#بارت انقاذ
مساء الخير ع اجمل متابعين اتمنى لكم قراءه ممتعه
🌹🦋 البارت 21 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
هذا البارت بي احداث وكلام مكرر لان لازم نذكر القصه مثل ماهي
مااريد احد يكول البارت قصير او الكلام معاد لان هذا البارت
هديه مني الكم لان لحيتوا عليه انزل مااكدر ماانفذ الكم
دخلت واتفاجأت برجال ينطي ملامح لبابا
ويا ولد شاب
كلت السلام عليكم
الكل وعليكم السلام
فتحلي ادي اثنينهن الرجال
وكال تعاي بنيتي خلي احضنج
كتله اسفه اعذرني لان معرفتك منو
كال اني عمج
بس اني ماعندي عمام ابد
بابا الوحيد ماعنده اخوان
لا عمي متوهمه اني عمج
اخو ابوج وعندج بعد عمام
الظاهر ابوج مخبركم عنه
لا بالعكس اعرفكم كلش زين
بس اعتقد الاخو الي يتخله عن اخو باصعب الاوقات
ميعتبر اخو وبالنسبه النه انتو ميتين كلكم
طفر الولد الشاب
كال احترمي نفسج واحجي عدل
الظاهر عمي معرف شلون يعلمج تحترمين الاكبر منج
علي راد يحجي عمو اشرله سكت
كتله لا بالعكس عرف يعلمني احسن تعليم
مبين واضح عليج من كلامج
مثل الي مستهزء بيه
كال نبقى اهلكم غصبا ماعليكم والرضيتو والمارضيتو
الكل صامت
اصلا ماعدنه اهل ولا يشرفنه هيج اهل
وانتو الرضيتو والمارضيتو
كال الرجال بنتي جدج وبيبيتج انطوج عمرهم
وكاتبين وصيه وذاكرين ابوج بالوصيه
وحرام ع الكل لازم انفذ الوصيه
ولازم حقكم يرجع الكم
التفتت ع عمو ابو حيدر
كتله عمو من رخصتك راح ارجع لغرفتي معايزه مغثه وجع راس
صاحني الرجال اصبري بنيتي
احنه جاين والنه امل تتصافى الكلوب بفضلج وفضل هاي الناس الطيبه
نريد بس عنوان ابوج والباقي علينه
اعذرني مااكدر انطي اله اخبر بابا يله
اتصلت ابابا
كلي الرجال افتحي حاكيه فتحت
سلمت علي وسالني عن الكل بعدين
كتله اكو رجال يكول هو اخوك
ويريد عنوانك
بابا اتخبل كال بس بابا انت تدرين بيه ماعندي اخوان
اخوتي كلهم ماتوا بيوم المات بي سيوفي
والله بابا ادري وخبرتهم
بس همه اصروا
والله يابنتي لا اعرفج ولا تعرفيني واتبره منج ليوم الدين اذا انطيتي عنوانه
بده يحجي الرجال ليش هيج خويه تحجي
بسرعه طبكته
كتلهم وهسه اني اترخص
هذا الولد يباوعلي من فوك لجوه
ردت اطلع
اشو طفر واخذ الموبايل من ايدي
انطيني الرقم واحنه نتصرف
لان الظاهر ميفيد الحجي وياج
اني تخبلت
ردت احجي
كام دفعني حيدر ورا
اخذه من ايده وكله
انت بيا حق وبصفت شنو تسحب الجهاز من ايدها
كله بصفتي ابن عمها
واذا ابن قن..... وسكت قصده قندرتها
هنا الولد اتخبل
وهذا هم تحول وحش
كله اني اتحملتك وتحملت سخافتك لخاطر ابوك ولخاطر انت ابيتنه
بس الظاهر انت مو مالت احترام
وراد يضربه
ادخل عمو والرجال
بعدين الرجال اخذ ابنه وطلع
بقه هذا يسب ويغلط
اجتي خاله ع صوت حيدر
كالت شكو
كللها هذا ابنج مسودن مو صاحي
ابد ميتفاهم بس يصيح
عباله كلشي ينحل بالصايح والقوه
عفتهم وترخصت صعدت بغرفتي
هسه شيكولون عليه مااعرف والله عيب صرت بموقف محرج
وخاصه هذا المغرور يريدله حجه عليه
ثاني يوم كعدت من وكت
خليت القوري ع النار
مر من الباب شاف ماكو احد دار وجها وراح
فوكاها هو الزعلان
بقيت اتواجد كله بالمطبخ
بس البنات هواي يساعدني ميقبلن
بس من يجي حيدر يختفن خوش يسوون
حنان مكروها ولا وحده تحبها
شايفه نفسها شوفه
بعد مرور اسبوع تقريبا سالني عمو انتو من عشيرة ال.....
اي عمو
طلعتوا عرف وماندري بيكم
شلون عمو
واحد من عمامج طلع معلم وياي
وعلاقتي قويه بي
اني اعرف اخوته بالاسماء بس الوحيد الي مسامعين عنه هو ابوج
كتله مو زعلان وياهم صار عمر
لهذا السبب ميجيبون طاريه
زين عمو ليش من اجه ذاك اليوم واحد منهم معرفته
لان مااعرفهم بالشكل
اليوم يله خابرني وعرفته
واليوم راح يجي للبيت هو واخوته
الي اريده منج ادخلين وتحجين وياهم بهدوء
بس انتو لوحدكم
حيدر : جنت فرحان بالترقيه
ورجعت للبيت والكل باركلي
لكيت فاطمه تجهز بالاكل الي
استغربت وين زينب
سالتها
كالت اليوم لهسه نايمه
استغربت
جان الاكل بايت واني مااحب الاكل البايت
بس جنت جوعان يادوب اكلت لكمتين
بعدها نزلت زينب
اشوف اهلي هواي يدافعون عنها
اشتميت ريحة طماطه كلت خل اكوم اكل وياها
فعلا كعدت بس هي رفضت تاكل ويايه
الخجل واضح عليها
جنت حيل جوعان واكلت الطماطه كلها
حيل احبها وخاصه اذا بيها دهن زايد وملح
حبيت اتشاقه وياها
كتلها اجتني عقوبه من وراج
اشو هاي فاجأتني من كلتلي
جنت سهران وسكران ومدري شنو
اتخبلت منو الكللها عليه
وهو اصلا محد يعرف بينا
احنه كلنه ضباط ونخاف ع سمعتنه
محد يعرف بينا ابد
اذا اخوتي ميعرفون هي شلون عرفت
عقلي راح لبعيد
اكيد منسقه وي واحد وينطيها معلومات عني
ضربتها وغلطت عليها
وهي ولاكانو عجيب امرها
وراها رحت جبت حنان
وسون العشه الكل كعد بس هي الوحيده ماتكعد
مرات احسها مغروره حيل وشايله خشمها
وع شنو مااعرف
ومرات احسها تخجل
وتاهت عليه الحسبه
خطيه ابويه يتوسل بيها تجي تاكل
وهي ولاكانو صدك فار دمي
خربطت بالحجي واول مره اتجاوز عليها كدام البنات
الكل ماقبل عليه ورزلوني
حتى العشه عفته ع النص وكمت
بقيت بالحديقه اشرب جكاير
والصراحه حيل اتندمت هيج سويت بيها
خطيه فشلتها كدام البنات
بس العجيب ابد متجاوبني من اعصب
لحد هاي المره ماحجيت عليها مره وجاوبتني
الى قله وجوابها يكون بكل هدوء
مستحيل راح اسامح نفسي ع السويته بيها
بقيت بره
اجتي نور وجان تضربني بكل برائه
ضحت كتلها ليش ولج
ليش تصيح ع ماما زينب وتخليها تبجي
اني مااحبك وانت مو بابا ابد
عافتني وراحت
بقيت صافن
هاي شمسويه لنور وهيج تحبها ومتعلقه بيها
اجتي حنان وقطعت سلسلة افكاري وسين وجيم
وليش هيج تحجي وياها
وابد متجاوبك
ليش علاقتك بيها منتهيه
كتلها ماالي خلكج روحي للبيت لا اذب حركتي بيج
بقت ادردم ودخلت
وره شويه وجان يندك الباب
فتحته جان ولد شاب ورجال متوسط بالعمر
هواي شبه بينه وبين ابو زينب
سلموا ورديت السلام
كال الرجال اني عم زينب
رحبت بيهم
والصراحه استغربت من جيتهم
دخلتهم وصحت لابويه واجه محمد وامير
بده يحجي عمها كال الصراحه نريدكم واسطة خير بينه وبين ابوها لزينب
اكو خلاف بينه من زمان وهسه حابين نتصالح
بس المشكله شالوا من بيتهم وبعد منندل بيتهم الجديد
هواي سالنه وماكو
والبارحه شايفين ابو زينب ابابكم من سالنه عرفنا نسيبكم
كال ابويه ميكون خاطركم اله طيب
هسه ندز ع زينب واحجوا وياها
كلي ابويه كوم بابا صيح زوجتك
رحت لفاطمه وخبرتها تصيحها
وقدمنالهم جاي
وره شويه وجان تدخل
عبالك ملاك طالعه
لابسه عبايه ومحتشمه
ياربي اذا هاي مو شريفه
لعد الشريفه منو
سلمت وجانت متفاجأه ولا كانو تعرفهم
عمها فتحلها ادي بس هي رفضت
ابن عمها مو راحه ابد
بس يباوع عليها منزل عينه منها ابد
كمت افور دم بس مااكدر احجي
فاجأتنه من حجت
جانت واثقه بنفسها وشخصيتها تخبل
عكس ويايه
اشوفها جبانه ومتحجي
اكيد لان لازم عليها لزمه وتخاف
بس هنا لا شفت شخصيتها الحقيقيه
بس مااعرف شنو سبب الخلاف الجبير بينهم
اتصلت بابوها
اكو كلمه ضلت متعلقه باذني
كال ابوها من مات سيوفي لليوم ماتو ويا اهلي
منو سيوفي
اتذكر من عندي رقم مروان الله يرحمه
وجانت زينب تتصل بي
كاتب عليها سيوفي
وبوقتها مكدرت افسر الاسم
بس هسه دخت
عيوني صارن بكصتي من سحب الموبايل من ايدها
ردت اخليلي طلقه براسه والله
بس ادخلوا اهلنه بالوقت الاخير
اخذ ابنه السكط وطلع
محد سالها ولا احد ادخل
بعدها كمت اشوفها دائما متواجده بالمطبخ
اكيد لان حجيت عليها
وذني اكيد مكيفات براسها
هي الوحيده الي عدها مسؤلية اطفال
نور ومنتظر
حجيت وي امي كتلها حاجيهن جناينج ميصير هيج
كالت يوم زينب هي الي متخليهن هنه ماعليهن
وانت بنفسك كلت مكانج المطبخ والخدمه بس
اي عادي حجيتها بحالة عصبيه
يمه ذيج مرتك واحجي وياها لدخلني ابينكم
روح كللها حجيت هيج بساعة عصبيه
سكتت بعد شاريد احجي
حجيت وي حنان
كتلها ميصير هيج روحي يم اهلي نضفي واطبخي مو تاكلين ع الجاهز
لو من باجر اجيبلج مسواك وتكعدين هنا اطبخين وتنجبين
على كيفك وياي
اشو انت الحجيت وي زينب وكتله خدامه
وهي الثانيه مصدكت وكامت بس تكرب وتخدم
اريد اساعدها متقبل شاسويلها قابل
اكثر واحد عرف زينب اني
حيل عنوديه والشغله التخليها براسها تقفل عليها
اني متاكد مثل من قفلت ع السياره ومراحت لاهلها رغم ماهي مشتاقه الهم
هم راح تعاند ومتقبل احد يساعدها ابد
بس هالمره لازم اتنازل واحجي وياها
كلت بس تصحلي فرصه احجي وياها
رجعت من الدوام صاحلي ابويه
كلي اكو معلم ويايه ويجوز تعرفه استاذ كاظم
طلع عمها لزينب
والظاهر عدهم طلابه قديمه بينهم
ومتزاعلين صارلهم سنين
وهسه حابيت يتصالحون
منتقلين لغير مكان
وممخلين احد مسالي عليهم ومحد منطيهم عنوانهم
واليوم راحوا يجون عمامها يردون يحجون وياها
هم يجي هذا السكط وياهم والله ابتلي بي
لا مااعتقد يجي
الي اريده منك متدخل بيناتهم ابد
نسلم ونعوفهم بوحدهم
اخاف يتجاوزون عليها لو يسمعوها حجايه
يابه ذوله عمامها شنو يتجاوزون
واليسمعك هسه يكول انت ولا غيرك وياها
اشو البنيه فوك ماخادمتنه بديها وبرجليها
ومربيه بنتك تربيه تخبل
تكوم تهينها وتكعد تهينها
سكتت
غيرت الموضوع شوكت يجون
كال بالليل
كتله اذا اجوي بس عمامها اعوفهم بوحدهم
بس اذا اجه واحد من ولدهم ادخل يمهم ومااعوفهم ولا ثانيه
رحت نمت وكعدت وره الاذان
صليت وخلصت
رحت يم اهلي
ولكيتها تسوي عشه
بس زهراء وفاطمه وياها
بعدين اجتي رسل وياهن
اله حنان
دزيتلها رساله تعاي وي البنات
اجتي بس بعد مكملت كلشي
جهزن كلشي وصاحونه
هي اخذت نظوري وراحت للمطبخ
نور هم كامت كالت اكل وي ماما احسن
اتعمدت كمت اول واحد
شفتها توكل بيهم
بس هي لا متاكل
من شافتني عافتهم وكامت صبتلي جاي
ردت احجي لازم اعتذر منها
كتلها اسمعيني زينب
اني
وجان تجينه حنان
هسه وكتج بنت الكلب
بهالاثناء اندك الباب وعرفتهم همه
طلعت فتحت الباب
وجانوا جايين 5 رياجيل اكيد ذوله عمامهم
وجاي هذا السكط وياهم وبعد اكو شاب ثاني
سلمو عليه ودخلتهم
صحت ابويه
كام الهم وكعد يمهم
وديت ماي وجاي
كلي ابويه روح صيحها لزنوبه
طلعت اريد اصيحها لكيتها بالباب تريد تدخل
كتلها كعدي بصفي
دخلنه سويه
سلمت عليهم
الكل كام الها بس هي فشلتهم وكعدت بسرعه
عيني تراقب ابن عمها السكط
هالمره ميباوع عليها
وهذا الثاني مبين مثقف وحباب
اجه محمد وسلم عليهم وجانت المفاجئه
الولد يعرفه محمد دكتور وياه
حجه المعلم صاحب ابويه
كللها شلونج عمي
زينه الحمد لله
ابوج شلونه
زين الحمد لله
اسمعيني بنيتي احنه عدنه اسبابنه الخاصه الي خلتنه نقاطعه لابوج
ووهذا الشي انت متعرفين بي
الي نترجاه منج تنطينه العنوان والباقي علينه
اعذرني مااكدر والله
وهاي اسبابكم الخاصه كلها اعرفها
ولتنسون بابا كلي اتبره منج ليوم الدين اذا انطيتي العنوان
كلي اتصلي بي واني احجي ويا
وانت اطلعي منه
فعلا اتصلت بي
وخبرته لحضات وانطتهيا
وبده يحجي ويا
عيني عليها ابد مرفعت راسها من الكاع
طلع بره وحجه ويا
طول بره
بده هذا الولد الدكتور يسالها
اي زنوبه شلونج شخبارج
تمام الحمد للهً
شمخلصه دراسه
مااعرف شصار بيه من كللها زنوبه
بس اسلوبه يختلف عن ذاك الهمجي
كلتله خلصت اعداديه
يعني مكمله السادس
اي كملت
وشكد جان معدلج
جان تصدمنه وتكول 98ونص
ابد ممتوقعها هيج معدلها عالي
محمد انصدم بس مبين كدام احد
شنقبلتي
مقدمت ابد
ليش حرامات
ظروف منعتني اقدم
وصادفت مرضت سيوفي الله يرحمه
الكل صاح الله يرحمه
زين ورنا
رنا انقبلت طب مرحله اولى
ماشاء الله تستاهل ورده
شكرا
بهالاثناء دخل المعلم
وجان يضحك وانطا لابويه
كله هاذا ابو محمد وياك
حجه ويا ابويه
وكله تدلل من عيوني الجمعه اجيبهم واجي
الكل فرح واضح عليهم الفرح
طبكه ابويه واتشكروا من عدنا واترخصو وطلعوا
هي كامت
رادت تطلع
كللها ابويه تعاي بنيتي عندي حجي وياج من زمان اتمنى اسالج واخاف احرجج
كال لامير صيح لامك وفاطمه وتعال
هي رجعت
كالت عمو اسال اي شي ابالك
اجتي امي وفاطمه
كال ابويه فاطمه راقبي المكان مااريد اي وحده تسمع الحجي
كالت تدلل بابا
كال اقفلو الباب
كعدنه كلنه
كال احنه مندخل بخصوصياتج انت واهلج
ولانريد نعرف اسباب الزعل
بس الي عرفته
ابوج مهندس واكبر مقاول بمحافظتكم
وحالتكم الماديه زينه
اني فكيت حلكي ابوها مهندس
وانتن بنات مربايات احسن تربيه
مو مالت تتزوجين بالسر بالهين
اني حاب اعرف الاسباب الي دفعتج تزوجين مروان وبالسر
هي كامت تبجي كالت والله ياعمو من زمان جنت منتظره هذا السؤال منكم
احسب لحضه لحضه شوكت احد يسالني
لان اني لو احجيلكم من البدايه اكيد مراح تصدكوني
وهسه هم متاكده مراح تصدكوني
احجي بنيتي واحنه نحكم
زينب : اصعب شعور من سالني عمي
هذا السؤال منتظرته صارلي شكم سنه
احنه ناس معروفين واملاكنه نص محافظتنه
بابا يملك شركات ومعارض سيارات
جدوابو ماما الله يرحمه جان غني حيل وبس ماما الوحيده عنده
بابا اتعرف ع ماما وجان اصلها تركماني
راد يخطبها بس اهله كلهم عارضو
بعدين طردوا واتبروا منه
من تزوج ماما
بعدين توفه جدوا والاملاك كلهن تحولن لماما
لحد قبل زواجي من مروان باشهر
دخل صفقه جبيره بابا وجان مجازف بيها بدون علمنه
فجاه خسر الاول والتالي
راحت الشركات والمعارض والاملاك بلمح البصر
وصابته بابا جلطه
جان بوقتها ياخذ اجايز دائما بدون راتب
وي خسارتنه
اني جنت سادس بوقتها
ومخلينه بوقتها بابا سياره خاصه تاخذنه وتجيبنه
من الباب منطلع ابد
كوه كدرت اركز والحمد لله نجحت وبمعدل عالي بس مافرحت
لان بوقت غير مناسب جانت
جان عندي اخ وحيد بكلية الصيدله مرحله ثانيه
فجأه بده يتخربط علينه
اخذه بابا وعرضه ع الدكتور واكتشفنه عنده عجز كلوي
بعنه الاثاث ومبقه شي علينه
حتى البيت بوقتها جان مرهون وخلال سنه لازم نطلع
بابا احتار باخويه من طبيب لطبيب
طلبت منه اشتغل حتى اكدر اساعدهم
لان حالتنه ادهورت حيل
كوه قبل بابا
عن طريق بنيه صديقتي اتوضفت وي مروان الله يرحمه
جنت حيل مؤدبه والكل يحترمني
بس من شافني اتخبل
بده يتجاوز عليه ويتحارش بيه
ردت اعوف الشغل كله وابطل
بعدين اعتذر مني
وكال هذا اختبار الج
شغلني سكرتيره عنده
وجنت ملتزمه بشغلي
وجنت محتشمه ومكدر يتجاوز عليه ابد
لان وكفته عند حده
بس اخويه حيل اتخربط
وكالو لازم تتبرعوله بكله
وباسرع وقت والافضل باربيل
جنه عاجزين بذاك الوكت
كلت لبابا راح اطلب من المدير سلفه واسددها من راتبي
فرح بابا كال ياريت ونساعد اني وياج ونفكهن
كال ارجع للوضيفه واشتغل العصر
رحت اله وجانت المفاجأه تنتظرني
احجي وابجي كوه مسيطره ع نفسي
انطوني مي وكلي ع كيفج لتستعجلين
كتله طلب مني انام ويا بالحرام مقابل 15 مليون
غلطت علي وهنته اهانه تسوه عمره وحياته
وبسقت بوجها بوكتها وهو ضربني
وبقه يكولي ساقطه لو ماساقطه مشتغلتي وياي
رجعت لاهلي وجانت احلامنا محطمه
كتلهم المدير مسافر وميرجع قبل اسبوع
واني اخذت اجازه
مااكدر اواجهم واكللهم الحقيقه
بوكتها بابا اصر اله يروح لاهله لان حالتهم زينه
رفضنه بوقتها بس مقبل
راح ورجعنه وجان مكسور كسره حتى بخسارته مشفته هيج
بقه مروان يدزلي رسائل ويستفزني بيهن
بس هم ماسكتت اله
اخر شي الدكتور كال بعد ميتحمل استعجلو
بقيت حايره مااكدر اسلم نفسي بهاي السهوله لمروان
ولا كدرت اشوف اخويه الوحيد يموت كدامنه
دزيت رساله اله
وكتله خل نعقد سيد
ونتزوج بالسر
رفض وبده يغلط عليه ويشتم
ثاني يوم قررت اروح بنفسي ومستعده اتوسل بي
ع حساب اخويه
رحت وطلبت منه
وشرط عليه شروط
نبقه مدة شهر
وشوكت ميريدني كون حاضره
وميريد احد يعرف كائن ميكون
اني وافقت لان مابيدي حل ثاني
كلت احسن من الحرام
مجنت افكر بنفسي وبلي يصير بيه اذا اهلي عرفوا
اهم شي ممسويه شي حرام ويغضب ربي
وانقذ اخويه بنفس الوقت
ثاني يوم اتكلف مروان كلشي دزوا لاربيل هو وبابا وكادر كامل
واتزوجنه اني ومروان
بس فاجأني بمعاملته
ابد متقل عن معاملت اخو ابو نور
حيل هاني وحسسني اني ملكه ولعبه بين ادي
بس المفاجأه جانت بانتضاري
بعد يومين من زواجي وجان يخابرني ابويه ويكلي مات سيوفي
هنا اني فقدت كمت ابجي وبحركه
كلي عموروحي غسلي وبعدين نكمل
كتله لا احب افرغ هموم السنين الراحت
راحت تضحيتي كلها وراح مستقبلي وياها
معرفت بوكتها راح اخسر هواي اشياء
امانه مروان اتكلف كلشي مراسم الدفن والفاتحه
بسه بقه يجبرني ابقه وره الدوام حتى محد يشك بيه
كلت لابويه زاد شغلي ساعتين وراتبي راح يزود
كمنه نداوم وبعد الدوام نروح للبيت
ابد معاملني معامله حلوه
اني جنت ماخذه احتياطي ابلع حب بوقتها
وجنت متاكده مراح يصير حمل
خلص الشهر ورفض يطلكني
واحتارين شلون راح اخلص روحي منه
بس بيوم الي اتوفه بي مروان
حسيت بي انسان ثاني وجان يعلم راح يموت
لان لاول مره يعاملني ك بشر
ويتمنى يطلب رضاي
يكلي اموت اني بلياج
اتعودت عليج وحبيتج
فجأه اتخربطت ووكعت
وطلعت حامل
اني انصدمت وهو اكثر
بس هو فقد ويايه وكام يضربني وااذاني حيل
كلي اني ميصير عندي جهال هذا ابن منو
حلفتله والله محد لامسني غيرك
وكتله اشو اني مكابلتك هنا ومن ماهي يبقى يتصل بيه كل شويه
بعدين اعتذر مني وكام يتاسف
كال راح احاجي اهلي واجيبهم واجي اخطبج
بس خاف اموت امانه تسمي منتظر
خابرتو وطلبتو منه يجي
وهو مقبل ابد
كال اريد اشبع من ابني
بس لحيتو علي
وراح بس فرحان
وكل شويه يتصل بيه
كتله خلي عينك ع الطريق
كلي لج الواحد جم موته لازم يموت هي وحده
واني اليوم فرحان ميهمني لاموت ولا غيره
كلي سامحيني زينب اذيتج هواي
هاي اخر كلمه سمعتها منه
انتبهت عليهم الكل يبجي حتى حيدر
اول مره اشوفه يبجي
بوقتها رغم جبروته وشخصيته بس حسيت بضعفه
وكمت ابجي ليل نهار
اني مهمني نفسي
لو ما حامل جان بقيت مدى العمر بلا زواج
بس صارت روح ابطني
وهواي وصاني علي قبل ليموت
حرت شاسوي ووين انطي وجهي
ماكدرت افكر احجي لاهلي
لان بابا اكيد ميتحمل الصدمه
لان هواي تعبان ع تربيتنه
اظطريت للمره الثانيه اتوسل بشخص الي هو ابو نور
والباقي انتو تعرفونه
بس والله ياعمو اني شريفه ونزيها ومو لمصلحتي الشخصيه قبلت اتزوج بالسر
ولو ما شريفه جان سقطته للطفل وعشت حياتي مثل البقيه
كلي عمو زين اهلج شلون قنعتيهم
كتله كلت لبابا يردون الفلوس اهله
لو يزوجوني لابنهم
الكل عارض وبابا مقبل
بس اني قنعتهم كوه
الصراحه اتندمت لان اتزوجته لمروان واكيد راح تستغربون
تعرفون ليش
لان زواجي بالحلال خلاني مو شريفه بعيون البعض
وخلاني اسقط وحده
اني لو موافقه ع عرضه لمروان ومقضيه ليله وحده بالحرام
جان طلعت شريفه وماكو اشرف مني لان مشيت بالحرام
بس هم ارجع واكول تضحيتي جانت جبيره
بس مو لخاطر احد لا لخاطر ابني
مستعده اعيش وياكم حالي حال الخدامه
ومااطلع من الباب
ولا افكر اكمل دراستي
بس ع مود سري ميطلع
ومحد يروح بيها غير ابني
اكيد اذا نكشفت حقيقتي يجوز اهلي يكتلوني لو يتبرون مني
عادي اموت يطبني طوب
هو حياتي هسه ماكو فرق عن موتي والله
بس هل ياترى ابني راح يكدر يواجه المجتمع من يكبر
اكيد الكل يستهزء بي
ويكلوله انت اكيد ابن حرام لان امك كتلوها اهلها
هاي كل قصتي وبعد مااعرف راح تصدكوني لو لا
عمو كام باسني بكصتي
كلي بنتي اشرف واطهر وحده انت
عاشت ايد الرباج
والله يابنتي لو هاي التربيه لو لا
خاله كلبتها مناحه ع مروان
كلي عمو روحي بنتي لابنج وارتاحي
وجهزي نفسج يوم الجمعه اخذج وياي لاهلج ابقي هناك وارتاحي
شكم يوم
حيل فرحت
من حجيت حسيت براحه نفسيه
احس هم وانزاح من صدري
صعدت ولكيت فاطمه تبجي
الظاهر سمعت الحجي كله
صعدنه لفوك
كالت ليش ماحجيتي قصتج النه
مو محد فكر منكم يسالني
وكلت بس احجي محد يصدكني
والله لو حاجيه الله شاهد اول وحده اني اصدكج
بقينه نحجي شويه وراحت لغرفتها
نيمت الجهال
فجأه اندك الباب
عدلت حجابي
وجان اشوف حيدر كبالي
دخل جان يكول .....
مساء الخير ع اجمل متابعين اتمنى لكم قراءه ممتعه
🌹🦋 البارت 22 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
قبل لاابدي فدوه اروحلكم بعد لطالبون بارت مفاجئ لان كاعد اضغط ع نفسي الله شاهد
الاحداث بدت تحله اكثر واكثر والنهايات كلهن راح تكون نار وشد اعصاب وراح تشدكم اكثر وكل بارت راح يكون احلى من الخ بس اصبروا ولتستعجلون
ارجع واكول الاحداث بدايتها هاي هواي مفاجئات وهواي مواقف بالانتظار
وبالنسبه للصور مااكدر انزل لان هواي اشخاص بالقصه الهم دور بعدهم مظاهرين مااكدر انزل لمن يكملون الاشخاص يله انزل
انتظروني
جان يكول لا عبالج صدكتج وصدكت فلمج هذا
اني اكثر واحد يعرفج انت اكبر جذابه
بس الصراحه اهنيج ع هاي القدره الي تكدرين تقنعين اكبر واحد بجذبج هذا
ابو نور الصراحه راسي حيل يوجعني والبيه مكفيني
مابيه حيل اسمع اهاين ومغثه
الصدكتني والماصدكتني ميهمني ابد
لان انت اخر همي
حيدر : زينب تحجي واني مدري شصار بيه
وي كل كلمه احس كلبي يوجعني عليها
هواي نضلمت وهواي اخذت غيبتها
من كالت اشرف من الشرف مجذبت
اطهر وحده شفتها بحياتي
باصعب ضروفها مسلمت نفسها
ولا قبلت بالحرام ابد
يعجز لساني عن وصفها
جنت متوهم من كلت عليها ماتصلح ك زوجه ولا ك ام
بالعكس افضل واروع ام بالدنيه
حجيها صحيح تكدر تتنازل عن ابنها
وتشوف حياتها وتتزوج
بس هي مقبلت ابد
اني الغبي الي حتى من تحجي وي اخوي امير اشك بيها
طلعت اشرف مني بميت مره
صدك مااستاهلها ابد
اني عار ع المجتمع
اني سكير ونسيواني
وهي اشرف من الشرف
بس شنو الفايده ضلمتها وخلص
شبهتني بمروان
وفعلا اني اقرب واحد لشخصية مروان
اثنينه نفس التفكير ونفس الاسلوب
هواي ضالمها مروان
وهم شاك بيها وباخلاقها
يعني ميفرق عني
تضحيتها جانت جبيره
وعرفت ليش مروان مسميها سيوفي ع اسم اخوها الله يرحمه
اني متاكد منه هو جان يحبها ويعشقها يجوز
بس لان جرحت كرامته وغلطت علي حب يعاملها هيج
مثلي بالضبط
جنت اميل الها بس كبريائي يمنعني
لان ممعبرتني ولا تعترف بيه
مااكدر اوصف شعوري بهاي اللحضات ابد
هي تحجي وتبجي
اتمنيت امسح دموعها بيدي
تمنيت احضنها واخفف عنها
بس ماالي حق ابد
دموعي كامن ينزلن
جنت حيل متعلق بمروان
من حجت علي هيجت المواجع
اباوع الكل يبجي
هيج انسانه كون نقدسها مو نهينها
اني مااعرف شنو العمه ع كلبي
مجانت عندي ثقه بيها
لان جانت موجوده من كلي مروان هي الاجتني برجليها
عبالي من ذني الساقطات
ولان حالتهم الماديه موشي
كلت اكيد جلبت بينه ع الفلوس
وماانسى خيانة زوجتي السابقه ام نور هواي اثرت عليه
خلتني اشوف الاغلبيه مو شريفات
وبحكم شغلي وقضايا الفساد الي تجيني هم خلت ماكو ثقه عندي
لليوم هي متجاهلتني
لليوم مخالفت رايي
لا بلبسها ولا بطلعه ابد
كلشي الي اطلبه منها مجاب
مايوم فكرت تتقرب عليه
اكيد لو مو شريفه عدها 100طريقه تكدر تجذب اكبر رجال وخاصه اذا زوجته كانت
بس هاي لا جانت مبتعده مني اكثر من مااني مبتعد عنها
لهاي اللحضه مطلبت مني لافلوس ولا ملابس بس اول مره
من طلبت منها تنزع الاسود ومقبلت بملابسها
اني رفضت وجنت اكبر غبي الصراحه
هستوني يله فسرت هواي شغلات جنت دايخ بيهن
ابوها الي جان مثقف بشكل
اخواتها وهدوئهن وخجلهن
هي الي ابد متاكل ويانه
جانت حيل خجوله
ابد ماعدها نوع من الغرور
رغم مجانت تكدر تفتخر بشهادتها امامنا
بس لليوم مذكرت هي شمخلصه
وعرفت شنو السبب الخلاها متصعد بالصدر ويايه
هاي عزت نفس يسموها
خلت الكل مصدوم وطلعت
جنه واحد يباوع بوجه الثاني
اخر شي حجه ابويه
كلي لهنا وتسوي حد لتصرفاتك وياها
هاي اعرفنه حقيقتها شنو
لتضل تجلب بنت الفكر وبنت الفكر
ولتكلها كلمه والثانيه ساقطه وكح.....
اني ساكت منطقت ولا بحرف
احس بنفسي مبنج اشوف بس مااكدر احجي
اني ساكت منطقت ولا بحرف
احس بنفسي مبنج اشوف بس مااكدر احجي
وكال املاك مروان كلهن من حقها هي وابنها
البيت نتازل بي الها
وفلوس الشركات مالاته تصير باسمها
طلعوا امي وابويه
بقه محمد وامير
حجه وياي محمد
لك معقوله انت اثول لهيج درجه
شكد صارلها هنا البنيه
معرفت تسالها تحاجيها
والله عبالي من البدايه محاجيها
وهي الي معترفه بلسانها
مو شريفه لو غير شي
امير اكتفى بالصمت
اني كذلك
اني كذلك
والله حرامات ضيعت مستقبلها بيدك
اخوك خطأ انت شبيك الثاني
مااكدر انطق ولا حرف
عافوني وطلعوا
بقيت بس اشرب جكاير
اجتي حنان وسالتني
كتلها مابيه شي
روحي نامي لتنتظريني
عافتني وراحت
ردت حجه اصعد يمها
ومااعرف شلون احاجيها
وهل ياترى اذا اعتذرت منها راح تقبل اعتذاري
بعدين كلت اريدها هي تحجي
اريد اخذها للنجف لقبر مروان ولقبر اخوها
واخليها تحجي وتفوخ الي بكلبها
بس متاكد مراح تروح ويايه طلعت بسالفه وكلت خل اسوي نفسي ممصدك بيها ابد
وراح اخليها تراويني تاريخ وفاة اخوها
ع اساس وي تاريخ عقدهم
فعلا دخلت وحجيت وياها
وجانت ولا مهتمه
وتكلي الصدكتني والماصدكتني مو مهم اخر همي انت
جاوبتها بس اني يهمني اعرف الحقيقه
وشراح تفرق الحقيقه
تفرق هواي
بس اني مراح تفرق عندي
اجيت لهذا البيت بصفت خدامه ومربيه
وراح ابقى كذلك
مو مهم هذا الحجي
اثبتيلي الحقيقه
وشلون اثبتلك
اخذج للنجف لقبر اخوج
واشوف تاريخ الوفاة
واقارنه وي تاريخ العقد مالتكم
بس اعتقد كلت مالكيت عقدنه ابد
لا لكيته بعدين
عادي اخذني وشوف
بس من هسه اكلك مااروح وياك وحدنه لو شيصير
شنو معقوله تخافين مني
لا مو هذا قصدي
اني اعرفه قصدها بس سويت نفسي مااعرف
مااصعد وياك بالصدر ابد
والله نعلتي ابليسي من وره الصدر
نمشي بوحدنه واصعدي وره ماعليه بيج
شوكت تاخذني
باجر اخذ اجازه وارجع نروح
عفتها وطلعت
رجعت وكوه كدرت انام
ثاني يوم اخذت الاجازه ورجعت
لكيت امي مجهزه نفسها
ايا ملعونه اتغدت بيه قبل لااتعشه بيها
جان ابالي بوحدنه نروح حتى اخذ راحتي اعتذر منها
اطلب السماح بس طلعت اذكى مني
ومجهزه نور ومنتظر
كتلها ذوله وين يردون
كالت ويانه غير
كتلها شنو رايحين نتونس مثلا وناخذهم ويانه
بس مااكدر اعوفهم ابد
والله يبهذلونه
كالت خل فاطمه تروح ويانه
بعدني منطقت ولاحرف
اجتي ذيج مبدله
تكول كلبي علمني راح تاخذوني
لهذا السبب جنت جاهزه قبل لتكلولي
حنان لهسه نايمه ومتدري بعد احسن
رحنه امي صعدت بالصدر والكل وره
الجهال نامو
وفاطمه كذلك
امي همين وراهم هم نامت
هي عيني عليها مبين رغم ما مبوشه منايمه
كتلها ليش منمتي
كالت لا منعسانه
شنو فرحانه الظاهر
اكيد فرحانه لان راح اثبت صحة حجيي واشوف زوجي واخويه الله يرحمهم
مااعرف شصار بيه من حجت هيج
كتلها بس خل يكون بعلمج اني مصدك كل كلمه حجيتها
شنو كول والله
اي والله
لعد ليش جبتني
حتى تشوفيهم وترتاحين
سكتت محجت
بس ليش الجذب جان كتلي واني اروح وياك
اول شي محد علمني ع الجذب غيرج انت
وثاني شي متاكده لو كايلج ترحين وياي
سكتت
كتلها لتحجين بعد
انت تندلين اخوج لو هم مثل بيتكم
لا اندله
بالبدايه جنه كل يوم جمعه نروح للمقبره
اشتريت فواكه ثواب الهم اثنينهم
وصلنه اول شي رحنه لاخوها
وخرت البوشيه وفعلا اندلته بالضبط
جانت صورته جبيره مخلينها للقبر
وجان شاب يخبل الله يرحمه نسخه من زينب
وفعلا التاريخ فرق يومين يمكن او 3 ايام
هي هنا فقدت
كامت تبجي بس بهدوء
كعدت بصفه
ليش هيج سيوفي لك ضحيت بعمري كله ع مودك
لك وقعت ع موتي بيدي بس ردتك تعيش
ليش هيج سويت بينا
اتمنيتك هسه عايش وتشوف اختك شصار بيها بعدك
انذليت واني الجنت عزيزه بجالكم
انظربت وانهنت واني الجنت محد رافع صوته عليه
بعدك كمت اكوم اكعد يكلولي فكر بنت الفكر
يجوز انت متت وارتاحيت من هاي الدنيه الغبره الي مترحم احد
بس اني لا بقيت والهم راكبني من راسي لرجليه
دمار دمرتني والله
احتقرت نفسي وكرهته
جبت مي ورشيته ع القبر وقرينه الفاتحه
وزعنه الثواب وجانو قله ناس لان صادف يوم اثنين
قرت قران عفناها ع راحته لمن شبعت
رحنه بعدها لمروان وجنت حيل مشتاقله
وصلن من بعيد ونزلت دمعه مني
نزلنه اول شي قريت الفاتحه
وكمت احجي بكلبي
والله مستحي منك
ذليت مرتك وهنتها وشلعت كلبها
اسف مروان والله ماجنت اعرف الحقيقه
امنتني وخنت الامانه
بس والله انت الوصلتني لهيج
انت الطعنت بشرفها امامي
سمعتها تحجي وي القبر
تكله مروان اسفه لان امس كلت متندمه ع زواجنه
لا بالعكس مامتندمه تدري ليش
لان حصلت اغلى شي واعز شي عندي بالدنيه
ابنا نظوري
صحيح من يوم الشفتك لليوم ادمرت حياتي
اخذت هواي مني
اخذت حريتي واخذت مستقبلي واخذت ضحكتي والاهم من كلشي اخذت استقراري
بس بالمقابل عوضتني عن الاهم
انطيتني نظوري
جابت نظوري وتكله بوسه هذا بابا
هو يكلها لا هذا بابا حدر عود حيدر
هم رشينه مي وقرينه قران ومشينه
كالت اتاكدت من التاريخ
محاجيتها شي
بعدها رحنه للامام
زرنه وصلينه وارتاحينه
الجهال وكلناهم بالطريق
التفتت عليهن
هم ترحن للسوك
لان غدانه بشارع الروان مو هنا
فاطمه طفرت اي
وانت زينب
لا مااروح اني تعبانه وماالي خلك
كلت لامي روحي انت وياها
وجيبن حلويات وياجن ودهين بس اله من احمد الياسري
كالن ماشي
انطيتهن فلوس
اخذن نور ونظوري وياهن
بقينه بوحدنه
ومااعرف شاحجي وياها وبيمن ابدي
ليش مارحتي وياهن
لا مااكدر اروح
كتلها ممكن سؤال
اي تفضل
اي تفضل
ليش محجيتي قصتج من البدايه
لو حاجيه جان محد صدكني
ليش محد يصدكج
هسه وحد صدكناج
اي وحد
هسه عاشرتوني وعرفتوني
مو مثل الاول
زين هم حبيتي لمروان
اجذب عليك اذااكلك حبيته
اصلا جنت اموت منه واحقد علي
بس اخر يوم لا سامحته ع كلشي سوا بيه
زين هم راح يجي يوم وتسامحيني ع السويته بيج
لا مستحيل اسامحك انت
ليش شنو الفرق
هواي فرق
مروان الله يرحمه اني الي غلطت علي واتجاوزت علي
يله اذاني
بس انت لا شنو عذرك
سكتت
وهي همين
لحد هاي اللحضه محجت من وحدها
اله واحد يسالها
اسف ع كلشي سويته بيج
بس اسفك اجه بعد فوات الاوان
حيل اتاخرت
رجعن امي وفاطمه
وكالن يله
ورحنه لمطعم دائما اني وجماعتي ناكل بي
بشارع الروان
اكلهم نضيف ومرتب
كلمن طلب اله
هي كالت مااشتهي
مو بكيفج سفر وطريق
طلبت الها
اكلنه وهي من جوه البوشيه كوه تاكل
كتلها انزعي البوشيه
كالت لا عوفني هيج
مااكلت هواي
خلصنه ورجعنه من وكت
وصلنه واتفاجأت حنان بينه
استلمتني تحقيق
وين وليش ماادري
كتلها رحنه للمقبره
ردت اخذج وياي بس شفتج نايمه
سكتت متنفست بعد
كال ابويه راح اروح وياهم الجمعه واخذ زينب فرد مره
خل ترتاح
كتله حتى اني اروح وياكم
لان مستحيل اخليها تروح بوحدها
اخاف من هذا السكط يسمعها حجايه
كال الله كريم
جماعتي اكلو كلبي ع الغده
وطلبوا مني اسويلهم كيكه بمناسبة الترقيه
وحاير اكلها لو لا
اخاف تاخذها بغير شي
بعدين كلت خليها مااكللها
طلبت من فاطمه تشوفلي وحده من الفيس تسويلي
كالت بسيطه بس شوكت تريدها كتلها بكيفها الاربعاء لو الخميس
والعزيمه راح ااجلها هسه
الاربعاء بالليل جابتلي الكيكه فاطمه
وجانت صدمه الي ام 3 طبقات تخبل مثل 👇
سالتها ع السعر كالت ب250 الف
اصلا سعرها رخيص
لان كوه قبلت خلال يومين تجهزها
لان هاي حجز وعدها طلبيات كون
اقل كيكه عدها ب50 الف
يعني تحجين صدك انت لو تشاقين
والله مااشاقه
روحي طكي راسج بميت حايط انت وياها
اخذيها مااريدها
مااجيتي وكتيلي السعر
ردت بس وحده مو 3 طوابق
اكو هاي الي بيها ملابس عسكريه
كلش حلوه يجيبوها الضباط
واني شمدريني بيك
هسه اخذها
لج كولي غيرها غير انتحر
اصلا سعرها رخيص
لان كوه قبلت خلال يومين تجهزها
لان هاي حجز وعدها طلبيات كون
اقل كيكه عدها ب50 الف
يعني تحجين صدك انت لو تشاقين
والله مااشاقه
روحي طكي راسج بميت حايط انت وياها
اخذيها مااريدها
مااجيتي وكتيلي السعر
ردت بس وحده مو 3 طوابق
اكو هاي الي بيها ملابس عسكريه
كلش حلوه يجيبوها الضباط
واني شمدريني بيك
هسه اخذها
والله اكعد اكلها هسه
روحي اكليها
لك المن تريد الفلوس عصه صاير
قحط 250 لاشيء بالنسبه لراتبك
او كش منج خليتي عينج عليه
الساتر الله منج
ماعليه هسه انطيني بس 200 وامري لا الله
دخذيها وخليها ع حالها
انطيني 150
لج انت مخبله اكيد شنو كاتلي سيد واخذها ب150
اخر شي انطيني 100 بس وربك بعد ماانزل
شنو ولج ماخذه ربح 150 مني
لج قطاطه انت درجه اولى
والله ماانطي بيها غير ال50
يعجبج يعجبج
ميعجبج اخذيها
لا اقبل جيب ال 50 وتعال اخذها
لازم اكو انه بالموضوع
هاي الكيكه مو مالت 50 ابد
وهاي فاطمه لو تموت متجمل فلوس منها
كتلها شويه واجيبهن الج
اجت نور سالتها
ماما زينب هم سوت كيك لو لا
كالت اي امس سوت واليوم كعدت زينتهن فوك يمنه
اني اعلمج فاطمه
بس الصراحه تبهر ولا اتوقعتها هي مسويتها
بعدين شلت هم شلون راح اخذها
رحت للمطبخ وكلت خل اسالها شلون اخذها
واخاف تفلت الطوابق
اجتي فاطمه
ها وين الخمسين
لج تردين تقطيني ب250 همزين اعترفت نور بكلشي
ايا كلبه اني اعلمها
بس معليه والله لازم تنطينياهن
صارلي يومين الهي بجهالك
كتلها انطيج بس بشرط
كليلي شكد تكاليفها ومنو دفعهن ومنو جابهن الجن
كالت اول شي وصينه امير جابلنه وثاني شي هي دفعتهن
والسعر مااعرف
كتلها هاج هاي 100 تنطيهن الها وكليلها ماياخذ الكيكه اله تاخذين الفلوس
ايا خبيث اني كوه الخمسين دفعهن الي ويكلي غاليه
وهسه طلعت بعد 100الها
اسكتي عيب منها فوك تعبها وخسارتها
راحت واجت رجعتهن كالت هاك وهي راح تراسلك
دزتلي صوره 👇
اعذرني مااكدر اخذهن الفلوس لان اني ماابيع كيك
بس تكدر تعتبرها هديه مني الك بمناسبة العقوبه العفو اقصد الترقيه
عرفتها تقصد من رزلتها
بس هاي فلوس المخاسير
المخاسير كلها متجاوزت ال 25 لان اغلبية المواد عندي
ميسون اخذهن
لعد خل تجي فاطمه تاخذ الكيكه
مااريدها ابد
مجاوبتني
اجتي فاطمه كالت ماتقبل والله وتكول ميسون
خل تاخذ بس المخاسير ال25
لحضات واجت اخذت الفلوس
دزيتلها شكرا وتعبتج ويايه
لا شكر ع واجب
كتلها ممكن تنزلين شويه
كالت اوك
اجتي كتلها شلون راح انقلها واخذها
اخاف توكع الطوابق مني
لا ابد معليها ثبتتها باعواد خشبيه
ومن تردون تكصصوها وخروهن الاعواد
يعني اخليها بجنطة السياره ماعليها
هو الافضل اذا احد يلزمها
اخاف تتاثر بالطسات مالت الشارع
شلون تعلمتي هيج تسوين
من زمان عندي هوايه بس طورتها اكثر من اليوتيوب
وداخله كروب تعليم
عاشت ايدج من صدك فنانه
شكرا
زين وين اخليها للصبح
فرغ الثلاجه وخليها بيها
تكدرين تخليها يمج افضل لباجر ارجع يجوز ب10 اخذها
اي عادي
اخذتها وصعدت
اني الصراحه خفت من حنان لو تاكل منها لو تخبث
ثاني يوم رجعت وجبت ويايه شرطي حتى يلزمها
وخابرتها بالطريق
وصلت ولكيتها جاهزه
ومخليات وياهن هي وفاطمه
جكليت وكرزات ومواعين وشوكات
ع كل ماعون مكتوب مبروك الترقيه
الصراحه اتفاجأت
وانطتني ورد ارشه ع الميز
خليتها وره والشرطي لازمها
كتله اسجنك مؤبد اذا صار بيها شي واضحك
كمت امشي تاته تواته 😅😅😅
اخاف عليها
بالطريق اخذت ببسي وعصائر
وصلنه بسلامه
المركز كله اتجمعوا بغرفتي
خليناها ع ميز
رتبت كلشي بنفسي
حيل متفاجأين وممتوقعين هيج اسوي
دزيت ع الكل وحتى الرتب الي اعلى مني
الكل اجه وباركولي وقطعنه الكيكه
كلش حلوه صارت
طالبوني بعد بعشه
كتلهم اوديكم بالمطعم
مقبلو كالو نريد اكل بيت
كتلهم ميخالف
كلت خل نفض شغلت عمام زينب وبلكي ترجع مطول يم اهلها
لان محد ادبرها غيرها
الصراحه امي مو هاكد اكلها طيب
شاطره بالتمن والمرك والدولمه
وهم نموت من الضحك ع شكل الدولمه
الدولمه الوحده بيها نص كيلو
تلعب بينه جوله من نقلد تكول اهم شي الطعم
بس زينب فنانه بمعنى الكلمه
مااعرف بالضبط شنو الي اسوي للعزيمه
كلت بعدين وتصفه
الخميس بالليل اتصلوا بينه عمامها واتفقنه ع الوقت
كالوا ب8 نطلع
كلت خل احجي وياها بلكي تقنع نروح قبلهم
اخاف يحتاجون شي وماعدهم احد
واكيد راح يكون الغده يمهم
دزيتلها مسج
نروح قبلهم وره الصلاه اخاف يحتاجونج اهلج
لا ماكو داعي اروح وي عمو فرد مره
وماعدهم شي اهلي
ع راحتج
شكد عنيده بس الصراحه حبيت عنادها حيل
حنان هواي تدخل وتسال
كتلها اريد ادزها لاهلها وابويه عنده شغل راح اخذه وياي
وقتت المنبه ونمت
كعدت لكيتها جاهزه
بس لابسه عبايه
حتى الريوك جاهز
كللها ابويه ليش لابسه عبايتج بعد وكت
كالت احسن
عرفت اكو شي بالموضوع
باوعت عليها لافه نفسها لف
انتظرت ابويه يطلع واحجي وياها
كمل ريوكه وطلع
كتلها وين نظوري ونور
كالت نايمين بس جاهزين ومبدلتلهم
كتلها اصعدي كعدي نور
صعدت وصعدت وراها
رادت تكعد نور كتلها اصبري اريد احجي وياج
التفتت عليه
كتلها انزعي العبايه خل اشوف لبسج
كالت ها لا مااكدر
شنو السبب الي يخليج هيج لافه نفسج
ليكون لابسه ملابس نوم
لاوالله شنو تخبلت
لعد خل اشوفج
لاحضت خدودها صارن طماطه من الخجل
لا عفيه والله ملابسه شي مو لائق
لعد ليش تتهربين
الصراحه لابسه بنطرون وقميص طويل
لعد ليش خايفه انت مو لابسه عبايه
وخريها العبايه خل اشوفج
ها الصراحه لابسه قميص احمر
ماما جابته اليه من اجتي
وكلت عيب ماالبسه
اي وشنو المشكله
مو انت منعتني من اللون الاحمر
اي صحيح منعتج بس يم اهلج انت حره شتلبسين البسي
ماعليه بيج
وهسه وخريها العبايه خل اشوف لبسج
وخرتها العبايه
ياالله ع النزاكه مو طبيعيه
الاحمر وي بشرتها غير
عود ياهو اليجي ويلبس احمر
يخبلن عليها
لابسه بنطرون اسود بوري وقميص احمر
ولابسه حجاب احمر واسود
من تتبوش اكيد ميبين الحجاب
تعرفين ليش مانعنج من اللون الاحمر
كالت لا مااعرف
لان الاحمر وي بشرتج خطير
يعني حتى الحباب تجبرينه يصير وكيح
تجذبين الواحد غصبا ماعلي
اتقدمت عليها تدرين طالعه تخبلين احجي واتقدم عليها
وهي راحت ع السريع كعدت نور
كامت تصيح جنها مخبله 🤣🤣🤣🤣
نور اكعدي
خطيه نور كعدت جنها مخبله
ليش هيج سويتي
سكتت
دك ابويه عليه وكلي يله تعالوا
اخذت نظوري بيدي
وهي اخذت الجنطه همزين هالمره مو علاكه
رادت تنزل
كتلها مااخذتي للبنات حلويات
لاماكو داعي داعي ميحبن الحلويات
نزلنه كتلها عدلي البوشيه وخل انطيج نظوري
شغلت السياره وكعدت بيها وي نور
كتلهم هسه اجي نسيت شغله
رحت اخذت علاكه وخليت بيها حلويات ونزلت
طلعت السياره ورحنه
متواعدين يم السيطره الرئيسيه
وصلنه انتظرنه دقايق
وجان ننصدم بعدد السيارات
يمكن 7 سيارات او 8
وياهم ولد شباب هواي
سلمو علينه وانطلقنه
وكفوا يم استراحه وطلبوا من عدنه ندخل للمطعم
رفضنه لان جنه منشتهي
حاولت احسبهم لازم ننطيهم علم بالعدد
اخاف الاكل ميكفي
الكبار بالعمر 10 والشباب 7 يعني 17 واحد
اخذولنا ببسي ومي وانطلقنه
كلت لزينب خبري اهلج بالعدد اخاف محاسبين حسابهم
زينب : حيل ضجت من حيدر من كلي اريد دليل وانت جذابه
قررنه نروح للنجف واثبتله
طلبت من خاله تروح ويانه وحيل فرحت
وفاطمه كذلك
بس بعدين كلي جذبت عليج حتى اخذج للمقبره
حيل افرحت لان من زمان مجايه لاخويه
اما بالنسبه لمروان ولا مره جايته
حسيت هم الدنيا كله انزاح من كلبي
صدك لو كالوا
لو ضاقت بكم الصدور عليكم بزيارة القبور
فعلا ارتاحيت حيل
واتغيرت نفسيتي
رغم ما مبوشه بس نفست عن نفسي شويه
رجعنه للبيت
بعدها اجتي فاطمه كالت ولج عندي صفقه الج تخبل
شنو
اكو احد طلب مني ابحثله بالفيس عن وحده تسويله كيكه
وهذا الشخص طاك وشكد منطلب منه ينطينه
منو هذا الشخص
معليج انت
شكلولج عليه ابيع كيك ولي عني
لج لتصيرين ثوله
هم نغير جو ونتلها بيها
وهم نحصل خوش فلوس
اني راح اكون مساعدتج ونص بالنص
ضحكت عليها وتحجي من كل عقلها
كتلها منو هذا الشخص
كالت مو اخاف اكلج ومتسوين
ليش
مو هذا الشخص غثه وتكرهينه
اكيد تقصد حيدر
بس اني مااكره احد
كولي والله
اي والله
لعد انت شكد فطيره
لج والله لو اني منج جان متحملت هذا الغثه
جان سممته بالليل واخلص منه
كتلها شنو من كيكه يريد
كالت اترقه وصار رائد
هاي شوكت
بيوم الي رزلج تذكرين
كلت بكلبي لعد ليش يجذب عليه ويكلي اتعاقبت من وراج
كالت خل نسويله شي مميز وحلو
منو يجيب المواد
اكتبيلي واني اخلي امير يجيبلي
ردت اسويله بعجينة السكر احلى واضبط
بس فاطمه كالت لا كريمه اطيب وتطلع احلى
بقينه بيومها بس نبحث باليوتيوب
اخر شي صفيت ع هاي جانت نازكه وسهله
يعني نقشتها بسيطه
كتبت لامير
كريمه ام الكيلو وحشوه توفي ومواعين بيهن كتابه وشوكات
بعدين كالت خل نوصي ع جكليت وكرزات
والباقي كلشي عندي
اني من جنت عند اهلي جايبه هواي اشياء فورمات وبسمار للورد
جبت ويايه شكم وحده المهمات بس
اللوان عدنه بالبيت
والقوالب كالت فاطمه اني اجيب من رسل
فعلا راسلتها وكالتلها تعاي اخذي الي ترديهن
ثاني يوم بلشت بيهن بس شوي وبردتهن لثاني يوم
كملنه الغده وصعدت
نور ونظوري هادئين بس افتحلهم طيور الجنه لو توم وجيري
ينسون ارواحهم
الجو بارد ساعدني هواي بشغلي
خليت الصوره مقابيلي وسويتها بالضبط
جانت النتيجه مفرحه حيل
انسى نفسي بشغل الكيك
اني صحيح احب الطبخ بصوره عامه وجميع الحلويات احب اشتغلهن
بس تزين الكيك لا غير
انسى نفسي وانسى همي واني اشتغل
كالت راح اخذ منه 250
ضحكت عليها شدعوه هاكد تاخذين
انت ماعليج الج الصافي
لا اني مااريد ولا ربع
لعد كلهن الي
راحت وره شويه اجت وجها عابس
ها بشري
كالت لج فد واحد قبيص راد ينجلط من كتله 250
بعدين كتله انطيني 100 هم ماقبل
اخر شي كوه طلعت ال 50 منه
تعرفين ليش
لان عرف انت سويتيها
شلون عرف
نور كلتله
اجت نور كالتلها فاطمه انت منو كلج تكلين لابوج هاي الكيكه احنه سويناها
رادت تخنكها وهاي تضحك تكلها هو سالني
قابل تردين اكذب علي
ولي لو تموتين مااخذج لحفل التخرج مالتي
حتى اخلي بابا يكتلج
دطيري انت والبابا
وره شويه نزلت واجتي تضحك
هاج 100 الج واني 50
لج خل نفتح مشروع اني وياج
زوج الي تفتح عياده وتضحك
كتلها رجعيهن مراح اخذ ولا ربع
كالت غير اخنكج
مامحتاجه ابد والله لو اموت مااخذ ولاربع
حاولت تقنعني مقبلت
دزلي مسج
واني هم دزيتله وكتله اعتبرها هديه مني
كالت اصر اله تاخذيهن
كتلها جيبيهن واخذيهن الج
خليته بالثلاجه
اجه ثاني يوم وانطيته الكيكه والحبشكلات
بعدين اتذكرت انطيته الورد الطبيعي ابو العطر اليابس
كتله من ترتب الميز انثر علي
اجتي فاطمه والظاهر داخله ع صفحته
كالت تعاي شوفي
انتبهت ع صفحته كاتب عليها اسمه الحقيقي ولقبه
شفت صوره وهو يلبسوني الشعار
وصوره وهو يكص الكيكه
حيل مرتب الميز وجانت الكيكه تخبل
هواي طاك صور
قبل لااروح لاهلي طلب مني نروح قبلهم اني مقبلت
مااريد اصعد ويا وهم ذوله الاطفال يتبهذلون حيل
ماما خطيه من اجتنه جايبه ملابس لنور ولمنتظر
وجايبه اليه همين
قميص احمر وبطرون اسود
حيل خايفه البسهن اخاف ميقبل
واني متاكده ميقبل لان هواي حذرني من الاحمر
واستحي من ماما ماالبسهن
كلت خل البسهن بس مااخلي يشوفني ابد
فعلا لبستهن بس هو حس بيه
وحرجني اله انزع العبايه
حيل اخجل منه رغم مااني جان لبسي عادي قبل لااتزوج
ابد ممتقيده شالبس البس قبل زواجي
مرات البس قصير ويا بوت
بس هسه اخجل من هيج لبس
معارضني همزين
بس ارتبكت من كلي الاحمر يخبل عليج
اكيد نيته مو صافيه لازم انقذ موقفي
رحت كعدت نور خطيه بقوه
طلعنه بس انصدمت من شفت السيارت حيل هواي
اخاف اهلي محاسبين حسابهم ونتفشل كدامهم
كلي حيدر خابري اهلج وانطيهم علم عددهم 17 واحد
فعلا دكيت ع بابا وجان ابد ماكو رد
هواي لحيت علي بس هم ماكو رد
اتصلت بماما هم كذلك
اخواتي همين محد يجاوب
حيل خفت وقلقت
كتلهم ماكو جواب
لحضات وجان ........
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: