شاجاوبه
اروح فدوه للتخبز بالحر ع مود رجلها
ياربي مااعرف لويش حجيه يوترني
كملت وطفيت التنور
راح قبلي واني اجيت ورا
جبت الخبز ويايه بس افور من الحر متت
لكيت خاله بعدهي تكلي
صبيت اله ولعمو وخاله كلولي خلي السفره بالصاله
كتله ماصحت حنان خلي تاكل وياكم
خلي تولي معايز مغثه منها
كملت وطلبو مني اكل وياهم
اعتذرت
كتلهم اريد اصعد اسبح لان متت من الحر
فعلا صعدت وكبل للحمام
بعد مااخبز بهيج وقت لو شيصير ولو مو حيدر
كملت وبدلت وطلعت
لكيت نظوري ونور كاعدين هستوهم يفركون بعيونهم
دخلتهم للحمام وغسلتهم وبدلتهم
ونزلتهم
لكيت حيدر يغسل
وجان يشوفون ابوهم ويركضون علي
اخذهم اثنيهم لحضنه ويبوس بيهم
طفيت الجاي وصبيت بس اله ولعمو
خاله بعدهي تاكل
صحت نور ونظوري كتلهم تعالو اوكلكم
رحت صبيت وكعدت وياهم
حيل جوعانه جنت
كعدنه ناكل اني والجهال
نظوري كل شويه وطافر لابو
يجيني اخليله لكمه بحلكه ويروح
اخر شي
كله تعال راح اكعد وياكم وامري لا الله
كعد بصفي
خاله راحت تغسل وعمو دخل لغرفته
عاشت ايدج ع الاكل والخبز
الف عافيه
شلت الخاشوكه اريد اوكل نظوري
يله حبيبي افتح حلكك خل اوكلك
اشو هذا حيدر فتح حلكه
اني بقيت صافنه
لزم ايدي وخله الخاشوكه بحلكه
الله اطيب لكمه هاي
واحلى كلمه منج حبيبي
نظوري ونور بقوا صافنين علي
والله لو تدرون شكد مشتاقلكم
نور كلتله العصر تودينه للالعاب حباب بابا
خزرت نور
كتله بابا جاي تعبان اليوم ماكو طلعه ولا تزعجينه لبابا
خلي بس ينام
حبيبتي اذا نمت وكعدت بيه حيل اكيد اخذكم
كوه كدرت اكل لان عيونه عليه وحيل متوتره
اخذت المواعين وغسلتهن
اجه ورايه للمطبخ
صبيلي بعد جاي
صبيتله وكلت للجهال يله حبايبي خل نصعد لفوك
لهسه منايمه
هزيت راسي اي
لعد انطيني الجهال خليهم يمي وروحي نامي
لا هادئين همه اكعدهم يمي ع طيور الجنه واني انام
روح اخذ راحتك ونام جاي تعبان
اخذتهم وصعدت
فتحتلهم طيور الجنه
وكلت لنور ادير بالها ع نظوري
ونمت
بس شنو ممرتاحه انام شويه واكعد شويه اباوعلهم
اخاف ينزلون لو يتاذون
لمن اجتي فاطمه اخذتهم ارتاحيت كملت نومتي براحه
كعدت لكيت الليل صاير
صليت يله نزلت
لكيت الكل جوه ملتمين وحيدر وياهم
سلمت عليهم ودخلت للمطبخ
البنات يجهزن العشه
حنان وياهن بس وجها ثكيل مااعرف لويش
يجوز لان باسني حيدر
مقبلن اسوي وياهن
كالن الغده عليج بس
كملن وبدن ياخذن للصاله
اني وياهن
الكل كعد
ردت اروح للمطبخ
عمو كال اليوم لازم تاكلين ويانه
ولتكولين مااشتهي لان من وكت اتغديتي
شفت عيون حيدر تتوسل بيه
كلت خل اكسر الحاجز واكعد وياهم
احس الكل عينه عليه ومااعرف هل صدك لو توهمات
كوه اكل حيل اخجل
نظوري بحضني اوكل بي
كملنه بعدها صبيت الجاي اني وقدمته الهم
حيدر كلي بدلي انت والجهال خل نطلعهم
بقيت محتاره ارفض لو اوافق
نور كامت تكمز من الفرحه
كلت لنظوري بيباي
هو افتهم وفرح
الجهاز بيدي دزيتله
اخذ فاطمه لو حنان بمكاني
وليش يابه
اني حيل تعبانه ونعسانه
هستوج كعدتي
بس بعدني نعسانه
اني مو هم تعبان ونعسان وراح اطلعهم خطيه
غير يوم مااكدر والله
لعد بطلت مااخذهم
لتبدليلهم
شفته ضاج عافنه وطلع
كوه كدرت اقنع نور مانطلع اليوم
بالليل نفس روتيني اليومي
الجهال ب1 ينامون
اني تجيني فاطمه نبقى نسولف شويه
وبعدها تروح
ومرات تجي يمنه زهراء
وره ماانيم الجهال الهي نفسي بالموبايل اراسل اخواتي لو بالفيس
بعدها التفتت لصلاتي
صارت ب2 اجاني اشعار
الووو
نايمه كاعده
كاعده اصلي
راح اصعد افتحي الباب
اوك
كلت خلي يصعد لازم افهمه ابد مااحب يتقرب عليه ابد
اجه دخل للغرفه
مو كلتي نعسانه اشو لهسه منايمه
اصلي يله انام
لعد ليش مرحتي خطيه ضاجوا حيل
حيدر اتمنى تفهمني وراح اكون صريحه وياك
مااحب اصعد بالسياره وياك
ولا احب تتقرب عليه
واتمنى ماتجبرني ع هذا الشي
لاتنسى اني مااصلح اكون الك لازوجه ولا ام
اني مكاني هنا مربيه وبس
لاتنسه اذيتك اليه
اني صحيح مسامحتك ع كلشي سويته بيه
بس مستحيل اكدر انسى الاذيه
خلصتي كلامج
اي
لعد اسمعيني
حيدر : من وصلت ولكيت زينب منتظرتني
حسيت ملكت العالم كله
اجمل شعور انتابني بذيج اللحضه
اتقربت عليها وبستها
نسيت الوعد ونسيت المكان الي احنه بي
اتمنيت يتوقف العالم بهاي اللحضه
حسيتها ذايبه بين اديه
ثواني وبدت المقاومه
حاولت تبعدني عنها
بس اني ولا كانو
يمكن نفسها انقطع
فجأه سمعنه صوت حنان
هسه وكتج بنت الكلب
زينب اختفت باللحضه
اشو حنان كلبت الخلقه
شنو هاي شوكت اجيت وليش ماادري
وليش زينب فتحت الباب
بمكان ماتستقبلني بالاحضان
ادور زلات
يعجبني مااكول لاحد حبيت افاجئكم اكو مانع
شمعنى هي تدري
يعجبني بس هي تدري
وليش اتبوسها
اني هنا نفذ صبري
شنو ولج ليش ابوسها
غير مرتي لو نسيتي
قابل صاحبتي وتحاسبيني
وخل يكون بعلمج حتى اذا صاحبتي ماالج حق تحاسبيني
لا شنو ماالي حق
من اجيت وخطبتني كلت مريضه ومانعني الدكتور اتقرب الها
حنان روحي منا لا ارتكب جريمه بحقج وحق محمد
جاي من الضيم وتتلكيني بالطلايب
عفتها ودخلت ع اهلي
حيل مشتاقلهم
ذبيت نفسي ع امي دنكت ع ايدها وراسها ورجلها
خطيه بس تبجي
رحت سبحت وجنت حيل جوعان
ذيج يمكن زعلت يطبها مرض عفتها واجيت لاهلي
لكيت امي تسوي بالزوري
لعد زنوبه وين
كاعد تخبز بالحديقه الورانيه
شنو تخبز منين تنور
كالت هي طلبت من ابوك وجابلها
فدوه اروحلها اكيد ع مودي تدري بيه نقطة ضعفي الخبز مالت البيت
رحت يمها وجان الوجه طماطا
ماقبلت تخبز وخاصه بهيج وقت
الحر مو طبيعي
حسيتها منتهيه
كملت وراحت صبتلي
كل الاحبه مخليته بالسفره
لبن وخضره وطرشي وزلاطه
اكلت هواي يمكن طلعت فرق ال 20 يوم
هي صعدت
كملت وجان ينزلون حبايبي مشتاقلهم موت
طبعا نظوري حبي اله ميفرق عن ابني ابد
احس نفسي اني ابو وهو ابني
عمري ماحسبته ابن اخويه
بس بالبدايه لان جنت شاك بي
مجلبين بيه خطيه
بعدين فاجئتني من كعدت وتاكل وحسيتها ممتقيده
بس خطيه مبين عليها النعاس
لان لهسه منايمه
اني صحيح تعبان ونعسان بس كلت اهون منها
ردت اخذ الجهال بس مقبلت
هي صعدت واني رحت لبيتي
لكيت حنان مطيتني ظهرها ونايمه
كلت بكلبي يطبج مرض
شكد احتقر نفسي من فكرت بيها ك زوجه اليه
اني عفت الجوهره الي يمي
ورحت الها
من تزوجتها لليوم ايام معدوده الي مريحتني من صدك
رغم ماراتب عدها تاخذ مني مصرفها كامل
ولايوم فكرت تسالني ليش ضايج
شنو الي مشتهي شنو الي تحبه
نمت باللحضه غفيت لان تعبان
ماطولت لان دك عليه محمد
رحت شفتهم وجنت حيل مشتاقلهم
هو وامير وفطومه
بقيت وياهم فتره
سولفنه بس اني نسيت الكاميرا الي مقابيل البيت
زفوني زف محمد وامير
لك شلون تبوسها بره ماتستحي مو عيب عليك
يوووه لحكتوني ع هالبوسه
تعالو منو كلكم
ولك والكاميرا نسيتها
ضربت ع راسي اهووو شلون نسيتها
والله لو تدري يمكن متراويكم وجها
محمد كلي تعال سولف شنو هالتطورات
تعال سولفنه شلونها الحياة وي اثنين
ولكم هم حاسبين ع المتزوجين
اشو ذيج تلكتني بالمشاكل وليش تبوسها
واني ابدلتي
وهاي الثانيه اذا بستها يصير عليه يوم قيامه واضحك
اي عيني اطرد عيون
وبعدها رحت للحلاق
رجعت بالليل وزنوبه ماالها اثر
كلت لامي خطيه لتعبوها
لان البيت مليان نسوان غيرها
حنان دزيتلها رساله كومي وي البنات مو بنت وزير ويجيج الاكل جاهز
جهزن الاكل ونزلت زنوبه
ابويه طلب منها تتعشه ويانه
وفعلا كعدت
اني عيوني عليها
الصراحه ممصدك الي ديصير معقوله كاعده ويانه
كملنه رغم ماتعبان بس كلت خطيه الجهال خل اطلعهم
اتوقعتها اتروح وكلت اتغيرت من ناحيتي بس طلعت متوهم
رفضت ورغم ماكتلها مااروح
عادي عدها مغيرت رايها
حيل ضجت وروحي طلعت
اتمنيت تكلي اروح وغيرت رايي
بس ولا كانو
رحت للبيت ولكيت حنان سابيه الدنيه
لبس ومكياج ومخليه نغمه هادئه
ضحكت بكلبي كلت منها من الشيطان نادرا هيج تسوي
بس يجوز خافت من زينب لا تاخذني منها 🤣🤣😂😂😂
اتقربت الها حنان بس مو بلهفه ولا اشتياق
بالي يم زينب
سبحت وراسلتها وصعدت يمها
اني متاكد متنام اله وره الصلاه
صعدت واتفاجأت بردة فعلها
يعني رافضتني ومستحيل تتقبلني
بس اني مستحيل استسلم
ابقى وراها لمن اخليها تتقبلني وبارادتها
حجت وكتلها كملتي
كالت اي
كتله لعد اسمعيني
اني مااجيتج حتى افرض نفسي عليج
ولا اريد شي منج
كل الردته هو مصلحة الجهال خطيه
عبالي انطلعهم ونونسهم
وكتلج قبل بساع وراح اعيده الحجي
اسف ع كلشي حجيته وع كل جرح جرحتج
بس ياريت بعد متجذبين وتكولين مسامحتك
واني عند وعدي للموت مراح اجبرج ع شي ابد
عفتها وطلعت
وروحي طلعت من الدنيا
رحت نمت
وثاني يوم كعدت كلت لحنان جيبيلي الغده لهنا
مابيه حيل اروح هناك
اتغديت هنا والعصر رحت لجماعتي
اتعشينا وسهرنا مثل كل مره
وهم شربت بس قليل
بيومها جايبينه بنات مستحيل الواحد يكدر يقاومهن
بس اني الصراحه كامت تلعب نفسي من هاي السالفه
كمت بس اشرب وارجع
مااعرف شنو السبب
والكل يحجي عليه واني قافل
صدك اخر موقف بيني وبين زينب جان صعب عليه احسها هانتني
بديت اتجاهلها
ولا كانو موجوده
الجهال طلعتهم مره بوحدي
ومره اني وامير
ومره اني وحنان
قله اتواجد يم اهلي
اكثر المرات امي تجيني وابويه
ومحمد وامير
قرب موعد التحاقي ورجعت الكابه عندي
جنت اتمنى اطلب منها تسويلي كليجه وهذا الي مدري شنو
حتى اخذهن ويايه يفيدني
بس كرامتي متسمحلي
اتفقت وي حنان وامي وابويه يروحون لايران
بس لازم بنفس اليوم الي انزل بي
لان وره زواج فاطمه مباشرتا يسافر امير وزوجته
بعد منو يبقه يم زينب
لازم بيوم الي انزل همه يروحون
كتلهم 20 يوم ضبط ابقى هناك وال 21 انزل
ودعت فاطمه خطيه بعد اسبوع لزواجها
وقبل التحاقي بليله جنت متامل تجيني وتنطيني الكليجه
ولو اي علامه مسويتلي ماكو
ولا شميت ريحة الكليجه
كلت خليها ع راحتها
وبنفس الوقت ضجت لان محاولت تحجي ويايه ولا حاولت تشوفني
للصبح ماكدرت انام
بس اشرب جكاير بقيت بالحديقه
اتمنى تسامحني وتعيش طبيعيه وياي
اتمنى ارجع الكيها تضحك بوجهي
الصراحه لحد هاي اللحضه اني مشايفها تضحك ابد
ولو اعتقد السويته بيها مو هين حيل ذليتها وهنتها
مشكلتي اتعلقت بيها حيل
احس راحتي يمها
يمكن احبها يمكن اعشقها مااعرف
كل الي اعرفه راحتي هي
افرح من اشوفها
بقيت حسبه تاخذني وحسبه توديني
وهاي الثوله حنان ولاكانو رجلها واريد التحق
لا سالتني محتاج شي
اسويلك شي
اهم شي انطيني فلوس قبل لا تلتحق خاف اروح لايران
كتلها لعد ورواتبج وين
ماعليك بي راتبي اني اريد احس متزوجه ومصرفي ع رجلي ممعتمد عليه
يابه دطيري انت وراتبج ماعندي هسه
عود اخذي من راتبج وبعدين انطيج
بقت تحجي ولا اهتميت
اذن الاذان وصليت
واتسللت للمطبخ حتى اسلم ع اهلي
سلمت ع امي وبست راسها وايدها
وطلبت منها الرضا وهي تبجي خطيه
وابويه كذلك
كلت خل اصعد ابوس الجهال واودعهم خطيه
مدري كلبي مينطيني اروح بدون مااشوفها
صعدت ودكيت الباب ماكو جواب
دخلت وجان ماالكيها
بوست الجهال بس دخت
وين ماهي
اخاف بالحمام
دكيت الباب وفتحته وجان انصدم ...........
مساء الخير ع اجمل متابعين اتمنى لكم قراءه ممتعه
🌹🦋 البارت 32 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
حبيباتي بالنسبه لشبيهة زينب ذكرت بالحقيقه هواي احلى مالكيت الها شبيها ابد بس هذه اقرب وحده لملامحها العيون نفسهن والشعر نفسه بس طويل والرشاقه نفس الشي
اهواي كالن عليها مو حلوه تبقى بالحقيقه احلى بهواي وارجع واكول الناس اذواق وكلمن اله ذوقه الخاص
وجان انصدم ماكو ماهي بالحمام (ليش تفكيركم منحرف )😂😂😜
عبالكم غير شي
لعد وين راحت
جوه ماكو كلت يجوز يم فاطمه
عفتها ونزلت
وجنت ضايج لان راح اروح بدون مااودعها
ردت اطلع من باب المطبخ
وجان انصدم بيها مجهزتلي الريوك والجاي
سلمت وردت السلام
فرحتي متنوصف ابد
وبنفس الوقت دوختني بتصرفاتها
من ناحيه تقوم بواجبي وشنو الشي الي احبه تسوي
ومن جها ثانيه تبتعد عني ومتريد تتقربلي ابد
لويش تعبتي نفسج وباقيه لهيج وقت
هو اني اصلا يوميه ابقى كاعده لهيج وقت
صبتلي جاي وكعدت اتريك واني مدنك ابد ماباوعتلها
بس الصراحه ع اعصابي
كملت وغسلت واتصلو بيه وصلوا
ديري بالج ع الجهال
وروحي للحنه وللزواج مالت فاطمه
سكتت محجت شي
اني متاكد مراح تروح
طلعت وجان تصيح ورايه
هاي العلاكه نسيتها
اخذتها ع السريع وخليتها بالجنطه
شكرا وديري بالج ع نفسج والجهال
طلعت ورايه ورشت مي وانطلقنا للتاجي
وصلنه وفتحت الجنطه جنت متلهف اريد اشوفها شمخليه بالعلاكه
العلاكه حيل جبيره وثكيله
فتحتها وجانت بيها كليجه كميه جبيره
ونفس هذا الي مسويته مااعرف اسمه
ومخليتلي عسل علبه ولب جوز كميه
ضحكت هالمره ممخليه كرزات
بس والله الصراحه احسن من حنان بميت مره
حتى لو تكرهني اهم شي ذكرتني
حيل افرحت وبديت دوامي بنشاط وحيويه
اتصلت بمحمد وطمنته
بده مشوار عملي وخلصت ال10 ايام بتعب وارهاق
ثاني يوم كان استراحتي
فعلت النت
اتصلت بيهم كلهم
بس هي لا
كلت بلكي تحن عليه تشتاقلي
بلكي هي الي تتصل
بس ولاكانو
لليل اني انجبرت اراسلها
لان مينطيني كلبي
احس مشتاقلها حيل
الوووو
الوووو
شلونج زينب
الحمد لله وانت
تمام الحمد لله
الجهال شلونهم
زينين الحمد لله
اتزوجت فاطمه
اي
رحتي للحنه
لا
لويش
هيج ميعجبني اطلع
العن الساعه الشفتج بيها شكد عنوديه لخاطر ربج
مجاوبت شي
اهلج شالو
اي
اكيد هم مارحتي الهم لهسه
اي مارحت
لويش يابه ان شاء الله هم راح تقاطعين اهلج
لا مو هيج بس منتظرتك تراسلني حتى اكلك واروح
هنياني عليج اي والله
لج شنو انت من طينه
اني مو كتلج اذا شالو روحي
خفت لا تسويلي سالفه لان ماكتلك
اللهم طولج ياروح
يعني متعرفين تخابريني تراسليني لو حرام
مو كلت خاف مشغول وماعندك مجال
اي عادي حتلو من يصير عندي مجال اقره
شنو انت متضوجين من كعدت البيت
بس الله اليعلم شكد عانيت وشكد اتاذيت من كعدت البيت
بس اكدر اكول هسه اتعودت وكرهت الطلعه
شنو نسيت نفسك من منعتني اطلع من الباب
شنو الغيرك هسه
ولو يمكن جنت فكر بنت فكر ماالي حق اطلع
بس هسه من تحسنت حالتنه اختلف الوضع
احسها سجينه ودجتني بيها
صدك اني منعتها لان جنت اشك بيها بالبدايه وبعدها كمت اغار مااحب احد يشوفها مو لان فقيره والله
جاوبتها
خل يكون بعلمج اخر همي الفلوس
متهمني ابد
بس جنت بالنسبه اليه غامضه
ومااعرف علاقتج باخويه الله يرحمه شنو
من عرفت الحقيقه تغيرت نظرتي الج
مو الفلوس الغيرتني
بس اني بالنسبه الي مراح يتغير شي
لابعلاقتي وياك ولا بالطلعه
ابقى بالنسبه الك فكر بنت الفكر وذيج الساقطه الي اهم شي عدها الفلوس
ولتنسى اني الكذب عندي يمشي وي دمي
تدرين بنفسج الي يحجي وياج تزيدين همه وتكصرين عمره
متريحينه ابد
لج والله صارلي 10 ايام بالظيم
وحبيت احجي وياج حتى يخف همي وتعبي
بس انت بالعكس زدتيلي همي
كتلج اسف والله اسف
وداعت نظوري متندم حيل ع السويته بيج
اتمنى تسامحيني
هيج ابساطه
تذكر من تهمتني بالسرقه
تذكر من طردتني من البيت
لو لا هاي كلها هيج
تذكر من من ضغطت ع نفسي واعصابي
وبدلت واجيت وقررت افتح صفحه وياك
لخاطر الجهال
وانت شسويت هنتني وطردتني وفضحتني كدام الكل
تذكر من كتلي انت متصلحين لا ام ولا زوجه
فعلا بهاي وياك حق
اني اصلح مربيه وبس
لان صدك مستحيل اصلح زوجه لان هاي السالفه ماابالي ابد
لو تذكر من تشك بيه وي اخوتك تخاف احاول اسوي علاقه وياهم
انت حتى لبيت محمد متقبل اروح
شاترجى منك بعد
لعد شكد حاقده عليه انت وتكولين مسامحتك
اي مسامحتك صدك مجذبت عليك
بس مو معناها اتقبلك زوج الي حقيقي
لا انت بالنسبه الي ابو لابني وبس
يعني هذا اخر كلام عندج
اي اخر كلام
ولتشوفني معاملتي وياك هيج
والله وي الكل اني هيج
الصراحه انت واخوك حولتوني لحطام
خليتوني شبه انسانه
خليتو حياتي بدون معنى
الشي الوحيد الحلو بحياتي
نظوري ونور
الصراحه حيل ضايج من نفسي
صدك حجيها صحيح
اني ابد مااستاهلها
مشكلتي اغار عليها غيره مو طبيعيه
وعشقتها عشق خيالي
اكوم اكعد صورتها كبالي
اكل اشرب هي ابالي
بعد مكدرت اجاوبها
كمت بس اشرب جكاير
هالمره تختلف عن اول التحاقي
جنت متلهف اشوفها
مشتاقلها حيل
بس هسه لا حيل خجلان منها
واستحي ارويها وجهي
راسلت امير وجان مسافر
امي وابوي وحنان حاجزين بيوم نزولي يسافرون
ام حنان وابوها واختها وياهم
زينب : من حجيت وي حيدر كام يتجنبني
وكمت اشوفه صدفه بالبيت
بين الضايجه وبين الفرحانه
فرحانه لان مااحب يتقربلي ولا احب يجبرني اطلع ويا
بس ضايجه مااعرف لويش بالضبط يمكن لان اتجاهلني
كام يطلعهم للجهال ومتجاهلني ولا كانو موجوده
قرب موعد التحاقه
وكلت خطيه سويتله كليجه وكروسان
بس مخليت كرزات
عبالي يراسلني لو يصعد يمي ويحجي ويايه
بس ولا كانو
جهزتله كلشي وانتظرته للاذان صليت وخلصت
اخذت العلاكه ونزلت
بس مااله حس يمكن التحق حيل ضجت
حتى الريوك جهزته اله
يعني حتى مكلف نفسه ووعدني اني والجهال 😔😔😔
لحضات ودخل حيل افرحت
اتريك ووصاني ع الجهال والتحق
بعدها صعدت نمت مرتاحه
الغده ب 3 يوميه حتى عمو وخاله
اكعد ب1 اجهز كلشي
مااتعب حيل مو مثل قبل
قرب موعد زواج فاطمه
والكل يجهز ومخبوص اله اني
هالمره كلشي مجهزنه كله عليهم
والحنه بالقاعه
اني رفضت اروح للحنه
احس اكو شي بداخلي مكسور
ماالي واهس لكلشي
لااحب اطلع ولا امشي لاي مكان بس لاهلي
حسيت بنفسي مكسوره
وحياتي لا شيء
ماعندي هدف معين ابد
ولا عندي حلم
هواي اتوسلوا بيه بس اني رفضت
اصلا مااحب اروح حتى مااضوج
اشوف الكل فرحان واني لا
الكل الها حق تطلع وعايشه حياة طبيعيه
واني مبوشه وجهي ولاعبالك متزوجه لحد الان ممنضفته من الشعر
ولبسي كله مالت عجايز
حتى حلقه ملابسه ولاعندي اي قطعة ذهب
ممنوع عليه البس احمر ولا وردي ولا بنفسجي ولا جويتي
المن اروح حتى الكل يضحك عليه
هاي مرة حيدر الي اتزوج عليها لان متصلح تكون زوجه ولا ام
الكل راحن لمركز تجميل
حيل اضوج من اشوف حنان يخليها تطلع وتمشي واني لا
حارمني من ابسط حقوقي
الصراحه اكو حواجز هوايه بيني وبين حيدر
هي الي تمنعني اخلي زوج حقيقي الي
راحو ورجعوا بالليل وجانت طالعه تخبل
راوتني التصوير كله
لغوا الفكره بنفس اليوم حنه وزواج
ثاني يوم الزواج
اجتي من الصالون
وشفتها وبوستها وباركتلها وصعدت
حسيت بوحده مو طبيعيه
جانت علاقتنه قويه
ثاني يوم سافروا
خاله تبجي عليها
وتكول جنت مفاركه واحد صرت اثنين
تقصد حيدر
مااعرف لويش من حيدر ملتحق احس الدنيه فاهيه
ماالها معنى
مااعرف شاسوي بالوقت
وره يومين اهلي اجوي لبيتهم
وبدوا يرتبون
طلبوا مني اجي يمهم بس اني رفضت
كلت اكل لحيدر يله
اخاف يسويلي سالفه
كتلهم بس اكول لحيدر اجيكم
اتمنيت بس يخابرني لو يراسلني
لان حيل مخنوكه محتاجه اطلع
طبعا منطين السياره لبابا
كلي اني اجيكم اذا تردين تجين
امير سافر هو وزوجته
حسيت بخنكه مو طبيعيه
لان ماكو احد بعد يلهيني
جنه نكعد ونسولف اني وهي وفاطمه
سجلوا وي حمله عمو وخاله وحنان لايران
مدة 16 يوم حتى للشمال يروحون
صارله 11 يوم من التحق
بالليل وراسلني حيل افرحت وعبالك ردت روحي الي
بس حسيته هيج المواجع عليه
حسيت نفسي لعبه بين ادي
شوكت ميعجبه يرميني
وشوكت ميعجبه يقربني
اني متاكده منه من جنت فقيره وحالتنه ع كدنه
ميشرفه اكون زوجته
ولا عرفني ع احد من اقربائهم
دائما من يجونهم اختفي
اخاف احد يعرفني
بس هسه من رجعو بيت جدوا حق بابا
وصرنه زينين
بده يتقرب عليه حتى يتباها كدام الناس
مستحيل حيدر يحبني لو يفكر يحب
هو انسان مغرور واناني يحب نفسه وبس
والاهم من هذا كلشي يشرب
ويدور بنات ليل
ابد مو من ثوبي هو
اني لازم افكر بنفسي لحد هنا وكافي
دفنت نفسي عدله
لازم اداعي بحقوقي
اريد اكمل دراستي واشوف مستقبلي
والبوشيه لازم انزعها
اريد اخذ حريتي اطلع امشي حالي حال البقيه
من يرجع افتح الموضوع ويا واذا مقبل
اطلب الطلاك وشيريد يصير خل يصير
اكيد اذا يحبني مثل ميدعي راح ينفذ الي طلباتي
وهاي ابسط شي اداعي بيهن
ثاني يوم خبرت بابا يجيني حتى اروح ويا
دزيتله رساله
راح يمرلي بابا واروح ويا
شكد ابقى يمهم وارجع
دزلي ع راحتج شكد متبقين ابقي
فعلا اجاني بابا ورحت ويا
اتفاجأت بالبيت يخبل
صحيح مساحته صغيره مو جبير 200 م
بس بناءه يخبل وماما مرتبته
الكل ذوق ماما
البيت يجنن
بي غرفه وحده جوه واستقبال حيل جبير
ومطبخ حار وبارد
وحديقه زغيرونه
وصاله جبيره
فوك بي 3 غرف
المطبخ يفتح النفس يخبل
مختاره ماما كله اوف وايت وبنفسجي فاتح
الحديقه بيها مرجيحه
وجايبين زحليكه زغيرونه ع حساب نظوري
نور ونظوري ماادري بعد بيها
كله وي رقاوي
كلي بابا اريد اعزم اهل حيدر عيب منهم
لازم يجون كلهم
كتله محد موجود بس محمد وزوجته وعمو وخاله وحنان
كلي مو مهم باجر نسويلهم عشه
كتله اوك
فعلا جهزنه كلشي اني وماما والبنات
واجوي كلهم
بابا منطيهم العنوان ومنتظرهم
حنان مخلت مكان يعتب عليها مشافته
حتى لفوك صعدت
بس رسل لا اجتي ويانه تساعدنه
حيل حبابه
اتعشو وخلصو وبقوا لوقت متاخر
بعدها رجعوا
كال عمو اتغير موعد سفرنه
قبل ليجي حيدر بيوم
وشايلين هم الج
كتله عمو ماعليه شي مااخاف ومحمد يمي ماعلينه
وهو اصلا حيدر يجي الظهر
ويجوز اجيب رقاوي ويايه
بعدها راحو
اني بقيت اسبوع يم اهلي
حيل اتونست وغيرت جو
بيت عمامي كامو يجون
اتعرفنه ع بنات عمو وعمه
بس الشباب ابد منختلط بيهم
بيت عمو كاعد يلمحون يردون يخطبون رنا لابن عمو الدكتور مصطفى
الكل معارض
لان بعدهي تدرس
لازم اليوم ارجع لان باجر يسافرون بيت عمو
طلبت من رقاوي تروح ويايه
وفعلا رجعنه للبيت
وجانو مجهزين نفسهم
ثاني يوم يطلعون وي الاذان
لكيت عمو مسوك اشكال واللوان
وكلي هاي فلوس خليهن يمج خاف تحتاجين شي
رفضت اخذهن لان عندي ومااحتاج شي
بس مقبل اصر اله اخذهن
ثاني يوم راحو
بقينه نايمين ل3 الظهر
بيت محمد غداهم بوحدهم اذا عدهم دوام
بس يوم الجمعه والسبت والعطله سويه
سوينه غده نواشف
للعصر سوينه كيكه بالبرتقال بعدين كتلها اخذيهم للحديقه خل يلعبون
نظوري بالدراجه يلعب فرحان
بعدها دخلو
صلينه وهم طلعنه
اجوي محمد ورسل
جبت كيك وعصائر
بقينه بره حلوه نسولف والجهال يلعبون ويانه
رقاوي حيل خجلانه من محمد
بقينه لل 10 بره
بعدها كتلهم راح اسويلكم عشه
كال محمد هنا خل ناكل
مخلين مبرده جبيره متحركه بالحديقه
الجو يخبل بيها
كملنه العشه وبقينه فتره
بعدها دخلنه جوه
كال محمد راح انام يمكم
ماقبلت كتله والله احنه للصبح منام
ماكو شي ومنخاف
فعلا راح هو ورسل
بقينه نلعب وي الجهال
لحد مانامو
رقاوي صلت ونامت
اني راسلت حيدر
سالته تنزل اليوم
كلي اي
شمشتهي للغده اسويلك
اي شي موجود عادي
مامشتهي شي
حسيت بي ضايج وميريد يحجي ويايه
نزلت للمطخ وسويت دجاجه محشيه
وسويت وياها تبسي بيذنجان
حضرت زلاطه
وخبزت من وكت
خليت من العجين ع كد 4 خبزات
كلت قبل لايتغده اخبزهن
سويت لبن يحبه بالليمون
كملت كلشي مااكدر انام لان بس انام بعد مااكعد
اتصلت بي انطاني رفض
راسلني
هلوووو
هلوووو
مااكدر اجاوب اكتبي
شوكت توصل
والله مااعرف لحد الان مداخلين المحافظه
بس توصل خبرني حتى افتح الباب
اوك
منو بات يمكم
رقاوي اختي
نظوري ونور نايمين
اي نايمين
وانت هم لهسه منايمه
اي
ليش
مو كملت الغده اخاف انام وبعد مااكعد
البارحه كعدنه ب3
واذا فد مصيبه الغده مانمتي
لا شنو السالفه اتغده وانام
اهلي شوكت راحوا
البارحه وي الصلاه الفجر
هم خابرتيهم
اي كل شويه يخابرني عموا خطيه
عليمن تتصلين بيهم
ع الواتساب
شنو متصلو بيك
لا ماعندي واتساب
من ارجع ادخله
روحي نامي اذا تردين
لا متسوه راح اصلي
هم مشتهي شي حلو حتى اسويلك
والله تنقذيني اذا تحضريلي عصير طبيعي وبارد حيل حيل
لان الجو حيل حار والمي مكاعد يرويني
تدلل هسه اسويلك
بس شتحب من عصير
شعندج فواكه
عندي موز وبرتقال
اثنينهن مااحبهن
اكو بطيخ
اي
لعد سويلي منه
اوك
بعدنه شويه وندخل
اذن راح اصلي ومن توصل رمشلي
اوك
صليت وكملت
سويت العصير وكثرت ثلج وخليتله حليب وعندي كازوا مكسرات
طلع يمي يمي 😋😋😋 طيب حيل
صارت تقريبا ب1 اتصل بيه
رحت فتحت الباب
لحضات ودخل
طبعا يجي حيل تعبان ومتغير بشكل
مبين دوامه متعب
سلم عليه بس سلامه ابرود
مو مثل ذيج اجازته
الحمد ع السلامه
الله يسلمج
بيدي العصير
جان الجو حيل حار لان نهاية شهر الثامن
شربه كله وكلي
شكرا وعاشت ايدج
هذا الحجي بعدنه بالحديقه
اصبلك بعد
لا خل اسبح يله
اوك
راح سبح واني جهزت العجين
صارن 4 خبزات
رحت بسرعه خبزتهن محسيت بيهن ابد
لكيته منتظر بالمطبخ
منو كلج تخبزين بهالحر
مو هواي بس 4
سكت
اصبلك
ياريت لان حيل جوعان
صبيت التمن وطلعت الدجاجه من الفرن خليته فوكاها
وصبيت التبسي
والباقي كله جاهز
تاكل هنا ع الطبله لو بالصاله
لا خلينه هنا مابيه حيل بعد اكوم
المطبخ نظامه حار وبارد
البارد بي سبلت
يعني عادي نكعد بي لان بارد
جهزت كلشي وخليتله الخبز حار
بس اشو مكاعد ياكل
رحت احمي الجاي
اني عيوني كامت تلزك من النعاس
يمكن الواحد كمت اشوفه اثنين
بس استغربت من مااكل
شنو معجبك الاكل
متحبه
شنو معجبني هو بس الترتيب وحده كافي يفتح النفس
لعد لويش متاكل
امتانيج تاكلين ويايه
الصراحه اني حيل جوعانه واحبها لهاي الاكله هواي
بس استحي اكل وحرت شاجاوبه
ها مو مااشتهي
عفيه تعاي اكلي ويايه مااعرف اكل بوحدي
كلت خل اكعد قابل ياكلني
جبت خاشوكه الي
حسيت بي فرح
ليش متنزعي للحجاب والله ذبحتيني بي
محد بالبيت هو بس اني وانت
مو متعوده
اذا انت تصلين وتخافين الله
شلون تلبسينه وزوجج ميقبل
بصفتي زوجج ممنوع تلبسينه كدامي
ومراح اسامحج اذا لبستي
وراح اشكل ذمتج
نزعته للحجاب
وجنت حيل خجلانه
دائما اضفره صفح
لان طويل حتى ميضوجني
اي هسه احسن الج
كلي اقسميها الدجاجه
نص اني وياج
ونص لاختج والجهال
ماعليك بيهم اكل انت واشبع
همه يحبون التمن والتبسي
مااخذ حجي
قسمها وكلي روحي رجعيها للفرن خلي تبقى حاره
رجعتها واجيت
كعدت مقابيله
وبدينه ناكل
رغم ماجوعانه حيل
بس مكاعد اكدر اكل حيل اخجل منه
لج بابا اكلي جنج عصفور تنقشين تنقش
لو ماعاجبج الاكل
لا بالعكس اكثر اكله احبها هي هاي
بس مااشتهي
شوكت رجعتي
اولت البارحه بالليل
العصر اخابر بابا يجي ياخذ رقيه
ليش توديها خليها ع باجر واحنه ناخذها
نروح نبقه يمهم لليل
اوك
بداخلي فرحت حيل
لتكليلهم نجيكم حتى اطبخين غده هنا
وناخذه ونروح هناك نتغده
والعشه نسوي مشاوي
اوك
عاشت ايدج من صدك طيب
الف عافيه
اني كمت قبله
هم حاسبه نفسج اكلتي
وين راحت حنان عن هذا الاكل
جان اكلته واكلت ابو همين
بداخلي كلت حقها اذا جنها جاموسه 🤣🤣😂😂
اشو هذا ضحك
كال اذا هي جنها جاموسه تاكل ومتشبع 😂😂😂🤣🤣🤣
كمل وغسل وصبيتله جاي
كمل كال روحي اخذي راحتج ونامي
محتاج شي
يعني مثل شنو حتى اذا محتاج مستحيل تهتميلي وتسويلي الاريده
عرفت الي اباله
سكتت
ها اشوسكتي
مثل شنو حاب اغسلك ملابسك مثلا
روحي بابا نامي احسن
بس العصير وين خليتي
هذا بالثلاجه طلعته وانطيتهيا
صعدت ردت انام وجان يكعد نظوري
رجعته ونيمته همزين نام
اول مخليت راسي ع المخده باللحضه 😴😴😴😴
كعدت ع صوت نظوري
لكيت الساعه ب3 ونص ونور ورقيه كاعدات
كتلهن تعالن انزلن اصبلجن الغده
حيل نعسانه بس هم خطيه
كلت لرقيه تلبس الحجاب خاف يدخل حيدر
من عرفته جاي كالت اله اروح ماابقى
ولج مو يمنه هناك
ماعليه خابريلي بابا هسه يجيني
كوه قنعتها كتلها لليل نوديج
كلت خل اشوف حيدر
صبيتلهم الغده
كملوا وصعدنه
فدوه رقاوي خل انام ولهيهم
اوك حبيبتي ولايهمج
صدك نمت وكعدت لكيت الساعه ب9
عزه بعيني شكد نمت
لا رقيه ولا الجهال
نزلت لكيتهم ماكو جوه ولا واحد
اتصلت بحيدر
كال اني طلعتهم وراح اجيب عشه ونجي
قبل شويه طلعنه
اوك
رحت لبيته
الصراحه من اتزوج لهسه مداخله ابد
كلت لازم اغسله ملابسه والبدله
وارتبله الغرفه لان حنان ماموجوده
حيل مبهذل البيت
والغرفه متنوصف
من جان بوحده نازك بشكل ونضيف ومرتب
اكيد هاي حنان وسخه
مااندل الفرشات ملاتهم
صعدت جبت مني فرشه جديده
بدلت الفرشه وخليتله الجبتها
فتحت الشبابيك وجان تجيني كومة تراب
يمكن من اتزوجت لهسه مفاتحتهن
نزلت البرده خليتها بالغساله
نظفت الجام
كملتها ورجعتها لمكانها بس الشبابيك مفتوحه بقيتهن
رشت معطر جو عندي اسمه ايام عطره يجنن
اخذت البدله الوسخه واكو بدله ثانيه اله هم طلعتها من الجنطه
وطلعت كل الملابس الي بالجنطه وخليتهن بالغساله
رحت للاستقبال ثار انتباهي مخده وبطانيه بيهن
عرفته حيدر اكيد نايم هنا
ادري بي نظيف ومرتب حيل
وياخبل من الهوسه
بس تستاهل حيل وياك
هي هاي الفضلتها عليه
رحت للمطبخ لكيته مينوصف
بس لو تموت ماانظفه الها
بس غسلت المواعين ورتبت سطحي يعني من فوك لفوك
فتحت الثلاجه وجان انطدم
كله اكل معفن وفواكه معفنه
بقيتها ع حطتها
حتى يشوف حيدر بعينه
رجعت للغساله كملت الملابس وردت اطلعهن اشرهن
بهالاثناء سمعت صوت السياره
طلعت شفته مستغرب من وجودي بالبيت
حيدر : طبعا دوامي دمرني دمار
احسب باللحضات شوكت ارجع وارتاح
بالنسبه لحنان ولاكانو مبتعد عنها
لاتخابر لا تسال بس من عدها شغله
خابرتني كالت راح اذب العبايه هناك
كتلها العب جوله بيج اذا ذبيتيها
كامت تتوسل بالبدايه
حباب والله تبهذلني رفضت
بعدين كالت مو مرة محمد بلا عبايه وحتى مرة امير
واخواتك كلهن بلا عبي
ماعليج بيهن
ليش متكولين مرتك الثانيه ليش مبوشه
احمدي الله مخليج هيج
ممبوشج
بكلبي كلت وع شنو ابوشج
بس هيج حجيت
اسمعيني والله اذا سمعت بيج ذابتها للعبايه العب جوله
بس بالشمال حباب
ابد ولا لحضه
زعلت وطبكته
يطبج مرض
راسلت امير ع الماسنجر
ودزلي صوره حيل فرحانين
خابرت امي وابويه قبل ليسافرون
حيل ضجت من كالو قدمونه يوم
حرت منو يبقى يم زينب
حاولت انزل قبل يوم ماكدرت
خابرت محمد ووصيته عليهم
كلي تحجي صدك توصيني عليهم
اجت اختها يمها وعيب اضايقهن
وهي مقبلت ابد كالت اني كاعده للصبح
دزلي الصور كاعد يتعشون بالحديقه
حيل افرحت لان طالعه وياهم
بيوم نزولي كلت مااخبرها
خليها تنام
وعود اكل اي شي مو مهم
بس اتفاجات من خابرتني
بس مكدرت احجي
حبيت تستقبلني مثل ذيج المره
راسلتني وسالتني ع الغده
مردت اتعب نفسها
كلت اي شي اكل
وصلت وفتحتلي الباب
جنت متمني احضنها وابوسها
بس كلت كرامتي متسمحلي افرض نفسي عليها بالكوه
وشفتها رافضتني رفض نهائي
لكيتها مجهزتلي العصير الي طلبته منها
بس الطعم مينوصف ابد
بعمري وحياتي مضايك هيج عصير طيب
مااعرف شنو طعمه بالضبط
بعدها سبحت وجان اشوف البيت يلعب النفس
حتى اكو مواعين وسخه
شكد اضوج من المره الوسخه
خل تجي واني اعلمها الحقيره
سبحت وبدلت ورحت للمطبخ
مالكيت زينب
عرفتها تخبز
لحضات واجت بيدها شكم خبزه
كمت احجي عليها
كالت موهواي
جهزت الاكل وجانت الريحه تسطر سطر
اباوع ع الطبله وصفنت
شنو الترتيب وشنو النزاكه
واشكال والوان مخليه
حبيت تاكل وياي
وفعلا كعدت
بس شنو تنقش تنقش
امنيتي ترفع حاجز الخجل الي بيني وبينها
يمكن صارلها 3 سنوات وهي عدنه
بس لحد الان تخجل
طلبت منها تنزعه للحجاب
شكلها يخبل بدون الحجاب
شعرها اشكر وطويل وضافرته
كل شويه واباوع عليها
كملنه وهي صعدت
واني رحت انام حيل تعبان
ماعجبتني لا الفرشه ولا الغرفه حيل وسخه ومبهذله
لو مو تعبان جان اني اخفف الهوسه
بس حيل نعسان
تمددت ع اعصابي بالفراش
بس مكدرت انام
رحت نمت بالاستقبال
كعدت من النوم
لكيت الاذان ماذن
رحت لبيت اهلي
وشفت نظوري ونور
حبايبي حيل مشتاقلهم
حضنتهم وبوستهم
وحيل فرحانين
ورقيه همين سلمت عليها
اجه محمد ورسل
سلمت عليهم وجنت حيل مشتاق لمحمد
كال راح نروح للمطعم نتعشى
ونجيبلكم ويانه
كتله لا راح اطلعهم ونجيب سفري
طلعوا ورقيه كالت عفيه خابر بابا خل يجيني
ليش شنو ضجتي مني
لا مو هيج
لعد شنو
اني اريد اروح
باجر من الصبح نروح
اني وزينب والجهال
لا عفيه اريد اروح
يمكن العناد عدهم وراثه 🤔🤔🤔
كوه قنعتها تبقه
كتلها زينب بعدهي نايمه
كالت اي خطيه ب 4 يله نامت
لمن اتغدينه يله
خل نطلع نفتر شويه ونجيب عشه ونجي
كالت اوك
بدلت واجت حيل نازكه وبدون عبايه
الصراحه خفت عليها من العين
اكيد ياكلوها اكل هنا
مو مثل محافظتهم
رحنه شويه للمنتزه لعبتهم
وبعدها رحت للسوبر ماركت
اشتريت الهم كومه اشياء
ولرقيه اخذتلها بوحدها مقبلت
بس مو بكيفها
كتلهم شتردون عشه
كالت نور كنتاكي
لج انت شنوماعندج غير الكنتاكي
اتذكرت اخر مره من جبت كنتاكي وخلت شطه علي
كلت خل اجيب لان حسيتها تحبه
نظوري حبيبي شتريد
كال مثل نونه
وانت رقيه شتحبين
اي شي مو مهم
ماكو اي شي
اطلبي الي تحبينه
مقبلت تحجي
نوعت وجبت
بعدها اخذتهم وكلتهم موطه
واخذت وياي لزينب
اتذكرت السلاش
جبتلها ورجعنه
دخلت لجوه وجان انصدم بزينب
هاي شتسوي
انتبهت للسله بيدها
طلعت شرت الملابس
طلعت غاسله ملابسي كلهن
الي ماخذهن ويايه
ذيج اجازتي بقت الجنطه ع حطتها
لمن كتلها وره 3 ايام يله غسلتهن
كملت واجتي
كتلها تعالو هنا نتعشه
جبتلهم قواطي شاني وي الاكل
شغلنه المبرده وجان الجو يخبل
اكلنه وخلصنه
بقينه نلعب بالحديقه
بس هي اختفت
بعدها صارت ب1 رجعت للبيت
وجان انصدم بالمنظر
ياالله هاي شمسويه
البيت يخبل والريحه مالت النظافه عن بعد تشتمها
الغرفه تسطر سطر من العطر يخبل
رحت للغرفه لكيت الفرشه جديده تخبل تشبه 👇
الشبابيك مفتوحه
صحيح الغرفه حاره لان ممشغل السبلت
بس ترد الروح
رحت للمطبخ لكيته يفتح النفس
فتحت الثلاجه لكيتها ع حطتها
همزين مشايفتها
لان من صدك عيب منها
من وره هاي حنان الوسخه انحط بهيج موقف
اني اعلمها خل تجي ويصير خير بنت الكلب
دزيتلها مسج
هم اكو كيكه مسويه
دزتلي اي اكو
جيبيلي قطعه وياها جاي وتعالي
اجتي وجانت حيل خايفه
خلت الصينيه ع الطبله ورادت تروح
هاي وين تردين تعاي احجي وياج
كلتلي لحضات واجيك
مااعرف راح تهرب مني
لو عدها شي
كلت خل انتظر واشوف
اكلت الكيكه وشربت الجاي
اكيد راحت وهربت مني حيل ضجت
لحضات وجان انصدم ......
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: